Kotou Manatuʼi Ia Natou ʼAe ʼe Gaue ʼi Te Selevisi Temi Katoa
“ ʼE matou manatuʼi tuʼumaʼu takotou gaue agatonu pea mo takotou gaue ʼi te ʼofa.”—1 TESALONIKA 1:3, MN.
1. Neʼe kotea ia te manatu ʼa Paulo ʼo ʼuhiga mo natou ʼae neʼe gaue malohi ʼi te fakamafola ʼo te logo lelei?
NEʼE maʼuhiga ki te apositolo ko Paulo ʼona tehina mo tuagaʼane ʼae neʼe gaue malohi ʼi te fakamafola ʼo te logo lelei. Neʼe ina tohi fenei: “ ʼE matou manatuʼi tuʼumaʼu ia takotou gaue agatonu mo takotou gaue ʼi te ʼofa pea mo takotou faʼa kataki ʼaki takotou ʼamanaki ki totatou ʼAliki ko Sesu Kilisito, ia muʼa ʼo totatou ʼAtua pea mo Tamai.” (1 Tesalonika 1:3, MN) ʼE toe manatuʼi pea mo maʼuhiga kia Sehova ia meʼa fuli ʼae ʼe fai e tana hahaʼi ʼi tanatou tauhi ʼae kia te ia, pe ʼe lahi peʼe veliveli.—Hepeleo 6:10.
2. ʼI te alatike ʼaeni, ʼe tou talanoa anai kitea?
2 ʼI te temi muʼa ʼo toe feia mo te temi nei, ʼe lahi te ʼu sakilifisio ʼae neʼe fai e te kau Kilisitiano moʼo tauhi temi katoa kia Sehova. ʼI te alatike ʼaeni, ʼe tou talanoa anai pe kotea ʼae neʼe fai e ʼihi ʼi te temi muʼa ke natou tauhi ai kia Sehova. ʼE tou ako anai pe kotea ʼae ʼe fakahoko e te ʼu kaugana ʼae ʼi te selevisi temi katoa ia ʼaho nei. Pea ʼe tou iloʼi ai anai ia te ʼu faʼahiga tokoni ʼae ʼe feala ke tou foaki kia natou.
TE KAU KILISITIANO ʼO TE TEMI MUʼA
3, 4. (1) Neʼe tauhi feafeaʼi ʼihi tehina mo tuagaʼane ʼo te temi muʼa kia Sehova? (2) ʼI te temi ʼo te kau apositolo, neʼe totogi feafeaʼi e te kau faifakamafola ʼo te Puleʼaga ia te ʼu meʼa ʼae neʼe ʼaoga kia natou?
3 Hili tona papitema, neʼe kamata fakamafola e Sesu ia te Puleʼaga pea neʼe ina akoʼi ki ʼihi ia te fakahoko ʼo te gaue ʼaia. (Luka 3:21-23; 4:14, 15, 43) Hili te mate ʼo Sesu, neʼe takitaki e te kau apositolo ia te gaue faifakamafola pea neʼe hoko atu aipe tona mafola. (Gaue 5:42; 6:7) Neʼe tuku e ʼihi Kilisitiano ʼonatou ʼapi ke natou liliu ai ko he kau misionea. Ohage la, neʼe faifakamafola ia Filipo ʼi te ʼu potu kehekehe ʼo Palesitina. (Gaue 8:5, 40; 21:8) Ko Paulo, neʼe ko te tahi misionea, neʼe ina fakamafola ia te logo lelei ʼi te ʼu fenua ʼe tuʼu mamaʼo ʼi tona ʼapi. (Gaue 13:2-4; 14:26; 2 Kolinito 1:19) Ko ʼihi, ʼo kau ai ia Maleko, mo Luka pea mo Silivano (Silasi), neʼe natou tohi ia te Tohi-Tapu peʼe neʼe ko he kau sikalaipe. (1 Petelo 5:12) Pea tokolahi te ʼu tuagaʼane neʼe gaue fakatahi mo te ʼu tehina ʼaia. (Gaue 18:26, MN; Loma 16:1, 2, MN) ʼI te Koga Tohi-Tapu Fakakeleka Fakakilisitano, ʼe tou lau ai ni fakamatala fakafiafia ʼo ʼuhiga mo te ʼu tehina mo tuagaʼane. Pea ko te ʼu fakamatala ʼaia, ʼe ina fakamanatuʼi mai ʼe maʼuhiga kia Sehova te ʼu gaue ʼo ʼana kaugana pea ʼe ina foaki te ʼu meʼa ʼae ʼe ʼaoga kia natou.
