KO KATHERINE neʼe lahilahi ake ʼi Amelika pea neʼe papitema ʼi tona taʼu 16 ʼo liliu ai ko he Fakamoʼoni ʼa Sehova. Neʼe maʼuhiga kia ia ia tana minisitelio, kaʼe ʼi te koga meʼa ʼae neʼe faifakamafola ai, neʼe mole tali leleiʼi ia te logo lelei ʼo te Puleʼaga. ʼE ina ui fenei: “Neʼe au lau te ʼu fakamatala ʼo ʼuhiga mo te hahaʼi ʼae neʼe natou faikole ke fekauʼi e te ʼAtua ia he tahi, moʼo tokoni kia natou ke natou iloʼi ia te ia. Pea neʼe au tau fakaʼamu ke au felaveʼi mo he tahi feia, kaʼe neʼe mole hoko ia.”

Hili ki ai ni taʼu ʼi tana faifakamafola ʼi te telituale ʼaia, neʼe manatu leva ia Katherine ke alu ki he koga meʼa ʼe lahi ai anai te tali leleiʼi ʼo te logo lelei ʼo te Puleʼaga. Kaʼe neʼe feʼekeʼaki pe feala anai hana fakahoko te faʼahi ʼaia. Koteʼuhi neʼe kua mavae tuʼa tahi pe mai tona famili lolotoga vahaʼa ʼe lua pea ʼi te ʼaho fuli neʼe ina manatuʼi tona famili. Kaʼe neʼe malohi age pe ia tana fia maʼu te fiafia ke tokoni kia natou ʼae ʼe natou kumi ia Sehova. ʼI tana ʼosi vakavakaʼi te ʼu koga meʼa kehekehe ʼae neʼe feala ke alu ki ai, neʼe faitohi ai leva ki te Petele ʼo Guam pea mo ina maʼu mai ai ia te ʼu fakamahino neʼe ʼaoga kia ia. Pea ʼi te mahina ʼo Sulio 2007 ʼi tona taʼu 26, neʼe alu ai ia Katherine ki Saipan, ko he motu ʼo te Tai Pasifika ʼe vaha mo tona ʼapi ia kilometa ʼe 10 000. Kotea ʼae neʼe hoko?

ʼE mole faʼa fualoa ki te kaku atu ʼa Katherine ki tana kokelekasio foʼou, neʼe felaveʼi mo te fafine neʼe taʼu 40 tupu ʼe higoa ko Doris pea neʼe ina tali ke fai hana ako Tohi-Tapu. Hili tanā ako ia te ʼu ʼuluaki kapite ʼe tolu ʼo te tohi Te Ako Mai Te Tohi-Tapu, neʼe loto hoha ia Katherine. ʼE ina fakamatala fenei: “ʼI te hoholo lelei ʼo te ako ʼa Doris, neʼe mole au fia fai ai ia he meʼa ʼe feala ke fakatupu kovi ki tana ako. Neʼe heʼeki au fai he ako Tohi-Tapu ʼe fai tuʼumaʼu pea kia au ʼe ʼaoga ia ke fai ia te ako ʼa Doris e he tahi ʼe poto age ia au pea mo nā taʼu tahi.” Neʼe kole tokoni ai ia Katherine kia Sehova ke ina maʼu ia he tuagaʼane ʼae ka ina tuku anai ki ai tana ako. Pea neʼe ina fakatotonu ke ina fakaha te faʼahi ʼaia kia Doris.

