Tou Falala Tuʼumaʼu Kia Sehova
“Hahai, ke koutou falala tuumau kia ia.”—PESALEMO 62:9.
1-3. He koʼe neʼe tui papau ia Paulo neʼe feala ke falala kia Sehova? (Vakaʼi te ʼuluaki pāki.)
KAPAU neʼe ko koutou ko he Kilisitiano neʼe maʼuli ʼi Loma ʼi te temi ʼo te kau apositolo, ʼe kotou maʼuʼuli anai ʼi he temi fakatupu tuʼutamaki. Neʼe kovi ia te fakatagaʼi ʼo te kau Kilisitiano e te kau Loma. Neʼe tukugakoviʼi natou e te kau Loma ʼi te vela lahi ʼae neʼe hoko ʼi Loma pea neʼe natou toe tukugakoviʼi ʼe mole natou ʼoʼofa ki te hahaʼi. Pea tokolahi ʼotatou tehina mo tuagaʼane Kilisitiano neʼe pilisoniʼi natou. Neʼe ʼi ai ʼihi neʼe kai natou e te ʼu manu. Ko ʼihi neʼe tutuki ki te ʼu pou pea neʼe tutu maʼuli natou moʼo fakamalamagia ʼi te poʼuli. ʼI te ʼaho fuli pe, ʼe ke iloʼi ai ʼe feala ke hoko kia koutou ia te ʼu aluʼaga ʼaia.
2 Lolotoga te ʼu temi faigataʼa ʼaia, neʼe pilisoniʼi ai ia Paulo. Neʼe ina feʼuiʼaki pe ʼe haʼu anai he tahi ʼo tokoni age ki ai. Koteʼuhi, neʼe ina manatuʼi te ʼahiʼahi ʼae neʼe hoko ki ai ʼi muʼa atu kaʼe neʼe mole ʼi ai he tahi neʼe tokoni age. Kaʼe, neʼe maʼu e Paulo ia te tokoni mai ia Sehova ʼaki te ʼAliki Sesu. Koia, neʼe ina tohi fenei ai: “Ko te Aliki ae nee tuu mo au pea nee ina fakamalohii au.” Neʼe foaki e Sesu kia Paulo ia te malohi ʼae neʼe ʼaoga ki ai. Neʼe toe tohi e Paulo, “nee fakamauli au mai te gutu o te 2 Timoteo 4:16, 17. * (Vakaʼi te kiʼi nota.)
laione.”—3 Neʼe manatuʼi e Paulo pe neʼe tokoni feafeaʼi ia Sehova kia ia ʼi te temi muʼa. Pea neʼe tui papau ko Sehova ʼae neʼe ina foaki age ia te malohi ʼae neʼe ʼaoga moʼo katakiʼi ia te ʼahiʼahi ʼi te temi ʼaia pea mo te ʼu ʼahiʼahi ʼae ʼi te ka haʼu. Neʼe tui moʼoni ki te faʼahi ʼaia ʼo tupu ai tana tohi fenei: “E haofaki anai au e te Aliki mai te u gaue kovi fuli.” (2 Timoteo 4:18) Neʼe mahino kia Paulo logola neʼe mole feala ki ʼona tehina ke natou tokoni ki ai ʼi he aluʼaga neʼe hoko, kaʼe neʼe tuku tuʼumaʼu pe ia tana falala kia Sehova pea mo Sesu ʼe nā tokoni anai ki ai. Pea neʼe tui papau ia ki te faʼahi ʼaia.
ʼE LAHI TE ʼU FAIGAMALIE KE TOU FALALA AI KIA SEHOVA
4, 5. (1) Ko ai ʼae ʼe feala ke ina foaki atu ia te tokoni ʼae ʼe ʼaoga kia koutou? (2) ʼE kotou lava fakamalohiʼi feafeaʼi ʼakotou felogoʼi mo Sehova?
