ʼI Te ʼu Aluʼaga Fuli Pe, Kotou Fakalogo Ki Te Leʼo ʼo Sehova
“E logo anai ou taliga . . . ki te leo ae e ina ui: Koeni te ala.” —ESA. 30:21.
1, 2. ʼE felogoʼi feafeaʼi ia Sehova mo ʼana kaugana?
TALU mai fualoa, neʼe takitaki tuʼumaʼu pe e Sehova ia tana hahaʼi. ʼI te temi muʼa, neʼe ina fakaʼaogaʼi ia te ʼu ʼaselo, peʼe ko he ʼu moemisi, peʼe ko he ʼu meʼa neʼe ha, moʼo fakaha ki ʼihi ia te ʼu aluʼaga ʼae ka hoko anai ʼi te ka haʼu. Neʼe toe fai e Sehova ia te ʼu faʼahi ʼaia moʼo fakaha ki ʼihi ia te ʼu gaue ʼae neʼe tonu ke natou fakahoko. (Num. 7:89; Esk. 1:1; Tan. 2:19) Tatau aipe pe ʼe fakaha feafeaʼi e Sehova ʼana fakatuʼutuʼu ki tana hahaʼi, kaʼe neʼe ina tapuakiʼi ia natou ʼae neʼe fakalogo kia te ia.
2 Ia ʼaho nei, ʼe fakaʼaogaʼi e Sehova ia te Tohi-Tapu, mo tona laumalie maʼoniʼoni pea mo te kokelekasio moʼo takitaki ʼo tatou. (Gaue 9:31; 15:28; 2 Tim. 3:16, 17) ʼI te lelei ʼo tana faʼahiga takitaki, ʼe hage pe ʼe tou logo ki ai ʼe ina ui fenei mai: “Koeni te ala, koutou haele i ai!” (Esa. 30:21) ʼE toe fakaʼaogaʼi e Sehova ia Sesu moʼo fakaha mai Tana folafola. Neʼe ina hinoʼi ia Sesu ke ina takitaki te kokelekasio ʼaki ia “te tagata faifekau agatonu mo poto.” (Mat. 24:45) ʼE tonu ke tou tali fakamalotoloto ia te takitaki ʼaia ʼa Sehova, he ʼe fakalogo totatou maʼuli heʼe gata ki tatatou fakalogo kia te ia.—Hep. 5:9.
3. Kotea ʼae ʼe feala ke tupu ai hatatou mole fakalogo kia Sehova? (Vakaʼi te ʼuluaki pakī.)
3 ʼE iloʼi e Satana ʼe haofaki anai totatou maʼuli mo kapau ʼe takitaki tatou e Sehova. Koia ʼe ina faigaʼi ke ʼaua naʼa tou fakalogo kia Sehova. Pea tahi, ʼe feala ke mole tou fia fakalogo kia Sehova ʼuhi ko totatou ʼuhiga agahala. (Sel. 17:9) ʼI te alatike ʼaeni, ʼe tou vakaʼi anai pe ʼe tou lava tauʼi feafeaʼi ia te ʼu fakaneke ʼa Satana ke ʼaua naʼa tou fakalogo ki te leʼo ʼo te ʼAtua. ʼE tou toe vakaʼi anai pe ʼe feafeaʼi hatatou fakalogo ki te leʼo ʼo te ʼAtua. Pea ʼe tou vakaʼi anai pe ʼe ʼaoga feafeaʼi ia te faikole ke tou taupau ia he ʼu felogoʼi lelei mo Sehova ʼi te ʼu aluʼaga fuli pe.
TOU TAUʼI TE ʼU FAKANEKE ʼA SATANA
4. ʼE faigaʼi feafeaʼi e Satana ke ina puleʼi te fakakaukau ʼa te hahaʼi?
