ʼE Tuha Ke Taki Nātou Ki Te ʼu Matapuna Vai ʼo Te Maʼuli

“Ko te ʼAkeno, . . . ʼe ina fafaga anai ia nātou pea ʼe ina taki anai ia nātou ki he ʼu matapuna vai ʼo te maʼuli.”—FAKH. 7:17.

 1. ʼE fakahigoa feafeaʼi ʼi te Folafola ʼa te ʼAtua ia te kau Kilisitiano fakanofo, pea koteā ia te maʼua ʼaē neʼe foaki e Sesu kiā nātou?

 ʼE FAKAHIGOA ʼi te Folafola ʼa te ʼAtua ia te kau Kilisitiano fakanofo ʼaē ʼe natou taupau ia te ʼu koloa ʼo Kilisito ʼi te kele, ko “te tagata kaugana agatonu mo poto.” ʼI te temi ʼaē neʼe ʼaʼahi ai e Kilisito ia “te tagata kaugana” ʼi te taʼu 1918, neʼe ina maʼu mai te kau fakanofo ʼaia ʼi te kele ʼe natou foaki agatonu ia te “meʼa kai [fakalaumālie] ʼi tona temi totonu.” Ko te tupuʼaga lā ʼaia, ʼaē neʼe fiafia ai ia Sesu, te Pule, ʼo ina fakanofo ia nātou ki “ ʼona koloa fuli.” (Lau ia Mateo 24:45-47.) ʼI tonatou tuʼulaga ʼaia, ʼe tauhi ia te kau fakanofo ki te tahi kau ʼatolasio ʼa Sehova ʼi te kele nei, ʼi muʼa ʼo tanatou maʼu tonatou tofiʼa ʼi selō.

 2. Kotou fakamatala peʼe koteā ia te ʼu koloa ʼo Sesu?

² Ko he tahi ʼe pule, ʼe faʼifaʼitaliha ki te faʼahiga fakaʼaogaʼi ʼo tona ʼu koloa. Ko te ʼu koloa ʼo Sesu Kilisito, te Hau ʼaē neʼe fakanofo e Sehova, ʼe ko te ʼu koloa fuli ʼo te Puleʼaga ʼaē ʼi te kele. ʼE kau kiai “te toe hahaʼi tokolahi” ʼaē neʼe sio ki ai ia te ʼapositolo ko Soane ʼi te meʼa ʼaē neʼe hā age kiā ia. ʼE fakamatala e Soane te agaaga ʼo te toe hahaʼi tokolahi ʼaia, ʼo ina ʼui fēnei: “Koʼenī te toe hahaʼi tokolahi, ʼe mole feala tona lau e he tahi, mai te ʼu fenua fuli pea mo te ʼu telepī pea mo te ʼu hahaʼi pea mo te ʼu lea fuli, ʼe natou tutuʼu iā muʼa ʼo te hekaʼaga fakahau pea iā muʼa ʼo te ʼAkeno, ʼe natou kofuʼi te ʼu kofu hina; pea neʼe ʼi ai te ʼu pālema ʼi tonatou ʼu nima.”—Fakh. 7:9.

3, 4. Koteā ia te pilivilēsio lahi ʼaē ʼe maʼu e te toe hahaʼi tokolahi?

³ Ko te toe hahaʼi tokolahi ʼaia ʼe natou kau iā nātou ʼaē neʼe fakahigoaʼi e Sesu ʼe ko tana “tahi ʼu ovi.” (Soane 10:16) Ko tanatou ʼamanaki ke natou māʼuʼuli ʼo heʼegata ʼi te palatiso ʼi te kele. ʼE natou falala ko Sesu ʼe ina “taki anai ia nātou ki he ʼu matapuna vai ʼo te maʼuli”, pea “ ʼe holoholoʼi anai e te ʼAtua te loʼimata fuli pē ʼi ʼonatou mata.” ʼUhi ko te ʼamanaki ʼaia, ʼe natou “fō [ai] tonatou ʼu kofu pea mo natou fakahihina ʼi te taʼataʼa ʼo te ʼAkeno.” (Fakh. 7:14, 17) ʼE natou tui ki te sākilifisio ʼa Sesu, koia iā mata ʼo te ʼAtua, ʼe ‘hihina tonatou ʼu kofu.’ ʼE tala ʼe natou faitotonu ʼuhi heʼe natou kaumeʼa mo te ʼAtua, ohagē ko Apalahamo.

