ʼE tou lau fenei ia Selemia 31:15: “E folafola [ia Sehova], o ui: E logo ki ni tagi i Lama, ki ni tagi laulau, ki ni loimata kona; e tagi ia Lasele ki ana [“tama,” MN]; pea e mole ina tali ke fakapelepelei ia ia uhi ko ana fanau, koteuhi kua natou pupuli.”

Neʼe ʼuluaki mate ia Lasele ʼi ʼana tama ʼe toko lua. Koia ʼae ʼe hage mai ʼe mole totonu ia te ʼu palalau ʼa Selemia ʼae neʼe tohi hili taʼu ʼe 1 000 ki te mate ʼo Lasele.

Ko te ʼuluaki tama ʼa Lasele neʼe ko Sosefo. (Senesi 30:22-24) Ki muli age, neʼe mate ia Lasele ʼi tana fanauʼi ia tana lua tama ʼae ko Pesamino. Koia ʼe feala ke tou feʼekeʼaki ai pe koʼe ʼe ui ia Selemia 31:15, neʼe tagi ia Lasele koteʼuhi kua “pupuli” ʼana tama?

Neʼe maʼu e Sosefo ʼona foha ʼe toko lua, ia Manase pea mo Efalaimi. (Senesi 41:50-52; 48:13-20) ʼAki te temi, neʼe liliu ia te telepi ʼo Efalaimi ʼo malohi age ʼi te ʼu telepi fuli ʼo Iselaele ia te puleʼaga ʼo te potu noleto. Pea neʼe ina fakafofoga ai ia te ʼu telepi fuli ʼe hogofulu ʼo te puleʼaga ʼo te potu noleto. Ko te telepi ʼae neʼe hifo mai te lua tama ʼa Lasele, ia Pesamino, neʼe kau leva ia ki te puleʼaga ʼo te potu saute ʼo Suta. Koia ʼe feala ai ke tou ui neʼe fakata e Lasele ia te ʼu faʼe fuli ʼo Iseleale, ia te puleʼaga ʼo te potu noleto pea mo ʼae ʼo te potu saute.

ʼI te temi ʼae neʼe tohi ai ia te tohi ʼa Selemia, neʼe kua maʼu e te kau Asilia ia Iselaele, ia te puleʼaga ʼo te potu noleto. Pea neʼe ave popula ai ia te tokolahi. Kaʼe ko ʼihi ʼi te hologa ʼo Efalaimi, neʼe lagi feholaki ki Suta. ʼI te taʼu 607 ʼi muʼa ʼo te temi ʼo Kilisito, neʼe maʼu e te kau Papilone ia te ʼu telepi ʼe lua ʼo Suta, ia te puleʼaga ʼo te potu saute. Pea neʼe natou toʼo ia he kau popula. Tokolahi ia natou ʼaia neʼe ave ki te kolo ʼo Lama, ia teitei kilometa ʼe valu ʼi te potu noleto ʼo Selusalemi. (Selemia 40:1) Neʼe lagi matehi ʼihi ʼi te telituale ʼo Pesamino ʼae neʼe tanu ai ia Lasele. (1 Samuele 10:2) Koia ʼe feala ke fakaʼuhiga ia te tagi ʼa Lasele ki te lotomamahi ʼae neʼe tupu mai te mate ʼa te hahaʼi ʼo Pesamino peʼe ʼo natou ʼae neʼe matehi ʼi Lama. ʼE toe feala foki ke fakaʼuhiga ia te ʼu palalau ʼa Selemia, ki te fetagihi ʼa te ʼu faʼe fuli ʼo Iselaele ki te mate peʼe ki te ave popula ʼo te hahaʼi ʼa te ʼAtua.

Tatau aipe pe kotea te fakaʼuhiga ʼo te ʼu palalau ʼa Selemia ʼo ʼuhiga mo te tagi ʼa Lasele ki ʼana tama, kaʼe ʼe ko he lea fakapolofeta. ʼE fakaʼuhiga ʼana palalau ki te aluʼaga ʼae neʼe hoko ʼi ni ʼu taʼu ʼe lauʼi teau ki muli age, ʼi te temi ʼae neʼe kei veliveli ai ia Sesu. Neʼe fakatotonu e te Hau ko Helote ke tamateʼi te tamaliki tagata fuli neʼe hoki tupu ʼo kaku ki te taʼu lua, ʼi Petelehemi, ʼae neʼe tuʼu ʼi te potu saute ʼo Selusalemi. Fakafuafua age muʼa ia te kalaga mamahi ʼa te ʼu faʼe ʼaia ʼuhi ko te mate mo te ‘kua pupuli’ ʼo ʼanatou tama. Neʼe hage pe neʼe feala ke logoʼi ia te ʼu kalaga ʼaia ki Lama, ʼi te potu noleto ʼo Selusalemi.—Mateo 2:16-18.

Koia, ʼe fakaʼaogaʼi ia te tagi ʼa Lasele ki ʼana tama, ʼi te temi ʼo Selemia pea mo ʼae ʼo Sesu, moʼo fakamatalatala ia te lotomamahi ʼa te ʼu faʼe Sutea ki te mamate ʼo ʼanatou fanau. Kaʼe ʼe mahino papau ia, ko natou ʼae kua mamate pea mo olo ki “te fenua o te fili,” ʼe natou toe liliu mai anai mai ai ʼi te temi ʼae ka fakatuʼuake ai ia te kau mate.—Selemia 31:16; 1 Kolinito 15:26.