ʼE Fakaovi Feafeaʼi Mai Ia Sehova Kia Tatou?
“Kotou fakaoviovi ki te Atua, pea e fakaoviovi atu anai ia kia koutou.”—SAKP. 4:8.
1. Kotea ʼae ʼe ʼaoga ki te hahaʼi fuli? Pea ko ai ʼae ʼe feala ke tou felogoʼi mo ia?
ʼE ʼAOGA ki te hahaʼi fuli ke natou maʼu ni felogoʼi lelei mo niʼihi. ʼE tou fiafia moka tou maʼu hotatou famili mo hotatou ʼu kaumeʼa ʼe natou ʼoʼofa mo lotomahino pea mo fakamaʼuhigaʼi tatou. Kaʼe ʼe maʼuhiga age ia tatatou maʼu ni felogoʼi lelei mo totatou Tupuʼaga, ia Sehova.—Ekl. 12:3.
2. Kotea ʼae ʼe fakapapauʼi mai e Sehova? He ko ʼe ʼe mole tui ia te tokolahi ki te fakapapau ʼaia?
2 ʼE fakaafe tatou e Sehova ke tou liliu ko hona ʼu kaumeʼa. Pea ʼe ina fakapapauʼi mai, kapau ʼe tou fakaovi kia te ia, ʼe fakaovi mai anai kia tatou. (Sakp. 4:8) ʼE ko he manatu fakatupu fiafia ia. Kaʼe maʼa te tokolahi, ʼe mole feala ke fakaovi age ia te ʼAtua kia natou. Koteʼuhi ʼi tanatou manatu, ʼe mamaʼo fau ia te ʼAtua mai ia natou peʼe mole tuha mo natou ke natou maʼu ni felogoʼi mo te ʼAtua. Kaʼe ʼe feala koa hatatou fakaovi kia Sehova?
3. Kotea ʼae ʼe tonu ke tou tui papau ki ai ʼo ʼuhiga mo Sehova?
3 ʼE feala hatatou iloʼi ia Sehova koteʼuhi “e mole mamao” mai ia natou ʼae ’e natou kumi moʼoni ia ia. (Lau ia Gaue 17:26, 27; Pesalemo 145:18.) ʼE lotolelei ia Sehova ke ina tali tatou ohage ko hona ʼu kaumeʼa lelei logo ai totatou ʼuhiga agahala. (Esa. 41:8; 55:6) ʼAki ia te ʼu aluʼaga ʼae neʼe hoko ki te tagata faipesalemo, neʼe ina ui fenei ai ʼo ʼuhiga mo Sehova: “Sii koe, ae e fakalogo ki te kole, e omai anai te tagata fuli kia koe. Manuia ae e ke filifili pea e ke fakaulu ki tou afioaga.” (Pes. 65:3, 5) ʼI te Tohi-Tapu, ʼe tou vakaʼi ai anai pe neʼe fakaovi feafeaʼi te Hau ʼo Suta ʼae ko Asa ki te ʼAtua pea neʼe fakaovi feafeaʼi age ia te ʼAtua kia ia.
TOU AKO MAI HE FAʼIFAʼITAKI ʼO TE TEMI MUʼA
4. Kotea ia te faʼifaʼitaki ʼae neʼe tuku e te Hau ko Asa ki tana hahaʼi?
4 Ko Asa neʼe faʼafai ʼi te tauhi moʼoni. Neʼe ʼafio ia ʼi te temi ʼae ne’e lahi ai te aga fakapaomutu ʼi te fale lotu pea mo te ʼu tauhi taulaʼatua ʼi te fenua. Kaʼe neʼe fakalogo ia kia Sehova ʼaki ia tana pulihi te ʼu meʼa fakalialia ʼaia. (1 Hau 15:9-13) Neʼe kua fakaovi ia Asa kia Sehova pea mo fakalogo ki ʼana Lao, koia ʼae neʼe ina fakatotonu ai ki te hahaʼi ke natou “kumi [ia Sehova], te Atua o [ʼanatou] tamai, pea ke fai te lao mo ana fakatotonu.” Neʼe tapuakinaʼi ai e Sehova ia Asa he neʼe maʼu ia te tokalelei ʼi te ʼu ʼuluaki taʼu ʼe hogofulu ʼo tana ʼafio. Pea neʼe mahino ia Asa ko te tokalelei ʼaia neʼe haʼu ia mai ia Sehova, ʼo ina ui fenei ai ki te hahaʼi: “Nee tou kumi ia ia, pea nee ina foaki mai kia tatou te malolo mai potu fuli.” (2 Klk. 13:23–14:1-6) Koia tou vakaʼi pe kotea ʼae neʼe hoko ki muli age?
