TONATOU MAʼULI
Neʼe Tokoni Lahi Mai Ia Sehova
Mole faʼa fualoa ʼi te hili ʼo toma ʼohoana, ko au mo toku ʼohoana ko Evelyn, neʼe ma tau ki te kiʼi kolo ʼo Hornepayne ʼe tuʼu ʼi te potu noleto ʼo Ontario ʼi Kanata. Neʼe kei mafoata pea neʼe momoko ʼaupito. Neʼe haʼu ia te tehina ki te taulaga saliote afi ʼo ʼave maua ki tona ʼapi. Neʼe matou inu kafe mo tona ʼohoana pea mo tona foha. ʼOsi ʼaia pea neʼe matou olo ʼo faifakamafola ʼi te ʼu ʼapi logo la te nive. ʼI te hili hoʼata pe ʼaia ʼo te taʼu 1957, neʼe au fai ai taku ʼuluaki akonaki ki te kaugā malie ʼi toku ʼuhiga taupau ʼo te siliko. Neʼe matou toko nima pe.
KAʼE neʼe mole au lotovaivai ai. Koteʼuhi neʼe au aga ufiufi talu mai taku kei veliveli pea neʼe au alu ʼo nono moka ʼomai ʼihi ki tomatou ʼapi, maʼia mo natou ʼe matou feiloʼiʼaki.
ʼE lagi kotou punamaʼuli anai ʼi takotou iloʼi neʼe tonu ke au felogoʼi mo felaveʼi mo ni hahaʼi tokolahi ʼi te ʼu gaue kehekehe neʼe au fai maʼa te kautahi ʼa Sehova. ʼE ko he aluʼaga faigataʼa ʼaia ki he tahi ʼe aga ufiufi pea ʼe mole falala kia ia totonu. Koia ʼe mahino kia au neʼe mole au lava fai te ʼu gaue ʼaia ʼaki pe toku malohi, kaʼe ko Sehova ʼae neʼe tokoni mai. Neʼe ina fakahoko ai te fakapapau ʼaeni: “E au fakamalohii ia koe, e au hau o tokoni kia koe, e au taofi ia koe aki toku nima matau malo.” (Esa. 41:10) Neʼe ina tau foaki mai te tokoni ʼaia ʼaki te ʼu tehina mo tuagaʼane. Tuku ke au fakamatala atu pe neʼe feafeaʼi te tokoni mai ʼa ʼihi, ohage la ʼi taku kei veliveli neʼe tokoni mai ia te tahi tuagaʼane.
NEʼE INA FAKAʼAOGAʼI TE TOHI-TAPU MO TE KIʼI KAUPEPA ʼE TAKAFI ʼULI
Tomatou fale gaue kele ʼi te potu saute uesite ʼo Ontario
Neʼe matou maʼuʼuli ʼi te potu saute uesite ʼo Ontario. Pea ʼi te taʼu 1940 neʼe haʼu ia Elsie Huntingford ki tomatou ʼapi ʼi he ʼaho laulelei. Ko taku faʼe ʼae neʼe alu ki ai koteʼuhi neʼe aga ufiufi taku tamai ohage pe ko au. Neʼe ma fakalogo pe mai fale ki tanā faipalalau. Neʼe mahalohalo ai e taku tamai neʼe fia fakatau e te tuagaʼane ia he ʼu meʼa pea neʼe tuʼania naʼa totogi e taku faʼe ia te ʼu meʼa ʼaia. Neʼe alu ai leva taku tamai kia naua ʼo ui age ki te tuagaʼane ʼe mole matou loto ki he meʼa. Neʼe fehuʼi fenei age e te tuagaʼane: “ʼE mole kotou loto pe la ke kotou ako te Tohi-Tapu?” Neʼe tali age e taku tamai: “ʼEi foki, ʼe matou loto ki te faʼahi ʼaia.”
