1. (1) He koʼe ʼe maʼuhiga tafitō ia ʼaho nei ke tou tauʼi ia Satana? (2) ʼE tou lava iloʼi feafeaʼi ʼe feala hatatou malo ia Satana?

ʼE TAUʼI e Satana ia te kau fakanofo ʼae kei maʼuʼuli ʼi te kele pea mo te tahi ʼu “ovi.” (Soane 10:16) Lolotoga te temi ʼae kei toe, ʼe loto e te Tevolo ke ina maumauʼi te tui ʼa te ʼu kaugana ʼa Sehova. (Lau ia Apokalipisi 12:9, 12.) Kaʼe ʼe feala ke tou malo ia Satana. ʼE ui fenei ʼi te Tohi-Tapu: “Koutou tekei te tiapolo, pea e hola mamao anai ia ia maia koutou.”—Sakopo 4:7.

2, 3. (1) He koʼe ʼe loto e Satana ke tui te hahaʼi ʼe mole maʼuli moʼoni? (2) ʼE tou iloʼi feafeaʼi ʼe maʼuli moʼoni ia Satana?

² Tokolahi ʼe natou kokolo ki te ui ʼae ʼe maʼuli moʼoni ia Satana. ʼI tanatou manatu, ʼe maʼu pe ia Satana mo ʼana kau temonio ʼi te ʼu tohi, mo te ʼu ʼata fakamataku pea mo te ʼu gaoʼi viteo. ʼE manatu te hahaʼi, kapau ʼe kotou popoto ʼe mole kotou tui anai ʼe maʼuli moʼoni ia te ʼu laumalie agakovi. ʼE mamahi koa te loto ʼo Satana moka ʼe mole tui te hahaʼi ʼe maʼuli moʼoni ia ia mo ʼana temonio? Kailoa. Koteʼuhi ʼe faigafua kia Satana ia tana fakahalaʼi ia natou ʼae ʼe mole natou iloʼi papau pe ʼe maʼuli moʼoni. (2 Kolinito 4:4, MN) Pea ʼe fakaʼaogaʼi e  Satana ia te ʼu manatu ʼaia moʼo kakāʼi te hahaʼi.

³ ʼI totatou ʼuhiga kaugana ʼa Sehova, ʼe mole kakāʼi tatou, koteʼuhi ʼe tou iloʼi ʼe maʼuli moʼoni ia te Tevolo. He koʼe ʼe tou iloʼi ia te faʼahi ʼaia? ʼE ui ʼi te Tohi-Tapu neʼe palalau ia Satana kia Eva ʼaki he gata. (Senesi 3:1-5) Neʼe palalau kia Sehova ʼaki tana fakafihiʼi te ʼu fakatuʼutuʼu ʼa Sopo. (Sopo 1:9-12) Neʼe toe faigaʼi e Satana ke ina fakahalaʼi ia Sesu. (Mateo 4:1-10) Pea ʼi te ʼosi fakanofo Hau ʼo Sesu ʼi te taʼu 1914, neʼe kamata “taui” e Satana ia te kau fakanofo ʼae kei ʼi te kele. (Apokalipisi 12:17) ʼE kei hoko atu pe ia te tauʼi e Satana te tui ʼa te kau fakanofo pea mo te tahi ʼu ovi. Ke tou malo ʼi te tau ʼaia, ʼe tonu ke tou tauʼi ia Satana pea mo taupau ia he tui ʼe malohi. ʼE talanoa te alatike ʼaeni kia faʼahi ʼe tolu moʼo fakahoko ia te faʼahi ʼaia.

4. He koʼe ko Satana ʼe ko te faʼifaʼitaki lelei ʼaia ʼo te fialahi?

⁴ ʼE fialahi ʼaupito ia Satana. Neʼe fakafihiʼi e te ʼaselo agakovi ʼaia ia te takitaki ʼa te ʼAtua, pea neʼe faiga ke atolasio age ʼihi kia ia kaʼe mole kia Sehova. Koia, ʼe ko he faʼifaʼitaki lelei ʼaia ʼo te fialahi mo te fiatuʼu. Ko te tupuʼaga la ʼaia, ʼe tonu ai ke tou liakī te fialahi kaʼe tou agavaivai ke feala ai hatatou tauʼi ia Satana. (Lau ia 1 Petelo 5:5.) Kaʼe kotea ia te fakaʼuhiga ʼo te fialahi? ʼE kovi tuʼumaʼu koa?

