1, 2. He ko ʼe ʼe feala ke faigataʼa kia natou ʼae ʼe gaue ʼi tuʼa puleʼaga hanatou toe liliu ki tonatou ʼapi? (Vakaʼi te ʼuluaki pakī.)

KO EDUARDO neʼe maʼu gaue lelei pea neʼe falāʼia ʼi tana gaue ʼi tuʼa puleʼaga ʼo mamaʼo ai mo tona kiʼi famili. * Kaʼe ʼi tana ako te moʼoni, neʼe mahino ai leva neʼe mole ko te falā pe ʼae neʼe ʼaoga ki tona kiʼi famili. Neʼe ko ia ʼae neʼe ʼaoga kia natou ʼi fale moʼo tokaga kia natou. Koia ʼae neʼe toe liliu ai ki tona ʼapi.—Efe. 6:4.

² Neʼe iloʼi e Eduardo neʼe ko te loto ʼaia ʼa Sehova ke toe liliu ki tona kiʼi famili. Kaʼe neʼe mole faigafua te faʼahi ʼaia. Neʼe tonu ke ina toe faʼufaʼu ʼana felogoʼi mo tona ʼohoana pea mo tana fanau pea mo maʼu he foʼi falā feʼauga moʼo tokaga ki tona kiʼi famili. Koia ʼe ina fakahoko feafeaʼi anai te faʼahi ʼaia? ʼE tokoni anai koa te kokelekasio kia natou?

3. ʼE malave feafeaʼi ki te fanau ia tanatou vaha mamaʼo mo ʼanatou matuʼā?

³ ʼE ui fenei e Eduardo: “Neʼe mole au tokaga ki taku fanau ʼi te temi ʼae neʼe ʼaoga lahi ai kia natou ia taku takitaki pea mo toku ʼofa. Neʼe mole au maʼuli tahi mo toku kiʼi famili ke au lau age te Tohi-Tapu, mo faikole pea mo gaoʼi mo natou pea mo fakapelepeleʼi natou.” (Tet. 6:7) ʼE manatuʼi fenei e Anna ia tona ʼofafine lahi: “Neʼe  hage neʼe mole ʼofainaʼi au koteʼuhi neʼe mole matou maʼuli tahi mo tamatou tamai. Pea ʼi tana toe liliu mai, neʼe mata faikehe kia au tana faʼufua mai koteʼuhi neʼe mole matou feiloʼiʼaki lelei, gata pe ki tona fofoga mo tona leʼo neʼe matou iloʼi.”

4. He ko ʼe ʼe faigataʼa ki he tamai hana liliu ko he pule famili lelei moka ʼe mole maʼuli tahi mo tona kiʼi famili?

⁴ Moka puli fualoa te tamai ʼi te loto fale, pea ʼe faigataʼa anai hana liliu ko he pule famili. ʼE fakamahino fenei e te ʼohoana ʼo Eduardo ko Ruby: “Neʼe tonu ke au fakahoko te ʼu maʼua ʼa te Faʼe mo te Tamai pea neʼe teitei pe ke au toʼo te ʼu tonu fuli ʼo te famili. ʼI te toe foki mai ʼae ʼa Eduardo ki tomatou ʼapi, neʼe tonu ke au ako peʼe feafeaʼi te fakalogo ʼa he fafine Kilisitiano. Maʼia ʼi te temi nei, ʼi ʼihi temi ʼe tonu ke au manatuʼi kua ʼi fale nei toku ʼohoana.” (Efe. 5:22, 23) ʼE ui fenei e Eduardo: “Neʼe kua olo pe ʼoku ʼofafine ki tanatou faʼe ke ina fakagafua age tanatou fai he meʼa. Koia neʼe tonu ai ke au ako ke au fakahoko toku ʼuhiga pule famili Fakakilisitiano.” Pea neʼe mahino kia Eduardo mo Ruby neʼe ʼaoga ke sisio tanā fanau ʼe nā toʼo fakatahi te ʼu tonu.

5. Kotea ʼae neʼe fai e Eduardo moʼo toe faʼufaʼu ʼana felogoʼi ʼae mo tona kiʼi famili ʼi tana toe liliu ki tona ʼapi? Pea neʼe kotea ʼona fua?

