1. He koʼe “nee fakafiafia ia Sesu i te Laumalie Maonioni”? (Vakaʼi te ʼuluaki pāki.)

NEʼE fekauʼi e Sesu ʼana tisipulo ʼe toko 70 ke natou olo ʼo fakamafola te logo lelei ʼo te Puleʼaga ʼo te ʼAtua. Pea “nee fakafiafia ia Sesu i te Laumalie Maonioni.” Kotea tona tupuʼaga? Koteʼuhi neʼe ina fia iloʼi pe ʼe fakahoko feafeaʼi anai te gaue ʼaia e ʼana tisipulo, ʼi tana iloʼi ʼae ʼe kauga malie anai te kau fakafeagai ki te logo lelei. ʼE fakafeagai anai kia natou ia te kau sekelipa pea mo te kau Faliseo, ʼae neʼe ko he ʼu hahaʼi popoto pea mo ʼatamai. Ki tanatou manatu, ko Sesu neʼe mole ko he tagata maʼuhiga, kaʼe neʼe ko he tagata tufuga ʼakau, pea ko ʼana tisipulo, neʼe “ko he u tagata kaifenua” neʼe mole ako. (Gaue 4:13; Maleko 6:3) Kaʼe logo la ia te faʼahi ʼaia, neʼe fiafia ʼaupito ia te ʼu tisipulo ʼi te hili ʼo tanatou faifakamafola. Neʼe natou faifakamafola logo la te fakafeagai ʼa te hahaʼi, maʼia mo ʼae mai te kau temonio. Kotea ʼae neʼe natou lava taupau ai tanatou fiafia pea mo tanatou lototoʼa?—Lau ia Luka 10:1, 17-21.

2. (1) He koʼe neʼe ui e Sesu ko ʼana tisipulo ʼe ko he ʼu toe liliki? (2) Kotea ʼae neʼe tokoni ki te kau tisipulo ʼa Sesu ke natou mahino ki te ʼu moʼoni Fakatohi-tapu?

² Neʼe faikole fenei Sesu kia Sehova: “E au fakafetai kia koe,  Tamai, Aliki o te lagi mo te kele, koteuhi nee ke fufu te u mea aeni ki te kau poto mo te kau atamai, pea nee ke fakaha natou ki te u toe liliki. Io Tamai, e au fakafetai kia koe koteuhi nee ke loto ke fena.” (Mateo 11:25, 26) He koʼe neʼe ui e Sesu ko ʼana tisipulo ʼe ko “te u toe liliki”? Koteʼuhi neʼe natou lotolelei ke akoʼi natou ohage ko he ʼu toe liliki. Neʼe natou ako ke natou agavaivai, kaʼe mole ke natou fiameʼalahi. Neʼe mole natou hage ko te kau sekelipa peʼe ko te kau Faliseo, ʼae neʼe natou manatu ʼe natou popoto koteʼuhi neʼe natou ako. (Mateo 18:1-4) Koia neʼe foaki age ai e Sehova ia tona laumalie maʼoniʼoni ki te ʼu tisipulo ʼa Sesu, ke natou mahino ki te ʼu moʼoni Fakatohi-tapu. Kaʼe neʼe nonofo ia te kau takitaki lotu Sutea ʼi te fakapoʼuli fakalaumalie ʼuhi ko Satana pea mo tanatou fiameʼalahi.

3. Kotea ʼae ka tou vakaʼi anai ʼi te alatike ʼaeni?

³ ʼE mahino ia neʼe fiafia ʼaupito ia Sesu, koteʼuhi neʼe ina tokagaʼi neʼe fakamahino e Sehova ia te ʼu moʼoni Fakatohi-tapu ki te hahaʼi agavaivai, tatau aipe pe neʼe mole natou ako. Ko te faʼahiga ako ʼaia neʼe loto ki ai ia Sehova pea ʼo kaku mai ki te temi nei, ʼe heʼeki fetogi ia tana manatu. He koʼe ʼe tou iloʼi ʼe kei leleiʼia pe e Sehova ia te faʼahiga faiako ʼaia? ʼE tou vakaʼi anai ʼi te alatike ʼaeni pe neʼe fakaha feafeaʼi e Sehova ia te ʼu moʼoni Fakatohi-tapu ki te hahaʼi agavaivai ʼi totatou temi.

