ʼU Tagata ʼAfeā, ʼe Kotou Fakaʼuhiga Feafeaʼi Takotou Akoʼi Ni ʼIhi?
“E i ai he temi ki te u mea fuli.” —EKELESIASI 3:1.
1, 2. Kotea ʼae neʼe tokagaʼi e te ʼu taupau fakasiliko ʼi te ʼu kokelekasio?
NEʼE ʼamanaki fakaʼosi e te taupau fakasiliko ia tana fono mo te kau tagata ʼafeā. Neʼe ina sioʼi te ʼu tehina pea hake ia ia te ʼofa ʼo ʼuhiga mo te ʼu tagata faʼa gaue ʼaia, ko ʼihi ia natou kua matutuʼa. Kaʼe neʼe kei ʼi ai te tahi faʼahi ʼe hoha ki ai. Neʼe ina fehuʼi fenei age kia natou, “ ʼU tehina, kotea ʼae neʼe kotou fai moʼo akoʼi ni ʼihi ke natou fakahoko te ʼu maʼua ʼi te kokelekasio?” Neʼe iloʼi e te ʼu tehina neʼe fakalotomalohiʼi natou e te taupau ʼi te vahaʼa makehe ʼae kua hili ke natou toʼo he temi moʼo akoʼi ni ʼihi. Hili ia, pea neʼe tali fenei e he tagata ʼafeā: “Neʼe mole matou fai he meʼa.” Pea neʼe fakamoʼoni ki ai te ʼu tagata fuli ʼae.
2 Kapau ʼe ke tagata ʼafeā, pea ʼe lagi ke fai anai mo koe te tali ʼaia. Neʼe tokagaʼi e te ʼu taupau fakasiliko ʼe lahi te ʼu tagata ʼafeā ʼe natou fakaʼaogaʼi tonatou temi moʼo akoʼi te ʼu tehina tupulaga mo matutuʼa ke natou tokakaga ki te kokelekasio.
Kaʼe ʼe feala ke faigataʼa ia te fakahoko ʼo te faʼahi ʼaia. Kotea tona tupuʼaga?3. (1) ʼE fakaha feafeaʼi ʼi te Tohi-Tapu ia te maʼuhiga ʼae ʼo te akoʼi ni ʼihi? He koʼe ʼe tonu ke tou tokagaʼi fuli ia te ako ʼaia? (Vakaʼi te kiʼi nota.) (2) He koʼe ʼe feala ke faigataʼa ki ʼihi tagata ʼafeā hanatou akoʼi ni ʼihi?
3 ʼI totatou ʼuhiga tagata ʼafeā, ʼe tou iloʼi te maʼuhiga ʼae ʼo te toʼo he temi moʼo akoʼi te ʼu tehina. * (Vakaʼi te kiʼi nota.) ʼE tou iloʼi ia te ʼaoga ʼae ʼo he ʼu tehina moʼo tokoni ki te taupau ke malohi te ʼu kokelekasio ʼo toe feia mo te ʼu kokelekasio foʼou ʼo te ka haʼu. (Lau ia Esaia 60:22.) ʼE ui ʼi te Tohi-Tapu ʼe tonu ke tou “fakaako foki ki ni ihi age.” (Lau ia 2 Timoteo 2:2.) Kaʼe, ʼe feala ke faigataʼa te maʼu ʼo he temi ki ai. ʼE tonu foki ke tou tokakaga ki te ʼu meʼa ʼae ʼe ʼaoga ki totatou famili pea mo tatatou gaue ʼi te fale gaue. ʼE toe maʼua foki ke tou tokakaga ki te ʼu meʼa ʼae ʼe ʼaoga ki te kokelekasio mo ʼihi atu ʼu faʼahi ʼe tonu ke fakahoko fakavilivili. Logola ʼe lahi te ʼu gaue ʼe tonu ke fai, kaʼe tou vakaʼi muʼa ia te tupuʼaga ʼo te maʼuhiga ʼae ke tou toʼo he temi moʼo akoʼi ni ʼihi.
ʼE MAʼUHIGA TE AKOʼI ʼO NI ʼIHI
4. ʼI ʼihi temi, he koʼe ʼe holoʼi tuʼumaʼu e te ʼu tagata ʼafeā te akoʼi ʼo te ʼu tehina?
