ALATIKE AKO 32
Fakamalohi’i Tau Tui Ki Te Tupu’aga ’o Te Maʼuli
“Ko te tui . . . ʼe ko te fakamoʼoni lelei ʼo te ʼu moʼoni ʼae ʼe heʼeki tou sisio ki ai.”—HEP. 11:1.
KATIKO 11 ʼE Ha Te Kololia ʼo Sehova ʼi ʼAna Fakatupu
TE ʼU MANATU FAKANOUNOU *
1. Kotea ʼae ne’e akoʼi atu kia koe ’o uhiga mo te Tupuʼaga ’o te maʼuli?
KAPAU ne’e akoʼi koe talu mai tau kei veliveli ’i te mo’oni, ’e mahino ia ne’e ke iloʼi ai Sehova. Ko ia ko te Tupuʼaga ʼo te maʼuli pea ’e faigafua te fakaovi ki ai pea mo tana fakatu’utu’u fonu ’i te ofa ma’a te tagata.—Sen. 1:1; Gaue 17:24-27.
2. ʼE fakaʼuhiga feafea’i e ihi ia natou ʼae ’e tui ’e ʼi ai te Tupuʼaga ’o te maʼuli?
2 Tokolahi te hahaʼi ʼe mole natou tui ki te ʼAtua, pe’e ko ia ʼae ne’e ina fakatupu ia meʼa fuli. ʼE natou manatu ko te maʼuli ne’e ha fakafokifa, pea ko ʼihi fa’ahiga maʼuli ’e natou tuputupu mamalie ʼaki te temi, ’o mahino ai leva pe ko ai te ’u fa’ahiga maʼuli ʼaia. Ko ʼihi ia natou ʼaia ne’e natou kau ’i te ’u ako maʼoluga. ʼE natou ui ko te sienesia ’e ina fakaha ’e mole mo’oni te Tohi-Tapu, ’e gata pe kia natou ʼae ne’e mole ako ’e natou tui ’e ’i ai te Tupuʼaga ’o te maʼuli.
3. He koʼe ’e maʼuhiga ke tou fakamalohi’i tatatou tui?
3 Ko te fa’ahiga manatu hala ʼae ’e mau e natou ’e mole tui, ’e feala koa ke ina fakavaivai’i tau tui pau ʼae ko Sehova ko te Tupuʼaga fonu ’i te ʼofa? ’E fakalogo ki te ’u tupuʼaga ʼae ne’e tou tui ai ko Sehova ko te Tupu’aga ’o te maʼuli. ʼE tou tui koa ʼuhi ne’e ui mai e he tahi kia tatou peʼe ne’e tou to’o tatou he temi ke tou vakaʼi he ’u fakamo’oni ’i te Tohi-Tapu? (1 Ko. 3:12-15) Pe ’e kua fualoa pe’e kei tou fo’ofo’ou ’i te kautahi ’a Sehova, ’e ʼaoga ke tou fakamalohi’i tatatou tui. ’O mole tou tuku ke kakaʼi tatou e “te filosofia pea mo he ʼu manatu kaka mo vaʼiganoa” ’e feagai ki te Tohi-Tapu. (Kol. 2:8; Hep. 11:6) ’E tou vakaʼi ’i te alatike ʼaeni (1) he koʼe tokolahi ’e mole natou tui ’e ʼi ai he Tupuʼaga ’o te maʼuli, (2) ʼe feafea’i hau fakamalohi’i tau tui kia Sehova te Tupuʼaga, (3) ʼe feafea’i te taupau ’o te tui ke malohi tu’umaʼu.
TOKOLAHI ’E MOLE NATOU TUI ’E ʼI AI HE TUPUʼAGA ’O TE MAʼULI
4. ʼO mulimuli kia Hepeleo 11:1, ʼe fakatafito kitea te tui?
