Fakaʼaogaʼi Ia Te Folafola Maʼuli ʼa Te ʼAtua
“Ko te folafola a te Atua e mauli, mo malohi.”—HEP. 4:12.
1, 2. Kotea ʼae neʼe loto e Sehova ke fai e Moisese? Pea kotea ia te fakapapau ʼae neʼe fai e Sehova?
FAKAKAUKAUʼI age muʼa te aluʼaga ʼaeni: ʼE ke fakafofoga ia te hahaʼi ʼa te ʼAtua pea ʼe tonu ke ke palalau ki te pule malohi tokotahi ʼo te kele. ʼE ke feafeaʼi anai? ʼE mahalo ia, ʼe ke lototuʼania pea mo ke mataku anai ʼi te palalau. Kaʼe ʼe ke teuteuʼi feafeaʼi anai ʼau palalau? Pea ʼi tou ʼuhiga tagata ʼave logo ʼa te ʼAtua, ʼe feala anai koa ke ke palalau ohage he tagata pule?
2 Ko Moisese neʼe felaveʼi mo te aluʼaga ʼaia pea neʼe ko he tagata agavaivai ʼaupito. (Num. 12:3) Kaʼe, neʼe fekauʼi ia ia e Sehova ke alu ʼo palalau ki te tagata agapauʼu pea mo fiatuʼu ʼae ko Falaone. Neʼe loto e Sehova ke alu ia Moisese ʼo fakatotonu kia Falaone ke ina fakaʼateainaʼi ia tana hahaʼi mai tonatou maʼuli popula. (Eke. 5:1, 2) Koia ʼe tou mahino ai ki te fehuʼi fenei age ʼa Moisese kia Sehova: “Ko ai ia au, ke au alu kia Falaone, pea ke au fakamavae mai Esipito te u fanau a Iselaele?” ʼE mahino ia, ʼi te manatu ʼa Moisese neʼe mole feala ia ke palalau kia Falaone. Kaʼe neʼe fakapapauʼi e Sehova kia Moisese ʼe mole nofo tokotahi anai. Koteʼuhi neʼe ui fenei e Sehova: “E au nofo anai mo koe.”—Eke. 3:9-12.
3, 4. (1) He ko ʼe koa neʼe mataku ia Moisese? (2) He ko ʼe ʼe feala ke tatau te ʼu meʼa ʼae ʼe ke logoʼi pea mo ʼae ʼe logoʼi e Moisese?
3 He ko ʼe koa neʼe mataku ia Moisese? ʼE mahino ia, neʼe mataku naʼa mole tali peʼe mole tokagaʼi e Falaone ia te fakafofoga ʼa Sehova ʼAtua. ʼO toe feia pe, neʼe tuʼania ia Moisese naʼa mole tui ia te kau Iselaele ko ia ʼae neʼe filifili moʼoni e Sehova ke ina fakamavae ia natou mai Esipito. Neʼe ui fenei e Moisese kia Sehova: “E mole natou tui anai kia au, pea e mole natou fakalogo anai ki toku leo. Kae e natou ui anai: Nee mole ha [ia Sehova] kia koe.”—Eke. 3:15-18; 4:1.
4 ʼE feafeaʼi kia koe? ʼE lagi mole ke palalau anai ʼi he ʼaho ki he tagata pule malohi. Kaʼe ʼe feala ke faigataʼa hau palalau ki te hahaʼi ʼo tou telituale ʼo ʼuhiga mo Sehova pea mo tona Puleʼaga. Koia, ʼe feala ke tou taʼofi ia he ako maʼuhiga mai te fakatotonu ʼae neʼe fai e Sehova kia Moisese pea mo te aluʼaga ʼae neʼe hoko ki muli age.
“KOTEA I TOU NIMA?”
5. Kotea ʼae neʼe tuku e Sehova ki te nima ʼo Moisese? Pea neʼe liliu feafeaʼi ia Moisese ʼo lotofalala? (Vakaʼi te ʼuluaki pakī.)
