ALATIKE AKO 30
Faiga Ke Ke Nofo ʼi Te Kautahi ʼa Sehova
“Ne’e ke fakatupu ia ia ʼo malalo age ’i te kau ʼaselo pea ne’e ke fakakolona ia ia ʼaki te kololia mo te mauhiga.”—PES. 8:5, NWT.
KATIKO 123 Tou Agatonu Ki Te ʼu Tuʼutuʼuni Fakaʼatua
TE ʼU MANATU FAKANOUNOU *
1. Ka tou sio ki te lahi ʼaupito ’o te ʼatulaulau, kotea ’e tou logo’i?
KAPAU ’e tou fakakaukau’i ia te lahi ʼaupito ’o te ʼatulaulau ʼae ne’e fakatupu e Sehova, ’e feala ai ke tou logo’i ’o hage ko Tavite, ’i tana faikole aeni: “Ka au sio ki te atu lagi, te gaueaga o ou nima, mo te mahina, mo te u fetuu ae nee ke fakatupu: Kotea te tagata ke ke manatu ai kia ia? Pea mo te foha o te tagata ke ke tokaga ai kia ia!” (Pes. 8:4, 5) Ohage ko Tavite, ’e tou logoʼi ’e tou veliveli ’i te ʼatulaulau, kae ’e tou punamaʼuli ki tana manatuʼi tatou. Ne’e mole gata ʼaki pe te tokaga ’a Sehova kia Atama mo Eva, kae ne’e ina fakagafua ke nā kau ki tona kautahi.
2. Kotea ne’e loto e Sehova ke fakahoko e Atama mo Eva?
2 Ko Atama mo Eva, ko te ʼu ʼuluaki fanau ʼaia ’a Sehova pea neʼe ko he tamai fonu ’i te ofa ma’a naua. Ne’e ina loto ke lahi hanā fanau koia ne’e ina ui fenei: “Kolua fanaunau, kolua liuliuga, kolua fakahahai te kele, pea kolua pulei ia ia.” (Sen. 1:28) Ne’e tonu ke nā maʼu fanau pea ke nā taupau lelei te kele. Ko te ʼu meʼa fuli ne’e fakatotonu age e Sehova kia naua, ne’e tonu ke nā talagafua ki ai. Kapau ’e nā mulimuli ki te ’u fakatotonu ʼaia, pea ko naua mo tonā hologa katoa, ’e hoko atu pe anai tanatou kau ki te kautahi ’a Sehova ʼo talu ai.
3. Kotea ’e ha mai ai ne’e mauhiga mo’oni ia Atama mo Eva ’i te kautahi ’a Sehova?
3 Ne’e maʼuhiga ia Atama mo Eva ’i te kautahi ’a Sehova. Tokagaʼi te manatu ’a Tavite ’o uhiga mo Sehova ’i tana fakatupu te tagata. ’E ina ui fenei ʼi te Pesalemo 8:5, NWT: “Ne’e ke fakatupu ia ia ʼo malalo age ’i te kau ʼaselo pea ne’e ke fakakolona ia ia ʼaki te kololia mo te mauhiga.” ’E mo’oni, ʼe mole tatau te malohi, te atamai mo te ʼu fealagia ae ’e mau e te tagata ’i te kau aselo. (Pes. 103:20) Koia, ne’e fakatupu te tagata “’o malalo age” pe ia ’i te kau ʼaselo. ’I te fakatupu ʼae e Sehova ia Atama mo Eva, ne’e nā maʼuli fiafia mo’oni.