4 He koʼe ʼe feala ke faigataʼa te maʼu ʼo he temi ki te akoʼi ʼo te ʼu tehina ʼi te kokelekasio? ʼE ui fenei anai e ʼihi: “ʼE ʼi ai te tahi age ʼu faʼahi maʼuhiga ʼo te kokelekasio ʼe tonu ke fakahoko pea ko ʼihi faʼahi ʼe tonu ke fakaviliviliʼi. Kapau ʼe mole akoʼi nei ia natou pea ʼe mole tuʼutamakiʼia ai anai ki te kokelekasio.” ʼE moʼoni koa te ʼu manatu ʼaia? ʼE moʼoni, ko ʼihi faʼahi ʼe tonu ke foimo puleʼakiʼi. Kaʼe kapau ʼe tou holoʼi tuʼumaʼu ia te akoʼi ʼo te ʼu tehina pea ʼe fua kovi anai ki te kokelekasio.
5, 6. Kotea te ako ʼe tou maʼu mai te faʼifaʼitaki ʼa te tagata taki motoka pea mo tana taupau ʼo tana motoka? ʼE feala ke tou fakatatau feafeaʼi te faʼifaʼitaki ʼaia mo te akoʼi ʼo te ʼu tehina ʼi te kokelekasio?
5 Tou toʼo he faʼifaʼitaki. Moʼo taupau he motoka, ʼe iloʼi e te tagata taki motoka ia te maʼuhiga ʼae ʼo te fetogi tuʼumaʼu ʼo te lolo. Kaʼe, ʼe manatu anai ia ʼe maʼuhiga te ʼuʼutu ʼo te motoka koteʼuhi ka ʼago pea ʼe mole toe haʼele anai te motoka. ʼE toe manatu anai kapau ʼe maʼumaʼua fau pea ʼe feala pe anai hana tuku ki he tahi temi ia te fetogi ʼo te lolo. Pea tahi, ʼe kei feala pe te hoko atu ʼo te haʼele ʼo te motoka. Kaʼe ʼe feala pe ke hoko ia he tuʼutamaki. Kapau ʼe mole fetogi e te sofea ia te lolo ʼi tona temi totonu, ʼe feala pe anai ke maumau te masini. ʼOsi ʼaia, pea ʼe ʼaoga anai ki ai he toe temi mo he paʼaga lahi moʼo toe faʼu te masini. Kotea te ako ʼe tou maʼu mai ai?
6 ʼE tonu ke tokakaga fakavilivili te ʼu tagata ʼafeā ki te ʼu faʼahi maʼuhiga ʼo te kokelekasio. He kapau ʼe mole natou fai pea ʼe tuʼutamaki ai te kokelekasio. Ohage pe ko te tagata taki motoka ʼe tonu ke ina ʼuʼutu tuʼumaʼu te motoka, ko te kau tagata ʼafeā ʼe tonu ke natou “filifili te u mea e lelei tukupau.” (Filipe 1:10) Kaʼe ko ʼihi tagata ʼafeā ʼi tanatou maʼumaʼua fau ʼi te ʼu faʼahi maʼuhiga ʼaia, ʼe mole kei maʼu honatou temi ki te akoʼi ʼo ʼihi. ʼE hage pe ʼe mole natou tokakaga ʼo fetogi te lolo ʼo te motoka. Kapau ʼe holoʼi tuʼumaʼu e te ʼu tagata ʼafeā te akoʼi ʼo te ʼu tehina, pea ki ʼamuli ʼe mole feʼauga anai ia te ʼu tehina ʼae neʼe akoʼi moʼo tokakaga ki te ʼu gaue ʼae ʼe tonu ke fakahoko ʼi te kokelekasio.
7. ʼE tonu ke tou fakaʼuhiga feafeaʼi ia te ʼu tagata ʼafeā ʼae ʼe natou toʼo he temi ki te akoʼi ʼo ni ʼihi?
