ʼE FAKAMATALA ʼi te Tohi-Tapu ni aluʼaga kehekehe ʼae neʼe hae ai e ʼihi ʼonatou mutu ʼi meʼa. ʼE lagi mata faikehe kia tatou ia ʼaho nei te faʼahi ʼaia. Kaʼe neʼe ko te faʼahiga fakaha ʼaia ʼa te kau Sutea tonatou lotomamahi, mo tonatou ita, mo tonatou fakalainoa pea mo tanatou putu.

Ohage la ko Lupeni, “nee ina hae leva [tona] kofu” ʼi tana mahino ʼae ʼe mole ina lava haofaki tona kiʼi tehina ko Sosefo he neʼe kua fakatau ko he kaugana. Neʼe toe hae e tanā tamai ko Sakopo ia tona kofu he neʼe manatu ia neʼe matehi e te manu fekai ia tona foha ko Sosefo. (Sen. 37:18-35) Neʼe toe feia mo Sopo, neʼe ina “hae” tona kofu ʼi te fakaha age e tana kaugana kua mamate tana fanau fuli. (Sopo 1:18-20) ʼI te tahi lakaga, neʼe alu te tagata mo tona kofu “mahaehae” ki te Pelepitelo Lahi ko Eli ʼo ina fakaha age te ʼu logo fakamamahi ʼaeni: neʼe to te kau Iselaele, neʼe mamate ʼona foha ʼe tokolua pea neʼe ʼave fakamalohi te aleka ʼo te fuakava. (1 Sam. 4:12-17) Pea ʼi te fagono ʼae ʼa Sosiasi ki te ʼu folafola ʼa te Lao, neʼe ina vetevete ai te ʼu hala ʼo tana hahaʼi ʼo ina “hae leva [tona] kofu.”—2 Hau 22:8-13.

ʼI te fakamauʼi ʼo Sesu, neʼe “hae” e te Pelepitelo Lahi ko Kaifa tona kofu ʼi tana logo ʼae ki te ʼu palalau ʼa Sesu he ʼe ʼi tana manatu neʼe ko te patapata ia. (Mat. 26:59-66) ʼI te talatisio ʼa te kau lapi fakasutea neʼe fakamaʼua ki te hahaʼi ʼae ʼe logo ki he ʼu patapata ʼe fai ki te huafa ʼo te ʼAtua, ke natou hae ʼonatou kofu. Kaʼe ʼi te manatu leva ʼa te kau lapi ʼi te hili ʼo te fakaʼauha ʼo te fale lotu ʼo Selusalemi, “ko ia ʼae ʼe logo ki te patapata ʼe fai ki te Huafa ʼo Te ʼAtua ʼe mole kei tonu ke hae tona kofu, naʼa liliu ʼo makahaehae ʼona mutu ʼi meʼa fuli.”

ʼE mahino papau ia, neʼe mole he ʼuhiga ʼo te aga ʼaia kia mata ʼo te ʼAtua mo kapau neʼe mole ko he lotomamahi moʼoni. Koia neʼe ui ai e Sehova ki tana hahaʼi ke natou ‘hae ʼonatou loto kaʼe mole ko ʼonatou kofu pea ke natou toe tafoki mai kia te ia.ʼ—Soe. 2:13.