Kotou Tōkakaga Ki Tokotou ‘Faiva Faiako’

“Fakamafola te folafola, . . . akonakiʼi, fakatonutonuʼi, fakalotomālohiʼi ʼaki he faʼa kātaki fualoa, pea ʼaki he faiva ʼi te faiako.”—2 TIM. 4:2.

 1. Ko te fakatotonu fea ʼaē neʼe fai e Sesu ki tana ʼu tisipulo, pea koteā ia te faʼifaʼitaki ʼaē neʼe ina tuku mai ke tou muliʼi?

 LOGOLĀ neʼe fai e Sesu ia te ʼu gāue fakaofoofo moʼo faitoʼo te hahaʼi ʼi tona minisitelio ʼi te kele, kae neʼe mole ʼiloa ia ʼuhi he neʼe faifaitoʼo peʼe neʼe ko te ʼu milakulo ʼaē neʼe ina fai, kae neʼe logona ia ʼi tona ʼuhiga tagata faiako. (Mko. 12:19; 13:1) Neʼe takimuʼa kiā Sesu te tala ʼo te logo lelei ʼo te Puleʼaga ʼo te ʼAtua, pea ʼe toe fēia mo tana ʼu tisipulo iā ʼaho nei. ʼE ʼi ai te gāue ʼe tonu ke haga fai e te kau Kilisitiano: ko te fai ʼo ni ʼu tisipulo, ʼo akoʼi nātou ke natou mulimuli ki te ʼu meʼa fuli ʼaē neʼe fakatotonu mai e Sesu ke tou fai.—Mat. 28:19, 20.

 2. Koteā ʼaē ʼe tonu ke tou fai moʼo fakahoko totatou maʼua ʼaē ke tou fai fakamafola?

² Moʼo fakahoko ia tatatou gāue ʼaē ko te fai ʼo ni ʼu tisipulo, ʼe tou faiga tuʼumaʼu ke tou hikihiki totatou fealagia ʼaē ʼi te faiako. Neʼe fakahā e te ʼapositolo ko Paulo ia te maʼuhiga ʼo te fealagia ʼaia ʼi tana faitohi ʼaē ki tona kaugā fai fakamafola  ko Timoteo. Neʼe ina ʼui fēnei: “Tokaga tuʼumaʼu kiā koe, pea mo tau faiako. Haga fai te ʼu meʼa ʼaia, heʼe kapau ʼe ke fai fēia, ʼe ke haofaki anai ia koe, pea mo nātou ʼaē ʼe fakalogo kiā koe.” (1 Tim. 4:16) Ko te faʼahiga faiako ʼaē neʼe fia talanoa kiai ia Paulo, ʼe mole ko te fakaako pē ʼo he ʼu meʼa ki te hahaʼi, kae ʼe tonu ki te kau minisi faiva ke malave tanatou ʼu palalau ki te loto ʼo te hahaʼi pea mo uga ai nātou ke natou fai he ʼu fetogi ʼi tonatou maʼuli. Ko te taʼi faʼahiga faiako ʼaia ʼe ko he faiva. Koia ʼe feafeaʼi hatatou fakatuputupu ia totatou “faiva ʼi te faiako” mokā tou fakahā ki te hahaʼi ia te logo lelei ʼo te Puleʼaga ʼo te ʼAtua?—2 Tim. 4:2.

Tou Hikihiki Totatou “Faiva ʼi Te Faiako”

3, 4. (a) ʼE feafeaʼi hatatou hikihiki ia te “faiva ʼi te faiako”? (b) ʼE tokoni feafeaʼi mai ia te Ako Fakateokalatike ke tou liliu ko he ʼu minisi faiva?

