TOU fakakaukauʼi ia te aluʼaga ʼae neʼe hoko ʼi São Paulo ʼi Pelesile ʼi te taʼu 1923. Neʼe fonu te fale maholō ko te hahaʼi. Neʼe natou fakalogo ai ki te ʼu palalau matala lelei ʼa George Young. Pea neʼe fakaliliu tana akonaki ki te lea Portugais. ʼI te nofoʼaki neʼe ko te toko 585 neʼe fagono lelei pea mo natou lava lau te ʼu vaega Tohi-Tapu ʼae neʼe ha ʼi te foʼi televisio ʼi te lea Portugais. ʼI te ʼosi ʼo te fakatahi neʼe tufa ia kaupepa ʼe teau ʼi te lea Portugais ʼo te kiʼi kaupepa ʼaeni Ko Te Toko Lau ’i Miliona Hahaʼi ’e Ma’u’uli ’i Te Temi Nei ’e Mole Natou Mamate Anai!, mo ʼihi kaupepa ʼi te Fakapilitania, mo te Fakasiamani pea mo te Fakaitalia. Neʼe leleiʼia e te hahaʼi te akonaki ʼaia ʼo mafola ai te logo ʼo ʼuhiga mo te akonaki. Hili ki ai ʼaho ʼe lua pea neʼe toe kaugā malie mai ki te fale maholō ia natou ʼe fia logo ki te akonaki. Kaʼe kotea ʼae neʼe iku ki te ʼu aluʼaga ʼaia?

ʼI te taʼu 1867, neʼe mavae mai Amelika ia Sarah Bellona Ferguson mo tona famili ke olo ki Pelesile. ʼI te taʼu 1899 neʼe mahino kia Sarah kua ina maʼu te moʼoni ʼi tana ʼosi lau te ʼu tohi Fakatohi-tapu neʼe ʼaumai e tona kiʼi tokolua mai Amelika. Neʼe ina fia lau leva he tahi ʼu tohi, koia neʼe ina kole ai ke momoli tuʼumaʼu age Te Tule Leʼo ʼi te Fakapilitania. Neʼe fiafia ʼaupito ʼi tana malama ki te ʼu moʼoni Fakatohi-tapu ʼo ina tohi ki te Tehina ko Charles Russell ‘ko te aluʼaga neʼe hoko kia ia ʼe ha lelei ai, ʼe lava kaku te moʼoni ki te hahaʼi fuli tatau aipe pe natou nonofo mamaʼo.’

Neʼe faiga malohi e Sarah Ferguson ke ina fakaha te moʼoni ki ʼihi kaʼe neʼe feʼekeʼaki pe ko ai ʼae ka haʼu ʼo tokoni age ki ai mo tona famili pea mo te hahaʼi agalelei ʼo Pelesile. Pea ʼi te taʼu 1912, neʼe fakaha age e te Petele ʼo Brooklyn ʼe fekauʼi anai he tahi ki te kolo ko São Paulo ke alu ʼo ʼave te ʼu kiʼi pepa lotu ʼe lau ʼi afe ʼi te lea Portugais ʼE Olo Koa Kifea Te Kau Mate? ʼI te taʼu 1915, neʼe ina ui neʼe punamaʼuli pe ʼi te kei fakaʼamu ʼa te tokolahi ʼi te Kau Ako ʼo Te Tohi-Tapu kua natou vave hake ki selo. Neʼe ina fakaha ai leva tana manatu ʼo ina fakalavelave fenei: “Kaʼe ʼe feafeaʼi ki te hahaʼi ʼo Pelesile pea mo  Amelika Saute? . . . Moka kita fakakaukauʼi te kaugā malie ʼo natou ʼe maʼuʼuli ʼi Amelika Saute, ʼe ha lelei ai ʼe lahi te taʼukai ʼae ʼe tonu ke fai.” Neʼe lelei tana manatu, he neʼe lahi ʼaupito te taʼukai ʼae neʼe hoko ʼi te ʼu fenua ʼaia ki ʼamuli.