⁴ Tahi ʼaē meʼa, mai tona ʼaluʼaga ʼaē kiā mata ʼo te ʼAtua ʼe kua faitotonu ia te toe hahaʼi tokolahi ʼo te tahi ʼu ovi, ʼaē ʼe haga tuputupu, koia ʼe feala hanatou ʼamanaki ʼe natou hao anai ʼi te fakaʼauha ʼo te tuʼu ʼaenī ʼi te mamahi lahi. (Sake 2:23-26) ʼE feala ke natou fakaovi kiā Sehova, pea ʼe natou maʼu fuli ia te ʼamanaki taulekaleka ʼaē ke natou hao ʼi Halamaketone. (Sake 4:8; Fakh. 7:15) ʼE mole ko he hahaʼi ʼe gāue kehe, kae ʼe natou lotolelei ke natou gāue ʼo fakalogo ki te takitaki ʼa te Hau ʼaē ʼi selō pea mo tona ʼu tehina fakanofo ʼaē ʼi te kele.

 5. ʼE tokoni feafeaʼi ia te toe hahaʼi tokolahi ki te ʼu tehina fakanofo ʼa Kilisito?

⁵ Neʼe fakatagaʼi ia te kau Kilisitiano fakanofo pea ʼe toe hoko atu pē anai tonatou fakatagaʼi mālohi e te mālama ʼa Satana. Kae ʼe feala ke natou falala ki te tokoni ʼo tonatou ʼu kaumeʼa ʼaē ko te toe hahaʼi tokolahi. Logolā kua tokosiʼi ia te kau Kilisitiano fakanofo ʼi te temi nei, kae ʼe tuputupu aipē ia te toe hahaʼi tokolahi, ʼo toko lauʼi teau afe ia nātou ʼaē ʼe hilifaki kiā nātou ʼi te taʼu fuli. ʼE mole feala ki te kau fakanofo ke natou taupau takitokotahi ia te ʼu kōkelekāsio ʼaē e 100 000 ʼi te mālamanei kātoa. Koia, ko te tokoni ʼaē ʼe fai e te  tahi ʼu ovi ki te kau fakanofo, ʼe ko te gāue fakatagata ʼāfea ʼa te ʼu tagata fakapotopoto ʼo te toe hahaʼi tokolahi. ʼE natou tōkakaga ki te ʼu toko lauʼi miliona kau Kilisitiano ʼaē neʼe tuku ke taupau e “te tagata kaugana agatonu mo poto.”

 6. Koteā ia te fakakikite ʼaē neʼe fai ʼo ʼuhiga mo te lagolago anai ʼa te tahi ʼu ovi ki te kau Kilisitiano fakanofo?

⁶ Neʼe fakakikite e te polofetā ko Isaia ʼe lagolago anai te tahi ʼu ovi ki te kau Kilisitiano fakanofo. Neʼe ina tohi fēnei: “Koʼenī ia te folafola ʼa Sehova: ‘Ko te kau gāue ʼe mole totogi ʼo Esipito, ko te kau fakatau ʼo Etiopea pea mo te kau Sapea, te ʼu tagata lalahi, ʼe natou fakalaka anai iō koe, pea ʼe natou liliu anai ko tau hahaʼi. ʼE natou haʼele anai ʼi ʼou tuʼa.’ ” (Isa. 45:14) ʼI hona ʼaluʼaga fakatā, ko te kau Kilisitiano ʼaē ʼe ʼamanaki ʼi te temi nei ke natou māʼuʼuli ʼi te kele, ʼe natou haʼele iā tuʼa ʼo te kalasi ʼo te tagata kaugana fakanofo pea mo tona Kolesi Pule, ʼo natou fakalogo ki tanatou takitaki. Ohagē ko he “kau gāue ʼe mole totogi,” ko te tahi ʼu ovi ʼe natou lotolelei pea mo fakaʼaogaʼi ʼaki tonatou loto kātoa tonatou mālohi pea mo tonatou ʼu koloa, moʼo tokoni ki te gāue fai fakamafola ʼi te mālamanei kātoa, ʼaē neʼe fakatotonu e Kilisito ki tana kau tisipulo fakanofo ʼi te kele.—Gāue 1:8; Fakh. 12:17.