5, 6. (1) ʼE kovi tuʼumaʼu koa ia te fiameʼameʼa? Kotou fakamahino. (2) Ko te fiameʼameʼa fea ʼae ʼe kovi, pea kotea ia te ʼu faʼifaʼitaki ʼe tou maʼu ʼi te Tohi-Tapu?

⁵ Ohage ko tona ui ʼi te tikisionalio, ko te fialahi ʼe ko te falala mo te fakaʼapaʼapa pe ʼae kia tatou totonu. ʼE ko he tahi faʼahi, “ ʼe tou logoʼi ai ʼe tou fiafia ʼuhi ko he meʼa lelei neʼe tou fai peʼe ko ʼotatou famili peʼe maʼu ia tatou he meʼa ʼe lelei.” ʼE mole ko he meʼa ʼe kovi ia tatatou logoʼi ia te faʼahi ʼaia. Neʼe ui fenei e te apositolo ko Paulo ki te ʼu tehina ʼo Tesalonika: “Koia e matou fakakololia ai o uhiga mo koutou i te u Ekelesia o te Atua, uhi ko takotou kataki pea mo takotou tui i lotomalie o te u fakataga pea mo te u mamahi e kotou lolotoga tali.” (2 Tesalonika 1:4) ʼE feala ke fua lelei kia tatou moka tou fiafia ʼo ʼuhiga mo te gaue ʼa ʼihi pea mo tou toe maʼu ai he fiameʼameʼa. Koia, ʼe mole tonu ke tou ufiufi ʼo ʼuhiga mo totatou famili, mo ʼatatou agaʼi fenua peʼe ko te koga meʼa ʼae neʼe tou lahilahi ake ai.—Gaue 21:39.

⁶ Kaʼe, ʼe ʼi ai te faʼahiga fiameʼameʼa ʼe feala ke ina maumauʼi tafitō ʼatatou felogoʼi mo Sehova. ʼE feala ki te fiameʼameʼa ʼaia ke tou iita moka neʼe fakatonutonuʼi tatou. ʼE toe feala ke mole tou tali te tokoni ʼaki he agavaivai. (Pesalemo 141:5) Ko he tahi ʼe ina maʼu ia te fiameʼameʼa ʼaia, ʼe ko he tahi ʼe manatu ʼe maʼuhiga peʼe “ko he tahi ʼe ina maʼu te fialahi pea ʼe ina ui ʼe maʼoluga age ʼi ʼihi kaʼe ʼe mole ʼi ai hona tupuʼaga.” ʼE fehiʼa Sehova ki te fialahi. (Esekiele 33:28; Amosi 6:8) Kaʼe ʼe loto e Satana ke faʼifaʼitakiʼi e te tagata ia tana fiameʼameʼa ʼaki ia tana laupisiʼi ia ia totonu. Kotou fakakaukauʼi age muʼa ia te fiafia ʼae ʼa Satana ʼi te temi ʼae neʼe fakaha ai e Nimelote, mo Falaone pea mo Apisalome ia tanatou fiameʼameʼa. (Senesi 10:8, 9; Ekesote 5:1, 2; 2 Samuele 15:4-6) Neʼe toe pulihi ʼe Kaino ʼana felogoʼi lelei mo Sehova ʼo tupu ko te fiameʼameʼa. Neʼe fakatonutonuʼi e Sehova ia Kaino kaʼe neʼe lahi ia te fiameʼameʼa ʼa Kaino ʼo tupu ai tana mole fia fakalogo. Neʼe logogataʼa, pea neʼe mole fia fakalogo ki te fakatokaga ʼa te ʼAtua ʼo agahala ai kia Sehova.—Senesi 4:6-8.

7, 8. (1) Kotea ia te fakaʼuhiga ʼo te fehiʼa ki he tahi age lanu? Pea he koʼe ʼe alu tahi mo te fiameʼameʼa? (2) Fakamahino pe ʼe lava maumauʼi feafeaʼi e te fiameʼameʼa ia te tokalelei ʼi te kokelekasio.