1 Petelo 4:10.) ʼE maʼu tapuakina feafeaʼi ai te kokelekasio?
7 Koia ʼaua naʼa tou ui ʼe mole faʼa maʼuhiga te akoʼi ʼo te ʼu tehina. Ko te ʼu tagata ʼafeā ʼae ʼe tokakaga ki te apogipogi ʼo te kokelekasio pea mo natou toʼo he temi ki te akoʼi ʼo ni ʼihi, ʼe ko te ʼu kaugana ʼe fakapotopoto pea ʼe natou maʼuhiga ki te ʼu tehina mo tuagaʼane. (Lau iaKO HE FAKAʼAOGA LELEI ʼAIA ʼO TE TEMI
8. (1) He koʼe ʼe tonu ke akoʼi e te kau tagata ʼafeā ia te ʼu tehina? (2) Kotea ia te maʼua ʼae ʼe tonu ke foimo fakahoko e te kau tagata ʼafeā ʼae ʼe gaue ʼi te ʼu fahaʼi ʼae ʼe ʼaoga lahi ai he tokoni? (Vakaʼi te fakamatala ʼae ʼi ʼa takai “ Ko He Gaue ʼe Tonu Ke Foimo Fai.”)
8 Maʼia mo te kau tagata ʼafeā ʼae kua fotufotuʼa ʼe tonu ke natou fakapotopoto mo manatuʼi ʼe hifohifo anai tonatou malohi, pea ʼe mole toe feala anai hanatou fai te ʼu gaue ʼae ʼe natou fai ʼi te temi nei. (Mikea 6:8) Tahi ʼae meʼa, ʼe tonu ke manatuʼi e te ʼu tagata ʼafeā, ʼe feala ke hoko he ʼu aluʼaga neʼe mole natou ʼamanaki kiai ʼo faigataʼa ai ia te fakahoko ʼonatou maʼua. (Ekelesiasi 9:11, 12; Sakopo 4:13, 14) Koia, ʼuhi ko tonatou ʼofa mo tanatou tokakaga ki te hahaʼi ʼa Sehova, ko te kau tagata ʼafeā ʼe natou gaue kinakina ʼo akoʼi te ʼu tehina tupulaga ʼo ʼuhiga mo te ʼu meʼa neʼe natou ako ʼaki te temi.—Lau ia Pesalemo 71:17, 18.
9. Kotea ia te ʼu aluʼaga ʼae ka hoko mai anai ʼae ʼe maʼuhiga ʼaupito age ai te akoʼi ʼo ni ʼihi?
9 ʼE toe maʼuhiga ki te kau tagata ʼafeā ʼae ʼe natou akoʼi ʼihi koteʼuhi ʼe tokoni anai ʼanatou faiga ki te fakamalohiʼi ʼo te kokelekasio. ʼE fakafealagia e te ako ʼaia ke lahi ia te ʼu tehina ʼae kua akoʼi ke natou tokoni ki te kokelekasio ke natou logotahi pea mo tui ki te ʼAtua. ʼE maʼuhiga tafitō ʼi te temi nei lolotoga te ʼu ʼaho fakamuli, pea ʼe toe maʼuhiga ʼaupito age ia lolotoga te mamahi lahi ʼae ka hoko mai. (Esekiele 38:10-12; Mikea 5:4, 5) Koia, naʼi tagata ʼafeā, kotou toʼo he temi ki te akoʼi ʼo te ʼu tehina ia ʼaho nei.
10. Ke maʼu he temi ki te akoʼi ʼo ni ʼihi, kotea ʼae ʼe ʼaoga anai ke fai e he tagata ʼafeā?
10 ʼE matou iloʼi e kotou maʼumaʼua ʼi te ʼu faʼahi maʼuhiga ʼo te kokelekasio ʼae ʼe tonu ke kotou tokakaga ki ai. Koia, ʼe ʼaoga ai ke kotou toʼo he koga ʼo te temi ki ʼokotou maʼua pea mo fakaʼaogaʼi te temi ʼaia ki te akoʼi ʼo ni ʼihi. (Ekelesiasi 3:1) Ka kotou fai feia pea ʼe ko he fakaʼaoga lelei ʼaia ʼo tokotou temi pea ʼe fua lelei anai ki te kokelekasio ʼi te ka haʼu.
FAKATUʼUTUʼU HE ʼU ALUʼAGA LELEI
11. (1) Kotea ʼae ʼe feala ke tou tokagaʼi ʼo ʼuhiga mo te ʼu tokoni neʼe fai e te ʼu tagata ʼafeā mai te ʼu fenua kehekehe ʼo ʼuhiga mo te akoʼi ʼo ni ʼihi? (2) ʼO mulimuli kia Taaga Lea 15:22, he koʼe ʼe maʼuhiga ke tou talanoa ki te ʼu tokoni ʼae neʼe fai e ʼihi tagata ʼafeā?
