‘Kotou Tōkakaga Tuʼumaʼu Ki Te Minisitelio ʼAē Neʼe Kotou Tali ʼi Te ʼAliki’

“Tokaga tuʼumaʼu ki te minisitelio ʼaē neʼe ke tali ʼi te ʼAliki, ke feala hau fakahoko.”—KOL. 4:17.

1, 2. Koteā ia te gāue ʼaē ʼe maʼua ke fai e te kau Kilisitiano ki te mālamanei?

 ʼE ʼI AI totatou maʼua lahi ʼo ʼuhiga mo te hahaʼi ʼaē ʼi te mālamanei. Ko te ʼu tonu ʼaē kā natou fai ʼi te temi nei, ʼe fakalogo anai kiai tonatou maʼuli peʼe ko tonatou mate ʼi “te mamahi lahi.” (Fakh. 7:14) Neʼe ʼui fēnei e te tagata faitohi ʼo te ʼu Tāʼaga Lea: “Fakaʼāteaina ia nātou ʼaē ʼe ʼave ki te mate, pea ʼofa pē ke ke tāʼofi ia nātou ʼaē ʼe haʼele sisipa ki te mate!” ʼE ko he ʼu palalau maʼuhiga ʼaenī! Kapau ʼe mole tou fakahoko totatou maʼua ʼaē ke tou fakatokaga ki te hahaʼi ia te faʼahi ʼaē ʼe tonu ke natou filifili, pea ʼe feala ke tou lakahala ʼo ʼuhiga mo tonatou mate. ʼE toe ʼui fēnei ʼi te koga tohi ʼaia: “Kapau ʼe ke ʼui: ‘Koʼenī! Neʼe mole matou ʼiloʼi ia te faʼahi ʼaia,’ ʼe mole sio anai koa kiai ia ia ʼaē ʼe ina sivisivi ia te loto? ʼE mole ʼiloʼi anai koa e ia ʼaē ʼe sio ki tou nefesi, pea ʼe mahino ia, ʼe ina liufaki anai ki te tagata kelekele ia tana aga ʼaia?” ʼE hā ʼaki mai, ʼe mole feala anai ke ʼui e te ʼu kaugana ʼa Sehova ʼe ‘mole natou ʼiloʼi’ ia te tuʼutāmaki ʼaē kā ʼamanaki hoko mai ki te hahaʼi.—Taag. 24:11, 12.

² ʼE maʼuhiga kiā Sehova ia te maʼuli ʼo te hahaʼi. ʼE ina fakalotomālohiʼi tana ʼu kaugana fuli ke natou fai ia meʼa fuli ʼe natou lavaʼi moʼo tokoni ki te haofaki ʼo he tokolahi. ʼE tonu ki te kau minisi takitokotahi ʼa te ʼAtua ke natou fakahā ia te logo ʼo te maʼuli ʼaē ʼe tuʼu ʼi te Folafola ʼa te ʼAtua. ʼE tatau te gāue ʼaē ʼe tou fai pea mo te gāue ʼa te tagata leʼo ʼaē neʼe nofo ʼi te tule, heʼe kā sio ki he tuʼutāmaki ʼe ʼamanaki hoko mai pea ʼe puhi fakatagi moʼo fakatokaga ki te hahaʼi. ʼE mole tou loto anai ke tou huʼi maʼua ʼuhi ko te toto ʼo te hahaʼi ʼaē neʼe mole tou fakahā kiai ia te logo lelei. (Esk. 33:1-7) Koia, ʼe maʼuhiga ke tou faʼa kātaki ʼo “fakamafola ia te folafola”!—Lau ia 2 Timoteo 4:1, 2, 5.