5. Kotea ia te aluʼaga ʼae neʼe fakaha ai e Asa ia tana falala ki te ʼAtua? Pea neʼe kotea tona ikuʼaga?
5 Fakafuafua age muʼa mo ka na pau la neʼe ko koe ia te Hau ko Asa. ʼE haʼu ia Selake te Etiopea ke ina tauʼi ia tou puleʼaga mo tana foʼi kautau ʼe toko 1 000 000 pea mo ʼana saliote tau ʼe 300. (2 Klk. 14:7-9) Pea ʼe lagi tuʼa lua age te kaugā malie ʼo tana foʼi kautau ʼi tau kau solia. ʼE ke feafeaʼi anai? ʼE ke feʼekeʼaki anai pe ko ʼe ʼe mole taʼofi e te ʼAtua ia te foʼi kautau ʼaia? ʼE ke falala pe anai koa ki tou poto? Peʼe ke falala anai koa ki te puipui ʼa Sehova? ʼI te lakaga ʼaia, neʼe fakaha lelei ai e Asa neʼe ina maʼu ni felogoʼi lelei mo Sehova pea neʼe falala katoa ia kia te ia. Koteʼuhi neʼe kalaga fenei ia Asa: “Hau o tokoni mai kia matou, [Sehova], tomatou Atua! Koteuhi ko koe ae e matou falala ki ai.” Kotea ʼae neʼe fai e Sehova? ‘Nee ina taai leva te kau Etiopea’ pea neʼe mole he tahi neʼe hao ai.—2 Klk. 14:10-12.
6. ʼE tou lava faʼifaʼitakiʼi feafeaʼi ia Asa?
6 He ko ʼe neʼe falala katoa ia Asa ki te takitaki pea mo te puipui ʼa te ʼAtua? ʼE ui ʼi te Tohi-Tapu, ‘neʼe fai e Asa te meʼa ʼae ʼe totonu kia mata ʼo Sehova pea neʼe katoa ia tona loto kia te ia.’ (1 Hau 15:11, 14) ʼE toe ʼaoga mo tatou ke tou tauhi ki te ʼAtua ʼaki totatou loto katoa ke feala ai hatatou fakaovi kia te ia ʼi te temi nei pea mo te ka haʼu. ʼE tou lotofakafetaʼi kia Sehova ʼi tana fai ni fakatuʼutuʼu ke tou fakaovi ai kia te ia pea mo tou maʼu ai ni felogoʼi lelei mo ia. Tou vakaʼi ia faʼahi ʼe lua ʼe taki mai tatou e Sehova kia te ia.
ʼE TAKI MAI TATOU E SEHOVA KIA TE IA ʼAKI IA TE SAKILIFISIO
7. (1) Kotea ʼae neʼe fai e Sehova ke ina taki ai tatou kia te ia? (2) Pea kotea ia te faʼahi tafitō ʼe taki ai tatou e Sehova kia te ia?
