1, 2. He koʼe neʼe ʼaoga ke puipui ia te hakoga ʼo te fafine?

ʼE MAʼUHIGA ke tou iloʼi ia te ʼuluaki lea fakapolofeta ʼae ʼi te Tohi-Tapu, ke tou mahino pe fakahoko feafeaʼi anai e te ʼAtua ia tana fakatuʼutuʼu. ʼI te temi ʼae neʼe fai ai e te ʼAtua ia te fakapapau ʼi Eteni, neʼe ina ui fenei: “E au tuku anai te fehia ia koe [Satana] mo te fafine, i tou hakoga mo tona hakoga.” ʼE feafeaʼi anai te fehiʼa ʼaia? Neʼe ui fenei e Sehova: “E malamalaki anai e te hakoga o te fafine tou ulu [ʼo Satana], kae e ke uusi anai tona mulivae.” (Senesi 3:15) ʼE malohi ʼaupito anai ia te fehiʼa ʼae ia Satana pea mo te fafine. Koia ʼae ʼe fakaʼaogaʼi katoa anai e te Tevolo ia tona malohi moʼo maumauʼi ia te hakoga.

² Koia ʼae neʼe faikole fenei ai te tagata fai pesalemo ʼo ʼuhiga mo te hahaʼi ʼa te ʼAtua: “Koeni, kua gaugaue ou fili, ko natou ae e fehihia kia koe kua malaga onatou ulu ki oluga. E natou fai ki tau hahai ni fakatuutuu ae kua fonu i te kaka, pea e natou fakakaukau kovi fakatahi ki te hahai ae e ke malui. E natou ui: Koutou omai, ke tou tamatei natou i lotomalie o te atu puleaga, pea ke aua naa toe manatu anai ki te higoa o  Iselaele!” (Pesalemo 83: 3-5) Neʼe fakatuʼutuʼu e Satana ke ina ʼulihi pea mo fakaʼauha ia te famili ʼo te hakoga. Koia neʼe fai e Sehova ia te tahi ʼu fuakava moʼo puipui pea mo fakamoʼoni ʼe ina fakahoko anai ia tana fakatuʼutuʼu ʼo ʼuhiga mo te Puleʼaga Fakamesia.

3, 4. (1) Neʼe kamata ʼanafea ia te fuakava ʼo te Lao, pea kotea ʼae neʼe tali e te puleʼaga ʼo Iselaele ke natou fai? (2) Kotea ʼae neʼe tonu ke puipui e te fuakava ʼo te Lao?

³ ʼI te liliu ʼo te hakoga ʼo Apalahamo, mo Isaake pea mo Sakopo ko he toko lau ʼi miliona, neʼe fakaliliu ai natou e Sehova ko te puleʼaga ʼo Iselaele. Pea neʼe fai e te ʼAtua ia he fuakava makehe mo te puleʼaga ʼaia ʼaki ia Moisese, te tagata fakafelogoʼi. Neʼe foaki age e Sehova kia natou ia te Lao, pea neʼe tali e Iselaele ke fakalogo ki ai. ʼE ui ʼi te Tohi-Tapu, neʼe toʼo leva e Moisese “te tohi o te hai o lau i mua o te hahai; pea nee natou ui leva: E matou fai te u mea fuli ae kua lea ki ai [ia Sehova], pea e matou fakalogo anai ki ana folafola. Nee too leva e Moisese te toto [ʼo te ʼu vitulo ʼae neʼe sakilifisioʼi] o afuhi ki te hahai, o ui: Ko te toto aeni o te hai ae kua fai e [Sehova] mo koutou o mulimuli ki ana folafola fuli.”—Ekesote 24:3-8.

⁴ Neʼe kamata ia te fuakava ʼo te Lao ʼi te taʼu 1513 ʼi muʼa ʼo te temi ʼo Kilisito. ʼAki ia te fuakava ʼaia, neʼe filifili ai e Sehova ia te puleʼaga ʼo Iselaele ki he fakatuʼutuʼu makehe. Pea ʼe liliu anai ia te ʼAtua ko tonatou Tuʼi Fakamau, mo Tagata fai lao pea mo Hau. (Esaia 33:22) ʼE ʼasi mai ʼi te hisitolia ʼo Iselaele pe kotea ʼae ʼe hoko moka fakalogo peʼe moka talagataʼa ia te hahaʼi ki te ʼu lao faitotonu ʼa te ʼAtua. Pea ʼi te fakalogo ʼa te kau Iselaele ki te Lao ʼa te ʼAtua, neʼe mole tonu ke natou ʼohoana mo te kau pagani peʼe ke natou tauhi ki ʼihi atu ʼu ʼatua. Neʼe fakatuʼu ia te Lao moʼo puipui ia te hakoga ʼo Apalahamo mai te ʼu aga ʼae ʼe kovi.—Ekesote 20:4-6; 34:12-16.