4 ʼI te temi ʼo te kau apositolo, neʼe totogi feafeaʼi e te kau faifakamafola ʼo te Puleʼaga ia te ʼu meʼa ʼae neʼe ʼaoga kia natou? ʼI ʼihi temi neʼe natou gaue vaelua ʼi temi, pea neʼe mole natou kole ke tokoni age ʼonatou tehina. (1 Kolinito 9:11-15) Kaʼe kapau neʼe fakaafe natou ki he kiʼi meʼa kai, peʼe neʼe foaki age honatou nofoʼaga peʼe ko ʼihi atu aluʼaga, pea neʼe natou tali. Pea neʼe fia tokoni ʼihi mo te kokelekasio katoa kia natou.—Lau ia Gaue 16:14, 15; Filipe 4:15-18.
TE KAU GAUE TEMI KATOA IA ʼAHO NEI
5. Kotea ʼae neʼe ui e te taumatuʼa ʼo ʼuhiga mo tonā maʼuli ʼi te selevisi temi katoa?
5 ʼE toe feia pe ia ʼaho nei, tokolahi ʼe natou gaue kinakina ke natou tauhi kia Sehova ʼi ni ʼu aluʼaga kehekehe. (Vakaʼi te fakamatala ʼae ʼi te ʼa takai “Te ʼu Faʼahiga Gaue Kehekehe ʼo Te Selevisi Temi Katoa.”) Kaʼe kotea ia tanatou manatu ki te faʼahiga maʼuli ʼae neʼe natou filifili? Kapau ʼe kotou fai ia te fehuʼi ʼaia ki ʼokotou tehina mo tuagaʼane, ʼe natou fakalotomalohiʼi anai koutou. Ohage la, ko te tehina neʼe pionie katoa, pionie makehe, mo misionea pea ʼe kau nei ki te famili ʼo te Petele ʼi te tahi fenua, ʼe ina ui fenei: “Kia au, ko taku kau ʼae ki te selevisi temi katoa neʼe ko he tonu lelei ʼaia ki toku maʼuli. ʼI toku taʼu 18, neʼe faigataʼa haku filifili, ke au alu ʼo ako ʼi te ʼu fale ako lalahi, peʼe ke au maʼu haku gaue fakamalama peʼe ke au pionie. Pea neʼe ha ʼi te ʼu aluʼaga ʼae neʼe hoko ʼi toku maʼuli, ʼe mole galo kia Sehova ia te ʼu sakilifisio ʼae ʼe kotou fai ke kotou gaue temi katoa kia te ia. Neʼe au lava fakaʼaogaʼi ia toku poto mo te ʼu fealagia ʼae neʼe au maʼu mai ia Sehova ʼi he ʼu aluʼaga kehekehe. Pea neʼe lagi mole feala, mo ka na pau la neʼe au filifili ke au maʼu tuʼulaga ʼi te malama.” ʼE ui fenei e tona ʼohoana: “ ʼAki te ʼu gaue fuli ʼae neʼe hinoʼi au ki ai, neʼe feala ai ke au lakalaka ki muʼa. Mo ka na pau la neʼe ma fakafifimalie pe maua, ʼe mahino ia neʼe mole feala ke ma logoʼi tuʼumaʼu ia te puipui pea mo te takitaki ʼa Sehova ʼi he ʼu aluʼaga kehekehe. Koia ʼe ma lotofakafetaʼi ai kia Sehova ʼi te ʼaho fuli ki tama selevisi temi katoa.” ʼE kotou fia maʼu koa mo koutou ia te ʼu manatu ʼaia?
