NEʼE tupu taku tamai ʼi te taʼu 1899, ʼi te kolo ko Graz, ʼi Autriche. Neʼe kei tupulaga ʼi te temi ʼae neʼe hoko ai te ʼUluaki Tau Fakamalamanei. ʼI te taʼu 1939, ʼi te kamata pe ʼo te Lua Tau Fakamalamanei, neʼe hu leva ki te foʼi kautau Siamani. Neʼe mate ʼi te taʼu 1943 lolotoga tanatou tau ʼae ʼi Lusia, kaʼe neʼe kei au taʼu lua. Koia neʼe mole au iloʼi ai taku tamai. Neʼe au lotomamahi ʼuhi ko te faʼahi ʼaia, tafitō la moka au sio ʼi te fale ako ki te tamaliki ʼae ʼe ʼi ai tanatou tamai. Kaʼe ki muli age leva, ʼi toku temi tupulaga, neʼe au fiafia leva ʼi taku iloʼi ʼae, ʼe ʼi ai tatatou Tamai ʼi selo, ʼe mole feala ke mate ʼi he ʼaho.

ʼI toku taʼu fitu, neʼe au hu leva ki te kautahi ʼo te ʼu Scouts. Ko te kautahi fakamalamanei ʼaia, neʼe fakatuʼu ʼi te taʼu 1908 ʼi Pilitania, e te pule ʼo te solia Pilitania, ʼae neʼe higoa ko Robert Stephenson Smyth Baden-Powell. ʼI te taʼu 1916, neʼe ina fakatuʼu ia te kutuga ʼo te ʼu “Louveteaux,” maʼa te tamaliki tagata ʼo toku taʼi tupu.

Neʼe au leleiʼia ʼamatou fakatahi mo te ʼu Scouts ʼi te ʼu fakaʼosi vahaʼa. Neʼe matou momoe ʼi te ʼu kiʼi fale la, neʼe matou teu fakatahi, pea mo haʼele fakatahi ʼo mulimuli ki te tagi ʼo te nafa. Neʼe au leleiʼia tafitō tamatou fakatahi ʼae mo te tahi ʼu Scouts, ʼo matou hiva fakatahi te ʼu afiafi pea mo fai he ’u kiʼi gaoʼi. Neʼe lahi te ʼu faʼahi neʼe matou ako ʼo ʼuhiga mo te natula. Koia neʼe au leleiʼia ai ia te ʼu gaue ʼae ʼo totatou Tupuʼaga.

Neʼe fakalotomalohiʼi te ʼu Scouts ke natou fai he gaue ʼe lelei ʼi te ʼaho fuli. Neʼe takimuʼa kia natou te fai ʼo te faʼahi ʼaia. Ka matou felaveʼi mo he tahi, ʼe matou fakamalō age pea mo ui age “Nofo Teuteu Tuʼumaʼu.” Neʼe au leleiʼia te ʼu faʼahi ʼaia. Neʼe matou toko teau tupu kau tupulaga ʼi te kutuga ʼae neʼe au kau ki ai. Ko te toko 50 tupu neʼe ko te kau Katolika, ko te toko 50 tupu neʼe ko te kau Polotesita pea ko te foʼi tokotahi neʼe ko te Putisi.

Talu mai te taʼu 1920, neʼe fai e te ʼu Scouts te ʼu fakatahi fakamalamanei ʼi te ʼu taʼu lua fuli. Neʼe au kau ki te fitu Fakatahi Fakamalamanei ʼa te ʼu Scouts, ʼae neʼe fai ʼi Bad Ischl, ʼi Autriche, ʼi te mahina ʼo ʼAukusito 1951. Pea neʼe au toe kau ki te hiva Fakatahi Fakamalamanei ʼae neʼe fai ʼi Sutton Park, ʼi Pilitania, ʼi te mahina ʼo ʼAukusito 1957. ʼI te fakatahi ʼaia, neʼe ko te toko 33 000 kau Scouts mai te ʼu fenua ʼe 85 neʼe fakatahi ai. Pea neʼe ko te toko 750 000 kau mamata neʼe ʼomai ki te fakatahi ʼaia, ʼo kau ai mo te Fineʼaliki ʼo Pilitania ko Elizabeth. Neʼe hage kia au ko he foʼi famili fakamalamanei. Neʼe mole au iloʼi ʼi te temi ʼaia, ʼe au fakatahi anai mo he foʼi famili ʼe lahi age ia, ko he foʼi famili fakalaumalie.