 7. Koteā te akoako ʼaē ʼe fai ki te toe hahaʼi tokolahi?

⁷ ʼI tanatou lagolago ʼaē ki tonatou ʼu tehina fakanofo, ʼe feala ai ki te toe hahaʼi tokolahi ke natou akoako mai te toe ʼo te kau fakanofo, ke natou liliu ko te tafitoʼaga ʼo te sōsiete fakatagata foʼou ʼaē kā māʼuʼuli anai ʼi te hili ʼo Halamaketone. ʼE tonu ke mālohi te tafitoʼaga ʼaia, pea ko nātou ʼaē ʼe kau kiai ʼe tonu ke natou lotolelei pea mo feala hanatou mulimuli ki te takitaki ʼa te Pule. ʼE foaki ki te kau Kilisitiano takitokotahi ia te faigamālie ʼaē ke natou fakahā ʼe feala ke fakaʼaogaʼi nātou e te Hau, ia Sesu Kilisito. ʼAki tanatou tui pea mo tanatou agatonu ʼi te temi nei, ʼe natou fakahā ʼe natou fakalogo anai mokā fai anai e te Hau he ʼu fakatotonu kiā nātou ʼi te mālama foʼou.

ʼE Fakahā e Te Toe Hahaʼi Tokolahi Tanatou Tui

8, 9. ʼE fakahā feafeaʼi e te toe hahaʼi tokolahi tanatou tui?

⁸ Ko te tahi ʼu ovi ʼo te kōkelekāsio ʼo te kau Kilisitiano fakanofo, ʼe natou fakahā tanatou tui ʼi he ʼu ʼaluʼaga kehekehe. ʼUluaki, ʼe natou lagolago ki te kau fakanofo moʼo tala ia te logo lelei ʼo te Puleʼaga ʼo te ʼAtua. (Mat. 24:14; 28:19, 20) Lua, ʼe natou lotolelei ʼo fakalogo ki te takitaki ʼaē ʼe foaki e te Kolesi Pule.—Hep. 13:17; lau ia Sakalia 8:23.

⁹ Tolu, ko te toe hahaʼi tokolahi ʼe natou lagolago ki tonatou ʼu tehina fakanofo ʼo natou mulimuli ki te ʼu pelesepeto faitotonu ʼa Sehova. ʼE natou faiga ke natou maʼu ia “te ʼofa, te fiafia, te tokalelei, te kātaki fualoa, te lotoʼofa, te agalelei, te tui, te agamalū, te loto lolomi.” (Kal. 5:22, 23) Iā ʼaho nei, ʼe tahitahiga te fakahā e te hahaʼi ia te ʼu kalitātē ʼaia, kae tokolahi ʼe natou fai ia “te ʼu gāue ʼo te kakano.” Kae ʼe lotomālohi ia te toe hahaʼi tokolahi ke natou tekeʼi ia “te folonikāsio, te heʼe maʼa, te māmio kovi, te tauhi tamapua, te ʼu gaohi meʼa fakatemonio, te ʼu fehiʼa, te fefihiʼaki, te maheka, te ʼu ʼita kovi, te ʼu kē, te ʼu māvetevete, te ʼu magaʼi lotu, te ʼu fuaʼā, te ʼu ʼinu fakavale, te ʼu fakafiafia fakavalevale pea mo ʼihi ʼatu meʼa fēia.”—Kal. 5:19-21.

10. Koteā ʼaē ʼe lotomālohi ai ia te toe hahaʼi tokolahi ke natou fai?

¹⁰ Mai tona ʼaluʼaga ʼaē ʼe tou agahala, ʼe feala ke faigataʼa te maʼu ʼo te fua ʼo te laumālie, mo tekeʼi ia te ʼu gāue ʼo te kakano pea mo te ʼu fakaneke ʼo te mālama ʼa Satana. Kae ʼe tou lotomālohi ke mole tou tuku ia te lotovaivai ʼuhi ko hatatou ʼu vaivaiʼaga, peʼe ko hatatou tōtō, peʼe ko tatatou ʼu tuʼakoi ʼi te faʼahi fakasino, ke ina fakavaivaiʼi tatatou tui peʼe ina fakasiʼisiʼi totatou ʼofa ʼaē kiā Sehova. ʼE tou ʼiloʼi ʼe fakahoko anai e Sehova ia te meʼa ʼaē neʼe ina fakapapau—tana haofaki ia te toe hahaʼi tokolahi ʼi te mamahi lahi.