 3. Ko te ʼu manatu fea ʼaē kā tou talanoa anai kiai ʼi te ʼalatike ʼaenī pea mo te ʼu ʼalatike e lua ʼaē kā hoa mai?

³ ʼE vakaʼi anai ʼi te ʼalatike ʼaenī ia te ʼu puleʼaki ʼaē ʼe ʼaoga moʼo tekeʼi ia te ʼu fihifihia ʼaē ʼe feala ke natou fakafaigataʼa takotou minisitelio pea mo te gāue ʼaē ʼe feala ke kotou fai moʼo tokoni ki he tokolahi. Ko te ʼalatike ʼaē kā hoa mai, ʼe talanoa ai anai peʼe feafeaʼi hatatou fakatuputupu ia tatatou faiva ʼi te faiakonaki ʼo ʼuhiga mo te ʼu moʼoni maʼuhiga. Pea ʼe talanoa leva ʼi te tolu ʼalatike ki te ʼu fua fakatupu lotomālohi ʼaē neʼe maʼu e te kau fai fakamafola ʼo te mālamanei ʼi tanatou minisitelio. Kae ʼi muʼa ʼo tatatou vakaʼi ia te ʼu manatu ʼaia, ʼe lagi lelei muʼa ke tou vakaʼi pe koʼē kua kovi ʼaupitō ia totatou temi.

He Koʼē ʼe Tokosiʼi Ia Nātou ʼAē ʼe ʼi Ai Tonatou ʼAmanaki?

4, 5. Koteā ia te ʼu ʼaluʼaga ʼaē ʼe tau nei mo te mālamanei, pea ʼe malave feafeaʼi ki te hahaʼi?

⁴ ʼE hā mai ʼi te ʼu meʼa ʼaē ʼe hoko ʼi te mālamanei kua tou māʼuʼuli nei ʼi “te fakaʼosi ʼo te tuʼu ʼo te ʼu faʼahiga meʼa ʼaenī” pea kua ovi mai ia te fakaʼosi. ʼE tau nei ia te mālamanei mo te ʼu ʼaluʼaga ʼaē neʼe ʼui e Sesu pea mo tana ʼu tisipulo ʼe natou fakaʼiloga anai ia “te ʼu ʼaho fakamuli.” ʼE hoko ki te hahaʼi ia “te ʼu nunuʼa ʼo te tuʼania” ʼaē ko te ʼu tau, mo te ʼu hoge, mo te ʼu mafuike, pea mo ʼihi age malaʼia. ʼI te ʼu potu fuli ʼo te kele, ko te hahaʼi ʼe natou manukinukiʼi te lao, ʼe natou tahi manatu pē kiā nātou totonu, pea ʼe mole kei natou pipiki ki te ʼAtua. Tatau aipē mo te hahaʼi ʼaē ʼe natou fia fakalogo ki te ʼu lēkula ʼa te ʼAtua, ʼe natou felāveʼi mo “he ʼu temi maʼuhiga ʼaupitō mo faigataʼa.”—Mat. 24:3, 6-8, 12; 2 Tim. 3:1-5.

 ⁵ Kae tokolahi ʼi te mālamanei ʼe mole natou mahino ki te ʼuhiga moʼoni ʼo te ʼu meʼa ʼaē ʼe hoko ʼi te kele. ʼO tupu ai te hoha ʼa te tokolahi ʼo ʼuhiga mo tonatou maʼuli tokalelei pea mo ʼaē ʼo tonatou fāmili. Ko te tokolahi ʼe natou māʼuʼuli mamahi, ʼuhi ko te mate ʼa ni hahaʼi neʼe natou ʼoʼofa ai peʼe tupu ko he tahi age ʼu fihifihia. ʼI tanatou mole mahino ki te tupuʼaga ʼo te hoko ʼo te ʼu meʼa ʼaia pea mo tanatou mole maʼu he puleʼaki kiai, ʼe mole ʼi ai he ʼamanaki ʼa te taʼi hahaʼi ʼaia.—Efe. 2:12.

 6. He koʼē neʼe mole feala kiā “Papiloni Lahi” ke tokoni ki tana hahaʼi?

⁶ “Ko Papiloni Lahi” ia te kautahi fakamālamanei ʼo te ʼu lotu hala, neʼe mole ina fakafīmālieʼi ia te mālamanei. Kae ʼuhi ko “te vino ʼo tana fai folonikāsio” neʼe ina fakahehē ia te tokolahi ʼi te faʼahi fakalaumālie. Tahi ʼaē, ko te ʼu lotu hala ʼe natou fai he ʼu aga ohagē ko he fafine paomutu, heʼe natou fakahalaʼi pea mo puleʼi ia “te ʼu hau ʼo te kele,” ʼo natou fai te ʼu akonaki hala pea mo te ʼu gāue fakatemonio ke tupu ʼaki ai he fakalogo ʼa he tokolahi ki te takitaki ʼa te ʼu pule fakapolitike. Koia neʼe liliu ai leva te ʼu lotu hala ʼo mālolohi pea mo pule ki te tokolahi, kae lītuʼa ia ki te ʼu moʼoni fakalotu.—Fakh. 17:1, 2, 5; 18:23.

