HILI te fakafisi ʼa Petelo kia Sesu, neʼe tagi mamahi ai. Kaʼe neʼe faiga leva ia te apositolo ke toe malohi ʼi te faʼahi fakalaumalie, pea neʼe fia fakaʼaogaʼi e Sesu ia ia ke tokoni ki ʼihi. Koia ʼae neʼe ui fenei age ai e Sesu: “Ka ke toe liliu mai anai, fakamalohii ou tehina.” (Luka 22:32, 54-62) Neʼe liliu ai ia Petelo ko he tahi neʼe lagolago malohi ki te kokelekasio Fakakilisitiano ʼi te temi ʼo te kau apositolo. (Kal. 2:9) ʼO toe feia pe, ko he tahi ʼe mole kei tagata ʼafeā, ʼe feala ke ina toe maʼu ʼona pilivilesio pea mo fiafia ʼi te fakamalohiʼi ʼona tehina ʼi te faʼahi fakalaumalie.

Ko ʼihi ʼae neʼe toʼo tonatou ʼuhiga tagata ʼafeā, ʼe feala ke natou manatu ai neʼe mole ʼaoga te ʼu faʼahi ʼae neʼe natou fakahoko. Ko Julio, * ʼae neʼe tagata ʼafeā lolotoga taʼu ʼe 20 tupu ʼi Bolivie, neʼe ina ui fenei: “Ko te teuteuʼi ʼo te ʼu akonaki, mo te ʼaʼahi ʼo te ʼu tehina pea mo te tokaga kia natou ʼi te kokelekasio, neʼe ko he ʼu faʼahi ia neʼe au maʼumaʼua lahi ki ai. Kaʼe neʼe puli fuli leva ia te ʼu faʼahi ʼaia, pea neʼe mata faikehe kia au. Neʼe ko he lakaga lotomamahi ʼaia.” Ia ʼaho nei, kua toe tagata ʼafeā ia Julio.

Neʼe tohi fenei e te tisipulo ko Sakopo: “Oku tehina, kotou sisio ki te u ahiahi kehekehe ae e feala ke kotou felavei mo natou o hage ko he fiafia lahi.” (Sakp. 1:2) Neʼe talanoa ia Sakopo ki te ʼu ʼahiʼahi ʼae ʼe tupu mai totatou ʼuhiga agahala pea mo tatatou pipiki ki te ʼAtua. Neʼe palalau ia ki te manatu pe ʼae kia kita totonu, mo te fakapalatahi pea mo ʼihi atu faʼahi. (Sakp. 1:14; 2:1; 4:1, 2, 11) Moka fakatonutonuʼi tatou e Sehova, pea ʼe feala ia ke tou lotomamahi ai. (Hep. 12:11) Kaʼe ʼe mole tonu ke puli ia tatatou fiafia ʼi te ʼu ʼahiʼahi ʼaia.

Tatau aipe pe ʼe mole kei ʼi ai hotatou pilivilesio ʼi te kokelekasio, kaʼe ʼe kei feala pe hatatou vakavakaʼi ia tatatou tui pea mo tou fakaha ia totatou ʼofa ʼae kia Sehova. ʼE toe feala foki ke tou fakakaukauʼi pe ko ʼe neʼe tou fia tauhi ʼi te kokelekasio. Neʼe tou fia maʼu ai pe  koa he ʼu lelei kia tatou, pe neʼe tou fakaʼamu koa ki he pilivilesio koteʼuhi ʼe tou ʼoʼofa ki te ʼAtua? Peʼe neʼe tou tui papau koa ko te kokelekasio ʼe ʼa Sehova pea ʼe tuha ia ke tokaga ki ai ia ia? (Gaue 20:28-30) Ko natou ʼae neʼe tagata ʼafeā ʼi muʼa atu, ʼe kei hoko atu pe ia tanatou tauhi taputapu ʼi te fiafia. Pea ʼe natou fakamoʼoni ai ki te hahaʼi fuape ʼo kau ai mo Satana, ʼe ko Sehova ʼae ʼe natou ʼoʼofa moʼoni ki ai.

Neʼe tali e te Hau ko Tavite ia tona fakatonutonuʼi ʼuhi ko tana agahala mamafa pea neʼe fakamolemole ki ai ia Sehova. Neʼe hiva fenei ai ia Tavite: “Manuia ae kua fakamolemole kia ia tana uigataa, ae kua uufi tana agahala. Manuia te tagata ae e mole lau kia ia e [Sehova] tana agakovi, pea e mole mau he kaka i tona loto [peʼe ʼatamai]!” (Pes. 32:1, 2) ʼE mahino ia, ʼaki tona fakatonutonuʼi, neʼe liliu ai ia Tavite ko he tagata tauhi ovi ʼe lelei age maʼa te hahaʼi ʼa te ʼAtua.

Ko te ʼu tehina ʼae neʼe toe liliu ko ni tagata ʼafeā, kua toe lelei age tonatou ʼuhiga tauhi ovi ʼi muʼa atu. Neʼe ui fenei e te tagata ʼafeā: “Kua au mahino lelei age ʼi te temi nei pe feafeaʼi hakita tokaga kia natou ʼae ʼe lakahala.” Neʼe ui fenei e te tahi tagata ʼafeā: “ʼI te temi nei kua maʼuhiga age kia au ia toku pilivilesio ʼae ke au tauhi ʼoku tehina.”

