1. Kotea te manatu ʼa Sehova ʼo ʼuhiga mo te gaue? Pea kotea ʼae neʼe ina fai?

ʼE LELEIʼIA e Sehova tana gaue. (Pesalemo 135:6; Soane 5:17) Pea ʼe ina loto ke toe leleiʼia e te kau ʼaselo pea mo te tagata ia tanatou gaue. Koia ʼae ʼe ina tuku age ai kia natou ia he gaue ʼe natou fiafia ai. Neʼe fakaʼaogaʼi e Sehova ia tona ʼAlo ʼUlutokotahi ki te fakatupu ʼo meʼa fuli. (Lau ia Kolose 1:15, 16.) ʼE ui ʼi te Tohi-Tapu ʼi muʼa ʼo te hifo mai ʼa Sesu ki te kele, neʼe maʼuli ia mo te ʼAtua ʼi te lagi, pea neʼe ko “he tufuga faiva.”—Taaga Lea 8:30, MN.

2. ʼE tou iloʼi feafeaʼi neʼe maʼu tuʼumaʼu e te kau ʼaselo ia he gaue maʼuhiga neʼe natou leleiʼia?

² Mai te tohi ʼo Senesi ʼo kaku ki te tohi ʼo Apokalipisi, ʼe fakamahino mai ʼi te Tohi-Tapu neʼe foaki tuʼumaʼu e Sehova ia he ʼu gaue maʼa te kau ʼaselo. ʼI te temi ʼae neʼe agahala ai ia Atama mo Eva, neʼe nā mavae ʼi te Palatiso pea neʼe foaki e te ʼAtua ia he gaue ki he ʼu ʼaselo. ʼE tou lau ia Senesi “nee fakatuu leva e te Atua i te potu esite o te oloto o Eteni ni selupino, ke natou leo ia te ala ki te akau o te mauli.” (Senesi 3:24) Pea ʼi te tohi ʼo Apokalipisi, ʼe tou ako ai ko Sehova neʼe ina fekauʼi  mai “tana aselo ke fakaha ki ana tagata faifekau te u mea ae e tonu ke hoko vave,” peʼe ko ʼae ʼo te ka haʼu.—Apokalipisi 22:6.

3. ʼI tana nofo ʼi te kele, neʼe faʼifaʼitakiʼi feafeaʼi e Sesu ia tana Tamai?

³ ʼI te temi ʼae neʼe nofo ai ia Sesu ʼi te kele, neʼe fiafia ia ʼi te gaue ʼae neʼe tuku age e Sehova. Neʼe ina faʼifaʼitakiʼi tana Tamai ʼaki tana foaki ia he ʼu gaue maʼuhiga ki ʼana tisipulo. Neʼe ina fakalotomalohiʼi tanatou gaue ʼo ina ui fenei age: “E mooni, e mooni, e au ui atu kia koutou, ko ae e tui kia au, e ina fai anai te u gaue ae e au fai, pea e ina fai anai ni gaue lalahi age, koteuhi e au alu ki te Tamai.” (Soane 14:12) Pea neʼe tokoni ia Sesu ki ʼana tisipulo ke natou mahino ko tanatou gaue ʼe tonu ke faifakavilivili. Neʼe ina ui fenei age: “E tonu ke au fai kei aho te u gaue a ia ae nee ina fekaui mai au; e hau te pouli, ae e mole feala ke gaue ai he tahi.”—Soane 9:4.

4-6. (1) He koʼe ʼe tou lotofakafetaʼi kia Noe mo Moisese ki tanā fai ia te ʼu gaue ʼae neʼe foaki age e te ʼAtua? (2) Kotea ia te ʼu fua lelei ʼe lua ʼe maʼu mai te ʼu gaue ʼae ʼe foaki e te ʼAtua maʼa te tagata?

⁴ ʼI muʼa ʼo te hifo mai ʼa Sesu ki te kele, neʼe foaki e Sehova ia he ʼu gaue maʼa te tagata ke natou leleiʼia. Logo la neʼe mole fakahoko katoa e Atama mo Eva tanā gaue, kaʼe neʼe fakaʼosi ʼe ʼihi ia te ʼu gaue fuli ʼae neʼe fakatotonu age e te ʼAtua ke natou fai. (Senesi 1:28) Neʼe foaki e Sehova kia Noe ia he ʼu fakatotonu ʼo ʼuhiga mo te faʼu ʼo te aleka ke feala ke haofaki ai ia ia mo tona famili mai te Tulivio. Pea neʼe fai e Noe ia meʼa fuli ʼo mulimuli ki te ʼu fakatotonu ʼa Sehova. ʼE tou maʼuʼuli ia ʼaho nei koteʼuhi neʼe mulimuli lelei ia Noe ki te ʼu fakatotonu ʼa Sehova.—Senesi 6:14-16, 22; 2 Petelo 2:5.