11 Mole heʼeki faʼa fualoa, neʼe kumi ki ʼihi tagata ʼafeā ʼae neʼe fua lelei tanatou akoʼi ia te ʼu tehina ke hikihiki tanatou tokoni ki te kokelekasio, ia tona faʼahiga fai. * (Vakaʼi te kiʼi nota.) Ko te ʼu tagata ʼafeā fuli neʼe natou foaki te manatu ʼe tahi. Kotea ʼae ʼe fakamoʼoni ki ai? Ko te ako ʼaia ʼae ʼe fakatafito ki te Tohi-Tapu ʼe ʼaoga ki te kau ako ʼo ‘te ʼu kokelekasio fuli ʼi te potu fuli.’ (1 Kolinito 4:17) Koia ʼi te alatike ʼaeni pea mo ʼae ka hoa mai, ʼe tou talanoa anai ki te ʼu tokoni ʼae neʼe fai e te ʼu tagata ʼafeā ʼaia. (Taaga Lea 15:22) Ko natou ʼae ʼe natou foaki te ako ʼe tou fakahigoaʼi anai ko te kau faiako, pea ko natou ʼae ʼe akoʼi ko te kau ako.
12. Kotea ʼae ʼe tonu ke fakatuʼutuʼu e te faiako, pea kotea tona tupuʼaga?
12 ʼUluaki, ʼe tonu ke fakatuʼutuʼu e te faiako ia he ʼu aluʼaga lelei. He koʼe ʼe maʼuhiga te faʼahi ʼaia? Ohage pe ko he tagata gaue kele ʼe ina gaueʼi te kele ʼi muʼa ʼo tana nunusi te pulapula, ko te faiako ʼe ina teuteuʼi te loto ʼo ia ʼae ʼe ako ʼi muʼa ʼo tana akoʼi age kia ia he ʼu manatu foʼou. Koia, kotea ʼae ʼe feala ke fai e te faiako moʼo fakatuʼutuʼu he ʼu aluʼaga lelei ki te ako? ʼE feala ke ina muliʼi te faʼifaʼitaki ʼo te faiako faiva ʼo te temi muʼa, ia te polofeta ko Samuele.
13-15. (1) Kotea ʼae neʼe ui e Sehova kia Samuele ke ina fai? (2) Neʼe teuteuʼi feafeaʼi e Samuele ia Saulo ki tana gaue foʼou? (Vakaʼi te ʼuluaki pāki) (3) He koʼe ʼe ʼaoga ki te kau tagata ʼafeā ia te fakamatala ʼaia ʼi te Tohi-Tapu ʼo ʼuhiga mo Samuele?
13 ʼI te tahi ʼaho, ia taʼu ʼe 3 000 ki muʼa atu, neʼe ui fenei e Sehova ki te polofeta matuʼa ko Samuele: “I apogipogi, i te hola aeni, e au fekaui atu anai kia koe he tagata mai Pesamino, pea e ke vali anai ia ia aki te lolo ke fakanofo ia ia ko te pule o taku hahai ko Iselaele.” (1 Samuele 9:15, 16) Neʼe mahino kia Samuele ʼe mole toe hoko atu anai tana takitaki ia te puleʼaga ʼo Iselaele pea ʼe loto Sehova ke ina fakanofo he pule foʼou. Koia neʼe maʼu e Samuele he manatu pea mo he fakatuʼutuʼu moʼo teuteuʼi te tagata ʼaia ki tana gaue foʼou.
14 ʼI te ʼaho ake, neʼe felaveʼi ia Samuele mo Saulo, pea neʼe ui fenei Sehova ki te polofeta: “Koeni te tagata.” Mole tuai, pea neʼe fakahoko e Samuele ia te faʼahi ʼae neʼe ina fakatuʼutuʼu ki ai. Neʼe ina fakatuʼutuʼu he aluʼaga ke feala hana palalau mo Saulo. Neʼe fakaafe e Samuele ia Saulo pea mo tana tagata faifekau ki he kaitahi pea mo ina foaki age te ʼu lapalasi lelei pea mo te ʼu aluʼaga lelei. Neʼe ui fenei e Samuele: “Kai, koteuhi nee taupau ia kia koe i te temi ae nee au fakaafe ai te hahai.” ʼI te hili ʼo te kaitahi, neʼe fakaafe leva e Samuele ia Saulo 1 Samuele 9:17-27; 10:1.
