TONATOU MAʼULI
Kua Au Tokalelei Mo Te ʼAtua Pea Mo Taku Faʼe
NEʼE ui fenei mai e taku faʼe: “He koʼe mole kei ke tauhi ki ʼatatou kui? ʼE mole ke iloʼi neʼe ke maʼuli ʼuhi ko natou? He koʼe ʼe ke maʼuli galo feia kia natou? He koʼe kua ke liakī te ʼu agaʼi fenua ʼae neʼe tuku holo mai? Ko tau mole fakaʼapaʼapa ʼae ki ʼatatou kui ʼe hage pe ʼe ke ui ko tatatou tauhi ʼe laulaunoa.” Hili tana fai te ʼu palalau ʼaia, neʼe kamata tagi taku faʼe.
ʼI ni mahina ki muʼa atu, neʼe fakaui age e te kau Fakamoʼoni ʼa Sehova ke fai he ako Tohi-Tapu ʼo taku faʼe. Neʼe mole fia fai hana ako kaʼe moʼo fakaha tana fakaʼapaʼapa kia natou neʼe ina fai ai he fakatuʼutuʼu ke fai haku ako Tohi-Tapu mo natou. Pea ia ʼaho nei kua ita leva kia au koteʼuhi neʼe ko taku agamahani ko te fakalogo tuʼumaʼu kia ia. Kaʼe, ʼi te temi leva ʼaia neʼe mole kei au fakalogo kia ia koteʼuhi neʼe au fia fakafiafiaʼi te loto ʼo Sehova. Logo la neʼe mole ko he meʼa faigafua kaʼe neʼe foaki mai kia au e Sehova te malohi.
NEʼE AU AKO ʼO ʼUHIGA MO SEHOVA
Neʼe kau toku famili ʼi te lotu Putisi, ohage pe ko te tokolahi ʼi Saponia. Kaʼe hili mahina ʼe lua ki taku ako mo te kau Fakamoʼoni ʼa Sehova, neʼe au tui papau ko te ʼu faʼahi ʼae ʼe akoʼi mai ʼi te Tohi-Tapu ʼe moʼoni. ʼI taku iloʼi ʼae ʼe ʼi ai taku Tamai ʼe ʼi selo, neʼe au fia iloʼi lelei ia ia. ʼI te kamata, neʼe au fiafia ʼi te faipalalau mo taku Faʼe ʼo ʼuhiga mo te ʼu faʼahi ʼae neʼe au ako. Neʼe au kamata kau ki te ʼu fono ʼae neʼe fai ʼi te ʼu ʼAhotapu. Neʼe au fakaha age ki taku Faʼe ʼe mole au toe kau anai ʼi te ʼu toʼotoʼoga ʼo te kau Putisi koteʼuhi neʼe lahi te ʼu faʼahi neʼe kua au ako. Fokifa pe, kua fetogi mai tana aga kia au. Neʼe ina ui fenei: “Ko he tahi ʼi te famili ʼe mole ʼofa ki ʼatatou kui ʼe ko he meʼa fakaufiufi.” Neʼe ina kole mai ke au fakagata taku ako te Tohi-Tapu pea mo taku alu ki te ʼu fono. Neʼe mole au ʼamanaki leva ʼe ui mai e taku faʼe te faʼahi ʼaia. Neʼe kua fetogi ʼosi taku faʼe.
Neʼe manatu tahi taku tamai mo taku Faʼe. Neʼe au ako ʼi te tohi ʼo Efeso kapite 6 ʼe loto e Sehova ke au fakalogo ki ʼaku matuʼā. Neʼe au loto ke maʼu e toku famili te tokalelei pea neʼe au manatu ai kapau ʼe au fakalogo kia natou, ʼe feala anai hanatou fakalogo mai kia au. ʼI te temi ʼaia, neʼe au teuteu ki te ʼu sivi ʼi te fale ako, koia ʼae neʼe au manatu tahi ai mo ʼaku matuʼā ʼo ʼuhiga mo te ʼu faʼahi ʼae neʼe nā ui mai. Pea neʼe au fai te faʼahi ʼaia ia mahina ʼe tolu. Kaʼe, neʼe au fakapapau kia Sehova ʼe au kau anai ki te ʼu fono hili te ʼu mahina ʼaia ʼe tolu.
