1, 2. Kotea te manatu ʼa te hahaʼi ʼo ʼuhiga mo te ʼAtua?

KO TE manatu ʼa te tokolahi ʼe mole tokagaʼi e te ʼAtua ia te ʼu gaue ʼae ʼe natou fai. He ʼe ʼi tanatou manatu ʼe mole tokagaʼi moʼoni e te ʼAtua ia te ʼu aluʼaga ʼae ʼe hoko kia natou. Ohage la, hili te afā ʼae neʼe ina maumauʼi ia te potu lahi ʼo te fenua ko Filipine ʼi te mahina ʼo Novepeli 2013, neʼe ui fenei e te pule kolo ʼi te fenua ʼaia: “Neʼe mole sio mai te ʼAtua ʼi te temi ʼae neʼe hoko ai te tuʼutamaki fakanatula ʼaia.”

² Pea ko te manatu ʼa ʼihi, ʼe mole sio ifo te ʼAtua ki te ʼu meʼa ʼae ʼe natou fai. (Esaia 26:10, 11; 3 Soane 11) Ko ʼihi ʼi te temi ʼo te apositolo ko Paulo, neʼe natou maʼu te faʼahiga manatu ʼaia. Koia ʼae neʼe ui ai e Paulo ʼo ʼuhiga mo natou: “Neʼe mole natou fia iloʼi te ʼAtua.” Pea ko te ʼu hahaʼi ʼaia neʼe mole natou faitotonu, neʼe natou agakovi, mo manumanū pea mo agafakakakā.—Loma 1:28, 29, MN.

3. (1) Kotea ia te ʼu fehuʼi ʼe tonu ke tou fai? (2) ʼI te Tohi-Tapu, kotea ʼae ʼe fakaʼuhiga tuʼumaʼu ki ai te “nima” ʼo te ʼAtua?

³ ʼE feafeaʼi ʼo ʼuhiga mo tatou? ʼE tou iloʼi ʼe sio ifo Sehova ki te ʼu meʼa ʼae ʼe tou fai. Kaʼe, ʼe tou tui koa ʼe tokaga ia Sehova kia  tatou? ʼE tou sisio koa ki tona nima ʼi totatou maʼuli? ʼI te Tohi-Tapu, ʼe fakaʼuhiga tuʼumaʼu ia te “nima” ʼo te ʼAtua ki tona malohi gaue. Pea ʼe ina fakaʼaogaʼi tona malohi moʼo tokoni ki ʼana kaugana pea mo tauʼi ʼona fili. (Lau ia Tetelonome 26:8.) Neʼe ui e Sesu ko ʼihi hahaʼi ʼe natou “sisio anai ki te Atua.” (Mateo 5:8) ʼE tou kau koa ki te hahaʼi ʼaia? ʼE tou lava “sisio” feafeaʼi ki te ʼAtua? Tou vakaʼi te ʼu faʼifaʼitaki ʼi te Tohi-Tapu ʼo natou ʼae neʼe sisio ki te nima ʼo te ʼAtua ʼi tonatou maʼuli pea mo natou neʼe mole sisio ki ai. ʼE tou toe vakaʼi anai pe ʼe tou sisio lelei feafeaʼi ki te nima ʼo te ʼAtua ʼi totatou maʼuli.

