ʼE TOU maʼuʼuli nei ʼi te ʼu temi faigataʼa ʼaupito ʼi te hisitolia ʼo te tagata. (2 Tim. 3:1-5) Pea ʼi te ʼaho fuli pe, ʼe ʼahiʼahiʼi ai tatatou ʼofa ʼae kia Sehova pea mo tatatou fakalogo ʼae ki ʼana lekula faitotonu. Koia ʼae neʼe fakapapauʼi ai e Sesu ki ʼana tisipulo ʼe ina fakalotomalohiʼi anai natou ke natou faʼa kataki ʼo kaku ki te fakaʼosi. (Mat. 24:3, 13; 28:20) Ke feala hana tokoni mai, neʼe fakanofo e Sesu ia he tagata faifekau agatonu ke ina foaki ia “te meakai [fakalaumalie] i tona temi totonu.”—Mat. 24:45, 46.

Neʼe fakanofo ia te tagata faifekau agatonu ʼi te taʼu 1919. Pea talu mai te taʼu ʼaia, mo tana foaki ia te meʼa kai fakalaumalie ki te hahaʼi ʼa te ʼAtua ʼi ni lea kehekehe. (Mat. 24:14; Apk. 22:17) Kaʼe ʼe mole maʼu te ʼu tohi Fakatohi-tapu ʼi te ʼu lea fuli. Ohage la, ʼe mole feala ke lau e te hahaʼi fuli te ʼu alatike ʼae ʼe maʼu pe ʼi tatatou tuʼasila jw.org ʼi te Neti. ʼE mole toe feala foki ki te hahaʼi fuli ke natou sioʼi te ʼu ʼata ʼae ʼe maʼu ai. Ko tona fakaʼuhiga koa ʼe mole maʼu fuli e ʼihi kau Kilisitiano ia te meʼa kai fakalaumalie ʼae ʼe ʼaoga kia natou? Moʼo tali ki ai, tou vakaʼi ia fehuʼi maʼuhiga ʼe fa.

Neʼe ʼahiʼahiʼi e Satana ia Sesu ke ina fakaliliu te ʼu maka ko ni foʼi pane. Pea neʼe ui fenei age e Sesu: “E mole mauli anai te tagata ki te pane pe, kae ki te u folafola fuli ae e hau mai te gutu o te Atua.” (Mat. 4:3, 4) Ko te ʼu folafola ʼa Sehova ʼe tuʼu ʼi te Tohi-Tapu. (2 Pet. 1:20, 21) Koia, ko te faʼahi ʼae ʼe maʼuhiga tafitō ʼi tatatou meʼa kai fakalaumalie, ʼe ko te Tohi-Tapu.—2 Tim. 3:16, 17.

ʼAki te kautahi ʼa Sehova neʼe tou maʼu ai ia te Tohi-Tapu Les Saintes Écritures. Traduction du monde nouveau. Pea kua maʼu katoa peʼe fakakoga ia lea ʼe 120 tupu, ʼo tuputupu aipe te ʼu lea ʼae ʼe fakaliliu ki ai ʼi te taʼu fuli. Kaʼe ʼe toe ʼi ai foki mo te tahi ʼu fakaliliu ʼo te Tohi-Tapu, neʼe lau ʼi miliale tona ta pea ʼe maʼu ia lea ʼe lau ʼi afe. Pea ʼe ko te finegalo ʼaia ʼo te ʼAtua “ke fakamauli te tagata fuli, pea ke natou kaku ki te iloi katoa o te mooni.” (1 Tim. 2:3, 4) ʼE sio ia Sehova ki te loto ʼo te hahaʼi fuli, koia ʼe feala ai ke tou tui papau, ʼe ina taki anai natou ʼae “ʼe natou iloʼi tonatou masiva fakalaumalie” ki tana kautahi. Pea ʼe ina foaki anai kia natou ia te meʼa kai fakalaumalie.—Mat. 5:3, 6, MN; Soa. 6:44; 10:14; Hep. 4:13.