4 ʼE fakaʼaogaʼi e Satana he ʼu loi ke feala ai hana puleʼi te fakakaukau ʼa te hahaʼi. (Lau ia 1 Soane 5:19.) ʼI te malamanei katoa, ʼe lahi ʼaupito te ʼu logo ʼe tou maʼu ʼi te sulunale, ʼi te ʼu tohi, ʼi te latio, ʼi te televisio peʼe ʼi te Neti. ʼE ʼi ai pe te ʼu logo ʼe ʼaoga kia tatou, kaʼe ʼe lahi age pe te ʼu logo ʼe fakamaʼuhigaʼi ai te ʼu aga ʼae ʼe mole alu tahi mo te ʼu lekula ʼa Sehova. (Sel. 2:13) Ohage la, ʼe natou lau ʼe mole kovi ia te ʼohoana ʼa te tagata mo he tagata peʼe ko te fafine mo he fafine. ʼAki te logo ʼaia, tokolahi ʼe natou manatu ʼe fefeka fau ia te ʼu lekula ʼi te Tohi-Tapu ʼo ʼuhiga mo te faʼahi ʼaia.—1 Ko. 6:9, 10.
5. ʼE tou lava tauʼi feafeaʼi ia te ʼu fakaneke ʼa Satana?
5 Ke ʼaua naʼa fakaneke tatou e Satana ʼaki he ʼu loi, kotea ʼae ʼe tonu ke fai e tatou ʼaeni ʼe ʼoʼofa ki te ʼu lekula ʼa Sehova? ʼE tou iloʼi feafeaʼi te kehekehe ʼo te lelei pea mo te kovi? ʼAki tatatou tuku ke takitaki tatou e te Folafola ʼa te ʼAtua. (Pes. 119:9) ʼE tokoni mai te Tohi-Tapu ke tou lava fakakehekeheʼi te moʼoni pea mo te loi. (Taag. 23:23) Neʼe ui e Sesu ‘ ʼe maʼuli anai te tagata ki te ʼu folafola fuli ʼae ʼe haʼu mai te gutu ʼo te ʼAtua.ʼ (Mat. 4:4) ʼE foaki mai e Sehova ʼi te Tohi-Tapu ia he ʼu pelesepeto ʼe ʼaoga mo akoʼi ʼo tatou pea mo tou maʼuliʼi. Ohage la, ʼi te temi ʼo Sosefo, neʼe heʼeki tohi he lao ʼo ʼuhiga mo te tono. Kaʼe logo la te faʼahi ʼaia, neʼe kua iloʼi pe e Sosefo ʼe mole feala ke momoe mo te ʼohoana ʼo Potifale, koteʼuhi ʼe ko he agahala ia ki te ʼAtua. Neʼe mole manatu ia ke talagataʼa kia Sehova. (Lau ia Senesi 39:7-9.) Logo la tona fakaneke tuʼumaʼu e te ʼohoana ʼo Potifale, kaʼe neʼe fia fakalogo pe ia ki te leʼo ʼo Sehova. ʼO toe feia pe mo tatou, ʼe tonu ke tou fakalogo ki te leʼo ʼo Sehova, kaʼe mole ki te ʼu loi ʼae ʼe fai tuʼumaʼu e Satana.
6, 7. Kotea ʼae ʼe tonu ke tou fai moʼo tekeʼi ia te ʼu fakaneke ʼa Satana?
6 ʼE lahi te ʼu akonaki fakalotu kua mafola ʼi te malamanei, koia la ʼae ʼe mata faigataʼa ai ki te hahaʼi tanatou iloʼi pe ʼe ko te lotu fea ʼae ʼe moʼoni. Kaʼe kapau ʼe tou fia fakalogo kia Sehova, ʼe ina fakafealagia mai ke tou maʼu ia te moʼoni. ʼE tonu ke tou filifili pe ko ai ʼae ka tou fakalogo anai ki ai. ʼE faigataʼa hatatou fakalogo ki he ʼu leʼo ʼe lua ʼi he temi pe ʼe tahi. Ohage pe ko he ʼu ovi ʼe natou iloʼi ia te leʼo ʼo tanatou tagata tauhi ovi, ʼe tonu ke tou iloʼi ia te leʼo ʼo Sesu, ia ia ʼae neʼe hinoʼi e Sehova ke ina taupau tatou.—Lau ia Soane 10:3-5.
