KAPAU ʼe tou fakatatau ia te fuʼu sita ʼo Lipane pea mo te fuʼu oliveto, ʼe veliveli age te fuʼu oliveto pea ʼe mole tuʼu tonu. Kaʼe ʼe tologa age te fuʼu oliveto. ʼE ʼi ai ʼihi ʼe taʼu 1000 tupu. Pea ʼe ulu loloto ʼona aka ʼi te kele, koia ʼe feala ai ki he fuʼu oliveto ke toe homo ake, tatau aipe pe neʼe tuʼusi tona tafitō. Kapau ʼe kei maʼuli ʼona aka, ʼe feala pe ke toe homo ake te fuʼu ʼakau.

Neʼe tui papau ia Sopo, tatau aipe pe ʼe mate, kaʼe ʼe toe maʼuli ake anai. (Sopo 14:13-15) Neʼe ina fakaʼaogaʼi ia te faʼifaʼitaki ʼo te fuʼu ʼakau, ohage la ko te fuʼu fiku, moʼo fakaha ai tana tui ʼae ʼe lava toe fakatuʼuake ia ia e te ʼAtua mai te mate. Neʼe ui fenei e Sopo: “E mau e he akau he amanaki lelei: Koteuhi ka tuusi ia ia, e toe homo ia ia.” Ka to te ua hili te temi vevela, ʼe feala ki te tafito ʼo he fuʼu oliveto ke toe maʼuli ake pea “e toe hohomo ni vaa o hage ko he akau kei muli.”—Sopo 14:7-9.

Ohage pe ko he tagata gaue kele ʼe fakaʼamu lahi ke toe sio ki te toe maʼuli ake ʼo he fuʼu fiku neʼe tuʼusi, ʼe fakaʼamu lahi e Sehova ʼAtua ke toe fakatuʼuake ʼana kaugana pea mo ʼihi atu. (Mateo 22:31, 32; Soane 5:28, 29; Gaue 24:15) Kotou fakakaukauʼi age muʼa ia te toe fiafia lahi ʼe tou maʼu moka tou fakatalitali ia te kau mate, moka natou toe maʼuli ake anai.