 ⁷ Ia ʼaho nei, ʼe fakaha e te hahaʼi ia te ʼu faʼahiga fiameʼameʼa ʼae ʼe kovi. ʼE feala ʼi ʼihi temi ke alu tahi ia te fiameʼameʼa mo te fehiʼa ki he tahi age lanu. Ohage ko tona ui ʼi te tikisionalio, ko te fehiʼa ki te ʼu lanu ʼe ko te aga fakapalatahi mo natou ʼae ʼe mole lanu tahi mo tatou. ʼE toe ui foki “ʼe maʼu e te hahaʼi ʼo he tahi lanu ia he ʼu kalitate pea mo he ʼu fealagia kehekehe, pea ko ʼihi lanu ʼe maʼoluga ake ʼi he tahi age lanu.” ʼE tupu te lahi ʼo te ʼu tau pea mo te faifakapo ʼuhi ko te fakapalatahi.

⁸ ʼE mahino ia, ʼe mole tonu anai ke hoko ia te ʼu aluʼaga ʼaia ʼi te kokelekasio Fakakilisitiano. Kaʼe ʼe feala ke hoko he ʼu fihi ʼi te u tehina mo tuagaʼane ʼo tupu ko te fiameʼameʼa pea ʼe feala ai ke mole natou maʼu te lotololomi. Ko te aluʼaga ʼaia neʼe hoko ki ʼihi ʼuluaki Kilisitiano, koia ʼae neʼe fehuʼi fenei age e Sakopo: “E hau mai fea te u tau, pea e hau mai fea te u fekeaki ia koutou?” (Sakopo 4:1) Kapau ʼe tou fehiʼa ki ʼihi pea mo tou manatu ʼe tou lelei age ia natou, ʼe feala ke tou fai he meʼa ʼe natou lotomamahi ai. (Taaga Lea 12:18) Koia, ʼe feala ki te fiameʼameʼa ke ina maumauʼi ia te tokalelei ʼi te kokelekasio.

9. ʼE tokoni feafeaʼi mai te Tohi-Tapu ke tou tekeʼi ia te fehiʼa ki he tahi age lanu pea mo te ʼu faʼahiga fiameʼameʼa fuli pe ʼae ʼe kovi? (Vakaʼi te ʼuluaki pāki.)

⁹ Kapau ʼe tou manatu ʼe tou laka age ʼi ʼihi, ʼe tonu ke tou manatuʼi ko Sehova ʼe fehiʼa “ki te u loto fuli e fiamaoluga.” (Taaga Lea 16:5) ʼE tonu ke tou sivisivi ʼotatou loto pea mo feʼekeʼaki fenei: ‘ ʼE au manatu koa ʼe au laka age ia natou ʼae ʼe mole lanu tahi mo agaʼi fenua tahi mo au?’ Kapau koia, tou manatuʼi ko te ʼAtua “nee ina fakatupu mai he tagata e tahi te u puleaga fuli.” (Gaue 17:26) Koia ʼe tou ʼomai fuli mai he lanu ʼe tahi koteʼuhi ʼe tou ʼomai mai ia Atama. ʼE ko he agavale mo kapau ʼe tou tui neʼe fakatupu e te ʼAtua ia he ʼu lanu ʼe lelei age ʼi ʼihi atu lanu. Kapau ʼe tou maʼu ia te manatu ʼaia, ʼe tou tuku ia Satana ke ina maumauʼi totatou ʼofa Fakakilisitiano pea mo tatatou logotahi. (Soane 13:35) Moʼo tauʼi ia Satana pea mo malo ʼi ai, ʼe tonu ke tou liakī ia te ʼu faʼahiga fiameʼameʼa fuli pe ʼae ʼe kovi.—Taaga Lea 16:18.

10, 11. (1) He koʼe ʼe feala ke faigafua ia te ʼofa ki te malamanei? (2) Kotea ʼae neʼe hoko kia Temasi ʼi tana ʼofa ki te malamanei?

¹⁰ Ko Satana ʼe ko “te pule o te malama aeni” pea ʼe ina puleʼi. (Soane 12:31; 1 Soane 5:19) ʼE lahi ia te ʼu faʼahi ʼi te malamanei ʼe fakafeagai ki te ʼu pelesepeto Fakatohi-tapu. ʼE mahino ia, ʼe mole ko te ʼu meʼa fuli ʼae ʼi te malamanei ʼae ʼe kovi. Kaʼe, ʼe tou tui papau ʼe fakaʼaogaʼi e Satana ia tona malama ke tou fakahoko ʼotatou holi pea ke tou agahala. Peʼe ina faigaʼi anai ke tou ʼoʼofa ki te malamanei pea ke mole kei tou tokakaga ki tatatou tauhi ʼae kia Sehova.—Lau ia 1 Soane 2:15, 16.

