Tou Faʼifaʼitakiʼi Ia Te Lototoʼa Mo Te Fakasiosio Tonu ʼa Sesu
“E kotou ofa kia ia, kae e heeki kotou sisio kia ia. E kotou tui kia ia kae e heeki kotou sisio kia ia i te temi nei.” —1 PETELO 1:8.
1, 2. (1) ʼE tou lava maʼu feafeaʼi ia te maʼuli heʼe gata? (2) Kotea ʼae ʼe feala ke tokoni mai ke tou haga tokakaga tafitō ki tatatou folau?
MOKA tou liliu ko he Kilisitiano, ʼe hage pe ko hatatou folau. Kapau ʼe tou nofo agatonu ki te ʼAtua, ʼe iku lelei anai ia tatatou folau pea ʼe feala anai ke tou maʼuʼuli ʼo heʼe gata. Neʼe ui fenei e Sesu: “Ko ae e kataki fualoa anai o kaku ki te fakaosi, e haofaki anai.” (Mateo 24:13) ʼEi, moʼo fakaʼosi ia tatatou folau, ʼe tonu ke tou nofo agatonu ki te ʼAtua ʼo “kaku ki te fakaosi,” pe ʼe ki te gataʼaga ʼo totatou maʼuli peʼe ki te fakaʼosi ʼo te malama agakovi ʼaeni. Kaʼe ʼe tonu ke tou tokakaga naʼa fakaleluʼi tatou e te malama ʼaeni. (1 Soane 2:15-17) ʼE feafeaʼi hatatou haga tokakaga tafitō ki tatatou folau?
2 Neʼe tuku mai e Sesu ia he faʼifaʼitaki lelei maʼa tatou. Moka tou ako pe kotea ʼae ʼe ui ʼi te Tohi-Tapu ʼo ʼuhiga mo te folau ʼa Sesu, peʼe ko tona faʼahiga maʼuli, ʼe feala ai hatatou iloʼi ia tona ʼuluagaaga. Pea ʼe tou ʼoʼofa mo tui anai kia te ia. (Lau ia 1 Petelo 1:8, 9.) Neʼe ui e te apositolo ko Petelo, neʼe tuku mai e Sesu ia he faʼifaʼitaki ke tou mulimuli lelei ki ai. (1 Petelo 2:21) Pea kapau ʼe tou faʼifaʼitakiʼi lelei ia Sesu, ʼe feala anai hatatou faʼa kataki ki te fakaʼosi. * (Vakaʼi te kiʼi nota.) ʼI te ʼuluaki alatike ako, neʼe tou ako pe feafeaʼi hatatou lava faʼifaʼitakiʼi te agavaivai mo te agalelei ʼa Sesu. ʼI te alatike ʼaeni, ʼe tou ako anai pe feafeaʼi hatatou faʼifaʼitakiʼi ia tana lototoʼa pea mo tana fakasiosio tonu.
ʼE LOTOTOA IA SESU
3. Kotea ia te lototoʼa, pea ʼe feafeaʼi ia tona maʼu?
3 ʼE feala ki te lototoʼa ke ina fakamalohiʼi tatou pea mo tokoni mai ke tou katakiʼi te ʼu aluʼaga faigataʼa. ʼE toe feala foki ke tokoni mai ke tou lagolago ki te meʼa ʼae ʼe totonu. ʼE lava tokoni mai ke ʼaua tatatou lotohoha fau pea ke tou nofo agatonu ki te ʼAtua ʼi te ʼu ʼahiʼahi. Pea ʼe ʼi ai te pikipikiga ʼo te lototoʼa mo te manavasiʼi, mo te ʼamanaki pea mo te ʼofa. ʼO feafeaʼi? Moka tou manavasiʼi naʼa tou fakalotomamahiʼi ia te ʼAtua, ʼe tou maʼu ai ia te lototoʼa moʼo tauʼi ia te mataku ki te tagata. (1 Samuele 11:7; Taaga Lea 29:25) Ko tatatou ʼamanaki ʼae kia Sehova, ʼe tokoni mai ke tou tokakaga tafitō ki totatou ka haʼu kaʼe mole ki ʼotatou fihifihia. (Pesalemo 27:14) Pea ʼe uga tatou e te ʼofa moʼoni ke tou lototoʼa maʼia moka fakatagaʼi tatou. (Soane 15:13) ʼE tou lototoʼa ʼaki tatatou falala ki te ʼAtua pea mo tatatou faʼifaʼitakiʼi ia tona ʼAlo.—Pesalemo 28:7.
