1, 2. Kotea ʼae ʼe logoʼi e Sehova ʼo ʼuhiga mo ʼana kaugana takitokotahi?

MOKA sioʼi e te ʼu matuʼā te ʼu temi gaoʼi ʼo ʼanatou fanau, pea ʼe natou punamaʼuli ki te ʼu fealagia ʼae ʼe natou maʼu. Neʼe lagi kua ke sio pe ki he faʼahi feia. ʼE lagi ko he tamasiʼi ʼe faigaoʼi lelei kaʼe ʼe lagi leleiʼia e te tahi ia te fai pakī peʼe ko ʼihi atu ʼu meʼa. Pea ʼe fiafia te ʼu matuʼā ʼi te tokoni ki ʼanatou fanau ke natou fakaʼaogaʼi ʼonatou fealagia fuli peʼe ke natou fai te ʼu meʼa ʼae ʼe natou lavaʼi.

² ʼI tona ʼuhiga tamai ʼofa, ʼe tokaga ia Sehova ki ʼana kaugana. Kia Sehova ʼe natou maʼuhiga peʼe ko ni “koloa” ʼuhi ko tanatou nofo agatonu. (Ake. 2:7) Pea neʼe lagi kua ke tokagaʼi ʼe maʼu e ʼotatou tehina mo tuagaʼane ni fealagia kehekehe. Ohage la, ko ʼihi tehina ʼe natou faiakonaki lelei pea mo poto ʼi te fakaalualu ʼo ni fakatuʼutuʼu. Tokolahi te ʼu tuagaʼane ʼe natou faiva ʼi te ako ʼo ni lea matapule pea ko ʼihi ʼe natou tokakaga kia natou ʼae ʼe mahahaki peʼe natou fakalotomalohiʼi ʼihi. (Loma 16:1, 12) ʼE tou lotofakafetaʼi lahi ʼi tatatou kau ʼi he kokelekasio ʼe maʼu ai te ʼu faʼahiga tehina mo tuagaʼane ʼaia.

3. Ko te ʼu fehuʼi fea ʼae ka tou vakaʼi anai ʼi te alatike ʼaeni?

 ³ Ko ʼihi Kilisitiano, tafitō te kau tupulaga peʼe ko natou ʼae neʼe hoki papitema, ʼe lagi natou logoʼi ʼe mole honatou ʼaoga ʼi te kokelekasio. ʼE tou lava tokoni feafeaʼi kia natou ke natou fakaʼaogaʼi ʼonatou fealagia fuli? He ko ʼe ʼe tonu ke tou faiga ke tou faʼifaʼitakiʼi ia Sehova pea mo tokagaʼi te ʼu kalitate ʼo ʼotatou tehina?

4, 5. Kotea ʼae neʼe sio ki ai ia Sehova ʼo ʼuhiga mo Seteone? Kotea te ako ʼe tou taʼofi mai te faʼifaʼitaki ʼa Sehova?

⁴ ʼE fakaha ʼi te Tohi-Tapu ʼe mole gata pe te tokagaʼi e Sehova te ʼu kalitate ʼo ʼana kaugana kaʼe mo ʼonatou fealagia foki. Ohage la, neʼe filifili e Sehova ia Seteone ke ina fakaʼateaina te kau Iselaele mai ʼonatou fili ia te kau Matiane. Kaʼe ʼi te manatu ʼa Seteone neʼe mole hona ʼuhiga koia neʼe lagi punamaʼuli ai ʼi te ui fenei age e te ʼaselo: “E nofo [Sehova] mo koe, tagata lotomalohi mo toa!” Kia Seteone neʼe mole “lotomalohi” ia pea neʼe mole feala ia ke ina haofaki te hahaʼi ʼa te ʼAtua. Kaʼe neʼe kehe te sio ia ʼa Sehova. Koteʼuhi neʼe sio ia ʼe lavaʼi anai e Seteone te faʼahi ʼaia pea neʼe ina iloʼi ʼe feala ke Ina fakaʼaogaʼi ia ia moʼo haofaki te kau Iselaele.—Lau ia Tui Fakamaau 6:11-16.