¹¹ Ko ʼihi ʼuluaki Kilisitiano neʼe natou ʼoʼofa ʼi te malamanei. Ohage la, neʼe tohi fenei e Paulo: “Kua siaki au e Temasi; kua ofa ia ia ki te malamanei.” (2 Timoteo 4:10) ʼE mole ui fakahagatonu mai ʼi te Tohi-Tapu  pe kotea ʼae neʼe ʼofa ki ai ia Temasi ʼi te malamanei ke ina liakī ai ia Paulo. ʼE lagi neʼe kamata ʼofa ia Temasi ki te ʼu koloa ʼo lahi age ʼi tana tauhi ʼae kia Sehova. Kapau neʼe moʼoni te faʼahi ʼaia, pea neʼe mole kei ina maʼu ʼona pilivilesio ʼi te tauhi ʼae ki te ʼAtua. Neʼe ʼi ai koa hona fua ia tana alu ki te malama? Kailoa. Neʼe feala pe ke hoko atu e Temasi ia tana tokoni kia Paulo. Neʼe mole feala ke foaki age e te malamanei ia he meʼa ʼe lelei age ʼi te meʼa ʼae neʼe lava foaki age e Sehova.—Taaga Lea 10:22.

12. ʼE lava fakaʼaogaʼi feafeaʼi e Satana ʼotatou holi ʼaki ‘te malohi fakahala ʼo te ’u koloa’?

¹² ʼE feala ke hoko te faʼahi ʼaia kia tatou ia ʼaho nei. ʼI totatou ʼuhiga Kilisitiano, ʼe mole kovi ia tatatou tokakaga ki te ʼu meʼa ʼae ʼe ʼaoga kia tatou pea mo ʼotatou famili. (1 Timoteo 5:8) ʼE loto e Sehova ke tou maʼuli fiafia. Pea ʼe tou iloʼi ia te faʼahi ʼaia, koteʼuhi neʼe ina foaki kia Atama mo Eva ia he palatiso taulekaleka ke nā maʼuʼuli ai. (Senesi 2:9) Kaʼe ʼe feala ke fakaʼaogaʼi e Satana ʼotatou holi ʼaki ‘te malohi fakahala ʼo te ’u koloa.’ (Mateo 13:22) Tokolahi ʼe natou manatu ʼe feala anai ke natou maʼuli fiafia ʼi te paʼaga pea mo te ʼu koloa. Kapau ʼe tou maʼu ia te manatu ʼaia, ʼe feala ke puli ia tatou ia te faʼahi maʼuhiga ʼae ko ʼatatou felogoʼi mo Sehova. Neʼe fakatokaga fenei e Sesu: “E mole feala ki he tahi ke tauhi ki ni pule e toko lua. Koteuhi, e fehia anai ia ia ki te tahi, kae e ofa anai ia ia ki te tahi; pe e pipiki anai ia ia ki te tahi, kae e ina siaki anai te tahi. E mole feala ke kotou tauhi ki te Atua mo Mamone [peʼe ko te ʼu koloa].” (Mateo 6:24) Kapau ʼe tou kaugana pe ki te ʼu koloa, ʼe gata ai tatatou tauhi ʼae kia Sehova. Pea ʼe ko te faʼahi tafitō ʼaia ʼe loto e Satana ke tou fai. ʼAua naʼa tou tuku ia te paʼaga mo te ʼu koloa ke liliu ʼo maʼuhiga age ʼi ʼatatou felogoʼi mo Sehova. Moʼo tauʼi ia Satana pea mo malo ʼi ai, ʼe tonu ke tou maʼu ia he aga fakapotopoto ʼo ʼuhiga mo te ʼu koloa.—Lau ia 1 Timoteo 6:6-10.