4. He koʼe neʼe mole fia sisio te ʼu fili ʼo te kau Iselaele ki te nima ʼo te ʼAtua?

⁴ ʼI te temi muʼa, tokolahi te hahaʼi neʼe maʼu faigamalie ke natou sisio pea mo logo ai ki te tokoni ʼa te ʼAtua ki te kau Iselaele. Neʼe fai e Sehova te ʼu milakulo moʼo fakaʼateainaʼi tana hahaʼi mai Esipito pea mo tauʼi te ʼu hau ʼi te Kele ʼo Te Fakapapau. (Sosue 9:3, 9, 10) Logo la neʼe sisio pea mo logo ʼihi hau ki te haofaki e Sehova tana hahaʼi, kaʼe “nee natou loto tahi leva ke natou taui fakatahi ia Sosue mo Iselaele.” (Sosue 9:1, 2) ʼI tanatou tauʼi ia te kau Iselaele, neʼe maʼu e te ʼu hau ʼaia te faigamalie ke natou sisio ai ki te nima ʼo te ʼAtua. Pea ʼaki te malohi lahi ʼo Sehova, “nee tuu mau leva te laa, pea nee talitali leva te mahina, o kaku ki te osi o te lagavaka a te u fanau a Iselaele ki ona fili.” (Sosue 10:13) Neʼe tuku ai leva e Sehova ke “fakafefeka” te ʼu loto ʼo te ʼu fili ʼo te kau Iselaele, koia ʼae neʼe natou tauʼi ai te kau Iselaele. (Sosue 11:20) Koia, neʼe mole malo ai te ʼu fili ʼo te kau Iselaele, koteʼuhi neʼe mole natou tui ko Sehova ʼae neʼe tau maʼa tana hahaʼi.

5. Kotea ʼae neʼe mole tui ki ai te Hau agakovi ko Akapo?

⁵ Ki muli age, neʼe lahi te ʼu faigamalie ke sio ai te Hau agakovi ko Akapo ki te nima ʼo te ʼAtua. Neʼe ui fenei age e Elia: “E mole toe to anai he ua pee ko he hahau . . . , kae e gata tahi anai ki taku palalau.” (1 Hau 17:1) Neʼe feala pe ke hoko te ʼu palalau ʼaia ʼaki te nima ʼo te ʼAtua kaʼe neʼe mole tui ia Akapo ki te faʼahi ʼaia. Ki muli age, neʼe faikole ia Elia kia Sehova pea neʼe tali e te ʼAtua ki tana faikole ʼaki te hifo mai te lagi ia he afi. Neʼe sio ia Akapo ki te faʼahi ʼaia. Pea tahi, neʼe ui e Elia kia Akapo ʼe fakagata anai e Sehova ia te taʼi laʼa pea ʼe ina fakato anai he ʼua lahi. (1 Hau 18:22-45) Logo la neʼe sio ia Akapo ki te ʼu milakulo ʼaia kaʼe neʼe hoko atu pe tana mole fia sio ki te malohi ʼo Sehova. Kotea ia te ʼu ako ʼe tou taʼofi mai te ʼu faʼifaʼitaki ʼaia? ʼE tonu ke tou sisio ki te nima ʼo te ʼAtua ʼi totatou maʼuli.

6, 7. Kotea ʼae neʼe mahino ki ai ia te kau Kapaone pea mo Laape?

⁶ Neʼe kehekehe ia te kau Kapaone mai te ʼu puleʼaga ʼo ʼonatou tafaʼaki, koteʼuhi neʼe natou sisio ki te nima ʼo te ʼAtua. Koia la ʼae neʼe mole natou fia tauʼi ai te kau Iselaele kaʼe neʼe natou fia kumi te tokalelei mo natou. Kotea tona tupuʼaga? Koteʼuhi neʼe natou logo ki te ʼu faʼahi fuli ʼae neʼe fai e Sehova. (Sosue 9:3, 9, 10) Neʼe ko he aluʼaga  fakapotopoto ia tanatou iloʼi ʼae ko Sehova neʼe tau maʼa te kau Iselaele.

⁷ Neʼe toe sio ia Laape ki te nima ʼo Sehova. Logo la neʼe mole ko he Iselaele kaʼe neʼe logo ki te fakaʼateainaʼi e Sehova tana hahaʼi mai Esipito. Pea ʼi te ʼomai ʼa te ʼu tagata ʼe toko lua Iselaele kio Laape, ʼo vakavakaʼi te fenua neʼe ina ui fenei kia naua: “E au iloi kua tuku atu e [Sehova] kia koutou te fenua aeni.” Koia, neʼe tui ia Laape ʼe haofaki anai e Sehova ia ia mo tona famili. Logo la tana iloʼi ʼae ʼe tuʼutamakiʼia ai tona maʼuli kaʼe neʼe ina fakaha tana tui kia Sehova.—Sosue 2:9-13; 4:23, 24.