⁵ Ko Sehova neʼe falala katoa kia Seteone koteʼuhi neʼe Ina iloʼi ʼona fealagia. Ohage la, neʼe sio ia Sehova neʼe gaue malohi ia Seteone ʼi te temi ʼae neʼe ina haha ai pea mo teuteuʼi ai te fulumeto. Pea ʼi te agamahani ʼe gaue te kau gaue kele ʼi tuʼa. Kaʼe neʼe teuteuʼi e Seteone te fulumeto ʼi te tatauʼaga ʼo te vino ke ʼaua naʼa sisio ki ai te kau Matiane pea mo natou kaihaʼa. Kaʼe neʼe mole gata pe te sio ʼa Sehova ki te faʼa gaue ʼa Seteone. Neʼe ko he tagata ʼatamai neʼe lava mahino ki ni aluʼaga pea neʼe ina lava fai ni tonu fakapotopoto ke hao mai he tuʼutamaki. ʼE moʼoni neʼe sio ia Sehova ki te ʼu fealagia ʼa Seteone pea mo ina akoʼi ia ia.

6, 7. (1) Kotea ʼae neʼe kehekehe ai ia te manatu ʼa Sehova pea mo ʼihi Iselaele ʼo ʼuhiga mo Amosi? (2) ʼE tou iloʼi feafeaʼi neʼe mole hala te filifili ʼae ʼo Amosi?

⁶ ʼO toe feia pe, neʼe sio ia Sehova ki te ʼu fealagia ʼae neʼe maʼu e te polofeta ko Amosi. Maʼa te tokolahi, neʼe lagi ko he tahi neʼe aga fakapulipuli peʼe mole faʼa maʼuhiga. Neʼe ko he tagata tauhi ovi pe ia mo gaue kele. Kaʼe neʼe hinoʼi e Sehova ia Amosi ke ina fakatonutonuʼi te ʼu telepi ʼe hogofulu ʼae neʼe mole kei natou tauhi kia te Ia. Neʼe lagi manatu e ʼihi kau Iselaele neʼe hala te filifili ʼo Amosi. Kotea tona tupuʼaga?—Lau ia Amosi 7:14, 15.

⁷ Neʼe maʼuli ia Amosi ʼi he kolo ʼe tuʼu mamaʼo. Kaʼe neʼe lahi te ʼu faʼahi neʼe ina iloʼi ʼo ʼuhiga mo te ʼu aga ʼi fenua pea mo te ʼu pule ʼi ʼona tafaʼaki. Neʼe lagi ina iloʼi te ʼu faʼahi ʼaia mai ni tagata faikoloa neʼe fakalaka ʼi tona kolo. Ohage la, neʼe lahi te ʼu faʼahi neʼe iloʼi e Amosi ʼo ʼuhiga mo te ʼu puleʼaga ʼae neʼe tuʼu ovi age pea mo te ʼu aluʼaga kovi ʼae neʼe hoko ʼi Iselaele. (Amo. 1:6, 9, 11, 13; 2:8; 6:4-6) Pea tahi, neʼe ko he tagata faitohi lelei. Neʼe feala hana fakaʼaogaʼi ni kupu ʼe mahino gafua kaʼe ʼe malohi. Pea neʼe mole mataku ia ʼi te tauteaʼi ʼo te pelepitelo agakaka ko Amatesia. ʼE mahino ia neʼe lelei te fili e Sehova ia Amosi moʼo tala ia tana logo. Koteʼuhi neʼe sio ia ki te ʼu fealagia ʼo Amosi ʼae neʼe lagi mole sisio ki ai ʼihi.—Amo. 7:12, 13, 16, 17.

8. (1) Kotea ʼae neʼe fakapapau e Sehova ke ina fai maʼa Tavite? (2) He ko ʼe ʼe fakalotomalohi ia te Pesalemo 32:8 kia natou ʼae ʼe lagi mole loto falala ʼo ʼuhiga mo ʼonatou fealagia?