4. Kotea ne’e hoko kia Atama mo Eva? Pea kotea ʼae ka tou vakaʼi ’i te alatike ʼaeni?
4 Kae meʼa faka’ofaʼofa leva te mole kei kau ’a Atama mo Eva ’i te kautahi ’a Sehova. ʼO tupu ai ni nunu’a kovi ki ’ana fanau fuli. Koia la ʼae ka tou vakaʼi ’i te alatike ʼaeni. Ne’e mole fetogi te fakatu’utu’u ’a Sehova, ’e ina loto ke kau fuli ʼana fanau talagafua ki tana kautahi ’o talu ai. Tou vakaʼi pe ne’e fakamauhiga’i feafea’i tatou e Sehova. ʼOsi ʼaia pea tou vakaʼi pe kotea ’e feala ke tou fai mo’o fakaha tatatou fia kau ki te kautahi ’a te Atua ’i te temi nei pea mo te ’u tapuakina ’e mau anai e ʼana fanau ’o talu ai.
NE’E FAKAMAʼUHIGA’I E SEHOVA TE TAGATA
5. Ne’e fakamaʼuhigaʼi feafea’i tatou e Sehova?
5 ’E fakamauhigaʼi tatou e Sehova ’i tana fakatupu tatou ki tona pāki. (Sen. 1:26, 27) Ne’e fakatupu tatou ki te pāki ’o te Atua ’o feala ke tou maʼu he ’u kalitate taulekaleka ’o hage ko te ʼofa, te lotomanavaofa, te agatonu, mo te faitotonu. (Pes. 86:15; 145:17) ’E tou fakamaʼuhiga’i ia Sehova, pea mo tou lotofakafetaʼi ki ai mo kapau ’e tou maʼuli’i ’ona kalitate. (1 Pet. 1:14-16) ’E tou fiafia moka ’e tou fakafiafia’i tona loto. Ko te tupuaga la ʼaia ’o tatatou liliu ko he tahi ’e lotolelei ki ai ke kau ki tana kautahi.
6. Ne’e toe fakamauhigaʼi feafea’i e Sehova te tagata?
6 Ne’e fakatupu e Sehova he kele taulekaleka ma’a tatou. Ne’e teuteu’i e Sehova te kele ’i mua ’o tana fakatupu te ʼuluaki tagata. (Sopo 38:4-6; Sel. 10:12) Ko Sehova ko te ʼAtua ’e ʼofa pea mo lotofoaki, ’o ina foaki te tu’uga koloa lelei ma’a te tagata. (Pes. 104:14, 15, 24) ’I ʼihi temi, ’e ina fakakaukau’i te ’u mea ne’e ina fakatupu ’o sio ai ki tona lelei tukupau. (Sen. 1:10, 12, 31) Ne’e ina toe foaki ki te tagata ke ina puleʼi te ’u meʼa fuli ne’e ina fakatupu. (Pes. 8:7) Ko tana fakatu’utu’u ke fiafia ʼana fanau haohaoa ’i te taupau ’o te kele ’o talu ai. Koia, tou faikole tu’umaʼu kia Sehova ’o fakamalo ki ai ki te fakapapau taulekaleka ʼaia.
7. Ia Sosue 24:15, ʼe feafea’i hatatou mahino ki ai?
7 Ne’e tuku mai e Sehova te lotofaʼitaliha. ’A tatou te filifili te meʼa ’e tou loto ki ai ’i totatou mauli. (Lau ia Sosue 24:15.) Koʼena te fakaʼuhiga ’o te lotofaʼitaliha. ʼE fiafia totatou ʼAtua mo kapau ’e tou tauhi age kia te ia. (Pes. 84:12; Taag. 27:11) ʼE lahi te ’u aluʼaga ’e feala ke tou faka’aogai lelei ai totatou lotofaʼitaliha. Tou vakaʼi te faʼifaʼitaki ’a Sesu.
