’E Tonu Koa Ke Ke Fetogi Ia Tau Faʼahiga Manatu?
NEʼE fakatotonu e ʼihi Fakamoʼoni tupulaga ke natou olo ʼo sioʼi ia te ata. Koteʼuhi tokolahi ʼi te fale ako ʼe natou ui ʼe lelei ia te ata ʼaia. Pea ʼi te temi leva ʼae neʼe natou olo ai ki te fale senima, neʼe natou sisio ki te ʼu pāki ʼo te ʼu ata. Neʼe ʼasi ai he ʼu mahafu tau pea mo ni fafine ʼe mole fakaʼapaʼapa ʼonatou mutuʼi meʼa. Kotea anai ʼae ka fai e te ʼu Fakamoʼoni tupulaga? ʼE natou olo pe anai koa ʼo sioʼi ia te ata?
ʼE ha ʼi te aluʼaga ʼaia, ʼi te ʼaho fuli ʼe tou toʼo he ʼu tonu ʼe feala ke malohi peʼe ke vaivai ai ʼatatou felogoʼi ʼae mo Sehova. ʼI ʼihi temi, ʼe lagi ke fakatotonu ke ke fai ia he meʼa, kaʼe ʼe ke vakavakaʼi ia te aluʼaga ʼaia pea mo ke fetogi ia tau faʼahiga manatu. ʼE ke vale koa ʼi te fai ʼo he ʼu tonu, peʼe ke fai koa te meʼa ʼae ʼe lelei?
Moka ʼe Mole Tonu Ke Ke Fetogi Ia Tau Faʼahiga Manatu
ʼE lahi ia tatatou ʼofa ʼae kia Sehova, koia neʼe tou foaki ai totatou maʼuli kia te ia pea mo tou papitema. Neʼe tou fakapapau ke tou nonofo agatonu kia te ia, pea ʼe tou fia fakahoko ia te fakapapau ʼaia. Kaʼe ʼe faiga malohi ia totatou fili, ia Satana te Tevolo, ke ina maumauʼi ia tatatou nofo agatonu. (Apokalipisi 12:17) Neʼe tou toʼo ia te tonu ʼae ke tou tauhi pea mo fakalogo kia Sehova. Kaʼe kapau ʼe tou fetogi ia tatatou faʼahiga manatu, ʼe feala ke tou mamate ai.
Kua hili nei ki ai taʼu ʼe 2 600 tupu, neʼe fai e te Hau ʼo Papilone ko Nepukatenesale ia he toe fakatata ʼaulo. Pea neʼe ina fakatotonu ki te hahaʼi fuli ke natou atolasio ki ai. Ko he tahi pe ʼae neʼe fakafisi ki te fakatotonu ʼaia, ʼe li anai ki te gutuʼumu kakaha. Kaʼe ko te toko tolu tupulaga ʼae neʼe atolasio pea mo manavasiʼi kia Sehova, ia Satalake, mo Mesake, mo Apeteneko, neʼe natou fakafisi ki ai. Koia neʼe li ai natou e te hau ki te gutuʼumu kakaha, koteʼuhi neʼe natou taliʼia age hanatou mamate ʼi hanatou talagataʼa ki te ʼAtua. Kaʼe neʼe fakahoko ai leva e Sehova ia he milakulo ke haofaki ai natou.—Taniela 3:1-27.
Ki muli age, neʼe iloʼi e te polofeta ko Taniela kapau ʼe sisio age niʼihi ki tana faikole ki te ʼAtua, ʼe li anai ia ki te luo ʼo te ʼu laione pea ʼe hoko anai ki ai he mate fakamataku. Kaʼe neʼe haga faikole aipe tuʼa tolu ʼi te ʼaho. Neʼe mole ina fetogi ia tana tonu ʼae ke atolasio ki te ʼAtua moʼoni. Pea neʼe haofaki ai ia ia e Sehova “mai te malohi o te u laione.”—Taniela 6:1-27.