⁸ ʼE tokagaʼi e Sehova te ʼu fealagia ʼo ʼana kaugana fuli pea ʼe fia tokoni kia natou fuli ke natou fai te ʼu meʼa ʼae ʼe natou lavaʼi. Ohage la, neʼe fakapapau e Sehova ʼe ina takitaki anai ia Tavite pea mo tokoni anai ki ai.  (Lau ia Pesalemo 32:8.) He ko ʼe ʼe ko he fakalotomalohi ʼaia kia tatou? Koteʼuhi tatau aipe pe lagi tou manatu ʼe mole tou fealagia he faʼahi, kaʼe ʼe lava tokoni mai ia Sehova ke tou lavaʼi te faʼahi ʼaia. Ohage la, ko he tagata faiako lelei ʼe ina takitaki he tahi ʼe ako ʼi te ʼu faʼahi fuli ʼae ʼe ina fai ʼuhi ʼe heʼeki fakapotopoto. ʼO toe feia pe mo Sehova ʼe ina takitaki tatou ke feala hatatou fakaʼaogaʼi ʼotatou fealagia fuli. Pea ʼe lagi ina fakaʼaogaʼi te ʼu tehina mo tuagaʼane moʼo tokoni mai ke tou fakohoko te faʼahi ʼaia. ʼO feafeaʼi?

9. ʼE feafeaʼi hatatou tokakaga ki te ʼu aluʼaga ʼo ʼotatou tehina mo tuagaʼane?

⁹ Neʼe ʼekenaki e te apositolo ko Paulo ia te kau Kilisitiano fuli ke natou tokakaga ki te ʼu aluʼaga ʼo ʼonatou tehina mo tuagaʼane. (Lau ia Filipe 2:3, 4.) Kotea te fakaʼuhiga ʼo te tokoni ʼaia? ʼE tonu ke tou tokagaʼi pea mo tou fakaha age ki ʼotatou tehina ʼonatou fealagia. Kotea ʼae ʼe ke logoʼi moka tokagaʼi e he tahi hou kalitate? ʼE mahino ia ʼe ke fia tuputupu anai ʼi te faʼahi fakalaumalie. Pea ʼe toe feia ki ʼotatou tehina. Kapau ʼe tou tokagaʼi te ʼu faiga ʼo ʼotatou tehina, ʼe natou lotomalohi anai ʼo natou tuputupu pea mo lava lelei ai ia tanatou tauhi ʼae kia Sehova.

10. Ko ai tafitō ʼae ʼe ʼaoga ke tou tokakaga ki ai?

¹⁰ ʼI ʼihi temi, ʼe ʼaoga kia tatou fuli ke tokaga mai ʼihi. Kaʼe ʼe ʼaoga tafitō ki te kau tupulaga peʼe ko te ʼu tehina ʼae neʼe hoki papitema ke natou logoʼi ʼe natou lagolago ki te kokelekasio. Pea ʼe tokoni anai te faʼahi ʼaia kia natou ke natou mahino ʼe ʼi ai tonatou ʼaoga ʼi te hahaʼi ʼa Sehova. ʼE fakalotomalohiʼi te ʼu tehina ʼaia ʼi te Tohi-Tapu ke natou fakaʼamu ki ni gaue ʼi te kokelekasio. (1 Tim. 3:1) Kaʼe kapau ʼe natou logoʼi ʼe mole ofainaʼi natou ʼi te ʼu gaue ʼae ʼe natou fakahoko, ʼe feala ke natou lotovaivai ʼo mole kei lahi ai te ʼu gaue ʼae ʼe natou fai ʼi te tauhi kia Sehova.

11. (1) Neʼe tokoni feafeaʼi te tagata ʼafeā ki he tupulaga ke tuputupu ʼi te faʼahi fakalaumalie? (2) Kotea te ako ʼe ke lava taʼofi mai te faʼifaʼitaki ʼa Julien?

