1, 2. Neʼe akoʼi feafeaʼi tatou e Sehova ke tou ʼoʼofa kia te ia?

ʼE AKOʼI lelei anai e he tamai ia tana fanau mo kapau ʼe ina tuku he faʼifaʼitaki lelei. Ka ina fakaha te ʼofa ki tana fanau, ʼe ina akoʼi age kia natou pe ʼe feafeaʼi te fakaha ʼo te ʼofa. Ko te ʼofa ʼae ʼo tatatou Tamai ko Sehova kia tatou, ʼe mole hona fakatatau. Koia ʼae ʼe tou ako ai te ʼofa “koteuhi nee uluaki ofa ia kia tatou.”—1 Soane 4:19.

² Neʼe fakaha feafeaʼi e Sehova “nee uluaki ofa ia kia tatou”? ʼE ui fenei ʼi te Tohi-Tapu: “I te temi nee kei tou agahala ai, nee mate ia Kilisito o uhiga mo tatou.” (Loma 5:8) Neʼe foaki mai e tatatou Tamai ʼofa ko Sehova ia tona ʼAlo ko he totogi moʼo fakaʼateaina tatou mai te agahala mo te mate. Neʼe feala ʼaki te meʼa ʼofa maʼuhiga ʼaia ke tou fakaovi ai kia Sehova pea mo tou fakaha totatou ʼofa kia te ia. ʼAki tana fai te toe sakilifisio ʼaia, neʼe tuku ai e Sehova ia he faʼifaʼitaki. Neʼe ina akoʼi ai tatou ke tou fakaha totatou ʼofa ʼo mole tou manatu pe kia tatou kaʼe ke tou lotofoaki.—1 Soane 4:10.

3, 4. ʼE tou fakaha feafeaʼi ʼe tou ʼoʼofa ki te ʼAtua?

³ Ko te ʼofa ʼe ko te kalitate tafitō ʼaia ʼo Sehova. Koia ʼae neʼe ui ai e Sesu ko te fakatotonu ʼaeni ʼe maʼuhiga tokotahi: “E ke ofa  anai ki te Aliki, tou Atua, i tou loto katoa, mo tou laumalie [“maʼuli,” MN] katoa, mo tou atamai katoa, pea mo tou malohi katoa.” (Maleko 12:30) ʼE loto e Sehova ke tou ʼoʼofa kia te ia ʼaki totatou “loto katoa.” Kapau ʼe tou ʼoʼofa ki he tahi ʼo laka age ia Sehova, ʼe lotomamahi ai anai. Kaʼe ʼe mole gata pe totatou ʼofa ʼi te ʼu meʼa ʼae ʼe tou logoʼi ʼi totatou loto. ʼE toe fakaʼamu e Sehova ke tou ʼoʼofa kia te ia ʼaki totatou “atamai katoa” pea mo totatou “malohi katoa.” Ko tona fakaʼuhiga, ke tou fakaha totatou ʼofa kia Sehova ʼaki tatatou faʼahiga fakakaukau pea mo tatatou faʼahiga gaue.—Lau ia Mikea 6:8.

⁴ Koia, tou fakaha ʼe tou ʼoʼofa moʼoni kia Sehova ʼaki totatou malohi katoa pea mo ʼotatou fealagia. ʼI te alatike ʼae kua ʼosi, neʼe tou talanoa kia faʼahi ʼe fa ʼe fakaha ai e Sehova ia tona ʼofa lahi ʼae ki tana fanau. Tou vakaʼi ʼi te temi nei pe ʼe feala feafeaʼi hatatou fakamalohi ia totatou ʼofa kia Sehova pea mo tou fakaha ʼe tou ʼoʼofa kia te ia.