8. Neʼe sisio feafeaʼi ʼihi Iselaele ki te nima ʼo te ʼAtua?

⁸ Ko ʼihi Iselaele neʼe mole natou hage ko te Hau agakovi ko Akapo. Neʼe natou sisio ki te afi neʼe hifo mai te lagi moʼo tali ki te faikole ʼa Elia. Pea neʼe mahino ai kia natou ko te ʼAtua ʼae neʼe ina fai te faʼahi ʼaia. Koia, neʼe natou kalaga fenei ai: “Ko [Sehova] ae e Atua!” (1 Hau 18:39) Neʼe mahino lelei kia natou kua natou sisio ki te malohi ʼo te ʼAtua.

9. ʼE tou lava sisio feafeaʼi kia Sehova pea mo tona nima ia ʼaho nei?

⁹ Neʼe tou vakaʼi ia te ʼu faʼifaʼitaki lelei pea mo te ʼu faʼifaʼitaki ʼe kovi. ʼE tokoni mai ai ke tou mahino pe ʼe kotea ia te fakaʼuhiga ʼae ke tou “sisio . . . ki te Atua” peʼe ki te nima ʼo te ʼAtua. ʼI tatatou kua iloʼi ia Sehova pea mo ʼona kalitate, ʼe tou sisio ai ki tona nima ʼaki ‘te ʼu mata ʼo ʼotatou loto.’ (Efeso 1:18) ʼAki te faʼahi ʼaia, ʼe ina uga tatou ke tou faʼifaʼitakiʼi ia te ʼu tagata mo te ʼu fafine agatonu ʼo te temi muʼa pea mo te temi nei, ʼae neʼe sisio ki te tokoni ʼa Sehova ki tana hahaʼi. Kaʼe, kotea ia te ʼu fakamoʼoni ʼe tou maʼu ʼo ʼuhiga mo te tokoni ʼa te ʼAtua ki tana hahaʼi ia ʼaho nei?

10. Kotea ia te ʼu fakamoʼoni ʼe ha ai te tokoni ʼa Sehova ki te hahaʼi ia ʼaho nei? (Vakaʼi te ʼuluaki pāki.)

¹⁰ ʼE lahi te ʼu fakamoʼoni ʼe tou maʼu, ʼe ha ai te tokoni tuʼumaʼu ʼa Sehova ki te hahaʼi ia ʼaho nei. ʼE tou logo tuʼumaʼu ki te ʼu hisitolia ʼo natou neʼe kole tokoni ki te ʼAtua ʼi tonatou maʼuli pea neʼe tali e Sehova ʼanatou faikole. (Pesalemo 53:3) Ohage la, ko Allan ʼi tana lolotoga faifakamafola ʼi te kiʼi kolo ʼo Filipine, neʼe felaveʼi mo te fafine pea ʼi tana sio kia Allan neʼe kamata tagi. Koteʼuhi ko te fafine ʼaia, neʼe kua ina ako te Tohi-Tapu mo te kau Fakamoʼoni ʼa Sehova ʼi tana kei finemui. Kaʼe ʼi te temi leva ʼae neʼe ʼohoana ai, neʼe mavae ʼo maʼuli ʼi te tahi motu pea neʼe mole hoko atu tana ako. ʼE ui fenei e Allan: “ ʼI te uhu pe ʼaia, neʼe faikole te fafine kia Sehova ke felaveʼi mo ʼana Fakamoʼoni.” ʼE mahino ia, neʼe tali atu aipe e te ʼAtua tana faikole pea neʼe malave ai ki tona loto. Mole ʼosi he taʼu katoa ki ai, neʼe ina foaki tona maʼuli kia Sehova ʼaki te papitema.

11, 12. (1) Neʼe tokoni feafeaʼi ia Sehova ki ʼana kaugana? (2) Fakamatala he aluʼaga neʼe hoko ki te tuagaʼane.