5. (1) Kotea ia te fealagia ʼae neʼe foaki e te fuakava ʼo te Lao ki te puleʼaga ʼo Iselaele? (2) He koʼe neʼe liakī e te ʼAtua ia Iselaele?

⁵ ʼI te fuakava ʼo te Lao, neʼe hinoʼi ia te kau pelepitelo ke natou tauhi ʼi Iselaele. Neʼe fakata ia natou ki te kiʼi kutuga pelepitelo ʼae ka natou tokoni anai ki te hahaʼi ʼi te ka haʼu, ʼi hona aluʼaga ʼe lelei age. (Hepeleo 7:11; 10:1) Koia neʼe foaki e te fuakava ʼo te Lao ki te kau Iselaele ia te fealagia ʼae ke natou liliu ko ‘he puleʼaga fakapelepitelo.’ Ke feala hanatou maʼu ia te pilivilesio ʼaia, neʼe tonu ke natou fakalogo ki te ʼu lao ʼa Sehova. (Lau ia Ekesote 19:5, 6.) Kaʼe neʼe mole natou fakalogo. Neʼe mole natou tali ia te Mesia, ia te koga tafitō ʼo te hakoga ʼo Apalahamo. Neʼe natou liakī ia Sesu pea neʼe liakī e te ʼAtua ia natou.

6. Neʼe kotea ia te fakatuʼutuʼu ʼo te Lao?

⁶ Neʼe mole nofo agatonu ia te puleʼaga ʼo Iselaele ki te ʼAtua, koia ʼae neʼe mole natou liliu ai ko he puleʼaga fakapelepitelo. Kaʼe neʼe mole fakaʼuhiga leva neʼe ʼi ai he faʼahi neʼe hala ʼi te Lao. Neʼe puipui e te Lao ia te hakoga pea neʼe tokoni ki te hahaʼi ke natou iloʼi pe ko ai ia te Mesia. Pea ʼi te iloʼi ʼae ko Kilisito ia te Mesia  ʼi tana haʼu ki te kele, neʼe hoki hoko ai leva ia te Lao. ʼE ui fenei ʼi te Tohi-Tapu: “Ko Kilisito te fakaʼosi ʼo te Lao.” (Loma 10:4, MN) Kaʼe ko ai koa ʼae ka ina maʼu ia te fealagia ʼae ke natou liliu ko he puleʼaga fakapelepitelo? Neʼe fai e Sehova ia te tahi fuakava moʼo fakatuʼu ia he puleʼaga foʼou.

7. Kotea ʼae neʼe fakakikite e Sehova ʼaki ia Selemia?

⁷ Fualoa ʼi muʼa atu ʼo te pulihi ʼo te fuakava ʼo te Lao, neʼe fakakikite e Sehova ʼaki ia te polofeta ko Selemia, ʼe ina fai anai “he hai [peʼe fuakava] foou” mo te puleʼaga ʼo Iselaele. (Lau ia Selemia 31:31-33.) ʼE kehekehe anai ia te fuakava ʼaia mo te fuakava ʼo te Lao. Koteʼuhi ʼe mole ina fakamaʼua anai ia he ʼu sakilifisio manu ki te fakamolemole ʼo te ʼu agahala. Neʼe lava feafeaʼi ia te faʼahi ʼaia?

8, 9. (1) Kotea ʼae neʼe fakafealagia ʼaki ia te taʼataʼa ʼo Sesu? (2) Kotea ʼae neʼe feala ke maʼu e natou ʼae ʼe kau ʼi te fuakava foʼou? (Vakaʼi te ʼuluaki pakī.)