¹¹ ʼE ui e te tagata ʼafeā ʼe higoa ko Ludovic moka tokaga fakamalotoloto ki he tehina, pea ʼe vave age ia tana tuputupu. Ohage la ko Julien. Neʼe tokagaʼi e Ludovic ko Julien neʼe aga ufiufi pea ʼi te temi ʼae neʼe faiga ai ke lahi age ʼana gaue ʼi te kokelekasio, neʼe hage ia neʼe mole kei ina iloʼi te meʼa ʼae ʼe ina fai. Kaʼe ko Ludovic, neʼe sio ia ki te agalelei ʼae ʼa Julien pea mo tana fia tokoni ki ʼihi. Koia neʼe tokagaʼi tafitō e Ludovic ʼona kalitate pea mo fakalotomalohiʼi ia Julien kaʼe neʼe mole ina valokiʼi ia ia. Neʼe feala ai ke liliu ia Julien ko he faifekau fakaminisitelio pea ki muli age ko he pionie katoa.

12. Kotea ʼae ʼe tonu ke tou fai moʼo tokoni ki ʼotatou tehina? Tuku mai he faʼifaʼitaki.

¹² Kapau ʼe tou fia tokoni ki ʼotatou tehina ke natou fakaʼaogaʼi ʼonatou fealagia fuli, ʼe ʼaoga foki ke tou tokagaʼi ʼonatou fealagia. Tou kumi ʼonatou kalitate mo ʼonatou fealagia kaʼe ʼaua tatatou tokagaʼi ʼonatou vaivaiʼaga. Neʼe fai feia ia Sesu ki te apositolo ko Petelo. ʼI ʼihi temi, neʼe hage ia Petelo neʼe mole tuha mo te falala. Kaʼe neʼe sio ia Sesu ki ʼona kalitate pea neʼe ina ui ʼe liliu anai ia Petelo ʼo malohi ohage he utu.—Soa. 1:42.

13, 14. (1) Neʼe kotea te manatu ʼa Palenapa ʼo ʼuhiga mo te tupulaga ko Maleko? (2) Neʼe fua lelei feafeaʼi kia Alexandre ia tona tokoniʼi e te tagata ʼafeā? (Vakaʼi te ʼuluaki pakī.)

¹³ Tou vakaʼi mo te faʼifaʼitaki ʼa Palenapa pea mo Maleko. (Gaue 12:25) Neʼe tonu ke tokaga ia Maleko ki te ʼu meʼa ʼae neʼe ʼaoga kia Paulo pea mo Palenapa ʼi tanā ʼuluaki folau fakamisionea. Kaʼe fokifa pe ʼi tanatou kaku atu ki te koga meʼa ʼo Pafilia, neʼe liakī naua e Maleko. Neʼe tonu ai kia Paulo mo Palenapa ke nā folau tokolua pe ʼi he koga  meʼa ʼe tuʼutamakiʼia. (Gaue 13:5, 13) Kotea ʼae neʼe fai e Palenapa ki muli age? Neʼe ina tokagaʼi tafitō te ʼu kalitate ʼo Maleko kaʼe mole ko ʼona vaivaiʼaga. Pea kia ia ʼe tuha ia Maleko mo te falala. Kaʼe neʼe ina akoʼi ia Maleko pea neʼe liliu ai ia ia ko he Kilisitiano ʼe malohi ʼi te faʼahi fakalaumalie. (Gaue 15:37-39) ʼI ni taʼu ki muli age, neʼe tokoni ia Maleko kia Paulo ʼi te temi ʼae neʼe pilisoni ai ʼi Loma. Pea ʼi te temi ʼae neʼe faitohi ai ia Paulo ki te kau Kolose, neʼe palalau lelei ʼo ʼuhiga mo Maleko. (Kol. 4:10) Fakafuafua age muʼa ia te fiafia ʼae neʼe maʼu e Palenapa ʼi te kole ʼae e Paulo ke tokoni age ia Maleko.—2 Tim. 4:11.