¹¹ ʼI muʼa ʼo te liliu ʼa ʼihi ko te ʼu kaugana ʼa Sehova, tokolahi ia natou neʼe natou sisio ki tana tokoni ʼi tanatou fakagata ʼanatou agamahani ʼae ʼe kovi. Ohage la ko te suluka, mo te fakaʼaoga ʼo te toloke peʼe ko te sioʼi ʼo te ʼu ʼata kovi. Ko ʼihi neʼe natou ui neʼe natou faigaʼi ke natou taʼofi ʼaki pe tonatou malohi kaʼe neʼe mole ʼi ai hona fua. Kaʼe ʼi tanatou kole leva te tokoni ʼa Sehova, neʼe ina foaki ai kia natou “te malohi ʼae ʼe fakalaka ʼi te malohi mahani.” Pea neʼe feala ai ke natou fakagata ʼanatou agamahani ʼae ʼe kovi.—2 Kolinito 4:7, MN; Pesalemo 37:23, 24.

¹² ʼE toe tokoni ia Sehova ki ʼana kaugana ke natou katakiʼi ʼonatou fihifihia takitokotahi. Ko te aluʼaga ʼaia neʼe hoko ki te tuagaʼane ko Amy. Neʼe hinoʼi ke alu ʼo tokoni ki te laga ʼo te Fale Fono pea mo te fale ʼo te kau misionea ʼi te kiʼi motu ʼo te Tai Pasifika. Neʼe kehekehe te ʼu agaʼi fenua pea neʼe tahitahiga te maʼu ʼo te hila peʼe ko te vai ʼi te motu ʼaia, pea neʼe pu vai te ʼu ʼala. Tahi ʼae meʼa, neʼe ina manatuʼi tuʼumaʼu tona famili pea neʼe maʼuli ʼi he kiʼi koga fale ʼi te otele. ʼE ina ui fenei: “ ʼI te tahi ʼaho, neʼe au pupulaʼi te tuagaʼane neʼe ma gaue fakatahi. ʼI taku fai te faʼahi ʼaia, neʼe mamahi toku loto he neʼe au iloʼi neʼe kovi te meʼa ʼae neʼe au fai. ʼI taku alu ki toku koga fale ʼae ʼe fakapoʼuli, neʼe au faikole ai kia Sehova ke tokoni mai kia au.” ʼI te toe mu mai ʼo te hila, neʼe lau e Amy te alatike ʼi Te Tule Leʼo ʼo ʼuhiga mo te ako ʼa te kau misionea ʼo Kalaate. Pea neʼe talanoa te alatike ʼaia ki te ʼu fihifihia ohage pe ko te ʼu fihifihia ʼae neʼe hoko kia ia. ʼE ina ui fenei: “Neʼe au logoʼi neʼe palalau mai ia Sehova ʼi te afiafi ʼaia. Pea neʼe ina foaki mai te malohi ke au hoko atu taku gaue.”—Pesalemo 44:26, 27; Esaia 41:10, 13.

13. Neʼe tokoni feafeaʼi ia Sehova ki tana hahaʼi?

¹³ Neʼe toe tokoni ia Sehova ki tana hahaʼi ke natou haofaki te logo lelei ʼi muʼa ʼo te ʼu telepinale. (Filipe 1:7) Ohage la, neʼe tou haofaki tatatou tauhi ʼi muʼa ʼo te telepinale ʼi te temi ʼae neʼe faiga ai e ʼihi puleʼaga ke natou taʼofi te gaue faifakamafola. ʼI muʼa ʼo te telepinale, neʼe tou malo tuʼa 268 ʼi te ʼu tukugakovi  neʼe fai moʼo fakagata te gaue faifakamafola ʼi ʼihi fenua. Pea talu mai te taʼu 2000, neʼe tou malo tuʼa 24 ʼi te Telepinale Fakaeulopa ʼo Te ʼAlikiʼaga ʼo Te Tagata. Koia, ʼe ha lelei mai ai ʼe mole feala ke taʼofi e he tahi ia te nima ʼo te ʼAtua.—Esaia 54:17; lau ia Esaia 59:1.