⁸ Hili ki ai taʼu ʼe lauʼi teau, ʼi te ʼaho 14 ʼo Nisani ʼi te taʼu 33, neʼe kamata e Sesu ia te toʼotoʼoga foʼou ʼo te Taumafa ʼa Te ʼAliki. ʼI te palalau ʼa Sesu ki te ipu vino, neʼe ina ui fenei ki ʼana kau apositolo ʼe toko 11: “Ko te ipu aeni o te hai foou i toku [taʼataʼa], ae nee liligi o uhi ko koutou.” (Luka 22:20) ʼO mulimuli ki te fakamatala ʼa Mateo, neʼe ui fenei e Sesu: “Ko te mea aeni ko toku toto, ko te toto o te hai foou, ae nee liligi ki te kaugamalie, ke fakamolemole ai te u agahala.”—Mateo 26:27, 28.

⁹ ʼE fakamoʼoni ʼaki ia te taʼataʼa ʼo te sakilifisio ʼa Sesu ia te fuakava fo’ou. Pea neʼe foaki tuʼa tahi ia te taʼataʼa ʼaia ke feala ai ke fakamolemole ia te agahala ʼa te tokolahi ʼo talu ai. ʼE mole kau ia Sesu ki te fuakava foʼou, koteʼuhi ʼe mole hana agahala. Koia ʼae ʼe mole ʼaoga ai ki ai ia he fakamolemole. Kaʼe ʼe lava fakaʼaogaʼi e te ʼAtua ia te maʼuhiga ʼo te sakilifisio ʼa Sesu ke fua lelei ki te hahaʼi. ʼE toe feala ke ina fakaʼaogaʼi ia tona laumalie maʼoniʼoni moʼo fakanofo ʼihi hahaʼi agatonu pea mo vaheʼi natou ko ʼona foha. (Lau ia Loma 8:14-17.) Kia mata ʼo Sehova, ʼe mole hanatou ʼu agahala ohage pe ko Sesu ia tona ʼAlo. Pea ʼe “mau tofiga fakatahi” anai ia te kau fakanofo ʼaia mo Kilisito. ʼE natou toe maʼu anai ia te fealagia pea mo te pilivilesio ʼae neʼe mole kei maʼu e te puleʼaga ʼo Iselaele, ʼae ke natou liliu ko he puleʼaga fakapelepitelo. Neʼe ui fenei e te apositolo ko Petelo ʼo ʼuhiga mo natou: “Ko koutou, ko he lanu filifiliia, ko he kau hau faisakilifisio, [peʼe ko he ʼu pelepitelo fakahau] ko he puleaga maonioni,  ko he hahai kua totogi, o tupu ke kotou fakaha te u naunau o ae kua ina paui ia koutou mai te fakapouli ki tona malama matalelei.” (1 Petelo 2:9) ʼE ha lelei mai, ʼe maʼuhiga ia te fuakava foʼou. ʼE ina fakafealagia ki te ʼu tisipulo ʼa Sesu ke natou liliu ko te lua koga ʼo te hakoga ʼo Apalahamo.

10. Ko ʼanafea ʼae neʼe kamata ai ia te fuakava foʼou, pea he koʼe neʼe mole kamata ia ʼi muʼa atu?

¹⁰ Neʼe mole kamata ia te fuakava foʼou ʼi te Taumafa ʼa Te ʼAliki. Kotea tona tupuʼaga? Neʼe tonu ke liliu ia Sesu ki selo ʼo fakaha ia te maʼuhiga ʼo tona sakilifisio ki te ʼAtua, moʼo fakamoʼoni ia te fuakava foʼou. Pea neʼe tonu kia natou ʼae ka “mau tofiga fakatahi mo Kilisito,” ke fakanofo natou ʼaki ia te laumalie maʼoniʼoni. Koia neʼe hoki kamata ia te fuakava foʼou ʼi te Penikosite ʼo te taʼu 33, ʼi te temi ʼae neʼe maʼu ai e te ʼu tisipulo ʼa Sesu ia te laumalie ʼo te ʼAtua.

11. ʼAki ia te fuakava foʼou, neʼe lava kau feafeaʼi ia te kau Sutea pea mo te kau Senitile ki te Iselaele fakalaumalie? Pea ko te toko fia ʼae ka kau anai ʼi te fuakava foʼou?