4. Neʼe fakaha feafeaʼi e Sesu ia tana lototoʼa ʼi te fale tapu? (Vakaʼi te ʼuluaki pāki.)
4 ʼI te taʼu 12 ʼa Sesu, neʼe ina fakaha ia tana lototoʼa ʼi tana nofo ʼi te fale tapu, “i lotomalie o te kau toketa o te lao.” (Lau ia Luka 2:41-47.) Neʼe iloʼi lelei e te kau faiako lotu ʼaia ia te Lao ʼa Moisese, pea neʼe natou toe iloʼi mo te ʼu talatisio Fakasutea. ʼAki ia te ʼu talatisio ʼaia, neʼe faigataʼa ia te fakalogo ki te Lao. Logo la tanatou popoto ʼaia, kaʼe neʼe mole mataku ia Sesu. Neʼe haga ‘faifehuʼi aipe kia natou.ʼ ʼE moʼoni, neʼe mole fai leva e Sesu ia te ʼu faʼahiga fehuʼi ʼae neʼe fai mahani e he kiʼi tama. Kaʼe tou fakafuafua age muʼa ia te heheka ʼa te kau faiako ʼo fakalogo pea mo fakakaukauʼi te ʼu fehuʼi maʼuhiga ʼae neʼe fai e Sesu. Pea kapau neʼe natou faigaʼi ke natou kakāʼi ia Sesu ʼaki ʼanatou fehuʼi, neʼe to noa ʼanatou faiga ʼaia. Ko natou fuli ʼae neʼe fagono kia te ia, ʼo kau ai mo te kau faiako, neʼe natou punamaʼuli ki “tona atamai pea mo ana tali.” ʼEi, ʼaki he lototoʼa neʼe lagolago ia Sesu ki te moʼoni ʼae ʼe tuʼu ʼi te Folafola ʼa te ʼAtua.
5. Neʼe fakaha feafeaʼi e Sesu ia tana lototoʼa ʼi tana minisitelio?
5 Lolotoga tana minisitelio, neʼe fakaha e Sesu ia tana lototoʼa ʼi he ʼu aluʼaga kehekehe. Ohage la, neʼe ina fakaha ki te hahaʼi ia tonatou fakahehe e te kau takitaki lotu ʼaki ʼanatou akonaki loi. (Mateo 23:13-36) Tahi ʼae meʼa, neʼe mole fakagafua e Sesu ke fakahalaʼi ia ia e te malama. (Soane 16:33) Kaʼe neʼe faifakamafola aipe logo la te fakafeagai. (Soane 5:15-18; 7:14) Pea ʼaki he lototoʼa, neʼe ina fakamaʼa tuʼa lua ia te fale tapu ʼo ina kapu ia natou ʼae neʼe natou ulihi ia te tauhi moʼoni.—Mateo 21:12, 13; Soane 2:14-17.
Neʼe tala e Sesu ʼaki he lototoʼa ki te telepinale lahi Sutea, ʼe ko ia ia Kilisito, te ʼAlo ʼo te ʼAtua