7 Neʼe fakaha e Sehova ia tona ʼofa ki te tagata ʼaki tana fakatuʼu ia hotatou nofoʼaga taulekaleka. ʼE mole gata ai, koteʼuhi ʼe ina taupau totatou maʼuli ʼi te ʼaho fuli. (Gaue 17:28; Apk. 4:11) Pea ko te tahi faʼahi maʼuhiga, ko tana tokaga ʼae kia tatou ʼi te faʼahi fakalaumalie. (Luka 12:42) ʼE ina toe fakapapauʼi mai foki ʼe fagono ki ʼatatou faikole takitokotahi. (1 Soa. 5:14) Kaʼe ko te faʼahi tafitō ʼae ʼe fakaha mai ai e Sehova ia tona ʼofa pea mo ina taki ai tatou kia te ia, ʼe ko te sakilifisio faitotogi. (Lau ia 1 Soane 4:9, 10, 19.) Neʼe fekauʼi ifo e Sehova ia tona “Alo ulutokotahi” ke haʼu ʼo foaki ia tona maʼuli maʼa tatou. Pea ʼaki pe ia te sakilifisio ʼaia, ʼe feala ai hatatou maʼu te ʼamanaki ʼae ke tou maʼuʼuli haohaoa ʼo talu ai.—Soa. 3:16.
8, 9. Kotea ia te tuʼulaga ʼa Sesu ʼi te fakatuʼutuʼu ʼa Sehova?
8 Neʼe fakatuʼutuʼu e Sehova ia te sakilifisio ke fua lelei ki te hahaʼi fuli, maʼia mo natou ʼae neʼe maʼuʼuli ʼi muʼa atu ʼo te temi ʼo Kilisito. ʼI te temi ʼae neʼe fakakikite ai ia Sehova ʼo ʼuhiga mo totatou Fakamaʼuli ʼae ka ina fekauʼi mai, neʼe hage pe kia te ia neʼe kua fakahoko ia te sakilifisio ʼaia. Koteʼuhi neʼe ina iloʼi ʼe hoko tuʼumaʼu pe ia tana fakatuʼutuʼu. (Sen. 3:15) ʼI ni taʼu ʼe lau ʼi teau ki muli age, neʼe fakafetaʼi ia te apositolo ko Paulo kia Sehova ki tona fakaʼateainaʼi ʼaki ia “te puleaki o te totogi e mau ia Sesu-Kilisito.” Neʼe fakamahino e Paulo ko te ʼAtua “nee mole ina fakatua te u agahala nee fai i mua.” (Loma 3:21-26) Koia ʼe hoki feala ke tou fakaovi ki te ʼAtua ʼaki pe ia Sesu.
9 Neʼe fakafealagia e Sehova ki te hahaʼi agavaivai ke natou maʼu ni felogoʼi lelei mo ia ʼaki pe ia Sesu. ʼE ui fenei ʼi te Tohi-Tapu: “E fakamooni mai e te Atua tona ofa kia tatou, o fenei, i te temi nee kei tou agahala ai, nee mate ia Kilisito o uhiga mo tatou.” (Loma 5:6-8) Neʼe fakatuʼutuʼu ia te sakilifisio ʼa Sesu, mole ʼuhi he neʼe tou tuha mo ia kaʼe ʼuhi ko te ʼofa lahi ʼae ʼa Sehova pea mo Sesu kia tatou. Neʼe ui fenei e Sesu: “E mole feala ke hau he tahi kia au, mo kapau e mole taki mai ia kia au e taku Tamai ae nee ina fekaui mai au.” Neʼe ina toe ui fenei foki: “E mole he tahi e hau ki te Tamai kae ia au pe.” (Soa. 6:44; 14:6) ʼAki ia tona laumalie maʼoniʼoni, ʼe taki mai e Sehova te hahaʼi kia te ia ʼaki ia Sesu. Pea ʼe tokoni te ʼAtua kia natou ke natou ma ʼu ni felogoʼi lelei mo ia, ke feala ai hanatou maʼuʼuli ʼo talu ai. (Lau ia Suta 20, 21.) Tou vakaʼi ʼi te temi nei ia te tahi faʼahi ʼe taki ai tatou e Sehova kia te ia.
ʼE TAKI MAI TATOU E SEHOVA KIA TE IA ʼAKI IA TE TOHI-TAPU
10. ʼE tokoni feafeaʼi mai ia te Tohi-Tapu ke tou fakaovi ki te ʼAtua?