 7. Koteā te ʼamanaki ʼaē ʼe feala ke maʼu e te tokolahi, kae ʼe feafeaʼi he lava tokoniʼi ʼo ʼihi?

⁷ Neʼe fakahā e Sesu, ko te tokolahi ʼi te mālamanei ʼe natou ʼolo anai ʼi te ala fālahi ʼe ʼalu ki te mate. (Mat. 7:13, 14) Ko ʼihi ʼe natou ʼolo ʼi te ala fālahi ʼaia heʼe mole natou fia fakalogo ki te ʼu akonaki ʼo te Tohi-Tapu, kae ko ʼihi ʼe natou ʼolo ai he neʼe kākāʼi ia nātou, peʼe natou nonofo ʼi te fakapōʼuli fakalaumālie koteʼuhi neʼe mole fakahā age e tonatou ʼu takitaki lotu ia te moʼoni ʼo ʼuhiga mo te finegalo ʼo Sehova. Lagi ko ʼihi ʼe natou fetogi anai tonatou faʼahiga maʼuli mo kapau ʼe fakamahino fakalelei age te ʼu akonaki fakatohi-tapu. Kae ko nātou ʼaē ʼe natou nonofo ʼi Papiloni Lahi pea mo haga fakafeagai ki te ʼu lēkula ʼo te Tohi-Tapu, ʼe mole natou hao anai ʼi “te mamahi lahi.”—Fakh. 7:14.

Kotou Haga Fakamafola “Tuʼumaʼu”

8, 9. Koteā ʼaē neʼe fai e te kau Kilisitiano ʼo te ʼuluaki sēkulō ʼi tanatou felāveʼi ʼaē mo te ʼu fakafeagai, pea koteā tona tupuʼaga?

⁸ Neʼe ʼui e Sesu ʼe fakamafola anai e tana ʼu tisipulo ia te logo lelei ʼo te Puleʼaga pea mo natou fai anai ni ʼu tisipulo. (Mat. 28:19, 20) Koia ʼe fakaʼuhiga tuʼumaʼu e te kau Kilisitiano moʼoni ia tanatou fai fakamafola, ʼe ko hanatou agatonu ki te ʼAtua pea ʼe ko he gāue ʼe fakamaʼua tāfito ʼo ʼuhiga mo tanatou tui. Koia, ko te ʼu ʼuluaki tisipulo ʼa Sesu neʼe natou faʼa kātaki, ʼo fai fakamafola māʼiapē lā mo te ʼu temi ʼaē neʼe natou felāveʼi ai mo he ʼu fakafeagai. Neʼe natou falala kiā Sehova moʼo maʼu ia te mālohi, ʼo natou kole ke ina fakafealagia age ke natou hoko atu tanatou ‘palalau ʼaki he lototoʼa ʼo ʼuhiga mo tana folafola.’ Moʼo tali ki tanatou kole, neʼe fakafonu nātou e Sehova ʼaki ia tona laumālie māʼoniʼoni, pea neʼe natou palalau ʼaki he lototoʼa ʼo ʼuhiga mo te folafola ʼa te ʼAtua.—Gāue 4:18, 19, 31.

⁹ ʼI te temi ʼaē neʼe mālohi ai ia te fakafeagai,  neʼe lotovaivai ai koa te ʼu tisipulo ʼa Sesu ʼo ʼuhiga mo tanatou fakamafola ia te logo lelei? Kailoa ia. ʼI tanatou ʼiʼita ki te fai fakamafola ʼa te kau ʼapositolo, neʼe puke e te kau takitaki lotu Sutea ia te kau ʼapositolo, mo natou fakamatakuʼi ia nātou, pea mo tā ia nātou. Kae ko te kau ʼapositolo ‘neʼe natou haga hoko atu aipē ia tanatou faiakonaki pea mo tala ia te logo lelei ʼo ʼuhiga mo Kilisito, Sesu.’ Neʼe mahino lelei kiā nātou neʼe tonu ke natou “fakalogo ki te ʼAtua ohagē ko he fakalogo ki he pule kae mole ki te tagata.”—Gāue 5:28, 29, 40-42.