6. Neʼe fakaha feafeaʼi e Sesu ia tana lototoʼa ʼi te ʼaho fakaʼosi ʼo tona maʼuli ʼi te kele?
6 Tou vakaʼi age muʼa ia te lototoʼa ʼa Sesu ʼi te ʼaho fakaʼosi ʼo tona maʼuli ʼi te kele. Neʼe iloʼi e Sesu ia te aluʼaga ʼae ka hoko hili tona lavakiʼi e Sutasi. Koia, ʼi te Taumafa ʼo Te Pasikate, neʼe ui fenei e Sesu kia Sutasi: Soane 13:21-27) Pea ʼi te ʼomai ʼa te kau solia ko tona puke ʼi te ʼoloto ʼo Setesemani, neʼe ina fakaha ʼaki he lototoʼa pe ko ai ia ia. Tatau aipe pe neʼe tuʼutamakiʼia tona maʼuli, kaʼe neʼe ina puipui ʼana tisipulo, ʼo ina ui fenei ki te kau solia: “Koutou tuku natou aeni ke natou olo.” (Soane 18:1-8) Ki muli age, ʼi tona fakafehufehuʼi ʼi te telepinale lahi Sutea, neʼe lototoʼa ʼo ina fakaha ʼe ko ia ia Kilisito, te ʼAlo ʼo te ʼAtua. Loga la te kumi takuʼaki ʼa te pelepitelo lahi ke matehi ia ia, kaʼe neʼe mole mataku ia. (Maleko 14:60-65) Neʼe nofo agatonu ia Sesu ki te ʼAtua pea neʼe mate ʼi te pou fakamamahi. ʼI tana tukumanava fakaʼosi, neʼe kalaga fenei: “Ko te meʼa ʼaia kua hoko.”—Soane 19:28-30, MN.
“Ko te mea e ke fai, fai ia ke vave.” (TOU FAʼIFAʼITAKIʼI TE LOTOTOA ʼA SESU
7. Kau tupulaga, kotea ʼae ʼe kotou logoʼi ʼi takotou kau ki te kau Fakamoʼoni ʼa Sehova? Pea ʼe kotou lava fakaha feafeaʼi ʼe kotou lototoʼa?
7 ʼE tou lava faʼifaʼitakiʼi feafeaʼi ia te lototoʼa ʼa Sesu? ʼI te faleako. Kau tupulaga, ʼe kotou lototoʼa moka ʼe kotou fakaha ki ʼokotou kaugā ako pea mo ʼihi, ko koutou ko he kau Fakamoʼoni ʼa Sehova. Pea ʼe kotou fakaha ai, ʼe kotou fiameʼameʼa ʼi te fua ʼo te huafa ʼo Sehova, tatau aipe pe feala ai ke vaʼi koutou e ʼihi. (Lau ia Pesalemo 86:12.) ʼE lagi loto e ʼihi ke kotou tui ki te manatu ʼae ʼe haʼu te tagata mai te manu. Kaʼe ʼe feala hakotou falala, ʼe moʼoni ia te ʼu faʼahi ʼae ʼe talanoa ki ai te Tohi-Tapu ʼo ʼuhiga mo te fakatupu. Moʼo tali kia natou ʼae ʼe natou fia iloʼi ia “te uhiga o te amanaki lelei ae ia koutou,” ʼe feala hakotou fakaʼaogaʼi ia te kaupepa lahi Cinq questions à se poser sur lʼorigine de la vie. (1 Petelo 3:15) Pea ʼe kotou fiafia ai anai koteʼuhi ʼe kotou iloʼi neʼe kotou lagolago ki te ʼu moʼoni Fakatohi-tapu ʼaki he lototoʼa.