10 ʼI te ʼu palakalafe ʼe hiva ʼaeni kua ʼosi atu, neʼe tou fakaʼaogaʼi ai ni vaega neʼe toʼo mai te ʼu tohi kehekehe ʼe 14 ʼo te Tohi-Tapu. Neʼe takitaki e Sehova ia te tohi ʼo te Tohi-Tapu ʼaki ia tona laumalie maʼoniʼoni ke feala ʼaki ai hatatou fakaovi kia te ia. Kapau neʼe mole tou maʼu ia te Tohi-Tapu, pea ʼe tou iloʼi feafeaʼi anai ʼe feala hatatou fakaovi ki totatou Tupuʼaga? Peʼe feafeaʼi anai hatatou ako ʼo ʼuhiga mo te sakilifisio pea mo te faʼahiga tokoni mai ʼae ʼa Sesu ke tou fakaovi ai kia Sehova? Koteʼuhi ʼi te Tohi-Tapu, ʼe tou ako ai ia te ʼuluagaaga fakaofoofo ʼa Sehova pea mo tana fakatuʼutuʼu ʼo ʼuhiga mo te malamanei. Ohage la, ia Ekesote 34:6, 7, ʼe ui ai ko Sehova ʼe “manavaofa mo lotoofa, mo kataki fualoa, mo mau koloa i te agalelei mo te agatonu, ae e ina taupau tona ofa o kaku ki te u taitupu e afe, ae e ina fakamolemole te agakovi, mo te logogataa, pea mo te agahala.” Ko ai koa ʼae ʼe mole fia fakaovi kia te ia? ʼE mahino kia Sehova moka lahi te ʼu faʼahi ʼae ʼe tou ako ʼo ʼuhiga mo ia, pea ʼe hage anai kia tatou ko he tahi ʼe maʼuli moʼoni. Pea ʼe toe malohi age ai anai ʼatatou felogoʼi mo ia.
11. He ko ʼe ʼe maʼuhiga ke tou ako ʼo ʼuhiga mo Sehova? (Vakaʼi te ʼuluaki pakī.)
11 Moka tou kaumeʼa lelei mo he tahi, ʼe tou iloʼi lelei ia ia pea mo leleiʼia ʼona kalitate. Koia ke feala hatatou maʼu ni felogoʼi lelei mo te ʼAtua, ʼe ʼaoga ke tou iloʼi ia ia ʼaki ia tatatou ako ʼona kalitate ʼi te Tohi-Tapu. Pea ʼe tou lotofakafetaʼi ki te takitaki ʼae e te ʼAtua ia te tohi ʼo te Tohi-Tapu ke feala ʼaki ai hatatou mahino ki ai.
12. He ko ʼe neʼe fakaʼaogaʼi e Sehova ni tagata moʼo tohi ia te Tohi-Tapu?
12 Neʼe feala pe ke fakaʼaogaʼi e Sehova ia te kau ʼaselo moʼo tohi ia te Tohi-Tapu. Koteʼuhi ʼe natou tokakaga lelei kia tatou pea mo ʼatatou gaue. (1 Pet. 1:12) Pea ʼe mahino ia, neʼe feala hanatou tohi ia te logo ʼa Sehova maʼa te hahaʼi. Kaʼe ʼe mole hage te kau ʼaselo ko te tagata. ʼE mole feala ke natou mahino ki te ʼu meʼa ʼae ʼe tou logoʼi ʼi totatou loto, mo te ʼu meʼa ʼae ʼe ʼaoga kia tatou pea mo ʼotatou vaivaiʼaga. Koia neʼe filifili fakapotopoto ai e Sehova ni tagata ke natou tohi ia te Tohi-Tapu. Moka tou lau ʼi te Tohi-Tapu ia te ʼu vaivaiʼaga, mo te lotolotolua, mo te mataku pea mo te ʼu lakahala ʼa te ʼu tagata faitohi ʼo te Tohi-Tapu pea mo ʼihi atu, pea ʼe feala ke tou logoʼi tonatou lotomamahi. Pea moka tou lau ʼanatou fakamatala fakafiafia, ʼe tou toe fiafia ai. Ohage pe ko te polofeta ko Elia, “nee natula tahi mo tatou” ia te ʼu tagata faitohi fuli ʼo te Tohi-Tapu.—Sakp. 5:17.