4 ʼE manatu ’ihi ko te maʼu ’o te tui ’e mole ’i ai hona fakatafitoʼaga. ’E mole feia tona faka’uhiga ’i te Tohi-Tapu. (Lau ia Hepeleo 11:1.) ʼE ina fakamahino ko te tui ’e fakatafito ki he ’u fakamo’oni lelei mo totonu. Ohage la, ’e mole tou sio mata kia Sehova, Sesu mo te Puleaga, kae ’e tou mau te ’u fakamo’oni ’o ʼuhiga mo natou. (Hep. 11:3) Ne’e ui fenei e te Fakamoʼoni ’a Sehova ’e gaue ki te sivi ’o te ’u eveve ’o te maʼuli: “Ko tatatou tui ’e mole vaʼiganoa. ʼE alu tahi mo te ’u fekumi fakasienesia.”
5. He koʼe ’e manatu te tokolahi ʼe mole ʼi ai he kamata’aga ’o te maʼuli?
5 ʼE feala pe ke tou manatu fenei: ‘Pe ’e ʼi ai he ’u fakamo’oni totonu ’o he Tupuʼaga ’e maʼuli mo’oni, he koʼe ’e manatu te tokolahi ko te ʼAtua ʼe mole ko ia te matapuna ’o te maʼuli?’ Ko ’ihi ne’e mole natou to’o he temi ke natou kumi ni fakamo’oni ki te ’u alu’aga ʼaia. Ko Robert, ’i te temi nei ko te Fakamo’oni ’a Sehova, ʼe ina ui fenei: “ ʼUhi ʼae ne’e mole akoʼi ’i te fale ako ’e ʼi ai he kamata’aga ’o te maʼuli, ne’e au maʼu ai te manatu ʼaia. Kae ’i tona taʼu 22, ne’e felaveʼi mo te ’u Fakamo’oni ’a Sehova ’o na fakaha age ’i te Tohi-Tapu te ’u fakamo’oni totonu mo malave loto ’e ʼi ai te kamata’aga ’o te maʼuli.” *—Vakaʼi te fakamatala ʼae ʼi te ʼa takai “ He Manatu Maʼuhiga Ki Te ’u Matuʼā.”
6. He koʼe ko ʼihi hahaʼi ʼe mole natou tui ’e ʼi ai he Tupuʼaga ’o te maʼuli?
6 Ko ’ihi hahaʼi ʼe mole natou tui ’e ʼi ai he Tupu’aga ’o te maʼuli. Kote’uhi hoki natou tui pe ki he meʼa kua natou sio mata ki ai. Hep. 11:1) Koia, ’e ʼaoga ki ai he toe temi mo he ’u faiga malohi mo fai ni fekumi ki ai, tokolahi ne’e natou fakafisi ki te fai ’o he ’u fekumi. Kapau ʼe mole tou fai te fa’ahi ʼaia pea ’e faigafua anai hatatou tui ’e mole he ʼAtua.
Kae ko natou ʼaia ’e natou toe tui pe ki he ’u mo’oni ʼe mole natou sio ki ai, ohage la ko te mo’oni ’o ʼuhiga mo te foli’i e te ’u palanete ia te la’a. ʼO ʼuhiga mo te tui ʼae ’e tou mau ’i te Tohi-Tapu ’e lahi ʼaupito “te ’u mo’oni ʼae ʼe heʼeki tou sisio ki ai,” pea ko te ’u mo’oni fakapulipuli ʼaia ’e fakamahino lelei mai ’i te Tohi-Tapu. (7. Ko te kau sienesia fuli koa ʼe natou fakafisi ko te ʼAtua ne’e ina fakatupu te ʼatulaulau? Fakamahino.
7 ʼI tanatou kumi he ’u fakamo’oni, ko ʼihi sienesia ki muli age ne’e natou tui leva ko te ʼAtua ne’e ina fakatupu te ʼatulaulau. * Ohage ko Robert, ne’e ui e ʼihi ne’e mole ʼi ai he Tupuʼaga ’o te maʼuli he neʼe mole akoʼi ’i te ʼu fale ako lalahi. Tokolahi ia natou ’e mole natou tui ’e ʼi ai he ʼAtua. Kae ko ʼihi kau sienesia ne’e natou ako ke natou iloʼi mo ’o’ofa kia Sehova. ʼO hage pe ko natou ʼaia, pe ’e kotea he ’u fa’ahiga ako ne’e tou kau ai, ʼe tonu ke tou fakamalohi’i tatatou tui ki te ʼAtua. Pea ko te fa’ahi ʼaia ʼe mole feala ke fai e he tahi age ma’a tatou.