ʼE fakamatala fenei e Katherine: “ʼI muʼa ʼo taku palalau age ki te faʼahi ʼaia, neʼe ui mai e Doris ʼe fia faipalalau mo au ki he fihifihia. ʼI taku ʼosi fagono ki ai, neʼe au fakaha age pe neʼe tokoni feafeaʼi mai ia Sehova ke au tauʼi he aluʼaga feia ʼi toku maʼuli. Neʼe fakamalo mai.” Pea neʼe ui fenei mai e Doris: “Neʼe tokoni mai ia Sehova ʼaki tana fakaʼaogaʼi ia koe. ʼI te ʼuluaki ʼaho ʼae neʼe ke haʼu ai ki toku ʼapi, neʼe kua fualoa taku lolotoga lau te Tohi-Tapu. Neʼe au tagi ʼo au kole ki te ʼAtua ke ina fekauʼi mai he tahi moʼo tokoni mai ke au mahino ki te Tohi-Tapu, pea mo tau tukituki mai ia toku matapa. Neʼe tali ia Sehova ki taku faikole!” Lolotoga te fakamatala e Katherine ia te aluʼaga malave loto ʼaia,  neʼe tagi. ʼE ina ui fenei: “Ko te ʼu palalau ʼa Doris, neʼe ko te tali ʼaia ʼo taku faikole. Neʼe fakaha mai e Sehova neʼe feala pe taku hoko atu te ako.”

Neʼe papitema ia Doris ʼi te taʼu 2010 pea ʼe lahi nei te ʼu ako Tohi-Tapu ʼe ina fai. ʼE ui fenei e Katherine: “ʼE au loto fakafetaʼi kia Sehova koteʼuhi ko taku fakaʼamu ʼae ke au tokoni ki he tahi ʼe fia kaugana kia Sehova, kua hoko moʼoni ia!” Ia ʼaho nei, ʼe fiafia ia Katherine he ʼe pionie makehe ʼi te motu ʼo te Pasifika ko Kosrae.

Ko tehina mo tuagaʼane ʼe toko teau tupu mai ʼihi atu fenua, (mai te taʼu 19 ki te taʼu 79) ʼe natou faifakamafola ʼi te ʼu koga meʼa ʼae ʼe ʼaoga lahi ai ni kau faifakamafola ʼi Micronésie. Pea ko te ʼu manatu ʼa te kau gaue faʼafai ʼaia ʼe fakaha lelei ʼe Erica, ʼae neʼe alu ki Guam ʼi te taʼu 2006 ʼi tona taʼu 19. ʼE ina ui fenei: “ʼE ko he meʼa fakafiafia ʼaupito moka kita pionie ʼi he telituale ʼe uʼa kai ai te hahaʼi ki te moʼoni. ʼE au loto fakafetaʼi ki te tokoni mai ʼa Sehova ke au toʼo te selevisi ʼaia. Pea ʼe ko te faʼahiga maʼuli pe ʼaia ʼe lelei tokotahi!” Ia ʼaho nei, ʼe fiafia ia Erica he ʼe pionie makehe ʼi te motu ko Ebeye ʼae ʼe kau ki te ʼu Motu Marshall. ʼE moʼoni, ʼe toe ʼi ai foki mo ni fihifihia moka ʼe kita alu ʼo faifakamafola ʼi he tahi fenua. Koia tou vakaʼi ia fihifihia ʼe tolu pea mo tona faʼahiga tauʼi e natou ʼae neʼe olo ki Micronésie.

Te faʼahiga maʼuli. Hili te kaku atu ʼa Simon ki te motu ko Palau ʼi te taʼu 2007 ʼi tona taʼu 22, neʼe mahino vave ai neʼe mole kei feala ke lahi tana foʼi falā ohage ko tana kei gaue ʼi tona fenua ko Pilitania. “Neʼe tonu ke au ako ke mole au totogi pe te meʼa ʼe au loto ki ai. ʼI te temi nei, ʼe au filifili lelei taku meʼa kai ʼae ʼe au totogi pea mo kumi te ʼu meʼa ʼae ʼe totogi lelei. Moka maumau he meʼa, ʼe au alu ʼo kumi ʼona piesi kaʼe ko ʼae kua ʼosi fakaʼaogaʼi pea ʼe au kole ki he tahi ke ina fakapipiki.” Neʼe malave feafeaʼi kia Simon te ʼaoga ʼae ke maʼuli fakafeʼauga? ʼE ina ui fenei: “Neʼe au ako ai pe kotea ʼae ʼe maʼuhiga age ʼi te maʼuli pea mo feafeaʼi haku maʼuli mo te meʼa pe ʼe au maʼu. Pea neʼe ha lelei ia te tokaga ʼofa ʼae ʼa Sehova kia au ʼi ni aluʼaga kehekehe. Lolotoga te ʼu taʼu ʼe fitu ʼae neʼe au nofo ai ʼi heni, neʼe au maʼu tuʼumaʼu pe taku meʼa kai pea mo toku nofoʼaga.” ʼE moʼoni, ʼe lagolago ia Sehova kia natou ʼae ʼe maʼuli fakafeʼauga koteʼuhi ʼe natou fia kumi muʼa ia te Puleʼaga.—Mat. 6:32, 33.

