ʼE ko he fehuʼi maʼuhiga ʼaia, mo kapau la kua mate ia tokotou ʼohoana. ʼE mahino ia ʼe kotou fakaʼamu la ke kotou toe fakatahi mo tokotou ʼohoana ʼi te malama foʼou. ʼE ui fenei e te tehina: “Ko au mo toku ʼohoana neʼe mole ma fakaʼamu ke veteki toma ʼohoana. Neʼe ma loto moʼoni ke ma tauhi taumatuʼa ki te heʼe gata. Pea ʼe mole heʼeki fetogi ʼaku manatu.” Koia ʼe ʼi ai koa he tupuʼaga ke tou tui ai ʼe feala anai ke ʼohoana ia natou ʼae ka fakatuʼuake ʼi te kele? ʼE mole tou iloʼi.

Talu mai fualoa mo te talanoa ʼi ʼatatou tohi ko te ʼu palalau ʼa Sesu ki te fakatuʼuake pea mo te ʼohoana, ʼe fakaʼuhiga ki te fakatuʼuake ʼi te kele. ʼE toe ui ai foki ʼe mole ʼohoana anai te kau fakatuʼuake ʼi te malama foʼou. (Mat. 22:29, 30; Mko. 12:24, 25; Luka 20:34-36, MN) Kaʼe ʼe feala koa ke fakaʼuhiga te ʼu palalau ʼa Sesu ki te fakatuʼuake ʼae ʼi te lagi? ʼE mole heʼeki tou tukupau ki te manatu ʼaia, kaʼe tou vakaʼi pe kotea ʼae neʼe ui e Sesu.

Ko ai ʼae neʼe palalau ki ai ia Sesu ʼi tana talanoa ki te fakatuʼuake? (Lau ia Luka 20:27-33.) Neʼe palalau ia ki te kau Satuseo ʼae neʼe mole tui ki te fakatuʼuake. Pea neʼe natou faiga ke natou fakahalaʼi ia Sesu ʼaki ʼanatou fehuʼi ʼo ʼuhiga mo te fakatuʼuake pea mo te ʼohoana fakaholotuʼa. * Neʼe ui fenei e Sesu kia natou: “ʼE ʼohoana te fanau ʼo te tuʼu ʼo te ʼu faʼahiga meʼa ʼaeni pea ʼe foaki ia natou ke ʼohoanaʼi, kaʼe ko natou ʼae kua ʼosi fakafuafua ʼe tau mo natou ke natou maʼu te tuʼu ʼo te ʼu faʼahiga meʼa ʼaia pea mo fakatuʼuake mai te mate, ʼe mole natou ʼohoana pea ʼe mole foaki ia natou ke ʼohoanaʼi. ʼIo, ʼe mole feala ke natou toe mamate, he ʼe natou hage ko te kau ʼaselo, pea ko natou ko te ʼu fanau ʼa te ʼAtua, ʼuhi he ko natou ko te ʼu fanau ʼo te fakatuʼuake.”—Luka 20:34-36, MN.

He ko ʼe ʼe talanoa ʼi ʼatatou tohi neʼe lagi palalau ia Sesu ki te fakatuʼuake ʼi te kele? ʼE ʼi ai ʼona tupuʼaga tafitō ʼe lua. ʼUluaki, neʼe lagi talanoa ia te kau Satuseo ki te fakatuʼuake ʼi te kele ʼi tanatou palalau ʼae kia Sesu. Koia ʼe feala ke tou ui neʼe talanoa ia Sesu ki te fakatuʼuake ʼi te kele ʼi tana tali age kia natou. Lua, ʼi te fakaʼosi ʼo te tali ʼa Sesu neʼe talanoa ia kia Apalahamo, mo Isaake pea mo Sakopo. Pea ʼe ʼamanaki fakatuʼuake anai te ʼu tagata ʼaia ki te maʼuli ʼi te kele.—Luka 20:37, 38.

