1. Moka tou faifakamafola, ʼe tou lava fakaʼaogaʼi feafeaʼi ia te faikole ʼa Sesu ʼae ʼe tuʼu ia Mateo 6:9-13?

TOKOLAHI te hahaʼi ʼe natou iloʼi ia te faikole ʼae ʼe tuʼu ia Mateo 6:9-13. Moka tou faifakamafola, ʼe tou fakaʼaogaʼi ai te faikole ʼaia moʼo akoʼi ki te hahaʼi ko te Puleʼaga ʼe ko he puleʼaga moʼoni mai te ʼAtua pea ʼe ina fakaliliu anai te kele ko he palatiso. Pea ʼe tou toe fakaʼaogaʼi mo te ʼu kupu ʼaeni “ke tapuha tou huafa” moʼo fakaha ʼe ʼi ai te huafa ʼo te ʼAtua pea ʼe tonu ke tou taupau ke maʼa tona huafa.—Mateo 6:9.

2. ʼE tou iloʼi feafeaʼi neʼe mole loto e Sesu ke tou lau liuliuga he ʼu kupu ʼe tatau ʼi te temi fuli pe ʼae ʼe tou faikole ai?

² Neʼe loto koa e Sesu ke tou lau liuliuga te ʼu kupu ʼi te temi fuli pe ʼae ʼe tou faikole ai, ohage ko tona fai e te tokolahi? Kailoa. Neʼe ui fenei e Sesu: “Ka kotou faikole, aua naa kotou liuliuga ni kupu noa.” (Mateo 6:7) ʼI te tahi ʼaho, ʼi tana akoʼi ki ʼana tisipulo pe ʼe feafeaʼi te faikole, neʼe ina lau te faikole kaʼe neʼe mole ina fakaʼaogaʼi he ʼu kupu ʼe tatau. (Luka 11:1-4) Koia ʼae neʼe foaki mai ai e Sesu ia te faikole faʼifaʼitaki moʼo akoʼi ʼo tatou pe kotea te ʼu meʼa ʼe tonu ke tou kole.

3. Kotea ia te ʼu fehuʼi ʼe feala ke tou fai moka tou ako ia te faikole tamatou Tamai ʼae ʼi selo?

 ³ ʼI te alatike ʼaeni pea mo ʼae ka hoa mai, ʼe tou ako anai ia te faikole tamatou Tamai ʼae ʼi selo. Pea ʼi tatatou fai te faʼahi ʼaia, tou fai ia te ʼu fehuʼi ʼaeni: ‘ ʼE tokoni feafeaʼi mai te faikole ʼaia moʼo hikihiki ʼaku faikole? Pea ko te faʼahi ʼae ʼe maʼuhiga age, ʼe au maʼuliʼi koa ia te faikole ʼaia?’

4. Kotea ʼae ʼe fakamanatuʼi mai e te ʼu kupu ʼaeni “tamatou Tamai”? Pea he koʼe ko Sehova ʼe ko tatatou Tamai?

⁴ Neʼe kamata fenei e Sesu te faikole: “Tamatou Tamai.” ʼE fakamanatuʼi mai kia tatou ko Sehova ʼe ko te Tamai ʼo ʼotatou tehina mo tuagaʼane fuli ʼi te malamanei. (1 Petelo 2:17) Ko natou ʼae neʼe filifili e Sehova ke natou maʼuʼuli ʼi te lagi neʼe vavae natou ko ʼona foha, koia ʼae ʼe ko hanatou Tamai ʼi hona aluʼaga makehe. (Loma 8:15-17) Pea ʼe toe feala kia natou ʼae ʼe maʼuʼuli anai ʼo talu ai ʼi te kele ke natou fakahigoaʼi ia ia “Tamai.” Koteʼuhi ʼe foaki age e Sehova te maʼuli pea ʼe tokaga ki te ʼu meʼa ʼae ʼaoga kia natou ʼaki he lotoʼofa. ʼE fakahigoaʼi anai natou ko “te u foha a te Atua” moka natou haohaoa pea mo nonofo agatonu kia Sehova ʼi te ʼahiʼahi fakaʼosi.—Loma 8:21; Apokalipisi 20:7, 8.