10. Ko te ʼu fihifihia fea ʼaē ʼe felāveʼi nei mo te kau Kilisitiano, kae koteā anai tona ʼu fua mo kapau ʼe lelei tanatou aga?

¹⁰ Tokolahi ʼi te ʼu kaugana ʼa te ʼAtua iā ʼaho nei ʼe mole tā ia nātou peʼe pilisoniʼi ia nātou ʼuhi ko tanatou fai fakamafola. Kae ko te kau Kilisitiano moʼoni fuli ʼe natou felāveʼi mo te ʼu ʼahiʼahi pea mo te ʼu fihifihia kehekehe. Ohagē lā, ko tokotou leʼo ʼo loto ʼaē neʼe akoʼi ʼaki ia te Tohi-Tapu, ʼe lagi ina uga anai koutou ke kotou fai he aga ʼe mole māhani kiai te hahaʼi peʼe ko he aga ʼe ina fakakeheʼi ai koutou mai iā nātou. ʼE lagi manatu anai e tokotou ʼu kaugā gāue, mo tokotou ʼu kaugā ako, peʼe ko tokotou ʼu vāhaʼa fale, ʼe kehe takotou aga koteʼuhi ʼe fakatafito te ʼu tonu ʼaē ʼe kotou fai ki te Tohi-Tapu. Kae ʼaua naʼa kotou lotovaivai ʼi tanatou mole fia fakalogo ki takotou fai fakamafola. Ko te mālamanei ʼe nofo ʼi te fakapōʼuli fakalaumālie, kae ko te kau Kilisitiano ʼe tonu ke natou ‘mū ohagē ko he ʼu mālama.’ (Filp. 2:15) Lagi ko nātou ʼaē ʼe natou kumi fakamālotoloto ia te ʼAtua, ʼe natou tokagaʼi anai pea mo vikiʼi takotou ʼu gāue lelei, pea mo natou fakakolōlia anai kiā Sehova.—Lau ia Mateo 5:16.

11. (a) ʼE tali feafeaʼi e ʼihi ia te gāue fai fakamafola? (b) Koteā ia te ʼu faʼahiga fakafeagai ʼaē neʼe felāveʼi mo te ʼapositolo ko Paulo, pea neʼe ina tali feafeaʼi ki te faʼahi ʼaia?

¹¹ ʼE tonu ke tou lototoʼa moʼo hoko atu ia te fakamafola ʼo te logo lelei ʼo te Puleʼaga. Ko ʼihi, ʼo fēia pē mo te ʼu kāiga, ʼe lagi natou vāʼi koutou peʼe lagi natou faigaʼi ke natou fakalotovaivaiʼi koutou. (Mat. 10:36) Neʼe mole hoko tuʼa tahi pē ia te haha ʼaē ʼo te ʼapositolo ko Paulo he neʼe agatonu aipē ʼo fai ia tona minisitelio. Kotou fakatokagaʼi pe koteā ʼaē neʼe ina fai ʼi tana felāveʼi ʼaē mo te taʼi fakafeagai ʼaia: “ ʼI te hili ʼo tamatou tali mamahi pea mo laukoviʼi, . . . neʼe matou maʼu ia te lototoʼa mai te ʼAtua, ke matou tala atu kiā koutou ia te logo lelei ʼo ʼuhiga mo te ʼAtua, ʼi te lotolotoiga ʼo te ʼu fakafeagai.” (1 Tes. 2:2) ʼE mahino ia, neʼe tonu ke lototoʼa ia Paulo ke hoko atu tana palalau ʼo ʼuhiga mo te logo lelei ʼi tona ʼosi puke, mo te hae ʼo tona ʼu mutuʼi meʼa, mo tona tā ʼaki te ʼu ʼakau, pea mo tona pilisoniʼi. (Gāue 16:19-24) Koteā ʼaē neʼe ina fakafealagia kiā ia ke lototoʼa moʼo hoko atu ʼo tana fai fakamafola? Neʼe lototoʼa ia Paulo he neʼe ina fia fakahoko tāfito ia te gāue ʼaē neʼe fakatotonu age e te ʼAtua ke ina fai.—1 Ko. 9:16.