³ ʼE ʼui ʼi te tikisionalio, ko te “faiva” ʼe ko he “poto ʼe kita maʼu ʼi te ako, ʼi tona fai tuʼumaʼu, peʼe ʼi te siosioʼi fakalelei ʼo he gāue ʼe fai.” Ke tou liliu ko he kau faiako faiva ʼo te logo lelei, ʼe tonu ke tou tōkakaga ʼo fakahoko ia te ʼu puani ʼaia e tolu. ʼE tou mahino lelei anai ki te ʼu manatu ʼaē ʼe tou fia akoʼi ki niʼihi mo kapau kua tou ʼuluaki akoʼi e tātou totonu pea mo kole ki te ʼAtua ke ina fakamahino mai te faʼahi ʼaia. (Lau ia Pesalemo 119:27, 34.) Kapau ʼe tou sioʼi lelei ia te ʼu faʼahiga faiako ʼa te ʼu tehina faiva, pea ʼe tokoni mai anai kiā tātou ke tou faʼifaʼitakiʼi tanatou ʼu faʼahiga faiako. Pea kapau ʼe tou fakaʼaogaʼi tuʼumaʼu te ʼu meʼa ʼaē ʼe tou ako, pea ʼe feala ai anai ke tou hikihiki totatou ʼu fealagia.—Luka 6:40; 1 Tim. 4:13-15.

⁴ Ko Sehova ʼe ko totatou Faiako Lahi. ʼAki tana kautahi ʼaē ʼi te kele, ʼe ina foaki ki tana ʼu kaugana ia te takitaki moʼo fakahoko ia tanatou gāue ʼaē ko te fai fakamafola. (Isa. 30:20, 21) Pea ki te faʼahi ʼaia, ʼe fai ʼi te vāhaʼa fuli ʼi te ʼu kōkelekāsio fuli ia te Ako Fakateokalatike, moʼo tokoni ki te nofoʼaki kātoa ke natou liliu ko he kau fai fakamafola faiva ʼo te Puleʼaga ʼo te ʼAtua. Ko te Tohi-Tapu ʼaē ʼe fakaʼaogaʼi tāfito ʼi te ako ʼaia. Ko te Folafola ʼa Sehova ʼe ina fakahā mai ia te ʼu meʼa ʼaē ʼe tonu ke tou akoʼi ki te hahaʼi. Tahi ʼaē, ʼe ina fakahā mai te ʼu faʼahiga faiako ʼe lelei pea mo ʼaoga. ʼE fakamanatuʼi tuʼumaʼu mai ʼi te Ako Fakateokalatike, ʼe tou liliu anai ko he kau faiako ʼe faiva age mo kapau ʼe fakatafito tatatou faiako ki te Folafola ʼa te ʼAtua, ʼo tou fai he ʼu fehuʼi lelei, ʼo fakafaigafua tatatou faiako, pea mo tou ʼoʼofa fakamālotoloto ki te hahaʼi. Tou vakaʼi takitahi ia te ʼu manatu ʼaia, pea ʼe tou vakaʼi anai peʼe koteā ʼaē ʼe tonu ke tou fai ke tou fai he ako ʼe malave ki te loto ʼo te hahaʼi.

Kotou Fakatafito Takotou Faiako Ki Te Folafola ʼa Te ʼAtua

 5. Koteā ʼaē ʼe tonu ke fakatafito kiai tatatou faiako, pea koteā tona tupuʼaga?

⁵ Ko Sesu, ia te tagata faiako lahi, neʼe ina fakatafito tana ʼu faiakonaki ki te Tohi-Tapu. (Mat. 21:13; Soa. 6:45; 8:17) Neʼe mole faiakonaki ia ʼaki tona poto ʼo ia totonu pē, kae neʼe ina fai ʼo mulimuli ki te ʼu meʼa ʼaē neʼe akoʼi age e te ʼAtua ʼaē neʼe ina fekauʼi mai ia ia. (Soa. 7:16-18) Pea ʼe tonu ke tou mulimuli ki tona faʼifaʼitaki. Koia, peʼe koteā he ʼu palalau ʼe tou fai ʼi te minisitelio peʼe ʼi te ʼu ako Tohi-Tapu, kae ʼe tonu tuʼumaʼu ke tou fakatafito ki te Folafola ʼa te ʼAtua. (2 Tim. 3:16, 17) ʼE mole he tahi age meʼa ʼe tou lava fai ʼe lelei age pea mo mālohi age ʼi te Tohi-Tapu. ʼE ko te Tohi-Tapu ʼaē ʼe tonu ke tou fakaʼaogaʼi tāfito. Pe koteā te puani ʼaē ʼe tou faigaʼi ke tāʼofi e he tahi ʼe ina ako ia te Tohi-Tapu, ko te fakatuʼutuʼu ʼaē ʼe lelei ke tou fakaʼaogaʼi, ʼe ko tatatou fakalau kiā ia ia te manatu ʼaē ʼe tuʼu ʼi te Tohi-Tapu.—Lau ia Hepeleo 4:12.