5, 6. Kotea ia te meʼa ʼofa lelei ʼe feala ke foaki e te ʼu matuʼā ki ʼanatou fanau? Pea kotea ʼae ʼe tonu ke fai e te ʼu fanau takitahi ʼaki te meʼa ʼofa ʼaia? (Vakaʼi te ʼuluaki pāki.)

⁵ Moka tokoni te ʼu matuʼā ki ʼanatou fanau ke natou mahino ko Sehova ʼe ko tanatou Tamai ʼae ʼe ʼi selo pea mo natou akoʼi ke natou faikole kia te ia, ʼe natou foaki age he meʼa ʼofa. ʼE ui fenei e te taupau ʼo te siliko ʼi Afelika Saute: “Talu mai te ʼaho ʼae neʼe tupu ai ʼoku ʼofafine, neʼe au faikole mo natou ʼi te po fuli ʼi te temi pe ʼae ʼe au nofo ai ʼi fale. ʼE tau ui e ʼoku ʼofafine ʼe mole kei natou manatuʼi te ʼu kupu fuli ʼae neʼe au ui ʼi ʼaku faikole. Kaʼe neʼe natou manatuʼi ia te ʼu meʼa ʼae neʼe natou logoʼi, ia te ʼuhiga taputapu ʼo te ʼu felogoʼi mo tatatou Tamai, ko Sehova, pea mo tanatou logo fimalie ai. ʼI te temi pe ʼae kua feala ai tanatou faikole, neʼe au fakalotomalohiʼi natou ke natou faikole leʼo lahi ke feala haku fagono ki ʼanatou manatu pea mo te ʼu meʼa ʼae ʼe natou logoʼi ʼo ʼuhiga mo Sehova. Neʼe ko he temi faigamalie ʼaia ke au iloʼi pe kotea ʼae ʼi ʼonatou loto. Pea neʼe feala ke au akoʼi kia natou he ʼu faʼahi maʼuhiga ʼo te faikole tamatou Tamai ʼae ʼi selo ke feala hanatou fai he ʼu faikole lelei.”

⁶ Neʼe haga hoko atu aipe ia te nonofo ovi ʼo ʼona ʼofafine kia Sehova maʼia mo te temi ʼae kua natou lalahi ai. Kua natou ʼohoana pea mo tauhi temi katoa kia Sehova mo ʼonatou ʼohoana. Ko te meʼa ʼofa lelei ʼe feala ke foaki e te ʼu matuʼā ki ʼanatou fanau, ʼe ko te akoʼi kia natou ko Sehova ʼe ko he Tahi ʼe maʼuli moʼoni pea ʼe feala ke natou liliu ko hona kaumeʼa. Kaʼe ʼe tonu ki te ʼu fanau takitahi ke natou taupau malohi ia te aga fakakaumeʼa ʼaia mo Sehova.—Pesalemo 5:12, 13; 91:14.

7. Kotea ia te pilivilesio ʼe tou maʼu? Pea kotea ʼe tonu ke tou fai?

⁷ ʼE tou maʼu ia te pilivilesio ʼae ke tou iloʼi te huafa ʼo te ʼAtua pea mo tou liliu ko ‘he hahaʼi ʼe ina fua tona huafa.’ (Gaue 15:14; Esaia 43:10) ʼE tou faikole ke fakatapuha te huafa ʼo te ʼAtua, ko tona fakaʼuhiga ke fakamaʼoniʼoniʼi tona huafa. Pea ʼe tou toe kole kia Sehova ke tokoni mai ke ʼaua naʼa tou fai peʼe ui he meʼa ʼe feala ai ke tou fakalainoaʼi ia ia. ʼE mole tonu ke tou hage  ko ʼihi ʼi te temi ʼo te kau apositolo, ʼae neʼe mole natou maʼuliʼi ia te ʼu meʼa ʼae neʼe natou akoʼi ki ʼihi. Neʼe faitohi fenei ia Paulo kia natou: “Kua laukovii te huafa o te Atua i te kau pagani o tupu ko koutou.”—Loma 2:21-24.