⁵ Neʼe foaki e Sehova ia he ʼu fakatotonu kia Moisese ki te fakatuʼu ʼo te tapenakulo pea mo te fakatuʼutuʼu ʼo te gaue fakapelepitelo. Pea neʼe mulimuli lelei ia Moisese ki te ʼu fakatotonu fuli ʼae neʼe foaki age e Sehova ke ina fai. (Ekesote 39:32; 40:12-16) Kotea te ako ʼe feala ke tou taʼofi mai te gaue kinakina ʼa Moisese pea mo tana fakalogo? Ohage ko tona fakamahino e te apositolo ko Paulo, ko te tapenakulo pea mo te gaue fakapelepitelo ʼe nā fakata ia te ʼu meʼa lelei ʼae ka hoko mai.—Hepeleo 9:1-5, 9; 10:1.

⁶ ʼAki te alu ʼo te temi, ʼe tali e ʼana kaugana he ʼu gaue kehekehe moʼo fakahoko ia te ʼu fakatuʼutuʼu ʼa te ʼAtua. Logo la ia te fetogi ʼo te ʼu gaue ʼaia, kaʼe ko fua lelei ʼe lua ʼe maʼu mai ai: ʼE natou fakakololiaʼi tuʼumaʼu pe ia Sehova pea ʼe toe fua lelei ki te tagata. Pea neʼe ko te faʼahi ʼaia neʼe fai e Sesu ʼi muʼa ʼo tana haʼu ki te kele pea lolotoga tana ʼi te kele. ( Soane 4:34; 17:4) Ia ʼaho nei, moka tou fai ia te gaue ʼae ʼe foaki mai e Sehova pea ʼe fakakololiaʼi ʼatatou gaue ia ia. (Mateo 5:16; lau ia 1 Kolinito 15:58.) He koʼe ʼe feala ke tou ui ia te faʼahi ʼaia?

7, 8. (1) Kotea te pilivilesio ʼe maʼu e te kau Kilisitiano ia ʼaho nei? (2) ʼE tou tali feafeaʼi ia te takitaki ʼa Sehova?

⁷ ʼE ko he meʼa fakafiafia ia te fakaafe e Sehova ia te tagata agahala ke gaue fakatahi mo ia. (1 Kolinito 3:9) Ko ʼihi kau  Kilisitiano neʼe natou maʼu ia te pilivilesio ʼae ke natou kau ki te laga fale, ohage ko Noe mo Moisese. Ko ʼihi ʼe natou kau ki te laga ʼo te ʼu Fale Fakatahi mo te ʼu Fale Fono peʼe ko te ʼu filiale. Tatau aipe pe ʼe kotou fakafoʼou ia he ʼu Fale Fono peʼe kotou laga ia te ʼu fale ʼo te ʼu pilo lalahi ʼi Warwick ,ʼi New York, kaʼe ke kotou leleiʼia ia te pilivilesio ʼaia. (Vakaʼi te ʼuluaki pakī.) Pea ʼe ko he gaue taputapu ia. ʼE moʼoni ʼe mole feala ke tou kau fuli ki te ʼu gaue laga fale, kaʼe ko te kau Kilisitiano fuli ʼe feala ke natou kau ki he gaue fakalaumalie. ʼE ko te gaue faifakamafola ʼae ʼe ina fakakololiaʼi ia Sehova pea mo fua lelei ki te tagata. (Gaue 13:47-49) ʼE ko te kautahi ʼa Sehova ʼae ʼe ina takitaki ia te gaue faifakamafola. Pea ʼi ʼihi temi ʼe feala ke foaki mai ia he gaue foʼou.

⁸ Ko te ʼu kaugana ʼa Sehova ʼe natou fia muliʼi tuʼumaʼu ia tana takitaki. (Lau ia Hepeleo 13:7, 17.) ʼE feala ke mole tou mahino ki te ʼu fakatotonu foʼou ʼaia. Kaʼe ʼe tou kaugā gaue fakatahi mo Sehova koteʼuhi ʼe tou iloʼi ko te ʼu fetogi ʼaia ʼe haʼu mai ia ia pea ʼe fua lelei tuʼumaʼu anai.