“Kia au, ko taku kau ʼae ki te selevisi temi katoa neʼe ko he tonu lelei ʼaia ki toku maʼuli”
6. Kotea ia te manatu ʼa Sehova ʼo ʼuhiga mo tatatou tauhi ʼae kia te ia?
6 ʼE moʼoni, ʼe mole feala ki ʼihi hanatou kau ki te selevisi temi katoa ʼi te temi nei, kaʼe ʼe natou faiga malohi ke natou tauhi kia Sehova. Pea ʼe tou iloʼi ʼe maʼuhiga ia tanatou tauhi kia te ia. Ohage la, ia Filemo 1-3, ʼe fai ai e Paulo he ʼu fakamalo ki te ʼu tehina fuli ʼo te kokelekasio ʼo Kolose pea neʼe ina toʼo te ʼu higoa ʼo ʼihi ia natou ʼaia. (Lau.) Neʼe maʼuhiga kia Paulo ʼo toe feia pe kia Sehova ia tanatou gaue kinakina. Pea ʼe toe maʼuhiga kia Sehova ia takotou gaue ʼae ʼe kotou fakahoko ʼi tana tauhi. Kaʼe kotea ʼae ʼe feala ke kotou fai moʼo lagolago ki te ʼu kaugana ʼae ʼi te selevisi temi katoa?
ʼE FEALA KE TOU TOKONI KI TE KAU PIONIE
7, 8. Kotea ia te selevisi pionie katoa? Pea ʼe lava tokoni feafeaʼi ʼihi ʼi te kokelekasio ki te kau pionie?
7 ʼE hage pe ia te kau pionie ʼo te temi nei ko te kau faifakamafola ʼo te temi muʼa, koteʼuhi ʼe natou fakalotomalohiʼi ia te kokelekasio. Tokolahi ʼe natou faifakamafola ia teitei hola ʼe 70 ʼi te mahina fuli. Pea ʼe feafeaʼi hatatou lava tokoni kia natou?
8 Neʼe ui fenei e te tuagaʼane pionie ʼe higoa ko Shari: “ ʼE hage mai ʼe malolohi ia te kau pionie ʼuhi ko tanatou faifakamafola ʼi te ʼaho fuli. Kaʼe ʼe ʼaoga ke fakalotomalohiʼi natou.” (Loma 1:11, 12) Ko te tahi tuagaʼane ʼe pionie katoa talu mai fualoa, neʼe ina ui fenei ʼo ʼuhiga mo te kau pionie katoa ʼo tana kokelekasio: “ ʼE natou gaue kinakina tuʼumaʼu. ʼE natou lotofakafetaʼi moka ave natou e ʼihi ki te faifakamafola, peʼe fakaafe natou ki he kiʼi meʼa kai, peʼe foaki age hanatou kiʼi foʼi falā ki te penisini peʼe ki ʼihi atu ʼu aluʼaga. Pea ʼe natou tokagaʼi ai ʼe kotou tokakaga moʼoni kia natou.”
9, 10. Kotea ʼae neʼe fai e ʼihi moʼo tokoni ki te kau pionie ʼo tanatou kokelekasio?
9 ʼE tou toe tokoni anai kia natou mo kapau ʼe tou faifakamafola mo natou. Neʼe ui e te ʼu tuagaʼane pionie ʼe toko lua, neʼe faigataʼa tanā maʼu honā ʼu kaugā faifakamafola lolotoga te vahaʼa pea mo te ʼu hili hoʼata. Ko te tuagaʼane ʼe gaue nei ʼi te Petele ʼo Brooklyn, ʼe ina manatuʼi ia te tokoni ʼae neʼe ina maʼu lolotoga tana pionie. ʼE ina ui fenei: “Neʼe ui mai e te tuagaʼane neʼe ʼi ai tana motoka, ‘Kapau ʼe mole hou kaugā faifakamafola, paui mai ke ta olo ʼo faifakamafola.’ Neʼe tokoni lahi mai ki taku selevisi pionie.” ʼE ui fenei e Shari: “Hili tanatou faifakamafola, ʼe tau logoʼi e te kau pionie selipatea ia tanatou nonofo tokotahi. ʼI ʼihi temi, ʼe feala ke kotou fakaafe ia te ʼu tehina peʼe ko te ʼu tuagaʼane selipatea ki takotou ako fakafamili. ʼE toe feala foki ke kotou fakaafe natou ki ʼihi atu ʼu aluʼaga, koteʼuhi ʼe feala ke natou nonofo malolohi ai.”