¹¹ Neʼe fakaha e Sehova ʼaki ia Selemia, ʼe ina fai anai ia te fuakava foʼou mo Iselaele. Pea neʼe ha ai ʼe mole toe ʼaoga anai ia te fuakava ʼo te Lao. ʼI te kamata ʼo te fuakava foʼou, neʼe fakaʼosi ai leva ia te Lao. (Hepeleo 8:13) ʼAki ia te fuakava foʼou, ʼe maʼu tatau anai e te kau Sutea pea mo te kau Senitile, ʼae neʼe mole ko he kau Sutea, ia te fealagia ʼae ke natou liliu ko he kau maʼu tofiga ʼo te Puleʼaga ʼo te ʼAtua. Koteʼuhi ‘ko tonatou silikosisio ʼe ko te silikosisio ʼo tonatou loto ʼaki te laumalie, pea ʼe mole fai ʼaki he lao neʼe tohi.’ (Loma 2:29, MN) ʼE tuku anai e te ʼAtua ia tana lao ki ʼonatou ʼatamai pea mo ʼonatou loto. (Hepeleo 8:10) ʼE kau ia te toko 144 000 kau fakanofo ʼi te fuakava foʼou.  Pea ʼe natou faʼufaʼu ia he puleʼaga foʼou, ia “te Iselaele a te Atua,” peʼe ko te Iselaele fakalaumalie.—Kalate 6:16; Apokalipisi 14:1, 4.

12. Kotea ʼae ʼe tatau ai ia te fuakava ʼo te Lao pea mo te fuakava foʼou?

¹² Kotea ʼae ʼe tatau ai ia te fuakava ʼo te Lao pea mo te fuakava foʼou? Neʼe fai ia te fuakava ʼo te Lao ia Sehova pea mo te puleʼaga ʼo Iselaele, kaʼe neʼe fai ia te fuakava foʼou ia Sehova pea mo te Iselaele fakalaumalie. Neʼe ko Moisese ia te tagata fakafelogoʼi ʼo te fuakava ʼo te Lao, kaʼe ko Sesu ia te tagata fakafelogoʼi ʼo te fuakava foʼou. Neʼe fakamoʼoni ia te fuakava ʼo te Lao ʼaki ia te toto ʼo he ʼu manu, kaʼe neʼe fakamoʼoni ia te fuakava foʼou ʼaki ia te taʼataʼa ʼo te sakilifisio ʼa Sesu. ʼI te fuakava ʼo te Lao, neʼe ko Moisese ʼae neʼe ina takitaki ia te puleʼaga ʼo Iselaele. Kaʼe ko Sesu, ia te Pule ʼo te kokelekasio, ʼe ko te Takitaki ʼo natou ʼae ʼe kau ʼi te fuakava foʼou.—Efeso 1:22.

13, 14. (1) ʼE feafeaʼi ia te pikipikiga ʼo te fuakava foʼou pea mo te Puleʼaga? (2) Ke feala ia he ʼafio ʼa te Iselaele fakalaumalie pea mo Kilisito ʼi selo, kotea ʼae ʼe fakamaʼua ki ai?

¹³ Ko te fuakava foʼou ʼe ina fakatupu ia he puleʼaga maʼoniʼoni, ʼe ina maʼu ia te pilivilesio ʼae ke natou liliu ko he ʼu hau pea mo pelepitelo ʼi te Puleʼaga ʼo selo. Pea ʼe faʼufaʼu e te puleʼaga ʼaia ia te lua koga ʼo te hakoga ʼo Apalahamo. ʼO ha mai ai, ʼe ʼi ai te pikipikiga ʼo te fuakava foʼou mo te Puleʼaga. (Kalate 3:29) Koia ʼe fakamoʼoni e te fuakava foʼou ʼaia, ʼe hoko moʼoni anai ia te fuakava ʼae neʼe fai mo Apalahamo.

¹⁴ ʼE fakatupu e te fuakava foʼou ia te puleʼaga ʼo te Iselaele fakalaumalie, pea ʼe ko te fakatafitoʼaga ʼaia maʼa te kau fakanofo ke natou “mau tofiga fakatahi mo Kilisito.” Kaʼe ʼe lava feafeaʼi ki te kau fakanofo ke natou ʼafio fakatahi mo Sesu ʼi selo, ʼi tonatou ʼuhiga hau pea mo pelepitelo? ʼE fakagafua ia te faʼahi ʼaia ʼaki ia te tahi fuakava.