Kaʼe lagi neʼe talanoa ia Sesu ki te fakatuʼuake ʼi te lagi. He ko ʼe ʼe feala ke tou ui te faʼahi ʼaia? Tou vakaʼi manatu ʼe lua ʼi te tali ʼa Sesu ki te kau Satuseo.

“Ko natou ʼae kua ʼosi fakafuafua ʼe tau mo natou ke . . . fakatuʼuake mai te mate.” Ko te kau fakanofo agatonu ʼe natou “gali mo te puleaga o te Atua.” (2 Tes. 1:5, 11) Kia mata ʼo te ʼAtua, ʼe faitotonu te kau fakanofo ʼuhi ko te sakilifisio faitotogi ʼa Kilisito. Moka natou mamate, pea kia Sehova kua natou ʼateaina mai te agahala. (Loma 5:1, 18; 8:1) ʼE fakahigoaʼi te kau fakanofo ko te kau “manuia mo maonioni” pea ʼe natou tuha mo te fakatuʼuake ʼi te lagi. (Apk. 20:5, 6) Pea ʼe mole feala ke ui te faʼahi ʼaia kia natou ʼae ka fakatuʼuake ki te maʼuli ʼi te kele, koteʼuhi ʼe natou kau anai ki te kau “agahala” peʼe heʼe faitotonu.  (Gaue 24:15) Kaʼe ʼe feala koa ke tuha mo te kau heʼe faitotonu ʼaia ia he fakatuʼuake?

“ ʼE mole feala ke natou toe mamate.” Neʼe mole ui e Sesu: “ʼE mole natou toe mamate anai.” Kaʼe neʼe ina ui fenei: “ʼE mole feala ke natou toe mamate.” ʼO ʼuhiga mo te ʼu palalau ʼaia, ʼe fakaliliu fenei ʼi ʼihi Tohi-Tapu: “ʼE mole kei feala ke natou mamate” peʼe “ʼe mole kei puleʼi natou e te mate.” Moka nonofo agatonu ia te kau fakanofo ʼo kaku ki tonatou mamate, pea ʼe fakatuʼuake anai natou ʼi te lagi. Pea ʼe natou maʼuli tuputupua anai. Ko tona fakaʼuhiga ʼe mole feala ke natou mamate pea ke pulihi natou. (1 Ko. 15:53, 54, MN) ʼE mole puleʼi ia te mate ia natou ʼae ʼe fakatuʼuake ʼi te lagi. *

ʼAki te ʼu faʼahi neʼe hoki tou vakaʼi, kotea ʼae ʼe feala ke tou ui? ʼE tou ako mai ai, neʼe lagi talanoa ia Sesu ki te fakatuʼuake ʼi te lagi. Kapau koia, pea ʼe tou mahino ai ki te ʼu faʼahi ʼaeni ʼe tolu ʼo ʼuhiga mo natou ʼae ʼe fakatuʼuake ʼi te lagi: (1) ʼE mole natou ʼohoana, (2) ʼe mole feala ke natou mamate pea (3) ʼe natou hage ʼi ʼihi faʼahi ko he kau ʼaselo ʼi te lagi. Kaʼe kapau neʼe talanoa ia Sesu ki te fakatuʼuake ʼi te lagi, pea ʼe ʼaoga foki ke ʼi ai he tali ki te ʼu fehuʼi ʼae ʼe hoa mai.