10 Neʼe manatuʼi e te tuagaʼane ʼe kau ki te selevisi temi katoa talu mai teitei taʼu ʼe 50, ia te tokoni ʼae neʼe ina maʼu pea mo ʼihi tuagaʼane selipatea. ʼE ina ui fenei: “Tuʼumaʼu pe moka ʼosi mahina ʼe lua, pea ʼaʼahi matou e te ʼu tagata ʼafeā. Neʼe natou fakalavelave mai pe ʼe matou maʼuli malolō pe, pe ʼe feafeaʼi ki tamatou gaue fakamalama pea mo ʼamatou tuʼania. Neʼe natou fakamalotoloto. Koteʼuhi neʼe natou fakasiosio ia tomatou koga fale ke feala ai hanatou iloʼi pe ʼaoga kia matou ia he tokoni.” Ko te kau tagata ʼafeā ʼaia pea mo ʼihi atu, neʼe natou faʼifaʼitakiʼi ia Onesifolo. Koteʼuhi neʼe tokaga ki tona famili, pea neʼe ina toe foaki kia Paulo te ʼu meʼa ʼae neʼe ʼaoga ki ia.—2 Timoteo 1:18.
11. Kotea ia te selevisi pionie makehe?
11 Ko te tahi faʼahiga gaue ʼi te selevisi temi katoa, ʼe ko te gaue pionie makehe. Tokolahi te kau pionie makehe ʼe natou faifakamafola ia teitei hola ʼe 130 ʼi te mahina fuli. Pea ʼe natou toe maʼumaʼua foki ʼi ʼihi atu ʼu gaue ʼo te kokelekasio. Koia ʼe mole natou maʼu ai he temi ki he gaue fakamalama. Kaʼe ʼi te mahina fuli, ʼe foaki e te filiale ia tanatou kiʼi foʼi falā ke feala ai hanatou tokakaga tafitō ki tanatou minisitelio. Pea ʼe tokoni ia te faʼahi ʼaia ki te kau pionie ke natou totogi ai te ʼu meʼa ʼae ʼe ʼaoga kia natou.
12. ʼE lava tokoni feafeaʼi ia te kau tagata ʼafeā pea mo ʼihi ki te kau pionie makehe?
12 Kotea ʼae ʼe tou lava fai moʼo tokoni ki te kau pionie makehe? Ko te tagata ʼafeā ʼe gaue ʼi te filiale neʼe faipalalau mo te kau pionie makehe ʼe tokolahi, ʼe ina ui fenei: “ ʼE tonu ke faipalalau ia te kau tagata ʼafeā mo natou, ke natou iloʼi ia te ʼu aluʼaga ʼae ʼe tau mo natou pea mo te ʼu faʼahiga tokoni ʼae ʼe ʼaoga kia natou. ʼE manatu ʼihi kau Fakamoʼoni, ʼe feala pe ki te kau pionie makehe hanatou taupau ia tonatou maʼuli koteʼuhi ʼe foaki age ia tanatou kiʼi foʼi falā. Kaʼe ʼe toe feala pe ki te ʼu tehina ke natou tokoni kia natou ʼi he ʼu aluʼaga kehekehe.” Pea ohage pe ko te kau pionie katoa, ʼe lotofakafetaʼi ia te kau pionie makehe moka faifakamafola ia te ʼu tehina mo tuagaʼane mo natou. Koia, ʼe feala koa hakotou faifakamafola mo natou?
ʼE TOU LAVA TOKONI FEAFEAʼI KI TE ʼU TAUPAU FEʼOLOʼAKI?
