Ke Tou “Fonu ʼi Te Manavaʼofa”

KUA ʼaoga ʼaupitō age ʼi te temi nei ki totatou ʼu tehina mo tuagaʼane ke foaki e te tokolahi ia he tokoni manavaʼofa mokā hoko kiā nātou ia te hoge, te mahaki, te masiva, te faifakapō, te ʼu tau sivile, pea mo te ʼu tuʼutāmaki fakanātulā. Ko he tahi ʼe manavaʼofa ʼe ina logoʼi ia te mamahi peʼe ko he faigataʼaʼia ʼo he tahi, pea ʼe fakaʼamu ia ke fakafīmālieʼi te ʼu ʼaluʼaga ʼaia. Ohagē ko te māfana ʼo te laʼā, ʼe feala mo te manavaʼofa ke ina fakalotofīmālieʼi he tahi ʼe lotomamahi, ke ina ʼūtakiʼi he mamahi, pea mo ina fakalotomālohiʼi he tahi ʼe mafasia.

ʼE feala ke hā ia tatatou manavaʼofa ʼi tatatou ʼu aga pea mo tatatou ʼu palalau, ʼo tou tokoni pea mo lagolago kiā nātou ʼaē ʼe ʼaoga kiai he tokoni. ʼE mole tonu anai ke tou fakatuʼakoi pē totatou manavaʼofa ki totatou ʼu fāmili, totatou ʼu kaumeʼa pea mo te hahaʼi ʼaē ʼe feʼiloʼiʼaki mo tātou. ʼE feala ke tou toe manavaʼofa ki te hahaʼi ʼaē ʼe mole tou ʼiloʼi. Neʼe fehuʼi fēnei e Sesu Kilisito ʼi te Akonaki ʼaē neʼe ina fai ʼi te Moʼuga: “Kapau ʼe kotou ʼoʼofa pē kiā nātou ʼaē ʼe ʼoʼofa kiā koutou, koteā te fakapale ʼe kotou maʼu ai?” Neʼe toe ʼui foki e te tagata manavaʼofa ʼaia: “Koia, ko te meʼa fuli pē ʼe kotou loto ke fai e te hahaʼi maʼa koutou, ʼe maʼua foki mo koutou, ke kotou toe fai fēia maʼa nātou.”—Mateo 5:46, 47; 7:12.

ʼE feala hakotou lau ia te ʼu palalau ʼaia ʼi te Tohi-Tapu, ʼaē ʼe ʼiloa ohagē ko he Lēkula ʼAulo. Tokolahi ʼe natou ʼui ko te Tohi-Tapu ʼe ko he takitaki pē ʼaia moʼo tokoni kiā tātou ke tou fakahā ia te manavaʼofa. ʼE fakahā liuliuga ʼi te Tohi-Tapu ia totatou maʼua ʼaē ke tou tokoni kiā nātou ʼaē ʼe faigataʼaʼia. ʼE fakahā ʼi te Tohi-Tapu ko Sehova ʼAtua ʼaē ko tana ʼu manatu ʼaē ʼe tuʼu ʼi ai, pea ko totatou Tupuʼaga, ʼe ko Ia tokotahi pē ʼe ko te faʼifaʼitakiʼaga lelei ʼo ʼuhiga mo te manavaʼofa.

Ohagē lā, ʼe tou lau fēnei: “Ko te ʼAtua ʼe ina puipui te ʼu meʼa ʼaē ʼe ʼaoga ki te fānau ʼaē ʼe hala mo mātuʼa pea mo te ʼu fafine vītua. ʼE tokaga ki te kau matāpule pea mo foaki kiā nātou ia te meʼa kai pea mo te ʼu mutuʼi meʼa.” (Teutalonome 10:18, Contemporary English Version) Pea ʼe ʼui ko Sehova ʼAtua ʼe ina “fakahoko ia te fakamāu maʼa te hahaʼi ʼe gaohi koviʼi, ia Ia ʼaē ʼe ina foaki te moʼi pane ki te hahaʼi hālofia.” (Pesalemo 146:7) ʼO ʼuhiga mo te hahaʼi fakaʼofaʼofa ʼaē neʼe ʼomai mai he tahi ʼu fenua, neʼe ʼui e Sehova: “Ko te matāpule . . . ʼe tonu ke liliu kiā koutou ohagē ko he tahi ʼo koutou; pea ʼe tonu ke ke ʼofa ki ai ohagē pē ko koe totonu.”—Levitike 19:34.