Neʼe to lelei te ʼaʼahi ʼo matou e te tuagaʼane. Neʼe kua fakamalotoloto ʼaku matuʼā ʼi te lotu polotesita (Église unie du Canada). Kaʼe neʼe nā fakatotonu ke nā mavae ʼi te lotu ʼaia. Neʼe kotea tona tupuʼaga? Koteʼuhi neʼe fakatuʼu e te patele ʼi te huʼaga ʼo te ʼekelesia he lisi ʼo natou fuli neʼe foaki meʼa ʼofa. Kaʼe neʼe tuʼu te higoa ʼo ʼaku matuʼā ʼi te fakaʼosi, ʼo iloʼi ai e te hahaʼi neʼe veliveli pe ʼanā meʼa ʼofa. Pea neʼe fakaneke naua e te kau takitaki lotu ʼo te palokia ke laka age te ʼu meʼa ʼofa ʼae ʼe nā foaki, logo la tanā masisiva. Neʼe ʼi ai te tahi tupuʼaga ʼo te fia mavae ʼo ʼaku matuʼā. Neʼe ui age e te patele neʼe mole ina akoʼi ki te hahaʼi te ʼu faʼahi neʼe tui moʼoni ki ai naʼa fakamavae ia ia mai tana gaue. Neʼe matou mavae ai ʼi te lotu ʼaia, kaʼe neʼe kei matou fia iloʼi te moʼoni ʼo ʼuhiga mo te ʼAtua pea mo tauhi kia te ia.
Neʼe tapuʼi te gaue ʼa te kau Fakamoʼoni ʼa Sehova ʼi Kanata ʼi te temi ʼaia. Koia ʼae, ʼi te kamata ʼo tamatou ako mo te Tuagaʼane ko Huntingford Elsie, neʼe ina fakaʼaogaʼi pe ia te Tohi-Tapu mo te kiʼi kaupepa ʼe takafi ʼuli ʼae neʼe tohi ai ʼana nota. Ki muli age, ʼi tana iloʼi papau ʼae ʼe mole matou kakaʼi anai ia ia, neʼe ina foaki mai ʼihi atu tohi Fakatohi-tapu. Pea moka ʼosi tamatou ako neʼe matou fufu te ʼu tohi ʼaia. *
Neʼe tali e ʼaku matuʼā te moʼoni ʼo nā papitema ʼi te taʼu 1948
Neʼe lotomalohi ia te Tuagaʼane ko Huntingford ʼi te minisitelio logo la te fakafeagai ʼa te hahaʼi pea mo ʼihi atu fihifihia. Neʼe malave ʼaupito tana faʼafai ki toku loto pea neʼe au fakatotonu ai ke au tauhi kia Sehova. Neʼe papitema ʼaku matuʼā ʼi te taʼu 1948 pea ʼi te taʼu ʼae neʼe hoa mai ki ai neʼe au papitema ai ʼi toku taʼu 17. Neʼe au papitema ʼi te inuʼaga ʼo te ʼu manu. Pea neʼe au fakatotonu leva ke au pionie.
NEʼE TOKONI MAI IA SEHOVA KE AU LOTOMALOHI
Neʼe au punamaʼuli ʼi toku fakaafe ki te Petele ʼi te taʼu 1952
Neʼe mole au pionie atu aipe koteʼuhi neʼe au manatu neʼe tonu muʼa ke au maʼu haku foʼi falā. Koia neʼe au gaue ʼi te fale paʼaga pea mo te tahi atu pilo. Kaʼe ʼi taku kei tupulaga, neʼe puli vave ʼaku foʼi falā he neʼe heʼeki au poto ʼi te fakaalualu ʼo toku maʼuli. Neʼe uga au e te tehina ko Ted Sargent ke au lotomalohi pea mo falala kia Sehova. (1 Klk. 28:10) Neʼe tokoni mai ia te fakalotomalohi agalelei ʼaia ke au kamata pionie ʼi te taʼu 1951. Neʼe ʼi ai pe taku foʼi fa afe, mo taku lelue pea mo taku kiʼi kato foʼou. Kaʼe neʼe foaki tuʼumaʼu mai pe e Sehova te ʼu meʼa ʼae neʼe ʼaoga kia au. ʼE au lotofakafetaʼi kia Ted he neʼe ina fakalotomalohiʼi au ke au pionie. Neʼe lahi te ʼu fua lelei ʼo taku tonu ʼaia.
ʼI ʼAukusito ʼo te taʼu 1952, neʼe telefoni mai te tehina mai te Petele ʼo Toronto, ʼi Kanata. Neʼe fakaafe au ke au alu age ʼo gaue ʼi te Petele ʼi Sepetepeli. Neʼe kei au aga ufiufi pea neʼe heʼeki au ʼaʼahi te Petele, kaʼe neʼe au fiafia ʼaupito he neʼe au logo ki te ʼu faʼahi lelei ʼo ʼuhiga mo te Petele. Pea ʼi taku tau atu ki ai, neʼe au logo fimalie atu aipe.
