Neʼe Ina ‘Iloʼi Te Ala’
KO GUY HOLLIS PIERCE, neʼe kau ki te Kolesi Pule ʼo te kau Fakamoʼoni ʼa Sehova. Neʼe mate agatonu ʼi te Feliatolu ʼaho 18 ʼo Malesio 2014 ʼi tona taʼu 79. ʼE ko he tehina ʼo Kilisito, koia kua fakatuʼuake ia ia pea mo ina mau ia tona fakapale ʼi selo.—Hepeleo 2:10-12; 1 Petelo 3:18, MN.
Neʼe tupu ia Guy Pierce ʼi Auburn, ʼi Californie, ʼi Amelika, ʼi te ʼaho 6 ʼo Novepeli 1934, pea neʼe papitema ʼi te taʼu 1955. Neʼe ʼohoana ʼi te taʼu 1977 mo te fafine ʼofaina ʼae ko Penny, pea neʼe nā maʼu tonā kiʼi famili. Neʼe toe hage pe foki ko he tamai maʼa te tokolahi. ʼI te taʼu 1982 neʼe nā kamata pionie fakatahi mo Penny. ʼI te kamata ʼo te 1986, neʼe gaue taupau fakasiliko ʼi Amelika lolotoga taʼu ʼe 11.
ʼI te taʼu 1997, neʼe kamata kau ai leva ia Guy mo Penny Pierce ki te foʼi famili ʼo te Petele ʼo Amelika. Neʼe gaue ia te Tehina ko Pierce ʼi te Selevisi Gaue, pea ʼi te taʼu 1998 neʼe fakanofo ia ia ke tokoni ki te Komite Ki Te Hahaʼi Gaue ʼo te Kolesi Pule. ʼI te ʼaho 2 ʼo Oketopeli 1999, ʼi te fono ʼae ʼe fai ʼi te taʼu fuli ʼi Amelika, neʼe tala ai kua kau ia Guy Pierce ki te Kolesi Pule. ʼI te ʼu taʼu pe ʼaeni kua hili, neʼe gaue ʼi te Komite Ki Te Hahaʼi Gaue, mo te Komite ʼo Te Faitohi, mo te Komite Ta Tohi, pea mo te Komite ʼa Te Kau Kootinatea.
Neʼe mata malimali ia te Tehina ko Pierce pea mo gaohi meʼa fakakata. Ko te hahaʼi mai te ʼu fenua mo agaʼi fenua kehekehe neʼe natou faʼifaʼitaliha mo ia. Kaʼe neʼe fia fakaovi moʼoni te hahaʼi ki ai, ʼuhi ko tona ʼofa, tana agavavai, tana fakaʼapaʼapa ki te ʼu lao mo te ʼu pelesepeto ʼa te ʼAtua, pea mo tana tui katoa ki te ʼAtua. Neʼe tau ui e Guy Pierce ohage pe ko te hopo ake ʼa te laʼa ʼi te ʼaho fuli, ʼo toe feia aipe ʼe tou tui papau ʼe hoko moʼoni anai te ʼu fakapapau ʼa Sehova pea neʼe ina loto ke iloʼi e te malamanei katoa.
Neʼe gaue kinakina ia te tehina ko Pierce maʼa Sehova, ʼo kamata kei hegihegi pea ʼo kaku ki te poʼuli. Neʼe folau ʼi te malamanei katoa moʼo fakalotomalohiʼi ʼona tehina mo tuagaʼane Kilisitiano. Pea logola tona maʼumaʼua, kaʼe neʼe ina maʼu tuʼumaʼu pe he temi moʼo tokoni ki ʼihi. Tatau aipe pe kua hili he ʼu taʼu ki ai, kaʼe kei manatuʼi e ʼona tehina mo tuagaʼane ia tana tali kaiga, mo tana agalelei pea mo ʼana faitokoni Fakatohi-tapu.
Ko totatou tehina mo kaumeʼa ʼaia, ʼe manatuʼi tuʼumaʼu anai e tona ʼohoana, mo ʼana tamaliki e toko ono, mo ʼona mokopuna, mo ʼona mokoliha pea mo ʼana fanau fakalaumalie. Neʼe fai tona akonaki ʼavaifo ʼe Mark Sanderson ʼae ʼe kau ki te Kolesi Pule ʼi te Petele ʼo Brooklyn, ʼi te Moeaki ʼaho 22 ʼo Malesio 2014. Neʼe palalau ki te ʼamanaki ʼa te tehina ko Pierce ʼae ke alu ʼo maʼuli ʼi selo pea mo lau ia te ʼu palalau ʼaeni ʼa Sesu: “E lahi te u nofoaga i te fale o taku Tamai. . . . Ka e au alu anai, pea ke au teuteui anai he nofoaga kia koutou, e au toe hau anai, pea e au too anai koutou mo au, o uhi ko te kogamea e au nofo ai e kotou nofo ai anai. E kotou iloi te kogamea e au alu ki ai, pea e kotou iloi mo tona ala.”—Soane 14:2-4.
ʼE lahi anai ia tatatou manatuʼi ia te Tehina ko Pierce. Kaʼe ʼe tou fiafia koteʼuhi neʼe ina iloʼi ia te ala ʼo tona nofoʼaga heʼe gata.