4 Neʼe kua kotou felaveʼi koa mo he fihifihia faigataʼa? Neʼe kua kotou logoʼi koa ʼe kotou nofo tokotahi pea ʼe mole ʼi ai he tahi ʼe tokoni atu? ʼE lagi neʼe mole kei kotou gaue peʼe neʼe fakahalaʼi koutou ʼi te fale ako. Pe ʼe lagi neʼe kovi tokotou mahaki peʼe ko he tahi age ʼu aluʼaga faigataʼa. Neʼe lagi kotou kole tokoni ki ʼihi kaʼe neʼe kotou iita koteʼuhi neʼe mole natou foaki atu ia te tokoni ʼae neʼe kotou fakaʼamu ki ai. ʼE mahino ia, ʼe mole feala ki te tagata hana fakatokatoka ia te ʼu fihifihia fuli. Kotea anai ka kotou fai? ʼE ui mai ʼi te Tohi-Tapu ke tou “falala [kia Sehova].” (Taaga Lea 3:5, 6) Kaʼe ʼe tou tui papau koa ʼe tokoni mai anai? ʼEi. ʼE feala ke tou maʼu ʼi te Tohi-Tapu he ʼu faʼifaʼitaki ʼe tou tui papau ai ʼe tokoni moʼoni ia Sehova ki tana hahaʼi.
Ko te ʼahiʼahi ʼae ʼe kotou felaveʼi mo ia ʼe ko he faigamalie ʼaia ke kotou falala katoa kia Sehova
5 ʼAua naʼa kotou iita moka ʼe mole foaki atu e ʼihi ia te tokoni ʼae neʼe kotou fakaʼamu ki ai. Kaʼe ohage ko Paulo, ko te ʼahiʼahi ʼae ʼe kotou felaveʼi mo ia ʼe ko he faigamalie ʼaia ke kotou falala katoa kia Sehova. ʼE ko he tahi faigamalie ʼaia ke tou sisio ai ʼi totatou maʼuli ia tana tokaga ʼae kia tatou. Pea ʼe liliu anai ʼo malohi ia tatatou falala ʼae kia Sehova pea mo ʼatatou felogoʼi mo ia.
ʼE TONU KE TOU FALALA KIA SEHOVA
6. He koʼe ʼe mole ko he meʼa faigafua ia te falala ʼae kia Sehova moka ʼe tou felaveʼi mo he fihifihia faigataʼa?
6 ʼE lagi ʼe ʼi ai he fihifihia faigataʼa ʼe mole kotou leleiʼia. Neʼe kotou fai ia meʼa fuli ke kotou fakatokatoka ia te fihifihia ʼaia pea neʼe kotou faikole kia Sehova ke tokoni atu. ʼE feala koa ke mole kotou tuʼania ʼi te temi nei koteʼuhi ʼe kotou falala kia Sehova ʼe tokoni atu anai? ʼE mahino ia. (Lau ia Pesalemo 62:9; 1 Petelo 5:7.) Kapau ʼe kotou fia maʼu ia he ʼu felogoʼi lelei mo Sehova pea ʼe maʼuhiga ke kotou ako ke kotou falala kia te ia. Kaʼe ʼe mole ko he meʼa ʼe faigafua tuʼumaʼu. Kotea ia tona tupuʼaga? Koteʼuhi ʼe feala kia Sehova ke mole foimo tali vave mai ki ʼatatou faikole.—Pesalemo 13:2, 3; 74:10; 89:47; 90:13; Hapakuke 1:2.