8. Ko te fa’ifa’itaki fea ne’e tuku mai e Sesu?
8 ʼE feala tatatou fakamu’amu’a te ’u mea ’e ʼaoga ki ’ihi ’i te ’u me’a ’ae ’e aoga kia tatou mo kapau ’e tou mulimuli ki te fa’ifa’itaki ’a Sesu. ’I te tahi ’aho, ne’e kumi e Sesu he koga me’a lavaki ke natou malolo ai ʼuhi ʼae kua natou gaʼegagaʼe. Kae ne’e ma’u mai natou e he hahai tokolahi, ’aki tanatou lotofakavilivili ’ae ke akoʼi age natou e Sesu. Kae ne’e mole ita ia ne’e ʼofa mamahi kia natou. Kotea ’ae ka fai e Sesu? “Ne’e lahi te ’u meʼa ne’e ina kamata akoʼi age kia natou.” (Mko. 6:30-34) Ka tou fa’ifa’itaki’i ia Sesu ’o tou fakaʼaogaʼi totatou temi, totatou malohi mo’o tokoni ki ’ihi, ʼe tou fakakololia’i ai tatatou Tamai ko Sehova. (Mat. 5:14-16) ʼE tou toe fakaha ai kia Sehova ’e tou fia kau mo tatou ki tana kautahi.
9. Kotea ’e fakamaʼua ki te ʼu matuʼā?
9 Ne’e foaki e Sehova ki te tagata te fealagia ’ae ke ma’u fanau pea mo akoʼi ke natou ’oʼofa mo tauhi age kia te ia. ʼU matuʼā, ’e kotou fiafia koa ’i te fealagia ’ae ne’e tuku atu e Sehova? Logo la ne’e lahi age te ’u tapuakina ne’e foaki ki te kau ʼaselo, kae ne’e mole feala ke natou ma’u fanau. Koia ’e tonu ai te fiafia ’a te ’u matuʼā mo lotofakafeta’i ’i tanatou ma’u fanau. ’O foaki ai e Sehova ki te ’u matuʼā te maʼua ʼae ke natou ‘ako mo akonaki’i te ’u fanau ke natou mulimuli ki te me’a ʼae ’e ui e Sehova.’ (Efe. 6:4; Tet. 6:5-7; Pes. 127:3) ʼE fia tokoni te kautahi ’a te ʼAtua ki te ’u matuʼā. Ko te tupuaga ʼaia ’o tana foaki mai te ’u me’a gaue ʼaeni, ohage la ko te ’u tohi, te ʼu ʼata viteo pea mo te musika ’e tou ma’u ’i te Neti. ʼO tou tokaga’i lelei ai te ʼofa ’a Sehova pea mo Sesu Kilisito ki ʼatatou fanau. (Luka 18:15-17) ’E fiafia ia Sehova ’i tana sio ’ae ’e falala te ’u matuʼā kia te ia, pea mo tanatou faiga fakamalotoloto ’o akoʼi ’anatou fanau. ’O feala ai ki ’anatou fanau ke natou kau ’i te kautahi ’a Sehova ʼo talu ai
10-11. Kotea ’ae kua feala ke tou maʼu ʼuhi ko te totogi?
10 Ne’e foaki e Sehova tona ʼAlo ’ofaina ke tou toe kau ’i tana kautahi. Ne’e tou vakaʼi ’i te palakalafe 4, ʼe mole kei kau ia Atama mo Eva ki te kautahi ’a Sehova, pea ’uhi ko naua ʼe mole toe kau ai mo ’ana fanau fuli. (Loma 5:12) Ne’e nā filifili ke nā talagata’a ki te ʼAtua, ’o tupu ai tanā mole kei kau ’i tana kautahi. Kae feafea’i ki tona hologa? Ko natou ’ae ’e talagafua ne’e fai e Sehova ni fakatu’utu’u ke natou toe kau ki tana kautahi. Ne’e feala te fa’ahi ʼaia ʼaki te sakilifisio ’o tona ʼAlo ʼulu tokotahi ia Sesu kilisito. (Soa. 3:16; Loma 5:19) ʼO feala ai leva ki te toko 144 000 tagata mo fafine agatonu ke vahe’i natou ko ni foha ’o te Atua.—Loma 8:15-17; Fkha. 14:1.