12, 13. Ko te ʼu fihifihia fea ʼaē ʼe lagi felāveʼi mo ʼihi, pea neʼe feafeaʼi ia tanatou tekeʼi ia te ʼu fihifihia ʼaia?

¹² ʼE feala ke toe faigataʼa hatatou faʼafai ʼi te ʼu telituale ʼaē ʼe tahitahiga ai tatatou maʼu atu ʼo te hahaʼi kiō nātou peʼe ʼi te ʼu kolo ʼaē ʼe mole faʼa tali leleiʼi ai ia te logo lelei ʼo te Puleʼaga. Koteā ʼaē ʼe tou lava fai ʼi te ʼu taʼi ʼaluʼaga ʼaia? ʼE lagi ʼaoga anai ke tou maʼu he lototoʼa makehe moʼo palalau ki te hahaʼi ʼi te fagonogono faigamālie. ʼE lagi tonu ke tou fai fakamafola ʼi he tahi age ʼu temi, peʼe tou ʼolo ʼo fai fakamafola ʼi te ʼu koga meʼa ʼaē ʼe feala ai ke tou maʼu ai ia te hahaʼi.—Vakaʼi ia Soane 4:7-15; Gāue 16:13; 17:17.

¹³ Ko te tahi ʼu fihifihia ʼaē ʼe feala ke felāveʼi mo te tokolahi, ʼe ko te vaivai matuʼa pea mo te mahaki, ʼaē ʼe nā fakatuʼakoi anai tanatou fai fakamafola. Kapau ʼe fēia tokotou ʼaluʼaga, ʼaua naʼa kotou lotovaivai. ʼE ʼiloʼi lelei e Sehova ia tokotou ʼu vaivaiʼia pea ʼe fiafia ia pea mo fakafetaʼi ki te ʼu gāue ʼaē ʼe kotou lavaʼi. (Lau ia 2 Kolonito 8:12.) Pe koteā he faʼahiga faigataʼaʼia ʼe kotou felāveʼi mo ia—te fakafeagai, te meʼa noaʼi ʼo te logo lelei, peʼe ko te mahaki—kotou fai ia meʼa fuli ʼaē ʼe kotou lavaʼi moʼo fakamafola ki te hahaʼi ia te logo lelei.—Taag. 3:27; vakaʼi ia Maleko 12:41-44.

‘Kotou Tōkakaga Tuʼumaʼu Ki Tokotou Minisitelio’

14. Koteā ia te faʼifaʼitaki ʼaē neʼe tuku e te ʼapositolo ko Paulo ki tona ʼu tehina Kilisitiano, pea koteā te tokoni ʼaē neʼe ina foaki age kiā nātou?

¹⁴ Neʼe tokaga lelei ia te ʼapositolo ko Paulo ki tona minisitelio, pea neʼe ina uga mo tona ʼu tehina ke natou fai fēia mo nātou. (Gāue 20:20, 21;  1 Ko. 11:1) Neʼe ʼi ai te tehina ʼi te ʼuluaki sēkulō neʼe fai ki ai e Paulo ia te fakalotomālohi makehe, ʼe ko Akilipo. ʼI tana tohi ki te kau Kolose, neʼe ʼui fēnei e Paulo: “Kotou ʼui age kiā Akilipo: ‘Tokaga tuʼumaʼu ki te minisitelio ʼaē neʼe ke tali ʼi te ʼAliki, ke feala hau fakahoko.’ ” (Kol. 4:17) ʼE mole tou ʼiloʼi pe neʼe ko ai ia Akilipo peʼe neʼe feafeaʼi tona maʼuli, kae ʼe mahino mai neʼe ina tali ia te minisitelio ʼaē neʼe fakatotonu age ke ina fai. Kapau kua kotou papitema, pea ʼe tonu mo koutou ke kotou fai ia te gāue ʼaia. ʼE kei kotou tōkakaga koa ʼo fai ia te gāue ʼaia?