 6. ʼE feafeaʼi ki he faiako hana ʼiloʼi kua mahino lelei ia ia ʼaē ʼe ako ki te ʼu manatu ʼaē ʼe ina ako?

 ⁶ ʼE mole fakaʼuhiga leva, ko he Kilisitiano faiako ʼe mole tonu ke ina teuteuʼi tana ako Tohi-Tapu. ʼE tonu ke ina teuteuʼi fakatomuʼa te ako, ke feala hana filifili ia te ʼu vaega fakatohi-tapu ʼaē ʼe tonu ke nā lau. ʼI te agamāhani, ʼe lelei age ke tou lau ia te ʼu vaega ʼaē ʼe fakatafito kiai te ʼu akonaki ʼaē ʼe tou tui kiai. ʼE toe lelei foki ke tou tokoni kiā ia ʼaē ʼe ako ke mahino ki te ʼu vaega fuli ʼaē ʼe ina lau.—1 Ko. 14:8, 9.

Kotou Fakaʼaogaʼi He ʼu Fehuʼi Lelei

 7. He koʼē ko te fakaʼaogaʼi ʼo te ʼu fehuʼi, ʼe ko he faʼahiga faiako ʼe lelei?

⁷ Ko te fakaʼaogaʼi lelei ʼo te ʼu fehuʼi, ʼe ina uga ai te fakakaukau pea mo tokoni ki te tehina faiako ke malave tana ʼu palalau ki te loto ʼo ia ʼaē ʼe ina fai tana ako. ʼE mole kotou lau pē anai te ʼu vaega fakatohi-tapu kiā ia ʼaē ʼe ako, kae ʼe kotou kole age anai ke ina fakamahino atu ia te ʼu vaega. ʼI ʼihi temi, ko he tahi ʼu fehuʼi peʼe ko he ʼu fehuʼi ʼe fai hoholo, ʼe lagi ʼaoga anai moʼo tokoni kiā ia ʼaē ʼe ako ke mahino lelei ki te puani ʼaē ʼe tonu ke ina tāʼofi. Kapau ʼe kotou fai te taʼi faiako ʼaia kiā ia ʼaē ʼe ako, ʼe feala ai anai hana mahino ki tana ʼu tali pea mo tui papau kiai.—Mat. 17:24-26; Luka 10:36, 37.

 8. ʼE feafeaʼi hatatou ʼiloʼi ia te meʼa ʼaē ʼi te loto ʼo ia ʼaē ʼe tou fai tana ako?

⁸ Ko te faʼahiga faiako ʼaē ʼe tuʼu ʼi tatatou ʼu tohi fakatohi-tapu, ʼe ko te ʼu fehuʼi pea mo te ʼu tali. ʼE mahino ia, ʼe tokolahi iā nātou ʼaē ʼe natou ako mo koutou, ʼe natou maʼu vave anai te tali ʼo te ʼu fehuʼi ʼaē ʼe tohi ai, ʼo natou fakaʼaogaʼi te ʼu manatu ʼaē ʼe tuʼu ʼi te ʼu palakalafe. Kae ko te faiako ʼaē ʼe fakasiosio tonu, ʼe mole fakafeʼauga pē anai tana faiako ki te ʼu tali ʼaē ʼe totonu. Ohagē lā, ʼe feala ki he tahi ʼe ako, ke ina fai he tali ʼe totonu ʼo ʼuhiga mo te manatu ʼaē ʼe tuʼu ʼi te Tohi-Tapu ʼo ʼuhiga mo te fai folonikāsio. (1 Ko. 6:18) Kae ʼaki he ʼu fehuʼi fakapotopoto, ʼe feala anai ke ina ʼiloʼi ia te manatu moʼoni ʼo ia ʼaē ʼe ako ʼo ʼuhiga mo te ʼu manatu ʼaē ʼe ina ako. ʼE lagi feala anai ke fehuʼi fēnei age e ia ʼaē ʼe ina fai tana ako: “He koʼē ʼe tapuʼi ʼi te Tohi-Tapu te ʼu felāveʼi fakasino ʼi tuʼa atu ʼo te ʼohoana? Koteā tau manatu ki te fakatotonu ʼaenī ʼa te ʼAtua? ʼI tau manatu ʼe ʼi ai koa he fua lelei ʼo te maʼuliʼi ʼo te ʼu lēkula ʼa te ʼAtua?” ʼAki te tali ʼaē kā ina fai, ʼe tou lava ʼiloʼi ai te meʼa ʼaē ʼi tona loto.—Lau ia Mateo 16:13-17.