8, 9. Kotou tuku mai he faʼifaʼitaki pe ʼe tokoni feafeaʼi ia Sehova kia natou ʼae ʼe natou fia fakatapuha tona huafa.

⁸ ʼE tou fai ia meʼa fuli moʼo fakatapuha te huafa ʼo Sehova. Ko he tuagaʼane ʼi Norvège neʼe ina taupau tokotahi tana tama ʼe taʼu lua hili te mate ʼo tona ʼohoana, ʼe ina ui fenei: “Neʼe ko he temi faigataʼa ʼaupito ʼi toku maʼuli. Neʼe au faikole ʼi te ʼaho fuli, teitei pe ʼi te hola fuli ke au maʼu te malohi ke mole au lotovaivai ai pea ke mole fakalainoaʼi ai e Satana ia Sehova ʼuhi pe neʼe au toʼo he tonu ʼe mole fakapotopoto peʼe neʼe mole au nofo agatonu. Neʼe au fia fakatapuha ia te huafa ʼo Sehova pea neʼe au loto ke toe sio taku tama ki tana tamai ʼi te Palatiso.”—Taaga Lea 27:11.

⁹ Neʼe tali koa ia Sehova ki ʼana faikole? ʼEi. ʼI tana fakatahi tuʼumaʼu mo te ʼu tehina mo tuagaʼane, neʼe fakalotomalohiʼi ai ia ia. Hili ki ai taʼu ʼe nima, neʼe ʼohoana mo te tagata ʼafeā. Pea neʼe papitema tana tama ʼae kua taʼu 20. ʼE ina ui fenei: “ʼE au fiafia ʼi te tokoni mai ʼo toku ʼohoana ki tona taupau.”

10. ʼE fakatapuha katoa feafeaʼi anai e te ʼAtua tona huafa?

¹⁰ ʼE fakatapuha katoa anai e Sehova tona huafa moka ina fakaʼauha ia natou ʼae ʼe natou fakalainoaʼi ia ia pea mo liakī tona ʼuhiga Pule. (Lau ia Esekiele 38:22, 23.) ʼI te temi ʼaia, ʼe liliu anai te hahaʼi ʼo haohaoa pea ko natou fuli ʼi te lagi mo te kele ʼe natou tauhi anai kia Sehova pea mo fakakololiaʼi tona huafa maʼoniʼoni. Pea ko tatatou Tamai ʼe “afio katoa [anai] . . . i te meafuape.”—1 Kolonito 15:28, Tauhi Foou.

11, 12. ʼI te taʼu 1876, kotea ʼae neʼe fai e Sehova moʼo tokoni ki tana hahaʼi ke natou mahino ki ai?

¹¹ ʼI muʼa ʼo te toe liliu ʼa Sesu ki te lagi, neʼe kole fenei age e ʼana tisipulo: “Aliki, pe ko te temi koa aeni e ke toe fakatuu ai anai te puleaga o Iselaele?” Neʼe tali age e Sesu neʼe mole heʼeki hoko mai te temi ʼae ke natou iloʼi ai pe ko te temi fea ʼae ka pule anai ia te Puleʼaga ʼo te ʼAtua. Neʼe ina ui ki ʼana tisipulo ke natou tokakaga tafitō ki te gaue maʼuhiga ʼae ko te faifakamafola. (Lau ia Gaue 1:6-8.) Pea neʼe ina toe akoʼi kia natou ke natou faikole ke hoko mai te Puleʼaga ʼo Te ʼAtua pea mo fakatalitali ki te temi ʼaia. Koia ʼae ʼe kei tou faikole ai ke hoko mai ia te Puleʼaga.