Ko Sehova, tatatou Tamai ʼae ʼi selo ʼe ʼofa ia tatou pea ʼe ina iloʼi pe kotea ʼae ʼe ʼaoga kia tatou
7. He koʼe ʼe mole foimo tali vave tuʼumaʼu mai ia Sehova ki ʼatatou faikole?
7 He koʼe ʼe mole foimo tali vave tuʼumaʼu mai ia Sehova ki ʼatatou faikole? ʼE ui ʼi te Pesalemo 103:13) ʼE mole foaki e he tamai ki tana fanau ia meʼa fuli ʼe ina kole age peʼe ina foimo foaki atu aipe. ʼE iloʼi e te tamai ʼe feala ki te fanau ke fia fai ki he meʼa ʼi te moʼi temi pe ʼaia pea ki ʼamuli ʼe mole kei fia fai ki ai. ʼE toe iloʼi e te tamai ia te meʼa ʼae ʼe lelei ki tana fanau pea ʼe ina iloʼi pe ʼe malave feafeaʼi ki ʼihi. ʼE ina iloʼi ia te meʼa ʼae ʼe ʼaoga ki tana fanau pea mo te temi ʼae ʼe ʼaoga ki ai. Kapau ʼe foimo foaki e te tamai ia meʼa fuli ʼe kole age e tana fanau pea ʼe liliu anai ia te tamai ko he kaugana ʼa te fanau. Ko Sehova, tatatou Tamai ʼae ʼi selo ʼe ʼofa ia tatou. ʼI tona ʼuhiga Tupuʼaga poto, ʼe ina iloʼi pe kotea ʼae ʼe ʼaoga kia tatou pea ʼe ina toʼo ia te tonu ʼo ʼuhiga mo te temi lelei ʼae ke ina foaki mai ai ia te meʼa ʼae neʼe tou kole age. ʼE ko he meʼa lelei kia tatou ke tou fakatalitali pea mo sisio pe ʼe tali feafeaʼi ia Sehova ki ʼatatou faikole.—Vakaʼi mo Esaia 29:16; 45:9.
Tohi-Tapu ko Sehova ʼe ko tatatou Tamai pea ko tatou ko ʼana fanau. (8. Kotea ʼae ʼe fakapapauʼi mai e Sehova ʼo ʼuhiga mo tatatou lava katakiʼi ia he aluʼaga?
8 Kotou manatuʼi foki ʼe iloʼi e Sehova ʼe feala ki te kilisitiano takitahi ke ina katakiʼi ia he aluʼaga peʼe kailoa. (Pesalemo 103:14) Koia, ʼe ina foaki mai ia te malohi ʼae ʼe ʼaoga kia tatou. ʼE moʼoni, ʼe feala ʼi ʼihi temi ke tou logoʼi ʼe mole kei feala ke tou katakiʼi he aluʼaga. Kaʼe ʼe fakapapauʼi mai e Sehova kapau ʼe lahi ia te ʼu ʼahiʼahi ʼae ʼe mole feala ke tou lava katakiʼi, ʼe ina foaki atu anai ia te “faigamalie ke kotou hao ai.” (Lau ia 1 Kolinito 10:13.) ʼE ko he meʼa fakalotofimalie tatatou iloʼi ʼae ʼe feala ke tou falala kia Sehova koteʼuhi ʼe ina iloʼi ʼe feala ke tou katakiʼi ia he aluʼaga.
9. Kotea ʼae ʼe tonu ke tou fai mo kapau ʼe tou kole ia te tokoni ʼa Sehova kaʼe ʼe mole foimo tali vave mai?
9 Kapau ʼe tou kole ia te tokoni ʼa Sehova kaʼe ʼe mole foimo tali vave mai kia tatou, ʼe tonu ke tou maʼu ia te kataki fualoa. Kotou manatuʼi ʼe fia tokoni moʼoni mai ia Sehova kia tatou kaʼe ʼe fakatalitali ke ina foaki mai ʼi tona temi totonu ia te faʼahi ʼae ʼe ʼaoga kia tatou. ʼE ui fenei mai ʼi te Tohi-Tapu: “Koia, ʼe haga talitali anai ia Sehova ke ina fakaha atu tona ʼofa, pea koia, ʼe tuʼu ake anai moʼo fakaha atu tona manavaʼofa. Koteʼuhi ko Sehova ʼe ko he ʼAtua ʼo te fakamau. Manuʼia ia natou fuli ʼae ʼe natou haga talitali kia te ia.”—Isaia 30:18, MN.