ʼE mole gata ʼaki pe tatatou lau ia te Tohi-Tapu ke feala ai hatatou fakamalohiʼi ia tatatou tui. ʼE tonu foki ke tou mahino pea mo tou maʼuliʼi te ʼu manatu ʼae ʼe tou ako. (Sakp. 1:22-25) Neʼe ko te faʼahi ʼaia ʼae neʼe ʼaoga ke fai e te tagata Etiopea ʼi te temi muʼa. ʼI tana lolotoga lau ia te Folafola ʼa te ʼAtua, neʼe sio ki ai te tagata faifakamafola ko Filipo. Pea neʼe fehuʼi fenei age e Filipo: “Pe e ke mahino ki te mea e ke lau? Pea nee tali age leva e te enuke: Pe feafeai leva taku mahino, mo kapau mole taki au e he tahi?” (Gaue 8:26-31) Neʼe tokoni leva ia Filipo ki te tagata Etiopea ʼaia ke mahino ki te ʼu faʼahi ʼae neʼe ina lolotoga lau. Pea neʼe malave te ʼu faʼahi ʼaia kia ia, ʼo ina fakatotonu ai ke papitema. (Gaue 8:32-38) ʼO toe feia pe, neʼe tou mahino ki te ʼu moʼoni Fakatohi-tapu ʼaki ʼatatou tohi. ʼE malave kia tatou ia te ʼu faʼahi ʼae ʼe tou lau pea ʼe uga ai tatou ke tou maʼuliʼi te ʼu manatu ʼae ʼe tou ako.—Kol. 1:9, 10.

ʼI totatou ʼuhiga kaugana ʼa Sehova, ʼe tou “kakai” pea mo “iinu” ki te ʼu meʼa lelei ʼe tou maʼu ʼaki ʼatatou tohi. (Esa. 65:13) Ohage la, ʼe ta Te Tule Leʼo ia lea ʼe 210 tupu. ʼE fakamahino ai ia te ʼu lea fakapolofeta, mo tokoni mai ke tou mahino ki te ʼu moʼoni maʼuhiga. Pea ʼe uga ai tatou ke tou mulimuli ki te ʼu pelesepeto ʼa te ʼAtua. Ko te Réveillez-vous !, ʼe ta ia teitei lea ʼe 100. ʼE tokoni mai ke lahi age te ʼu faʼahi ʼe tou ako ʼo ʼuhiga mo te ʼu meʼa fakaofoofo ʼae neʼe fakatupu e Sehova. Pea ʼe tou toe ako ai foki pe ʼe feafeaʼi hatatou maʼuliʼi te ʼu tokoni ʼaoga ʼae ʼe tuʼu ʼi te Tohi-Tapu. (Taag. 3:21-23; Loma 1:20) Ko te tagata faifekau agatonu ʼe ina foaki mai ni tohi ia lea ʼe 680 tupu, ʼe fakatafito ki te Folafola ʼa te ʼAtua. Kaʼe ʼe kotou toʼo koa he temi moʼo lau ia te Tohi-Tapu ʼi te ʼaho fuli? ʼE kotou lau koa ia te ʼu nusipepa pea mo te ʼu tohi foʼou fuli ʼae kua fakaliliu ki takotou lea?

ʼE toe foaki mai foki e te kautahi ʼa Sehova ia te ʼu akonaki ʼae ʼe fai ʼi ʼatatou fono, mo ʼatatou fakatahi lalahi. Kaʼe ʼe kotou leleiʼia koa ia te ʼu akonaki, mo te ʼu kiʼi gaoʼi Fakatohi-tapu, mo te ʼu faʼifaʼitaki pea mo te ʼu fakafehuʼi ʼi ʼatatou fakatahi ʼaia? ʼE mahino ia, pea ko te meʼa kai fakalaumalie ʼae ʼe foaki mai e Sehova ʼe mahu ia.—Esa. 25:6.

Kailoa ia. ʼAua tatatou punamaʼuli mo kapau ʼe lahi age ia te meʼa kai fakalaumalie ʼae ʼe maʼu e ʼihi. Kotea tona tupuʼaga? Tou vakaʼi muʼa te faʼifaʼitaki ʼa te kau apositolo. ʼI te temi ʼo Sesu, neʼe lahi age ia te ʼu faʼahi ʼae neʼe ako e te kau apositolo ʼi ʼihi ake kau tisipulo. (Mko. 4:10; 9:35-37) Kaʼe neʼe maʼu pe e te kau tisipulo ʼaia ia te meʼa kai fakalaumalie ʼae neʼe ʼaoga kia natou.—Efe. 4:20-24; 1 Pet. 1:8.

ʼE lelei ke tou manatuʼi ʼe mole tohi ʼi te Tohi-Tapu ia meʼa fuli ʼae neʼe fai pea mo palalau ki ai ia Sesu ʼi tana kei nofo ʼi te kele. Neʼe tohi fenei e te apositolo ko Soane: “Nee lahi age ihi mea nee fai e Sesu; kapau nee tohi ia mea fuli aia . . . , e au mahalo e mole feauga anai te malamanei ke tanaki ai te fua tohi e tohi anai.” (Soa. 21:25) ʼE moʼoni, neʼe lahi age ia te ʼu faʼahi ʼae neʼe iloʼi e te kau Kilisitiano ʼi te temi ʼaia ʼo ʼuhiga mo Sesu ia tatou. Kaʼe ʼe tokaga pe ia Sehova ke tou iloʼi lelei ia totatou Pule ʼae ko Sesu. Koia ʼe feala hatatou faʼifaʼitakiʼi ia ia.—1 Pet. 2:21.