⁵ Neʼe faiga malohi e Eduardo ke ina toe faʼufaʼu ʼana felogoʼi ʼae mo tona kiʼi famili pea mo tokoni kia natou ke toe malohi ʼanatou felogoʼi ʼae mo Sehova. Neʼe ina fia akoʼi ki ʼana fanau te moʼoni ʼaki ʼana palalau pea mo tana faʼifaʼitaki. Neʼe mole ina lau pe ʼe ʼofa ia Sehova kaʼe neʼe ina toe fakaha foki. (1 Soa. 3:18) Neʼe tapuakinaʼi koa e Sehova te ʼu faiga ʼa Eduardo? ʼE ui fenei e Anna: “Neʼe matou tokagaʼi ʼana faiga ʼae ke liliu ko he tamai lelei pea mo toe fakaovi mai kia matou. Pea neʼe tokoni mai te ʼu faʼahi ʼaia. Neʼe matou fiafia foki ʼi tamatou tokagaʼi ia tana fakaʼamu ki he gaue ʼi te kokelekasio. Neʼe faigaʼi e te malama ke ina fakamamaʼo matou mai ia Sehova. Kaʼe neʼe matou sisio ki te fakamuʼamuʼa e ʼamatou matuʼā ia te moʼoni, koia ʼae neʼe matou faiga ai ke matou faʼifaʼitakiʼi. Neʼe fakapapau mai e Papa ʼe mole ina toe tuku anai matou pea neʼe mulimuli pe ki ai. Ka na pau la neʼe mole mulimuli ki tana fakapapau, pea ʼe lagi mole au ʼi te kautahi ʼa Sehova ia ʼaho nei.”

6. Kotea te ako neʼe taʼofi e te ʼu matuʼā ʼe tokolahi lolotoga te tau ʼae neʼe hoko ʼi te ʼu Balkans?

⁶ ʼE loto e te fanau ke nonofo ʼanatou matuʼā mo natou. Ohage la, ʼi te temi ʼae neʼe hoko ai te tau ʼi te ʼu Balkans, neʼe mole kei feala ke olo ʼihi tehina mo tuagaʼane ʼo gaue. Koia neʼe teitei pe ke natou fakaʼaogaʼi tonatou temi katoa ki ʼanatou fanau. Neʼe gaoʼi te ʼu fanau, mo faipalalau pea mo ako mo ʼanatou matuʼā. Logo la te ʼu aluʼaga faigataʼa ʼo tonatou maʼuli, ka’e neʼe natou fiafia. Kotea te ako ʼe kita taʼofi mai ai? Ko te faʼahi tafitō ʼae ʼe loto ki ai te fanau ʼe ko ʼanatou matuʼā kaʼe mole ko te paʼaga mo te ʼu meʼa ʼofa. Ohage pe ko tona ʼui ʼi te Tohi-Tapu, ʼe fua lelei anai ki te fanau moka toʼo e te ʼu matuʼā he temi moʼo akoʼi ʼo natou.—Taag. 22:6.

7, 8. (1) He ko ʼe ʼe lagi punamaʼuli te ʼu matuʼā moka natou toe foki ki tonatou ʼapi? (2) ʼE toe lava fakatokatoka feafeaʼi e te ʼu matuʼā ʼanatou felogoʼi mo ʼanatou fanau?

⁷ Ko ʼihi matuʼā ʼe lagi natou punamaʼuli anai ki te aga ʼo ʼanatou fanau ʼi tanatou toe foki ʼae ki tonatou ʼapi. ʼE lagi mole natou fiafia ʼi te toe liliu age ʼo ʼanatou matuʼā pea ʼe mole kei natou falala kia natou. ʼE feala pe ke ui e te ʼu matuʼā, “ʼOiaue he ko ʼe koa ʼe ke maʼuli galo feia? ʼE ke sio mai la neʼe ma fai pe ia meʼa fuli maʼa koe.” Kaʼe ʼi tona fakahagatonu ʼe lotomamahi la te tamasiʼi koteʼuhi ko tona tuku ʼae e ʼana matuʼā. Koia ʼe lava fakatokatoka feafeaʼi te fihifihia ʼaia e te tamai peʼe ko te faʼe?