13. Kotea ʼae ʼe ke logoʼi ʼo ʼuhiga mo te faikole ʼa Sonasi?
13 Ohage la, neʼe hinoʼi e te ʼAtua ia te polofeta ko Sonasi ki he gaue maʼuhiga, kaʼe neʼe hola ia. ʼE mahino ia, ka na pau la neʼe ko he ʼaselo ʼae neʼe ina tohi ia te hisitolia ʼaia, ʼe lagi neʼe mole ina fakamatalatala lelei pe kotea ʼae neʼe logoʼi e Sonasi. Koia ʼae neʼe lelei age ai ke filifili e Sehova ia Sonasi totonu ke ina tohi ia tona hisitolia, ʼo kau ai mo tana faikole ki te ʼAtua mai te loloto ʼo te tai. Neʼe ui fenei e Sonasi: “I te temi ae nee gaegae ai toku laumalie [peʼe maʼuli] ia au, nee au manatui ia koe, [Sehova].”—Son. 1:3, 10; 2:1-9.
14. He ko ʼe ʼe feala ke tou mahino ki te ʼu palalau ʼa Esaia?
14 ʼE tou maʼu ia he tahi faʼifaʼitaki ʼi te ʼu palalau ʼae neʼe tohi e Esaia ʼo ʼuhiga mo ia. Koteʼuhi ʼi tana ʼosi mamata ki te kololia ʼo Sehova, neʼe ina ui fenei ai ʼo ʼuhiga mo ʼana agahala: “Malaia kia au! Kua au puli noa, koteuhi ko au ko he tagata ae e uli oku laugutu, pea e au nofo i lotomalie o he hahai ae e uuli onatou laugutu, kae kua sio oku mata ki te Hau, [ia Sehova] o te atu fua tau.” (Esa. 6:5) Neʼe mole feala ki he ʼaselo ke palalau feia ʼo ʼuhiga mo ia totonu. Kaʼe neʼe fealagia ia te faʼahi ʼaia kia Esaia koteʼuhi neʼe ko te tagata agahala ia. Pea ʼuhi ʼae ʼe tou agahala ohage ko Esaia, ʼe feala ai hatatou fakafuafua pe neʼe feafeaʼi ia tona loto ʼi te lakaga ʼaia.
15, 16. (1) He ko ʼe ʼe feala ke tou mahino ki te ʼu meʼa ʼae ʼe logoʼi e ʼihi? Tuku mai he ʼu faʼifaʼitaki. (2) Kotea ʼae ka tokoni mai anai ke tou fakaovi kia Sehova?
15 Neʼe mole feala ki he ʼaselo ke ina ui ʼo ʼuhiga mo ia ‘ʼe mole tuha mo au’ peʼe “ko au ko he tagata agahala” ohage ko tona fai e Sakopo pea mo Petelo. (Sen. 32:10; Luka 5:8) Neʼe mole feala ki te kau ʼaselo ke natou matataku ohage ko te ʼu tisipulo ʼa Sesu ʼae neʼe natou logoʼi te faʼahi ʼaia ʼi ʼihi temi. Pea neʼe mole ʼaoga ke natou maʼu ia te lototoʼa moʼo fakamafola ia te logo lelei ʼi te ʼu fakataga ohage ko Paulo pea mo ʼihi atu. (Soa. 6:19; 1 Tes. 2:2) Koteʼuhi ʼe haohaoa ia te ʼu ʼaselo ʼi te ʼu faʼahi fuli pea mo malolohi age ʼi te tagata. Koia ʼae neʼe fakaʼaogaʼi ai e Sehova ni tagata agahala ohage pe ko tatou moʼo tohi ia te Tohi-Tapu ke feala ai hatatou mahino ki te ʼu meʼa ʼae neʼe natou logoʼi. Pea moka tou lau ia te ʼu faʼahi ʼae neʼe natou tohi, ʼe feala hatatou “fakafiafia mo natou e fiafia; ke [tou] fetagihi mo natou e fetagihi.”—Loma 12:15.