7 Neʼe ui fenei e Sesu: “Koutou tokaga ki te mea ae e koutou logo ki ai.” (Mko. 4:24) Ko te takitaki ʼa Sehova ʼe mahino gafua pea mo totonu. Kaʼe ʼe tonu ke tou maʼu ia he faʼahiga manatu ʼe lelei ke feala ai hatatou tali tana tokoni. Kapau ʼe mole tou nonofo tokaga, ʼe feala pe ke tou fakalogo ki te ʼu fakaneke ʼa Satana kaʼe mole ki te takitaki ʼofa ʼa Sehova. ʼAua naʼa kotou tuku te musika, peʼe ko te ʼu ʼata viteo, peʼe ko te ʼu ʼata ʼi te televisio, peʼe ko te ʼu tohi, peʼe ko ʼokotou kaugā gaue, peʼe ko te ʼu faiako, peʼe ko te hahaʼi popoto, ke natou puleʼi tokotou maʼuli.—Kol. 2:8.
8. (1) ʼE tou lava tuku feafeaʼi totatou loto ke fakaneke e Satana? (2) Kotea ʼae ʼe feala ke hoko mo kapau ʼe mole tou tokagaʼi te ʼu aluʼaga ʼae ʼe tou totō ai?
8 ʼE iloʼi lelei e Satana ia totatou ʼuhiga agahala. ʼE ina faigaʼi ke tou mulimuli ki ʼotatou holi. Koia ʼe faigataʼa ai hatatou nonofo agatonu kia Sehova. (Soa. 8:44-47) ʼE feala pe ke tou taʼofi tatatou faikole, peʼe mole kei tou faʼafai ʼi te minisitelio, peʼe kua tou to fono. ʼE ha ʼi te ʼu aluʼaga ʼaia ia te ʼu meʼa ʼae ʼi totatou loto. Kapau ʼe mole tou tokagaʼi te ʼu faʼahi ʼaia, ʼe feala ke tou tuʼutamakiʼia ai. Kapau ʼe mole tou nonofo tokaga, ʼaki te temi ʼe feala pe ke mole kei tou fakalogo ki te leʼo ʼo Sehova. ʼE tou fakahoko anai ʼotatou holi pea mo fai ia he meʼa neʼe mole tou fakaʼamu ki ai. (Loma 7:15) Kaʼe ʼe feala pe ke ʼaua naʼa tou to ki te hele ʼaia, mo kapau ʼe tou tokagaʼi te ʼu aluʼaga ʼaia pea mo tou foimo fai ia he ʼu puleʼaki ki ai. Kapau ʼe tou fakalogo fakalelei ki te leʼo ʼo Sehova, ʼe mole tou fakalogo anai ki te ʼu manatu fakafeagai.—Taag. 11:9.
9. He ko ʼe ʼe lelei ke tou foimo tokagaʼi ʼotatou holi?
9 ʼE feala ke haofaki ia he tahi ʼe mahaki kovi mo kapau ʼe maʼu tautonu tona mahaki pea mo foimo faitoʼo. ʼO toe feia pe mo tatou, kapau ʼe tou tokagaʼi ʼe ʼi ai hotatou holi, ʼe tonu ke tou foimo fai he puleʼaki ki ai. Kapau ʼe mole tou fai ia te faʼahi ʼaia, ʼe feala anai ke “puke [tatou e Satana] o fakapopulai ki tona finegalo.” (2 Tim. 2:26) Kotea ʼae ʼe tonu ke tou fai mo kapau ʼe tou tokagaʼi ʼe mole kei alu tahi ʼatatou manatu mo ʼotatou holi pea mo te ʼu meʼa ʼae ʼe fakamaʼua mai e Sehova? ʼE tonu ke tou toe foimo fakaovi atu aipe kia Sehova, ʼo tou kumi tana takitaki pea mo tou mulimuli ki ai. (Esa. 44:22) Kaʼe ʼe tou iloʼi, ʼe feala pe ke lotomamahi he tahi ʼuhi ko te ʼu agahala ʼae neʼe ina fai, logo la tana kua toe liliu mai kia Sehova. Koia ʼe lelei age ke tou nonofo ovi tuʼumaʼu pe kia Sehova.