Neʼe mole lelei te tonu ʼae neʼe au fai ʼuhi ko tupuʼaga ʼe lua. ʼUluaki, neʼe au manatu ʼe hili anai
te ʼu mahina ʼaia ʼe tolu ʼe kei au lotomalohi anai ʼo tauhi kia Sehova. Koteʼuhi neʼe kua liliu ʼaku felogoʼi mo Sehova ʼo vaivai. Lua, neʼe faiga taku Faʼe mo taku Tamai ke mole hoko atu taku tauhi ʼae kia Sehova.TE TOKONI MO TE FAKAFEAGAI
ʼI te Fale Fono, neʼe au felaveʼi ai mo te ʼu Fakamoʼoni neʼe fakafeagai ʼonatou famili kia natou. Neʼe natou fakalotomalohiʼi au ʼe foaki mai anai e Sehova te malohi. (Mateo 10:34-37) Neʼe natou fakamahino mai kia au kapau ʼe au nofo agatonu kia Sehova, ʼe lahi anai te ʼu faʼahi ʼe ako ʼe toku famili ʼo ʼuhiga mo Sehova. Neʼe au fia tuku taku falala kia Sehova, koia ʼae neʼe au faikole fakamalotoloto ai.
Neʼe fakafeagai toku famili kia au ia aluʼaga kehekehe. Neʼe kole mamahi mai e taku faʼe ke au fakagata taku ako pea neʼe faiga ke au fetogi taku manatu. ʼI te temi fuli pe, ʼe au nofo fakalogologo. Koteʼuhi ka au palalau ki he meʼa, ʼe au tau fihi mo taku faʼe koteʼuhi ʼe mole he tahi ia maua ʼe fia malalo. ʼI te temi nei kua au mahino kapau neʼe au fakaʼapaʼapa ki te ʼu meʼa ʼae neʼe logoʼi e taku Faʼe mo te ʼu akonaki ʼae ʼe tui ki ai, ʼe lagi neʼe lelei pe ʼamatou felogoʼi. Neʼe lahi te ʼu gaue neʼe foaki mai e ʼaku matuʼā ke au fai ke au nofo maʼu ai ʼi fale. ʼI ʼihi temi, neʼe natou pupunu au ʼi tuʼa peʼe neʼe mole ʼaumai haku meʼa kai.
Neʼe kole tokoni taku faʼe ki ʼihi ke natou fakalotoʼi au. Neʼe palalau mo taku faiako kaʼe neʼe mole ʼi ai hona fua. Neʼe ʼave au e taku faʼe ki tona patolo ʼi te fale gaue ke feala hana fakakoviʼi au ko te ʼu lotu fuli neʼe mole hona ʼaoga. Neʼe telefoni ki ʼomatou famili pea mo tagi kia natou ke natou tokoni age. ʼI tana fai te ʼu faʼahi ʼaia, neʼe au tuʼania ʼosi. Kaʼe ʼi te ʼu fono, neʼe fakamanatuʼi mai e te kau tagata ʼafeā ka palalau taku Faʼe ki ʼihi ʼo ʼuhiga mo taku tauhi, ʼe ko he fakamoʼoni lelei kia natou.
Neʼe loto ʼaku matuʼā ke au alu ʼo ako ʼi te univelesite ke feala ke au maʼu haku gaue lelei. Neʼe mole feala ke matou palalau ki te faʼahi ʼaia ʼi te fakatokatoka koteʼuhi ʼe matou iita fuli. Koia ʼae neʼe au fai ai ʼaku tohi moʼo fakamahino ʼaku fakatuʼutuʼu. Neʼe kovi ʼosi te ita ʼo taku tamai pea neʼe ina ui fenei: “Ka apogipogi ake mole maʼu hau gaue pea ke mavae ʼi totatou ʼapi.” Neʼe au faikole kia Sehova ke tokoni mai kia au. ʼI te ala uhu ake pe, neʼe au maʼu taku gaue. Koteʼuhi ʼi taku faifakamafola neʼe haʼu te kiʼi tehina ʼo kole mai pe ʼe feala ke au tokoni ki tana fanau heʼe ko au ko te fafine faiako. Pea neʼe haʼu te tahi kiʼi tehina ʼo toe kole mai te faʼahi ʼaia. Kaʼe, neʼe mole fiafia taku Tamai ʼo ʼuhiga mo te faʼahi ʼaia koia ʼae neʼe hoko atu pe tana mole palalau mai pea mo tana mole tokagaʼi au. Neʼe ui e taku faʼe neʼe lagi lelei age pe ke ke higoa ko he tahi ʼe fakahoko agatuʼu kaʼe mole ko he Fakamoʼoni ʼa Sehova.