FAKAMALOHI’I TAU TUI KI TE TUPU’AGA ’O TE MAʼULI
8-9. (1) Kotea te fehu’i ka tou tali anai ki ai? (2) Kotea te ’u lelei ’e ke ma’u ’i tau ako te natula?
8 ’E ke fakamalohi’i feafea’i tau tui ki te Tupu’aga ’o te maʼuli? Tou vakaʼi aluʼaga ’e fa.
9 Ako ke ke iloʼi te natula. ʼE feala te fakamalohi’i ’o tau tui ’o ke mamata te ʼu ʼakau, te ’u manu pea mo te ’u fetu’u. (Pes. 19:2; Esa. 40:26) Ka lahi tau ako ke ke iloʼi te natula, pea toe lahi age tau tui papau ʼae ko Sehova te Tupuʼaga ’o te maʼuli. ʼE maʼu ’i ʼatatou tohi te ’u alatike ’e fakaha ai te taulekaleka ’o te fakatupu. Faiga malohi ke ke lau, tatau aipe pe ’e faigata’a tau mahino ki ai. Faiga’i ke ke fakahu ki tou ʼatamai, pea ʼaua na’a galo ke ke sio’i te ʼu ʼata viteo fakamuli ’i te ʼu fakatahi fakafenua ʼae ’e tou maʼu ’i totatou tuʼasila ʼi te Neti jw.org.
10. Tuku mai he faifaitaki ʼe ʼi ai moʼoni he Tupuʼaga ’o te maʼuli ʼo mulimuli kia Loma 1:20.
10 ʼI tau ako te natula, tokagaʼi lelei pe kotea ’e ina akoʼi atu ’o ʼuhiga mo te Tupuʼaga ’o te maʼuli. (Lau ia Loma 1:20.) Ohage la, kua ke iloʼi ko te la’a ’e ina foaki mai te mafana ’o ina fakafealagia te maʼuli. Kae ’e toe feala ki te la’a ke ina foaki te mafana ’o malohi age pea ’e fakatupu tu’utamaki kia tatou. ʼE puipui koa tatou ki te alu’aga ʼaia? ʼEi. Ko te kele kua puipui lelei pea mo tukupau ʼaki te kasa. ’E ina taʼofi te malohi ’o te vela. Pea ka toe lahi age te malohi ’o te vela pea ’e toe hikihiki age te lahi ʼo te kasa ʼaia mo’ona tauʼi. ʼE mole koa la ke manatu ko te fakatu’utu’u ʼaeni ne’e fai e he tahi, pea ko ia ko he Tupuʼaga poto pea mo fonu ’i te ʼofa?
11. ʼE ke maʼu ’ifea he ʼu fakamahino mo’o fakamalohi’i tau tui? (Vakaʼi te fakamatala ʼae ’i te ʼa takai “ He ʼu Tohi Moʼo Fakamalohi’i Tau Tui.”)
11 ’E lahi te ’u ako ’e feala ke ke maʼu mo’o fakamalohi’i ’o tau tui ki te fakatupu. Vakaʼi ’i te Kumi’aga Tohi ʼa Te Kau Fakamo’oni ’a Sehova pea mo fai hau ’u fekumi ’i te jw.org. Ohage la, lau te ʼu alatike pea mo sio’i te ʼu ʼata viteo ’i te kupu tafito “Hasard ou conception?” ’E nounou pea mo fakaha ni fakamahino maʼuhiga ’o ʼuhiga mo te ’u manu pea mo te vao ʼakau. Pea ’e faiga te kau sienesia ke natou faʼifaʼitaki’i.