16 ʼAki ia tatatou metitasio ki te aga ʼae neʼe fai e Sehova ki ʼana kaugana agatonu ʼo te temi muʼa, ʼe lahi ai anai te ʼu faʼahi taulekaleka ʼae ka tou iloʼi ʼo ʼuhiga mo totatou ʼAtua. ʼE tou mahino anai pe neʼe fakaovi feafeaʼi ia Sehova ki te ʼu hahaʼi agahala ʼaia ʼaki he kataki fualoa pea mo he lotoʼofa. Kapau ʼe tou iloʼi lelei ia Sehova pea mo lahi age ia totatou ʼofa ʼae kia te ia, ʼe tou fakaovi anai kia te ia.—Lau ia Pesalemo 25:14. *
KE MALOHI ʼATATOU FELOGOʼI ʼAE MO TE ATUA
17. (1) Kotea ia te tokoni lelei ʼae neʼe foaki e Asalia kia Asa? (2) Neʼe meʼa noaʼi feafeaʼi e Asa ia te tokoni ʼa Asalia pea neʼe kotea tona ikuʼaga?
17 ʼE feala ke tou taʼofi ʼihi ako mai te faʼifaʼitaki ʼa te Hau ko Asa. ʼI tana ʼosi malo ʼae ʼi te foʼi kautau Etiopea, neʼe foaki age ki ai e Asalia ia he tokoni fakapotopoto. Neʼe ui fenei e Asalia: “E nofo [ia Sehova] mo koutou moka e kotou nonofo mo ia; kapau e kotou kumi ia ia, e kotou mau anai ia ia; kae kapau e kotou siaki ia ia, e ina siaki anai koutou.” (2 Klk. 15:1, 2) Kaʼe ki muli age, neʼe mole fakalogo ia Asa ki te tokoni lelei ʼaia. ʼI te temi ʼae neʼe laga tau ai ia te puleʼaga ʼo Iselaele ki te puleʼaga ʼo Suta, neʼe mataku ia Asa. Neʼe mole kole tokoni kia Sehova kaʼe neʼe ina fai he fuakava mo te kau Silia, ʼae neʼe ko he kau pagani. Neʼe ui fenei ai e Sehova kia ia: “I te mea aena, kua ke hage he vale, koia i te temi aeni e ke mau anai ni tau.” Pea neʼe hoko moʼoni te faʼahi ʼaia. (2 Klk. 16:1-9) Kotea te ako kia tatou?
18, 19. (1) Kotea ʼae ʼe tonu ke tou fai ke tou nonofo ovi tuʼumaʼu kia Sehova? (2) ʼE tou haga fakaovi feafeaʼi kia Sehova?
18 ʼE mole tonu ke tou fakamamaʼo mai ia Sehova ʼi he temi. Kapau ʼe mole kei tou nonofo ovi kia Sehova, tou foimo mulimuli ki te ʼu palalau ʼaeni ia Oseo 12:7: “Toe liliu mai ki tou Atua; taupau te ofa ki te Atua mo te faitotonu, pea falala tuumau ki tou Atua.” Ke feala hatatou fakaovi kia Sehova, tou ako fakalelei ia te Tohi-Tapu pea mo metitasio ki te sakilifisio.—Lau ia Tetelonome 13:4.
19 Neʼe ui fenei e te tagata faipesalemo: “Ko taku fakaovi ki te Atua, koena toku koloa.” (Pes. 73:28) ʼEi, ʼe ko he meʼa lelei ʼaia kia tatou takitokotahi. Tou fakatuʼutuʼu ke hoko atu ia tatatou ako ʼihi atu faʼahi ʼo ʼuhiga mo Sehova. Kapau ʼe tou fai feia, pea ʼe tuputupu anai ia totatou ʼofa ʼae kia te ia. Koia moka tou fakaovi kia te ia, pea ʼe fakaovi mai anai ia Sehova kia tatou ia ʼaho nei ʼo talu ai.
^ pal. 16 Pesalemo 25:14 (MN): “ ʼE kaumeʼa ia Sehova mo natou ʼae ʼe manavasiʼi kia te ia, ʼo toe feia mo tana fuakava, ʼe ina fakaha age kia natou.”