Neʼe tokoni mai ia Sehova ke au fakatonutonuʼi taku faʼahiga manatu pea ke au iloʼi te meʼa ʼae ʼe tonu ke au fai
ʼI ʼihi temi, neʼe au feʼekeʼaki pe ʼe loto e Sehova ke au fakafeagai ki ʼaku matuʼā. Koia, neʼe au faikole kia Sehova pea mo metitasio ki te ʼu faʼahi ʼe ui ʼi te Tohi-Tapu ʼo ʼuhiga mo tona ʼofa. Neʼe tokoni mai te faʼahi ʼaia ke au maʼu he ʼu manatu ʼe lelei pea ke au mahino neʼe fakafeagai mai ʼaku matuʼā ki au koteʼuhi neʼe nā tuʼania ʼo ʼuhiga mo au. Neʼe tokoni mai ia Sehova ke au fakatonutonuʼi taku faʼahiga manatu pea ke au iloʼi te meʼa ʼae ʼe tonu ke au fai. Pea tahi, ka au alu ʼo faifakamafola pea ʼe toe lahi age mo toku fiafia. Koia ʼae neʼe au fia liliu ai ko he pionie.
TAKU SELEVISI PIONIE
ʼI te logo ʼa ʼihi tehina ki taku fia pionie, neʼe natou ui mai ʼe tonu ke au atali ke puli muʼa te ita ʼo ʼaku matuʼā. Neʼe au faikole ke au maʼu te poto pea mo fai te ʼu fekumi ke au iloʼi te ʼu tupuʼaga ʼo taku fia pionie. Pea neʼe au palalau mo te ʼu tehina mo tuagaʼane kua fakapotopoto. Neʼe au toʼo leva te tonu ʼae ke au fakafiafiaʼi te loto ʼo Sehova. Pea neʼe au toe mahino ai kapau neʼe au fakatalitali ʼi he kiʼi temi ʼi muʼa ʼo taku kamata toʼo te selevisi pionie, ʼe lagi kei hoko atu pe te fakafeagai ʼo ʼaku matuʼā kia au.
Neʼe au kamata taku selevisi pionie ʼi toku taʼu fakaʼosi ʼi te lise. Lolotoga taku selevisi pionie, neʼe au fia alu ʼo faifakamafola ʼi te ʼu koga meʼa ʼae ʼe lahi ai te gaue. Kaʼe, neʼe mole loto e taku Faʼe mo taku Tamai ke au mavae ʼi fale. Koia, neʼe au fakatalitali ai ke hoki au taʼu 20. Pea neʼe au kole ki te filiale ke au alu ʼo gaue faifakamafola ʼi he koga meʼa ʼe mole mamaʼo fau mo toku famili ʼi te potu saute ʼo Japon ke mole nofo tuʼania fau taku Faʼe.
ʼI taku gaue ʼi te koga meʼa neʼe hinoʼi au ki ai, neʼe au fiafia ʼi te sio ki ʼaku ako Tohi-Tapu ʼe natou papitema. Neʼe au kamata ako te lea Fakapilitania koteʼuhi neʼe au loto ke au gaue lahi maʼa Sehova. Pea, ʼi taku sio ki te faʼafai ʼa te ʼu pionie makehe ʼe toko lua ʼi taku kokelekasio pea mo tanā tokoni ki ʼihi, neʼe au fakatuʼutuʼu ai ʼe au toe fia liliu ko he pionie makehe. Lolotoga te temi ʼaia, neʼe tuʼa lua te kovi ʼo te mahaki ʼo taku Faʼe pea neʼe au toe liliu tuʼa lua ʼo tokoni kia ia. Neʼe punamaʼuli taku faʼe ʼo tupu ai tana agalelei kia au.