ʼI te taʼu 1958, neʼe au ako te gaue faiselevisi ʼi te Otele Lahi ko Wiesler, ʼi Graz, ʼi Autriche. Neʼe au gaue fakatahi mo te tagata faikato neʼe higoa ko  Rudolf Tschiggerl, neʼe toe fakahigoaʼi ko Rudi. Neʼe palalau mai ʼo ʼuhiga mo te moʼoni, pea neʼe ko taku hoki logo ʼae ki te faʼahi ʼaia. Neʼe ʼuluaki palalau mai ki te akonaki ʼo te Tahitolu Tapu pea mo ui mai ʼe mole ko he akonaki Fakatohi-tapu. Neʼe au tui ki te Tahitolu Tapu, pea neʼe au fia fakaha age ki ai ʼe ko te moʼoni pe ʼaia. Neʼe au leleiʼia toku kaugā gaue ʼaia pea neʼe au fia fakalotoʼi ia ia ke toe liliu ki te lotu Katolika.

Neʼe au kole age kia Rudi ke ina ʼaumai haku Tohi-Tapu Katolika. Koia neʼe au kamata lau ai pea mo tokagaʼi neʼe ai e Rudi te kiʼi pepa lotu ʼa te Sosiete Watchtower ʼi te Tohi-Tapu. Neʼe mole au fia lau te kiʼi pepa ʼaia koteʼuhi neʼe au manatu neʼe ko he tohi moʼo fakahalaʼi te hahaʼi. Neʼe lotomahino ia Rudi, koia neʼe mole ina toe tuku mai ai he tohi. Kaʼe neʼe au lotolelei ke ma faipalalau ki te Tohi-Tapu. Lolotoga mahina ʼe tolu, neʼe ma faipalalau fualoa ki te Tohi-Tapu.

ʼI te ʼosi ʼo taku gaue ʼi te otele ʼi Graz, neʼe totogi e taku faʼe taku ako ʼi te fale ako ʼae ʼe tokaga ki te taupau ʼo he otele. Koia neʼe au mavae ai ʼo alu ki Bad Hofgastein, ko te kolo ʼe tuʼu ʼi te ʼu Alpes, ʼe tuʼu ai te fale ako. Neʼe gaue fakatahi te fale ako ʼaia mo te Otele Lahi ʼi Bad Hofgastein. Koia ʼi ʼihi temi, neʼe au gaue ʼi te otele ʼaia ke au iloʼi lelei age te gaue.

Neʼe momoli e Rudi taku tuʼasila foʼou ki te filiale ʼo Vienne. Koia neʼe fekauʼi ai e te filiale te ʼu tuagaʼane misionea ʼe toko lua, ko Ilse Unterdörfer pea mo Elfriede Löhr. ʼI te tahi ʼaho, neʼe pauʼi mai ia te tagata ʼae ʼe tali fagona ʼi te otele pea mo fakaha mai ʼe ʼi ai te ʼu fafine ʼe toko lua ʼe fia palalau mo au ʼi tuʼa. Neʼe au tuʼania koteʼuhi neʼe mole au iloʼi pe ko ai ia naua. Kaʼe neʼe au alu pe kia naua. Ki muli age, neʼe au iloʼi leva, neʼe ko he ʼu tuagaʼane ʼave logo ʼi te temi ʼae neʼe pule ai te kau Nasi ʼi Siamani. Neʼe tapuʼi ai te gaue ʼa te kau Fakamoʼoni ʼa Sehova ʼo kaku ki te Lua Tau Fakamalamanei. ʼI muʼa ʼo te kamata ʼo te tau, neʼe puke naua e te kau polisi siamani (Gestapo) pea neʼe ʼave naua ʼo pilisoniʼi ʼi Lichtenburg. Pea lolotoga te tau, neʼe ʼave naua ki te fale pilisoni ʼo Ravensbrück, ʼe tuʼu ovi ki Berlin.