4. He koʼe neʼe lelei ke ʼi ai he Tule Leʼo ako faigafua?

⁴ ʼI te ʼu taʼu ʼaeni kua hili, neʼe fakaha e te kautahi ʼa te ʼAtua ia te maʼuhiga ʼo tanatou faʼahiga faiako, ʼaki tanatou fakafaigafua te ʼu fakamahino. Tou vakaʼi ia faʼifaʼitaki ʼe tolu. ʼUluaki, ko Te Tule Leʼo ako faigafua. * (Vakaʼi te kiʼi nota) Neʼe fai ia te faʼahi ʼaia maʼa te hahaʼi fuli, ʼo kau ai mo natou ʼae ʼe mole lautohi lelei peʼe mole mahino lelei ki te lea. Tokolahi ʼe natou leleiʼia Te Tule Leʼo ako ʼaia koteʼuhi ʼe mahino gafua ki ʼanatou fanau. Tokolahi neʼe natou faitohi ʼo fakaha tanatou fiafia ʼo ʼuhiga mo te fakatuʼutuʼu ʼaia. Neʼe ʼi ai te tuagaʼane neʼe mataku tuʼumaʼu ʼi te fai hana tali ʼi te ako ʼo Te Tule Leʼo. Neʼe ina ui fenei: “Kua lahi taku faitali, pea ʼe mole kei au mataku. ʼE au fakamalō kia Sehova pea mo koutou.”

5. Kotea te ʼu fua lelei ʼo te fakafoʼou ʼo te fakaliliu ʼo te Tohi-Tapu Les Saintes Écritures. Traduction du monde nouveau?

⁵ Lua, neʼe fakafoʼou ia te fakaliliu ʼo te Tohi-Tapu Les Saintes Écritures. Traduction du monde nouveau ʼi te lea Fakapilitania, pea neʼe tufa ʼi te ʼaho 5 ʼo Oketopeli 2013, ʼi te fono ʼae ʼe fakatuʼutuʼu e te kolesi pule ʼi te taʼu fuli ʼi Amelika. * (Vakaʼi te kiʼi nota.) ʼE lahi te ʼu vaega neʼe tohi fakanounou kaʼe neʼe mole fetogi ia te manatu pea ʼe kua mahino gafua. Ohage la, ia Sopo 10: 1, ʼi muʼa atu neʼe maʼu ai kupu ʼe 27 pea ʼaki te fakaliliu foʼou ʼe ko kupu pe leva ia ʼe 19. Pea ki te vaega ʼo Taaga Lea 8:6, neʼe ko kupu ʼe 20 pea ko kupu pe leva ʼe 13 ʼe maʼu ai. ʼE mahino gafua ia te faʼahiga fakaliliu foʼou ʼaia. Koia neʼe ui fenei ai e te tehina fakanofo kua fualoa tana ʼi te moʼoni: “Neʼe au lau ia te tohi ʼo Sopo, pea ʼe hage neʼe ko taku hoki mahino ʼae ki te tohi ʼaia.” Tokolahi neʼe natou maʼu ia te manatu ʼaia.

6. Kotea takotou manatu ʼo ʼuhiga mo tatatou mahino lelei kia Mateo 24:45-47?

⁶ Tolu, ko tatatou mahino lelei leva ki ʼihi vaega Tohi-Tapu. Ohage la ko te ʼu fakamahino foʼou ʼae neʼe tou maʼu ʼi Te Tule Leʼo ʼo te ʼaho 15 ʼo Sulio 2013, ʼo ʼuhiga mo “te tagata faifekau agatonu mo poto.” (Mateo 24:45-47) Neʼe fakamahino ai ko te tagata faifekau ʼe ko te Kolesi Pule. Pea ko te “hahaʼi ʼo te tagata pule” ʼe ko natou ʼae neʼe fakanofo pea ko “te tahi ʼu ovi” ʼe ko natou fuli ʼae ʼe fafaga e te tagata faifekau. (Soane 10:16, MN) ʼE tou fiafia ʼi tatatou ako ia te ʼu moʼoni ʼaia pea ʼe tou toe fiafia ʼi tonatou toe akoʼi ki ni ʼihi. Kotea ia te tahi ʼu aluʼaga ʼe ha ai ʼe loto e Sehova ke mahino gafua tatatou faʼahiga faiako?

7, 8. Kotea ʼihi fakamatala Fakatohi-tapu neʼe fakata ki he ʼu aluʼaga neʼe hoko ki muli age?

