‘Ko Taku Meʼa Kai Ko Te Fai ʼo Te Finegalo ʼo Te ʼAtuaʼ
Kotea ʼae ʼe tupu ai tou fiafia lahi? ʼE ko te maʼuli fakataumatuʼa koa? Peʼe ko tau faʼufaʼu tou maʼuli fakafamili, peʼe ko tau taupau lelei ʼau felogoʼi mo ʼou kaumeʼa? ʼE mahino ia, ʼe ke fiafia anai ʼi tau kai fakatahi mo natou ʼae ʼe ke ʼofa ai. Kaʼe kia tatou ʼae ʼe kaugana kia Sehova, ʼe ko he fakapale maʼuhiga ia te fai ʼo te finegalo ʼo te ʼAtua, mo ako tana Folafola, pea mo fakamafola ia te logo lelei.
ʼI he hiva fakavikiviki ki te Tupuʼaga, neʼe hiva fenei ia te Hau ʼo Iselaele ko Tavite: “Neʼe au fiafia, e toku ʼAtua, ʼi te fai ʼo tou finegalo, pea ko tau lao ʼe nofo ʼi toku loto.” (Pes. 40:8, MN) Logo la te ʼu fakataga mo te ʼu fihifihia ʼae neʼe tau mo ia ʼi tona maʼuli, kaʼe neʼe leleiʼia tafitō e Tavite ia te fai ʼo te finegalo ʼo te ʼAtua. Kaʼe neʼe toe fiafia ai mo ʼihi kaugana ʼa Sehova ʼi te tauhi kia te ia.
Neʼe fakaʼaogaʼi e te apositolo ko Paulo te ʼu palalau ʼae ia Pesalemo 40:8 ʼo ʼuhiga mo te Mesia, peʼe ko Kilisito ʼo ina ui fenei: “Nee ui ai e Kilisito, i tana hau ki malamanei: Nee mole ke loto ki he sakilifisio pee ko he molaga, kae nee ke fau he sino kia au: nee mole ke tali ni failaulau pee ko ni sakilifisio ki te agahala. Koia nee au ui ai: Koeni, e au hau, (koteuhi nee tohi i te takaiga tohi kia au) o fai, oi Atua, tou finegalo.”—Hep. 10:5-7.
ʼI tana ʼi te kele, neʼe leleiʼia e Sesu tana mamata ki te fakatupu, tana fakatahi mo ʼona kaumeʼa pea mo tana kai fakatahi mo ʼihi. (Mat. 6:26-29; Soa. 2:1, 2; 12:1, 2) Kaʼe ko te koga ʼae neʼe maʼuhiga tafitō kia ia pea mo lahi ai tona fiafia, neʼe ko te fai ʼo te finegalo ʼo tana Tamai ʼae ʼe ʼi selo. Koia neʼe ui fenei ai e Sesu: “Ko taku meakai ko taku fai te finegalo o ia ae nee ina fekaui mai au, pea mo taku fakakatoa tana gaue.” (Soa. 4:34; 6:38) Neʼe ako e te ʼu tisipulo ʼa Sesu mai tonatou Pule pe ʼe feafeaʼi te maʼu ʼo te fiafia moʼoni. Koia ʼaki he fiafia lahi mo he faʼafai, neʼe natou fia tala te logo ʼo te Puleʼaga ki ʼihi atu.—Luka 10:1, 8, 9, 17.
‘KOTOU OLO ʼO FAI NI TISIPULOʼ
Neʼe fakatotonu fenei e Sesu ki ʼana tisipulo: ‘Kotou olo, kotou fai ni tisipulo ʼi te ʼu puleʼaga fuli, pea kotou papitemaʼi natou ʼi te huafa ʼo te Tamai, mo te ʼAlo pea mo te laumalie maʼoniʼoni, pea kotou ako natou ki te taupau ʼo te ʼu meʼa fuli neʼe au fakatotonu atu kia koutou. Pea koʼeni, ʼe au fakatahi mo koutou ʼi te ʼaho fuli, ʼo kaku ki te fakaʼosi ʼo te malamanei.ʼ (Mat. 28:19, 20) Ko te fakahoko ʼo te fakatotonu ʼaia ʼe fakaʼuhiga ke tou tala te logo lelei ki te hahaʼi ʼi he koga meʼa pe ʼe tou maʼu ai natou, ʼo tou ʼaʼahi natou ʼae neʼe fia logo pea mo fai hanatou ako Tohi-Tapu. ʼE feala ke tou maʼu ai he fiafia lahi ʼi te fai ʼo te gaue ʼaia.