13, 14. (1) Kotea ʼae ʼe tonu ke tou manatuʼi ʼo ʼuhiga mo te ʼu taupau fakasiliko pea mo ʼonatou ʼohoana? (2) ʼE kotou lava tokoni feafeaʼi kia natou ʼae ʼe kau ki te gaue taupau feʼoloʼaki?
13 ʼE moʼoni, ko te ʼu taupau fakasiliko mo ʼonatou ʼohoana, ʼe natou faiva mo malolohi ʼi te faʼahi fakalaumalie pea ʼe natou fakalotomalohiʼi tatou. Kaʼe ʼe mole tonu ke galo kia tatou ʼe toe ʼaoga ke tou fakalotomalohiʼi ia natou. ʼE toe ʼaoga foki ke tou faifakamafola mo natou ʼi te minisitelio. Pea ʼe natou lotofakafetaʼi moka fakaafe natou e te ʼu tehina ki he ʼu kiʼi fakafiafia. Ka mahaki peʼe tuku ʼi te lopitali ia te taupau feʼaluʼaki peʼe ko tona ʼohoana, ʼe feala hatatou ʼaʼahi naua pea mo tokaga ki te ʼu meʼa ʼae ʼe ʼaoga kia naua. Ko Luka, “te toketa ofaina,” neʼe tokaga ki te ʼu meʼa ʼae neʼe ʼaoga kia Paulo, pea mo natou ʼae neʼe olo ʼo ʼaʼahi ia te ʼu kokelekasio kehekehe.—Kolose 4:14; Gaue 20:5–21:18.
14 ʼE ʼaoga ki te ʼu taupau feʼoloʼaki mo ʼonatou ʼohoana ia te ʼofa pea mo te fakalotomalohi ʼo ʼonatou kaumeʼa lelei. Neʼe tohi fenei e te taupau fakasiliko: “ ʼE hage ia ʼe iloʼi e ʼoku kaumeʼa ia te temi ʼae ʼe ʼaoga ai ki au he fakalotomalohi. ʼE natou fai mai ni ʼu fehuʼi ʼe fakapotopoto pea ʼe feala ai haku fakaha ʼoku fihifihia. Pea ʼaki pe ia tanatou fakalogo mai, ʼe ko he tokoni lahi ia kia au.” ʼE mahino ia, ʼe lotofakafetaʼi ia te ʼu taupau fakasiliko moka tokakaga ia te ʼu tehina mo tuagaʼane kia natou, pea mo natou liliu ko honatou ʼu kaumeʼa moʼoni.
TOU LAGOLAGO KI TE FAMILI ʼO TE PETELE
15, 16. He ko ʼe ʼe maʼuhiga ia te gaue ʼae ʼe fakahoko ʼi te ʼu Petele pea mo te ʼu Fale ʼo Te ʼu Fakatahi Lalahi? Pea ʼe tou lava tokoni feafeaʼi kia natou?
15 ʼE maʼuhiga ia te gaue ʼae ʼe fakahoko ʼi te ʼu Petele pea mo te ʼu Fale ʼo Te ʼu Fakatahi Lalahi, koteʼuhi ʼe lagolago ki te fakamafola ʼo te logo lelei. Kapau ʼe ʼi ai he kau Petelite ʼi tokotou kokelekasio peʼe ʼi tokotou siliko, ʼe feafeaʼi anai hakotou manatuʼi ia natou?
16 ʼI tanatou foʼofoʼou mai ʼae ʼo maʼuʼuli ʼi te Petele, ʼe lagi natou logoʼi ia tanatou nonofo tokotahi pea ʼe natou manatu tuʼumaʼu ki tonatou famili pea mo ʼonatou kaumeʼa. Kaʼe ʼe natou lotofakafetaʼi moka loto e ʼihi Petelite pea mo ʼihi ʼi tonatou kokelekasio, ke natou feʼiloʼiʼaki pea ke natou liliu ko honatou ʼu kaumeʼa. (Maleko 10:29, 30) ʼAki tanatou gaue ʼi te Petele, ʼe feala pe hanatou kau ki te ʼu fono pea mo te gaue faifakamafola ʼi te vahaʼa fuli. Kaʼe ʼi ʼihi temi, ʼe lahi ai tanatou gaue ʼi te Petele. Pea ʼe lelei ke mahino ia te ʼu kokelekasio ki te ʼu faʼahi ʼaia, pea mo natou fakaha ia tanatou leleiʼia ia te gaue ʼae ʼe fakahoko e te kau Petelite.—Lau ia 1 Tesalonika 2:9.