⁸ Kole tokoni kia Sehova ke ke mahino pe kotea te tupuʼaga ʼo te feia ʼo tou kiʼi famili pea mo ke fakaha age ʼe ke hoha ki te faʼahi ʼaia. Pea ʼe tonu ke ke toe mahino neʼe ke faihala pea mo fai hau fakalelei ki tou kiʼi famili. Moka tokagaʼi e tou kiʼi famili ʼe ke faiga  malohi ke ke fakatokatoka te aluʼaga ʼaia, pea ʼe natou iloʼi ai anai ʼe ke fakamalotoloto. Kapau ʼe ke kataki fualoa aipe, pea ʼe lagi toe ʼofa mo fakaʼapaʼapa atu anai tou kiʼi famili.

9. He ko ʼe ʼe tonu ke tou maʼuli fakafeʼauga?

⁹ Neʼe ui e te apositolo ko Paulo moka ʼe mole kei feala ki te kau Kilisitiano matutuʼa hanatou tokakaga kia natou totonu, pea ʼe tonu anai ke tokoni kia natou ʼanatou fanau mo mokopuna. Kia Paulo, ko te u faʼahi ʼae ʼe ʼaoga moʼoni kia tatou pea mo tou maʼuli fakafeʼauga ai, ʼe ko te meʼa kai, mo te meʼa laofi pea mo he nofoʼaga. (Lau ia 1 Timoteo 5:4, 8; 6:7-12.) ʼE mole ʼaoga ki he Kilisitiano ke koloaʼia ʼi te malama ʼaeni ka puli moʼo tokaga ki tona kiʼi famili. (1 Soa. 2:15-17) ʼAua tatatou manatu ʼae ʼe feala ke fakatokatoka e te paʼaga ʼotatou fihifihia fuli. Pea tou tokakaga naʼa mole kei puke maʼu e totatou kiʼi famili ia “te mauli mooni” ʼi te malama foʼou ʼa te ʼAtua ʼuhi ko te ʼu meʼa ʼae ʼe tou hoha ki ai.—Mko. 4:19; Luka 21:34-36; 1 Tim. 6:19.

10. He ko ʼe ʼe ko he agafakapotopoto hatatou mole toʼo maʼua?

¹⁰ ʼE iloʼi e Sehova ʼe ʼaoga ke ʼi ai hatatou kiʼi foʼi falā. Kaʼe ʼe mole lava tokoni mo puipui tatou e te falā ohage ko te poto ʼae ʼe foaki mai e Sehova. (Ekl. 7:12; Luka 12:15) ʼI ʼihi temi, ʼe mole tokagaʼi e te hahaʼi tonatou puli moka natou olo ʼo gaue ʼi tuʼa puleʼaga. Pea tahi, ʼe mole feala hanatou iloʼi pe ʼe natou maʼu anai hanatou foʼi falā moka natou tau atu. ʼI tona fakahagatonu, ʼe feala ke natou fetaulaki ai mo ni fihifihia lahi. Tokolahi ia natou ʼae neʼe natou tuku tonatou kiʼi famili kua lahi age ʼonatou maʼua ʼi tanatou toe foki ki tonatou ʼapi. ʼE natou kaugana ai kia natou ʼae ʼe natou tuʼu maʼua ki ai ʼo mole feala ai hanatou tauhi faʼitaliha ki te ʼAtua. (Lau ia Taaga Lea 22:7.) Koia ʼe lelei age pe hatatou mole toʼo maʼua.

11. ʼE lava tokoni feafeaʼi te fakafuafua ʼo te foʼi falā ki te ʼu famili?

¹¹ Neʼe mahino kia Eduardo hili tana toe foki ki tona ʼapi, neʼe tonu ke ina fakaalualu lelei mo tona kiʼi famili tanatou foʼi falā ke feala ai foki hana tokaga lelei kia natou. Neʼe fakafuafua e naua taumatuʼa tanā foʼi falā ki te ʼu meʼa ʼae ʼe ʼaoga moʼoni kia natou ʼi te faʼahi fakasino. * Pea ke natou mulimuli ki ai, neʼe mole kei natou totogi ni meʼa ohage ko te temi ʼae neʼe lahi ai tanatou foʼi falā. Kaʼe neʼe natou felagolagoʼaki pea neʼe mole natou fakaʼaogaʼi tanatou foʼi falā ki ni meʼa ʼe mole hona ʼaoga. Ohage la, ʼe ui e Eduardo neʼe ina tuku tana fanau ki te ʼu fale ako ʼe mole totogi kovi. Pea neʼe faikole ia ia mo tona kiʼi famili ke ina maʼu hana gaue ʼe feala ai hanatou hoko atu ʼanatou gaue fakalaumalie. Neʼe tali feafeaʼi e Sehova ki ʼanatou faikole?