“FAKAHA AGE KI TE ʼU TEHINA ʼE KE ʼOFA IA NATOU”
Hili ta ʼu ʼe lua ki taku hu ki te Petele, neʼe au fetogi ai ia Bill Yacos ʼae neʼe ko te kootinatea ʼo he kokelekasio ʼi Toronto pea neʼe ko he tehina kua fotufotuʼa. Kaʼe neʼe kei au taʼu 23 pe, pea neʼe au lahilahi ake ko he tupulaga gaue kele, koia neʼe au logoʼi ai neʼe mole au tuha mo te gaue ʼaia. Kaʼe ʼaki he agaʼofa mo he agavaivai neʼe fakaha mai e te Tehina ko Yacos pe neʼe tonu ke feafeaʼi te gaue ʼaia. Pea neʼe tokoni lahi mai ai ia Sehova.
Ko te Tehina ko Yacos neʼe ko he tahi ʼe fua pukupuku pea mo mata malimali. Pea neʼe ʼofa ki te hahaʼi. Neʼe ʼofa ki te ʼu tehina pea neʼe natou ʼoʼofa ki ai. Neʼe tau alu ia ʼo fakasiosio natou, ʼo mole gata pe moka natou tau mo he ʼu fihifihia. Neʼe fakalotomalohiʼi au e Bill Yacos ke au toe fai feia pea mo kaugā gaue mo te ʼu tehina mo tuagaʼane ʼi te minisitelio. Neʼe ina ui fenei mai: “Ken, fakaha age ki te ʼu tehina ʼe ke ʼofa ia natou.” Pea neʼe ina toe ui mai kapau ʼe kita lotomahino pea ʼe kita fakamolemole gafua.
KO HE ʼOHOANA AGATONU MO HE KAUGANA AGATONU ʼA SEHOVA
Neʼe foaki mai e Sehova he tokoni ʼi hona aluʼaga makehe ʼi Sanualio 1957. ʼI te mahina pe ʼaia, neʼe au ʼohoana mo Evelyn, neʼe kau ʼi te 14 kalasi ʼo te Ako ʼo Kileate. Neʼe misionea ʼi te potu fenua ʼo Québec ʼae ʼe lea Fakafalani ʼi muʼa ʼo toma ʼohoana. Neʼe malohi foki ʼi ai te Lotu Katolika koia neʼe faigataʼa ai te faifakamafola. Kaʼe neʼe kataki pe ʼi tana gaue pea mo tauhi agatonu kia Sehova.
Neʼe au ʼohoana mo Evelyn ʼi te taʼu 1957
Neʼe toe agatonu ia Evelyn ʼi tana lagolago mai. (Efe. 5:31) ʼI ʼihi temi neʼe mole faigafua te faʼahi ʼaia. Ohage la, ʼi te ʼaho ake pe ʼo toma ʼohoana, neʼe kole mai e te filiale ke au alu ki te Petele ʼo Kanata ʼo kau ai ki te fono ʼe vahaʼa katoa. Kaʼe neʼe kua ma fakatuʼutuʼu foki ke ma olo ʼo malolō ʼi Floride, ʼi Amelika. Neʼe ma fetogi ai leva tamā fakatuʼutuʼu ʼo ma olo ki Brooklyn koteʼuhi neʼe ma fia fai pe te meʼa ʼae ʼe kole mai e Sehova. Neʼe faifakamafola ia Evelyn ʼo ovi ki te Petele lolotoga te vahaʼa ʼaia. Logo la neʼe mole tatau ia te telituale ʼaia mo Québec, kaʼe neʼe ina faigaʼi pe.