Ia ʼaho nei, ʼe toe agatonu ia te ʼu kaugana ʼa te ʼAtua ki tanatou fakapapau ʼae neʼe natou fai kia Sehova ʼi te temi ʼae neʼe natou foaki ai tonatou maʼuli kia te ia. ʼI Afelika, ko te ʼu Fakamoʼoni tupuluga, tagata mo fafine, neʼe mole natou fakaʼapaʼapa ki te fuka ʼi te toʼotoʼoga neʼe fai ʼi te fale ako. Pea neʼe fakamatukuʼi natou ʼe fakamavae anai natou ʼi te fale ako. ʼE mole faʼa fualoa ki ai, neʼe haʼu ia te minisi ʼo te ako ʼo palalau ki te ʼu Fakamoʼoni tupulaga ʼaia. Neʼe mole natou matataku, kaʼe neʼe natou fakamahino ʼaki he aga fakaʼapaʼapa ia tanatou mole kau ki te toʼotoʼoga. Talu mai ai mo te mole kei hoko ʼo te aluʼaga ʼaia. Koia neʼe feala ai hanatou olo ʼo ako kaʼe mole fakakinauʼi natou ke natou talagataʼa kia Sehova.
Neʼe toe ʼahiʼahiʼi mo Joseph ʼi te temi ʼae neʼe mate fakapunamaʼuli ai ia tona ʼohoana. Neʼe fakaʼapaʼapa te famili ʼo Joseph ki ʼana fakatuʼutuʼu ʼo ʼuhiga mo te ʼavaifo. Kaʼe ko te famili ʼo tona ʼohoana neʼe mole natou ʼi te moʼoni, pea neʼe natou fia fakahoko ia he ʼu toʼotoʼoga ʼe mole leleiʼia e te ʼAtua. ʼE ui fenei e Joseph: “Neʼe mole au fia fakafisi ki taku tui, koia ʼae neʼe natou faigaʼi ai ke natou fakaneke ʼaku tamaliki, kaʼe neʼe natou nonofo agatonu aipe. Neʼe toe faigaʼi foki e ʼoku famili ke fai he ala ʼi toku ʼapi ohage pe ko tona fai mahani e te hahaʼi. Kaʼe neʼe au ui age kapau neʼe natou faiga malohi ke fai he ala, pea ʼe mole fai anai ʼi toku ʼapi. Neʼe natou iloʼi ai ʼe mole alutahi anai ia tanatou faʼahiga ala mate mo taku tui ʼo toe feia mo te tui ʼo toku ʼohoana, koia hili he ʼu felogoʼi, neʼe natou olo ai ʼo fai ʼi he tahi age koga meʼa.
“Lolotoga te temi faigataʼa ʼo tamatou putu, neʼe au kole mamahi kia Sehova ke tokoni mai ki toku kiʼi famili ke mole matou talagataʼa ki ʼana lao. Neʼe fagono mai ki ʼaku faikole pea neʼe tokoni mai ke matou nonofo agatonu aipe logo la tomatou fakaneke.” Koia neʼe mole he temi neʼe manatu ai ia Joseph mo tana fanau ke natou fetogi ia tanatou fakatotonu ʼae ke natou fakalogo kia Sehova.
Moka ʼe Lagi Feala Ke Ke Fetogi Ia Tau Faʼahiga Manatu
ʼI te taʼu 32, neʼe kole e te fafine neʼe mole ko he Iselaele kia Sesu, ke ina kapu ia te temonio ʼae neʼe ulu sino ʼi tana taʼahine. Logo la ia tana kole liuliuga age ia te faʼahi ʼaia, kaʼe neʼe mole tali age Sesu ki ai. Neʼe ina fakamahino fenei ki ʼana tisipulo: “Nee fekaui mai au ki te u ovi hehe o te fale o Iselaele.” Kaʼe neʼe hoko atu aipe e te fafine ia tana kole, koia neʼe ui fenei ai e Sesu kia ia: “E mole lelei ke too te pane a te u fanau, o laku ki ni uhii kuli.” Pea neʼe fakaha e te fafine ia tana tui ʼo ina tali fenei: “lo, Aliki, kae e kai e te u uhii kuli te u eveeve ae e maluku mai te laupapa o onatou pule.” Neʼe fetogi ai e Sesu ia tana faʼahiga manatu ʼo ina kapu ia te temonio ʼae neʼe ulu sino ʼi tana taʼahine.—Mateo 15:21-28.