13. Neʼe fakamafola feafeaʼi e te malama ʼaeni ia he manatu hala ʼo ʼuhiga mo te nofo ʼohoana pea mo te aga heʼe ʼaoga?

¹³ Ko te tahi hele ʼa Satana ʼe ko te aga heʼe ʼaoga. Tokolahi ʼe natou manatu ʼe mole kei ʼaoga ia te nofo agatonu ʼi te maʼuli fakataumatuʼa pea kua ʼi ai te ʼu tuʼakoi ʼi tonā loto faʼifaʼitaliha. Ohage la, neʼe ui e he fafine gaoʼi ʼata ʼe mole feala ke tou nofo agatonu ki he foʼi tokotahi. Neʼe ina ui fenei: “ ʼE mole au iloʼi he tahi ʼe agatonu peʼe fia nofo agatonu.” Neʼe ui fenei e te tahi tagata gaoʼi ʼata: “ʼE mole au iloʼi pe ʼe ko he agaaga ʼo tatou ke tou ʼohoana mo he tahi ʼo kaku ki te mate.” ʼE fiafia lahi ia Satana moka ʼe laukovi ia te hahaʼi ki te meʼa ʼofa ʼae neʼe foaki mai e te ʼAtua ʼae ko te ʼohoana. ʼE fehiʼa ia te Tevolo ki te fakatuʼutuʼu ʼohoana pea ʼe mole ina loto ke fua manuʼia te nofo ʼohoana. Koia moʼo tauʼi ia Satana pea mo malo ʼi ai, ʼe tonu ke tou maʼu ia te faʼahiga manatu ʼa te ʼAtua ʼo ʼuhiga mo te nofo ʼohoana.

14, 15. Kotea ʼe feala ke kotou fai moka ʼe fakahalaʼi koutou ke kotou fai ia he aga heʼe ʼaoga?

¹⁴ Tatau aipe pe kua tou ʼohoana peʼe kei  tou selipatea kaʼe ʼe tonu ke tou tauʼi ia te ʼu aga heʼe ʼaoga fuli pe. ʼE ko he meʼa koa ʼe faigafua? Kailoa ia. Ohage la, kapau ko koutou ko he tupulaga ʼe feala ke kotou logo ki ʼokotou kaumeʼa neʼe natou fai he ʼu felaveʼi fakasino mo he tahi pe. ʼE toe feala pe ke natou feʼaveʼaki he ʼu kupu mo he ʼu pāki heʼe ʼaoga ʼi ʼanatou telefoni. ʼI te tahi ʼu fenua, ʼe toe momoli ai he ʼu pāki ʼo he ʼu felaveʼi fakasino ki he ʼu fanau. ʼE ui fenei ʼi te Tohi-Tapu: “[Ko] te feauaki e agahala ia ki tona sino totonu.” (1 Kolinito 6:18) Tokolahi ʼe natou tau mo te mamahi pea mo te mate ʼuhi ko te ʼu mahaki ʼae ʼe maʼu ʼi te ʼu felaveʼi fakasino heʼe ʼaoga. Pea ko ʼihi kau tupulaga, neʼe natou fai ia he ʼu felaveʼi fakasino kaʼe mole heʼeki natou ʼohoana, neʼe natou fakahemala ki ʼamuli. ʼE loto e te malamanei ke tou tui ʼe mole ʼi ai anai he ʼu nunuʼa ʼo tatatou mole fakaʼapaʼapa ki te ʼu lao ʼa te ʼAtua. Kapau ʼe tou tui ki te ʼu loi ʼaia, ʼe feala ke kakāʼi tatou e te “malohi kakā ʼo te agahala.”—Hepeleo 3:13, MN.

¹⁵ Kapau ʼe fakahalaʼi koutou ke kotou fai ia he aga heʼe ʼaoga, kotea ʼae ka kotou fai? ʼE tonu ke tou iloʼi ʼe ʼi ai ʼotatou vaivaiʼaga. (Loma 7:22, 23) Kotou faikole kia Sehova ke kotou maʼu ia te malohi. (Filipe 4:6, 7, 13) Kotou tekeʼi ia te ʼu aluʼaga ʼae ʼe feala ai ke kotou fai ia he aga heʼe ʼaoga. (Taaga Lea 22:3) Pea ka ʼe ʼi ai he fakahala kotou foimo liakī.—Senesi 39:12.

16. Kotea ʼae neʼe ui e Sesu ʼi te temi ʼae neʼe faiga ai ia Satana ke ina fakahalaʼi? Pea kotea ia te ako ʼe tou taʼofi mai tana faʼifaʼitaki?

