Ko He Meʼa ʼOfa Neʼe Mole ʼAmanaki Ki Ai Ia Saponia
NEʼE fai ia te fono makehe ʼi Nagoya, ʼi Saponia, ʼi te ʼaho 28 ʼo Apelili 2013. Pea neʼe fakaha ai e te tehina ko Anthony Morris ʼo te Kolesi Pule ia te logo fakafiafia ʼaeni: koʼeni te tohi foʼou ʼi te lea Fakasaponia ko tona kupu tafitō Te Tohi-Tapu—Te Evaselio ʼa Mateo. Neʼe ko te toko 210 000 tupu ʼae neʼe kau ʼi te fono ʼaia ʼo feia mo natou ʼae neʼe natou muliʼi fakahagatonu ʼaki te ʼu televisio. ʼI te ʼosi logo ʼa te nofoʼaki ki te logo ʼaia, neʼe natou fakaha tanatou fiafia ʼaki tanatou pasipasi fualoa.
Ko te tohi ʼaia ʼo Te Evaselio ʼa Mateo, neʼe toe ta mai ʼi te Traduction du monde nouveau. Kaʼe neʼe makehe ia te tohi ʼaia ʼae ʼe pasina 128. Neʼe fakamahino e te Tehina ko Morris neʼe ta ia te tohi ʼaia moʼo tokoni ki te hahaʼi ʼo Saponia. He koʼe ʼe kehe ia te tohi ʼaia? He koʼe neʼe ʼaoga ia te tohi ʼaia? Pea neʼe kotea ia te faʼahiga manatu ʼa te hahaʼi?
HE KOʼE ʼE KEHE IA TE TOHI ʼAIA?
Neʼe punamaʼuli te tokolahi ki te agaaga ʼo te tohi ʼo Mateo. ʼE feala ki te ʼu mataʼi tohi Fakasaponia ke fakatuʼu peʼe fakatakoto. Pea ʼe lahi te ʼu tohi mo te ʼu nusipepa ʼae ʼe fakatakoto ai ia te ʼu mataʼi tohi ʼo kau ki ai mo ʼatatou tohi. Kaʼe ʼi te tohi ʼaeni, ʼe fakatuʼu ai te ʼu mataʼi tohi, ohage pe ko ʼihi atu ʼu nusipepa pea mo te ʼu tohi Fakasaponia. Pea ki te tokolahi ʼo te kau Saponia, ʼe faigafua age ia tanatou lau ia te tohi ʼaia ʼuhi ko tona faʼahiga tohi. Pea tahi, ʼe mole kei ʼi ai ni kupu tafitō ʼi ʼoluga ʼo te ʼu pasina, kaʼe ko te ʼu kupu taki ʼi te ʼu vaega moʼo tokoni ki te kau lautohi ke natou mahino gafua ai ki te ʼu puani tafitō.
Neʼe kamata lau atu aipe ia te tohi ʼo Mateo e te ʼu tehina mo tuagaʼane ʼi Saponia. Pea neʼe ui fenei e te tuagaʼane ʼe taʼu 80: “Neʼe kua tuʼa lahi ia taku lau ia te tohi ʼo Mateo ʼi muʼa atu, kaʼe neʼe hoki au mahino lelei age ki te Akonaki ʼi Te Moʼuga, ʼuhi ko ʼona kupu taki pea mo te tohi fakatuʼu ʼo ʼona mataʼi tohi.” Neʼe tohi fenei e te tuagaʼane ʼe kei finemui: “Neʼe au lau ia te tohi katoa ʼo Mateo ʼi te moʼi temi pe ʼe tahi. Kua au mahani ʼi te lau ʼo te ʼu mataʼi tohi ʼae ʼe fakatakoto, kaʼe ko te tokolahi ʼi te kau Saponia ʼe natou leleiʼia age moka tohi fakatuʼu ia te ʼu mataʼi tohi.”
NEʼE TA IA TE TOHI MAʼA TE KAU SAPONIA
He koʼe ʼe ʼaoga tafitō ia te tohi Fakatohi-tapu ʼaia ki te kau Saponia? Logo la ʼe tokosiʼi ia te kau Saponia ʼae ʼe mole natou iloʼi lelei ia te Tohi-Tapu, kaʼe ʼe natou lotolelei ke natou lau ia te tohi ʼo Mateo. Tokolahi ʼae neʼe heʼeki natou sisio ki he Tohi-Tapu, ʼi te temi nei kua natou maʼu ia te faigamalie ʼae ke natou puke nima he koga ʼo te Tohi-Tapu pea ke natou lau.