⁷ Kapau kua fualoa takotou ʼi te moʼoni, neʼe lagi kua kotou tokagaʼi te fetogi ʼo tatatou faʼahiga fakamahino ʼo te ʼu fakamatala Fakatohi-tapu ʼi ʼatatou tohi. ʼI muʼa atu, neʼe tou ui tuʼumaʼu ko ʼihi fakamatala ʼe natou fakata ia he aluʼaga ʼe lahi age ʼi te ka haʼu. Neʼe ʼi ai koa he ʼu tupuʼaga ʼo tatatou fakamahino feia te ʼu fakamatala Fakatohi-tapu ʼaia? ʼE mahino ia. Ohage la, neʼe palalau ia Sesu ki te “milakulo” peʼe ko te fakaʼiloga ʼo te polofeta ko Sonasi. (Lau ia Mateo 12:39, 40.) Neʼe fakamahino e Sesu ko te temi ʼae neʼe nofo ai ia Sonasi ʼi te fatu ʼo te ika ʼe ina fakata te temi ʼae ka nofo ai ʼi te faitoka.

⁸ ʼE ʼi ai te tahi ʼu fakamatala Fakatohi-tapu ʼe natou fakata ia he aluʼaga ʼe lahi age ʼi te ka haʼu. Neʼe fakamahino e te apositolo ko Paulo ʼihi fakamatala. Ohage la, neʼe fakata te ʼu felogoʼi ʼa Apalahamo, mo Akale pea mo Sala ia te ʼu felogoʼi ʼae ʼa Sehova mo te puleʼaga ʼo Iselaele pea mo te koga ʼo te kautahi ʼa te ʼAtua ʼae ʼi te lagi. (Kalate 4:22-26) ʼO toe feia pe, ko te tapenakulo, mo te fale lotu, mo te ʼAho ʼo te ʼu Faifakalelei, mo te pelepitelo lahi, pea mo ʼihi koga ʼo te Lao, neʼe ko “he ata o te u mea lelei ka hau.” (Hepeleo 9:23-25; 10:1) ʼE malohi tatatou tui mo kapau ʼe tou ako ia te ʼu fakamatala Fakatohi-tapu ʼaia pea mo te ʼu faʼahi ʼae ʼe fakata ki ai. Kaʼe ʼe feala koa ke tou ui ko te ʼu hahaʼi fuli, peʼe ko te ʼu aluʼaga fuli peʼe ko te ʼu meʼa fuli ʼae ʼe tuʼu ʼi te Tohi-Tapu ʼe fakata ki he tahi peʼe ki he meʼa?

9. ʼI muʼa atu, neʼe fakamahino feafeaʼi ia te fakamatala Fakatohi-tapu ʼo ʼuhiga mo Napote?

⁹ ʼI muʼa atu, neʼe ui ʼi ʼatatou tohi, ko te  ʼu hahaʼi takitahi, peʼe ko te ʼu aluʼaga neʼe hoko, peʼe ko te ʼu meʼa fuli ʼae ʼe maʼu ʼi ʼihi fakamatala ʼe fakata ki he tahi peʼe ki he meʼa. Ohage la, neʼe matehi e te fineʼaliki ko Sesapele ia Napote, ke feala ki tona ʼohoana ko Akapo ke ina maʼu ia tana gaueʼaga vite. (1 Hau 21:1-16) ʼI te taʼu 1932, neʼe fakamahino ʼi te Te Tule Leʼo, neʼe fakata e Akapo pea mo Sesapele ia Satana pea mo tana kautahi. Kaʼe ʼe fakata e Napote ia Sesu. Pea ko te mate ʼo Napote neʼe ina fakata ia te mate ʼo Sesu. Kaʼe ʼi te taʼu 1961, neʼe fakamahino ʼi tatatou tohi “Ke Tapuha Tou Huafa!” (Fakapilitania) ʼe fakata e Napote ia te kau fakanofo, kaʼe ʼe fakata e Sesapele ia te ʼu lotu Fakakilisitiano loi. Pea neʼe fakata ia te gaohi koviʼi ʼo Napote e Sesapele, ia te fakatagaʼi ʼo te ʼu tehina fakanofo lolotoga te ʼu ʼaho fakamuli. Lolotoga ni taʼu, neʼe malohi te tui ʼa te hahaʼi ʼa te ʼAtua ʼuhi ko te ʼu fakamahino ʼaia. Kaʼe he koʼe kua fetogi ia te ʼu fakamahino ʼaia ʼi te temi nei?

10. (1) He koʼe ʼe nofo tokaga “te tagata faifekau” moka ina fakamahino te ʼu fakamatala Fakatohi-tapu? (2) Kotea ʼae ʼe tokaga tafitō ki ai ʼatatou tohi ia ʼaho nei?