8. Kotea ia te ʼu tupuʼaga ʼae ʼo tatatou faifakamafola ʼaki he lototoʼa?
8 ʼI tatatou minisitelio. ʼI totatou ʼuhiga Kilisitiano moʼoni, ʼe ʼaoga ke tou haga “palalau mo he lototoa” ʼi te malohi ʼo Sehova. (Gaue 14:3) He koʼe ʼe feala ke tou faifakamafola ʼaki he lototoʼa? ʼUluaki, ʼe tou iloʼi ko te ʼu faʼahi ʼae ʼe tou fakamafola ʼe haʼu ia mai te Tohi-Tapu. ʼE ko te moʼoni. (Soane 17:17) Lua, ʼe tou ‘kaugā gaue mo te ʼAtua,ʼ pea neʼe ina foaki mai ia tona laumalie maʼoniʼoni moʼo tokoni kia tatou. (1 Kolinito 3:9; Gaue 4:31) Tolu, ʼe tou ʼofa ia Sehova pea mo te hahaʼi, koia ʼae ʼe tou faiga malohi ai ke tou tala ia te logo lelei ki te hahaʼi. (Mateo 22:37-39) ʼE tokoni mai te lototoʼa ke ʼaua naʼa tou fakagata ia tatatou faifakamafola. Kaʼe ʼe tou fakatotonu ke tou akoʼi te moʼoni kia natou ʼae kua ‘fakakiviʼiʼ peʼe kua kakāʼi e te kau takitaki lotu. (2 Kolinito 4:4) Pea ʼe tou hoko atu anai ia tatatou fakamafola ia te logo lelei, tatau aipe pe mole tali e ʼihi peʼe fakatagaʼi tatou.—1 Tesalonika 2:1, 2.
9. ʼE tou lava fakaha feafeaʼi ia tatatou lototoʼa moka tou tau mo he ʼu ʼahiʼahi?
9 Moka tou tau mo he ʼu ʼahiʼahi. Moka tou falala ki te ʼAtua, ʼe tou maʼu ai anai ia te tui pea mo te lototoʼa ʼae ʼe ʼaoga ke tou katakiʼi te ʼu faigataʼaʼia. Kapau, ʼe mate he tahi ʼe tou ʼofa mamahi ai, ʼe tou lotomamahi, kaʼe ʼe ʼi ai tatatou ʼamanaki. ʼE tou tui papau ʼe fakamalohiʼi anai tatou e “te Atua o te fakafimalie fuli.” (2 Kolinito 1:3, 4; 1 Tesalonika 4:13) ʼE feala ke tou lotomamahi, mo kapau ʼe tou mahaki peʼe tou lavea, kaʼe ʼe tou fakafisi ki te ʼu faitoʼo fuli ʼae ʼe mole leleiʼia e te ʼAtua. (Gaue 15:28, 29) Pea kapau ʼe tou lotomamahi, ʼe feala ke ‘fakalakahalaʼi tatou e totatou loto,ʼ kaʼe ʼe mole tou lotovaivai ai. ʼE tou falala kia Sehova, ʼae ʼe ovi kia “natou ʼae ʼe lavea ʼonatou loto.” * (Vakaʼi te kiʼi nota.)—1 Soane 3:19, 20; Pesalemo 34:18, MN.
ʼE FAKASIOSIO TONU IA SESU
10. Kotea ia te fakasiosio tonu, pea ʼe feafeaʼi ia te faʼahiga palalau pea mo te aga ʼa he Kilisitiano ʼae ʼe fakasiosio tonu?
10 Ko te fakasiosio tonu, ʼe ko te lava fakakehekeheʼi ʼo te meʼa ʼae ʼe lelei mai te meʼa ʼae ʼe kovi, pea mo te filifili ʼo te fai ʼo te meʼa ʼae ʼe lelei. (Hepeleo 5:14) Ko te Kilisitiano ʼae ʼe ina maʼu te fakasiosio tonu, ʼe ina toʼo he ʼu tonu ʼe malohi ai anai ʼana felogoʼi ʼae mo te ʼAtua. ʼE tokaga ia naʼa fakatupu lavea tana faʼahiga palalau ki ʼihi. Pea ʼe leleiʼia ia ia e te ʼAtua koteʼuhi ʼe ina filifili lelei ʼana palalau moʼo tokoni ki ʼihi. (Taaga Lea 11:12, 13) ʼE “mole ita vave.” (Taaga Lea 14:29) ʼE alu te Kilisitiano ʼaia “i te ala totonu,” ko tona fakaʼuhiga, ʼe ina toʼo he ʼu tonu ʼe lelei lolotoga tona maʼuli katoa. (Taaga Lea 15:21) ʼE feafeaʼi hatatou lava ako ke tou maʼu ia te fakasiosio tonu? ʼE tonu ke tou ako ia te Folafola ʼa te ʼAtua pea mo tou maʼuliʼi. (Taaga Lea 2:1-5, 10, 11) ʼE toe feala ke tou ako pea mo faʼifaʼitakiʼi ia te fakasiosio tonu ʼa Sesu.
