ʼI TE taʼu 537 I.M.T.S., * ʼi te mavae ʼa te kau Iselaele mai Papilone, neʼe tokaga lelei ia Sehova ki tanatou toe fagona ʼae ki Selusalemi. Neʼe ina ui fenei kia natou: “Koutou teuteui he ala ki te hahai! Koutou fakaatea! Koutou fakaatea te ala, koutou too te u maka!” (Esa. 62:10) Kotea ʼape ʼae neʼe tonu ke natou fai ke natou mulimuli ki te fakatotonu ʼaia? Neʼe lagi muʼamuʼa he kutuga ia natou moʼo tanu te ʼu pu pea mo fakaʼatea te ala. ʼE mahalo ia ko te ʼu faiga ʼaia neʼe tokoni ki ʼonatou tehina ke faigafua tanatou toe fagona ʼae ki Selusalemi.

ʼE toe feia pe mo tatou, ʼe tou olo ʼi he ala ʼe tou tokakaga ai ki te ʼu gaue kehekehe ʼi te tauhi ʼae kia Sehova. Pea ʼe loto ia Sehova ke tou tokakaga ki te ʼu faʼahi ʼaia ʼaki tatatou tekeʼi te ʼu aluʼaga ʼae ʼe ina fakaleluʼi tatou. Ke fua lelei ʼatatou faiga, ʼe lelei ke tou maʼuliʼi te tokoni ʼaeni ʼi te Tohi-Tapu: “Fakatoka lelei te ala ʼae ʼe haʼele ai tou vaʼe, pea ʼe fua lelei anai ʼou ala fuli.”—Taag. 4:26, MN.

ʼE ui fenei ʼi te Tohi-Tapu: “Ko te malohi ko te kololia o te kau tupulaga.” (Taag. 20:29) Tokolahi te kau tupulaga ʼe natou hao mai te ʼu mahaki, mo malolohi, mo popoto pea mo natou fakaʼamu malohi ke maui malie tonatou maʼuli. ʼE tau tokagaʼi e te hahaʼi lalahi te ʼu fealagia pea mo te faiva ʼo te kau tupulaga pea ʼe natou fakaʼamu ke natou fakaʼaogaʼi katoa te ʼu faʼahi ʼaia. ʼE maʼuli fiafia moʼoni anai te kau tupulaga mo kapau ʼe natou fakaʼaogaʼi lelei tonatou poto pea mo ʼonatou fealagia ʼi te tauhi ʼae kia Sehova.

Ko ʼihi ʼi te malama, ʼe natou toe leleiʼia te ʼu fealagia pea mo te faiva ʼo te kau tupulaga. Ohage la, ʼe lahi te kau Fakamoʼoni ʼe lelei tanatou ako, pea ʼe lagi fakalotoʼi natou e te kau faiako pea mo ʼihi  kauga ako ke hoko atu tanatou ako ʼi te ʼu fale ako lalahi. Pea ki te kau tupulaga ʼae ʼe faiva ʼi te faigaoʼi, ʼe lagi uga natou e ʼihi ke natou filifili te faigaoʼi ko honatou maʼuliʼaga. ʼE lagi ʼe ke felaveʼi mo te aluʼaga ʼaia peʼe ko he tahi ʼe kolua feiloʼiʼaki. Kotea ʼae ka tokoni anai ki he Kilisitiano ke ina fai ni tonu fakapotopoto?

ʼE tokoni mai te ʼu pelesepeto Fakatohi-tapu ke tou muliʼi te ala ʼae ʼe ina taki tatou ki he ka haʼu taulekaleka anai ʼi te tauhi ʼae kia Sehova. ʼE ui fenei ia Ekelesiasi 12:3: “Ke ke manatui tou tupuaga i te temi o tou tupulaga.” ʼE feafeaʼi hau manatuʼi ia Sehova peʼe ko he tahi age tupulaga ʼe kolua feiloʼiʼaki?