Ke Faigafua Takotou Faiako

 9. Koteā ʼaē ʼe tonu ke tou manatuʼi mokā tou fakahā ia he manatu fakatohi-tapu?

⁹ ʼI te agamāhani, ʼe faigafua ia te ʼu moʼoni ʼaē ʼe tuʼu ʼi te Folafola ʼa te ʼAtua. Kae ko te hahaʼi ʼaē ʼe tou fai tanatou ako, ʼe lagi natou mahino gataʼa kiai ʼuhi ko te ʼu akonaki ʼo te ʼu lotu hala. Kā tou faiako, ʼe tou faiga anai ke tou fakafaigafua ia tatatou fakamahino ia te Tohi-Tapu. Ko te kau faiako faiva, kā natou fakamahino ia te ʼu manatu fakatohi-tapu, pea ʼe natou fakafaigafua, mo fakatāsilo, pea mo fakahā he ʼu manatu ʼe totonu. Kapau ʼe fēia tatatou faiako, pea ʼe mole liliu anai ia te moʼoni ʼo faigataʼa kiā ia ʼaē ʼe ako. ʼAua naʼa tou hilifaki he tahi ʼu manatu ʼe mole hona ʼaoga. ʼAua naʼa tou fakamahino fuli ia te ʼu vaega Tohi-Tapu ʼaē ʼe tou lau. Tou talanoa pē ki te puani tāfito moʼo fakamahino ia te puani ʼaē ʼe tou vakaʼi mo ia. ʼAki te temi, ko ia ʼaē ʼe ako ʼe mahino anai  ki te ʼu moʼoni loloto ʼo te Tohi-Tapu ʼi te tuputupu ʼo tana mahino.—Hep. 5:13, 14.

10. Ko te ʼu faʼahi fea ʼaē ʼe tonu ke tou tokagaʼi moʼo fakafuafua ia te ʼu palakalafe ʼaē kā vakaʼi lolotoga ia te ako Tohi-Tapu?

¹⁰ Ko palakalafe e fia ʼaē ʼe tonu ke ako? Ki te faʼahi ʼaia, ʼe tonu anai ke kotou fakafuafua fakapotopoto. ʼE fakalogo ia te faʼahi ʼaia ki te ʼu fealagia pea mo te ʼu ʼaluʼaga ʼo ia ʼaē ʼe ako pea mo ia ʼaē ʼe ina fai te ako, kae ʼe tonu ke tou manatuʼi tuʼumaʼu ʼi totatou ʼuhiga faiako, ʼe tonu ke tou fakatupu he tui mālohi iā ia ʼaē ʼe tou fai tana ako. Koia tou tuku hona temi feʼauga ke ina lau, mo mahino pea mo ina tali ia te ʼu moʼoni ʼaē ʼe tuʼu ʼi te Folafola ʼa te ʼAtua. Tou fakafuafua pē ia te ʼu palakalafe ʼaē ke tou ako mo nātou, ʼo fakalogo ki tana lava mahino kiai. Pea ʼe haga haʼele aipē ia te ako ki muʼa. Kapau kua mahino ia ia ʼaē ʼe ako ki te puani ʼaē ʼe tonu ke ina tāʼofi, pea tou hoko atu tana ako.—Kol. 2:6, 7.