9. Kotea ia te faʼifaʼitaki lelei ʼe tuku e te kau tagata ʼafeā ʼi ʼanatou kokelekasio?

⁹ ʼE fakaha e te kau tagata ʼafeā ia tanatou fia fai ia te finegalo ʼo te ʼAtua ʼaki tanatou faʼahiga takitaki ia te kokelekasio. (2 Kolinito 1:24; 1 Tesalonika 5:12, 13) ʼE fia gaue kinakina ia te kau tagata ʼafeā mo muliʼi ia te takitaki ʼa te kautahi, koia ʼae ʼe natou fia ako ai ia te ʼu faʼahiga faifakamafola foʼou. Pea ʼe natou maʼu ia he ʼu fua lelei moka ʼe natou fakatuʼutuʼu ia te gaue faifakamafola ʼaki te telefoni, peʼe ko te faifakamafola ʼi te ʼu ʼuafu, peʼe ko te faifakamafola faigamalie logo ai ʼe manatu ʼihi ʼe mole anai hona fua. Ohage la, ko te ʼu pionie e toko fa ʼi Siamani neʼe natou fakatuʼutuʼu ke natou olo ʼo faifakamafola ʼi te telituale ʼo te ʼu matani gaue ʼae neʼe kua fualoa tona mole kei gaueʼi. ʼE ui e Michael neʼe natou tuʼania koteʼuhi neʼe kua fualoa ia tanatou mole kei fai ia te faʼahiga faifakamafola ʼaia. ʼE ina ui fenei: “ʼE hage neʼe kua iloʼi e Sehova koteʼuhi neʼe ina fakafealagia ke maui malie tamatou faifakamafola ʼi te uhu ʼaia. Pea neʼe matou fiafia koteʼuhi neʼe matou mulimuli lelei ki te manatu ʼae neʼe tuku mai ʼi Te Minisitelio ʼo te Puleʼaga pea neʼe matou falala ki te tokoni ʼa Sehova.” ʼE kotou toe fia ʼahiʼahi fai koa ia te ʼu faʼahiga faifakamafola foʼou ʼaia ʼi takotou telituale?

10. Kotea ia te ʼu fetogi neʼe fai e te kautahi ʼa Sehova ʼi te ʼu taʼu ʼaeni kua hili?

¹⁰ ʼI ʼihi temi ʼe fai ʼe te Petele ia he ʼu fetogi.  Ohage la ʼi te ʼu taʼu ʼaeni kua hili, neʼe pupunu ia te ʼu filiale liliki pea neʼe hiki ia tanatou gaue ki he ʼu filiale lalahi. Pea neʼe lotomamahi ia natou ʼae neʼe gaue ʼi te ʼu filiale liliki ʼaia. Neʼe lagi natou fai ia he ʼu fetogi kaʼe neʼe natou sisio ki ʼona fua lelei ki muli age. (Ekelesiasi 7:8) Ko te kau gaue fuli ʼaia, neʼe natou fiafia koteʼuhi ʼe natou kau ʼi te hisitolia ʼo te hahaʼi ʼa Sehova ʼo te temi nei.

11-13. Kotea ia te ʼu faigataʼaia neʼe felaveʼi mo ʼihi ʼuhi ko te ʼu fetogi ʼae neʼe fai e te kautahi?

¹¹ ʼE ʼi ai te ʼu ako maʼuhiga ʼe feala ke tou maʼu mai ia natou ʼae neʼe gaue ʼi te ʼu filiale liliki ʼaia. Tokolahi ia te ʼu tehina mo tuagaʼane neʼe natou gaue ʼi ai lolotoga he ʼu taʼu. Ko te taumatuʼa neʼe nā gaue i te kiʼi Petele neʼe fekauʼi ke olo ki Mekesike ʼae neʼe kaugā malie ai ia te kau Petelite. Neʼe ui fenei e tona ʼohoana, ko Rogelio: “Neʼe ko he meʼa fakalotomamahi ia taku mavae mai toku famili pea mo ʼoku kaumeʼa.” Neʼe kole kia Juan, ia te tahi Petelite ke alu ki Mekesike. Neʼe hage kia ia neʼe tonu ke ina toe faʼufaʼu ia tona maʼuli. ʼE ina ui fenei: “Neʼe tonu ke au maʼu hoku tahi ʼu kaumeʼa. Pea neʼe tonu ke au fakamamahani mo ʼanatou aga ʼi fenua.”