Moka ko he faʼahi neʼe feala, neʼe lotolelei ia Sesu ke ina fetogi ia tana faʼahiga manatu, ʼo ina faʼifaʼitakiʼi ai ia Sehova. Ohage la, ʼi te talagataʼa ʼa te kau Iselaele kia Sehova ʼaki tanatou atolasio ki te ʼuhiʼi pipi ʼaulo, neʼe ina fakatotonu ke ina pulihi natou. Kaʼe ʼi te kole mamahi ʼae ʼa Moisese ke mole ina matehi natou, neʼe lotolelei ia Sehova ke ina fetogi ia tana faʼahiga manatu.—Ekesote 32:7-14.
Ohage ko Sehova pea mo Sesu, neʼe lotolelei mo Paulo ke ina fetogi ia tana faʼahiga manatu. ʼI tana ʼuluaki folau fakamisionea, neʼe liakī ia ia e Maleko. Ko te tupuʼaga la ʼaia ʼo te mole toe fia ave e Paulo ia Maleko ʼi he tahi age ʼu folau. Kaʼe ki muli age, neʼe lagi sio ia Paulo ki te kua fotufotuʼa ʼa Maleko pea neʼe feala ke ina fakaʼaogaʼi ia ia. Koia neʼe ui fenei ai e Paulo kia Timoteo: “Too ia Maleko o hau mo koe, koteuhi e aoga ia kia au i te gaue [peʼe ʼi te minisitelio].”—2 Timoteo 4:11.
Kotea te ʼu ako ʼe feala ke tou taʼofi mai te ʼu aluʼaga fuli ʼaia? Logo la ʼe haohaoa ia Sehova, kaʼe ʼe lotolelei ke ina fetogi ia tana faʼahiga manatu koteʼuhi ʼe manavaʼofa, mo kataki fualoa pea mo ʼofa. Kaʼe ko tatou, ʼe mole tou haohaoa pea ʼe mole lelei tuʼumaʼu tatatou faʼahiga sio. Koia ʼe lahi age te ʼu tupuʼaga ʼae ke tou fetogi ai tatatou faʼahiga manatu ʼi ʼihi temi. Ohage la, ʼe feala ke tou fetogi ia tatatou faʼahiga manatu ʼo ʼuhiga mo ʼihi, mo kapau ʼe tou mahino ki tonatou ʼu aluʼaga.
ʼI ʼihi temi, ʼe lagi ʼaoga ke tou fetogi ia tatatou faʼahiga manatu ʼo ʼuhiga mo te ʼu fakatuʼutuʼu fakateokalatike. ʼE lagi tou ako ia te Tohi-Tapu pea mo tou olo ki te ʼu fono, kaʼe ʼe tou fakatuatuai ʼi te papitema. Peʼe tou tuʼania ʼi te toʼo ʼo te selevisi pionie, kaʼe ʼe lagi tou fealagia. Pea ʼe lagi mole fia liliu he tehina ko he faifekau fakaminisitelio peʼe ko he tagata ʼafeā ʼi te kokelekasio. (1 Timoteo 3:1) Neʼe kua ke manatu feia koa? ʼE feala koa ke ke fetogi ia tau faʼahiga manatu? ʼE fakaafe koe e Sehova ke ke maʼu ia te ʼu pilivilesio ʼaia pea ke ke tauhi fakafiafia kia te ia pea mo ʼihi atu.