12. Ka tou ako te Tohi-Tapu, kotea ’e tonu ke tou tokaga’i?
12 Ako te Tohi-Tapu. Neʼe tou talanoa ki muʼa atu ki he tehina neʼe gaue ki te sivi ’o te ’u eveve ’o te maʼuli. Ne’e fakafisi te tehina ʼaia ki te ui ʼae ’e ʼi ai he Tupu’aga ’o te maʼuli. Kae ʼaki te temi ne’e fetogi tana manatu. ʼE ina fakamahino fenei: “Ko taku tui ne’e mole fakatafito pe ki ʼaku fekumi fakasienesia, kae ’e toe fakatafito ia ki taku ako fakamalotoloto te Tohi-Tapu.” ʼE lagi kua ke maʼu he ʼatamai malama ’o te ’u akonaki ’o te Tohi-Tapu, kae ʼe mole ko he tupu’aga ʼaia ke taʼofi ai te fakamalohi’i ’o tau tui. Hoko atu tau ako te Tohi-Tapu. (Sos. 1:8; Pes. 119:97) Tokagaʼi te mo’oni ʼae ʼe talanoa ki ai ’o ʼuhiga mo te ’u aluʼaga ne’e hoko ’i te hisitolia, ʼo toe feia pe mo’ona lea fakapolofeta. Pea ke ke fiafia ’i te logo tahi ’a te Tohi-Tapu katoa. ʼAki te fa’ahi ʼaia, ’e ina fakamalohi’i ai tau tui ’ae ko Sehova ʼe ko te Tupu’aga ’o te maʼuli pea ko te Tohi-Tapu ne’e tohi ʼaki tona laumalie maʼoni’oni. *—2 Tim. 3:14; 2 Pet. 1:21.
13. Tuku mai he tokoni fakapotopoto ’e tuʼu ’i te Tohi-Tapu.
13 Ka ke ako te Tohi-Tapu, tokagaʼi te maʼuhiga ’o te ʼaoga ’o ʼana tokoni. Ohage la talu mai fualoa, ’e tokoni mai ke tou liʼaki te manako ki te pa’aga, koteʼuhi ’e fakatupu tu’utamaki mo ina fakatupu he ’u ‘mamahi lahi.’ (1 Tim. 6:9, 10; Taag. 28:20; Mat. 6:24) Ko te tokoni ʼaia kei ʼaoga pe koa ’i totatou temi? ʼE ui fenei ʼi he tohi fakatoketa: “Ko te hahaʼi ʼae ’e manako ki te ’u koloa ’e si’isi’i age tanatou fiafia kae lahi age tanatou lotomamahi. ’O toe feia pe mo natou ’e faka’amu ke lahi ’anatou foʼi falā ’e natou pelepelegesi ʼi te fa’ahi ʼo te fakakaukau pea mo te fa’ahi ’o te malolo fakasino.” Ko te fakatokaga ’a te Tohi-Tapu ’o ’uhiga mo te manako ki te pa’aga kua toe lahi age tona ʼaoga kia tatou ’i te temi nei. Lagi ʼe ʼi ai he tahi ’u pelesepeto ʼe tokoni atu anai kia koe. Koia, ka lahi tatatou leleiʼia te ’u tokoni ʼo te Tohi-Tapu pea ʼe toe lahi age anai tatatou falala ki te poto ʼae ʼe foaki mai e totatou Tupuʼaga ʼofa. (Sakp. 1:5) Pea ʼe mahino ia, ’e tou fiafia lahi anai.—Esa. 48:17, 18.
14. ʼI tau ako te Tohi-Tapu, kotea ka ke mahino anai ki ai ’o ʼuhiga mo Sehova?
14 Ako te Tohi-Tapu ʼaki te fakatu’utu’u ʼae ke tou iloʼi lelei ia Sehova. (Soa. 17:3) Ko tau ako te Tohi-Tapu ’e ke mahino ai ko ia ʼe ko he laumalie ʼe ʼi ai ʼona kalitate fakaofoofo, pea ’i tau ako te natula ’e ke tokagaʼi ai te ’u kalitate pe ʼaia ’e ina maʼu. Ko te ’u kalitate ʼaia ’e gata pe ki he laumalie ’e maʼuli mo’oni ’e ina maʼu. (Eke. 34:6, 7; Pes. 145:8, 9) ʼAki te temi ’i tau ako ʼae ke ke iloʼi lelei ia Sehova, ko tau tui mo tou ʼofa pea mo tau fakakaumeʼa mo ia ’e toe malohi age anai.