11. Neʼe fakaha feafeaʼi e Sesu ia te fakasiosio tonu ʼi tana faʼahiga palalau?
11 Neʼe fakaha e Sesu ia te fakasiosio tonu ia faʼahi fuli ʼae neʼe ina ui pea mo fai. ʼI tana faʼahiga palalau. ʼI te temi ʼae neʼe fakamafola ai e Sesu ia te logo lelei, neʼe ina fakaʼaogaʼi ni kupu fakalotomalohi neʼe punamaʼuli ki ai ia natou ʼae neʼe fagono kia te ia. (Mateo 7:28; Luka 4:22) Neʼe ina lau tuʼumaʼu ia te Folafola ʼa te ʼAtua pe neʼe talanoa tuʼumaʼu ki ai. Pea neʼe ina iloʼi lelei pe ko te ʼu vaega fea ʼae neʼe tonu ke ina fakaʼaogaʼi ʼi te ʼu aluʼaga fuli pe. (Mateo 4:4, 7, 10; 12:1-5; Luka 4:16-21) Tahi ʼae meʼa, neʼe malave ʼaupito ki te hahaʼi ʼae neʼe fagono kia Sesu ia tana faʼahiga fakamahino ia te ʼu vaega Fakatohi-tapu. Hili tona fakatuʼuake, neʼe palalau ia Sesu ki ʼana tisipulo ʼe toko lua lolotoga tanā fagona ki Emausi. Neʼe ina fakamahino te ʼu vaega ʼae ʼe fakaʼuhiga kia ia totonu. Ki muli age, neʼe ui fenei e te ʼu tisipulo: “Pe nee mole vevela ota loto, i tana palalau mai kia taua i te ala, pea mo tana fakamahino mai kia taua te Tohi tapu?”—Luka 24:27, 32.
12, 13. Ko te ʼu faʼifaʼitaki fea ʼae ʼe ha ai ko Sesu neʼe tuai ʼi te ita pea mo agafakapotopoto?
12 ʼI te ʼu meʼa ʼae neʼe ina logoʼi pea mo tana faʼahiga manatu. Neʼe tokoni ia te fakasiosio tonu kia Sesu ke ‘tuai ʼi te ita.ʼ (Taaga Lea 16:32) Neʼe ina maʼu te fealagia ʼae ke ina lolomi te ʼu meʼa ʼae neʼe ina logoʼi, pea neʼe “agamalu.” (Mateo 11:29) Neʼe faʼa kataki tuʼumaʼu ia Sesu ki ʼana tisipulo logo la ʼanatou lakahala. (Maleko 14:34-38; Luka 22:24-27) Pea neʼe nofo fakalogologo moka neʼe gaohi koviʼi ia ia.—1 Petelo 2:23.
13 Neʼe tokoni ia te fakasiosio tonu kia Sesu ke agafakapotopoto. Neʼe mahino ia ki te ʼuhiga moʼoni ʼo te tohi ʼo te Lao ʼa Moisese, Maleko 5:25-34.) Neʼe haʼele ia te fafine ʼaia ʼi te lotolotoiga ʼo te hahaʼi kaugā malie, pea mo fafā ki te kofu tuʼa ʼo Sesu, ʼo malolō ai mai tona mahaki. Neʼe heʼe maʼa ia ia, ohage ko tona fakaha ʼi te Lao, koia neʼe mole tonu ai ke fafā ki he tahi. (Levitiko 15:25-27) Kaʼe neʼe mole fefeka te faʼahiga palalau ʼae ʼa Sesu kia ia. Kotea tona tupuʼaga? Koteʼuhi neʼe mahino kia ia ʼe maʼuhiga age te manavaʼofa pea mo te agatonu ʼi te fakalogo lelei ʼae ki te Lao. (Mateo 23:23) Koia neʼe agalelei ia Sesu, ʼo ina ui fenei: “Siaku taahine, kua haofaki koe e tau tui; alu i te tokalelei, koteuhi kua ke mauli i tou mahaki.” Neʼe uga e te fakasiosio tonu ia Sesu ke ina fakaha ia te lotoʼofa, pea ʼe ko he faʼifaʼitaki malave loto ʼaia.