Neʼe au fakaʼapaʼapa kia naua, koteʼuhi neʼe ko te ʼu finematuʼa. Neʼe mole au loto ke puli tonā temi ʼi te faipalalau mo au. Koia hili kiai ni vahaʼa peʼe ko ni mahina, neʼe au ui age leva kia naua ʼe mole au loto ke toe hoko atu tamatou faipalalau. Neʼe au kole age ke nā tuku mai pe he lisi ʼo he ʼu vaega Tohi-Tapu ʼo ʼuhiga mo te akonaki Fakakatolika ʼo te hologa fakaapositolika. Neʼe au ui age kia naua ʼe au fakatoʼo anai te lisi ʼaia ki te patele pea mo faipalalau mo ia ʼo ʼuhiga mo te faʼahi ʼaia. Neʼe au manatu ʼe au mahino anai ki te moʼoni.

ʼE akonaki e te Lotu Katolika, ko te hologa fakaapositolika ʼe ko te hologa ʼo te ʼu tuʼi tapu ʼe hifo mai te apositolo ko Petelo. (Neʼe mahino hala te lotu Katolika ki te ʼu palalau ʼae neʼe fai e Sesu ia Mateo 16:18, 19.) ʼE toe ui e te Lotu Katolika, ʼe mole feala ke hala te ʼu akonaki ʼa te tuʼi tapu. Neʼe au tui au, kapau ʼe mole feala ke hala te ʼu akonaki ʼa te tuʼi tapu, ia ia ʼae ʼe fakahigoaʼi e te kau Katolika ko te Tamai Maʼoniʼoni, pea ko tana akonaki ʼae ʼo ʼuhiga  mo te Tahitolu Tapu ʼe moʼoni pe ia. Kaʼe kapau ʼe feala ke faihala te tuʼi tapu pea ʼe lagi feala pe ke mole moʼoni ʼana akonaki. Ko te tupuʼaga la ʼaia ʼo te fakamaʼuhigaʼi e te kau Katolika te akonaki ʼaia ʼo te hologa fakaapositolika, koteʼuhi ʼe mole feala ai ke natou fakafifihi ki te ʼu akonaki Fakakatolika fuli.

ʼI taku alu ʼae ki te patele, neʼe mole ina lava tali mai ki ʼaku fehuʼi. Neʼe ina fakatoʼo mai te tohi Fakakatolika ʼe talanoa ki te akonaki ʼo te hologa fakaapositolika. Neʼe ina ui mai ke au alu ʼo lau ʼi toku ʼapi. Kaʼe neʼe lahi age leva te ʼu fehuʼi ʼae neʼe au fia mahino ki ai. Neʼe mole lava tali e te patele ki ʼaku fehuʼi, koia neʼe ina ui fenei mai: “ʼE mole feala ke au fakalotoʼi koe, pea ʼe mole feala ke ke fakalotoʼi au. . . . ’E lelei age pe tau hoko atu ʼau fekumi.” Neʼe mole ina loto ke toe hoko atu tama faipalalau.

ʼI te temi leva ʼaia, neʼe au fia ako te Tohi-Tapu mo Ilse pea mo Elfriede. Neʼe lahi te ʼu faʼahi neʼe au ako ʼo ʼuhiga mo Sehova ʼAtua, te Tamai Maʼoniʼoni moʼoni ʼae ʼe ʼi selo. (Soa. 17:11) Neʼe mole heʼeki fakatuʼu he kokelekasio ʼi te koga meʼa ʼaia. Koia neʼe takitaki ai e te ʼu tuagaʼane ʼe tokolua te ʼu fono ʼi te ʼapi ʼo te famili neʼe natou ako te moʼoni. Neʼe ko te tokosiʼi neʼe kau ki te ʼu fono. Neʼe lahi te ʼu akonaki neʼe faipalalau ki ai ia te ʼu tuagaʼane ʼe toko lua lolotoga te fono, koteʼuhi neʼe mole he tehina ke ina takitaki te fono. ʼI ʼihi temi, neʼe haʼu he tehina ʼo fakahoko ia he akonaki ki te kaugā malie ʼi he fale neʼe lue.