15. Kotea te ’u fua lelei ’e tou maʼu ’i tatatou vaevae mo ʼihi tatatou tui?
15 Ko te tahi puleʼaki mo’o fakamalohi’i tau tui ki te ʼAtua, ko te vaevae mo ʼihi. Kae kotea ’e ke fai anai moka ’e fehuʼi atu e he tahi pe ’e maʼuli mo’oni te ʼAtua kae ʼe mole ke iloʼi lelei tona tali ki ai? Kumi he ’u fakamahino Fakatohi-tapu ’i ʼatatou tohi pea ke vaevae mo ia. (1 Pet. 3:15) ʼE toe feala ke ke kumi tokoni ki he tehina pe’e ko he tuaga’ane faiva. Tatau aipe pe ina tali pe’e kailoa te ’u fakamahino Fakatohi-tapu ʼaia kae ’e ʼaoga pe anai kia koe mo’o fakamalohi’i ’o tau tui. ʼAki tau fai ʼaia, ʼe mole ke tuku anai ia koe ke ke lotovaivai ’i te ’u manatu hala ʼo te kau poto mo natou ae ’e natou ui ʼe mole ʼi ai he Tupu’aga ʼo te maʼuli.
TAUPAU MAʼU HE TUI ’E MALOHI
16. Kotea ’e feala ke hoko kia tatou mo kapau ’e mole tou fakamalohi’i tatatou tui?
16 Pe ’e kua tou fualoa pe’e kei tou fo’ofo’ou ’i te tauhi kia Sehova, ’e tonu ke hoko atu te taupau lelei ’o tatatou tui. Kotea tona tupuʼaga? Koteʼuhi ’e feala pe ke vaivai. Tou manatuʼi ’e tou tui ki te ’u mo’oni ’e mole tou sio mata ki ai. Koia, ’e feala pe ke tou galoʼi vave ʼuhi ʼe mole tou sio mata ki te ’u meʼa ʼaia. Koia ’e fakaʼuhiga e Paulo te hala mo tui ki te “agahala ʼae ʼe ina taʼofi gafua tatou.” (Hep. 12:1) Kotea ’e tonu ke tou fai ke ʼaua na’a tou to ki te hele ʼaia?—2 Tes. 1:3.
17. Kotea te tokoni ’e ʼaoga kia tatou mo’o fakamalohi ’o te tui?
17 ʼUluaki pe muʼa, faikole tu’umau kia Sehova ke ina foaki atu tona laumalie maʼoniʼoni. He koʼe ’e ʼaoga? He ’e ko te tui ko te agaaga ’o te fua ’o te laumalie. (Kal. 5:22, 23) ʼE mole feala ke malohi tatatou tui ki te Tupu’aga mo kapau ’e mole tokoni mai tona laumalie maʼoniʼoni. Koia ka tou haga kole kia Sehova tona laumalie maʼoniʼoni pea ’e ina foaki mai anai. (Luka 11:13) ʼAua na’a ke lotonoa kae ke haga kole: “Fakatuputupu tamatou tui.”—Luka 17:5.
18. Ia Pesalemo 1:2, 3, kotea te faigamalie kua tou maʼu ’i te temi nei?
18 ʼOsi ʼaia, ako tu’umaʼu te Folafola ’o te ʼAtua. (Lau ia Pesalemo 1:2, 3.) ʼI te temi ʼae ne’e tohi ai te pesalemo, tokosi’i te kau Iselaele ne’e natou maʼu katoa te Lao ’a te Atua. Gata pe ki te hau mo te kau pelepitelo ne’e natou maʼu te Lao, kae ki te “tagata, mo fafine, mo fanau,” ʼo feia mo te kau matapule, ne’e ʼi ai te ’u fakatu’utu’u ne’e fai hili taʼu ’e fitu ke fakafealagia kia natou ke natou fagono ki te lau ’o te Lao. (Tet. 31:10-12) ʼI te temi ’o Sesu, ko te tokosi’i pe ne’e natou maʼu te ’u takaiga tohi ’o te Lao. Kae ’i te temi nei kua tokolahi ʼaupito kua natou maʼu katoa pe’e fakakoga te Tohi-Tapu. ʼI mea fakafiafia leva! ’E tou fakaha feafea’i ’e tou fiafia ’i tatatou maʼu te Tohi-Tapu?
