Ko He Kole ʼe Fai e Te Hahaʼi ʼi Te Mālamanei Kātoa

KOTOU fakakaukauʼi age muʼa ia te kole ʼe fai fuli pē e te ʼu toko lauʼi miliona peʼe ko te ʼu toko lauʼi miliale hahaʼi. ʼE natou kole ki te pule māʼoluga ʼo te ʼatulaulau ke ina fakahoko ia te faikole. Kae tokosiʼi iā nātou ʼaia ʼe mole natou ʼiloʼi totonu pe koteā te meʼa ʼaē ʼe natou kole ki te ʼAtua. ʼE feala koa ke fai he kole fēia? ʼEī, heʼe ko te kole ʼaia ʼe natou fai ʼi te ʼaho fuli. Koteā ʼaē ʼe kole e te hahaʼi fuli ʼaia? ʼE natou kole ke hoko mai lā ia te Puleʼaga ʼo te ʼAtua!

ʼE fakafuafua ʼe ko lotu e 37 000 ʼe lau ko te ʼu lotu fakakilisitiano, ʼe natou tui kiā Sesu Kilisito ko tonatou Pule. ʼE natou toko lua miliale ʼi te ʼu lotu ʼaia. Pea ʼe tokolahi iā nātou ʼaia ʼe natou fai ia te faikole ʼe higoaʼi māhani: ko Tamatou Tamai ʼe ʼi Selō peʼe ko te Faikole ʼo Te ʼAliki. ʼE kotou ʼiloʼi koa ia te faikole ʼaia? Ohagē ko tona akoʼi e Sesu ki tana ʼu tisipulo, ʼe kamata fēnei ia te faikole ʼaia: “Ko tamatou Tamai ʼe ʼi selō, ke tapuhā tou huafa. Ke hoko mai tou puleʼaga. Ke fai tou finegalo ʼi te kele, ohagē ko selō.”—Mateo 6:9, 10.

Lolotoga ia te ʼu sēkulō, neʼe lau liuliuga ia te faikole ʼaia e te hahaʼi tui ʼi te ʼu ʼēkelesia. Ke natou maʼu loto ia te faikole ʼaia, ʼi te ʼu temi faigamālie pea mo te ʼu temi faigataʼa neʼe natou lau fakafāmili peʼe takitokotahi. Neʼe natou lau mo tonatou loto kātoa. Ko ʼihi atu hahaʼi e tokolahi neʼe natou ako fakaʼatamai te faikole ʼaia pea mo lau tuʼumaʼu kae mole natou mahino pē lā ki te fakaʼuhiga ʼo tona ʼu palalau. ʼE mole gata pē ki te hahaʼi ʼo te Keletiate neʼe natou falala pea mo kole ke hoko mai lā ia te Puleʼaga ʼo te ʼAtua.

ʼE Mole Gata Pē Ia Te Kole ʼAia ʼi Te ʼu Lotu Fakakilisitiano

Ko te faikole ʼiloa ʼa te kau Sutea ʼe ko te faikole ʼa Kaddish. Logolā ʼe mole hona pikipikiga mo te mate peʼe mo te lotomamahi, kae neʼe lau māhani ʼi te ʼu temi ʼaē ʼe putu ai te hahaʼi. ʼE ʼui fēnei ʼi te faikole ʼaia: “ ʼOfa pē [ki te ʼAtua] ke ina fakatuʼu tona Puleʼaga ʼi tokotou temi maʼuli . . . peʼe ke fakavilivili mai.” a Ko te tahi faikole ʼāfea ʼi te sinakoka ʼe talanoa ʼo ʼuhiga mo te falala ki te Puleʼaga ʼo te Mēsia mai te ʼapi ʼo Tavite.