5 Neʼe fakaha e Moisese kia Sehova ia tana tuʼania ʼae naʼa mole tui ia te hahaʼi ki ʼana palalau. Pea neʼe teuteuʼi ai e Sehova ia Moisese ke feala hana tauʼi ia te ʼu aluʼaga ʼae ka hoko. ʼE ui fenei ʼi te Tohi-Tapu: “Pea nee ui leva e [Sehova] kia [Moisese]: Kotea i tou nima? Pea nee ina tali leva: Ko he tokotoko. Pea nee ui leva e [Sehova]: Li te tokotoko ki te kele. Pea nee li leva ia e Moisese ki te kele, pea nee liliu leva te tokotoko ko he gata. Pea nee hola leva ia Moisese i ona mua. Pea nee ui leva e [Sehova] kia Moisese: Faoi tou nima, o too ia ia i tona hiku. Pea nee ina faoi leva tona nima o too ia ia; pea nee toe liliu leva te gata ko he tokotoko i tona nima. Nee ui leva e te Eteleno: Koena te mea ae e tonu ke ke fai, ke natou tui anai nee ha kia koe [ia Sehova].” (Eke. 4:2-5) ʼAki te malohi ʼa te ʼAtua, neʼe liliu ai ia te tokotoko ko he gata ʼi te nima ʼo Moisese. Ko te milakulo ʼaia, ʼe ina fakamoʼoni anai ko Moisese neʼe ko te tagata ʼave logo ʼa te ʼAtua pea mai ia te ia neʼe ina maʼu te tuʼulaga pule. Neʼe fakatotonu fenei e Sehova kia ia: “Too i tou nima te tokotoko aena, ae e ke fai anai ki ai te u fakailoga.” (Eke. 4:17) ʼAki te fakamoʼoni ʼaia, neʼe feala ai kia Moisese ke lotofalala pea ke alu ʼo palalau kia Falaone mo te hahaʼi ʼa te ʼAtua.—Eke. 4:29-31; 7:8-13.
6. (1) Kotea ʼae ʼe tonu ke tou toʼo ʼi ʼotatou nima moka tou faifakamafola, pea kotea tona tupuʼaga? (2) Fakamahino pe ko ʼe ʼe “mauli” pea mo “malohi” ia te Folafola ʼa te ʼAtua?
6 Moka tou tala ia te logo lelei ʼa te ʼAtua ki te hahaʼi, kotea ʼae ʼe tou toʼo ʼi ʼotatou nima? ʼE tou toʼo ia te Tohi-Tapu pea ʼe tou fiafia ʼi tona fakaʼaogaʼi. ʼI te manatu ʼa ʼihi, ko te Tohi-Tapu ʼe ko he tohi lelei pe ia. Kaʼe ʼe mole gata ai, koteʼuhi ʼe palalau mai ia Sehova kia tatou ʼaki ia tana Folafola. (2 Pet. 1:21) ʼE tou maʼu ai ia te ʼu fakapapau ʼa te ʼAtua pea ʼe fakaha ai pe kotea ʼae ka ina fakahoko ʼaki ia tona Puleʼaga. Neʼe tohi fenei e te apositolo ko Paulo: “Ko te folafola a te Atua e mauli, mo malohi.” (Lau ia Hepeleo 4:12.) He ko ʼe ʼe maʼuli ia te Folafola ʼa te ʼAtua? Koteʼuhi ʼe gaue tuʼumaʼu pe ia Sehova ki te fakahoko ʼo ʼana fakapapau fuli pea ʼe ina fakahoko katoa anai ʼana fakapapau. (Esa. 46:10; 55:11) Moka ʼe mahino he tahi ki te ʼu faʼahi ʼaia ʼo ʼuhiga mo te Folafola ʼa te ʼAtua, pea ʼe feala ki te ʼu manatu ʼae ʼe ina lau ʼi te Tohi-Tapu ke malave malohi ki tona maʼuli.
7. ʼE tou lava fakaʼaogaʼi feafeaʼi ia “te folafola ʼo te moʼoni”?