5. Ka tou fakakaukauʼi te ʼu meʼa fuli ʼae neʼe fai e Sehova maʼa tatou, kotea ʼae ʼe tou loto ke tou fai?

⁵ Ka foaki atu e he tahi he meʼa ʼofa kia koutou, ʼe mahino ia ʼe kotou lotofakafetaʼi anai. Pea ʼe kotou fakaʼaogaʼi anai koteʼuhi ʼe kotou leleiʼia te meʼa ʼofa ʼaia. Neʼe tohi fenei e Sakopo: “Ko te u kalasia lelei fuli pea mo te u meaofa lelei tukupau fuli, e natou hihifo mai oluga, mai te Tamai o te u malama, ae e mole toe fetogi pee mohu lakaga.” (Sakopo 1:17) ʼE tou lotofakafetaʼi koteʼuhi ʼe foaki mai e Sehova ia meʼa fuli ʼae ʼe ʼaoga kia tatou pea mo tou fiafia ai. ʼE tou mahino ai ki te lahi ʼae ʼo tona ʼofa kia tatou pea ʼe tou loto ke tou toe fakaha totatou ʼofa kia te ia. ʼE mole ko te faʼahi koa la ʼaia ʼe ke logoʼi?

6. Kotea ʼae neʼe tonu ke fai e te kau Iselaele mo kapau neʼe natou loto ke hoko atu te tapuakina ʼa Sehova?

⁶ Neʼe foaki e Sehova he ʼu meʼa lelei ki te kau Iselaele. Lolotoga ni taʼu ʼe lauʼi teau, neʼe ina takitaki natou ʼaki ʼana lao pea mo ina foaki age ia meʼa fuli ʼae ʼe ʼaoga kia natou. (Tetelonome 4:7, 8) Pea neʼe feala ke fakaha e te kau Iselaele tonatou ʼofa kia Sehova ʼaki tanatou mulimuli ki ʼana lao. Ohage la, ʼi te temi ʼae neʼe natou momoli ai ʼanatou sakilifisio kia Sehova, neʼe tonu ke natou foaki kia te ia “te u uluaki fua o te kele” ʼae ʼe lelei tukupau. (Ekesote 23:19) Neʼe iloʼi e te kau Iselaele, kapau neʼe natou fakalogo kia Sehova pea mo foaki kia te ia ʼanatou meʼa ʼae ʼe maʼuhiga, ʼe hoko atu pe anai tonatou tapuakinaʼi e Sehova.—Lau ia Tetelonome 8:7-11.

7. ʼE tou fakaʼaogaʼi feafeaʼi ʼatatou meʼa maʼuhiga moʼo fakaha kia Sehova ʼe tou ʼoʼofa kia te ia?

⁷ ʼE tou toe fakaha totatou ʼofa kia Sehova, ʼaki tatatou foaki kia te ia ʼatatou meʼa ʼae ʼe maʼuhiga. (Taaga Lea 3:9) Ko tona fakaʼuhiga, ke tou fakaʼaogaʼi ʼotatou koloa moʼo fakamaʼuhigaʼi ia ia. Ohage la, ʼe feala ke tou foaki he ʼu meʼa ʼofa moʼo lagolago ki te gaue ʼo te Puleʼaga ʼo te ʼAtua ʼi tatatou kokelekasio pea mo te malamanei katoa. Pe ʼe lahi peʼe veliveli te ʼu meʼa ʼae ʼe tou maʼu, kaʼe ʼe feala kia tatou fuli ke tou fai te faʼahi ʼaia moʼo fakaha totatou ʼofa kia Sehova. (2 Kolinito 8:12) Kaʼe ʼe toe feala ke tou fakaha totatou ʼofa kia Sehova ʼi hona tahi age aluʼaga.

8, 9. Kotea he tahi aluʼaga ʼe tou fakaha ai kia Sehova ʼe tou ʼoʼofa kia te ia? Kotea ʼae neʼe fai e Mike mo tona kiʼi famili?