14. Kotea ʼae ʼe ha ai ko te ʼAtua ʼe nofo mo tana hahaʼi?

¹⁴ Ko te fakamafola ʼo te logo lelei ʼi te malamanei ʼe ko he tahi fakamoʼoni ʼaia ʼo te nima ʼo te ʼAtua. (Mateo 24:14; Gaue 1:8) ʼE hoki feala ke maʼu te logo tahi e te ʼu kaugana ʼa Sehova ʼi te ʼu puleʼaga fuli, ʼaki pe te tokoni ʼa Sehova. ʼE mole maʼu te logo tahi ʼaia ʼi he tahi age faʼahi. Maʼia mo te hahaʼi ʼae neʼe mole tauhi kia Sehova ʼe natou fakamoʼoni ki te faʼahi ʼaia. He neʼe natou ui fenei: “E nofo mooni te Atua ia koutou.” (1 Kolinito 14:25) ʼE lahi te ʼu fakamoʼoni ʼe tou maʼu ko te ʼAtua ʼe nofo mo tana hahaʼi. (Lau ia Esaia 66:14.) Kaʼe, ʼe feafeaʼi ʼo ʼuhiga mo koe? ʼE ke sio koa ki te nima ʼo Sehova ʼi tou maʼuli?

15. He koʼe ʼi ʼihi temi ʼe mole tou sisio ai ki te nima ʼo Sehova ʼi totatou maʼuli?

¹⁵ ʼI ʼihi temi, ʼe mole tou sisio ai ki te nima ʼo te ʼAtua ʼi totatou maʼuli. Kotea tona tupuʼaga? Koteʼuhi ka lahi te ʼu fihifihia ʼae ʼe tou felaveʼi mo ia, ʼe feala ke tou galoʼi ai te tokoni ʼa Sehova kia tatou ʼi muʼa atu. Pea neʼe ko te aluʼaga ʼaia neʼe hoko kia Elia. Neʼe lototoʼa kaʼe neʼe mataku ʼi te temi ʼae neʼe fia matehi ai ia ia e te Fineʼaliki ko Sesapele. ʼI he kiʼi temi pe, neʼe ina galoʼi te tokoni ʼa Sehova kia ia ʼi muʼa atu. ʼE ui ʼi te Tohi-Tapu neʼe loto Elia ke mate. (1 Hau 19:1-4) Neʼe ina maʼu feafeaʼi ia te tokoni mo te lototoʼa? Neʼe ʼaoga ke sio ki te nima ʼo Sehova.—1 Hau 19:14-18.

16. ʼE tou lava sisio feafeaʼi ki te nima ʼo te ʼAtua?

¹⁶ ʼO toe feia pe mo Sopo, neʼe tokaga tafitō ki ʼona fihifihia ʼo tupu ai tana mole maʼu te faʼahiga manatu ʼa Sehova. (Sopo 42:3-6)  Koia ʼi ʼihi temi, ʼe toe feala mo tatou ke faigataʼa tatatou sisio ki te nima ʼo te ʼAtua ʼuhi ko ʼotatou fihifihia. Kaʼe, kotea ʼae ʼe feala ke tokoni mai ke tou sisio ki te meʼa ʼae ʼe fai e te ʼAtua maʼa tatou? ʼE tonu ke tou fakakaukauʼi te ʼu faʼahi ʼae ʼe ui ʼi te Tohi-Tapu ʼo ʼuhiga mo te ʼu fihifihia ʼae ʼe hoko kia tatou. Pea, ʼe liliu anai ia Sehova ko he tahi ʼe maʼuli moʼoni kia tatou. ʼO feala ai ke tou toe ui fenei: “Nee logo toku taliga ki te u palalau kia koe; kae i te lakaga nei, kua sio oku mata kia koe.”