7 Neʼe foaki mai e Sehova kia tatou ia tana Folafola maʼuli, ia te Tohi-Tapu. Pea ʼaki ia te meʼa gaue ʼaia, ʼe feala ke tui te hahaʼi ko te logo lelei ʼae ʼe tou tala ʼe haʼu mai te ʼAtua. Koia lolotoga tana akoako ia Timoteo, neʼe fakalotomalohiʼi ai e Paulo ia ia ke ‘faiga fakamalotoloto ʼo fakaʼaogaʼi lelei te folafola ʼo te moʼoni.’ (2 Tim. 2:15, MN) Kaʼe ʼe tou lava mulimuli feafeaʼi ki te tokoni ʼa Paulo? ʼAki tatatou filifili leleiʼi ia te ʼu vaega Tohi-Tapu ʼae ka tou lau anai ki te hahaʼi. Ko tatatou fakatuʼutuʼu, ke malave ki te loto ʼo te hahaʼi ʼae ʼe fagono mai kia tatou. Pea neʼe ko te fakatuʼutuʼu ʼaia ʼo te ʼu pepa lotu ʼae neʼe tou maʼu ʼi te taʼu 2013.
LAU IA HE VAEGA NEʼE FILIFILI LELEIʼI
8. Kotea ʼae neʼe ui e te tehina taupau ki te gaue ʼo ʼuhiga mo te ʼu pepa lotu?
8 ʼE tatau ia te agaaga ʼo te ʼu pepa lotu foʼou fuli. Koia moka tou iloʼi pe feafeaʼi ia te fakaʼaogaʼi ʼo he pepa lotu ʼe tahi, pea ʼe tou iloʼi anai ia te fakaʼaogaʼi fuli ʼo te ʼu pepa lotu. Neʼe tohi e te tehina taupau ki te gaue ʼi Hawaii, ‘neʼe mole natou lavelave tuʼa tahi ʼe fua lelei anai ia te ʼu pepa lotu foʼou ʼaia ki te faifakamafola ʼi te ʼu ʼapi pea mo te faifagonogono faigamalie.’ ʼI te manatu ʼa te tehina taupau ʼaia ki te gaue, ʼe faigafua ia te fakaʼaogaʼi ʼo te ʼu pepa lotu, ʼuhi ko te tuʼu ʼo te fehuʼi pea mo te ʼu tali ʼi te muʼa pasina ʼo te pepa lotu. Koteʼuhi ʼe mole tuʼania anai ia ia ʼae ʼe tou faipalalau mo ia naʼa hala ia tana tali. Pea ʼuhi ko te faʼahiga tohi ʼo te ʼu pepa lotu, ʼe lotolelei ai ia te tokolahi ke natou faipalalau mo tatou ʼo iku ai ki ni faipalalau lelei.
9, 10. (1) Neʼe fakatuʼutuʼu feafeaʼi ʼatatou pepa lotu ke feala ai hatatou fakaʼaogaʼi ia te Tohi-Tapu? (2) Ko te ʼu pepa lotu fea ʼae neʼe fua lelei age ʼi tau faifakamafola? Pea kotea tona tupuʼaga?
9 ʼE maʼu ʼi te ʼu pepa lotu takitahi ia he vaega neʼe filifili leleiʼi, ʼe feala ke tou lau age kia ia ʼae ʼe tou faipalalau mo ia. Ohage la, moka ʼe ke toʼo ia te pepa lotu ʼae ʼE Gata Anai Koa Te Mamahi?, fai age ia te fehuʼi ʼaia ʼi te muʼa pasina ki ai. ʼE feala anai ke ina tali atu “ʼei,” “kailoa,” “ʼe mahalo pe.” Tatau aipe pe kotea ʼae ka ina tali atu, fuli age ia te pasina pea mo ke ui age “Koʼeni ia te manatu ʼae ʼe ui ʼi te Tohi-Tapu.” Pea ke lau age leva ia Apokalipisi 21:3, 4.