12, 13. Kotea ʼae neʼe fai e Eduardo moʼo taupau tona kiʼi famili? Pea neʼe tapuakiʼi feafeaʼi e Sehova tana haga ʼo fakafaigafua tonatou maʼuli?

¹² Lolotoga te ʼu ʼuluaki taʼu ʼe lua ʼo tana liliu ki tona ʼapi, neʼe mole lahi te foʼi falā ʼae neʼe maʼu e Eduardo moʼo taupau tona kiʼi famili. Neʼe tonu ai ke natou fakaʼaogaʼi te foʼi falā ʼae neʼe ina tuku keheʼi. Pea tahi neʼe kua ogosia foki. Kaʼe ʼe ui fenei e Eduardo: “Neʼe feala pe tamatou kau ki te ʼu fono fuli mo te faifakamafola.” Neʼe ina fakatotonu ke ʼaua naʼa manatu ke ina maʼu he gaue ʼe ina toe fakamamaʼo anai ia ia mai tona kiʼi famili. Kaʼe ʼe ina ui fenei: “Neʼe au ako ke au fai ni gaue kehekehe, ohage la mo kapau ʼe noa te gaue ʼae pea ʼe au hola ki he tahi gaue.”

¹³ ʼUhi ko te huʼi e Eduardo ʼi he temi loaloaga ʼona maʼua koia la ʼae neʼe lahi ai te tupu ʼo te foʼi falā neʼe tonu ke ina huʼi. Kaʼe neʼe lotolelei ia Eduardo ke ina fai te faʼahi ʼaia ke feala ai hana tauhi mo tona kiʼi famili kia Sehova. ʼE ui fenei e Eduardo: “ʼE moʼoni ʼi te temi nei ʼe mole lahi taku foʼi falā ohage ko taku gaue ʼi tuʼa puleʼaga, kaʼe ʼe mole he temi ʼe matou hoge meʼa kai ai. Koteʼuhi ʼe mole nounou te nima ʼo Sehova. Koia neʼe matou fakatotonu ai ke matou pionie fakafamili.”  Mole faʼa fualoa ki ai, neʼe toe lelei te maʼuli fakaekonomika, pea mo faigafua age ai te taupau ʼo tona kiʼi famili.—Esa. 59:1.

14, 15. Kotea ʼae ʼe lava fai e te ʼu famili mo kapau ʼe uga natou e ʼonatou kaiga ke natou fakamuʼamuʼa age te falā ʼi te tauhi kia Sehova? Kaʼe kotea ʼe feala ke hoko moka tou tuku he faʼifaʼitaki lelei?

¹⁴ Ki te manatu ʼa ʼihi ʼe tonu ke natou foaki falā mo meʼa ʼofa ki ʼonatou kaiga mo kaumeʼa. ʼE ui fenei e Eduardo: “ʼE ko he koga ʼaia ʼo tomatou aga ʼi fenua pea ʼe matou leleiʼia. Kaʼe ʼe fakalogo pe ki te fealagia.” Pea ʼe ina fakamahino lelei pe ki ʼona kaiga ʼe ina fai anai te faʼahi ʼaia ʼo mulimuli pe ki ʼona fealagia. Kaʼe ʼe tokaga muʼa anai ia ki tona kiʼi famili ʼi te faʼahi fakasino pea mo fakalaumalie.

¹⁵ ʼE lagi lotovaivai ʼihi kaiga moka filifili e he tahi ke nofo mo tona kiʼi famili peʼe ke toe foki ki tona ʼapi. Maʼia pe la ʼe feala ke natou ui ʼe ko he tahi ʼe mole ʼofa peʼe manatu pe ia kia ia. Kotea tona tupuʼaga? Koteʼuhi ʼe natou fakaʼamu ke foaki age e ia ʼaia hanatou foʼi falā. (Taag. 19:6, 7) ʼE ui e te ʼofafine ʼo Eduardo ko Anna, ‘kapau ʼe fakamuʼamuʼa age e tomatou kiʼi famili te tauhi kia Sehova ʼi te falā, pea ʼe lagi mahino anai ʼomatou kaiga ki te maʼuhiga ʼae ʼo Sehova ki tomatou kiʼi famili.’ Kaʼe kapau ʼe mole matou fai te faʼahi ʼaia, pea ʼe mole feala anai ke mahino ʼomatou kaiga.—Vakaʼi mo 1 Petelo 3:1, 2.