Ko Ella ʼe nofo ʼi te Petele ʼi Afelika, ʼe ina ui fenei: “ʼI taku hu ki te Petele, neʼe mole au iloʼi pe ʼe au nofo fualoa anai. Neʼe au fia tauhi kia Sehova ʼi toku maʼuli katoa, kaʼe neʼe au toe ʼofa foki ki toku famili. ʼI te kamata, neʼe au manatuʼi tuʼumaʼu toku famili. Kaʼe neʼe fakalotomalohiʼi au e te tuagaʼane ʼae ʼe ma kogafale tahi, ʼo au fakatotonu ai ke au nofo. Hili taʼu ʼe hogofulu ʼi te Petele, neʼe au fia hoko atu ia taku tauhi ʼae ki ʼoku tehina mo tuaʼagane, ʼo au haga gaue ʼi te Petele.”
Moka ʼe Tonu Ke Ke Fetogi Ia Tau Faʼahiga Manatu
ʼE tonu ʼi ʼihi temi ke tou fetogi ia tatatou faʼahiga manatu. Ohage la, neʼe maheka ia Kaino ki tona tehina pea neʼe “ita.” Neʼe sio ia te ʼAtua ki te ʼamanaki fai ʼae e Kaino ia he meʼa ʼe kovi, pea neʼe ina fakatokaga ki ai ke ina lolomi ia tona ita. Neʼe ui e te ʼAtua ‘neʼe moe ia te agahala ʼi tona muʼa matapa.’ Kaʼe neʼe mole fetogi e Kaino ia tana faʼahiga manatu, ʼo ina meʼa noaʼi ia te fakatokaga ʼa te ʼAtua. Koia neʼe matehi ai e Kaino ia tona tehina.—Senesi 4:2-8.
ʼE toe feala foki ke tou taʼofi he ʼu ako mai te faʼifaʼitaki ʼa te Hau ko Osiasi. ʼI te kamata, neʼe fakalogo pea neʼe ina maʼu ni felogoʼi lelei mo Sehova. Kaʼe meʼa fakaʼofaʼofa foki he neʼe liliu leva ia ʼo fialahi. Neʼe hu ki te fale tapu ke ina momoli te iseso, kaʼe neʼe gata pe ki te kau pelepitelo neʼe tonu ke natou fakahoko ia te faʼahi ʼaia. Neʼe fakatokaga age ki ai e te kau pelepitelo ke ʼaua tana fai ia te faʼahi ʼaia, kaʼe neʼe mole ina fetogi ia tana faʼahiga manatu. Neʼe “itaita” leva ia Osiasi pea neʼe ina meʼa noaʼi ia tanatou fakatokaga. Koia neʼe tauteaʼi ai e Sehova ia ia ʼaki te kilia.—2 Koloniko 26:3-5, 16-20.
Ko Joachim, ʼe ko te faʼifaʼitaki ʼo totatou temi, neʼe ʼaoga ke ina fetogi ia tana faʼahiga manatu. Neʼe papitema ʼi te taʼu 1955, kaʼe neʼe fakamavae ʼi te kokelekasio ʼi te taʼu 1978. Hili ki ai taʼu ʼe 20 tupu, neʼe ina fetogi ia tana faʼahiga manatu, mo fakahemala pea mo toe liliu mai ki te moʼoni. Neʼe fehuʼi age e te tagata ʼafeā pe koʼe neʼe talitali fualoa feia, pea neʼe tali fenei age e Joachim: “Neʼe au ita pea mo fialahi. Pea ʼe au fakahemala ʼi taku talitali fualoa. Kaʼe lolotoga te temi ʼaia, neʼe kua au mahino ko te kau Fakamoʼoni ʼa Sehova ʼae ʼe natou akoʼi ia te moʼoni.”
Mo tatou foki, ʼi ʼihi temi, ʼe lagi ʼaoga ke tou fetogi ʼatatou tonu pea mo tatatou aga. Kapau ʼe tou lotolelei ʼo fai ia te faʼahi ʼaia, pea ʼe leleiʼia anai tatou e Sehova.—Pesalemo 34:9.