ki tona ʼapi. ʼI tanā lolotoga olo, neʼe nā faipalalau ʼi te fiafia. ʼI tanā tau atu ki te ʼapi ʼo Samuele, neʼe nā hahake ki te fuga fale pea “nee palalau leva ia Samuele mo Saulo i oluga o te fale” ʼo aʼu ki tanā olo ʼo momoe. ʼI te ʼaho ake, neʼe fakanofo leva e Samuele ia Saulo pea mo ina foaki age te tahi ʼu fakatotonu. ʼOsi ʼaia pea neʼe mavae leva ia Saulo, kua tokalelei ia ki te ʼu aluʼaga ʼae ka hoko anai.—15 Neʼe fakanofo e Samuele ia Saulo ko he takitaki ʼo he puleʼaga. ʼE mahino ia, ʼe mole tatau ia mo te akoʼi ʼo he tehina ke liliu ʼo tagata ʼafeā peʼe tagata faifekau fakaminisitelio ʼi te kokelekasio. Kaʼe, ʼe feala ke maʼu e te ʼu tagata ʼafeā ia he ʼu ako maʼuhiga mai te faʼahiga teuteuʼi e Samuele ia te loto ʼo Saulo. Tou vakaʼi ia ako ʼe lua ʼo ʼuhiga mo natou.
FAIAKO MO KAUMEʼA LELEI
16. (1) Kotea ʼae neʼe logoʼi e Samuele ʼi te kole age e te kau Iselaele honatou hau? (2) Kotea ʼae neʼe fai e Samuele ʼi te ui age e Sehova ke ina fakanofo ia Saulo?
16 Ke ke lotolelei, ʼaua naʼa ke fakatuatuai. ʼI te ʼuluaki logo ʼa Samuele ki te kole age e te kau Iselaele he tagata ke liliu ko honatou hau tagata, neʼe mamahi tona loto pea mo ina logoʼi tona liʼakina. (1 Samuele 8:4-8) Neʼe tuʼa tolu te ui age e Sehova ke ina tali te kole ʼa te hahaʼi, koteʼuhi neʼe mole fia foaki age e Samuele honatou hau. (1 Samuele 8:7, 9, 22) Logola te ʼu manatu ʼaia ʼa Samuele, kaʼe neʼe mole liliu ia ʼo maheka mo itaita kia ia ʼae ka ina toʼo anai ia tona tuʼulaga pule. ʼI te temi ʼae neʼe ui age e Sehova ke ina fakanofo ia Saulo, neʼe mole fakatuatuai ia Samuele. Neʼe fakalogo ia ʼaki he lotolelei, ʼo mole ʼuhi he neʼe tonu ke ina fai kaʼe ʼuhi ko tona ʼofa ʼae kia Sehova.
ʼU faiako, kotou toʼo he koga ʼo tokotou temi ke kotou fakatahi ai mo te ako
17. ʼE tonu ke faʼifaʼitakiʼi feafeaʼi e te kau tagata ʼafeā ia Samuele ia ʼaho nei pea kotea te fiafia ʼae ʼe natou maʼu ai?
17 Tokolahi te kau tagata ʼafeā kua fotufotuʼa, ʼe feala hanatou faʼifaʼitakiʼi ia Samuele pea mo akoʼi ni ʼihi ʼi te lotolelei. (1 Petelo 5:2) Ko te ʼu tagata ʼafeā agalelei ʼaia ʼe natou lotolelei ke natou akoʼi ni ʼihi pea ʼe mole natou tuʼania ia te fakaha ki ʼanatou kau ako ʼihi koga ʼo ʼanatou pilivilesio ʼi te kokelekasio. Kaʼe, ʼe natou fakaʼuhiga te ʼu tehina ʼaia ʼe ko he kaugā gaue maʼuhiga, ʼe tokoni age anai ki te taupau ʼo te kokelekasio. (2 Kolinito 1:24; ) Pea ʼe fiafia te ʼu tagata ʼafeā agavaivai ʼaia, ʼi tanatou sisio ki te fakaʼaogaʼi e te kau ako ʼonatou faiva moʼo tokoni ki te hahaʼi ʼa Sehova.— Hepeleo 13:16Gaue 20:35.
18, 19. ʼE lava teuteuʼi feafeaʼi e he tagata ʼafeā ia te loto ʼo ia ʼae ʼe ako ki tona akoʼi, pea he koʼe ʼe maʼuhiga?