¹² ʼI te fakaovi mai ʼo te temi ʼae ke kamata pule ai Sesu ʼi te lagi, neʼe tokoni Sehova ki tana hahaʼi ke natou mahino pe hoko anai ʼi te taʼu fea. ʼI te taʼu 1876, neʼe tohi e Charles Taze Russell ia te alatike ʼaeni “Les temps des Gentils : Quand prendront-ils fin ?” (ʼE Fakaʼosi Anai ʼAfea Te Temi ʼo Te Kau Senetile?) Neʼe ina fakamahino ʼe tatau ia te ʼu “tau e fitu” ʼae ʼe maʼu ʼi te lea fakapolofeta ʼo Taniela mo “te ʼu temi ʼae kua fakakatofa ki te ʼu puleʼaga” ʼo te lea fakapolofeta ʼa Sesu. ʼE fakamahino ʼi te alatike ʼaia ʼe fakaʼosi anai te ʼu temi ʼaia ʼi te taʼu 1914. * (Vakaʼi te kiʼi nota.)—Taniela 4:16; Luka 21:24, MN.

13. Kotea ʼae neʼe hoko ʼi te taʼu 1914? Pea kotea ʼae neʼe fakamoʼoni e te ʼu aluʼaga ʼae neʼe hoko ʼi te malamanei talu mai te taʼu 1914?

¹³ ʼI te taʼu 1914, neʼe kamata te tau ʼi Eulopa pea neʼe mafola atu aipe ʼi te malamanei katoa. ʼUhi ko te tau, neʼe lahi ai te ʼu hoge. Pea ʼi te fakaʼosi ʼo te tau ʼi te taʼu 1918,  neʼe ʼi ai he taʼi mahaki kovi neʼe to ʼi te malamanei pea neʼe mamate ai te tokolahi ʼo laka age ia natou ʼae neʼe mamate ʼi te tau. Ko te ʼu aluʼaga ʼaia neʼe ko he koga ʼo te “fakailoga” ʼae neʼe fakaha e Sesu. Neʼe fakamoʼoni e te fakailoga ʼaia ia te fakanofo Hau ʼo Sesu ʼi te lagi ʼi te taʼu 1914. (Mateo 24:3-8; Luka 21:10, 11) ʼI te taʼu ʼaia, ‘neʼe alu leva ia ohage he tagata toʼa ke ina fakaʼosi tana malo.’ (Apokalipisi 6:2) Neʼe li ifo e Sesu ia Satana pea mo ʼana temonio mai te lagi ki te kele. Hili ia, neʼe hoko ia te lea fakapolofeta ʼaeni: “Malaia ki te kele mo te tai! Koteuhi kua hifo te tiapolo kia kolua, kua mapula i he ita lahi, koteuhi e ina iloi kua nounou pe tona temi.”—Apokalipisi 12:7-12.

14. (1) He koʼe ʼe kei tou faikole ke hoko mai te Puleʼaga ʼo te ʼAtua? (2) Kotea ia te gaue maʼuhiga ʼe tonu ke tou fai ia ʼaho nei?

¹⁴ Neʼe tokoni mai te lea fakapolofeta ʼae ʼe tuʼu ia Apokalipisi kapite 12, ke tou mahino pe koʼe neʼe kamata hoko he ʼu aluʼaga fakamataku ʼi te kele ʼi te temi ʼae neʼe fakanofo Hau ai ia Sesu ʼi te Puleʼaga ʼo te ʼAtua. Logo la kua pule Sesu ʼi te lagi kaʼe ʼe kei pule pe ia Satana ʼi te kele. Kaʼe kua vave ‘fakaʼosi pe anai e Sesu tana malo’ ʼaki tana pulihi ia te agakovi fuli pe ʼi te kele. ʼI tatatou fakatalitali ki ai, tou haga faikole ke hoko mai te Puleʼaga ʼo te ʼAtua pea mo maʼumaʼua ʼi te fakamafola ʼo te Puleʼaga ʼaia. Ko tatatou gaue ʼe ina fakahoko ia te lea fakapolofeta ʼaeni ʼa Sesu: “E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.”—Mateo 24:14.

15, 16. ʼE tonu pe koa ke tou faikole ke fai te finegalo ʼo te ʼAtua ʼi te kele? Kotou fakamahino.