11. Koteā te ako ʼaē neʼe tuku mai e te ʼapositolo ko Paulo ʼo ʼuhiga mo te faiako?

¹¹ Neʼe faigafua te logo ʼaē neʼe fakamafola e te ʼapositolo ko Paulo ki te hahaʼi ʼaē neʼe foʼofoʼou mai ki te kōkelekāsio. Logolā neʼe ko he tagata poto, kae neʼe mole ina fakaʼaogaʼi he ʼu palalau ʼe faigataʼa fau. (Lau ia 1 Kolonito 2:1, 2.) ʼE fia logo pea mo leleiʼia e te hahaʼi fakamālotoloto ia te ʼu moʼoni fakatohi-tapu ʼuhi heʼe faigafua, pea ʼe feala pē ki te hahaʼi fuli ke natou mahino kiai.—Mat. 11:25; Gāue 4:13; 1 Ko. 1:26, 27.

Kotou Tokoni Ki Te Kau Ako Ke Natou Leleiʼia Ia Tanatou Ako

12, 13. Koteā ʼaē ʼe feala ke ina uga he tahi ke ina maʼuliʼi ia te ʼu meʼa ʼaē ʼe ina ako? Tuku mai he faʼifaʼitaki.

¹² Ke lelei tatatou faʼahiga faiako, ʼe tonu ke malave tatatou ʼu palalau ki te loto ʼo ia ʼaē ʼe tou ako. ʼE tonu ke mahino kiā ia ko te ʼu meʼa ʼaē ʼe ina ako, ʼe ʼaoga kiā ia, pea ʼe fua lelei anai kiā ia, pea ʼe hikihiki anai tona maʼuli mo kapau ʼe mulimuli ki te takitaki ʼa te Tohi-Tapu.—Isa. 48:17, 18.

¹³ Ohagē lā iā Hepeleo 10:24, 25, ʼe fakalotomālohiʼi te kau Kilisitiano ke natou fakatahitahi mo tonatou ʼu tehina mo tuagaʼane, ʼo natou fefakalotomālohiʼaki ʼi te ʼofa. Kapau ʼe mole heʼeki kau ki te ʼu fono, pea ʼe lagi lelei ke tou fakamatala fakanounou age peʼe feafeaʼi te fakaʼaluʼalu ʼo te ʼu fono ʼaia pea mo te ʼu akonaki ʼaē ʼe fai ai. ʼE feala ke tou ʼui age ʼe kau te ʼu fono ki tatatou tauhi pea mo fakahā age ki ai tona ʼaoga ʼaē kiā tātou takitokotahi. Pea ʼe feala hatatou fakaafe ia ia ke haʼu ki te ʼu fono ʼaia. Kapau ʼe ina tali ia te fakatotonu fakatohi-tapu ʼaia, pea ʼe ina fai anai ʼuhi ko tana fia fakalogo ʼaē kiā Sehova, kae mole ko hana fia mālualoi kiā ia ʼaē ʼe ina fai tana ako.—Kal. 6:4, 5.

14, 15. (a) Koteā ʼaē ʼe feala ke ako e he tahi ʼe ina ako ia te Tohi-Tapu ʼo ʼuhiga mo Sehova? (b) ʼE fua lelei feafeaʼi ki he tahi ʼaē ʼe ina ako ia te Tohi-Tapu tana mahino ki te ʼulugaaga ʼo te ʼAtua?