“TE GUTU O TE LAIONE”
10-12. (1) Kotea ʼae ʼe feala ke faigataʼa ia te tokaga ki he tahi ʼo te famili ʼe mahaki? (2) Moka kotou falala kia Sehova ʼi te ʼu temi faigataʼa, ʼe malave feafeaʼi anai ki ʼakotou felogoʼi mo ia? Tuku mai he faʼifaʼitaki.
10 Ohage ko Paulo, ʼe feala ki te aluʼaga ʼae ʼe kotou felaveʼi mo ia ke faigataʼa kia koutou pea ʼe ʼaoga ke haofaki koutou mai “te gutu o te laione.” (2 Timoteo 4:17) Lolotoga te ʼu temi ʼaia, ʼe maʼuhiga ʼaupito ai ke kotou falala kia Sehova. Ohage la, ʼe feala ke kotou tokakaga ki he tahi ʼo tokotou famili ʼe mahaki. ʼE kotou faikole kia Sehova ke tokoni atu ke kotou toʼo ia he ʼu tonu ʼe lelei pea mo kotou lotomalohi. * (Vakaʼi te kiʼi nota.) Kua feala ʼi te temi nei ke kotou lotofimalie moka kotou manatuʼi ʼe sio pea mo lotomahino ia Sehova ʼo ʼuhiga mo koutou pea mo tokotou aluʼaga. ʼE tokoni atu anai ke kotou maʼu ia te kataki fualoa pea ke kotou nonofo agatonu kia te ia.—Pesalemo 32:8.
Kotou falala ʼe foaki atu anai e takotou Tamai ʼae ʼe ʼi selo ia te malohi moʼo fakalogo agatonu kia te ia
11 ʼI ʼihi temi, ʼe lagi feala ke kotou manatu ʼe mole tokoni atu ia Sehova. Ohage la, ʼe lagi mole manatu tahi ia te ʼu toketa ʼo ʼuhiga mo he aluʼaga ʼe tonu ke kotou fai. Peʼe kotou fakaʼamu ʼe foaki atu anai e tokotou famili ia he fakalotofimalie kaʼe ʼe mole natou tuʼania natou. Kaʼe tuku tuʼumaʼu takotou falala kia Sehova, ʼe ina tuku atu anai ia te malohi. Kotou haga fakaovi tuʼumaʼu kia te ia. (Lau ia 1 Samuele 30:3, 6.) Ki muli age, ko ʼakotou felogoʼi mo Sehova ʼe liliu anai ʼo malohi moka kotou tokagaʼi pe neʼe tokoni feafeaʼi ia Sehova kia koutou.
12 Neʼe ko te faʼahi ʼaia neʼe logoʼi e Linda. * (Vakaʼi te kiʼi nota.) Neʼe tokaga ia ki ʼana matuʼā ʼae neʼe mahahaki lolotoga he temi loaloaga ʼi muʼa ʼo tanā mamate. ʼE ina ui fenei: “ʼI te temi ʼaia, neʼe mole kei iloʼi e toku ʼohoana mo toku tokolua pe kotea ʼae ʼe tonu ke fai. ʼI ʼihi temi, neʼe mole kei matou lava fai he meʼa. Moka au toe manatuʼi, ʼe au tokagaʼi neʼe nofo ia Sehova mo matou. Neʼe ina fakalotomalohiʼi matou pea neʼe ina foaki mai ia te meʼa ʼae neʼe ʼaoga kia matou, logo aipe neʼe mole maʼu ia he puleʼaki ki ai.”