pea koia ʼae neʼe ha ʼi tana faʼahiga aga ʼae ki te hahaʼi. Ohage la, tou manatuʼi ia te fafine ʼae neʼe alu lahi te toto ia ia. (Lau ia14. Kotea ʼae neʼe filifili e Sesu ke ina fai? Pea neʼe feafeaʼi ia tana tokaga tuʼumaʼu ki tana minisitelio?
14 Tona faʼahiga maʼuli. Neʼe fakaha lelei e Sesu ia te fakasiosio tonu ʼi tona faʼahiga maʼuli. Neʼe ina filifili ke ina fakaʼaogaʼi ia tona maʼuli katoa ki te faifakamafola. (Luka 4:43) Neʼe toe toʼo e Sesu ni tonu neʼe tokoni ki ai ke tokaga tafitō ki te gaue ʼaia pea mo fakaʼosi. Ohage la, neʼe ina fakafaigafua ia tona maʼuli ke feala ai hana fakaʼaogaʼi tona temi pea mo tona malohi ki te minisitelio. (Luka 9:58) Neʼe mahino ia ki te maʼuhiga ʼo te akoako ʼo ʼihi ke natou hoko atu ia te gaue faifakamafola hili ia tana mate. (Luka 10:1-12; Soane 14:12) Pea neʼe ina fakapapau ki ʼana tisipulo ʼe tokoni anai kia natou ʼi te minisitelio “o kaku ki te fakaosi o te malamanei.”—Mateo 28:19, 20.
TOU FAʼIFAʼITAKIʼI TE FAKASIOSIO TONU ʼA SESU
15. ʼE tou lava fakaha feafeaʼi ia te fakasiosio tonu ʼi tatatou faʼahiga palalau?
15 ʼE tou lava faʼifaʼitakiʼi feafeaʼi ia te fakasiosio tonu ʼa Sesu? ʼI tatatou faʼahiga palalau. Moka tou faipalalau mo ʼotatou tehina mo tuagaʼane, tou fai ni palalau fakalotomalohi kaʼe ʼaua tatatou fakalotovaivaiʼi ia natou. (Efeso 4:29) Pea moka tou palalau ki ʼihi ʼo ʼuhiga mo te Puleʼaga ʼo te ʼAtua, ʼe tonu ki ʼatatou palalau ‘ke konakonaʼi ʼaki te masima,ʼ ko tona fakaʼuhiga, ke fakaʼeteʼete tatatou faʼahiga palalau. (Kolose 4:6) Tou faigaʼi ke tou mahino pe kotea ʼae ʼe ʼaoga mo leleiʼia e te hahaʼi, pea mo tou tokakaga fakalelei ki tatatou faʼahiga palalau. Kapau ʼe ha ʼi tatatou faʼahiga palalau ia te lotoʼofa, ʼe feala ke fia fagono mai te hahaʼi pea ke malave ia te logo lelei ki tonatou loto. ʼI te tahi faʼahi, moka tou fakamahino te ʼu akonaki ʼae ʼe tou tui ki ai, tou lau ia te Tohi-Tapu ʼi te temi fuli pe ʼe tou fealagia ai, koteʼuhi ʼe ko te Folafola ʼa te ʼAtua ʼae ʼe tonu ke fakaʼaogaʼi tafitō. ʼE tou iloʼi ʼe malohi age ia te logo ʼo te Tohi-Tapu ʼi te ʼu faʼahi fuli pe ʼe feala ke tou palalau ki ai.—Hepeleo 4:12.
16, 17. (1) ʼE tou lava fakaha feafeaʼi ʼe tou tuai ʼi te ita pea mo tou agafakapotopoto? (2) ʼE feafeaʼi hatatou tokakaga tafitō ki tatatou minisitelio?