⁸ Neʼe akoʼi tatou e Sesu ke tou haga fakamuʼamuʼa ia te Puleʼaga pea ke ʼaua tatatou tuʼania ki te meʼa kai mo te meʼa laofi. Pea ʼe fakapapauʼi mai e tatatou Tamai ʼe ina foaki mai anai te ʼu meʼa ʼae ʼe ʼaoga kia tatou. (Mateo  6:31-33) ʼE tou falala kia Sehova pea ʼe tou iloʼi ʼe ina fakahoko anai tana fakapapau ʼaia. Ka tou ʼoʼofa moʼoni ki he tahi, ʼe tou falala foki ki ai. Koia kapau ʼe tou falala lahi kia Sehova, pea ʼe toe malohi ai totatou ʼofa kia te ia. (Pesalemo 143:8) Pea ʼe feala ke tou fai te ʼu fehuʼi ʼaeni: ‘ʼI ʼaku fakatuʼutuʼu mo taku faʼahiga fakaʼaogaʼi ʼo toku temi pea mo toku malohi, ʼe ha ai koa ʼe au ʼofa moʼoni kia Sehova? ʼE ha koa ʼi toku maʼuli ʼi te ʼaho fuli, taku falala ʼae ʼe feala ke foaki mai e Sehova te ʼu meʼa ʼae ʼe ʼaoga kia au?’

⁹ Ko Mike mo tona kiʼi famili neʼe natou falala kia Sehova. ʼI te kei tupulaga ʼa Mike, neʼe fakaʼamu tuʼumaʼu ke alu ʼo faifakamafola ʼi he tahi fenua. Tatau aipe pe neʼe kua ʼohoana pea mo ina maʼu ʼana fanau ʼe toko lua, kaʼe neʼe heʼeki fetogi tana fakaʼamu ʼaia. Pea neʼe lau leva e Mike mo tona kiʼi famili te ʼu fakamatala ʼo te ʼu tehina mo tuagaʼane ʼae ʼe natou tauhi ʼi te ʼu koga meʼa ʼe ʼaoga lahi ai he kau faifakamafola. Neʼe natou fai ai te tonu ʼae ke natou fakafaigafua tonatou maʼuli. Neʼe natou fakatau ai tonatou ʼapi kaʼe natou mavae ki tonatou tahi nofoʼaga ʼe veliveli age. Pea neʼe fakamaʼamaʼa e Mike ia tana matani gaue fakamaʼa pea neʼe ina maʼu te puleʼaki ʼae ke ina fakahaʼele tana gaue ʼaki te Neti mai te fenua ʼae ka maʼuli ai anai. Koia neʼe feala ai kia Mike mo tona kiʼi famili ke natou olo ki he tahi fenua, pea neʼe natou leleiʼia tanatou minisitelio. Neʼe ui fenei e Mike: “Neʼe matou logoʼi te hoko moʼoni ʼo te ʼu palalau ʼa Sesu ʼae ʼe tuʼu ia Mateo 6:33.”

10. Ohage ko te Hau ko Tavite, he koʼe ʼe lelei ke tou metitasio ki te ʼu faʼahi ʼae ʼe tou ako ʼo ʼuhiga mo Sehova?

¹⁰ Neʼe tohi fenei e te Hau ko Tavite: “E fakamatala e te atu lagi te kololia o te Atua; Pea e fakaha e te malamanei te gaueaga o ona nima.” Pea neʼe ina toe ui fenei: “E haohaoa te lao a [Sehova], e ina fakafoou te laumalie [peʼe toe foaki te malohi]. E mooni te fakamooni a [Sehova], e ina tuku te poto ki te vale.” ʼI tana metitasio ki te ʼu lao fakapotopoto ʼa Sehova pea mo te taulekaleka ʼo tana fakatupu, neʼe malohi ai te felogoʼi ʼa Tavite mo Sehova pea mo ina fia fakaha kia te ia tona ʼofa. Neʼe ui fenei e Tavite: “Ke ke tali te u palalau o toku gutu; Pea mo te u manatu o toku loto, Oi [Sehova], toku utu mo toku fakamauli!”—Pesalemo 19:2, 8, 15.

11. ʼE tou fakaʼaogaʼi feafeaʼi te ʼatamai malama ʼae mai ia Sehova ke tou fakaha totatou ʼofa kia te ia? (Vakaʼi te ʼuluaki pāki.)