¹⁵ Kua hili ki ai teitei taʼu ʼe 6 000, neʼe fakahoko ia te finegalo ʼo te ʼAtua ʼi te kele. Koia ʼae neʼe ui ai e Sehova ko meʼa fuli “nee lelei tukupau.” (Senesi 1:31) Pea neʼe  agatuʼu ia Satana, pea talu mai te temi ʼaia tokolahi te hahaʼi neʼe mole natou fai ia te finegalo ʼo te ʼAtua. Kaʼe ia ʼaho nei ko te teitei toko valu miliona hahaʼi ʼe natou tauhi kia Sehova. ʼE natou faikole ke fai te finegalo ʼo te ʼAtua ʼi te kele pea ʼe natou toe fakahoko te finegalo ʼo te ʼAtua. ʼE natou fai te ʼu meʼa ʼae ʼe leleiʼia e te ʼAtua pea ʼe natou akoʼi ki ʼihi ʼaki he faʼafai ia tona Puleʼaga.

¹⁶ Ohage la, ʼi Afelika ko te tuagaʼane misionea ʼe taʼu 80 neʼe papitema ʼi te taʼu 1948 ʼe ina ui fenei: “ ʼE au tau faikole ke ʼaʼahi tuʼumaʼu te ʼu hahaʼi fuli ʼae ʼe hage ko ni ovi pea mo tokoni kia natou ke natou iloʼi ia Sehova naʼa tauhala. Koia ʼae moka au faifakamafola ki he tahi, ʼe au kole te poto ke feala ke malave ki tona loto. Pea ʼo ʼuhiga mo natou ʼae kua natou tali ia te moʼoni, ʼe au faikole kia Sehova ke ina tapuakinaʼi ʼatatou faiga ke feala hatatou tokakaga kia natou.” Neʼe tokoni ia te tuagaʼane ʼaia ki te tokolahi ke natou ako ʼo ʼuhiga mo Sehova. Kotou fakakaukauʼi age ia te faʼafai ʼa ʼihi kua matutuʼa ʼi te fai ʼo te finegalo ʼo Sehova.—Lau ia Filipe 2:17.

17. Kotea ʼe kotou logoʼi ʼo ʼuhiga mo te ʼu aluʼaga ʼae ka fakahoko anai e Sehova ki te kele?

¹⁷ ʼI tatatou fakatalitali ki te fakaʼauha e Sehova ʼona fili ʼi te kele, ʼe tonu ke tou haga faikole ke fai tona finegalo. Pea ʼe liliu anai te kele ko he palatiso pea ʼe fakatuʼake anai ia te toko lauʼi miliale hahaʼi. Neʼe ui fenei e Sesu: “E hau te hola ae e logo ai anai natou fuli e nonofo i te u tanuma ki tona leo, pea e natou feulufi anai ki tua.” (Soane 5:28, 29) Kotou fakakaukauʼi age muʼa te fiafia ʼe tou maʼu anai moka tou fakatalitali ia natou ʼae ʼe tou ʼoʼofa ai ʼi te fakatuʼuake. ʼE “holoholoi anai te u loimata fuli” e te ʼAtua. (Apokalipisi 21:4) Tokolahi ia natou ʼae ka fakatuʼuake anai ʼe ko te “kau agahala” peʼe heʼe faitotonu, ʼae neʼe mole natou ako te moʼoni ʼo ʼuhiga mo Sehova pea mo Sesu. ʼE tou fiafia anai ʼi te akoʼi kia natou ia te finegalo ʼo te ʼAtua ke feala hanatou maʼu te “mauli heegata.”—Gaue 24:15; Soane 17:3.

18. Kotea te ʼu faʼahi maʼuhiga ʼae ʼe ʼaoga ki te tagata?

¹⁸ Moka hoko mai te Puleʼaga ʼo te ʼAtua, ʼe ina fakatapuha anai tona huafa pea ʼe tauhi fuli anai te ʼatulaulau kia Sehova ʼi te logotahi. ʼEi, ʼe foaki anai e te ʼAtua ki te tagata te ʼu meʼa fuli ʼae ʼe ʼaoga kia natou, moka ina tali anai ki te ʼu kole ʼe tolu ʼo te faikole tamatou Tamai ʼae ʼi selo. ʼI te alatike ʼae ka hoa mai, ʼe tou vakaʼi anai he tahi ʼu puani maʼuhiga neʼe akoʼi mai e Sesu ke tou kole.