ʼE uga tatou e te ʼofa ke tou haga tala te logo lelei logo la ʼe mole fia logo ʼihi hahaʼi
Pe ʼe fia fai te hahaʼi ki te logo ʼae ʼe tou tala peʼe kailoa, kaʼe ko tatatou faʼahiga manatu ʼae ʼe maʼuhiga ke tou fiafia ai ʼi te minisitelio. He ko ʼe ʼe tou haga tala te logo lelei logo la ʼe mole fia logo ʼihi hahaʼi? Koteʼuhi ʼe tou mahino ko tatatou fakamafola ia te logo lelei ʼo te Puleʼaga pea mo fai ʼo ni tisipulo, ʼe tou fakamoʼoni ai ʼe tou ʼofa ki te ʼAtua pea mo te hahaʼi. Pea tahi, ko totatou maʼuli pea mo ʼae ʼo te hahaʼi ʼe tuʼutamaki. (Esk. 3:17-21; 1 Tim. 4:16) Tou vakaʼi te ʼu manatu ʼae neʼe tokoni ki te ʼu tehina mo tuagaʼane ke natou taupau pea mo toe malohi ai tanatou faʼafai ʼi te minisitelio ʼi te ʼu telituale faigataʼa.
FAKAʼAOGAʼI IA TE ʼU FAIGA MALIE FULI
ʼE tau fua lelei te fakaʼaogaʼi ʼo he ʼu fehuʼi fakapotopoto ʼi tatatou minisitelio. Ohage la, neʼe sio Amalia ʼi te tahi uhu ki he tagata ʼe lau sulunale ʼi he koga meʼa ʼe malolō ai te hahaʼi. Neʼe fakaovi ia Amalia ki ai pea neʼe ina fehuʼi age pe ʼe kua ina lau la he ʼu logo lelei. Neʼe fakafisi age te tagata, pea neʼe ui fenei age e Amalia: “ʼE au haʼu mo te ʼu logo lelei ʼo ʼuhiga mo te Puleʼaga ʼo te ʼAtua.” Neʼe tupu ai te fia logo ʼa te tagata, pea neʼe ina tali ke fai hana ako Tohi-Tapu. Neʼe lava kamata e Amalia ia he ʼu ako Tohi-Tapu ʼe tolu ʼi te koga meʼa ʼaia.
Pea ko Janice, neʼe ina fakaʼaogaʼi tona fale gaue ko hona telituale. ʼI te fia lau e te tagata leʼo mo tona kaugā gaue fafine ia he alatike ʼi Te Tule Leʼo, neʼe ui age e Irma ʼe feala hana ʼaumai tuʼumaʼu he ʼu nusipepa maʼa naua. Neʼe ina fai feia mo tana tahi kaugā gaue tagata, ʼae neʼe malave ki ai ia te ʼu kupu tafitō kehekehe ʼi Te Tule Leʼo mo te Réveillez-vous ! Pea neʼe toe kole ai e te tahi kaugā gaue fafine he ʼu nusipepa. Neʼe ui fenei e Janice: “ʼE ko he tapuakina mai ia Sehova!” ʼI tona fale gaue ʼe ko te toko 11 ʼe ina tufa tuʼumaʼu ki ai te ʼu nusipepa.
