ʼE Feafeaʼi Ia Te Kā Haʼu?

HE KO’Ē ʼE LELEI KE TOU MAʼU IA TE TALI KI TE FEHUʼI ʼAIA? Ko te fakatuʼutuʼu ʼa he tahi ki tona ʼapogipogi ʼe malave ki te ʼu gāue ʼaē ʼe ina fai ʼi te ʼaho nei. Ohagē lā, ko nātou ʼaē ʼe mole honatou ʼamanaki ki te kā haʼu, ʼe lagi feala anai ke natou manatu fēnei: “Tou kakai pea mo tou ʼiʼinu, heʼe tou mamate anai ʼapogipogi.” (1 Kolonito 15:32) ʼI te agamāhani, ko te taʼi manatu ʼaia ʼe iku pē ia ki he kai pea mo he ʼinu fakavale, pea mo he lotohoha—kae ʼe mole tou lava maʼu ai he ʼatamai ʼe tokalelei moʼoni.

Kanapau lā neʼe fakalogo kātoa ia te kā haʼu ʼo te mālamanei ki te ʼu fakatuʼutuʼu ʼa te tagata, ʼe vaʼiganoa anai tatatou ʼu ʼamanaki. He kua ʼuli ʼaupitō ia te ʼaele ʼo te kele, mo tona vai, pea mo tona fenua. Pea ko te ʼu fakamataku ʼo he tau fakanukeleʼea pea mo te ʼu fai fakapō kua ʼāʼāsili age. ʼE felāveʼi te ʼu toko lauʼi miliale hahaʼi mo te mahaki pea mo te masiva. Kae ʼe ʼi ai te ʼu tupuʼaga ʼo hatatou loto falala.

Ko te tagata ʼe mole feala ke ina fakakikite te kā haʼu, kae ko Sehova ʼAtua ʼe ina fakahā ko “Ia ʼaē ʼe ina fakahā te fakaʼosi talu mai te kamataʼaga, pea talu mai te temi kua hili te ʼu meʼa ʼe mole heʼeki hoko.” (Isaia 46:10) Koteā ʼaē neʼe ʼui e Sehova ʼo ʼuhiga mo te kā haʼu?

Koteā ʼAē ʼe ʼUi Mai ʼi Te Tohi-Tapu?

ʼE mole tuku anai e Sehova ia te kele peʼe ko te maʼuli ke maumauʼi. ʼE fakapapau mai ʼi te Tohi-Tapu, ko te ʼAtua ʼe ina ‘maumauʼi anai ia nātou ʼaē ʼe natou maumauʼi te kele.’ (Fakahā 11:18) ʼAki tona Puleʼaga ʼe ʼi selō, ʼe fakaʼauha anai e Sehova te kau agakovi mai te kele, kae ʼe ina toe foaki te ʼu ʼaluʼaga ʼaē neʼe ina fakatuʼutuʼu ʼi te kamataʼaga. (Senesi 1:26-31; 2:8, 9; Mateo 6:9, 10) Ko te ʼu vaega fakatohi-tapu ʼaenī, ʼe fakahā mai ai ia te ʼu meʼa ʼaē kā hoko ʼi te kā haʼu, ʼo ina fakahāhā te ʼu meʼa ʼaē kua vave maʼu pē e te hahaʼi fuli ʼo te kele.

Pesalemo 46:8, 9. “Kotou ʼomai, ʼo kotou mamata ki te ʼu gāue ʼa Sehova, peʼe feafeaʼi tana fakahoko te ʼu meʼa fakaofoofo ʼi te kele. Neʼe ina fakagata te ʼu tau ʼo aʼu ki te potu taupotu ʼo te kele. ʼE ina fasifasiʼi te nahau pea mo maumauʼi te tao; ʼe ina tutu te ʼu sāliote ʼi te afi.”

Isaia 35:5, 6. “ ʼI te temi ʼaia ʼe ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli. ʼI te temi ʼaia ko te ketu ʼe kake anai ohagē he tia pea ko te ʼalelo ʼo te tagata ʼaē ʼe gutu mate ʼe kalaga fakafiafia anai. Heʼe mapuna anai ʼi te toafa te ʼu vai, pea mo he ʼu liuʼa ʼi te potu magemage.”

Isaia 65:21, 22. “ ʼE mahino papau ia, ʼe natou laga anai ni ʼu fale pea ʼe natou nofoʼi anai; pea ʼe mahino papau ia ʼe natou tō anai he ʼu fuʼu vite pea mo natou kai anai tona ʼu fua. ʼE mole natou laga anai ke nofoʼi e he tahi kehe; pea ʼe mole natou tō anai ke kai e he tahi kehe.”

Taniela 2:44. “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.”

Soane 5:28, 29. “ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe natou logo anai ki [te] leʼo [ʼo Sesu] pea ʼe natou hū mai anai ki tuʼa.”

Fakahā 21:3, 4. “Ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”

ʼE Feafeaʼi Ia Hatatou Maʼu He ʼAtamai ʼe Tokalelei Moʼoni ʼAki Te ʼu Tali Mai Te Tohi-Tapu?

ʼUluaki, ʼe lagi tou tui gataʼa ki te ʼu palalau ʼo te ʼu vaega ʼaenī heʼe matalelei fau. Kae ko te ʼu fakapapau ʼaia neʼe fai e te ʼAtua kae mole ko te tagata. Pea ko Sehova ʼAtua “ ʼe mole feala ke loi.”—Tito 1:2.

Kapau ʼe kotou falala ki te ʼu fakapapau ʼa te ʼAtua pea mo maʼuliʼi tana ʼu lao, ʼe kotou lava maʼu ai anai ia he ʼatamai ʼe tokalelei logolā te ʼu fihifihia ʼaē ʼe kotou felāveʼi mo ia. ʼE mole feala ki te tau, te mahaki, pea mo te vaivai matuʼa peʼe ko te mate ke natou toʼo ia te tokalelei ʼo tokotou ʼatamai. Koteā tona tupuʼaga? Heʼe kotou falala ko te Puleʼaga ʼo te ʼAtua ʼe ina pulihi anai te ʼu fua kovi ʼo te ʼu mahaki fuli ʼaia.

ʼE feafeaʼi hakotou maʼu ia te taʼi falala ʼaia ʼo ʼuhiga mo te kā haʼu? ʼE tonu ke “fakafoʼou tokotou ʼatamai” pea mo kotou vakavakaʼi peʼe koteā ia “te finegalo ʼo te ʼAtua, tona lelei, tona tali lelei pea mo tona haohaoa.” (Loma 12:2) ʼE lagi ʼaoga anai ke lahi age te ʼu fakamoʼoni ko te ʼu fakapapau ʼo te Tohi-Tapu ʼe tuha ke kotou falala kiai. ʼE tonu ke kotou fai ia te sivi ʼaia. ʼE mole lahi te ʼu meʼa ʼe kotou fai ʼi tokotou maʼuli, ʼe kotou lava maʼu ai anai he ʼatamai tokalelei ʼe lahi age.