Ko ʼihi lotu ʼe mole tui kiā Kilisito, neʼe natou leleiʼia te logo ʼo ʼuhiga mo te Puleʼaga ʼo te ʼAtua. ʼI te nusipepa The Times of India, ko te tagata takitaki lotu Initia ʼiloa ʼo te 19 sēkulō, neʼe tokaga ki te faʼahi neʼe mole maʼu ʼi te tauhi ʼa te kau Initia, ʼi te tauhi Mahometa, pea mo te ʼu lotu ʼo te Keletiate, he neʼe ina ʼui fēnei: “ ʼE hoki feala ke maʼu ia te Puleʼaga moʼoni ʼo te ʼAtua mo kapau ʼe fakatahi ʼi te logotahi ia te potu ʼesitē pea mo te potu ʼuesitē.” Pea ko te pule ʼo te kolesi ʼo te lotu Mahometa ʼi te kolo ko Strathfield ʼi Ositalalia, neʼe mole heʼeki faʼa fualoa neʼe ina ʼui fēnei ʼi te sulunale: “Ohagē pē ko te hahaʼi fuli ʼo te Lotu Mahometa, ʼe au tui ko Sesu ʼe toe liliu mai anai pea ʼe ina fakatuʼu anai ia te Puleʼaga moʼoni ʼo te ʼAtua.”

ʼIo, ʼi te temi nei ʼe ko te toko lauʼi miliale hahaʼi ʼe natou falala pea mo kole ke hoko mai lā ia te Puleʼaga ʼo te ʼAtua. Kae tou vakaʼi age muʼa ia te faʼahi maʼuhiga.

ʼE lagi kotou ʼiloʼi pē ko mātou ia te kau Fakamoʼoni ʼa Sehova ʼaē ʼe matou tā ia te nusipepa ʼaenī, ʼe matou fakamafola haʼele ʼi tokotou ʼu kolo ke feala hamatou felāveʼi mo te hahaʼi, ʼo palalau mo nātou ki te Tohi-Tapu. ʼI te lolotoga fai ʼo te ʼalatike ʼaenī, ʼe matou fai ia te gāue ʼaia ʼi te mālamanei kātoa, iā fenua e 236 pea iā lea e 400 tupu. Ko te kupu tāfito ʼo tamatou fai  fakamafola, ʼe ko te Puleʼaga ʼo te ʼAtua. ʼE kotou fakatokagaʼi anai ko te kupu tāfito ʼo te nusipepa ʼaenī ʼe Ko Te Tule Leʼo ʼe Ina Kalagaʼi Te Puleʼaga ʼo Sehova. ʼI te agamāhani, ʼe matou fehuʼi ki te hahaʼi peʼe natou faikole ʼo ʼuhiga mo te Puleʼaga ʼaia. Pea ʼe tokolahi iā nātou ʼaē ʼe natou faikole ki te Puleʼaga ʼaia. Kae kā matou fehuʼi age peʼe koteā ia te Puleʼaga ʼaia, pea ʼe tokolahi ʼe natou tali mai: ‘ ʼE mole natou ʼiloʼi’ peʼe ko te ʼu fakamahino ʼaē ʼe natou fai, ʼe mole tāsilo lelei.

Kae he koʼē ʼe kole e te tokolahi ia te meʼa ʼe mole natou mahino lelei kiai? ʼE mole natou mahino koa kiai, ʼuhi heʼe ko te Puleʼaga ʼo te ʼAtua ʼe mata faigataʼa? Kailoa ia, heʼe fakamahino lelei mai ʼi te Tohi-Tapu ia te Puleʼaga. Tahi ʼaē, ʼi te ʼu temi fakapōʼuli ʼaenī, ʼe feala ke kotou maʼu ia he falala moʼoni ʼaki ia te logo ʼo te Tohi-Tapu ʼo ʼuhiga mo te Puleʼaga. ʼI te ʼalatike ʼaē kā hoa mai, ʼe tou vakaʼi ai anai ia te manatu ʼi te Tohi-Tapu ʼo ʼuhiga mo te falala ʼaia. Pea ʼe tou vakaʼi anai pe ko ʼāfea ʼaē kā hoko ai anai ia te faikole ʼa Sesu ʼo ʼuhiga mo te Puleʼaga.

[Nota]