TOU TAUʼI TE FIATUʼU PEA MO TE MANUMANŪ
10, 11. (1) ʼE ha feafeaʼi ia te fiatuʼu ʼa he tahi? (2) Kotea te ako ʼe tou maʼu mai te agatuʼu ʼa Kole, mo Tatane pea mo Apilame?
10 ʼE tonu ke tou mahino ʼe feala pe ke taki tatou e totatou loto ke tou mamaʼo mai ia Sehova. Ohage la, ʼe feala ke tou liliu ʼo fiatuʼu pea mo manumanū koloa. ʼE feala ke tou fai he ʼu agahala mamafa ʼuhi ko te ʼu vaivaiʼaga ʼaia. Ko ia ʼae ʼe fiatuʼu, ki tana manatu ʼe maʼuhiga age ia, pea ʼe ina fai pe ia te meʼa ʼae ʼe loto ki ai. Kia ia, ʼe mole tonu ke tokoniʼi ia ia e he tahi age, peʼe ko he tehina, peʼe ko he tagata ʼafeā, peʼe ko he tahi pe ʼi te kautahi. ʼI tana fakamamaʼo ʼaia mai ia Sehova, ʼe mole kei ina logoʼi Tona leʼo.
11 Neʼe fakanofo e Sehova ia Moisese pea mo Alone, ke nā takitaki te kau Iselaele ʼi te toafa. Kaʼe neʼe fakafeagai ia Kole, mo Tatane pea mo Apilame kia naua, koteʼuhi neʼe natou fiatuʼu. Koia neʼe natou fia fakahoko ai tanatou faʼahiga tauhi kia Sehova. Kotea ʼae neʼe fai e Sehova? Neʼe ina fakaʼauha ia natou ʼaia. (Num. 26:8-10) ʼE ʼi ai te ako maʼuhiga ʼe tou taʼofi mai te aluʼaga ʼaia neʼe hoko. Ko te fakafeagai ʼae kia Sehova, ʼe ina taki ki te malaʼia. Koia, ʼe ui fenei ai ʼi te Tohi-Tapu: “E muamua te fiamealahi i te maumau.”—Taag. 16:18; Esa. 13:11.
12, 13. (1) ʼE tou lava tuʼutamaki feafeaʼi ʼuhi ko te manumanū? Tuku mai he faʼifaʼitaki. (2) ʼE lava tuputupu feafeaʼi ia tatou ia te manumanū mo kapau ʼe mole tou lolomi ʼotatou holi? Kotou fakamahino.
12 ʼE kovi ia te manumanū. Ko ia ʼae ʼe manumanū, ki tana manatu ʼe mole ʼaoga ke takitaki ia ia e Sehova. Ki tana manatu ʼe feala pe ke ina toʼo ia te ʼu meʼa ʼae ʼe mole ʼa ia. Neʼe ʼi ai te Senelale Silia, neʼe higoa ko Naamane, pea neʼe kau ki te mahaki ʼae ko te kilia. Neʼe haga leva ia te polofeta ʼa te ʼAtua ko Eliseo ʼo fakamalolō ia ia mai tona mahaki. ʼI te lahi ʼo tona fiafia, neʼe fia foaki e Naamane ia he ʼu meʼa ʼofa kia Eliseo, ko he paʼaga pea mo he ʼu mutu ʼi meʼa, kaʼe neʼe fakafisi ki ai ia Eliseo. Kaʼe neʼe fia fai ki ai ia Keasi, te tagata kaugana ʼa Eliseo. Koia neʼe liliu ai ia Keasi ʼo manumanū. Neʼe alu fakafufu ia Keasi, ʼo tuli ia Naamane pea mo lohiʼi ia ia ke ina ʼavage ia te ʼu meʼa ʼofa. Kotea ʼae neʼe hoko kia Keasi? Neʼe pikisia ia ʼi te kilia.—2 Hau 5:20-27.