19. Kotea ’e tonu ke tou fai mo’o taupau te tui ke malohi tu’umaʼu?
19 ʼE tou fakaha anai ’e tou leleiʼia te faigamalie ʼae kua tou maʼu te Folafola ’a te Atua ’o tou lau tu’umaʼu. ʼE mole hoki tou maʼu pe he temi pea hoki tou fai te fa’ahi ʼaia. ʼE tonu ke ʼi ai hatatou polokalama ako tokotahi pea mo fakahoko tu’umaʼu. ʼAki te fa’ahi ʼaia, ’e tou taupau ai he tui ’e malohi.
20. Kotea kua tou fakatotonu ke tou fai?
20 ʼO mole hage ko “te kau potopoto mo te kau ʼatamai” ’o te malama ʼaeni, ʼe tou tui tatou ki te Tohi-Tapu, pea ’e fakatafito tatatou tui ki te ’u meʼa ’e mo’oni. (Mat. 11:25, 26) ʼI tatatou ako te Tohi-Tapu, ’e tou iloʼi ai te tupu’aga ’o te kua lesili kovi ’o te malamanei pea mo te alu’aga kua ina vave fai mo’o fakatokatoka ’o te fa’ahi ʼaia. Tou fakatotonu ke tou fakamalohi’i tatatou tui pea mo tokoni ki te hahaʼi tokolahi ke natou maʼu te tui ki te Tupuʼaga ’o te maʼuli. (1 Tim. 2:3, 4) Pea ke hoko atu tatatou talitali ki te ʼaho ʼae ’e fakavikiviki ai te hahaʼi fuli kia Sehova pea mo fai te ʼu palalau ʼaeni ia Fakaha 4:11: “ ʼE tuha mo koe, Sehova tomatou ʼAtua, ke ke maʼu te kololia . . . he neʼe ke fakatupu ia meʼa fuli.”
KATIKO 2 Ko Tou Huafa Ko Sehova
^ pal. 5 ʼE tala mo’oni ʼi te Tohi-Tapu ko Sehova ’e ko te Tupuʼaga ʼo te maʼuli. Kae ki te tokolahi ’e mole natou tui ne’e ʼi ai he kamataʼaga ’o te maʼuli. Ma’a natou ne’e hoko fakafokifa pe ia. ’E tupu koa ia koutou he mahalohalo ’i tanatou manatu aia? Kailoa ia, mo kapau ’e tou fakamalohi’i tatatou tui ki te ʼAtua mo te Tohi-Tapu. Ko te alatike ʼaeni ’e ina fakamahino ai pe ’e feafeaʼi tatatou gaue’i te fa’ahi ʼaia.
^ pal. 5 ’I te ʼu fale ako ne’e mole ako’i ai ’e ʼi ai he kamata’aga ’o te maʼuli. ʼUhi ʼae ʼe mole natou maʼu he ’u fakamahino totonu ’o ʼuhiga mo te alu’aga ʼaia. Ko ’ihi kau faiako ko te ako’i ’o te manatu ʼaia ki te ’u fanau ’e fakatupu maveu ki te tauhi ʼae ’e natou tui ki ai.
^ pal. 7 ʼI te Kumi’aga Tohi ’a Te Kau Fakamo’oni ʼa Sehova, ’e ke maʼu ai te ’u tala manatu ’a te toko 60 kau faiako mo te kau sienesia ’e natou tui ki te Tupu’aga ’o te ma’uli. Alu ki te kupu tafito “Sienesia,” pea ke alu ki te kupu tafito “Scientifiques partisans de la création.” ʼI te ’u tala manatu ʼaia, ’e tou maʼu ʼihi ’i te Kumi’aga Tohi ’a Te Kau Fakamo’oni ’a Sehova, alu ki te kupu tafito “Sienesia, tekenolosia,” pea ke alu ki te kupu tafito “Interview.”
^ pal. 12 Ohage la, vakaʼi te alatike “La science et la Bible sont-elles compatibles ?” ʼi te Kotou ʼAʼala! (Fakafalani) ʼo Fepualio 2011 pea mo te alatike “Les prédictions de Jéhovah s’accomplissent” ʼi Te Tule Leʼo (Fakafalani) ʼo te ʼaho 1 ʼo Sanualio 2008.