Tou vakaʼi muʼa te maʼuli ʼa te tehina tupulaga ko Eric * ʼi te potu Uesite ʼo Afelika. Neʼe ina leleiʼia te ʼaka fitipolo. Pea ʼi tona taʼu 15 leva, neʼe kau ʼi te foʼi ʼaka ʼae ka alu ʼo gaoʼi ʼi te ʼu fenua tai. Neʼe feala pe ke kau ki he ako faigaoʼi ʼe lelei age ʼi Eulopa pea mo liliu ai ʼo faiva ʼi te ʼaka fitipolo. Kaʼe ʼi te temi ʼaia, neʼe kamata ako e Eric ia te Tohi-Tapu mo te kau Fakamoʼoni ʼa Sehova. Neʼe ina lava “manatui” feafeaʼi ia Sehova? Kotea te ako ʼe tou taʼofi mai tona maʼuli?

Neʼe ako e Eric ʼi te Tohi-Tapu, ʼe fakatokatoka anai e te ʼAtua te ʼu fihifihia fuli ʼo te malamanei. Pea neʼe mahino leva kia ia, ʼe maʼuhiga age ia te fai ʼo te finegalo ʼo te ʼAtua ʼi te ʼaka fitipolo. Koia neʼe papitema leva pea neʼe ina fakaʼaogaʼi tona temi pea mo tona malohi ki te tauhi ʼae kia Sehova. Pea ki muli age, neʼe liliu ko he faifekau fakaminisitelio ʼe tokoni ki te kokelekasio. Neʼe mole kau ki te ako ʼo te faigaoʼi ʼaka fitipolo, kaʼe neʼe kau leva ki te Ako Tohi-Tapu ʼo Te ʼu Tehina Selipatea.

Neʼe lagi feala pe ke paʼaga pea mo iloa ia Eric mo kapau neʼe liliu ʼo faiva ʼi te ʼaka fitipolo. Kaʼe neʼe mahino kia ia ʼe tonu te manatu ʼaeni ʼa te Tohi-Tapu: “Ko te koloa ko he kolo malohi ki te tagata mau koloa; e ina ui, ko he kaupa maoluga ia ia.” (Taag. 18:11) Ko te falā ʼe ina kakaʼi te hahaʼi. Koteʼuhi ʼe mole ina foaki te maʼuli fimalie moʼoni. Pea ko natou ʼae ʼe faiga ke paʼaga ʼe natou tau ‘to ki te u mamahi kehekehe.’—1 Tim. 6:9, 10.

ʼE lahi te kau tupulaga ʼe natou fiafia pea ʼe natou logo ʼe puipui natou ʼi te selevisi temi katoa. ʼE ui fenei e Eric: “Kua au kau ki he kau faigaoʼi ʼe faʼufaʼu e ni kaugana ʼa Sehova ʼi te selevisi temi katoa. Pea ʼe ko he foʼi gaoʼi ʼe mole hona tatau, koia ʼe au fakafetaʼi kia Sehova ʼi tana fakaha mai te ala pe ʼae ʼe taki ki te fiafia moʼoni.”

Kaʼe ʼe feafeaʼi kia koe? ʼE ke lava muliʼi koa te ala ʼae ʼe tokoni atu anai ke lahi age tau gaue ʼi te tauhi ʼae kia Sehova? Peʼe ke fai anai koa koe ni fakatuʼutuʼu ki te malama ʼaeni? ʼE feala koa ke ke faiga fakamalotoloto ke ke pionie?—Vakaʼi te fakamatala ʼae ʼi te ʼa takai “ Te ʼu Lelei ʼe Mole Maʼu ʼi Te Univelesite.”

Neʼe tokagaʼi e he taumatuʼa ia te maʼuli fiafia ʼa te kau Petelite ʼi tanā ʼaʼahi ia te Petele ʼo Amelika. Ki muli age, neʼe tohi fenei e te tuagaʼane: “Neʼe kua mā fimalie fau ʼi toma maʼuli.” Pea neʼe nā fai leva te tonu ʼae ke nā fakaʼaogaʼi lelei tonā temi pea mo tonā malohi ʼi te tauhi ʼae kia Sehova.