 ¹⁶ Neʼe tuku mai e Sesu ia he faʼifaʼitaki lelei kia tatou. Neʼe mole ina tuku ia ia ke fakahalaʼi e te ʼu fakapapau ʼa Satana. Neʼe mole ina kumi ke ina fakakaukauʼi ʼana fakapapau. Neʼe ina foimo ui fenei atu aipe kia Satana: “E tuu i te tohi.” (Lau ia Mateo 4:4-10.) Neʼe iloʼi e Sesu ia te Folafola ʼa te ʼAtua, koia ʼae neʼe ina foimo ui atu aipe ʼe tuʼu ʼi te tohi ʼi te temi ʼae neʼe faiga ai ia Satana ke ina fakahalaʼi ia ia. Moʼo tauʼi ia Satana pea mo malo ʼi ai, ʼaua naʼa tou tuku ke fakahalaʼi tatou ke tou fai he aga heʼe ʼaoga.—1 Kolinito 6:9, 10.

17, 18. (1) Kotea ia te tahi ʼu hele ʼe fakaʼaogaʼi e Satana, pea he koʼe ʼe tonu ke tou nofo teuteu ki ai? (2) Kotea ʼae ʼe hoko anai kia Satana, pea he koʼe ʼe fakalotomalohiʼi tatou ke tou faʼa kataki?

¹⁷ Ko te fialahi, mo te fia maʼu koloa pea mo te aga heʼe ʼaoga ʼe ko te ʼu hele ʼaia ʼe tolu ʼa Satana. Kaʼe ʼe lahi ia te tahi age ʼu hele. Ohage la, ʼe ʼi ai ʼihi kau Kilisitiano ko ʼonatou famili ʼe natou fakafeagai kia natou peʼe ko ʼonatou kaugā ako ʼe natou vaʼi ia natou. Ko ʼihi ʼe natou maʼuʼuli ʼi he ʼu fenua ʼe tapuʼi ai e te ʼu puleʼaga ia tanatou faifakamafola. ʼE tou talitali ke tou tauʼi ia te ʼu faigataʼaia peʼe ko he ʼu ʼahiʼahi. Neʼe fakatokaga fenei mai Sesu kia tatou: “E fehia anai kia koutou te hahai fuli, o tupu ko toku huafa; kae ko ae e kataki fualoa anai o kaku ki te fakaosi e haofaki anai.”—Mateo 10:22.

¹⁸ ʼE tou lava tauʼi feafeaʼi ia Satana pea mo malo ʼi ai? Neʼe ui fenei e Sesu: “I takotou kataki fualoa, pea e kotou haofaki anai okotou laumalie.” (Luka 21:19) Ko te ʼu agakovi fuli ʼe feala ke fai mai e he tagata kia tatou ʼe mole heʼe gata anai ia. Pea ʼe mole feala ki he tahi ke ina fakagata ʼatatou felogoʼi mo te ʼAtua kaʼe ʼe gata pe kia tatou totonu. (Loma 8:38, 39) Tatau aipe pe ʼe mamate ʼihi ʼu kaugana agatonu ʼa Sehova, ʼe mole fakaʼuhiga leva ia neʼe malo ia Satana. Koteʼuhi ʼe fakatuʼuake anai natou e Sehova. (Soane 5:28, 29) Kaʼe ʼe mole ʼi ai he ka haʼu ʼa Satana. Ka fakaʼauha anai ia te malama ʼaeni, ʼe li anai ki te vanu lolotoga taʼu ʼe 1 000. (Apokalipisi 20:1-3) Hili te ʼu taʼu ʼe afe ʼo te pule ʼa Sesu, ʼe “veteki anai Satana mai tona pilisoni” pea ʼe ina toe fakahalaʼi fakaʼosi anai ia te hahaʼi haohaoa ʼi te kele. Hili ʼaia, ʼe fakaʼauha anai ia ia. (Apokalipisi 20:7-10) Logo la ʼe mole ʼi ai he ka haʼu ʼa te Tevolo, kaʼe ʼe ʼi ai totatou ka haʼu. Koia, kotou haga tauʼi ia Satana pea kotou taupau malohi ia takotou tui. ʼE feala ke kotou tauʼi ia Satana pea mo malo ʼi ai.