Kae ʼe mole ko he meʼa faigafua ia te fakahā ʼo te manavaʼofa. Neʼe ʼui fēnei e te ʼapositolo ko Paulo ki te kau Kilisitiano ʼo Kolose: “ ’Kotou toʼo kehe iā  koutou tokotou ʼulugaaga ʼāfea mo ʼana gāue, pea ke kotou kofuʼi te ʼulugaaga foʼou, ʼaē ʼaki te ʼatamai mālama totonu, ʼe fakafoʼou ʼo mulimuli ki te pāki ʼo Ia ʼaē neʼe ina fakatupu. . . . Ohagē ko he ʼu hahaʼi neʼe fili e te ʼAtua, ko he ʼu hahaʼi māʼoniʼoni pea mo ʼofainaʼi, kotou kofuʼi foki te ʼu ʼofa mamahi ʼo te manavaʼofa.”—Kolose 3:9, 10, 12.

Koia ko te fakahā ʼo te manavaʼofa ʼe ko he kalitātē ʼe tonu ke gāueʼi. Ko te kalitātē ʼaia ʼe kau ki “te ʼulugaaga foʼou” ʼaē ʼe fakamaʼua ki te kau Kilisitiano ke natou kofuʼi. Neʼe maʼuli ia Paulo ʼi te mālama agakovi ʼo Loma. Koia, neʼe ina fakalotomālohiʼi ai tona ʼu tehina mo tuagaʼane ke natou fai ni ʼu fetogi ʼi tonatou ʼulugaaga ke feala hanatou liliu ʼo agalelei age, pea mo lahi age tonatou manavaʼofa.

Te ʼu Fua Lelei ʼo Te Manavaʼofa

Ko ʼihi ʼe natou fakaʼuhiga ia nātou ʼaē ʼe manavaʼofa, ʼe mole ko he ʼu hahaʼi ʼe lototoʼa. Kae ʼe totonu koa ia te manatu ʼaia?

Kailoa ia! ʼE maʼu ia te manavaʼofa moʼoni mai he ʼofa ʼe loloto, pea ʼe haʼu mai te ʼAtua, ʼaē ʼe ko te faʼifaʼitakiʼaga lelei ʼo te kalitātē ʼaia. Ko te “ ʼAtua ʼe ʼofa.” (1 Soane 4:16) ʼE fakahigoa ia Sehova ʼe “ko te Tamai ʼo te manavaʼofa pea ko te ʼAtua ʼo te fakalotofīmālie fuli.” (2 Kolonito 1:3) Ko te kupu ʼaē ʼe fakaliliu ʼaki te “manavaʼofa” ko tona fakaʼuhiga ko “ te ʼofa, te manavaʼofa ki he ʼu mahaki ʼo ʼihi.” Koia ʼe ʼui ai ko Sehova ‘ ʼe agalelei ki te kau maʼuli galo pea mo te kau agakovi’!—Luka 6:35.

ʼE fakamaʼua mai e totatou Tupuʼaga ke tou toe fakahā mo tātou ia he ʼu kalitātē, ohagē ko te manavaʼofa. ʼE tou lau fēnei iā Mikea 6:8: “Neʼe ina fakahā atu kiā te koe, Ê tagata kelekele, te meʼa ʼaē ʼe lelei. Pea koteā ʼaē ʼe kole atu e Sehova kiā te koe, ʼe mole koa lā ko te maʼuliʼi ʼo te faitotonu, mo te manako ki te finegaloʼofa?” Pea ʼe tou lau iā Tāʼaga Lea 19:22: “Ko te meʼa ʼaē ʼe lelei ʼi te tagata kelekele, ko tana agaʼofa.” Ko te ʼAlo ʼo te ʼAtua ia Sesu Kilisito ʼaē neʼe ina fakaʼata kātoa te ʼulugaaga ʼo tana Tamai, neʼe ina toe tokoniʼi fēnei tana ʼu tisipulo: “Ke kotou haga manavaʼofa ohagē ko takotou Tamai ʼe manavaʼofa.” (Luka 6:36) Ko te Tohi-Tapu La Bible de Jérusalem ʼe ina fakaliliu fēnei ia te ʼu palalau ʼaia: “Ke kotou manavaʼofa ohagē ko takotou Tamai ʼe manavaʼofa.”