Neʼe au kamata ako te Tohi-Tapu mo Ilse pea mo Elfriede ’i te mahina ʼo Oketopeli 1958. Hili ki ai mahina ʼe tolu, pea neʼe au papitema leva ʼi te mahina ʼo Sanualio 1959. ʼI muʼa ʼo taku papitema, neʼe au kole age kia naua peʼe feala la ke matou kaugā olo ki te faifakamafola, ke au sio ki te faʼahiga fakahoko ʼo te gaue. (Gaue 20:20) ʼI taku ʼuluaki alu mo naua, neʼe au feʼekeʼaki pe ʼe feala anai ke tuku mai haku telituale ke au gaueʼi. Neʼe nā tuku mai te kolo ke au faifakamafola ai. Neʼe tonu ke au alu tokotahi ki ai pea mo faifakamafola ʼi te ʼu ʼapi pea mo liliu ʼo toe ʼaʼahi ia natou ʼae neʼe fia logo. Ko te ʼuluaki tehina ʼae neʼe au kaugā alu mo ia ʼi te gaue faifakamafola, neʼe ko te taupau ʼo te siliko.

ʼI te taʼu 1960, ʼi te ʼosi ʼo taku ako, neʼe au toe liliu ki toku kolo ʼo faigaʼi ke au fakaha te moʼoni ki toku famili. ʼO kaku mai ki te temi nei, ʼe mole he tahi ia natou ʼaia neʼe hu mai ki te moʼoni. Kaʼe neʼe ʼi ai pe ʼihi neʼe natou fia mahino ki ai.

ʼI te taʼu 1961, neʼe lau ʼi te ʼu kokelekasio te ʼu tohi neʼe momoli e te filiale, moʼo fakalotomalohiʼi te ʼu tehina mo tuagaʼane ki te selevisi pionie. Neʼe kei au selipatea pea neʼe mole hoku mahaki. Koia neʼe au manatu ai, ʼe feala pe ke au liliu ʼo pionie. Neʼe au felogoʼi mo te taupau ʼo te siliko, ʼae ko Kurt Kuhn, ʼo ʼuhiga mo te faʼahi ʼaia. Neʼe au fehuʼi age pe kotea la tana manatu, mo kapau ʼe au gaue lolotoga ni mahina ke feala haku totogi haku motoka, ʼe ʼaoga anai ki taku selevisi pionie. Neʼe ina tali fenei mai: “ʼI tau manatu la, neʼe ʼaoga koa kia Sesu pea mo ʼana apositolo, he motoka moʼo fakahoko tanatou selevisi temi katoa?” Neʼe ʼaoga mai ki au te tokoni ʼaia. Neʼe au fakatuʼutuʼu ai ke au foimo kamata atu aipe taku selevisi pionie. Kaʼe ʼi taku gaue ʼi te fale kai ʼo te otele, neʼe au gaue hola ʼe 72 ʼi te vahaʼa, koia neʼe tonu muʼa ke au fetogi ʼaku fakatuʼutuʼu.

Neʼe au kole ki toku patolo pe feala la ke au gaue pe hola ʼe 60. Neʼe tali lelei e toku patolo kaʼe neʼe mole ina fetogi toku totogi. Mole faʼa fualoa ki ai, neʼe au kole age ki ai pe feala la ke au gaue pe hola  ʼe 48 ʼi te vahaʼa. Neʼe toe ʼio mai, kaʼe neʼe mole ina fetogi toku totogi. Neʼe au toe kole age ki ai pe ʼe feala la ke au gaue pe hola ʼe 36 ʼi te vahaʼa. Neʼe toe ʼio pe ki ai toku patolo. Kaʼe neʼe au punamaʼuli koteʼuhi neʼe mole ina fetogi toku totogi! Neʼe au manatu au ʼe lagi mole loto e toku patolo ke au mavae ʼi taku gaue. Koia, ʼaki taku fakatuʼutuʼu gaue ʼaia, neʼe au kamata ai leva taku selevisi pionie. ʼI te temi ʼaia, neʼe kei fakamaʼua ai ki te kau pionie ke natou fai ni hola gaue ʼe 100 ʼi te mahina.