15. Koteā ʼaē ʼe fakamaʼua ki he Kilisitiano kua papitema, pea ko te ʼu fehuʼi fea ʼaē ʼe malaga mai ai?

¹⁵ ʼI muʼa ʼo tatatou papitema, neʼe tou fakahā kiā Sehova ʼi te faikole ʼe tou foaki kiā te ia totatou maʼuli. Ko tona fakaʼuhiga neʼe tou fakapapau ʼi te temi ʼaia ke tou fai tona finegalo. Koia tou fai ia te fehuʼi ʼaenī kiā tātou totonu: ‘Ko te fai ʼo te finegalo ʼo te ʼAtua ʼe ko te gāue moʼoni koa ʼaia ʼaē ʼe maʼuhiga tāfito ʼi toku maʼuli?’ ʼE mahino ia, ʼe ʼi ai te ʼu gāue kehekehe ʼe fakamaʼua mai e Sehova ke tou fai—ohagē lā ko te tokaga ki te maʼuli fakasino ʼo totatou fāmili. (1 Tim. 5:8) Kae ʼi tatatou ʼosi fakahoko ia te ʼu gāue ʼaia, ʼe tou fakaʼaogaʼi feafeaʼi totatou temi pea mo totatou mālohi? Koteā ʼaē ʼe tou fakamuʼamuʼa ʼi totatou maʼuli?—Lau ia 2 Kolonito 5:14, 15.

16, 17. Koteā ia te ʼu fealagia ʼaē ʼe lagi feala ke vakavakaʼi e he ʼu tūpulaga Kilisitiano pea mo nātou ʼaē ʼe mole lahi tonatou ʼu maʼua fakafāmili?

¹⁶ Ko koe koa ko he Kilisitiano tūpulaga kua papitema pea kua ʼosi tau ako peʼe kua vave ʼosi tau ako? ʼE mahino ia ʼe mole heʼeki ʼi ai hou ʼu maʼua fakafāmili. Kapau koia, pea koteā ʼaē ʼe ke fakatuʼutuʼu kiai ʼo ʼuhiga mo tou maʼuli? Koteā he ʼu tonu lelei ʼe feala anai ke ke fai moʼo fakahoko tau fakapapau ʼaē ke ke fai ia te finegalo ʼo Sehova? Tokolahi neʼe natou fai he ʼu fakatuʼutuʼu ke feala hanatou pioniē, pea neʼe natou maʼu ai te ʼu fiafia pea mo te ʼu tapuakina lahi.—Pes. 110:3; Tnk. 12:1.

¹⁷ ʼE lagi ko koe ko he tahi kua fotufotuʼa. Kua ke gāue kae mole heʼeki lahi fau hou ʼu maʼua, gata pē ki tou taupau. ʼE mahino ia ʼe ke lagolago ki te ʼu gāue ʼo te kōkelekāsio ʼo mulimuli pē ki tou ʼu fealagia. ʼE feala koa ke toe lahi age tou fiafia? Neʼe kua ke fakakaukauʼi koa ke ke fakalahi age tau lagolago ʼaē ki te minisitelio? (Pes. 34:8; Taag. 10:22) ʼI ʼihi telituale, ʼe kei lahi te gāue ʼaē ʼe tonu ke feala ai ki te hahaʼi ke natou ʼiloʼi te logo ʼo te moʼoni ʼaē ʼe natou maʼu ai anai ia te maʼuli. ʼE feala koa ke ke fai he ʼu fetogi ʼi tou maʼuli, lagi ke ke ʼalu ʼo gāue ʼi he ʼu telituale ʼe ʼaoga tāfito ai he ʼu kaugā fai fakamafola?—Lau ia 1 Timoteo 6:6-8.