TE ʼU TAPUAKINA MAI IA SEHOVA
Hili ki ai taʼu ʼe fitu, neʼe au maʼu te tohi mai ia Atsushi, ko te pionie makehe ʼae neʼe au palalau ki ai ʼi te palakalafe ki muʼa atu. Neʼe fia ʼohoana pea neʼe ina fia iloʼi pe kotea ʼe au logoʼi ʼo ʼuhiga mo ia. Neʼe mole au manako ia ia pea neʼe mole au manatu leva ʼe manako ia au. Hili te mahina, neʼe au tali age ki ai ʼe au fakaʼamu ke ma feʼiloʼiʼaki lelei. Neʼe ma tokagaʼi neʼe tatau ʼama fakatuʼutuʼu. Neʼe ma fia hoko atu tamā gaue temi katoa pea neʼe ma fiafia moka hinoʼi maua ke ma olo ʼo gaue ʼi he koga meʼa pe. Ki muli age, neʼe ma ʼohoana. Neʼe au fiafia ʼosi ʼi te ʼomai ʼo ʼaku matuʼā mo ʼihi ʼo ʼoku kaiga ki toma ʼohoana.
Népal
Mole faʼa fualoa ki ai, ʼi tamā gaue ʼi toma ʼuhiga pionie katoa neʼe fakanofo ia Atsushi ko te tehina fetogi ʼo te taupau ʼo te siliko. Pea ki muli age, neʼe hinoʼi maua ko te ʼu pionie makehe pea
ke ma fai te gaue ʼaia. Neʼe ko tamā ʼuluaki ʼaʼahi ʼaia te ʼu kokelekasio. Kaʼe ʼi tamā ʼosi ʼaʼahi ʼo te ʼu kokelekasio fuli ʼo tomatou siliko, neʼe telefoni mai te filiale. Neʼe natou kole mai pe ʼe ma lotolelei anai ke ma olo ki Népal ʼo hoko atu te gaue taupau fakasiliko ʼi te koga meʼa ʼaia.Ko taku gaue ʼi te ʼu fenua kehekehe neʼe au ako lahi ai ʼo ʼuhiga mo Sehova
ʼI taku iloʼi ʼae ʼe au alu mamaʼo anai, neʼe au tuʼania ʼo ʼuhiga mo ʼaku matuʼā. ʼI taku telefoni kia naua neʼe tali fenei mai e taku Tamai: “ ʼE kolua olo anai ʼo sisio ki he koga meʼa ʼe matalelei.” Kua ʼosi te vahaʼa ki ai, neʼe foaki age e tona kaumeʼa he tohi ʼo ʼuhiga mo Népal pea neʼe manatu ai e taku Tamai ʼe ko he koga meʼa matalelei anai.
Neʼe ma fiafia ʼi te fakatahi mo te hahaʼi aga fakakaumeʼa ʼo Népal. Ki muli age, neʼe toe kau mo te fenua ko Bangladesh ki tona ʼaʼahi. Logo la neʼe ovi te fenua ʼaia ki Népal kaʼe neʼe kehe age ia. Neʼe lahi te ʼu telituale kehekehe ʼi tamā gaue faifakamafola. Hili ki ai taʼu ʼe nima, neʼe toe hinoʼi maua ki Saponia pea neʼe ma fiafia ʼi te fai ai ʼo te gaue taupau ʼo te siliko.
Neʼe lahi te ʼu faʼahi neʼe au ako ai ʼo ʼuhiga mo Sehova ʼi taku gaue ʼae ʼi Japon, mo Népal, pea mo Bangladesh. Neʼe kehekehe te ʼu agaʼi fenua pea mo te ʼu gaue ʼae ʼi te ʼaho fuli ʼa te hahaʼi ʼo te ʼu fenua ʼaia. Pea neʼe kehekehe ia te ʼulugaaga ʼa te tagata takitokotahi. Neʼe au sio ki te tokaga ʼa Sehova ki te tagata takitokotahi, mo tali, mo tokoni pea mo tapuakinaʼi natou.
ʼE lahi te ʼu faʼahi ʼe au fakafetaʼi ai kia Sehova. Neʼe ina fakafealagia ke au iloʼi ia ia pea mo fai tana gaue. Pea neʼe ina foaki mai hoku ʼohoana lelei. Neʼe tokoni mai te ʼAtua ke au toʼo he ʼu tonu ʼe lelei. ʼI te temi nei kua au maʼu he ʼu felogoʼi lelei mo te ʼAtua pea mo toku famili. ʼE au fakamalō kia Sehova koteʼuhi kua au toe kaumeʼa lelei mo taku Faʼe. ʼE au lotofakafetaʼi lahi ki taku tokalelei mo te ʼAtua pea mo taku faʼe.
ʼE ma fiafia ʼi te gaue fakasiliko