ʼI te fakaʼosi ʼo te vahaʼa ʼaia, neʼe au punamaʼuli he neʼe fakaha mai kua hinoʼi au ko te taupau ʼo te siliko ʼi te potu noleto ʼo Ontario. Neʼe mole au poto ʼi te gaue ʼaia, neʼe hoki au ʼohoana pe pea neʼe kei au taʼu 25 pe. Kaʼe neʼe ma falala kia Sehova pea mo olo ai. ʼI he ʼaho neʼe momoko kovi neʼe ma folau ai ʼi te saliote afi mo ni taupau feʼoloʼaki fotufotuʼa ʼae neʼe toe liliu ki ʼonatou telituale. Pea neʼe natou foaki mai ni fakalotomalohi lelei. Neʼe tuku mai e he tehina tona nofoʼaga ʼi te saliote afi ʼae neʼe maʼu ai he palepale he neʼe mole ina loto ke ma heheka ʼi te po katoa. ʼI te ʼaho ake, ohage ko taku fakamatala atu ʼi te ʼu ʼuluaki palalau, neʼe ma kamata ʼaʼahi te kiʼi kutuga ʼi Hornepayne, pea neʼe ko te hoki vahaʼa lua pe ʼaia ʼo tamā nofo ʼohoana.
Hili ki ai ni taʼu pea neʼe hoko ʼihi atu fetogi ʼi toma maʼuli. ʼI tamā fakahoko te gaue taupau ʼo te tisitilike ʼi te fakaʼosi ʼo te taʼu 1960, neʼe fakaafe au ke au kau ki te 36 kalasi ʼo te Ako ʼo Kileate ʼae ka kamata ʼi Fepualio 1961. Neʼe au fiafia ʼaupito ʼi te fealagia ʼae ke au ako te Tohi-Tapu lolotoga mahina ʼe hogofulu. Kaʼe meʼa fakaʼofaʼofa he neʼe mole fakaafe ia Evelyn ohage pe ko ʼihi atu fafine ʼohoana. Neʼe tonu ke ina fai he kiʼi tohi ʼo ina ui ai ʼe lotolelei ke nofo ʼi Kanata lolotoga taku ako ʼi Brooklyn ʼi New York. Neʼe tagi mamahi ia Evelyn ʼuhi ko te loaloaga ʼo taku puli kaʼe neʼe ina tali ke au kau ki te Ako ʼo Kileate he neʼe mahino kia ia ʼe ko he ako maʼuhiga.
Lolotoga taku nofo ʼi Brooklyn, neʼe gaue ia Evelyn ʼi te Petele ʼo Kanata. Neʼe ina maʼu ai te pilivilesio ʼae ke koga fale tahi mo te tuagaʼane fakanofo ko Margaret Lovell. ʼE mahino ia, neʼe faigataʼa kia maua tamā fevahamamaʼoʼaki. Kaʼe neʼe tokoni mai ia Sehova ke ma fakahoko tamā gaue. Pea neʼe malave kia au te lotolelei ʼa Evelyn ke ina fai ni sakilifisio maʼa Sehova.
Hili mahina ʼe tolu, neʼe au maʼu he pepa fakaafe mai te Tehina ko Nathan Knorr, ʼae neʼe ina takitaki te gaue faifakamafola fakamalamanei. Neʼe ina kole mai ke au toe liliu ki Kanata ʼo akoʼi te ʼu tehina ki te Ako ʼo Te Minisitelio ʼo Te Puleʼaga. Kaʼe neʼe ina ui mai ʼe lagi mole toe fakaafe anai au ki te Ako ʼo Kileate moka ʼosi taku akoʼi te ʼu tehina ʼi Kanata. Koia neʼe fakamahino mai e te Tehina ko Nathan Knorr ʼe mole ko he fakamaʼua ia. Neʼe feala pe taku fakaʼosi te Ako ʼo Kileate pea ʼe lagi hinoʼi anai au ki te gaue misionea. Neʼe ui mai e te tehina ke au faipalalau mo toku ʼohoana pea hoki feala leva haku fai he tonu.
Kaʼe neʼe mole he ʼuhiga ʼo taku faipalalau mo Evelyn ʼo ʼuhiga mo te faʼahi ʼaia koteʼuhi neʼe kua au iloʼi tana manatu. Kia maua, ʼe tonu ke ma olo ki te telituale pe ʼae ʼe fekauʼi maua ki ai e te kautahi ʼa Sehova tatau aipe pe ma leleiʼia peʼe kailoa. Koia neʼe au foimo tali fenei ki te Tehina ko Nathan Knorr, “ʼE ma fia fai pe te gaue ʼae ʼe tuku mai e te kautahi ʼa Sehova.”