¹⁴ Neʼe manatuʼi e te tagata ʼafeā ko Alexandre ia te tokoni age ʼa te tehina. Neʼe ina ui fenei: “ʼI taku kei tupulaga, neʼe faigataʼa kia au haku faikole ʼi muʼa ʼo te kaugā malie. Neʼe fakamahino mai e te tagata ʼafeā pe feafeaʼi haku teuteu ki ai pea mo logo fimalie. Neʼe mole ina tukunoaʼi au, kaʼe neʼe ina tuku mai te faigamalie ʼae ke au tau faikole ʼi te ʼu fono faifakamafola. ʼAki te temi, neʼe au liliu ai ʼo lotomalohi.”

15. Neʼe fakaha feafeaʼi e Paulo ʼe maʼuhiga kia ia ʼona tehina?

¹⁵ Kotea ʼae ʼe ke fai moka ʼe ke tokagaʼi te ʼu kalitate ʼo ʼihi Kilisitiano? ʼE ke haga koa ʼo vikiʼi natou? ʼI te kapite 16 ʼo te tohi ʼo Loma neʼe fakamoʼoni ai ia Paulo ko te toko 20 tupu ʼu tehina mo tuagaʼane ʼe maʼuhiga kia ia ʼuhi ko ʼonatou kalitate. (Loma 16:3-7, 13) Ohage la, neʼe vikiʼi e Paulo ia Atoloniko mo Suniasi koteʼuhi neʼe kua fualoa age tanā tauhi ʼae kia Kilisito ia ia pea neʼe nā faʼa kataki. Neʼe toe talanoa foki ia Paulo ki te faʼe ʼa Lufusi ʼae neʼe tokaga lelei kia ia.

16. Kotea ʼae ʼe feala ke hoko moka tou vikiʼi te kau tupulaga?

¹⁶ Moka tou vikiʼi ʼihi, pea ʼe toe feala foki ke fua lelei. Tou vakaʼi te faʼifaʼitaki ʼa Rico. Ko he kiʼi tama ʼe nofo ʼi Falani pea ko tana tamai neʼe mole tauhi kia Sehova. Neʼe lotovaivai ʼaupito ia Rico koteʼuhi neʼe mole loto e tana tamai ke papitema. Pea neʼe tuʼania ia naʼa fakatalitali anai ke hoki lahi moʼo fakahoko te faʼahi ʼaia. Neʼe toe lotomamahi foki ia Rico ʼi te haga ʼa te tamaliki ʼi te fale ako ʼo fakalainoaʼi ia ia ʼuhi ko te ʼu akonaki ʼae neʼe tui ki ai. Kaʼe neʼe vikiʼi ia ia e te tagata ʼafeā ʼe higoa ko Frédéric. Neʼe ina ui kia Rico ʼe ha ʼi te fakafeagai ʼae neʼe tau mo ia neʼe lototoʼa koteʼuhi neʼe ina fakaha ia tana tui. Pea ʼuhi ko te ʼu palalau fakalotomalohi ʼaia, neʼe fakatotonu ai e Rico ke haga tuputupu ʼi te faʼahi fakalaumalie pea mo lelei ʼana felogoʼi mo tana tamai. Pea neʼe papitema leva ia Rico ʼi tona taʼu 12.

17. (1) ʼE tou lava tokoni feafeaʼi ki ʼotatou tehina ke toe lahi age tanatou tauhi ʼae kia Sehova? (2) Neʼe tokoni feafeaʼi te tehina misionea ki ni tehina tupulaga? Neʼe kotea ʼona fua?