11. Koteā ia te ʼu kākā ʼaē ʼe fakaʼaogaʼi e Satana moʼo fakavaivaiʼi ia te tui ʼa te kau Kilisitiano?

¹¹ Kae ʼe tou nonofo tōkakaga tuʼumaʼu heʼe tou ʼiloʼi ko totatou fili moʼoni ʼe ko te Tēvolo, pea ʼe mole ina fakahalaʼi tuʼa tahi pē anai tātou. (Lau ia 1 Petelo 5:8.) ʼE ina faigaʼi ke ina fakaʼaogaʼi ia te ʼu ʼapositā pea mo ʼihi atu moʼo fakaneke ʼo tātou ke tou fakatui ko te ʼu akonaki ʼaē ʼe tou mulimuli kiai ʼe ko he ʼu loi. Kae ʼi te agamāhani, neʼe mole he fua ʼo tana faiga ʼaia. ʼO toe fēia aipē, logolā ʼi ʼihi temi neʼe fakasiʼisiʼi ia te gāue fai fakamafola ʼuhi ko te fakataga, kae ʼi te agamāhani, neʼe liliu ia ʼe ko he fakalotomālohiʼi ʼo te tui ʼo nātou ʼaē neʼe fakatagaʼi. Koia, ʼe ʼāsili fakaʼaogaʼi e Satana  ia tana faʼahiga kākā, ʼaē ʼi tana manatu ʼe feala anai ke ina fakavaivaiʼi tatatou tui. ʼE ina fakaʼaogaʼi ia te lotovaivai. Neʼe fakatokagaʼi fēnei ki te kau Kilisitiano ʼo te ʼuluaki sēkulō ʼo ʼuhiga mo te tuʼutāmaki ʼaia: “Kotou tokagaʼi fakalelei ia [Kilisito] ʼaē neʼe ina kātakiʼi ia te ʼu palalau fakafeagai ʼaia mai te kau agahala, ʼaē neʼe ko he meʼa kovi kiā nātou.” Koteā tona tupuʼaga? “Koteʼuhi ke mole kotou fiu pea mo lotovaivai ʼi tokotou ʼu nefesi.”—Hep. 12:3.

12. Koteā ia te ʼu tokoni ʼaē ʼe tuʼu ʼi te Tohi-Tapu ʼe ina fakaloto mālohiʼi ia nātou ʼaē ʼe lotovaivai?

¹² Neʼe kua kotou lotovaivai koa? Neʼe kotou manatu koa ʼi ʼihi temi, ʼe mole ʼi ai hokotou ʼuhiga? Kapau ʼe hake iā koutou he ʼu manatu fēia, ʼaua naʼa kotou tuku ke fakaʼaogaʼi e Satana te ʼu manatu ʼaia moʼo tāʼofi takotou tauhi ʼaē kiā Sehova. Kapau ʼe kotou ako loloto ia te Tohi-Tapu, mo faikole fakamālotoloto, pea mo kotou kau tuʼumaʼu ki te ʼu fono pea mo fakatahi mo te kau Kilisitiano, ʼe kotou maʼu ai anai he lotomālohi pea ʼe mole kotou ‘lotovaivai anai ʼi tokotou nefesi.’ Neʼe fakapapau mai e Sehova ʼe tokoni anai kiā nātou ʼaē ʼe tauhi kiā te ia ke natou toe maʼu ia te mālohi, pea ʼe hoko anai tana fakapapau ʼaia. (Lau ia Isaia 40:30, 31.) Ke takimuʼa kiā koutou ia te ʼu gāue ʼo te Puleʼaga. Kotou tekeʼi ia te ʼu fakafiafia ʼaē ʼe fakapuli temi, pea kotou tokaga ʼo tokoni ki te hahaʼi. ʼE kotou maʼu ai anai ia te mālohi ke kotou faʼa kātakiʼi logolā tokotou lotovaivai.—Kal. 6:1, 2.