10 ʼO toe feia pe, moka ʼe ke fakaʼaogaʼi ia te pepa lotu ʼae Kotea Takotou Manatu ʼo ʼUhiga Mo Te Tohi-Tapu?, ʼe filifili pe anai e ia ʼae ʼe kolua faipalalau ia he tali ʼi te ʼu tali ʼe tolu ʼae ʼe tuʼu ʼi te muʼa pasina. ʼOsi ʼaia, fuli age ia te pasina pea mo ke ui age “ʼE ui ʼi te Tohi-Tapu ‘ko te Tohi-Tapu katoa ʼe haʼu mai te ʼAtua.’ ” ʼE feala ke ke toe ui age “Kaʼe ʼe mole gata ai he ʼe hoko atu fenei ia te vaega.” ʼE ke avahi leva ia tau Tohi-Tapu pea mo ke lau age ia 2 Timoteo 3:16, 17, MN.
11, 12. (1) ʼE feafeaʼi hau fakaʼaogaʼi ia te ʼu pepa lotu ke lahi age ia tau fiafia ʼi te minisitelio? (2) ʼE tokoni feafeaʼi atu ia te ʼu pepa lotu ke ke teuteuʼi ʼau ʼaʼahi?
11 ʼE lagi ke filifili anai ke ke lau ia te pepa lotu pea ke hoko atu ia te faipalalau. Pea ʼe fakalogo pe anai ia ki te tali ʼa te kilisitiano ʼae ʼe kolua faipalalau. Tatau aipe pe kotea ʼae ka tali atu e te hahaʼi, kaʼe neʼe kua ke fakaha age ia te logo lelei mai te pepa lotu pea kua ke lau age kia natou ni vaega Fakatohi-tapu. Mo kapau ʼi tau ʼuluaki ʼaʼahi, neʼe ke lau age pe he vaega ʼe tahi peʼe lua, kaʼe ʼe feala hau toe liliu ʼo hoko atu ia te faipalalau.
12 ʼI te tuʼa pasina ʼo te ʼu pepa lotu fuli, ʼe tuʼu ai te ʼu palalau ʼaeni “Tou Fai Te Fehuʼi ʼAeni.” Pea ʼi lalo ifo, ʼe tuʼu ai te fehuʼi pea mo te ʼu vaega ʼe feala hatatou faipalalau ki ai ʼi ʼatatou ʼaʼahi. Ohage la, ʼi te pepa lotu ʼae Kotea Takotou Manatu ʼo ʼUhiga Mo Te Ka Haʼu?, ʼe tuʼu ai te fehuʼi ʼae “ʼE fetogi feafeaʼi anai e te ʼAtua ia te malamanei ke lelei age?” mo te ʼu vaega ʼo Mateo 6:9, 10 pea mo Taniela 2:44. Ki te pepa lotu leva ʼae ʼE Feala Moʼoni Koa Ke Toe Maʼuli Ake He Mate?, ʼe tuʼu ai te fehuʼi ʼae “He ko ʼe ʼe tou matutuʼa pea mo mamate?” mo te ʼu vaega ʼo Senesi 3:17-19 pea mo Loma 5:12.
13. Fakamahino pe fakaʼaogaʼi feafeaʼi ia te ʼu pepa lotu moʼo kamata ʼaki ai ni ako Tohi-Tapu?
13 Neʼe fakatuʼutuʼu ia te ʼu pepa lotu ʼaia moʼo tokoni mai kia tatou ke tou kamata ni ako Tohi-Tapu. Moka fakaʼaogaʼi e he tahi ia te code QR ʼae ʼe tuʼu ʼi te tuʼa pasina ʼo he pepa lotu, ʼe ina avahi fakahagatonu ai tatatou tuʼasila ʼi te Neti. Pea ʼe fakaafe anai ia ia ke ina ako ia te Tohi-Tapu. ʼE tou toe maʼu ʼi te ʼu pepa lotu ia he tahi ʼu fakamahino mai te kaupepa lahi ʼae Te ʼu Logo Lelei Mai Te ʼAtua. Pea ʼe talanoa ia te ʼu pepa lotu takitahi ki he ako ʼo te kaupepa lahi ʼaia. Ohage la, ʼi te pepa lotu ʼae Ko Ai Te Pule ʼo Te Malamanei?, ʼe taki ai tatou ki te ako 5 ʼo te kaupepa lahi. Pea ko te pepa lotu ʼae Kotea ʼAe ʼe ʼAoga Ke Fiafia Ai He Maʼuli Fakafamili? ʼe taki ai tatou ki te ako 9. Koia, neʼe fakatuʼutuʼu ai ia te ʼu pepa lotu ʼaia ke feala hatatou fakaʼaogaʼi ia te Tohi-Tapu ʼi tatatou ʼuluaki felaveʼi mo he tahi pea ʼi ʼatatou ʼaʼahi. Pea ʼe feala ai ke lahi age ia te ʼu ako Tohi-Tapu ʼae ka tou kamata anai. Kaʼe ʼe feafeaʼi hau toe fakaʼaogaʼi lelei ia te Folafola ʼa te ʼAtua?