16. (1) Kotea te ʼu manatu hala ʼae ʼe feala ke maʼu e he tahi? (Sakp. 1:22) (2) Kotea te ʼu faʼahiga tonu ʼae ʼe tapuakinaʼi e Sehova?

¹⁶ Ko he tuagaʼane neʼe ina tuku tona kiʼi famili kaʼe alu ʼo gaue ʼi tuʼa puleʼaga, neʼe ina ui fenei ki te kau tagata ʼafeā: “Neʼe matou fai ni toe sakilifisio ke au haʼu ki heni. Pea neʼe tuku e toku ʼohoana tona pilivilesio ʼae ko te tagata ʼafeā. Koia ʼe au fakaʼamu ʼe tapuakina anai e Sehova ia taku haʼu.” ʼE moʼoni kapau ʼe tou maʼu te tui mo fai ni tonu ʼe alu tahi mo te finegalo ʼo Sehova, pea ʼe tou lava tui papau ʼe ina tapuakinaʼi anai tatou. Kaʼe ʼe mole ina tapuakinaʼi anai te ʼu tonu ʼae ʼe fakafeagai ki tona finegalo. Pea ʼe mole ina leleiʼia anai mo kapau ʼe tou tuku he pilivilesio ʼuhi ko ni manatu hala.—Lau ia Hepeleo 11:6; 1 Soane 5:13-15.

17. He ko ʼe ʼe tonu ke ke kumi te takitaki ʼa Sehova ʼi muʼa ʼo hau fai ni tonu? Pea ʼe feafeaʼi hau lava fai te faʼahi ʼaia?

¹⁷ Kumi ia te takitaki ʼa Sehova ʼi muʼa ʼo hau fai he tonu ke mole ke fakahemala ai  ki ʼamuli. Kole ke ina foaki atu te laumalie maʼoniʼoni, mo te poto pea mo tana takitaki. (2 Tim. 1:7) Pea ke fai te ʼu fehuʼi ʼaeni: ‘Kotea ʼae ʼe au lotolelei ke au sakilifisioʼi ke au tauhi ai kia Sehova? ʼE au mulimuli anai koa ki tana fakatotonu ʼae ke au nofo mo toku kiʼi famili tatau aipe pe mole faʼa lelei ai anai toku maʼuli?’ (Luka 14:33) Kole tokoni ki te kau tagata ʼafeā pea mo mulimuli ki ʼanatou tokoni Fakatohi-tapu. Kapau ʼe ke fai te faʼahi ʼaia, pea ʼe ke fakaha ai ʼe ke falala ki te fakapapau ʼae ʼe tokoni atu anai ia Sehova. ʼE mole ui atu anai e te kau tagata ʼafeā te faʼahi ʼae ʼe tonu ke ke fai. Kaʼe ʼe natou tokoni atu anai ke ke fai ni tonu fakapotopoto ʼe ke maʼuli fiafia ai anai.—2 Ko. 1:24.

18. Ko ai ʼae ʼe tonu ke tokaga ki he famili? Pea ʼe tou lava tokoni feafeaʼi kia natou?

¹⁸ ʼE fakaʼamu e Sehova ke tokaga te ʼu pule famili ki tonatou kiʼi famili ʼi te temi fuli. Tou faikole maʼa natou pea mo tou vikiʼi natou ʼae ʼe natou fakahoko tonatou maʼua ʼaia kaʼe neʼe mole natou tuku tonatou kiʼi famili. Maʼia mo kapau ʼe natou fia olo ʼo gaue ʼi tuʼa puleʼaga peʼe fakaneke natou e ʼihi ke natou fai te faʼahi ʼaia. Kaʼe ʼe mole gata ʼaki pe ʼatatou faikole, ʼe tou toe maʼu foki te faiga malie ʼae ke tou fakaha totatou ʼofa ki te ʼu tehina agatonu ʼaia moka hoko he tuʼutamaki fakanatula peʼe ko he faitoʼo ʼe ʼaoga fakavilivili kia natou. (Kal. 6:2, 5; 1 Pet. 3:8) ʼE feala koa hatatou tokoni kia natou ke natou maʼu hanatou gaue ʼe tuʼu ovi ki tonatou ʼapi? Peʼe tou foaki age koa te ʼu meʼa ʼae ʼe ʼaoga atu aipe, ohage la ko he foʼi falā peʼe ko te meʼa kai? Kapau ʼe tou fai te faʼahi ʼaia, pea ʼe mole ʼaoga anai ke natou tuku tonatou kiʼi famili kaʼe natou olo ʼo gaue ʼi he tahi fenua.—Taag. 3:27, 28; 1 Soa. 3:17.