16 ʼI te ʼu meʼa ʼae ʼe tou logoʼi pea mo totatou faʼahiga manatu. ʼE tokoni mai ia te fakasiosio tonu ke tou lolomi te ʼu meʼa ʼae ʼe tou logoʼi moka tou lotohoha, pea ʼe tokoni mai kia tatou ke tou tuai ʼi te ita. (Sakopo 1:19) Moka lakahala mai ʼihi, tou faigaʼi ke tou mahino pe koʼe neʼe natou palalau pea mo aga feia. Koteʼuhi ʼe tou fakamolemole gafua ai anai kaʼe ʼe mole tou iita kia natou. (Taaga Lea 19:11) ʼE toe tokoni mai te fakasiosio tonu ke tou agafakapotopoto. ʼE mole tou fakaʼamu ke haohaoa ʼotatou tehina mo tuagaʼane. Kaʼe tou manatuʼi ʼe lagi natou tau mo ni fihifihia ʼe mole tou mahino katoa ki ai. ʼE tou lotolelei ke tou fagono ki ʼanatou manatu. Pea moka ʼe feala, tou tali tanatou manatu, kaʼe ʼe mole tou fakakinauʼi anai te ʼu meʼa ʼae ʼe tou loto ki ai.—Filipe 4:5.
17 ʼI totatou faʼahiga maʼuli. ʼE mahino kia tatou, ko te fakamafola ʼo te logo lelei, ʼe ko te pilivilesio lahi ʼaia ʼe feala ke tou maʼu. Koia ʼae ʼe tou loto ai ke tou toʼo he ʼu tonu ʼe tokoni mai anai ke tou tokakaga tafitō ki tatatou minisitelio. ʼE tou filifili ke tou fakamuʼamuʼa ia Sehova ʼi totatou maʼuli. Pea ʼe tou maʼuli fakafeʼauga ke feala ai hatatou fakaʼaogaʼi totatou temi mo totatou malohi ki te fakamafola ʼo te logo lelei ʼi muʼa ʼo te hoko mai ʼo te fakaʼosi.—Mateo 6:33; 24:14.
18. ʼE tou lava hoko feafeaʼi atu ia tatatou folau ki te maʼuli heʼe gata? Pea kotea ʼae ʼe tou fakatotonu ke tou fai?
18 ʼE tou fiafia ʼi tatatou ako ʼihi kalitate taulekaleka ʼo Sesu. Tou fakakaukauʼi age muʼa ia te u lelei ʼae ʼe feala ke tou maʼu mo kapau ʼe tou ako ʼona ʼihi atu kalitate pea mo tou ako ke tou hage ko ia. Koia tou fakatotonu ke tou faʼifaʼitakiʼi ia Sesu. ʼAki tatatou fai ia te faʼahi ʼaia, ʼe tou hoko atu pe anai ia tatatou folau ki te maʼuli heʼe gata pea mo tatatou fakaovi ʼae kia Sehova.
^ pal. 2 Ko te ʼuluaki tohi ʼa Petelo 1:8, 9, neʼe tohi ki te kau Kilisitiano ʼae neʼe natou maʼu te ʼamanaki ʼae ke natou maʼuʼuli ʼi selo. Kaʼe ʼe toe feala ke fakaʼuhiga ia te ʼu palalau ʼa Petelo ki te kau Kilisitiano ʼae ʼe natou maʼu te ʼamanaki ki te maʼuli heʼe gata ʼi te kele.
^ pal. 9 ʼO ʼuhiga mo he ʼu faʼifaʼitaki ʼo he ʼu hahaʼi neʼe lototoʼa ʼi te ʼu ʼahiʼahi, vakaʼi te alatike ʼo Te Tule Leʼo ʼo te ʼaho 1 ʼo Tesepeli 2000, ʼi te pasina 24-28; pea mo te alatike ʼo te Réveillez-vous ! ʼo te ʼaho 22 ʼo Apelili 2003, ʼi te pasina 18-21; pea mo ʼae ʼo te ʼaho 22 ʼo Sanualio 1995, ʼi te pasina 11-15.