FAIPALALAU KI HE MANATU ʼE FIA PALALAU KI AI TE HAHAʼI
14, 15. ʼE ke lava faʼifaʼitakiʼi feafeaʼi ia Paulo ʼi tau minisitelio?
14 Ko te apositolo ko Paulo, neʼe fia mahino ia ki te faʼahiga manatu ʼa “he hahai kaugamalie” ʼi tana minisitelio. (Lau ia 1 Kolinito 9:19-23.) Kotea tona tupuʼaga? Koteʼuhi neʼe fia tokoni ki “te u tagata fuli,” ia te kau Sutea pea mo ʼihi atu, ke natou ako ia te moʼoni ke feala ai honatou haofaki. (Gaue 20:21) ʼE feafeaʼi hatatou faʼifaʼitakiʼi ia Paulo moka tou teuteuʼi ia tatatou fakamafola ia te moʼoni ki “te tagata fuli”?—1 Tim. 2:3, 4.
15 ʼI te mahina fuli, ʼe tou maʼu ʼi te Te Minisitelio ʼo Te Puleʼaga he ʼu faʼifaʼitaki moʼo tala ia te logo lelei. Faigaʼi ke ke ʼahiʼahi fai ia te ʼu faʼifaʼitaki ʼaia. Kaʼe ʼe feafeaʼi mo kapau ʼe fia faipalalau te hahaʼi ʼo tou telituale ki he manatu ʼe natou tuʼania ki ai? Teuteuʼi ʼau palalau ke feala hanatou fia fagono atu. Fakakaukauʼi pe kotea ʼae ʼe tuʼania ki ai ia te hahaʼi ʼae ʼi ʼou tafaʼaki. Pea filifili ia he vaega ʼe alutahi mo te faʼahi ʼaia. Ko he taupau ʼo te siliko pea mo tona ʼohoana, ʼe nā fakamatala pe ʼe feafeaʼi ia tanā fakaʼaogaʼi lahi age ia te Tohi-Tapu ʼi te minisitelio. ʼE nā ui fenei: “ʼE tali anai e te tokolahi ke tou lau age ia he vaega, mo kapau ʼe tou fakanounou ʼatatou palalau pea mo tou talanoa ki te ʼu manatu tafitō. Koia hili tatatou faifakamalo, ʼe feala ke tou lau age ia te vaega.” ʼI te ʼu palakalafe ʼae ka hoa mai, ʼe ke vakaʼi ai anai ni manatu, mo ni fehuʼi pea mo ni vaega neʼe fua lelei ʼi te minisitelio. Pea ʼe feala ke ke ʼahiʼahi fai ʼi tau telituale.
ʼE ke fakaʼaogaʼi lelei koa ia te Tohi-Tapu pea mo te ʼu pepa lotu ʼi tau minisitelio? (Vakaʼi te palakalafe 8-13)
16. Fakamahino pe ʼe ke lava fakaʼaogaʼi feafeaʼi ia Esaia 14:7 ʼi te minisitelio.
16 Mo kapau ʼe ke maʼuli ʼi he koga meʼa ʼe lahi ai te faifakapo pea mo te agamalohi, ʼe feala hau ui fenei age ki he tahi: “Fakakaukauʼi age muʼa ʼe ke lau ʼi te ʼuluaki pasina ʼo te sulunale, ‘Kua malolo ia te kele katoa, ʼe mole toe ʼi ai he maveuveu pea ʼe kalaga fakafiafia ia te hahaʼi.’ ʼI tona fakahagatonu, ʼe ko te manatu ʼaia ʼe tuʼu ʼi te Tohi-Tapu ia Esaia 14:7. Pea ʼi te Tohi-Tapu, ʼe lahi ai ia te ʼu fakapapau neʼe fai e te ʼAtua ʼo ʼuhiga mo te ʼu temi tokalelei ʼae ka haʼu.” ʼOsi ʼaia, ui age ʼe ke fia fakaha age ki ai ia he tahi fakapapau ʼe tuʼu ʼi te Tohi-Tapu.