MAʼU HE MANATU ʼE LELEI
Neʼe kole e te taupau feʼaluʼaki ki te kau faifakamafola ke ʼaua naʼa natou fakaʼosi ʼanatou faipalalau mo te hahaʼi ʼi te ʼu ʼapi ʼo ui age, ʼe natou toe liliu age anai ʼi he tahi ʼaho. Kaʼe ʼe feala pe hanatou fehuʼi fenei: “ʼE ke lotolelei la ke au fakaha atu pe ʼe feafeaʼi te fai ʼo he ako Tohi-Tapu?” peʼe “Kotea la te ʼaho mo te hola ʼae ʼe ke loto ke au toe haʼu ai ke hoko atu tatā faipalalau?” Neʼe fakamatala e te taupau feʼaluʼaki ko te ʼu tehina mo tuagaʼane ʼi he kokelekasio neʼe ina ʼaʼahi, neʼe natou kamata te ʼu ako Tohi-Tapu ʼe 44 ʼi te vahaʼa ʼe tahi ʼaki tanatou fakaʼaogaʼi te faʼahiga fai ʼaia.
Maʼia pe kua hili ki ai ni ʼaho ki te uluaki faipalalau, kaʼe ʼe fua lelei te liliu fakavilivili ʼo fai ia te ʼu ʼaʼahi. Kotea tona tupuʼaga? Koteʼuhi ko tona faʼahiga fai ʼaia, ʼe ha aki ai ʼe tou fia tokoni moʼoni ki te hahaʼi ʼae ʼe fakamalotoloto ke natou mahino ki te Tohi-Tapu. Neʼe fakafehuʼi leva he fafine pe ko ʼe neʼe ina tali ke fai hana ako Tohi-Tapu mo te kau Fakamoʼoni ʼa Sehova, pea neʼe ina tali fenei: “Neʼe au kamata ako he neʼe au logoʼi tanatou tokaga lelei kia au pea mo tonatou ʼofa.”
ʼE feala ke ke fehuʼi ki he tahi, “ ʼE ke lotolelei la ke au fakaha atu pe ʼe feafeaʼi te fai ʼo he ako Tohi-Tapu?”
ʼI te hili ʼo te kau ʼa Madaí ki te Ako ʼo Te Kau Pionie, neʼe ina fai te ʼu ako Tohi-Tapu ʼe 15 pea neʼe ina foaki te tahi ʼu ako ʼe 5 ki ʼihi kau faifakamafola. Kua kamata kau tuʼumaʼu te tokolahi ʼo ʼana kau ako Tohi-Tapu ki ʼatatou fono. Kotea ʼae neʼe tokoni kia Madaí ke lahi ʼana ako Tohi-Tapu? Neʼe malave kia ia te ako ʼo ʼuhiga mo te ʼaoga ʼae ke liuliuga kio natou ʼae neʼe fia logo ʼi te uluaki faipalalau ʼo aʼu ki tana maʼu ia natou. Ko te tahi Fakamoʼoni ʼae neʼe tokoni ki te tokolahi ke natou ako te ʼu moʼoni Fakatohi-tapu, ʼe ina ui, “Neʼe au ako ai ko te faʼa kataki moʼo fai ʼo te ʼu ʼaʼahi, ʼe ko te puleʼaki maʼuhiga ʼaia ke tou tokoni ki te hahaʼi ʼae ʼe natou fia iloʼi ia Sehova.”
Ko te liliu fakavilivili ʼo fai te ʼu ʼaʼahi ʼe ha ai ia tatatou fia tokoni moʼoni kia natou ʼe fia mahino ki te Tohi-Tapu
Ko te fai ʼo te ʼu ʼaʼahi mo te ʼu ako Tohi-Tapu, ʼe fakamaʼua ki ai ni faiga fakamalotoloto. Kaʼe ʼe laka age te ʼu tapuakina ʼi ʼatatou faiga fuli. ʼI tatatou faiga fakamalotoloto ki te gaue faifakamafola, ʼe tou lava tokoni ki ʼihi ke “natou kaku ki te iloi katoa o te mooni,” ko tona fakaʼuhiga ko te haofaki ʼo tonatou maʼuli. (1 Tim. 2:3, 4) Pea kia tatou, ʼe tou maʼu ai ia he fiafia ʼe mole hona fakatatau.