15. Kotea ia te fuakava ʼae neʼe fai e Sesu pea mo ʼana apositolo agatonu?

¹⁵ Hili te fakatuʼu e Sesu ia te Taumafa ʼa Te ʼAliki, neʼe ina fai ia he fuakava mo ʼana tisipulo agatonu. Pea ʼe higoa ko te fuakava ki he Puleʼaga. (Luka 22:28-30, MN) ʼE mole tatau ia mo te ʼu fuakava ʼae, koteʼuhi ʼe mole kau ia Sehova ʼi te fuakava ʼaia. Kaʼe neʼe fai pe ia te fuakava ʼaia ia Sesu pea mo te kau fakanofo. ʼI te ui fenei e Sesu: “Ohage ko taku tamai neʼe ina fai te fuakava mo au,” neʼe lagi talanoa ia ki te fuakava ʼae neʼe nā fai mo Sehova, ʼae ke liliu ko ‘he pelepitelo ʼo heʼe gata, ohage ko Melekiseteke.’—Hepeleo 5:5, 6.

16. Kotea ʼae neʼe fakafealagia ʼaki ia te fuakava ki he Puleʼaga ki te kau Kilisitiano fakanofo?

¹⁶ Lolotoga te ’u ʼahiʼahi fuli ʼa Sesu, neʼe nonofo agatonu ia te toko 11 kau apositolo kia te ia. Neʼe fakamoʼoni e te fuakava ki he Puleʼaga, ʼe heheka anai ia te kau apositolo ki ni hekaʼaga fakahau pea mo natou ʼafio fakatahi anai mo Sesu ʼi selo, ʼi tonatou ʼuhiga hau pea mo pelepitelo. Kaʼe ʼe mole ko te toko 11 pe ʼae ka natou maʼu ia te pilivilesio ʼaia. Neʼe ha ia Sesu ki te apositolo ko Soane pea neʼe ina ui fenei: “Ko ae e malo anai, e au fakanofo anai ia mo au i toku hekaaga fakahau, o hage ko au ae nee malo pea kua au heka mo taku Tamai i tona hekaaga fakahau.” (Apokalipisi 3:21) Koia neʼe fai ia te fuakava ki he Puleʼaga mo te toko 144 000 kau Kilisitiano fakanofo. (Apokalipisi 5: 9, 10, MN; 7:4) ʼE fakagafua e te fuakava ʼaia ki te kau fakanofo ke natou kaugā hau mo Sesu ʼi selo. ʼE hage pe ko he fafine neʼe filifili ke ʼohoana mo he hau. ʼI tanā kua ʼosi ʼohoana, ʼe feala leva ki te fafine ʼohoana ke kaugā pule mo te hau. Koia, ʼe talanoa ʼi te Tohi-Tapu ki te kau fakanofo ohage ko te “ʼohoana” ʼo Kilisito, pea ʼe ko “he taupoou maa” neʼe fakapapauʼi ke ʼohoana mo Kilisito.—Apokalipisi 19:7, 8, MN; 21:9 MN; 2 Kolinito 11:2.

17, 18. (1) Kotou fakamahino fakanounou ia te ʼu fuakava takitahi ʼae ʼe ʼi ai tonatou pikipikiga mo te Puleʼaga. (2) He koʼe ʼe feala ke tou tui malohi ki te Puleʼaga?

¹⁷ Neʼe tou talanoa ʼi te ʼu alatike ʼaeni ʼe lua, kia fuakava ʼe ʼi ai tonatou pikipikiga mo te Puleʼaga ʼi he faʼahi maʼuhiga ʼe tahi peʼe laka atu. (Vakaʼi te pakī “ʼE Fakahoko Feafeaʼi Anai e Te ʼatua Ia Tana Fakatuʼutuʼu?”) ʼE ha lelei mai, ʼe fakatafito ia te Puleʼaga ki te ʼu fuakava ʼaia. Pea ʼe feala hatatou tui papau ʼe fakaʼaogaʼi anai e te ʼAtua ia te Puleʼaga Fakamesia, moʼo fakahoko ia tana fakatuʼutuʼu maʼa te tagata pea mo te kele.—Apokalipisi 11:15.

¹⁸ ʼE mahino papau ia, ko te Puleʼaga ʼe ko te puleʼaki pe ʼaia ʼe tahi ki te ʼu fihifihia ʼo te malamanei. Pea ʼe tou iloʼi papau, ʼe ina ʼaumai anai ia he ʼu tapuakina ʼe heʼe gata ki te hahaʼi fuli. Koia, ʼofa pe ke tou tala ʼaki he faʼafai ia te ʼu moʼoni taulekaleka ki te hahaʼi.—Mateo 24:14.