ʼE ʼi ai te tupuʼaga tāfito ʼe tonu ai ke tou manavaʼofa, heʼe feala ki te kalitātē ʼaia ke tou maʼu ai ni ʼu tuʼuga tapuakina. ʼI te agamāhani, ʼe tou sio ki te moʼoni ʼo te ʼu palalau ʼaē iā Tāʼaga Lea 11:17: “Ko te tagata ʼaē ʼe lotoʼofa ʼe tokaga ʼo puipui tona nefesi.” Kā tou manavaʼofa ki he tahi ʼe ʼaoga ki ai he tokoni, pea ko te ʼAtua ʼe ina fakaʼuhiga te aga ʼaia ʼe hagē ʼe tou fai age kiā te Ia. Pea ʼe ina fakaʼuhiga ohagē ko hona maʼua ke ina liufaki ia te faʼahiga manavaʼofa ʼaē neʼe fai e tana kau ʼatolasio. Neʼe ʼui fēnei e te Hau ko Salomone: “Ko ia ʼaē ʼe ina  fakahā te ʼofa kiā ia ʼe veliveli, ʼe ina tokagaʼi ia Sehova, pea ko Ia ʼe ina liufaki anai kiā ia.” (Tāʼaga Lea 19:17) Pea neʼe ʼui e Paulo: “ ʼE kotou tahi ʼiloʼi pē ko he meʼa lelei pē ʼe fai e he tahi, ʼe ina toe maʼu anai te meʼa ʼaia mai iā Sehova.”—Efesi 6:8.

Ko te manavaʼofa ʼe ina fakafealagia ke taupau maʼu ia te tokalelei pea mo fakafealagia ke fakatokatoka ia te ʼu fihifihia peʼe ko he ʼu fihi. ʼE ina fakatokatoka he ʼu femahino hala pea ʼe ina fakafealagia ki te fakamolemole. ʼE feala ke hoko he ʼu femahino hala koteʼuhi ʼe mole tou fakahā tuʼumaʼu ia tatatou ʼu manatu ohagē ko te meʼa ʼaē ʼe tou loto kiai, peʼe lagi ʼe mole mahino lelei ki ʼihi totatou ʼuhiga. ʼI te temi leva ʼaia, ʼe feala ai ki te manavaʼofa ke ina fakatokatoka he fihifihia pea mo taupau ia te tokalelei. ʼE faigafua age hata fakamolemole ki he tahi ʼe ʼiloa ʼe manavaʼofa. ʼE fakafealagia mai e te manavaʼofa ke tou mulimuli ki te tokoni ʼaenī neʼe fai e Paulo ki te kau Kilisitiano: “Kotou haga fekātakiʼaki pea mo fefakamolemoleʼaki ʼaki he lotolelei, mo kapau ʼe lotomamahi he tahi ʼi he meʼa ki he tahi age.”—Kolose 3:13.

Ko Te Manavaʼofa, ʼe Ko He Kalitātē ʼe Hā

Tahi ʼaē, ko te manavaʼofa ʼe ina fakafealagia ke fakafīmālieʼi te mamahi. Ohagē ko te ʼu manatu neʼe kua tou vakaʼi ki muʼa atu, ko te manavaʼofa ʼe ko he kalitātē ʼe ina uga tātou ke tou maʼu ia te lotomahino kiā nātou ʼaē ʼe lotomamahi. Kā tou maʼu ia te manavaʼofa pea mo te lotomahino ki te hahaʼi fakaʼofaʼofa pea ʼe tou fia tokoni kiā nātou ʼaia.