¹⁴ Ko te tapuakina tāfito ʼaē ʼe maʼu e te kau ako mai tanatou ako ia te Tohi-Tapu pea mo tanatou maʼuliʼi tona ʼu pelesepeto, ko tanatou lava ʼiloʼi lelei ia Sehova pea mo ʼofa ki ai. (Isa. 42:8) Ko ia ko te Tamai ʼofa, te Tupuʼaga ʼo meʼa fuli, te Pule ʼo te ʼatulaulau, pea ʼe ina toe fakahā mai mo tona ʼulugaaga pea mo tona ʼu fealagia kiā nātou ʼaē ʼe ʼoʼofa pea mo tauhi age kiā te ia. (Lau ia Ekesote 34:6, 7.) ʼI te temi ʼaē neʼe teuteu taki ai e Moisese ia te puleʼaga ʼo Iselaele ke natou ʼāteaina mai tonatou maʼuli pōpula ʼi Esipito, neʼe fakahā age e Sehova ia ia totonu ʼo ina ʼui fēnei: “ ʼE au liliu anai ʼo fakahoko.” (Eke. 3:13-15) Ko tona fakaʼuhiga ʼe liliu anai ia Sehova ko meʼa fuli moʼo fakahoko tana ʼu fakatuʼutuʼu ʼo ʼuhiga mo tana hahaʼi ʼaē neʼe ina fili. Koia ko te kau Iselaele neʼe natou ʼiloʼi ia Sehova ʼi tona ʼu tuʼulaga ʼaenī: ʼE ina Haofaki, ʼe Tau, ʼe Tokaga, pea ʼe ina Fakahoko ia tana ʼu fakapapau, pea mo ʼihi age ʼu fealagia.—Eke. 15:2, 3; 16:2-5; Sos. 23:14.

¹⁵ ʼE lagi mole tatau anai ia te tokoni ʼaē kā fai e Sehova ki tatatou kau ako ohagē ko tana fai ʼaē kiā Moisese, kae ʼi te tuputupu ʼo tanatou tui pea mo tanatou leleiʼia ia te ʼu meʼa ʼaē ʼe natou ako, pea mo tanatou kamata maʼuliʼi ʼo te ʼu meʼa ʼaia, ʼe mahino ia ʼe mahino anai kiā natou ia te ʼaoga ʼaē ke natou falala kiā Sehova ke feala ai hana foaki age he lototoʼa, mo he poto, pea mo he takitaki. Kapau ʼe natou fai ia te faʼahi ʼaia, pea ʼe natou toe ʼiloʼi ai anai ia Sehova ʼi tona ʼu tuʼulaga ʼaenī: ko he Tahi ʼe Fai Tokoni poto ʼe tou lava falala ki ai, ko he Tahi ʼe ina Puipui tātou, pea ʼe ina foaki lahi mai ia meʼa fuli ʼaē ʼe ʼaoga kiā tātou.—Pes. 55:22; 63:7; Taag. 3:5, 6.

 Kotou Fakahā Ia He ʼOfa Fakamālotoloto

16. He koʼē ʼe mole ko te fealagia ʼaē ʼe kita maʼu, ʼaē ʼe maʼuhiga tāfito ai ke tou liliu ko he faiako faiva?

¹⁶ ʼAua naʼa kotou lotovaivai, mo kapau ʼe kotou tokagaʼi ʼe faigataʼa hakotou liliu ʼo popoto ʼi te faiako. Ko Sehova pea mo Sesu ʼe nā takitaki ia te polokalama ako ʼaē ʼe fai ʼi te mālamanei kātoa iā ʼaho nei. (Gāue 1:7, 8; Fakh. 14:6) ʼE feala ke nā tapuakinaʼi tatatou ʼu faiga ʼaē ke malave tatatou ʼu palalau ki te loto ʼo te hahaʼi ʼaē ʼe natou kumi moʼoni ia te ʼAtua. (Soa. 6:44) Ko te ʼofa fakamālotoloto ʼo ia ʼaē ʼe faiako kiā ia ʼaē ʼe ako, ʼe lava fua lelei age ia ʼi he faʼahiga fealagia ʼe kita maʼu. Neʼe mahino ki te ʼapositolo ko Paulo ia te maʼuhiga ʼaē ke ʼofa kiā nātou ʼaē ʼe ako.—Lau ia 1 Tesalonika 2:7, 8.

17. ʼE feafeaʼi hatatou fakahā tatatou tōkakaga fakamālotoloto ki te kau ako takitokotahi?