¹¹ Ia ʼaho nei, ʼe lahi te ʼu faʼahi ʼe akoʼi mai e Sehova ʼo ʼuhiga mo ia totonu, mo tana fakatuʼutuʼu, mo tana fakatupu pea mo tana Folafola. Ko te malama ʼe ina uga te hahaʼi ke natou ako, kaʼe ʼi te agamahani ʼaki te ʼu ako lalahi ʼe puli ai tonatou ʼofa ʼae ki te ʼAtua. ʼE mole loto pe e Sehova ke tou maʼu te ʼatamai malama, kaʼe ʼe toe tokoni mai ke tou aga fakapotopoto. Pea ʼe ina loto ke tou maʼuliʼi te ʼu faʼahi ʼae ʼe tou ako mo tokoni ki te hahaʼi. (Taaga Lea 4:5-7) Ohage la, ʼe ina loto ke tou fakaha te “iloi katoa o te mooni” ki te hahaʼi pea mo tou tokoni ke haofaki tonatou maʼuli. (1 Timoteo 2:4) ʼE tou fakaha totatou ʼofa kia Sehova mo te hahaʼi, ʼaki tatatou faiga malohi ʼo tala te  Puleʼaga ʼo te ʼAtua pea mo te ʼu aluʼaga ʼae ka ina fakahoko maʼa te malamanei.—Lau ia Pesalemo 66:16, 17.

12. Kotea ʼae neʼe ui e te kiʼi taʼahine ʼo ʼuhiga mo te meʼa ʼofa mai ia Sehova?

¹² ʼE toe feala ki te kau tupulaga ke natou metitasio ki te ʼu meʼa fuli ʼae neʼe foaki mo akoʼi age e Sehova kia natou. Ohage ko Shannon, ʼe kei ina manatuʼi pe kotea ʼae neʼe ina logoʼi ʼi te fakatahi lahi neʼe kau ai ʼi tona taʼu 11 kaʼe neʼe taʼu 10 tona kiʼi tehina. Lolotoga te fakatahi fakatisitilike “La piété” (Te Pipiki Ki Te ʼAtua), neʼe kole age ki te kau tupulaga fuli, ʼo kau ai mo Shannon pea mo tona kiʼi tehina, ke natou heheka ʼi te ʼu hekaʼaga neʼe kua taʼofi maʼa natou. ʼI te kamata neʼe lotohoha. Kaʼe neʼe punamaʼuli ʼi te temi ʼae neʼe tufa ai kia natou takitokotahi te tohi Les jeunes s’interrogent. Réponses pratiques. Kotea ʼae neʼe ina logoʼi ʼo ʼuhiga mo Sehova ʼaki te meʼa ʼofa taulekaleka ʼaia? ʼE ina ui fenei: “Neʼe au mahino ai ko Sehova ʼe maʼuli moʼoni pea mo lahi ʼaupito ia tona ʼofa ʼae kia au. ʼI ʼomatou toe fiafia ʼi te ʼu meʼa ʼofa taulekaleka pea mo haohaoa ʼae ʼe foaki mai e totatou ʼAtua lahi ko Sehova.”

13, 14. Kotea ʼae ʼe tonu ke tou fai moka fakatonutonuʼi tatou e Sehova, pea kotea tona tupuʼaga?