13 Kapau ʼe mole tou nonofo tokaga, ʼe feala ke tuputupu ia tatou te manumanū ki he meʼa ʼe feala ke tuʼutamakiʼia ai totatou maʼuli. Neʼe ko te faʼahi la ʼaia neʼe hoko kia Akane. Neʼe ina ui fenei: “Nee au sio i te koloa o te tau ki he pulupulu matalelei mai Mesopotamia, mo ni foi sikele paaga e luageau, pea mo he potu aulo e nimagofulu sikele. Nee au manumanu leva ki te u mea aena, pea nee au too leva natou.” Neʼe tonu ke tekeʼi e Akane ia tona holi ʼaia. Kaʼe neʼe mole ina fai. Koia neʼe ina kaihaʼa ai te ʼu koloa ʼaia pea mo ina fufu ʼi tona fale la. Neʼe fakaha e Sehova ia te agahala ʼae neʼe fai e Akane, ke iloʼi e te hahaʼi fuli. Pea ʼi te ʼaho pe ʼaia, neʼe tuki makaʼi e te kau Iselaele ia te tagata kaihaʼa ʼaia pea mo tona famili, ʼo natou mamate ai. (Sos. 7:11, 21, 24, 25) ʼE feala pe ke tou liliu fuli ʼo manumanū ohage ko Akane. Koia ʼe tonu ai ke tou “tokaga aupito ki te manumanū koloa.” (Luka 12:15) ʼO toe feia pe ki te ʼu felaveʼi fakasino heʼe ʼaoga, ʼe ko he tahi faʼahiga manumanū ʼaia. ʼE moʼoni, ʼi ʼihi temi ʼe feala pe ke tou maʼu he ʼu manatu ʼe mole lelei, kaʼe ʼe tonu ke tou lolomi ʼatatou manatu ke ʼaua naʼa tou agahala ʼuhi ko ʼotatou holi.—Lau ia Sakopo 1:14, 15.
14. Kotea ʼae ʼe tonu ke tou fai moka tou logoʼi ʼe tou fiatuʼu peʼe tou manumanū?
14 ʼE mahino ia, ko te fiatuʼu pea mo te manumanū, ʼe ina taki tatou ki te malaʼia. Kapau ʼe tou fakakaukauʼi ʼona fua kovi, ʼe tou faiga anai ke tou haga fakalogo ki te leʼo ʼo Sehova. (Tet. 32:29) ʼE fakaha mai e Sehova ʼi te Tohi-Tapu ia te ʼu fua lelei ʼe tou maʼu moka tou fai ia te ʼu meʼa ʼae ʼe lelei, pea mo te ʼu fua kovi moka tou fai ia te ʼu aga ʼae ʼe kovi. Ka tou logoʼi ʼe tou fia fai he meʼa ʼe kovi, ʼuhi ko te fiatuʼu peʼe ʼuhi he ʼe tou manumanū, ʼe lelei ke tou fakakaukauʼi ʼona fua kovi kia tatou, ki totatou famili, ki ʼatatou felogoʼi mo Sehova.
TOU TAUPAU HE ʼU FELOGOʼI LELEI MO SEHOVA
15. Kotea te ako ʼe tou maʼu mai te faʼifaʼitaki ʼo Sesu?
15 ʼE loto e Sehova ke manuʼia totatou maʼuli. (Pes. 1:1-3) ʼE ina foaki mai tana tokoni ʼi tona temi totonu. (Lau ia Hepeleo 4:16.) Maʼia mo Sesu, logo la neʼe haohaoa, kaʼe neʼe ʼaoga ke felogoʼi tuʼumaʼu mo Sehova. Koia neʼe ko hana agamahani ia te faikole. Neʼe tokoni ia Sehova kia Sesu pea mo ina takitaki ia ia ʼi hona aluʼaga fakaofoofo. Neʼe ina fekauʼi he ʼu ʼaselo ke natou tokakaga ki ai, mo ina foaki age tona laumalie maʼoniʼoni, pea mo ina takitaki ia ia ʼi tana filifili te toko 12 kau apositolo. Neʼe palalau ia Sehova mai te lagi, ʼo ina fakaha tana lagolago pea mo tona ʼofa ʼae kia Sesu. (Mat. 3:17; 17:5; Mko. 1:12, 13; Luka 6:12, 13; Soa. 12:28) Ohage pe ko Sesu, ʼe tonu ke tou faikole fakamalotoloto kia Sehova. (Pes. 62:8, 9; Hep. 5:7) ʼE tokoni mai te faikole ke tou nonofo ovi kia Sehova pea ke tou fakakololiaʼi ia ia ʼaki totatou faʼahiga maʼuli.