¹² ʼI te pupunu ʼo te ʼu filiale ʼo Eulopa, neʼe kole ai ki ʼihi kau Petelite ke olo ki te filiale ʼo Siamani. Neʼe natou felaveʼi mo te ʼu faigataʼaia, pea neʼe mole ko he meʼa faigafua ia tanatou mavae ʼae mai tonatou fenua. Ko natou ʼae neʼe mavae mai Suisse neʼe natou fia sisio ki te ʼu moʼuga ʼae ʼe higoa ko te Alpes. Pea ko natou ʼae neʼe mavae mai Autriche neʼe natou manatuʼi ia te kiʼi famili ʼo te Petele.

¹³ Ko te ʼu tehina mo tuagaʼane ʼae neʼe natou olo ki te filiale ʼo te tahi atu fenua neʼe tonu ke natou fai he ʼu fetogi. Neʼe tonu ke natou fakamamahani ʼi tonatou nofoʼaga foʼou, mo ʼonatou kaugā gaue pea mo te tahi age gaue. Pea neʼe tonu ke natou fakamamahani ki ʼanatou kokelekasio, mo ʼanatou telituale peʼe ko he tahi age lea. ʼE faigataʼa ia te fai ʼo te ʼu fetogi ʼaia kaʼe tokolahi ia te kau Petelite neʼe natou lotolelei ke natou fai ia te faʼahi ʼaia. Kotea tona tupuʼaga? Tou vakaʼi ia te ʼu manatu ʼa ʼihi.

14, 15. (1) Neʼe fakaha feafeaʼi ʼe ʼihi ia tanatou leleiʼia te pilivilesio ʼae ke natou gaue fakatahi mo Sehova?(2) He koʼe ko he ʼu faʼifaʼitaki lelei kia tatou?

¹⁴ ʼE ui fenei e Grethel: “Neʼe au tali ia te fakaafe ʼaia koteʼuhi neʼe au fia fakaha kia Sehova ko toku ʼofa ʼae kia ia ʼe maʼuhiga age ʼi he fenua, peʼe ko he fale peʼe ko he pilivilesio.” ʼE ui fenei e Dayska: “ʼI taku manatuʼi ʼae ko te fakaafe ʼaia ʼe haʼu mai ia Sehova, neʼe au tali ʼaki he fiafia.” ʼE ui fenei e André mo Gabriela: “Neʼe ma sisio ki he faigamalie foʼou ke ma tauhi ai kia Sehova pea mo tuku keheʼi ia te ʼu meʼa ʼae neʼe ma loto ki ai.” Koia, neʼe natou logoʼi ai ka fai e te kautahi ʼa Sehova ia he ʼu fetogi, ʼe lelei age takita tali ʼaki he fiafia ʼi takita fakafisi ki ai.

¹⁵ ʼI te temi ʼae neʼe pupunu ai te ʼu filiale, ko ʼihi kau Petelite neʼe natou liliu ʼo pionie. Pea ko te aluʼaga ʼaia neʼe hoko ki ʼihi kau Petelite ʼi te temi ʼae neʼe pupunu ai ia te ʼu filiale ʼo Danemark, mo Norvège, mo Suède pea mo fakatahiʼi ia te ʼu filiale ʼaia ki te filiale ʼo Scandinavie. ʼE ui fenei  e te taumatuʼa ko Florian mo Anja: “Neʼe ma fiafia ʼi te fakahoko ʼo te gaue ʼaia. Neʼe ko he meʼa fakafiafia ia te fakaʼaogaʼi ʼo maua e Sehova ʼi he potu pe ʼe ma olo ki ai. Pea ʼe feala ke ma ui neʼe tapuakinaʼi lahi maua e Sehova.” Logo la ʼe mole tou felaveʼi fuli mo te faʼahi ʼaia, kaʼe ʼe feala ke tou faʼifaʼitakiʼi ia te aga ʼa te ʼu tehina mo tuagaʼane ʼaia pea mo fakamuʼamuʼa ia te Puleʼaga ʼi totatou maʼuli. (Esaia 6:8) ʼE tou tui papau ʼe tapuakinaʼi anai e Sehova ia natou ʼae ʼe natou leleiʼia te pilivilesio ʼae ke natou gaue fakatahi mo ia ʼi he potu pe ʼe natou olo ki ai.