13. Ko te falala ʼae kia Sehova, neʼe tokoni feafeaʼi kia Rhonda ke ina katakiʼi ia he ʼu aluʼaga fakatupu mamahi?
13 ʼE tokoni mai anai ia tatatou falala katoa ʼae kia Sehova ke tou katakiʼi ia he ʼu aluʼaga fakamamahi. Ko te aluʼaga ʼaia neʼe hoko kia Rhonda. Neʼe mavete mo tona ʼohoana ʼae neʼe mole ko he Fakamoʼoni ʼa Sehova. Lolotoga te temi ʼaia, neʼe tau ia tona tokolua mo he mahaki kovi ʼe higoa ko te lupus. Pea tahi, hili pe ki ai ni mahina neʼe mate ia tona maʼā. ʼI tana kua logo fimalie mai te ʼu aluʼaga neʼe felaveʼi mo ia, neʼe ina kamata toʼo ai leva tana selevisi pionie katoa. Kaʼe hili ia, neʼe mate ia tana faʼe. Neʼe lava katakiʼi feafeaʼi e Rhonda ia te ʼu aluʼaga fakamamahi ʼaia? ʼE ina ui fenei: “Neʼe au felogoʼi mo Sehova ʼi te ʼaho fuli maʼia mo te ʼu tonu liliki ʼae neʼe au fai. ʼI taku fai ia te faʼahi ʼaia neʼe liliu ai ia Sehova ko he tahi ʼe moʼoni kia au. Neʼe tokoni lahi mai te aluʼaga ʼaia ke au falala kia Sehova kaʼe mole kia au pe peʼe ko ʼihi atu. Pea ko te tokoni ʼae neʼe ina foaki mai neʼe liliu ʼo moʼoni kia au pea neʼe kua katoa fuli pe ia te ʼu meʼa ʼae neʼe ʼaoga kia au. Koia, neʼe au ako ai ke au haʼele fakatahi mo Sehova.”
14. ʼE lava tokoni feafeaʼi ia Sehova kia koutou mo kapau ʼe ʼi ai he tahi ʼo tokotou famili neʼe fakamavae?
14 Kotou fakakaukauʼi age ia he tahi aluʼaga faigataʼa. Neʼe lagi fakamavae he tahi ʼo tokotou famili mai te kokelekasio. ʼE kotou iloʼi pe kotea ʼae ʼe ui mai ʼi te Tohi-Tapu pe feafeaʼi te aga ʼae kia natou ʼae kua fakamavae. (1 Kolinito 5:11; 2 Soane 10) Kaʼe ʼuhi ko tokotou ʼofa ʼae ki ai, ʼe lagi feala ke faigataʼa ia takotou fakalogo ki te fakatotonu ʼa te Tohi-Tapu. ʼE kotou falala koa ʼe foaki atu anai e takotou Tamai ʼae ʼe ʼi selo ia te malohi moʼo fakalogo agatonu kia te ia? ʼE kotou manatu anai koa ko te aluʼaga ʼaia ʼe ko he faigamalie ke kotou fakaovi ai kia Sehova?
15. He koʼe neʼe talagataʼa ia Atama kia Sehova?
15 Kotea ʼae ʼe tatau ai ia te aluʼaga ʼaia mo te aluʼaga ʼae neʼe hoko ki te ʼuluaki tagata, ia Atama? Neʼe tui koa ʼe feala pe ia tana talagataʼa kia Sehova pea mo hoko atu pe tona maʼuli? Kailoa. Ko Atama “nee mole kakaai.” (1 Timoteo 2:14) Kaʼe he koʼe neʼe talagataʼa kia Sehova? Neʼe kai e Atama ia te fuaʼi ʼakau ʼae neʼe foaki age e tona ʼohoana koteʼuhi neʼe lahi age ia tona ʼofa ʼae ki tona ʼohoana ʼi tona ʼofa ʼae kia Sehova. Neʼe fakalogo ki tona ʼohoana kaʼe mole ki te fakatotonu ʼae neʼe foaki age e Sehova.—Senesi 3:6, 17.