Hili ki ai mahina ʼe fa, neʼe hinoʼi au ke au pionie makehe pea neʼe fakanofo au ko te tagata taupau ʼo te kiʼi kokelekasio ʼi Carinthia, ko te kolo ʼo Spittal an der Drau. ʼI te temi ʼaia, neʼe fakamaʼua ki te kau pionie makehe ke natou fai ni hola gaue ʼe 150 ʼi te mahina. Neʼe mole hoku kaugā gaue pionie. Kaʼe neʼe au fiafia koteʼuhi neʼe tokoni mai ia te tuagaʼane neʼe higoa ko Gertrude Lobner, neʼe ko he faifekau ʼo te kokelekasio. *

ʼI te taʼu 1963, neʼe hinoʼi au ke au liliu ko te taupau ʼo te siliko. ʼI ʼihi temi, neʼe au faifolau ʼi te saliote afi ʼo ʼaʼahi ia te ʼu kokelekasio. Neʼe au feʼaluʼaki mo te ʼu pasikete mamafa. Tokolahi te ʼu tehina neʼe mole hanatou motoka, koia neʼe mole feala ai ke haʼu he tahi ʼo kumi au ʼi te ʼu taulaga saliote afi. Kaʼe ʼi taku fia fakaʼapaʼapa kia natou, neʼe mole au toʼo ai he takisi. Neʼe au alu lalo ki te ʼapi ʼae neʼe tonu ke au nofo ai.

ʼI te taʼu 1965, neʼe kei au selipatea, koia neʼe fakaafe au ke au kau ki te 41 Kalasi ʼo te Ako ʼo Kileate. Tokolahi ʼi te ako ʼaia neʼe natou selipatea. ʼI te hili ʼo te ako, neʼe au punamaʼuli koteʼuhi neʼe toe fekauʼi au ki Autriche, ke au hoko atu taku gaue taupau ʼo te siliko. Kaʼe ʼi muʼa ʼo taku mavae ʼi Amelika, neʼe au kole ke au kaugā gaue mo he taupau ʼo te siliko, lolotoga vahaʼa ʼe fa. Neʼe au fiafia ʼi taku gaue ʼae mo te tehina agalelei ko Anthony Conte. Neʼe leleiʼia e te tehina ia te gaue faifakamafola pea neʼe faiva ʼi te gaue ʼaia. Neʼe ma gaue fakatahi ʼi te kolo ko Cornwall ʼi New York.

ʼI taku tau atu ki Autriche, neʼe hinoʼi au ke au tokaga ki he siliko. Neʼe au felaveʼi ai mo te tuagaʼane selipatea finemui, neʼe higoa ko Tove Merete. Neʼe lahilahi ake ʼi te moʼoni talu mai tana kei taʼu nima. Ka fehuʼi mai e te ʼu tehina pe neʼe feafeaʼi tamā feʼiloʼiʼaki, neʼe ma tali fenei: “Neʼe ko te filiale ʼae neʼe ina fakatuʼutuʼu te faʼahi ʼaia.” Hili ki ai he taʼu katoa, neʼe ma ʼohoana ai leva ʼi te mahina ʼo Apelili 1967.

ʼI te taʼu 1968, neʼe au mahino ai ki te ʼofa makehe ʼo Sehova, ʼi tana vavae au ko tona foha fakalaumalie. Koia neʼe makehe ai leva ʼaku felogoʼi ʼae mo taku Tamai ʼae ʼi selo, ohage pe ko natou fuli ʼae ʼe talanoa ki ai ia Loma 8:15, ʼae ʼe natou “kalaga ai: Abba! Tamai!”

Neʼe au hoko atu mo Merete, taku gaue taupau fakasiliko pea mo fakatisitilike, ʼo kaku ki te taʼu 1976. ʼI ʼihi temi, ʼi te ʼu temi momoko, neʼe ma momoe ʼi he ʼu ʼapi neʼe mole mafana. ʼI te tahi ʼaho, ʼi tamā ʼaʼalaake ʼi te uhu, neʼe ma tokagaʼi te fefeka ʼo tamā tupenu, ʼi te lahi fau ʼo te momoko. Koia neʼe ma toʼo ai ia te kiʼi masini hila moʼo fakamafanaʼi te koga fale ʼi te poʼuli. ʼI ʼihi koga meʼa, ʼe tuʼu te fale  maʼanu ʼi tuʼa. Koia ka ma fia olo ki ai ʼi te poʼuli, neʼe tonu ke ma haʼele ʼi te nive kaʼe ʼe lolotoga agi te matagi. Neʼe mole homa lotofale. Koia ʼi te ʼu Monite, neʼe maʼua ke ma nonofo ʼi te ʼapi ʼae ʼo te famili ʼo te kokelekasio ʼae neʼe ma ʼaʼahi ʼi te vahaʼa ʼaia. Pea ʼi te Feliatolu uhu leva, neʼe ma mavae ʼo olo ki te kokelekasio ʼae neʼe tonu ke ma ʼaʼahi ʼi te vahaʼa ʼae neʼe hoa mai ki ai.