11 Ne’e mole gata pe ’i te toko 144 000, ’e toe ’i ai te toko lauʼi miliona hahaʼi agatonu ’e natou fai te finegalo ’o te ʼAtua. ’E natou maʼu te ʼamanaki ’ae ’e natou kau ’i tana kautahi, hili Ta’u ’e Afe ’i te ’ahiʼahi faka’osi. (Pes. 25:14; Loma 8:20, 21) ’I tanatou tui ki te ʼamanaki ’aia ’i te temi nei kua natou faikole kia Sehova ko tanatou “Tamai.” (Mat. 6:9) Ka fakatu’uake anai te kau mate, ’o feala ai ke natou ako te ’u fakama’ua ’a Sehova. Pea ka natou tali ’ana fakatotonu kua feala leva ke natou kau ’i te kautahi ’a Sehova.
12. ’I te temi nei, kotea te fehuʼi ’e tonu ke tou fai takitokotahi?
12 ʼE tou tokaga’i, ’e fakamaʼuhigaʼi e Sehova te hahaʼi ’i ni aluʼaga kehekehe. Kua ʼosi ina vahe’i te kau Kilisitiano fakanofo ke natou liliu ko hona ’u foha. Pea ki te “hahaʼi tokolahi” ne’e ina foaki te ʼamanaki ’ae ke natou liliu ko ’ana fanau ’i te malama fo’ou. (Fkha. 7:9) ’I te temi nei, kotea ’e tou fai ’o fakaha ai ’e tou fia kau ’i tana kautahi ’o talu ai?
FAKAHA KIA SEHOVA ’E KOTOU FIA KAU KI TANA KAUTAHI
13. Kotea ka tou fai mo kapau ’e tou fia kau ’i te kautahi ’a Sehova? (Maleko 12:30)
13 Kotou tauhi kia Sehova mo tokotou loto katoa. (Lau ia Maleko 12:30.) Ko Sehova ne’e ina foaki mai te tu’uga me’a ʼofa lelei. ’O ina foaki mai te fealagia ʼae ke tou atolasio age kia te ia. ’E tou fakaha totatou ʼofa ʼo “mulimuli ki ʼana fakatotonu.” (1 Soa. 5:3) Ne’e foaki e Sesu ki ʼana tisipulo te fakatotonu mai tana Tamai. Ne’e ina ui age ke natou fai ni tisipulo pea mo papitema’i natou. (Mat. 28:19) Pea ke natou feʼofaʼaki. (Soa. 13:35) Ko natou fuli ’ae ’e talagafua kia Sehova ’e ina fakagafua ke natou kau ki tana ʼu kaugana ’ae ’e mavetevete ’i te malamanei katoa.—Pes. 15:1, 2.
14. ʼE tou fakaha feafea’i anai totatou ʼofa ki te hahaʼi? (Mateo 9:36-38; Loma 12:10)
14 Kotou ʼo’ofa ki te hahai fuli. Ko te ʼofa ’e ko te kalitate lahi pe ʼaia ’o Sehova. (1 Soa. 4:8) Ne’e ʼuluaki ʼofa ia ia tatou ’i muʼa ’o tatatou iloʼi. (1 Soa. 4:9, 10) ʼE tou fa’ifa’itakiʼi tona ʼofa mo kapau ’e tou ’oʼofa ’i te hahai. (Efe. 5:1) ʼO tou tokoni anai ke natou iloʼi ia Sehova ’i te temi nei, na’a tauhala. (Lau ia Mateo 9:36-38.) ’I tatatou fai te fa’ahi ʼaia, ’e feala ai kia natou ke natou kau ’i te kautahi ’a te Atua. Ka papitema he tahi tou hoko atu ’o fakaha te ʼofa mo aga faka’apa’apa kia ia. (1 Soa. 4:20, 21) ’O feafea’i? Ohage la, ’e mole tonu ke tou mahalohalo ’e mole ina maʼu te ʼofa, pe’e ina maʼu he ʼu manatu kovi. ʼE tonu ke tou fakamaʼuhigaʼi tu’umaʼu te ’u tehina mo tuaga’ane, ’o tou manatu ’e natou maʼuhiga age ia tatou.—Lau ia Loma 12:10; Flp. 2:3.