Te manatu ki tona fenua. ʼE ui fenei e Erica: “ ʼE au felogoʼi lelei mo toku famili pea neʼe au tuʼania naʼa fakatupu kovi ki taku minisitelio ia taku manatu tuʼumaʼu ʼae kia natou.” Kotea ʼae neʼe ina fai moʼo teuteu ki ai? ʼE ina toe ui fenei: “ʼI muʼa ʼo taku mavae, neʼe au lau ni alatike ʼo Te Tule Leʼo ki te faʼahi ʼaia. Neʼe feala ai ke au teuteuʼi toku loto moʼo tauʼi te fihifihia ʼaia. ʼI te tahi alatike, neʼe fakalotofimalieʼi e te faʼe ia tana taʼahine ʼaki tana ui ʼae, ‘ʼe tokaga lelei age anai ia Sehova kia koe ia au.ʼ Neʼe au lotomalohi moʼoni ai.” Ko Hannah pea mo tona ʼohoana ko Patrick, ʼe nā faifakamafola ʼi Majuro ʼi te ʼu Motu Marshall. ʼE tauʼi e Hannah ia tana manatu tuʼumaʼu ki tona fenua ʼaki tana tokaga tafitō ki te ʼu tehina mo tuagaʼane ʼo tana kokelekasio. ʼE ina ui fenei: “ʼE au loto fakafetaʼi tuʼumaʼu kia Sehova  ki tana foaki mai ia he foʼi famili fakamalamanei koteʼuhi ʼe natou toe kau foki ki toku famili. Pea ka na pau la neʼe mole natou ʼoʼofa mo lagolago mai, neʼe mole feala ia ke au alu ʼo faifakamafola ʼi te ʼu koga meʼa ʼe ʼaoga lahi ai ni kau faifakamafola.”

Te fakamamahani. ʼE fakatokagaʼi fenei e Simon: “Moka tou kaku ki he tahi fenua, pea ʼe teitei pe ko meʼa fuli ʼe kehekehe. ʼI ʼihi temi, ʼe au loto ke natou mahino ki ʼaku fakahuahua.” ʼE ui fenei e Erica: “ʼI te kamata, neʼe au logoʼi taku nofo tokatahi kaʼe neʼe tokoni mai te faʼahi ʼaia ke au vakavakaʼi pe kotea ʼae neʼe ina uga ai au ke au haʼu ki heni. Neʼe mole au haʼu ʼuhi ke au maʼu ai ni lelei kaʼe ke lahi age taku gaue ʼae kia Sehova.” ʼE ina toe ui fenei: “ʼAki te temi, neʼe au maʼu ai ʼoku kaumeʼa lelei pea ʼe ko he faʼahi ia ʼe maʼuhiga kia au.” Ko Simon neʼe faiga malohi ke ina ako ia te lea ʼo te motu ko Palau, ke feala ai hana “fakalaulahi” ia tona loto mo te ʼu tehina mo tuagaʼane ʼo te motu ʼaia. (2 Ko. 6:13) ʼO tupu ko tana faiga ʼae ke ina ako ia te lea, koia neʼe ʼoʼofa ai te ʼu tehina kia ia. ʼEi, moka felagolagoʼaki te ʼu tehina mo tuagaʼane mai te ʼu fenua matapule mo natou ʼae ʼi te fenua, pea ʼe natou fiafia fuli ʼuhi ko te ʼu fakakaumeʼa lelei ʼae ʼe maʼu ʼi te kokelekasio. Kotea ʼihi fakapale ʼe maʼu e natou ʼae ʼe lotolelei ke natou olo ki te ʼu koga meʼa ʼae ʼe aoga lahi ai ni kau faifakamafola?