Tou toe manatuʼi foki ia te ʼu tohi ʼae neʼe momoli e te kau apositolo ki te ʼu kokelekasio ʼi te temi muʼa. Neʼe ʼi ai te tahi tohi ʼa Paulo neʼe mole tuʼu ʼi te Tohi-Tapu. (Kol. 4:16) Kaʼe ko tona fakaʼuhiga koa ʼe mole feʼauga tatatou meʼa kai fakalaumalie koteʼuhi ʼe mole tou maʼu ia te tohi ʼaia? Kailoa ia. ʼE iloʼi tatou e Sehova pea ʼe ina foaki mai te ʼu meʼa ʼae ʼe ʼaoga kia tatou ke tou malolohi aipe ʼi te faʼahi fakalaumalie.—Mat. 6:8.

ʼE mahu ia te meʼa kai fakalaumalie ʼae ʼe maʼu e ʼihi kaugana ʼa Sehova. Kaʼe lagi ʼe mole lahi ia te ʼu tohi ʼae ʼe maʼu ʼi takotou lea. Kapau koia, pea ke kotou iloʼi ʼe tokaga ia Sehova kia koutou. Kotou ako ia te ʼu tohi ʼae ʼe kotou maʼu pea mo kau ki te ʼu fono ʼae ʼe fai ʼi he lea ʼe kotou mahino ki ai. Koteʼuhi, ʼe malohi aipe anai ʼakotou felogoʼi ʼae mo Sehova.—Pes. 1:2; Hep. 10:24, 25.

ʼI tatatou tuʼasila ʼi te Neti, ʼe maʼu ai ia te ʼu nusipepa pea mo ʼihi atu tohi. ʼE toe maʼu ai foki ni tokoni ki te nofo ʼohoana, ki te ʼu matuʼā, ki te kau tupulaga pea ki te tamaliki liliki. Pea ʼe ʼaoga te ʼu tokoni ʼaia ki te ʼu Ako Fakafamili. ʼE toe maʼu ʼi tatatou tuʼasila ni logo ʼo ʼuhiga mo te ʼu fakatuʼutuʼu makehe. Ohage la, ko te foaki ʼo te ʼu pepa ʼo te Ako ʼo Kileate, mo te fono ʼae ʼe fai ʼi te taʼu fuli ʼo te Watch Tower Bible and Tract Society of Pennsylvania, mo te ʼu tuʼutamaki fakanatula pea mo te ʼu faifakamau ʼae ʼe lotomamahi ai te hahaʼi ʼa Sehova. (1 Pet. 5:8, 9) ʼE toe ʼaoga foki ia tatatou tuʼasila ki tatatou gaue faifakamafola. Pea ʼe fakafealagia ʼaki ai ke kakusia ia te logo lelei ki te ʼu fenua ʼae ʼe fakatuʼakoi ai peʼe tapuʼi ai ia tatatou gaue.

Kaʼe ʼe feala hakotou nonofo malohi ʼi te moʼoni tatau aipe pe kotou lava olo ki tatatou tuʼasila ʼi te Neti peʼe kailoa. Pea ko te tagata faifekau ʼe ina ta lahi ia te ʼu nusipepa pea mo te ʼu tohi, ke maʼu fuli e te kau Kilisitiano ia te meʼa kai fakalaumalie ʼae ʼe ʼaoga kia natou. Koia, ʼaua takotou manatu ʼae ʼe tonu ke kotou toʼo hakotou olotinatea peʼe ko he tahi atu meʼa ʼuhi pe he ʼe kotou fia olo ki te jw.org /wls. Ko ʼihi ʼe natou fakatuʼutuʼu ke natou toʼo mai tatatou tuʼasila ni alatike maʼa natou ʼae ʼe mole hanatou Neti. Kaʼe ʼe mole fakamaʼua te faʼahi ʼaia ki te ʼu kokelekasio.

ʼE tou lotofakafetaʼi ki te fakahoko e Sesu ia tana fakakapapau ʼae ke tokaga ʼo foaki mai te ʼu meʼa ʼae ʼe ʼaoga kia tatou ʼi te faʼahi fakalaumalie. Pea ʼe feala ke tou tui papau ʼe foaki mai pe anai e Sehova ia “te meakai i tona temi totonu” ʼo kaku ki te fakaʼosi ʼo te malama agakovi ʼaeni.