Kaʼe he koʼe koa neʼe ko te tohi ʼo Mateo ʼae neʼe filifili? Koteʼuhi tokolahi te kau Saponia moka natou logo ki te kupu “Tohi-Tapu,” ʼe natou manatuʼi ia Sesu Kilisito. Pea tahi, ʼe ko he fakamatala ʼo ʼuhiga mo te hologa mo te tupu ʼa Sesu, mo tana Akonaki ʼi Te Moʼuga pea mo tana lea fakapolofeta ki te ʼu ʼaho fakaʼosi. Pea ʼe leleiʼia e te kau Saponia ia te ʼu faʼahi fuli ʼaia.
ʼAki he faʼafai, neʼe kamata tufa e te kau faifakamafola ʼi Saponia ia te tohi foʼou ʼaia ʼi te ʼu ʼapi pea mo natou fai he ʼu ʼaʼahi. Neʼe tohi fenei e te tuagaʼane: “Kua au maʼu ʼi te temi nei ia he ʼu faigamalie ke au tufa ai ia te
Folafola ʼa te ʼAtua ki te hahaʼi ʼo toku telituale. Neʼe feala ke au tufa ia te tohi ʼo Mateo ʼi te hili hoʼata pe ʼae neʼe fai ai te fono makehe.”NEʼE KOTEA IA TE FAʼAHIGA MANATU ʼA TE HAHAʼI?
ʼE tufa feafeaʼi e te kau faifakamafola ia te tohi foʼou ʼaia? Tokolahi te kau Saponia ʼe natou iloʼi ia te ʼu kupusiga palalau ohage la ko “te matapa lau veliveli,” te ʼu “lopa kia mua o te u puaka” pea “aua naa kotou tuania te apogipogi.” (Mateo 6:34; 7:6, 13) Neʼe natou punamaʼuli ʼi tanatou iloʼi ʼae ʼe ko te ʼu palalau ʼaia neʼe fai e Sesu Kilisito. Pea ʼe ui fenei e te tokolahi moka natou sisio ki te ʼu kupusiga palalau ʼaia ʼi te tohi ʼo Mateo: “Neʼe au fakaʼamu tuʼumaʼu ke au lau ia te Tohi-Tapu tuʼa tahi pe.”
Neʼe toe liliu ia te kau faifakamafola ʼo ʼaʼahi ia natou ʼae neʼe natou tali te tohi ʼo Mateo. Pea neʼe tau ui age e ʼanatou ʼaʼahi, neʼe natou foimo lau atu aipe ʼihi vaega ʼo te tohi ʼo Mateo, pe neʼe ko te tohi katoa. Neʼe ui fenei e te tagata kua taʼu 60 tupu ki he kaugā fagona: “ʼE au lau liuliuga ia te tohi ʼo Mateo pea mo au lotofimalie ai. Fakalelei age siʼi ʼou loto, kaʼe ke ke akoʼi lahi mai ia te Tohi-Tapu.”
ʼE toe tufa foki ia te tohi ʼo Mateo ʼi te ʼu koga meʼa ʼae ʼe maʼu ai te hahaʼi. Lolotoga ia tana faifakamafola, neʼe foaki e te tuagaʼane ia tona tuʼasila ʼae ʼi te Neti ki he fafine neʼe ina tali ia te tohi. Hili ki ai te hola pe ʼe tahi, neʼe faitohi mai ia te fafine ʼaia ki te tuagaʼane. Neʼe ina fakaha age neʼe ina lau fakakoga ia te tohi, kaʼe neʼe ina fia iloʼi ʼihi atu ʼu manatu ʼo ʼuhiga mo te tohi. Hili ki ai te vahaʼa katoa, neʼe kamata ai te ako Tohi-Tapu ʼa te fafine pea ʼo mole faʼa fualoa ki ai, neʼe kau ki te ʼu fono.
Neʼe ko tohi ʼo Mateo ʼe tahi miliona ono geau afe tupu ʼae neʼe tufa ki te ʼu kokelekasio ʼi Saponia. Pea ʼi te mahina fuli, ko te ʼu lauʼi hogofulu afe tohi ʼae ʼe tufa e te kau Fakamoʼoni ki te hahaʼi. ʼE ha ʼi te ʼu ʼuluaki palalau ʼo te tohi ʼaia ia te ʼu manatu ʼa natou ʼae neʼe natou ta ia te tohi. Koteʼuhi ʼe natou ui fenei: “ʼE matou fakaʼamu fakamalotoloto ke loloto age ia takotou fia iloʼi ia te Tohi-Tapu ʼaki takotou lau ia te tohi ʼaeni.”