Neʼe au toe liliu leva ki Kanata ʼo akoʼi te ʼu tehina ki te Ako ʼo Te Minisitelio ʼo Te Puleʼaga ʼi Apelili 1961. Ki muli age, neʼe fakaafe maua ke ma gaue ʼi te Petele ʼo Kanata. Pea neʼe ma punamaʼuli leva ʼi toku fakaafe ki te 40 kalasi ʼo Kileate ʼae ka kamata ʼi te taʼu 1965. Neʼe toe tonu ai kia Evelyn ke fai hana tohi moʼo fakamoʼoni ai ki tana tali ke nofo ʼi Kanata kaʼe au alu ki Brooklyn. Pea hili ki ai ni vahaʼa neʼe ma fiafia ʼaupito he neʼe toe fakaafe mo Evelyn ki Kileate.
ʼI tamā kamata te Ako ʼo Kileate, neʼe fakaha mai e te Tehina ko Knorr ʼe fekauʼi anai maua ki Afelika ʼo toe feia pe mo natou fuli ʼae neʼe natou lolotoga ako te Fakafalani. Kaʼe meʼa fakapunamaʼuli leva, neʼe fekauʼi maua ki Kanata. Neʼe kei au taʼu 34 pe pea neʼe fakanofo au ko te tehina taupau ʼo te filiale. Neʼe au ui age ki te Tehina ko Knorr neʼe kei au tupulaga, kaʼe neʼe ina tokoniʼi au ke au loto falala. Pea neʼe au kumi tokoni tuʼumaʼu ki te ʼu tehina fotufotuʼa ʼo te Petele ʼi muʼa ʼo te fai ʼo ni tonu maʼuhiga.
ʼE KITA LAVA AKO MO FAIAKO ʼI TE PETELE
Kua lahi te ʼu faʼahi lelei neʼe au ako mai te ʼu tehina mo tuagaʼane ʼuhi ko taku gaue ʼi te Petele. ʼE au fakaʼapaʼapa lahi ki te ʼu tehina ʼae ʼe matou gaue fakatahi ʼi te Komite ʼo Te Filiale. Neʼe au toe maʼu ni ako lelei mai te ʼu lau ʼi teau tehina mo tuagaʼane, tupulaga peʼe matutuʼa, ʼae neʼe au felaveʼi mo natou ʼi te Petele mo te ʼu kokelekasio kehekehe.
ʼE au takitaki te lau ʼo te koga tohi ʼo te ʼaho mo te famili ʼo te Petele ʼo Kanata
ʼI te Petele, neʼe au toe maʼu te fealagia ʼae ke au akoʼi pea mo tokoni ki ʼihi ke natou fakamalohiʼi tanatou tui kia Sehova. Neʼe ui fenei e te apositolo ko Paulo kia Timoteo: “Ke ke nofo mau i te u mea nee ke ako.” Pea neʼe ina toe ui fenei: “Ko te mea nee ke logo maia au, ia mua o he kau fakamooni kaugamalie, ke ke tuku ia ki he u tagata agatonu, ae e natou lavai tona fakaako foki ki ni ihi age.” (2 Tim. 2:2; 3:14) Kua taʼu 57 leva taku nofo ʼi te Petele. ʼE fehuʼi mai e ʼihi pe kotea te ako ʼe au taʼofi ai. Koʼeni taku tali: Kotou fai tuʼumaʼu te meʼa ʼae ʼe kole atu e te kautahi ʼa Sehova ke kotou fai. Pea kotou tui papau ʼe tokoni atu anai ia Sehova.
ʼE au manatuʼi lelei te ʼaho ʼae neʼe au hu ai ki te Petele. Neʼe kei au tupulaga mo aga ufiufi pea neʼe heʼeki au poto ʼi he meʼa. Kaʼe neʼe tokoni tuʼumaʼu mai ia Sehova talu mai te ʼu taʼu ʼaia. ʼO ina tau fakaʼaogaʼi he ʼu tehina mo tuagaʼane ʼofa moʼo lagolago mai moka neʼe ʼaoga. ʼE hage pe neʼe ui fenei mai e Sehova ʼi te ʼu lakaga ʼaia: “Aua naa ke mataku ki he mea, e au hau o tokoni kia koe.”—Esa. 41:13.
^ pal. 10 Neʼe toe fakagafua e te puleʼaga ʼo Kanata ki te kau Fakamoʼoni ʼa Sehova ke natou faifakamafola ʼi te taʼu 1945.