15. Ko ai ’e tonu ke tou fakaha te agalelei pea mo te manava’ofa?
15 Tou agalelei pea mo manava’ofa ki te hahai fuli. Kapau ’e tou fia kau ’i tana kautahi ’o talu ai ’e tonu ke tou maʼuli’i tana folafola. Ohage la, ne’e akoʼi mai e Sesu ke tou agalelei pea mo manava’ofa ki te haha fuli maʼia mo ’otatou ’u fili. (Luka 6:32-36) ’I ʼihi temi ko tona fakahoko ʼe mole faigafua. Koia ’e ʼaoga ai ke tou ako’i te fa’ahiga ako mo te manatu ne’e mau e Sesu. Kapau ’e tou faiga malohi ke tou fakalogo mo fa’ifa’itaki’i ia Sesu, ’e tou fakaha ai ’e tou fia kau ’i te kautahi ’a Sehova ’o talu ai.
16. ʼE tou puipui feafea’i te matagafua ’o te kautahi ’a Sehova?
16 Kotou puipui te matagafua ’o te kautahi ’a Sehova. ’I te agamahani ʼi he famili ko te ki’i fanau veliveli ’e ina fa’ifa’itaki’i tu’umau pe tona tehina lahi. Kapau ko ia ʼae ’e lahi ʼe ina maʼuli’i te ’u pelesepeto ’o te Tohi-Tapu ’e ina tuku he faʼifaʼitaki lelei kia ia ʼae ’e veliveli. Kae kapau ’e ina fai te mea ’e kovi, ko ia ’ae ’e veliveli ’e ina muli’i te faʼifaʼitaki kovi ʼaia. ’E toe feia pe ’i te kautahi ’a Sehova. Ohage la, ’i muʼa atu ko he Kilisitiano ne’e agatonu, kae ’i te temi nei kua liliu ia ’o aposita pea mo fai he ’u aga he’e ʼaoga, ko ’ihi ne’e natou fia faʼifaʼitaki’i ’o fai te ’u ʼaga ʼaia. Ko natou ’aia ’e natou ʼulihi te matagafua ’o Sehova. (1 Tes. 4:3-8) ʼE mole tonu ke tou muli’i ’anatou fa’ifa’itaki kovi ʼaia pea mo fakamamaʼo mai ’i tatatou Tamai ko Sehova ’ae ’e ofa ia tatou.
17. Ko ai ’e tonu ke tou falala ki ai pea kotea tona tupuaga?
17 Falala kia Sehova kae mole ki te ’u koloa fakamalama. Ne’e fakapapau’i mai e Sehova ke tou fakamu’amu’a tona pule’aga mo maʼuli’i ʼana lao faitotonu ’i totatou maʼuli pea ’e ina foaki mai anai te meʼa kai, te ’u mutuʼi meʼa mo he nofoʼaga. (Pes. 55:23; Mat. 6:33) Ka tou taupau tu’umaʼu te manatu ʼaia, pea ’e mole tou manatu anai ki te ’u koloa ʼae ’e foaki mai e te malama ’o ui ’e tou maʼu ai te fimalie mo te fiafia mo’oni. ’O tou mahino ai leva ’e gata pe ko te fai ’o te finegalo ’o Sehova ’e tou maʼu ai te tokalelei mo’oni. (Flp. 4:6, 7) Tatau aipe pe ’e tou maʼu te fealagia ke tou totogi ni tu’uga koloa, kae ’e tonu ke tou fakakaukau’i pe ’e tou maʼu mo’oni he temi mo he malohi mo’ona faka’aogaʼi pea mo taupau lele’i. ʼE mole tonu ke tou pipiki fau ki ai. ʼAua na’a galo kia tatou ’e loto e te Atua ke tou liliu ko ni hahaʼi fa’a gaue ’i tana kautahi. ʼAua na’a tou tuku te ’u koloa fakamalama ke ina fakalelu’i tatou. Pea ’e mole tou fia hage ko te tupulaga ʼae ne’e fakafisi ki te faigamalie ʼae ke tauhi kia Sehova, pea mo kau ia natou ʼae ne’e vahe’i ko hona ’u foha fakalaumalie, ʼuhi pe he ne’e mauhiga kia ia ʼona koloa.—Mko. 10:17-22.