16. (1) ʼO mulimuli kia Kalate 6:4, kotea ʼae ʼe tonu ke tou fai? (2) Kotea ia te toe pilivilesio lahi ʼae ʼe tou maʼu?

¹⁶ ʼUhi ko totatou ʼuhiga heʼe haohaoa, ʼe tou tau fakatatau ia tatou ki ʼihi. Kaʼe ʼe ui mai ʼi te Folafola ʼa te ʼAtua ke tou tokakaga fakamalotoloto ki te ʼu gaue ʼae ʼe tou lava fai. (Lau ia Kalate 6:4.) ʼE mole feala kia tatou fuli ke tou tagata ʼafeā, mo pionie, mo misionea pea mo Petelite. ʼE moʼoni ʼe ko he ʼu pilivilesio maʼuhiga kaʼe ʼe tou maʼu fuli ia he toe pilivilesio lahi. Koteʼuhi ʼe tou gaue fakatahi mo Sehova ki te fakamafola ʼo te logo lelei. Tou leleiʼia te pilivilesio ʼaia.

17. ʼI te tuʼu ʼaeni, kotea ʼae ʼe mole feala ke tou fakatokatoka? Pea he koʼe ʼe mole tonu ke tou lotovaivai?

¹⁷ ʼI te tuʼu ʼaeni, ʼe mole feala ke tou tauhi kia Sehova ʼo hage ko tatatou fakaʼamu ki ai. ʼE ʼi ai te ʼu aluʼaga ʼe mole feala ke tou fakatokatoka, ʼo hage ko te ʼu maua fakafamili peʼe ko te mahaki. Pea ʼe mole tonu ke tou lotovaivai ai. Tatau aipe pe kotea te ʼu fihifihia ʼe tou tau mo ia, ʼe feala tuʼumaʼu pe ke tou fakamafola ia te huafa ʼo Sehova pea mo tona Puleʼaga. Ko te faʼahi  ʼae ʼe maʼuhiga ʼe ko tatatou fai ia te meʼa ʼae ʼe tou lavaʼi maʼa Sehova. Ohage la, ʼe feala ke tou faikole kia Sehova ke tokoni kia natou ʼae ʼe natou lava fai he gaue ʼo lahi age ia tatou. Tou manatuʼi ʼe maʼuhiga kia mata ʼo Sehova ia natou fuli ʼae ʼe natou fakavikiviki kia te ia.

18. Kotea ʼae ʼe tou ʼamanaki ki ai ʼi te ka haʼu? Pea kotea ia te pilivilesio lahi ʼae kua tou maʼu?

¹⁸ ʼE loto ia Sehova ke tou liliu ko ʼana kaugā gaue logo la totatou ʼuhiga agahala. Pea ʼe ko he toe pilivilesio lahi ia tatatou gaue fakatahi mo totatou ʼAtua ʼi te ʼu temi fakamuli ʼaeni. Koia tou sisio ki te ka haʼu, te maʼuli moʼoni ʼaia ʼae heʼeki tou maʼu ʼi te temi nei. Pea ʼe tapuakinaʼi anai tatou e Sehova ʼi te malama foʼou ʼaki ia tana foaki mai ia te fiafia mo te tokalelei.—1 Timoteo 6:18, 19.

19. Kotea ia te ka haʼu taulekaleka ʼae ʼe fakapapauʼi mai e Sehova?

¹⁹ ʼE fakapapauʼi mai e te ʼAtua kua ina vave fakatuʼu pe anai ia he malama foʼou. Tou manatuʼi ia te faʼahi ʼae neʼe ui e Moisese ki te kau Iselaele ʼi muʼa ʼo tanatou ʼulu ki te Kele ʼo Te Fakapapau: “Ko Sehova tou ʼAtua ʼe ina fai anai ke lahi ia te ’u gaue fuli ʼo tou nima.” (Tetelonome 30:9) ʼI te hili ʼo Halamaketone, ʼe foaki anai e Sehova ia te kele kia natou ʼae neʼe kaugā gaue mo ia, ohage ko tana fakapapauʼi age. Pea hili ʼaia, ko tatatou gaue ʼe ko te fakaliliu ia te kele ko he palatiso.