Kapau ʼe manavaʼofa ia te kau Kilisitiano, pea ʼe natou faʼifaʼitakiʼi ia Sesu. Neʼe mole feala ke maʼumaʼua fau ia ke mole tokoni ki te hahaʼi ʼi te faʼahi fakasino pea mo te faʼahi fakalaumālie. Kā fakatokagaʼi e Sesu neʼe ʼaoga he tokoni ki niʼihi, pea neʼe ina maʼu ia te ʼu ʼaluʼaga ʼaē moʼo fakahā ia te manavaʼofa.

Kotou fakatokagaʼi te tokoni ʼaē neʼe fai e Sesu ʼi tana sio ki te hahaʼi tokolahi ʼaē neʼe māsisiva ʼi te faʼahi fakalaumālie: “ ʼI tana mamata ki te hahaʼi, neʼe ʼofa mamahi ia kiā nātou, he neʼe natou ʼāhua pea mo mavetevete, ohagē he faga ovi ʼe mole honatou tagata tauhi.” (Mateo 9:36) Ko te kupu ʼaē neʼe fakaliliu ʼaki te kupu “ ʼofa mamahi,” neʼe ʼui e te tagata sivi Tohi-Tapu, ko tona fakaʼuhiga ʼe ko “he meʼa ʼe logoʼi e he tagata ʼi tona sino kātoa.” Ko he kupu ʼe loloto ʼi te lea fakakeleka ʼo ʼuhiga mo te manavaʼofa.

ʼO toe fēia pē, ko te kau Kilisitiano ʼaē ʼe natou loto manavaʼofa ʼe natou foimo tokoni ki te hahaʼi ʼaē ʼe ʼaoga kiā nātou he tokoni ʼi te faʼahi fakasino pea mo te faʼahi fakalaumālie. Neʼe ʼui fēnei e te ʼapositolo ko Petelo: “Ke kotou maʼu fuli he manatu e tahi, kotou kaugā mamahi, mo ʼofa ki te ʼu tehina, mo fonu ʼi te manavaʼofa.” (1 Petelo 3:8) Ohagē lā, ʼi te temi ʼaē neʼe tonu ai ke mavae ia te kiʼi fāmili Kilisitiano ki te tahi kolo ʼuhi he neʼe natou māhahaki pea neʼe faigataʼa tonatou maʼuli, ko tonatou ʼu tehina mo tuagaʼane ʼo te kolo ʼaia neʼe natou tuku age kiā nātou ia te nofoʼaga ʼe mole natou totogi lolotoga iā māhina e ono. ʼE ʼui fēnei e te ʼohoana ʼo te tuagaʼane: “ ʼI te ʼaho fuli pē neʼe natou ʼomai ʼo fakasiosio mai peʼe matou feafeaʼi, pea ʼaki tanatou ʼu palalau fakalotomālohi neʼe hagē pē kiā mātou, ʼe matou nonofo ʼi homatou ʼapi totonu.”

ʼE toe tōkakaga foki te kau Kilisitiano moʼoni ki te ʼu meʼa ʼaē ʼe ʼaoga ki te hahaʼi matāpule. ʼE natou fiafia ʼi te foaki ʼo tonatou temi, tonatou mālohi, pea mo tonatou ʼu koloa moʼo tokoni kiā nātou ʼaē ʼe mole feʼiloʼiʼaki lelei mo nātou. Ohagē ko tona ʼui ʼi te ʼuluaki ʼalatike, neʼe ko te kau Fakamoʼoni ʼa Sehova ia te ʼu hahaʼi ʼaē neʼe lotolelei ke natou tokoni ki te hahaʼi ʼaē ʼe mole natou feʼiloʼiʼaki.