ʼUluaki, kapau neʼe manatu te kau Satuseo ki te fakatuʼuake ʼi te kele, pea he ko ʼe koa neʼe talanoa ia Sesu ki te fakatuʼuake ʼi te lagi? Neʼe mole he temi neʼe tali ai ia Sesu ki ʼona fili ʼo mulimuli ki tanatou faʼahiga manatu. Ohage la, neʼe kole e ʼihi kau Sutea kia Sesu ke ina fakahoko he milakulo. Pea neʼe ina ui fenei kia natou: “Koutou maumaui te fale tapu aeni, pea e au toe lagai anai ia i ni aho e tolu.” ʼE mahino ia neʼe iloʼi e Sesu neʼe natou manatu ki te fale lotu, “kae nee palalau ia ki te fale tapu o tona sino.” (Soa. 2:18-21) Kia Sesu, neʼe lagi mole ʼaoga ia ke tali ki te kau Satuseo malualoi. Pea tahi, neʼe mole natou tui ki te fakatuʼuake peʼe ko te maʼuli moʼoni ʼa te kau ʼaselo. (Taag. 23:9; Mat. 7:6; Gaue 23:8) Kaʼe neʼe lagi fia foaki e Sesu ni fakamahino ʼo ʼuhiga mo te fakatuʼuake ʼi te lagi ki ʼana kau tisipulo. Koteʼuhi neʼe natou fakamalotoloto pea neʼe natou maʼu te ʼamanaki ki te maʼuli ʼi te lagi.

Lua, he ko ʼe koa neʼe fakaʼosi e Sesu ʼana palalau ʼaki tana talanoa kia Apalahamo, mo Isaake pea mo Sakopo ʼae ka fakatuʼuake anai ki te maʼuli ʼi te kele? (Lau ia Mateo 22:31, 32.) ʼI muʼa ʼo tana talanoa ki te ʼu tagata agatonu ʼaia, neʼe kamata fenei e Sesu ʼana palalau: “O uhiga mo te toe tuuake a te kau mate.” ʼAki te ʼu palalau ʼaia, neʼe feala ke ʼaumai te faipalalau ʼae ki te fakatuʼuake ʼi te lagi ki te fakatuʼuake ʼi te kele. Pea neʼe iloʼi e Sesu neʼe tali e te kau Satuseo ia te ʼu tohi ʼa Moisese, koia neʼe ina fakaʼaogaʼi te ʼu folafola ʼae neʼe fai e te ʼAtua kia Moisese ʼi te fuʼu ʼakau neʼe ulo. Koteʼuhi neʼe fia fakaha e Sesu ki te kau Satuseo, ko te fakatuʼuake ʼae ʼi te kele ʼe kau ki te fakatuʼutuʼu ʼa te ʼAtua.—Eke. 3:1-6.

Tolu, kapau neʼe fakaʼuhiga te ʼu palalau ʼa Sesu ki te fakatuʼuake ʼi te lagi, pea ko tona fakaʼuhiga koa ʼe feala anai ke ʼohoana ia natou ʼae ka fakatuʼuake ʼi te kele? ʼE mole tali fakahagatonu mai te Folafola ʼa te ʼAtua ki te faʼahi ʼaia. Pea kapau neʼe palalau ia Sesu ki te fakatuʼuake ʼi te lagi, ʼe mole ha ʼi ʼana palalau pe ʼe feala kia natou ʼae ka fakatuʼuake ʼi te kele ke natou ʼohoana ʼi te malama foʼou.

ʼE ui lelei ʼi te Tohi-Tapu, ʼe veteki e te mate ia he maʼuli fakataumatuʼa. Koia moka kua mate tokotou ʼohoana, pea ʼaua takotou tukugakoviʼi ia koutou mo kapau ʼe kotou fakatotonu ke kotou toe ʼohoana. Ko te tonu ʼaia ʼe ʼa koutou pe. Pea ʼe mole tonu ke valokiʼi e he tahi ia ia ʼae ʼe toe fia ʼohoana.—Loma 7:2, 3; 1 Ko. 7:39.

ʼE lagi tou feʼekeʼaki pe feafeaʼi anai te maʼuli ʼi te malama foʼou. Kaʼe ʼe tonu ke tou nonofo ʼo fakatalitali, ʼo mole tou faiga ke tou maʼu he ʼu tali ki te ʼu faʼahi ʼaia. Pea koʼeni te faʼahi ʼae ʼe tou tui papau ki ai: ʼE fiafia anai natou ʼae ʼe fakalogo ki te ʼAtua, koteʼuhi ʼe foaki anai e Sehova kia natou ia te meʼa ʼae ʼe natou loto ki ai pea mo ʼaoga kia natou.—Pes. 145:16.