TOU TOKONI KI TE ʼU KAUGANA ʼAE ʼE GAUE TEMI KATOA ʼI ʼIHI ATU ʼU FENUA
17, 18. Kotea ia te ʼu gaue ʼae ʼe fakahoko e te ʼu kaugana ʼae ʼi te selevisi temi katoa ʼi ʼihi atu fenua?
17 Ko ʼihi ʼae ʼi te selevisi temi katoa, ʼe natou tali tonatou hinoʼi ʼae ki he tahi fenua. ʼE mahino ia, ʼe kehekehe anai ia te faʼahiga meʼa kai, mo te lea, mo te ʼu aga ʼi fenua pea mo te maʼuli ʼo te fenua. Kotea ia te ʼu gaue ʼae ʼe fakahoko e te ʼu kaugana ʼae ʼi te selevisi temi katoa ʼi ʼihi atu ʼu fenua?
18 Ko ʼihi ʼe natou misionea pea ʼe teitei pe ke natou fakaʼaogaʼi ia tonatou temi katoa ki te minisitelio. ʼE natou faiva ʼi te faifakamafola pea mo te faiako, pea ʼe natou vaevae ia te ʼu faʼahi ʼae neʼe natou ako ki ʼihi ʼo tanatou kokelekasio. ʼE foaki e te filiale ki te kau misionea honatou kiʼi nofoʼaga pea mo hanatou kiʼi foʼi falā ke feala ai hanatou toʼo ia te ʼu meʼa ʼae ʼe ʼaoga kia natou. Ko ʼihi ʼe hinoʼi natou ki he tahi fenua moʼo gaue ʼi te ʼu filiale peʼe ke natou laga ia te ʼu filiale, peʼe ko te ʼu pilo faifakaliliu ʼe tuʼu mamaʼo mai te Petele, peʼe ko te ʼu Fale ʼo Te ʼu Fakatahi Lalahi, peʼe ko te ʼu Fale Fono. ʼE tokaga ia te filiale peʼe ko te ʼu tehina ʼo te fenua ki te ʼu meʼa ʼae ʼe ʼaoga kia natou, ohage la ko tanatou meʼa kai pea mo honatou nofoʼaga. Ohage pe ko te famili ʼo te Petele, ʼe kau tuʼumaʼu ia te kau gaue laga fale ʼaia ki te ʼu fono pea mo te faifakamafola. Pea ko te ʼu tehina mo tuagaʼane ʼaia, ʼe ko he tapuakina ia maʼa te ʼu kokelekasio.
19. ʼE kotou tokoni feafeaʼi anai ki te ʼu kaugana ʼae neʼe ʼomai ʼo gaue ʼi te selevisi temi katoa ʼi tokotou fenua?
19 ʼE kotou tokoni feafeaʼi anai ki te ʼu kaugana ʼae neʼe ʼomai ʼo gaue ʼi te selevisi temi katoa ʼi tokotou fenua? Kotou manatuʼi tanatou ʼuluaki tau mai, neʼe lagi mole natou mahani mo te meʼa kai. Koia moka kotou fakaafe ia natou, ʼe feala hakotou fehuʼi age pe ʼe natou fia ʼahiʼahiʼi ia he faʼahiga meʼa kai, peʼe kotea ʼae ʼe natou fia kai ki ai. Pea moka ʼe natou faiga ke natou ako ia takotou lea pea mo ʼakotou aga ʼi fenua, ʼe mole natou iloʼi atu aipe ia te ʼu faʼahi ʼaia. Koia kotou faʼa kataki pea mo agalelei ʼo kotou tokoni kia natou. Koteʼuhi ʼe natou faiga moʼoni.