ʼE au fiafia ʼo ʼuhiga mo toku ʼohoana koteʼuhi, lolotoga te ʼu taʼu ʼaia, neʼe tokoni mai kia au. ʼE ina leleiʼia te gaue faifakamafola pea neʼe mole he ʼaho neʼe ʼaoga ke au fakalotoʼi ia ia ke alu ʼo faifakamafola. ʼE ʼofa ʼi ʼona kaumeʼa pea ʼe tuʼania ʼo ʼuhiga mo te hahaʼi. Neʼe tokoni lelei mai kia au.

ʼI te taʼu 1976, neʼe fakaafe maua ke ma hu ki te Petele ʼo Autriche, ʼi Vienne. Neʼe hinoʼi au ke au kau ki te Komite ʼo te Filiale. ʼI temi ʼaia neʼe tokaga te filiale ʼo Autriche ki te gaue faifakamafola ʼi te ʼu fenua kehekehe ʼo te potu Esite ʼo Eulopa. Neʼe momoli fakafufu e te filiale te ʼu tohi ki te ʼu fenua ʼaia. Neʼe ko te tehina ko Jürgen Runde ʼae neʼe ina takitaki te gaue ʼaia pea mo fai he ʼu fakatuʼutuʼu poto ʼo ʼuhiga mo te faʼahi ʼaia. Neʼe au leleiʼia taku gaue mo ia. Ki muli age leva, neʼe kole mai ke au takitaki te gaue faifakaliliu ia lea ʼe hogofulu ʼo te ʼu fenua ʼo te potu Esite ʼo Eulopa. Neʼe hoko atu e Jürgen pea tona ʼohoana ko Gertrude, tanā selevisi pionie makehe ʼi Siamani. ʼI te taʼu 1978, neʼe kamata fai pea mo ta e te filiale ʼo Autriche ʼana nusipepa ia lea ʼe ono. Neʼe matou momoli ia te ʼu tohi ki te tahi ʼu fenua ʼae ʼe natou fakaui mai. Neʼe hu ia te tehina ko Otto Kuglitsch pea mo tona ʼohoana ko Ingrid ki te Petele ʼo Siamani. Pea neʼe tokaga lelei te tehina ʼaia ki te fakahoko ʼo te ʼu gaue ʼaia.

Neʼe fakaʼaogaʼi e te ʼu tehina ʼo te ’u fenua ʼaia ʼo te potu Esite ʼo Eulopa, te ʼu masini moʼo ta ʼaki ʼanatou tohi. Kaʼe neʼe kei ʼaoga pe ke tokoni age ia te tahi ʼu fenua kia natou. Neʼe tokoni ia Sehova ki te fakahoko ʼo te gaue ʼaia. Neʼe ʼoʼofa te ʼu tehina ʼo te filiale ki te ʼu tehina ʼaia ʼuhi ko te ʼu aluʼaga faigataʼa ʼae neʼe tau mo natou pea mo te tapuʼi ʼae ʼo tanatou gaue lolotoga ni taʼu.