17. ʼE tou lava fakaʼaogaʼi feafeaʼi ia Mateo 4:4 ʼi he faipalalau?
17 Ko te hahaʼi ʼo tou telituale ʼe lagi natou hoha fau ki te ʼu koloa. Peʼe lagi faigataʼa ki ʼihi hanatou taupau ia tonatou maʼuli. Kapau koia, pea ʼe feala ke ke kamata fenei ia he faipalalau: “ʼI tau manatu la, ʼe hoki tou maʼuli fiafia pe koa moka ʼe lahi ia te ʼu koloa ʼae ʼe tou maʼu?” ʼI tana ʼosi tali atu, ʼe ke lava ui fenei age: “Ko te tokolahi ʼae ʼe natou maʼu koloa, ʼe mole natou maʼuli fiafia. Kaʼe kotea koa ʼae ʼe ʼaoga moʼoni ke tou maʼuli fiafia ai?” ʼOsi ʼaia, lau age ia Mateo 4:4 pea mo ke fakalavelave age pe ʼe ina fia ako ia te Tohi-Tapu.
18. ʼE ke lava fakaʼaogaʼi feafeaʼi ia Selemia 29:11 moʼo fakalotofimalieʼi ʼihi?
18 ʼE lagi lotomamahi ia te hahaʼi ʼo tou telituale ʼuhi ko he tuʼutamaki neʼe hoki hoko pe. Koia ʼe feala ke ke kamata fenei ia he faipalalau: “ʼE au fiafia ʼi taku maʼu mai koe ki tou loto fale he ʼe au fia fakaha atu ia he logo fakalotofimalie. (Lau ia Selemia 29:11.) Neʼe ke tokagaʼi koa ia te ʼu faʼahi ʼaeni ʼe tolu ʼae ʼe fakaʼamu ki ai te ʼAtua maʼa tatou? Ko ‘te tokalelei,’ mo ‘he apogipogi pea mo he ʼamanaki ʼe lelei.’ ʼE ko he meʼa lelei ia tatatou iloʼi ʼae ʼe loto e te ʼAtua ke tou maʼuli fiafia. Kaʼe ʼe feala ke hoko feafeaʼi ia te faʼahi ʼaia?” ʼOsi ʼaia, pea ke fakaha age leva ia te ako ʼae ʼe alutahi mo te faʼahi ʼaia ʼi te kaupepa lahi Logo Lelei.
19. Fakamahino pe ʼe ke lava fakaʼaogaʼi feafeaʼi ia Apokalipisi 14:6, 7 kapau ʼe ke faipalalau mo natou ʼae ʼe ʼi ai tanatou lotu.
19 ʼE lagi ʼi ai he lotu ʼa te hahaʼi ʼae ʼe maʼuʼuli ʼi ʼou tafaʼaki. Kapau koia, pea ʼe feala ke ke kamata fenei ia he faipalalau: “Kapau ʼe palalau atu ia he ʼaselo, ʼe ke fagono anai koa ki ʼana palalau? (Lau ia Apokalipisi 14:6, 7.) Ko ai koa ia te ʼAtua ʼae ʼe ui e te ʼaselo ke tou ‘matataku’ peʼe ke tou manavasiʼi ki ai? ʼE ko ‘ia ae nee ina fakatupu te lagi mo te kele.’ Kaʼe kotea koa te tahi ʼu fakamahino ʼo ʼuhiga mo te ʼAtua ʼe tuʼu ʼi te Tohi-Tapu?” ʼOsi ʼaia, lau age ia Pesalemo 124:8 ʼae ʼe ui fenei ai: “E mau tomatou tokoni i te huafa o [Sehova], ae nee ina fai te atu lagi mo te kele.” Pea ke fakaha age leva ʼe ke fia vaevae mo ia he tahi ʼu fakamahino ʼo ʼuhiga mo Sehova ʼAtua.