¹³ ʼE fakamanatuʼi fenei mai ʼi te Tohi-Tapu: “E tauteai e [Sehova] ia ia ae e ofa ia ki ai, o hage ko he tamai ki te fanau ae e ofa mamahi ia ia ki ai.” (Taaga Lea 3:12) Kapau ʼe tou tali te fakatonutonu ʼae mai ia Sehova pea mo tou tuku ke ina akoʼi tatou, ʼe tou  iloʼi ai te meʼa ʼae ʼe lelei mo ʼae ʼe kovi pea mo tou maʼu te tokalelei. ʼE moʼoni, “e mole he fiafia i te tautea, kae ko te mamahi.” (Hepeleo 12:11) Kaʼe, kotea ʼae ʼe tonu ke tou fai moka fakatonutonuʼi tatou e Sehova? ʼAua naʼa tou meʼa noaʼi te tokoni ʼa Sehova mo tou nonofo mo hotatou ita mo kapau ʼe mole tou leleiʼia te ʼu faʼahi ʼae ʼe tou logo ki ai. Koia ʼe tou fakalogo kia Sehova, koteʼuhi ʼe tou ʼoʼofa kia te ia pea mo tou fai te ʼu fetogi ʼae ʼe ʼaoga.

¹⁴ ʼI te temi ʼo Malakia, tokolahi te kau Sutea neʼe mole natou fakalogo kia Sehova. Neʼe natou meʼa noaʼi ʼanatou sakilifisio ʼae neʼe natou momoli kia te ia. Koia neʼe fai ai e Sehova kia natou he tokoni malohi ʼo ʼuhiga mo te aluʼaga ʼaia. (Lau ia Malakia 1:12, 13.) ʼI tona fakahagatonu, neʼe foaki tuʼa lahi e Sehova kia natou ni tokoni, kaʼe neʼe natou fakafisi ki ai. Koia neʼe ina ui fenei ai kia natou: “E au tuku anai kia koutou te malaia, pea e au fakaliliu anai te u tapuakina ae nee au fakapapau atu kia koutou ko ni malaia.” (Malakia 2:1, 2) ʼE ha lelei mai, kapau ʼe tou meʼa noaʼi peʼe mole tou fakamaʼuhigaʼi te tokoni ʼofa ʼa Sehova, ʼe puli anai ʼatatou felogoʼi lelei mo ia.

15. Ko te faʼahiga manatu fea ʼae ʼe tonu ke tou tekeʼi?

¹⁵ ʼE ʼekenaki e te malama ʼa Satana ia te hahaʼi ke natou fialahi pea ke natou manatu pe kia natou. Tokolahi ʼe mole natou loto ke fakatonutonuʼi natou peʼe ke fakatotonu age te meʼa ʼae ʼe tonu ke natou fai. Pea ʼe fakalogo pe ʼihi ki te ʼu tokoni koteʼuhi ko tonatou maʼua. Kaʼe ʼe mole tonu ke tou feia. Koia ʼe fakatotonu mai ʼi te Tohi-Tapu ke tou fakagata tatatou “muliʼi te tuʼu ʼo te ’u faʼahiga meʼa ʼaeni.” Kaʼe ʼe ʼaoga ke tou mahino pe kotea ʼae ʼe fakamaʼua mai e Sehova pea mo tou fai te meʼa ʼae ʼe ina leleiʼia. (Loma 12:2, MN) ʼE ina fakaʼaogaʼi ia tana kautahi moʼo foaki mai te ʼu tokoni ʼi tona temi totonu. Ohage la, ʼe fai mai te ʼu fakamanatu ʼo ʼuhiga mo te aga ʼa te tagata ki he fafine pea mo te fafine ki he tagata, mo tatatou filifili ʼotatou kaumeʼa, pea mo te ʼu tonu ʼae ʼe tou toʼo ki te ʼu temi fakafiafia. Kapau ʼe tou tali lelei te fakatonutonu ʼa Sehova mo tou fai te ʼu fetogi ʼae ʼe ʼaoga, ʼe  tou fakaha ai te ʼofa moʼoni mo tou lotofakafetaʼi ki tana takitaki.—Soane 14:31; Loma 6:17.

16, 17. (1) He koʼe ʼe tonu ke tou maʼu te manatu ʼa Sehova ʼi muʼa ʼo hatatou toʼo he tonu? (2) Neʼe fakaha feafeaʼi e te kau Iselaele ia tanatou mole falala kia Sehova?