16. Ko ai ʼae ʼe tonu ke lahi age ki ai totatou ʼofa pea kotea tona tupuʼaga?
16 Ko te tonu ʼae neʼe toʼo e Atama ʼe tokoni mai kia tatou ke lahi age totatou ʼofa ʼae kia Sehova ʼi ʼihi atu. (Lau ia Mateo 22:37, 38.) Pea kapau ʼe malohi totatou ʼofa ʼae kia Sehova, ʼe feala ke tou foaki he tokoni lelei ki ʼotatou famili tatau aipe pe ʼe natou tauhi kia Sehova peʼe kailoa. Koia, kotou taupau ke malohi tokotou ʼofa ʼae kia Sehova pea mo tokotou falala ʼae kia te ia. Kapau ʼe kotou tuʼania ki he tahi ʼo tokotou famili neʼe fakamavae, kotou faikole kia Sehova pea mo kotou fakaha kia te ia te ʼu meʼa fuli ʼae ʼe kotou logoʼi. (Loma 12:12; Filipe 4:6, 7) Maʼia pe ʼe koutou lotomamahi ʼaupito, kaʼe kotou manatuʼi ko te aluʼaga ʼaia ʼe ko he faigamalie ke kotou fakamalohiʼi ai ʼakotou felogoʼi mo Sehova. Pea ʼe feala anai ke kotou falala kia te ia pea mo kotou iloʼi ko te fakalogo ʼae kia Sehova ʼe fua lelei anai.
“MOKA TOU FAKATALITALI”
17. Kapau ʼe tou maʼumaʼua ʼi te gaue faifakamafola, kotea ʼe fai anai e Sehova maʼa tatou?
17 He koʼe neʼe haofaki e Sehova ia Paulo mai “te gutu o te laione”? ʼE ui e Paulo: “Koteuhi ke au fakaha te akonaki katoa.” (2 Timoteo 4:17) Neʼe toe foaki mai e Sehova kia tatou ia te gaue ʼae ke tou fakamafola ia ‘te logo lelei’ pea ʼe ina fakahigoaʼi tatou ko ʼana ‘kaugā gaue’. (1 Tesalonika 2:4; 1 Kolinito 3:9) Kapau ʼe tou maʼumaʼua ʼi te gaue ʼaia, ʼe feala ke tou falala ʼe foaki mai anai e Sehova ia te ʼu meʼa fuli ʼae ʼe ʼaoga kia tatou. (Mateo 6:33) Pea ʼe faigafua anai hatatou fakatalitali ke tali mai Sehova ki ʼatatou faikole.
18. ʼE kotou lava falala feafeaʼi kia Sehova pea mo fakamalohiʼi ʼakotou felogoʼi mo ia?
18 Kotou faiga malohi ʼi te ʼaho fuli ke kotou fakamalohiʼi ʼakotou felogoʼi mo Sehova. Kapau ʼe kotou felaveʼi mo he fihifihia pea mo kotou tuʼania, kotou fakaʼaogaʼi ia te faigamalie ʼaia ke kotou fakaovi ai kia Sehova. Kotou lau, mo ako pea mo metitasio ki te Folafola ʼa te ʼAtua, te Tohi-Tapu. Kotou haga faikole kia Sehova pea mo kotou maʼumaʼua ʼi te gaue faifakamafola. Kapau ʼe kotou fai ia te faʼahi ʼaia, ʼe feala ke kotou falala ʼe tokoni atu anai ia Sehova ke kotou katakiʼi ia te ʼu ʼahiʼahi fuli ʼe kotou felaveʼi mo ia ʼi te temi nei pea mo te ka haʼu.
^ pal. 2 Neʼe haofaki ia Paulo mai te ʼu laione peʼe mai ʼihi aluʼaga fakamataku.
^ pal. 10 Neʼe ta ia te ʼu alatike moʼo tokoni ki te kau Kilisitiano ke natou katakiʼi ia te mahaki pea mo tokoni kia natou ʼae ʼe tokakaga ki te kau mahahaki. Vakaʼi te ʼu Réveillez-vous ! ʼo te ʼaho 8 ʼo Fepualio 1994, mo te ʼaho 8 ʼo Fepualio 1997, mo te ʼaho 22 ʼo Maio 2000 pea mo te ʼaho 22 ʼo Sanualio 2001.
^ pal. 12 Neʼe fetogi te ’u higoa.