ʼE Haofaki Tātou Mai Te Mamahi Pea Mo Tou Hū Ki Te Mālama Foʼou

13. Ko te gāue fea ʼaē kā fai e nātou ʼaē kā hao ʼi Halamaketone?

¹³ Hili ia Halamaketone, ko te tokolahi ʼo te kau heʼe faitotonu ʼaē kā fakatuʼuake, ʼe ʼaoga anai ke akoʼi nātou ke natou mulimuli ki te ʼu ala ʼa Sehova. (Gāue 24:15) ʼE tonu anai ke akoʼi kiā nātou ia te sākilifisio faitotogi ʼa Sesu; pea ʼe tonu tāfito anai ke akoʼi kiā nātou ke natou tui ki te sākilifisio ʼaia ke feala hanatou maʼu ia te ʼu lelei ʼo te sākilifisio ʼaia. ʼE tonu anai ke natou liʼaki ia te ʼu manatu fakalotu hala ʼo te temi muʼa pea mo lītuʼa ki tonatou maʼuli ʼāfea. ʼE tonu ke natou ako ke natou kofuʼi ia te ʼulugaaga foʼou ʼaē ʼe ʼiloʼi ai ia te kau Kilisitiano moʼoni. (Efe. 4:22-24; Kol. 3:9, 10) ʼE lahi anai ia te ʼu gāue ʼaē kā fai e te tahi ʼu ovi ʼaē kā hao ʼi Halamaketone. ʼE ko he toe fiafia lahi anai te fakahoko ʼo te gāue ʼaia maʼa Sehova, heʼe mole toe ʼi ai anai ia te ʼu faigataʼaʼia pea mo te ʼu fakahala ʼo te mālama agakovi ʼaenī!

14, 15. Kotou fakamatala te ʼu manatu ʼaē kā fevaevaeʼaki anai iā nātou ʼaē kā hao ʼi te mamahi lahi pea mo te kau fakatuʼuake.

¹⁴ Ko te ʼu kaugana agatonu ʼa Sehova ʼaē neʼe mamate ʼi muʼa atu ʼo te fai fakamafola ʼa Sesu ʼi te kele, ʼe toe lahi anai te ʼu meʼa ʼaē kā natou ako ʼi te temi ʼaia. ʼE natou ʼiloʼi anai peʼe ko ai ia te Mēsia  ʼaē neʼe fakapapauʼi mai, ʼaē neʼe natou fakaʼamu ki ai kae neʼe mole natou sisio ki ai. ʼI tonatou maʼuli ʼi te temi muʼa, neʼe kua natou fakahā tanatou loto ʼaē ke akoʼi nātou e Sehova. Kotou fakakaukauʼi age muʼa ia te fiafia pea mo te pilivilēsio ʼo te tokoni kiā nātou, ohagē lā, ke natou fakamahino kiā Taniela ia te hoko ʼo te ʼu lea fakapolofetā ʼaē neʼe ina tohi kae neʼe mole mahino kiai!—Tan. 12:8, 9.

¹⁵ ʼE mahino ia, ʼe lahi anai te ʼu meʼa ʼaē kā tou akoʼi ki te kau fakatuʼuake, kae ʼe toe lahi anai mo te ʼu fehuʼi kā tou fai kiā nātou. ʼE feala anai ke natou fakahā mai ia te tahi ʼu manatu ʼo ʼuhiga mo te ʼu meʼa ʼaē neʼe mole fakamatala kātoa ʼi te Tohi-Tapu. Kotou fakakaukau age muʼa ia te fiafia ʼaē kā tou maʼu anai ʼi tatatou ʼiloʼi te tahi ʼu faʼahi ʼo ʼuhiga mo Sesu mai tona tehina mataʼi tama ko Soane Patita! ʼE mahino ia, ʼaki te ʼu meʼa ʼaē kā tou ako anai mai te kau fakamoʼoni agatonu ʼaia, ʼe tou maʼu anai he toe loto fakafetaʼi ʼe lahi age ʼi ʼaē ʼe tou maʼu ʼi te temi nei, ʼo ʼuhiga mo te Folafola ʼa te ʼAtua. Ko te ʼu kaugana agatonu ʼa Sehova ʼaē kua mamate, ʼo kau ai mo nātou ʼo te toe hahaʼi tokolahi ʼaē ʼe mamate ʼi te temi fakaʼosi, ʼe natou maʼu anai “he fakatuʼuake ʼe lelei age.” Neʼe kamata tanatou tauhi kiā Sehova ʼi he mālama neʼe puleʼi e Satana. ʼE natou fiafia lahi anai ʼi tanatou hoko atu tanatou tauhi ʼi te mālama foʼou, ʼi ni ʼu ʼaluʼaga ʼe lelei age!—Hep. 11:35; 1 Soa. 5:19.