ʼI te taʼu 1989, neʼe au maʼu ia te pilivilesio ʼae ke au kaugā alu mo te tehina ko Theodore Jaracz ki Roumanie. Neʼe kau te tehina ʼaia ʼi te Kolesi Pule. Ko te fakatuʼutuʼu ʼo tamā ʼaʼahi ʼaia, ke ma tokoni ki he foʼi kutuga ke natou toe fakatahi mo te kautahi ʼa Sehova. Neʼe ʼi ai te ʼu fihifihia neʼe hoko ʼi te fenua  ʼaia, koia talu mai te taʼu 1949, neʼe natou mavae mai te kautahi, ʼo natou fakatuʼu ai ʼanatou kokelekasio. Kaʼe neʼe natou hoko atu aipe tanatou faifakamafola pea mo tanatou papitemaʼi te hahaʼi. Neʼe natou taupau maʼu tanatou agatonu Fakakilisitiano ʼo tupu ai tonatou pilisoniʼi. Neʼe hage pe tanatou fai ʼaia, neʼe natou kau ki te kautahi ʼae ʼe takitaki e te Kolesi Pule. ʼI te temi ʼaia, neʼe kei tapuʼi pe te gaue ʼa te kau Fakamoʼoni ʼa Sehova ʼi Roumanie. Koia, neʼe matou fono fakafufu mo te ʼu tagata ʼafeā ʼe toko fa ʼo te foʼi kutuga ʼaia pea mo te ʼu tehina ʼo te Komite ʼo te filiale ʼo Roumanie. Neʼe matou fono ʼi te ʼapi ʼo te tehina ko Pamfil Albu, pea neʼe ko te tehina mai Autriche, neʼe higoa ko Rolf Kellner, ʼae neʼe fakahoko lea maʼa matou.

ʼI te lua po ʼae neʼe matou fono ai, neʼe fakalotoʼi e te tehina ko Albu ia te ʼu tagata ʼafeā ʼe toko fa, ke natou toe gaue fakatahi mo te kautahi. Neʼe ina ui fenei age: “Kapau ʼe mole kotou fai nei ia te tonu ʼaia, ʼe lagi mole toe ʼi ai anai he tahi age faigamalie.” Ki muli age, neʼe ko te toko 5 000 ʼu tehina neʼe toe fakatahi age ki te kautahi. Neʼe ko he tahi malo ʼaia ʼa Sehova ia Satana.

ʼI te fakaʼosi ʼo te taʼu 1989, neʼe fakaafe e te Kolesi Pule ia au pea mo toku ʼohoana, ke ma olo age ʼo gaue ʼi te ʼu pilo lalahi ʼae ʼe tuʼu ʼi New York. Neʼe ma punamaʼuli ʼuhi ko te faʼahi ʼaia. Koia neʼe ma kamata gaue ai ʼi te Petele ʼo Brooklyn ʼi te mahina ʼo Sulio 1990. ʼI te taʼu 1992, neʼe hinoʼi ai au ke au tokoni ki te Komite Gaue ʼo te Kolesi Pule. Pea talu mai te mahina ʼo Sulio 1994, neʼe foaki mai leva ia te pilivilesio ʼae ke au kau ki te Kolesi Pule.

Kua ʼosi leva ia te temi ʼae neʼe au faiselevisi ai ʼi te ʼu otele. ʼI te temi leva ʼaeni, ʼe au fiafia ʼi te gaue ʼae ki te teuteuʼi pea mo te tufa ʼo te meʼa kai fakalaumalie ki ʼotatou tehina mo tuagaʼane ʼi te malamanei katoa. (Mat. 24:45-47) Ka au manatuʼi toku maʼuli lolotoga te ʼu taʼu 50 tupu ʼi te selevisi temi katoa, ʼe au fiafia pea mo lotofakafetaʼi ʼuhi ko te ʼu tapuakina ʼae neʼe foaki e Sehova ki tatatou foʼi famili fakamalamanei. ʼE au fiafia ʼaupito moka au kau ki ʼatatou fakatahi fakamalamanei, ʼae ʼe tou ako ai ke tou iloʼi lelei tatatou Tamai ʼae ʼi selo, ia Sehova, pea mo te ʼu moʼoni Fakatohi-tapu.

ʼE au kole kia Sehova ke tokoni ki te toko lau ʼi miliona hahaʼi ke natou tali ia te moʼoni. Pea ke natou tauhi fakatahi kia Sehova mo te faletautehina fakamalamanei. (1 Pet. 2:17) ʼE au fakaʼamu ke au sio mai te lagi, ki te fakatuʼuake ʼo te kau mate, ke feala haku iloʼi pe ko ai taku ʼuluaki tamai. ʼE au fakaʼamu, ka maʼuʼuliʼake anai taku tamai, mo taku faʼe pea mo ʼihi atu ʼo toku famili ʼi te palatiso, ʼe natou fia tauhi fuli anai kia Sehova.