16. ʼE tokoni feafeaʼi mai ia Sehova ke tou lava logo ki tona leʼo?
16 Logo la ʼe fakafealagia e Sehova ke tou maʼu tana tokoni, kaʼe ʼe mole ina fakakinauʼi he tahi ke mulimuli ki ai. Kapau ʼe tou kole tona laumalie maʼoniʼoni moʼo takitaki ʼo tatou, ʼe ina haga foaki mai anai. (Lau ia Luka 11:10-13.) ʼE ui fenei ʼi te Tohi-Tapu: “Koutou tokaga ki takotou faahiga fakalogo.” (Luka 8:18) Ohage la, ʼe tou kole kia Sehova ke tokoni mai ke ʼaua naʼa tou fai he ʼu aga heʼe ʼaoga. Kaʼe kapau ʼe tou haga sioʼi he ʼu ʼata kovi, ʼe ha ai ʼe mole tou fia fakalogo moʼoni ki tana tokoni. Ke feala hana tokoni mai, ʼe tonu ke tou kau ki te ʼu fono, mo te faifakamafola, mo te ʼu fakatahi lalahi pea mo ʼihi atu gaue ʼe takitaki e tona laumalie. Tokolahi ʼi te ʼu kaugana ʼa Sehova neʼe natou hao mai te ʼu malaʼia he neʼe natou logo ki te leʼo ʼo Sehova ʼi ʼatatou fono. ʼI tanatou iloʼi ʼae ʼe kua tuputupu ia natou he ʼu holi kovi, ʼe natou foimo fai he ʼu puleʼaki ki ai.—Pes. 73:12-17; 143:10.
TOU HAGA FAKALOGO FAKALELEI KI TE LEʼO ʼO SEHOVA
17. He ko ʼe ʼe mole tonu ke tou falala fau kia tatou totonu?
17 ʼE ʼi ai te ako maʼuhiga ʼe feala ke tou taʼofi mai te faʼifaʼitaki ʼo Tavite, te Hau ʼo Iselaele. Mai tona aluʼaga ʼae neʼe falala ia Tavite kia Sehova, neʼe ina lava fai he ʼu gaue lalahi. ʼI tana kei tupulaga, neʼe ina matehi ia te tagata lahi ʼae ko Koliate. Ki muli age neʼe liliu ko he tagata solia, pea neʼe fakanofo leva ia ia ko he hau. Neʼe ko tona maʼua ke ina puipui pea mo ina takitaki lelei ia te kau Iselaele. Kaʼe ʼi te temi leva ʼae neʼe kamata falala fau ai kia ia totonu, neʼe kakaʼi leva ia ia e tona loto. Neʼe agahala mo Pate-Sepa pea mo ina matehi ia tona ʼohoana ko Uli. Kaʼe ʼi te temi ʼae neʼe fakatonutonuʼi ai e Sehova ia Tavite, neʼe fakalogo ʼaki he agavaivai, pea neʼe mole ina fufu ʼana agahala. Koia neʼe toe liliu ai leva ko he kaumeʼa ʼo Sehova.—Pes. 51:6, 8, 12, 13.
18. Kotea ʼae ka tokoni mai anai ke tou haga fakalogo ki te leʼo ʼo Sehova?
18 ʼE tou tokagaʼi ia 1 Kolinito 10:12, ia te maʼuhiga ʼae ke ʼaua naʼa tou falala fau kia tatou totonu. ʼE ui fakahagatonu ʼi te Tohi-Tapu, ʼe mole feala ke tou takitaki ia tatou totonu. ʼE tou filifili pe anai pe ʼe tou fakalogo ki te leʼo ʼo Sehova peʼe ki te leʼo ʼo Satana. (Sel. 10:23) ʼE maʼuhiga ke tou faikole tuʼumaʼu pea mo tou mulimuli ki te takitaki ʼo te laumalie maʼoniʼoni. Koia, ʼofa pe ke tou haga fakalogo fakalelei ki te leʼo ʼo Sehova.