ʼI te teitei taʼu 1920, neʼe kau te ʼu solia tai ʼe toko valu ki ni fono ʼi New York kaʼe lolotoga faʼu tanatou vaka tau. Pea ʼi tanatou toe liliu ki Rio de Janeiro, neʼe natou fakaha ki ʼihi te ʼamanaki Fakatohi-tapu neʼe natou ako. Mole faʼa fualoa ki ai, ʼi Malesio ʼo te taʼu 1923, neʼe tau atu ki te koga meʼa ʼaia ia George Young, te tehina taupau feʼaluʼaki. Neʼe ina maʼu ai ʼihi hahaʼi neʼe natou fia iloʼi te moʼoni. Koia neʼe ina fakatuʼutuʼu ke fakaliliu ni tohi ki te lea Portugais. Ki muli age, neʼe alu ia te Tehina ko Young ki São Paulo ʼae neʼe nonofo ai te teitei toko 600 000 hahaʼi. Neʼe ina fai ai te akonaki pea mo tufa te ʼu kiʼi kaupepa Te Toko Lau ʼi Miliona Hahaʼi, ohage ko tona ui ʼi te kamata ʼo te alatike. Neʼe ina fakamatala fenei: “ʼUhi ko taku gaue tokotahi, neʼe fakalogo te fakaafe ʼo te hahaʼi ki taku fakahaha ia te ʼu akonaki ʼi te sulunale.” Neʼe ko “te ʼu ʼuluaki akonaki neʼe fakahaha ʼi Pelesile ʼaki te higoa ʼo totatou kautahi I.B.S.A.” *

ʼO ʼuhiga mo te gaue ʼi Pelesile, neʼe fakamatala fenei ʼi Te Tule Leʼo ʼo te ʼaho 15 ʼo Tesepeli 1923: “ʼE tou lava ui neʼe tapuakiʼi e te Aliki te gaue ʼi hona aluʼaga fakaofoofo, moka kita fakakaukauʼi ia te hoki kamata ʼo te gaue ʼi te ʼaho 1 ʼo Sunio kaʼe neʼe mole ʼi ai he tohi ʼi te lea ʼi te temi ʼaia.” Neʼe toe ui ai ko te ʼu akonaki ʼe lua ʼa te Tehina ko Young ʼi São Paulo neʼe kau ki te ʼu akonaki ʼe 21 neʼe fai mai te ʼaho 1 ʼo Sunio ki te ʼaho 30 ʼo Sepetepeli, pea neʼe kau ki ai te toko 3 600. Neʼe toe tuputupu te fakamafola ʼo te logo ʼo ʼuhiga mo te Puleʼaga ʼi Rio de Janeiro. Pea ʼi ni mahina pe, neʼe tufa ai ia tohi ʼe 7 000 tupu ʼi te lea Portugais. Tahi ʼae faʼahi, neʼe kamata ta Te Tule Leʼo ʼi te lea Portugais ʼaki te nusipepa ʼo Novepeli-Tesepeli 1923.

Neʼe ʼaʼahi e George Young ia Sarah Ferguson pea neʼe tala fenei ʼi Te Tule Leʼo: “ʼI te alu age ʼa te tuagaʼane ki te tehina, neʼe mole lava palalau age. Pea neʼe ina puke te nima ʼo te tehina mo haga sio ki tona fofoga, ʼo ui fenei age: ‘ʼE moʼoni koa la, ko koe ko he tehina taupau feʼaluʼaki?’ ” Mole faʼa fualoa ki ai pea neʼe papitema ia ia mo ʼihi ʼo ʼana fanau. Ko he faʼahi ia neʼe fakatalitali ki ai ia taʼu ʼe 25. Neʼe fakaha ʼi Te Tule Leʼo ʼo te ʼaho 1 ʼo ʼAukusito 1924, neʼe papitema ai te toko 50 hahaʼi ʼi Pelesile tafitō la ʼi Rio de Janeiro.

Ia ʼaho nei, kua hili ki ai taʼu ʼe 90 tupu, ʼe mole toe ʼaoga ke fai te fehuʼi ʼaeni: “Kaʼe ʼe feafeaʼi ki te hahaʼi ʼo Pelesile pea mo Amelika Saute?” Koteʼuhi ko te toko 760 000 tupu kau Fakamoʼoni ʼa Sehova ʼe natou fakamafola te logo lelei ʼi Pelesile. Pea ʼi te ʼu fenua fuli ʼo Amelika Saute, ʼe lava fagono te hahaʼi ki te logo ʼo ʼuhiga mo te Puleʼaga ʼi te ʼu lea Portugais, Fakasepania mo ʼihi atu lea ʼo te fenua. Neʼe moʼoni te ʼu palalau ʼae neʼe fai e Sarah Ferguson ʼi te taʼu 1915, ‘Neʼe kei lahi te taʼukai ʼae ʼe tonu ke fai.’—Mai tatatou tanaki’aga tohi ’i Pelesile.