¹⁶ ʼE falala te ʼu kiʼi fanau liliki ki ʼanatou matuʼā ke natou tokoni mo puipui natou. ʼE lagi toe kole tokoni mo te hahaʼi lalahi ki ʼanatou matuʼā. Logo la ʼe feala tanatou toʼo ni tonu, kaʼe ʼe natou mahino ʼe feala ke foaki age e ʼanatou matuʼā ni tokoni lelei. Ko tatatou Tamai ko Sehova, ʼe ina fakagafua mai ke tou toʼo e tatou totonu ʼatatou tonu. Kaʼe ʼe tou kole tokoni tuʼumaʼu kia te ia pea mo tou faiga ke tou maʼu tana manatu ʼi muʼa ʼo hatatou toʼo he tonu, koteʼuhi ʼe tou falala mo tou ʼoʼofa moʼoni kia te ia. Kapau ʼe tou falala kia Sehova, ʼe tokoni mai anai ʼaki tona laumalie ke tou fai te meʼa ʼae ʼe lelei.—Filipe 2:13.

¹⁷ ʼI te temi ʼo Samuele, neʼe malo te kau Filisitini ʼi te kau Iselaele. Neʼe mole natou kole kia Sehova pe kotea ʼae ka natou fai anai, kaʼe neʼe natou ui fenei: “Tou olo o kumi i Silo te aleka o te hai a [Sehova] o te u fua tau; ke hau ia ia ki te lotomalie o tatou pea ke ina haofaki tatou i te nima o otatou fili.” Kotea leva ʼae neʼe hoko? Neʼe lahi te matea, “pea nee to leva i Iselaele te toko tolugofulu afe tagata solia ae nee haele lalo. Nee too leva te aleka o te Atua e te kau Filisitini.” (1 Samuele 4:2-4, 10, 11) ʼI te manatu ʼa te kau Iselaele, ʼe tokoni pea mo puipui anai natou e Sehova ʼaki pe tanatou ave te Aleka mo natou. Kaʼe neʼe mole natou kole tokoni kia Sehova peʼe natou faiga ke natou maʼu ia tana manatu. Neʼe natou mulimuli pe ki ʼanatou manatu, ʼo iku ai ki te tuʼutamaki.—Lau ia Taaga Lea 14:12.

18. Kotea ʼae ʼe tou ako mai te Tohi-Tapu ʼo ʼuhiga mo te falala kia Sehova?

¹⁸ Neʼe ʼofa moʼoni pea mo falala ia te tagata faipesalemo kia Sehova, ʼo ina tohi fenei: “Ke ke amanaki lelei ki te Atua, koteuhi e au toe fakafetai anai kia ia: Koia ko toku fakamauli mo toku Atua. Koia e au manatu ai kia koe.” (Pesalemo 42:6, 7) ʼE kotou manatu feia koa ʼo ʼuhiga mo Sehova? ʼE kotou nonofo ovi koa pea mo falala kia te ia? ʼE feala ke kotou ako ke toe lahi age takotou falala ʼae kia te ia. ʼE fakatotonu fenei mai ʼi te Tohi-Tapu: “Falala [kia Sehova] i tou loto katoa, kae aua naa ke falala ki tou poto, ke ke falala kia ia i ou ala fuli, pea e ina fakatokatoka anai ou ala.”—Taaga Lea 3:5, 6.

19. ʼE kotou fakaha feafeaʼi anai kia Sehova ʼe kotou ʼoʼofa kia te ia?

¹⁹ ʼI tana ʼuluaki ʼofa ʼae kia tatou, neʼe akoʼi mai ai e Sehova pe ʼe feafeaʼi hatatou ʼoʼofa kia te ia. Tou fakakaukauʼi tuʼumaʼu ia tona toe ʼofa ʼae kia tatou mo te ʼu meʼa fuli ʼae neʼe ina fai maʼa tatou. Koia, ʼofa pe ke tou fakaha ʼe tou ʼoʼofa kia te ia ʼaki totatou loto katoa, mo totatou maʼuli katoa, mo totatou ʼatamai katoa pea mo totatou malohi katoa.—Maleko 12:30.