¹⁷ ʼO toe fēia pē mo tātou, ʼe tou fakahā anai tatatou tōkakaga fakamālotoloto ki tatatou kau ako, mo kapau ʼe tou toʼo hotatou temi ke tou feʼiloʼi leleiʼaki mo ia. Kapau ʼe tou felōgoi ki te ʼu pelesepeto fakatohi-tapu mo ia, ʼe mahino ia ʼe tou feʼiloʼi leleiʼaki anai mo nātou. ʼE lagi tou fakatokagaʼi anai tana kua maʼuliʼi ia te ʼu puani ʼaē ʼe ina ako ʼi te Tohi-Tapu. Pea ʼe lagi ʼe ʼi ai he tahi age ʼu faʼahi ʼo tona maʼuli, ʼe kei ʼaoga ke ina fai ni ʼu fetogi. ʼI tatatou tokoni kiā ia ʼaē ʼe ako peʼe ʼaoga feafeaʼi ki tona maʼuli ia te ʼu manatu ʼaē ʼe ina ako ʼi te Tohi-Tapu, ʼe feala ai hatatou tokoni kiā ia ʼaki he agaʼofa, ke liliu ko he tisipulo moʼoni ʼa Kilisito.

18. He koʼē ʼe maʼuhiga ke tou faikole mo ia ʼaē ʼe ako pea mo tou hūfakiʼi ia ia?

¹⁸ Kae ko te meʼa ʼaē ʼe maʼuhiga tāfito, ko tatatou lava faikole mo ia ʼaē ʼe ako pea mo tou hūfakiʼi ia ia. ʼE tonu ke mahino lelei kiā ia, ʼe tou fia tokoni kiā ia ke lahi age tana mahino ʼaē ki tona Tupuʼaga, ke fakaovi kiā te Ia, pea mo ina maʼu Tana takitaki. (Lau ia Pesalemo 25:4, 5.) Kā tou faikole ke tokoni mai ia Sehova ki te ʼu faiga ʼo ia ʼaē ʼe ako ke ina maʼuliʼi ia te ʼu meʼa ʼaē ʼe ina ako, pea ʼe mahino anai ki te maʼuhiga ʼaē ke ina “maʼuliʼi ia te folafola.” (Sake 1:22) Pea ʼi te logo ʼo ia ʼaē ʼe ako ki tatatou ʼu faikole fakamālotoloto, ʼe ina toe akoʼi ai anai peʼe feafeaʼi ia te faikole. ʼE ko he meʼa fakafiafia hatatou tokoni ki he tahi ke ina fakatuputupu tana ʼu felōgoi mo Sehova!

19. Koteā ʼaē kā tou vakaʼi anai ʼi te ʼalatike ʼaē kā hoa mai?

¹⁹ ʼE ko he meʼa fakalotomālohi ʼi tatatou ʼiloʼi ʼaē ʼe ko te toko ono miliona tupu kau Fakamoʼoni ʼi te mālamanei ʼe natou ako ke natou “faiva ʼi te faiako,” ʼaki te fakatuʼutuʼu ʼaē ke natou tokoni ki te hahaʼi ʼaē ʼe fakamālotoloto ke natou mulimuli ki te ʼu meʼa fuli ʼaē neʼe fakatotonu mai Sesu. Koteā ia te ʼu fua ʼaē ʼe tou maʼu ʼi tatatou fai fakamafola? ʼE tou vakaʼi anai te tali ki te fehuʼi ʼaia ʼi te ʼalatike ʼaē kā hoa mai.

ʼE Kei Kotou Manatuʼi Koa?

• He koʼē ʼe tonu ke hikihiki e te kau Kilisitiano ia te “faiva ʼi te faiako”?

• Ko te ʼu faʼahiga faiako fea ʼaē ʼe feala ai ke lelei age ai takotou faiako?

• Koteā ʼaē ʼe feala ke tou fai mo kapau ʼe mole tou maʼu ia te fealagia ʼaē ko te poto ʼi te faiako?

[ʼU fehuʼi ʼo te ako]

[Paki ʼo te pasina 13]

ʼE kotou kau koa ki te Ako Fakateokalatike?

[Paki ʼo te pasina 14]

He koʼē ʼe maʼuhiga ke kotou fakaafe ia ia ʼaē ʼe ako ke ina lau ia te Tohi-Tapu?

[Paki ʼo te pasina 16]

Kotou faikole mo ia pea mo kotou hūfakiʼi ia ia