20. ʼE kotou lava tokoni feafeaʼi anai ki te ʼu kaugana ʼae ʼi te selevisi temi katoa pea mo ʼanatou matuʼā?
20 ʼAki te temi, ʼe lagi tonu anai ke fakakaukauʼi e te ʼu kaugana ʼae ʼi te selevisi temi katoa ʼi te tahi fenua, pe ʼe natou tokoni feafeaʼi anai ki ʼanatou matuʼā ʼae kua vaivavavai. Kapau ko te ʼu matuʼā ʼe ko he ʼu Fakamoʼoni, pea ʼe mole natou loto ke tuku e ʼanatou fanau ia tanatou selevisi temi katoa. (3 Soane 4) ʼE moʼoni, ʼe faigaʼi anai e te ʼu kaugana ʼae ʼi te selevisi temi katoa ke natou tokakaga ki ʼanatou matuʼā pea ke natou tau olo ʼo fakasiosio ia natou. Kaʼe ʼe toe feala pe kia natou ʼae ʼe nonofo ovi ki te ʼu matuʼā, hanatou tokoni ki te ʼu kaugana ʼae ʼi te selevisi temi katoa, ʼaki ia tanatou tokakaga ki te ʼu matuʼā. ʼE mole tonu ke galo kia tatou ʼe maʼumaʼua ia te ʼu kaugana ʼaia ki te lagolago ki te gaue faifakamafola, ia te gaue maʼuhiga ʼae ʼe fakahoko ʼi te kele ia ʼaho nei. (Mateo 28:19, 20) ʼE feala koa hakotou manatuʼi ia te ʼu kaugana ʼae ʼi te selevisi temi katoa ʼo kotou tokakaga ki ʼanatou matuʼā?
21. Kotea ia te manatu ʼa te ʼu kaugana ʼae ʼe kau ki te selevisi temi katoa, ki te tokoni pea mo te fakalotomalohi ʼae ʼe foaki age e ʼihi?
21 Tokolahi ʼe natou gaue kinakina koteʼuhi ʼe natou fia maʼu koloa. Kaʼe ko natou ʼae ʼe natou filifili ia te selevisi temi katoa, ʼe natou gaue kinakina koteʼuhi ʼe natou fia foaki kia Sehova ia te ʼu meʼa ʼae ʼe lelei tukupau pea mo fia tokoni ki te hahaʼi. Koia ʼe natou lotofakafetaʼi ai moka foaki age e ʼihi ia he faʼahiga tokoni pe. Ko te tuagaʼane ʼe kau ki te selevisi temi katoa ʼi te tahi fenua, neʼe ina ui fenei: “Maʼia pe ʼe ko he kiʼi moʼi pepa ʼe tohi ai he fakamalo, ʼe ha ai ia te manatu ʼa ʼihi ʼo ʼuhiga mo koe pea mo tanatou fiafia ki tau gaue.”
22. Kotea ia takotou manatu ʼo ʼuhiga mo te selevisi temi katoa?
22 Neʼe filifili e natou ʼae ʼe kau ki te selevisi temi katoa ia te faʼahiga maʼuli fiafia moʼoni. Pea ʼe ko te faʼahiga maʼuli pe ʼaia ʼe lelei tokotahi. ʼE feala ke natou maʼu ʼi tanatou tauhi temi katoa ʼae kia Sehova ia he ʼu kalitate pea mo he ʼu ako, ʼe ʼaoga ki te temi nei pea mo te ka haʼu ʼi te malama foʼou. Pea kua ovi mai pe ia te fakahoko e te ʼu kaugana fuli ʼa Sehova ia he gaue fakafiafia moʼoni ʼi te ʼaho fuli. Koia tou haga manatuʼi ia te ʼu kaugana ʼae ʼe kau ki te selevisi temi katoa, ia tanatou “gaue agatonu” pea mo tanatou “gaue ʼi te ʼofa.”—1 Tesalonika 1:3, MN.