KOTEA TE KA HAʼU ʼA TE ʼU FANAU ʼA SEHOVA?
18. Kotea te gaue maʼuhiga pea mo te ʼu tapuakina ’e maʼu anai e te hahaʼi talagafua?
18 Ko te hahaʼi talagafua ’e natou fiafia anai ’i te atolasio kia Sehova ’o talu ai. Ko natou ʼae ka maʼu’uli ’i te kele ’e natou fiafia anai ’i te taupau ’o he kele taulekaleka. ʼE ko Sehova ne’e ina fakatupu te kele ke maʼuli fiafia ai te tagata ’o he’e gata. Kua vave pe, ko te kele mo te ’u meʼa maʼuli fuli pe ’e ma’u ai ’e toe fakafo’ou anai ’i te pule ’a te Pule’aga. ʼE pulihi anai e Sesu ia nunuʼa kovi fuli ’o te agahala ’a Atama mo Eva. ’E toe fakatuʼuake anai e Sehova te lauʼi miliona hahaʼi ki te maʼuli he’e gata ’i he kele kua liliu ko he palatiso. (Luka 23:42, 43) ʼE tuputupu anai te kau atolasio ’a Sehova ki te maʼuli haohaoa ’o natou tahi fakaha ai te “kololia mo te ma’uhiga” ’o hage ko tona ui e Tavite.—Pes. 8:5, NWT.
19. Kotea anai ka tou taupau ’i totatou ʼatamai?
19 Kapau ’e kotou kau ki te “hahaʼi tokolahi,” ʼe kotou maʼu anai he ka haʼu taulekaleka. ’E ʼofa te ʼAtua ia koutou, koia kotou fai ia meʼa fuli ’e kotou fealagia mo’ona fakafiafia’i. Kotou taupau maʼu ’i tokotou ʼatamai mo tokotou loto ʼana fakapapau ’i te ʼaho fuli pe. Kotou fiafia ’i te fealagia ʼae ke kotou kau ia natou ’e atolasio ki tatatou Tamai ʼae ’i selo pea mo fakamaʼuhiga’i te fakapapau ʼae ke tou viki’i ’o talu ai.
Katiko 107 Tou Faʼifaʼitakiʼi Ia Te ʼOfa ʼo Te ʼAtua
^ pal. 5 Ke maʼu te fiafia ’i he famili, ’e ʼaoga ke natou gaue fakatahi. Ohage la, ko te tamai ’e ina taki tona famili ʼaki te ʼofa, ʼe lagolago ki ai te fafine pea ke talagafua te fanau kia naua. ’O toe feia pe mo te kautahi ’a Sehova. ’E ’i ai te fakatu’utu’u ’a te ʼAtua ma’a tatou, pea kapau ’e tou lagolago lelei ki te fakatu’utu’u ʼaia ’e tou kau anai ’o talu ai ʼi te kautahi ʼaia ʼe atolasio kia Sehova.
^ pal. 55 FAKAMATALA ’O TE ʼU PĀKI: Ne’e fakatupu tatou ki te pāki ’o te ʼAtua, koia ’e tonu ai ke fefakahaʼaki e te taumatuʼa te ʼofa mo te manava’ofa ia naua ’o toe feia ki ʼana fanau. ʼE ʼofa Sehova ia naua ’o ina foaki age te fealagia ʼae ke nā maʼu fanau mo akoʼi natou ke natou ’oʼofa mo tauhi kia Sehova. ʼE fakaha e te ’u matuʼā te ʼata viteo mo’o fakamahino pe ’e kotea te tupuʼaga ’o te foaki e Sehova ia Sesu ko he totogi. ’E natou toe fakamahino ’e natou taupau anai te kele mo te ’u manu ’i te palatiso ’o talu ai.