Neʼe faigataʼa ki te taumatuʼa hanā fai ni fetogi. Kaʼe ʼi te tahi ʼaho, neʼe nā fakakaukauʼi te ʼu palalau ʼaeni ʼa Sesu ia Soane 8:31: “Kapau e kotou nonofo mau i taku folafola, pea ko aku tisipulo mooni koutou.” Neʼe nā mahino ai neʼe tonu ke na fai ni sakilifisio mo kapau ko naua ko ni tisipulo moʼoni ʼa Sesu. Pea neʼe nā manatu fenei: “Ko te ʼu faʼahi fuli ʼae ʼe ta fakahoko ke ta maʼuli fakafeauga ai ʼe ko he ʼu sakilifisio ʼaoga ia.” Pea neʼe nā fakatau tonā toe ʼapi lahi, mo liakī ʼanā meʼa ʼae ʼe mole hona ʼaoga, pea mo nā olo ki he kokelekasio ʼe ʼaoga ki ai he tokoni. ʼI te temi nei, kua nā pionie. ʼE nā toe tokoni ki te laga ʼo te ʼu Fale Fono pea mo te ʼu gaue ki te ʼu fakatahi fakatisilike. Kotea ʼe nā logoi ʼi te ʼu fetogi ʼae neʼe nā fai? “ʼE ma punamaʼuli ki te fiafia ʼae ʼe ma maʼu ʼi tamā maʼuli fakafeauga ʼuhi pe he ʼe ma fai te ʼu faʼahi ʼae ʼe uga mai e te kautahi ʼa Sehova ke ma fai.”

Neʼe tohi fenei e Salomone: “ʼE tonu ke sio fakahagatonu ʼou mata, ʼei ko ʼou mata ʼe tonu ke na sio maʼu ki muʼa.” (Taag. 4:25, MN) Kotea tona fakaʼuhiga? ʼE tonu ke tou nonofo maʼu ʼi te ala ʼae ʼe tokoni mai anai ke lahi age tatatou gaue ʼi te tauhi ʼae kia Sehova. ʼE tonu ke tou tekeʼi te ʼu aluʼaga ʼae ʼe ina fakaleluʼi tatou ke tou fakahoko ʼatatou fakatuʼutuʼu.

 Kotea te ʼu fakatuʼutuʼu ʼe feala ke ke fai? Lagi ʼe feala ke ke toʼo te selevisi temi katoa. Peʼe lagi feala ke ke alu ki he kokelekasio ʼe lahi ai te telituale kaʼe ʼe tokosiʼi te kau faifakamafola. Kapau ko koe ko he tehina, ʼe lagi feala ke ke alu ki he kokelekasio ʼe ʼaoga ki ai ni faifekau fakaminisitelio peʼe ko ni tagata ʼafeā. ʼE feala ke ke palalau mo te taupau ʼo te siliko ke ina vakaʼi te ʼu kokelekasio ʼae ʼe ʼaoga ki ai he tokoni. Kapau ʼe ke fia tokoni ki he kokelekasio ʼe vaha mamaʼo mo tou nofoʼaga, ʼe feala ke ke kumi he tahi ʼu fakamahino ʼo ʼuhiga mo te kokelekasio ʼaia.

Tou toe fakakaukauʼi age muʼa te aluʼaga ʼae ʼe tuʼu ia Esaia 62:10. Ko ʼihi ʼi te kau Sutea neʼe lagi tonu ke natou gaue kinakina moʼo fakaʼatea te ala ke feala hanatou kaku ki Selusalemi. Ia ʼaho nei, ʼe toe ʼaoga kia koe ke ke haga faiga malohi moʼo fakahoko ʼau fakatuʼutuʼu. ʼAua naʼa ke lotovaivai. ʼE feala ke ke fakahoko te ʼu fakatuʼutuʼu ʼaia ʼaki te tokoni ʼa Sehova. ʼI tau faiga ʼae ke ke tekeʼi ni aluʼaga ʼe ina fakaleluʼi koe, kole te poto ʼa Sehova. Pea ʼe ke sio anai pe ʼe lava tokoni feafeaʼi atu ia te ʼAtua ke ke “fakatoka lelei te ala ʼae ʼe haʼele ai tou vaʼe.”—Taag. 4:26, MN.