Neʼe tohi fenei ia te tagata faipesalemo: “E mole . . . valoki [anai e Sehova] o heegata.” (Pes. 103:9) Koia, ʼaua tatatou manatu ʼae ʼe mole toe falala anai ia te ʼAtua ki he tahi neʼe ina fai hana hala mamafa. Ko Ricardo, neʼe tagata ʼafeā lolotoga ni taʼu kaʼe neʼe mole kei ina maʼu leva tona pilivilesio ʼaia. Neʼe ina ui fenei: “Neʼe au lotovaivai ʼaupito, ʼuhi pe ko ʼaku hala. Neʼe loaloaga ia te temi ʼae neʼe mole au toe tauhi ai ki ʼoku tehina ʼi toku ʼuhiga tagata ʼafeā ʼuhi ko taku manatu ʼae ʼe mole au lavaʼi ia he meʼa. Kia au neʼe mole kei au tuha mo te falala. Kaʼe ʼi taku fiafia ʼi te tokoni ʼae ki ʼihi, neʼe au lava fai ai ni ako Tohi-Tapu, mo fakalotomalohiʼi te ʼu tehina ʼi te Fale Fono pea mo faifakamafola fakatahi mo natou. Neʼe tokoni mai te ʼu faʼahi ʼaia ke au toe maʼu te lotofalala. Pea ʼi te temi nei kua au toe tagata ʼafeā.”

Moka nofo he tehina mo hona lotomamahi ʼe feala ai ke mole liliu ko he tagata ʼafeā. Kaʼe ʼe lelei age hatatou hage ko te kaugana ʼa Sehova ko Tavite, ʼae neʼe hola mai te maheka ʼa te Hau ko Saulo. Neʼe mole fia  lagavaka ia Tavite kia Saulo, maʼia ʼi te ʼu lakaga ʼae neʼe maʼu faigamalie ai. (1 Sam. 24:5-8; 26:8-12) ʼI te mate ʼae ʼa Saulo ʼi te tau, neʼe putu ia Tavite. Neʼe ui ai e Tavite ʼo ʼuhiga mo Saulo pea mo tona foha ko Sonatane ʼe tuha ke ʼofainaʼi naua. (2 Sam. 1:21-23) Koia neʼe mole nofo ia Tavite mo hona lotomamahi.

Kapau ʼi tau manatu, neʼe mahino hala he tahi ʼo ʼuhiga mo koe peʼe ke tau mo he aluʼaga heʼe faitotonu, pea ʼaua tau nofo mo te ʼu manatu ʼaia. Ohage la, ko William, neʼe tagata ʼafeā ia teitei taʼu 30 ʼi Pilitania, neʼe ita ki ʼihi kau tagata ʼafeā hili te toʼo leva ʼo tona pilivilesio ʼaia. Kotea ʼae neʼe tokoni kia William ke ina toe maʼu ni manatu fakapotopoto? Neʼe ina ui fenei: “Ko taku lau ia te tohi ʼo Sopo ʼae neʼe ina fakalotomalohiʼi au. Koteʼuhi, kapau neʼe tokoni ia Sehova kia Sopo ke ina kumi ia te tokalelei mo ʼona kaumeʼa ʼe toko tolu, pea ʼe feafeaʼi age la ia Tana fia tokoni mai ʼae ke au kumi ia te tokalelei mo te kau tagata ʼafeā.”—Sopo 42:7-9.

Kapau ʼe mole ke toe fia tokaga ki te faga ovi ʼa te ʼAtua, pea ʼe lelei anai ke ke vakavakaʼi pe ko ʼe neʼe ke fai ia te tonu ʼaia. Neʼe ke lotovaivai koa ʼuhi ko ʼou fihifihia? Pe neʼe kua maʼuhiga age koa ʼihi faʼahi ʼi tou maʼuli? Neʼe ke lotovaivai koa ʼuhi ko te ʼu vaivaiʼaga ʼo ʼihi? Tatau aipe pe neʼe kotea te aluʼaga ʼae neʼe hoko, kaʼe manatuʼi ʼe feala ke lahi age tau tokoni ki ʼihi moka ʼe ke tagata ʼafeā. Neʼe ke fakalotomalohiʼi ia natou ʼaki ʼau akonaki, mo tau faʼifaʼitaki, pea ʼaki tau ʼaʼahi natou neʼe feala ai ke natou ʼutakiʼi ʼonatou fihifihia. Koia ʼe fiafia ia Sehova ki ʼau gaue ʼi tou ʼuhiga tagata ʼafeā agatonu pea ʼe ke toe fiafia ai foki.—Taag. 27:11.

Neʼe tokoni ia Sehova ki te hahaʼi tagata ke natou toe fiafia pea mo toe fia takitaki ʼi te kokelekasio. Kapau neʼe ke filifili ke mole ke toe tagata ʼafeā pe neʼe toʼo tou pilivilesio ʼaia, ʼe feala pe hau toe fakaʼamu ke ke toe liliu ko he tagata ʼafeā. (1 Tim. 3:1) Neʼe mole tuku ia te faikole ʼa Paulo ʼo ʼuhiga mo te kau Kilisitiano ʼo Kolose, ke natou fonu ʼi te ʼatamai malama ʼo te finegalo ʼo te ʼAtua ke feala ai hanatou “haele o gali mo [Sehova], pea ke [natou] lelei kia ia i te u mea fuli.” (Kol. 1:9, 10) Kapau ʼe ke toe maʼu ia te pilivilesio ʼae ke ke toe tagata ʼafeā, pea kole kia Sehova ke ke maʼu ia te malohi, mo te faʼa kataki pea mo te fiafia. Pea ʼi te ʼu ʼaho fakamuli ʼaeni, ʼe ʼaoga ki te hahaʼi ʼa te ʼAtua ia he lagolago fakalaumalie mai te ʼu tauhi ovi ʼofa. Koia, ʼe ke fealagia koa pea mo lotolelei ke ke fakamalohiʼi ʼou tehina?