18 Ke ke aga fakakaumeʼa, kaʼe mole ke faiako pe. ʼI te felaveʼi ʼa Samuele mo Saulo, neʼe feala pe ke ina fakanofo atu aipe ia ia ko he hau ʼaki tana toʼo te moʼi lolo ʼo huhua ki tona ulu. ʼE lagi loto anai e te hau foʼou ke fakanofo ia ia, kaʼe neʼe heʼeki teuteuʼi ke ina puleʼi te hahaʼi ʼa Sehova. Kaʼe, neʼe toʼo e Samuele ia he temi ke ina teuteuʼi te loto ʼo Saulo ki te gaue foʼou ʼaia. ʼI muʼa ʼo tana fakanofo ia Saulo, neʼe nā kakai fakatahi, mo nā haʼele fakatahi, mo nā faipalalau fualoa pea mo nā malolo fakatahi. Neʼe fakatalitali ia Samuele ki te temi totonu ʼae ʼe ina fakanofo ai leva te hau foʼou.
19 ʼE toe moʼoni te faʼahi ʼaia ia ʼaho nei. ʼI muʼa ʼo te kamata akoʼi e he tagata ʼafeā ia he tehina, ʼe tonu ke ina faigaʼi ke nā liliu ʼo kaumeʼa. ʼE kehekehe pe anai te fakatuʼutuʼu ʼaia ʼa he tagata ʼafeā ʼuhi ko te ʼu aluʼaga pea mo te ʼu aga ʼi fenua. Kaʼe, ʼi te koga meʼa pe ʼae ʼe ke maʼuli ai, kapau ʼe ke toʼo he koga ʼo tou temi ke ke fakatahi ai mo ia ʼae ʼe ke ako, ʼe ina iloʼi anai tona maʼuhiga ʼae kia koe. (Lau ia Loma 12:10.) ʼE mahino ia, ko te kau ako ʼe natou lotofakafetaʼi lahi anai ʼuhi ko takotou tokakaga ʼofa age kia natou.
20, 21. (1) Kia kotou, ʼe tonu ke feafeaʼi he faiako lelei? (2) Kotea ʼae ka tou talanoa anai kiai ʼi te alatike ka hoa mai?
20 ʼE moʼoni, ko he faiako lelei ʼe tonu ke ina leleiʼia te akoʼi ʼo ni ʼihi. Kaʼe ko he faiako lelei ʼe maʼua ia ke ʼofa ia ki te tehina ʼae ʼe ina akoʼi. (Vakaʼi ia Soane 5:20.) He koʼe ʼe maʼuhiga? Koteʼuhi kapau ʼe logoʼi e te ako ʼe ke tokaga moʼoni kia ia, ʼe ina lelei anai tona akoʼi. Koia ʼu tagata ʼafeā, kotou faiga ke kotou akoʼi natou, kaʼe mole gata ai ʼe tonu ke kotou liliu ko he kaumeʼa lelei kia natou.—Taaga Lea 17:17; Soane 15:15.
21 Hili te teuteuʼi ʼo te loto ʼo te ako, kua feala leva ke kamata e te tagata ʼafeā ia tona akoʼi. Ko te ʼu puleʼaki fea ʼae ʼe feala ke fakaʼaoga e te tagata ʼafeā? ʼE tou talanoa anai ki ai ʼi te alatike ka hoa mai.
^ pal. 3 Neʼe fakatuʼutuʼu te alatike ʼaeni pea mo ʼae ka hoa mai maʼa natou ʼae kua fualoa ʼi te moʼoni. Kaʼe ʼe tonu ke tou tokagaʼi fuli ia te ako ʼaia. Kotea tona tupuʼaga? Koteʼuhi ʼe tokoni anai ki te ʼu tehina ke natou mahino ki te ʼaoga ʼo te akoako ʼaia kia natou ke lahi age tanatou tokoni ki te kokelekasio. Ka hahaʼi te ʼu tehina ʼae neʼe akoʼi moʼo tokoni ʼi te kokelekasio, pea ʼe tou maʼu tapuakina fuli anai ai.
^ pal. 11 Ko te ʼu tagata ʼafeā ʼaia ʼe maʼuʼuli ʼi ʼOsitalalia, Bangladesh, Belgique, Pelesile, Falani, Guyane, Saponia, Corée, Mekesike, Namibie, Nigéria, Réunion, Lusia, Afelika Saute pea mo Amelika.