16. Ohagē ko tona ʼui ʼi te lea faka polofetā, ʼe fakahoko feafeaʼi anai te ʼAho ʼo te Fakamāu?

¹⁶ Lolotoga te ʼAho ʼo te Fakamāu, ʼe ʼavahi ai anai ia te ʼu takaiga tohi. ʼO hilifaki ki te Tohi-Tapu, ʼe natou liliu anai ko te fakatafito ki te fakamāu ʼo te hahaʼi fuli pē, peʼe tuha mo nātou ke natou maʼu ia te maʼuli heʼegata. (Lau ia Fakahā 20:12, 13.) ʼI te fakaʼosi ʼo te ʼAho ʼo te Fakamāu, ʼe maʼu anai e te hahaʼi takitokotahi ia te faigamālie ʼaē ke natou tali ki te fakafifihi ʼaē neʼe lagaʼi ʼo ʼuhiga mo te pule faʼitaliha ʼi te ʼatulaulau. ʼE natou lagolago anai koa ki te Puleʼaga ʼo te ʼAtua, pea mo natou tuku ke takitaki nātou e te ʼAkeno ki “he ʼu matapuna vai ʼo te maʼuli”? Peʼe natou fakafeagai anai koa, ʼo mole natou fia fakalogo ki te Puleʼaga ʼo te ʼAtua? (Fakh. 7:17; Isa. 65:20) ʼI te temi ʼaia, ko te hahaʼi ʼi te kele kātoa ʼe natou maʼu anai te faigamālie ke natou fai he tonu ki te faʼahi ʼaia, ʼo mole fakahalaʼi e te agahala peʼe ko te mālama agakovi. ʼE mole he tahi ʼe feala anai ke ina fakafihiʼi ia te faitotonu ʼo te fakamāu fakaʼosi ʼaē kā fai e Sehova. ʼE gata pē anai ki te kau agakovi ʼaē kā fakaʼauha anai ʼo talu ai.—Fakh. 20:14, 15.

17, 18. Ko te fiafia fea ʼaē ʼe maʼu e te kau Kilisitiano fakanofo pea mo te tahi ʼu ovi ʼo ʼuhiga mo te ʼAho ʼo te Fakamāu?

¹⁷ Ko te kau Kilisitiano fakanofo iā ʼaho nei, ʼaē ʼe tuha mo nātou ke natou maʼu ia te Puleʼaga, ʼe natou fakaʼamu ʼaupitō ki te temi ʼaē kā natou hau ai ʼi te ʼAho ʼo te Fakamāu. ʼE ko he toe pilivilēsio anai ʼaē kā natou maʼu! Ko te ʼamanaki ʼaia ʼe ina uga ai nātou ke natou mulimuli ki te tokoni ʼaenī neʼe foaki e Petelo ki tona ʼu tehina ʼo te ʼuluaki sēkulō: “Ke ʼāsili age takotou faiga ʼaē ke kotou fakamālohiʼi takotou pāui pea mo tokotou filifili; heʼe kapau ʼe kotou haga fai ia te ʼu meʼa ʼaia, kailoa ia, ʼe mole kotou higa anai ʼi he temi. Heʼe ʼi takotou fai ʼaia, ʼe ʼavahi lahi atu anai kiā koutou ia te hūʼaga ʼo te puleʼaga heʼegata ʼo totatou ʼAliki pea mo Fakamaʼuli ko Sesu Kilisito.”—2 Pet. 1:10, 11.

¹⁸ ʼE fakafiafia fakatahi ia te tahi ʼu ovi pea mo tonatou ʼu tehina fakanofo. ʼE natou lotomālohi ke natou tokoni kiā nātou. ʼI tonatou ʼuhiga kaumeʼa ʼo te ʼAtua ʼi te temi nei, ʼe natou fia faiga mālohi ʼi tanatou tauhi ki te ʼAtua. ʼI te ʼAho ʼo te Fakamāu, ʼe natou fiafia anai ʼi te lagolago ʼaki tonatou loto kātoa ki te ʼu fakatuʼutuʼu ʼa te ʼAtua, ʼi te takitaki ʼo nātou e Sesu ki te ʼu matapuna vai ʼo te maʼuli. Pea ki muli age leva, ʼe tuha anai mo nātou ke natou liliu ko he ʼu kaugana ʼa Sehova ʼe māʼuʼuli ʼi te kele ʼo talu ai!—Loma 8:20, 21; Fakh. 21:1-7.

Kei Kotou Manatuʼi Koa?

• Koteā ʼaē ʼe kau ki te ʼu koloa ʼo Sesu?

• ʼE tokoni feafeaʼi te toe hahaʼi tokolahi ki tonatou ʼu tehina fakanofo?

• Koteā ia te ʼu pilivilēsio pea mo te ʼamanaki ʼaē ʼe maʼu e te toe hahaʼi tokolahi?

• ʼE feafeaʼi kiā koutou ia te ʼAho ʼo te Fakamāu?

[ʼU fehuʼi ʼo te ako]

[Paki ʼo te pasina 27]

Koteā ʼaē ʼe kotou fakaʼamu ke kotou ako mai te kau fakatuʼuake agatonu?