¹⁰ ʼAki te temi, neʼe tokoni ia Sehova ki “te tagata faifekau agatonu mo poto” ke toe lahi age tona poto. ʼO feafeaʼi? ʼAki te nofo tokaga ʼa “te tagata faifekau” moka ina fakamahino te ʼu fakamatala Fakatohi-tapu. ʼE hoki ina fakamahino te  fakata ʼo he fakamatala Fakatohi-tapu ki he tahi age aluʼaga, mo kapau ʼe maʼu he fakamoʼoni pea mo he fakamahino lelei ʼi he vaega Tohi-Tapu. ʼE ʼi ai ʼihi fakamahino ʼe mole faigafua tatatou mahino ki ai, pea ʼe faigataʼa tona manatuʼi, peʼe ko tona maʼuliʼi. Kaʼe kapau ʼe faigataʼa fau takita maʼu te ʼu fakamahino totonu ʼo he fakamatala, ʼe mole feala ke tou maʼu mai ai he ʼu ako maʼa tatou. Koia kua fakafaigafua ʼatatou tohi, ke tou mahino gafua ki te ʼu ako ʼae ʼe ʼaoga ki tatatou tui, mo tatatou faʼa kataki, mo tatatou nofo agatonu ki te ʼAtua, pea mo te tahi ʼu kalitate ʼe feala ke tou ako mai te ʼu fakamatala Fakatohi-tapu. *—Vakaʼi te kiʼi nota.

11. (1) Kotea leva tatatou mahino ki te fakamatala ʼo ʼuhiga mo Napote? Kotea te ako ʼe tou maʼu mai ai? (2) ʼI te ʼu taʼu ʼaeni kua hili, he koʼe neʼe mole kei fai he ʼu fakamahino ʼo te ʼu fakamatala Fakatohi-tapu pea mo te ʼu meʼa ʼae ʼe fakata ki ai ʼi te ka haʼu? (Vakaʼi te alatike “Te ʼu Fehuʼi ʼa Te Kau Lautohi” ʼi te nusipepa ʼaeni.)

¹¹ Kua tou mahino lelei leva ki te fakamatala ʼo ʼuhiga mo Napote. Neʼe mole fakata ia te mate ʼo Napote ki te mate ʼa Sesu peʼe ko te kau fakanofo. Kaʼe neʼe mate ia ʼuhi ko tana fia nofo agatonu ʼae ki te ʼAtua. Neʼe fia fakalogo ki te Lao ʼa Sehova logo la te ʼu fakataga ʼa te kau takitaki. (Numelo 36:7; 1 Hau 21:3) ʼE ko he faʼifaʼitaki lelei ʼaia maʼa te ʼu kaugana ʼa te ʼAtua ʼi totatou temi, ʼae ʼe tau mo ni fakataga. (Lau ia 2 Timoteo 3:12.) Koia, kua feala leva ki te kau Kilisitiano fuli ke natou mahino, mo manatuʼi pea mo maʼuliʼi ia te ako ʼaia pea mo fakamalohi ai tanatou tui.

12. (1) Kotea ʼae ʼe feala ke tou ui ʼo ʼuhiga mo te ʼu fakamatala Fakatohi-tapu? (2) He koʼe kua feala hatatou mahino lelei, maʼia mo te ʼu ako loloto? (Vakaʼi te kiʼi nota.)

¹² ʼE tonu koa ke tou ui ʼe feala pe ke tou maʼu he ʼu ako mai te ʼu fakamatala Fakatohi-tapu kaʼe ʼe mole ʼi ai he tahi age ʼu fakaʼuhiga? Kailoa ia. ʼE mole tou fakamahino ia te fakata ʼo he fakamatala Fakatohi-tapu ʼi te ka haʼu. ʼE fia fakatokagaʼi tafitō ʼi ʼatatou tohi ia te pikipikiga ʼo he fakamatala pea mo he tahi age fakamatala Fakatohi-tapu. Ohage la, ko te nofo agatonu ʼa Napote logo la te ʼu fakataga ʼo kaku ki te mate, ʼe tou manatuʼi ai te nofo agatonu ʼa Kilisito pea mo te kau fakanofo. Kaʼe ʼe toe feala pe ke tou manatuʼi mo te nofo agatonu ʼo natou ʼae ʼe kau ki “te tahi ʼu ovi.” Koia ʼe tou sisio ai ki te haga ʼa Sehova ʼo fakafaigafua tana akoʼi tatou. *—Vakaʼi te kiʼi nota.