ʼI te loto kōkelekāsio ʼe toe maʼu aipē ia te manavaʼofa pea mo te agaʼofa. ʼAki te ʼofa, ʼe lotomālohi ia te kōkelekāsio ke natou maʼu ni ʼu ʼaluʼaga moʼo tokoni ki ʼihi. ʼUhi ko te ʼu fihifihia kehekehe ʼaē ʼe tau mo te fānau aē ʼe hala mo mātuʼa pea mo te ʼu fafine vītua ʼo te kōkelekāsio, ʼe lagi ʼaoga anai ke kotou tōkakaga pea mo agaʼofa kiā nātou. ʼE feala koa ke kotou tokoni kiā nātou ʼaē ʼe māsisiva, ʼe mole maʼu honatou faitoʼo ʼe lelei, ʼe mole honatou ʼapi, peʼe ko he tahi age pē ʼu fihifihia?

Tou vakaʼi age muʼa te meʼa neʼe hoko ki te taumātuʼa ʼi Heleni. Ko te tagata neʼe kau ki te mahaki ʼo te ʼuto. Pea ko ia mo tona ʼohoana neʼe tonu ke nā ʼolo ki te lōpitali ʼaē ʼe tuʼu mamaʼo ʼi te tahi kolo. Kae ko te kiʼi falā ʼaē ʼe nā māʼuʼuli kiai ʼe fakalogo ki te toli ʼo tonā ʼu fuʼu moli. Ko ai anai kā ina toli tonā ʼu fuʼu moli kae nā nonofo ʼi te lōpitali? Ko te gāue ʼaia neʼe fai e te kōkelekāsio. Neʼe natou toli pea mo fakatau te ʼu moli, ʼo maʼu ai te  falā ʼa te taumātuʼa faigataʼaʼia ʼaia, pea mo fīmālie ai tanā fakakaukau.

ʼE lahi ia te ʼu ʼaluʼaga ke tou fakahā ai totatou maʼu ia te manavaʼofa. Ohagē lā, ʼe mahino ki te kau Kilisitiano ʼaē ʼe manavaʼofa, ʼi ʼihi temi ko te meʼa tāfito ʼaē ʼe ʼaoga ki te hahaʼi ʼaē ʼe lotomamahi ke ʼaʼahi nātou pea mo fakalogo ki tonatou ʼu fihifihia, mo agalelei age kiā nātou, pea mo foaki age kiā nātou ia he fakalotofīmālie mai te Tohi-Tapu.—Loma 12:15.

Kotou Maʼu Te Manavaʼofa ʼi Te Loto Kōkelekāsio

Ko te kōkelekāsio fakakilisitiano ʼo te mālamanei ʼe ko he fakatafitoʼaga ʼo te tokalelei pea mo te fakalotofīmālie, heʼe maʼu ai ia te manavaʼofa pea mo te agalelei. ʼE mahino ki te kau Kilisitiano moʼoni ʼe loto ia te hahaʼi ki te manavaʼofa, kae ʼe mole natou lelei ia te aga fekai. Koia, ʼi tanatou faiga ʼaē ke natou faʼifaʼitakiʼi ki tanatou Tamai ʼe ʼi selō, ʼe natou fakahā ia te “manavaʼofa” ʼi he ʼu ʼaluʼaga ʼo te maʼuli.

ʼE fakaafe atu koutou e te kau Fakamoʼoni ʼa Sehova ke kotou logoʼi ia te manavaʼofa, te ʼofa, te tokaga ʼaē ʼe maʼu ʼi te lotolotoiga ʼo tonatou ʼu hahaʼi. ʼE natou tui papau ʼe kotou maʼu ai anai he fakatalitali ʼe lelei pea mo fakafiafia.—Loma 15:7.

[Paki ʼo te pasina 5]

Neʼe fakalotomālohiʼi e Paulo ia te kau Kilisitiano ʼo Kolose ke natou kofuʼi foki te ʼu ʼofa mamahi ʼo te manavaʼofa

[Paki ʼo te pasina 7]

Kā fakatokagaʼi e Sesu neʼe ʼaoga he tokoni ki niʼihi, pea neʼe ina maʼu ia te ʼu ʼaluʼaga ʼaē moʼo fakahā ia te manavaʼofa