18. Koteā ia te ʼu fetogi ʼaē neʼe fai e te taumātuʼa kei tūpulaga, pea neʼe koteā tona ʼu fua?

¹⁸ Tou vakaʼi ia te faʼifaʼitaki ʼa Kevin pea mo Elena ʼi Amelika. a ʼI tanā fuafua ʼohoana neʼe nā  fakatuʼutuʼu ke nā totogi honā fale. Neʼe nā gāue temi kātoa pea neʼe faigafua tonā maʼuli fakasino. Kae ʼi te lahi fau ʼo tanā tōkakaga ki tanā ʼu gāue pea mo te ʼu ogaoga ʼo tonā loto fale, neʼe mole lahi ai leva tanā fai fakamafola. Neʼe mahino ai kiā nāua kua tuku fuli pē tonā temi pea mo tonā mālohi ki tonā ʼu koloa. Kae ʼi tanā fakatokagaʼi ia te maʼuli fiafia ʼa te taumātuʼa pioniē neʼe nā fakafaigafua tonā maʼuli, pea neʼe fakatuʼutuʼu leva e Kevin mo Elena ke nā fetogi ia tonā maʼuli. ʼI tanā ʼosi kumi tokoni kiā Sehova ʼi te faikole, neʼe nā fakatau ai leva tonā ʼapi kae nā toʼo tonā kiʼi koga fale. Neʼe fakasiʼisiʼi e Elena tona ʼu hola gāue ke feala hana pioniē. ʼI te sio ʼa Kevin ki te ʼu fiafia ʼaē neʼe maʼu e tona ʼohoana ʼi tana pioniē, neʼe ina tuku mo ia tana gāue temi kātoa kae liliu ʼo pioniē. Ki muli age, neʼe nā ʼolo leva ki Amelika ʼo te Potu Sautē ʼaē neʼe ʼaoga lahi kiai he kau fai fakamafola. ʼE ʼui fēnei e Kevin: “Neʼe mā fiafia tuʼumaʼu pē ʼi tomā maʼuli fakataumātuʼa, kae kā tou fai ni ʼu fakatuʼutuʼu ke lahi age tatatou tauhi ki te ʼAtua, pea ko tatatou fiafia ʼe lahi ʼaupitō age ia.”—Lau ia Mateo 6:19-22.

19, 20. He koʼē ko te fakamafola ʼo te logo lelei ʼe ko te gāue maʼuhiga tāfito ʼaia iā ʼaho nei?

¹⁹ Ko te fakamafola ʼo te logo lelei ʼe ko te gāue maʼuhiga tāfito ʼaia ʼe fai ʼi te kele iā ʼaho nei. (Fakh. 14:6, 7) ʼE lagolago ia te gāue ʼaia ki te fakatapuhā ʼo te huafa ʼo Sehova. (Mat. 6:9) Ko te logo ʼo te Tohi-Tapu ʼe ina fetogi ʼi te taʼu fuli ia te maʼuli ʼo te tokolahi ʼaē ʼe natou tali ia te logo ʼaia, ʼo feala ai hanatou maʼu ia te haofaki. Kae ʼe fai e te ʼapositolo ko Paulo ia te fehuʼi ʼaenī: “ ʼE natou logo feafeaʼi anai, mo kapau ʼe mole he tahi ʼe fai fakamafola?” (Loma 10:14, 15) ʼE moʼoni ʼe faigataʼa anai mo kapau ʼe mole ʼi ai he tahi ʼe fai fakamafola, koia ʼe tonu ai ke kotou fai ia meʼa fuli ʼe kotou lavaʼi moʼo fakahoko ia tokotou minisitelio.

²⁰ Ko te tahi puleʼaki lelei moʼo tokoni ki te hahaʼi ke natou ʼiloʼi ia te maʼuhiga ʼo te ʼu temi faigataʼa ʼaenī pea mo te ʼu fua ʼo te ʼu tonu ʼaē kā natou fai, ʼe ko te hikihiki ʼaē ʼo tokotou ʼu fealagia faiako. ʼE tou talanoa anai ki te faʼahi ʼaia ʼi te ʼalatike ʼaē kā hoa mai.

[Nota]

ʼE Kotou Tali Feafeaʼi Anai?

• Koteā ia te gāue ʼaē ʼe maʼua ke fai e te kau Kilisitiano ki te mālamanei?

• ʼE feafeaʼi hatatou tekeʼi te ʼu fihifihia ʼaē ʼe hoko ki tatatou fai fakamafola?

• ʼE feafeaʼi hatatou fakahoko ia te minisitelio ʼaē neʼe kua tou tali ke tou fai?

[ʼU fehuʼi ʼo te ako]

[Paki ʼo te pasina 9]

ʼE tonu ke tou lototoʼa moʼo fai fakamafola mokā hoko mai ni ʼu fakafeagai

[Paki ʼo te pasina 11]

Koteā ʼaē ʼe kotou lava fai mo kapau ʼe kotou fai fakamafola ʼi te ʼu telituale ʼaē ʼe tahitahiga ai tatatou maʼu atu ʼo te hahaʼi kiō nātou?