20. (1) ʼE ke lava fakaʼaogaʼi feafeaʼi ia Taaga Lea 30:4 moʼo akoʼi ki he tahi ia te ʼuluagaaga ʼo te ʼAtua? (2) Ko te vaega fea ʼae neʼe ke fakaʼaogaʼi pea neʼe fua lelei ai ki tau minisitelio?
20 ʼE feala hau kamata faipalalau mo he tupulaga ʼo ke ui fenei age: “ʼE au ʼamusia age ke au lau atu ia he vaega ʼe lagaʼi ai ia ni fehuʼi maʼuhiga. (Lau ia Taaga Lea 30:4.) ʼE mahino ia ʼe talanoa te vaega ʼaeni ki totatou Tupuʼaga koteʼuhi ʼe mole feala ki he tagata ke ina fai te ʼu meʼa ʼaia. Kaʼe ʼe feafeaʼi hatatou lava iloʼi ia te ʼuluagaaga ʼo te ʼAtua? Koia ʼe au fiafia anai ʼi te fakaha atu ia te faʼahi ʼaia ʼi te Tohi-Tapu.”
FAKAʼAOGAʼI IA TE MALOHI ʼO TE FOLAFOLA ʼA TE ʼATUA ʼI TAU MINISITELIO
21, 22. (1) ʼE lava fetogi feafeaʼi ia te maʼuli ʼo he tahi ʼaki he vaega neʼe filifili leleiʼi? (2) Kotea ʼae ʼe ke fakatotonu ke ke fai ʼi tau minisitelio?
21 ʼE mole feala hatatou iloʼi pe ʼe tali feafeaʼi anai e te hahaʼi ia he vaega neʼe filifili leleiʼi. Ohage la, neʼe faifakamafola ia te ʼu Fakamoʼoni ʼe toko lua ki he fafine. Pea neʼe fehuʼi fenei age he tahi ia naua ki te fafine: “ʼE ke iloʼi koa pe ko ai te huafa ʼo te ʼAtua?” ʼOsi ʼaia, neʼe ina lau age leva ia Pesalemo 83:18, MN, ʼo punamaʼuli ai te fafine. ʼE ina ui fenei: “ʼI tanā mavae, neʼe au alu ai leva ki he fale fakatau tohi ʼe vaha mamaʼo mo toku ʼapi ia kilometa ʼe 56. Neʼe au fia vakaʼi ʼihi fakaliliu ʼo te Tohi-Tapu pea mo kumi ia te huafa ʼaia ʼi te tikisionalio. ʼI taku tui papau ʼae ʼe higoa ia te ʼAtua ko Sehova, neʼe au feʼekeʼaki ai leva pe kotea ʼihi atu faʼahi neʼe mole au iloʼi.” ʼE mole faʼa fualoa ki ai, neʼe ina kamata ako ia te Tohi-Tapu mo te tagata ʼae ka ʼamanaki ʼohoana mo ia, pea ki muli age neʼe nā papitema.
22 ʼE malohi ia te Folafola ʼa te ʼAtua ke ina fetogi ia te maʼuli ʼa te hahaʼi. Moka lau e he tahi ia te Tohi-Tapu, pea ʼe feala ke ina fakamalohiʼi ia tana tui ʼae ki te ʼu fakapapau ʼa Sehova. Pea ʼaki ia tana tui, ʼe uga ai anai ia ia ke ina maʼuliʼi ia te ʼu faʼahi ʼae ʼe ina ako. (Lau ia 1 Tesalonika 2:13.) ʼE malohi age ia te logo ʼo te Folafola ʼa te ʼAtua ʼi ʼatatou palalau. Koia ʼae ʼe tou fakatotonu ai ke tou faiga malohi ʼo fakaʼaogaʼi ia te Folafola ʼa te ʼAtua ʼi tatatou minisitelio. Koteʼuhi ʼe maʼuli ia te Folafola ʼa te ʼAtua.