¹⁷ ʼI te temi fuli pe ʼae ʼe tou vikiʼi ai ʼotatou tehina ki he gaue neʼe natou fakahoko leleiʼi, ʼe uga ai anai natou ke toe lahi age tanatou tauhi ʼae kia Sehova. Ko Sylvie ʼae neʼe gaue lolotoga ni taʼu ʼi te Petele ʼi Falani, ʼe ina ui ʼe toe feala pe foki mo te ʼu tuagaʼane ke natou  vikiʼi te ʼu tehina. * Pea kia ia neʼe ko hona maʼua ʼaia. (Taag. 3:27) ʼE tau tokagaʼi e te ʼu tuagaʼane ni faʼahi ʼe lagi mole tokagaʼi e te ʼu tehina. Koia moka vikiʼi e te ʼu tuagaʼane te ʼu faiga ʼa te ʼu tehina, ʼe feala ke toe tokoni ki te ʼu fakalotomalohi ʼae ʼe feala ke fai e te ʼu tehina fakapotopoto. Ko Jérôme, ʼe ko he tehina misionea ʼi Guyane Fakafalani neʼe tokoni ki ni tehina tupulaga ke natou fakatuʼutuʼu ke natou misionea. Neʼe ina ui ʼi te temi ʼae ʼe ina vikiʼi ai ni tehina tupulaga ki he faʼahi tafitō neʼe natou fai ʼi te minisitelio peʼe ko ʼanatou faitali lelei, ʼe lahi ai tanatou lotomalohi pea mo hikihiki ai ʼonatou fealagia.

18. He ko ʼe ʼe lelei ke tou gaue fakatahi mo te ʼu tehina tupulaga?

¹⁸ ʼE feala ke tou toe fakalotomalohiʼi ʼotatou tehina ke natou tuputupu ʼo tou gaue fakatahi mo natou. Ohage la, ʼe feala ke kole e he tagata ʼafeā ki he tehina tupulaga ke ina toʼo mai tatatou tuʼasila jw.org ʼi te Neti, ni alatike ʼe tokoni anai ki te ʼu tehina mo tuagaʼane matutuʼa ʼae ʼe mole ʼi ai hanatou olotinatea. Peʼe feala ke ke kole ki he tehina tupulaga ke tokoni ki te fakamaʼa peʼe ki te toe faʼu ʼo te Fale Fono. Koia moka ʼe ke faiga ke ke gaue fakatahi mo te kau tupulaga, ʼe ke maʼu ai anai he faiga malie ke ke tokagaʼi ʼonatou fealagia, mo vikiʼi natou pea mo sio ki tanatou tuputupu ʼi te faʼahi fakalaumalie.—Taag. 15:23.

19, 20. He ko ʼe ʼe tonu ke tou tokoni ki ʼihi ke natou tuputupu?

¹⁹ Neʼe filifili e Sehova ia Sosue ke ina takitaki te kau Iselaele. ʼI te temi ʼaia, neʼe fakatotonu e te ʼAtua kia Moisese ke ina akoako, mo “tokoni” pea mo “fakamalohii” ia Sosue. (Lau ia Tetelonome 3:28.) Ia ʼaho nei, kua hahaʼi ia natou ʼae ʼe ʼatolasio kia Sehova. Pea ʼe ʼaoga ke ʼi ai ni tehina faiva moʼo takitaki ʼi te kokelekasio fakamalamanei. Koia ʼe tonu kia tatou fuli ʼi te kokelekasio ke tou tokoni ki te ʼu tehina tupulaga peʼe ko te ʼu tehina ʼae neʼe hoki papitema ke natou fakaʼaogaʼi ʼonatou fealagia fuli. Pea ʼe kaugā malie ai anai te kau pionie katoa pea mo te ʼu tehina ʼae ka natou faiva anai ʼi te akoʼi ʼo ni ʼihi.—2 Tim. 2:2.

²⁰ Tatau aipe pe tou kau ki he kokelekasio ʼe maʼu ai ni tehina faiva peʼe ki he kiʼi kutuga, kaʼe ʼe feala hatatou lagolago ki te kokelekasio fakamalamanei ʼo ʼuhiga mo te ʼu meʼa ʼae ʼe ʼaoga ki ai ʼi te ka haʼu. Pea ke feala hatatou fakahoko te faʼahi ʼaia, ʼe tonu ke tou faʼifaʼitakiʼi ia Sehova pea mo tou tokagaʼi te ʼu faʼahi ʼae ʼe lelei ʼi ʼihi.