13. Kotea te ʼu faʼifaʼitaki ʼe ha ai kua tou lava fakamahino lelei te ʼu lea fakatata ʼa Sesu?

¹³ Ko Sesu neʼe ko te Tagata Faiako lahi tokotahi ʼaia neʼe maʼuli ʼi te kele. Moka faiakonaki ʼe ina fakaʼaogaʼi tuʼumaʼu ia te ʼu faʼifaʼitaki peʼe ko he ʼu lea fakatata. (Mateo 13:34) ʼE lelei te fakaʼaogaʼi ʼo te ʼu lea fakatata moʼo fakamahino he ʼu manatu faigataʼa, ke feala ai ke tou fakakaukauʼi pea ke malave ki ʼotatou loto. Talu mai fualoa, neʼe fakafaigafua ʼi ʼatatou tohi ia te fakamahino lelei ʼo te ʼu lea fakatata ʼa Sesu. Ohage la, ʼi Te Tule Leʼo ʼo te ʼaho 15 ʼo Sulio 2008, neʼe tou mahino lelei ai ki te lea fakatata ʼa Sesu ʼo ʼuhiga mo te meʼa fakatupu, mo te tegaʼi sinapi pea mo te kupega. Ia ʼaho nei, kua tou mahino neʼe talanoa ia te ʼu lea fakatata ʼaia ki te Puleʼaga ʼo te ʼAtua. Koia, neʼe tokolahi ai te hahaʼi neʼe natou situʼa ki te malama agakovi ʼaeni kaʼe ke natou liliu ko he ʼu tisipulo ʼa Kilisito.

14. (1) Neʼe fakamahino feafeaʼi ia te lea fakatata ʼo te tagata Samalitana agalelei? (2) Kua tou mahino feafeaʼi leva ki te lea fakatata ʼa Sesu?

¹⁴ ʼE tou lava mahino lelei feafeaʼi ki te ʼu fakamatala pea mo te ʼu lea fakatata ʼae neʼe fai e Sesu? ʼE ʼi ai ʼihi ʼu fakamatala neʼe fai e Sesu ʼe ko he ʼu lea fakatata peʼe ko he ʼu lea fakapolofeta. Pea ko ʼihi fakamatala ʼe ko he ʼu ako maʼa tatou. Kaʼe ʼe tou lava iloʼi feafeaʼi ko te ʼu fakamatala ʼe ko he ʼu lea fakatata peʼe kailoa? Neʼe tou mahino ki te faʼahi ʼaia ʼaki te alu ʼo te temi. Ohage la, ko tatatou ʼuluaki fakamahino ia te lea fakatata ʼa Sesu ʼo ʼuhiga mo te tagata Samalitana agalelei. (Luka 10:30-37) Neʼe ui ʼi Te Tule Leʼo ʼi te taʼu 1924, ʼe fakata e te tagata Samalitana ia Sesu, pea ʼe fakata ia te ala ʼae ʼe hifo mai Selusalemi ki Seliko ki te maʼuli mamahi ʼa te tagata talu mai te talagataʼa ʼae ʼi Eteni. Pea neʼe fakata ia te ʼu tagata kaihaʼa ia te ʼu sosiete fakatau koloa pea mo te ʼu tagata faikoloa manumanū. Neʼe fakata e te pelepitelo pea mo te Levite ia te ʼu lotu Fakakilisitiano loi. Kaʼe ʼi te temi nei, ʼe fakaʼaogaʼi ia te fakamatala ʼaia ʼi ʼatatou tohi moʼo fakamanatuʼi ki te kau Kilisitiano fuli ke mole natou fakapalatahi. ʼE tonu ke tou tokoni tafitō ki te hahaʼi fuli ke natou ako ia te moʼoni ʼo ʼuhiga mo te ʼAtua. ʼE tou fiafia ʼi tatatou sisio ʼae ʼe fakafaigafua e Sehova ia te fakamahino ʼo te moʼoni.

15. Kotea ʼae ka tou vakaʼi anai ʼi te alatike ʼae ka hoa mai?

¹⁵ ʼE tou vakaʼi anai ʼi te alatike ʼae ka hoa mai ia te lea fakatata ʼa Sesu ʼo ʼuhiga mo te ʼu taupoʼou ʼe toko 10. (Mateo 25:1-13) Neʼe loto e Sesu ke mahino feafeaʼi ʼana tisipulo ki te lea fakatata maʼuhiga ʼaia, ʼi te ʼu temi fakamuli? ʼE fakata koa ia te ʼu hahaʼi, mo te ʼu meʼa pea mo te ʼu aluʼaga ʼae neʼe hoko ki he aluʼaga ʼe lahi age ʼi te ka haʼu? Pe neʼe loto koa e Sesu ke tou maʼu ia he ʼu ako ʼe ʼaoga anai kia tatou ʼi te ʼu ʼaho fakamuli? ʼE tou tali anai ki te ʼu fehuʼi ʼaia ʼi te alatike ʼae ka hoa mai.