17, 18. (1) ʼE ke lava sio feafeaʼi ki te nima ʼo Sehova ʼi tou maʼuli? (2) Fakamatala he aluʼaga ʼe ha ai ʼe tokoni mai te ʼAtua ia ʼaho nei.

¹⁷ ʼE ke lava sio feafeaʼi ki te nima ʼo Sehova ʼi tou maʼuli? Tou vakaʼi ia te ʼu aluʼaga ʼaeni ʼe nima: ʼUluaki, ʼe lagi ke manatuʼi te tokoni atu ʼa Sehova ke ke maʼu te moʼoni. Lua, ʼe lagi ke manatuʼi tau alu ki te fono ʼo logo ki he akonaki pea ke ui fenei maʼa koe: “Neʼe ʼaoga moʼoni ʼosi kia au te akonaki.” Tolu, ʼe lagi neʼe ke sio pe neʼe tali feafeaʼi ia Sehova ki hau faikole. Fa, ʼe lagi neʼe ke loto ke lahi age tau tauhi ʼae kia Sehova pea neʼe ke sio ki tana tokoni atu ʼae ke ke fakahoko tau fakatuʼutuʼu. Nima, ʼe lagi neʼe ke mavae mai tau gaue ke lahi age tou temi ʼae ke ke tauhi ai kia Sehova. Pea neʼe ke sio ki te fakahoko e te ʼAtua tana fakapapau ʼaeni: “E mole au siaki anai koe.” (Hepeleo 13:5) ʼE faigafua anai tatatou sisio ki te nima ʼo Sehova ʼi totatou maʼuli mo kapau ʼe malohi ʼatatou felogoʼi mo ia.

¹⁸ ʼE ui fenei e te tuagaʼane mai Kenya, ʼe higoa ko Sarah: “Neʼe au faikole ʼo ʼuhiga mo te ako neʼe au fakatokagaʼi ʼe mole ina leleiʼia tana ako Tohi-Tapu. Pea neʼe au faikole kia Sehova pe ʼe tonu ke taʼofi muʼa tana ako. ʼI te ʼosi pe ʼo taku ui ‘Ameni,’ neʼe tatagi taku telefoni. Neʼe pauʼi mai taku ako ʼo kole mai pe ʼe feala ke ma olo ki te fono. Neʼe au punamaʼuli ʼosi.” Kapau ʼe tou sisio ki te faʼahi ʼae ʼe fai e te ʼAtua maʼa tatou, ʼe tou sisio anai ki tona nima. Ko Rhonna, ʼe ko te tuagaʼane ʼe maʼuli ʼi Asia, ʼe ina ui ʼe ʼaoga he temi ke tou sisio ai ki te tokoni ʼa Sehova kia tatou ʼi totatou maʼuli. ʼE ina hoko atu fenei: “Kapau ʼe tou fai te faʼahi ʼaia, ʼe tou punamaʼuli anai ki te tokaga lahi ʼa Sehova kia tatou.”

19. Kotea te tahi faʼahi ʼe tonu ke tou fai ke tou sisio ai ki te nima ʼo te ʼAtua?

¹⁹ Neʼe ui e Sesu ko natou ʼae ʼe “sisio anai ki te Atua” ʼe tonu ke natou maʼu he “Ioto maa.” (Mateo 5:8) Kotea tona fakaʼuhiga? ʼE tonu ke tou taupau ʼatatou manatu ke maʼa pea mo liakī te ʼu meʼa kovi fuli. (Lau ia 2 Kolinito 4:2.) ʼI te alatike ʼaeni, neʼe tou akoʼi ai ke tou sisio ki te nima ʼo te ʼAtua. Pea ke feala ke tou fai te faʼahi ʼaia, ʼe tonu ke tou taupau malohi ʼatatou felogoʼi mo ia. ʼI te alatike ʼae ka hoa mai, ʼe tou vakaʼi anai pe ʼe tokoni feafeaʼi mai te tui ke tou sisio lelei ki te nima ʼo Sehova ʼi totatou maʼuli.