19, 20. He ko ʼe ʼe lava tui papau te kau Kilisitiano ʼe tokoni anai Sehova kia natou?

¹⁹ ʼE fakapapau fenei mai ia Sehova: “Ke aua naa kotou manumanu ki te paaga; ke kotou fiafia i te mea e kotou mau, koteuhi nee ui e te Atua totonu: E mole au tukunoa anai koe, pea e mole au siaki anai koe. Koia e feala ai ke tou ui malohi ai: Ko [Sehova] ko toku tokoni, e mole au mataku anai ki he mea; kotea e fealagia e he tagata kia au?” (Hep. 13:5, 6) ʼE feafeaʼi anai hatatou maʼuliʼi te ʼu palalau ʼaia?

²⁰ Ko he tagata ʼafeā ʼe maʼuli ʼi te fenua masiva ʼe ina ui ʼe tau palalau te hahaʼi ki te maʼuli fiafia ʼae ʼa te kau Fakamoʼoni ʼa Sehova. ʼE ina toe ui ʼe natou tokagaʼi mo te teu lelei ʼa te kau Fakamoʼoni pea mo tanatou maʼu ia meʼa fuli ʼe ʼaoga kia natou logo la tonatou masisiva. Pea neʼe ko te faʼahi pe ʼaia neʼe fakapapau e Sesu. (Mat. 6:28-30) ʼE ʼofa ia Sehova kia tatou pea ʼe ina foaki mai te meʼa ʼae ʼe lelei kia tatou. ʼE fia tokaga ia ki ʼana kaugana fuli pea mo fia fakaha tuʼumaʼu ia tona malohi moʼo tokoni kia tatou. (2 Klk. 16:9) Ko te tupuʼaga la ʼae ʼo tana foaki mai ni fakatotonu ʼo ʼuhiga mo te maʼuli fakafamili pea mo te maʼu ʼo te ʼu meʼa ʼae ʼe ʼaoga kia tatou. Moka tou fakalogo ki te ʼu fakatotonu ʼaia, pea ʼe tou fakaha ai kia Sehova ʼe tou ʼofa mo falala kia te ia. “Koeni te ofa ki te Atua, ko te fai o ana fakatotonu. Pea e mole faigataa ana fakatotonu.”—1 Soa. 5:3.

21, 22. He ko ʼe neʼe ke fakatotonu ke ke falala kia Sehova?

²¹ ʼE ui e Eduardo ʼe ina iloʼi ʼe mole feala hana fetogi te temi ʼae neʼe vaha mamaʼo ai mo tona ʼohoana pea mo tana fanau. Kaʼe ʼe ina faigaʼi ke mole manatu tuʼumaʼu ki tana hala ʼaia. Tokolahi natou ʼae neʼe gaue mo ia ʼe natou koloaʼia kaʼe ʼe mole natou fiafia. ʼE tau ʼonatou famili mo ni fihifihia lahi. Kaʼe ʼe fiafia ʼaupito tona kiʼi famili. Logo ai tonatou masisiva, kaʼe ko te kiʼi famili ʼa Eduardo pea mo ʼihi atu famili ʼi tona fenua ʼe natou falala ʼe tokoni anai ia Sehova kia natou. ʼE ina ui, “ʼE matou sisio fuli ki te moʼoni ʼo te fakapapau ʼa Sesu ʼi tomatou maʼuli.”—Lau ia Mateo 6:33.

²² ʼAki he lotomalohi, filifili ke ke fakalogo kia Sehova pea mo falala kia te ia. ʼE feala ke ke liliu ko he pule famili lelei mo kapau ʼe ke ʼofa kia Sehova, mo tou ʼohoana pea mo tau kiʼi fanau. Pea ʼe feala anai ke ke sio ʼi tou maʼuli ko Sehova ʼe tokoni atu.