Neʼe ui fenei e te apositolo ko Paulo: “Ko ʼae ʼe ina to fakalahi ʼe ina toe utu fakalahi anai.” (2 Ko. 9:6, MN) Ko te pelesepeto ʼaeni ʼe fakaʼuhiga lelei kia natou ʼae ʼe natou loto ke toe lahi age tanatou faifakamafola. Kaʼe kotea te ʼu fua lelei ʼae ʼe natou “utu fakalahi” ʼi Micronésie?

ʼE kei lahi te ʼu faiga malie ʼi Micronésie moʼo kamata ni ako Tohi-Tapu pea mo mamata ki te tuputupu fakalaumalie ʼa te hahaʼi ʼae ʼe natou ako mo maʼuliʼi te ʼu moʼoni mai te Folafola ʼa te ʼAtua. Ko Patrick pea mo Hannah ʼe nā toe faifakamafola foki ʼi Angaur, ko he kiʼi motu ʼe maʼuʼuli ai te toko 320 hahaʼi. Hili ki ai ni mahina ʼe lua ki tanā faifakamafola ʼi ai, neʼe nā felaveʼi mo te fafine ʼe ina taupau tokotahi tana fanau. Neʼe ina tali atu aipe ke fai hana ako Tohi-Tapu, mo ina leleiʼia te moʼoni ʼo ina fai ai ni fetogi maʼuhiga ʼi tona maʼuli. ʼE ui fenei e Hannah: “ʼI te ʼu ʼosi ako fuli, pea ʼi tamā toe liliu ki toma ʼapi ʼi ʼama lelue, ʼe ma fesioʼaki ʼo ma ui fenei: ‘Malo Sehova!ʼ” ʼE toe ui fenei e Hannah: “ʼE au iloʼi neʼe feala pe ke fakaovi e Sehova te fafine ʼaeni kia te ia ʼi hona tahi age aluʼaga, kaʼe ʼuhi ko tamā faifakamafola ʼi te ʼu koga meʼa ʼae ʼe lahi ai te gaue, neʼe feala ai hamā maʼu pea mo tokoni ki te ovi ʼaia ke ina iloʼi ia Sehova. Pea ʼe ko he tahi pe ʼaia aluʼaga fakafiafia ʼaupito neʼe hoko ʼi toma maʼuli!” Ohage ko tona ui e Erica, “moka kita tokoni ki he tahi ke ina iloʼi ia Sehova, pea ko te fiafia ʼae ʼe tou utu ai ʼe mole hona fakatautau!”

ʼE lahi te ʼu fenua ʼe toe ʼaoga ki ai ni kau faifakamafola ʼo te Puleʼaga. ʼE feala koa ke ke kau kia natou ʼae ʼe olo ki te ʼu koga meʼa ʼae ʼe ʼaoga ki ai he tokoni? Faikole kia Sehova ke ina fakamalohiʼi ia tau loto ʼae ke toe lahi age ia tau minisitelio. Faipalalau ki te faʼahi ʼaia mo te kau tagata ʼafeā ʼo te kokelekasio, mo te taupau ʼo te siliko peʼe mo natou ʼae kua natou maʼu te pilivilesio ʼaia. Moka ke kamata fai ni fakatuʼutuʼu, faitohi ki te filiale ʼae ʼe tokaga ki te telituale ʼae ʼe ke fia alu ki ai pea mo kole ni ʼihi atu fakamahino. * Lagi ʼe feala mo koe ke ke kau ki te toko lau ʼi afe ʼu tehina mo tuagaʼane, tupulaga mo matutuʼa pea mo selipatea peʼe ʼohoana, ʼae ʼe natou lotolelei ke natou olo ʼo faifakamafola ʼi te ʼu koga meʼa ʼae ʼe lahi ai te gaue. Pea ʼe ke fiafia anai ʼi tau utu lahi.