ʼE Tatau Koa Takotou Sio Ki Te Hahaʼi Mo Te Sio ʼa Sehova?

“Ke mole ʼi ai he mavaevae ʼi te sino . . . ke tatau te fetokoniʼaki ʼo tona ʼu koga.” —1 KO. 12:25.

 1. Koteā ʼaē neʼe kotou logoʼi ʼi takotou kamata hū ʼaē ki te palatiso fakalaumālie?

 ʼI TE temi ʼaē neʼe tou mavae mai te mālama agakovi ʼaenī pea mo kamata fakatahi ki te hahaʼi ʼa Sehova, ʼe mahino ia neʼe tou fiafia ʼi te ʼofa pea mo te tokoni ʼaē neʼe tou maʼu mai iā nātou. ʼE natou kehekehe mo te ʼu hahaʼi aga fefeka, loto fehiʼa pea mo fakataupiepie ʼaē ʼe puleʼi e Satana! Neʼe tou hū ki te palatiso fakalaumālie ʼaē ʼe mahu ai te tokalelei pea mo te logotahi.—Isa. 48:17, 18; 60:18; 65:25.

 2. (a) He koʼē ʼe feala ke mole kei tou maʼu he ʼu manatu ʼe lelei ʼo ʼuhiga mo totatou ʼu tehina? (b) Koteā ʼaē ʼe lagi tonu ke tou fai?

² Kae ʼaki te temi, ʼuhi ko totatou ʼuhiga agahala, ʼe feala ke mole kei tou maʼu he ʼu manatu ʼe lelei ʼo ʼuhiga mo totatou ʼu tehina. ʼUhi ko totatou ʼuhiga agahala, ʼe feala ai ke tou fakalalahi ni ʼu hala ʼo totatou ʼu tehina, kae mole kei tou tokagaʼi leva ia tonatou ʼu kalitātē fakalaumālie. ʼI tona fakanounou, ʼe mole kei tou sio kiā nātou ohagē ko Sehova. Kapau ʼe hoko ia te faʼahi ʼaia kiā tātou, pea ʼe tonu ke tou toe vakavakaʼi ia tatatou manatu ʼo ʼuhiga mo nātou, pea ke tou faigaʼi ke tou sio kiā nātou ohagē ko Sehova, ʼaē ʼe sio fakalelei kiā nātou.—Eke. 33:13.

ʼE Feafeaʼi Te Sio ʼa Sehova Ki Totatou ʼu Tehina?

 3. ʼI te Tohi-Tapu, koteā ʼaē ʼe fakatatau kiai ia te kōkelekāsio fakakilisitiano?

³ Iā 1 Kolonito 12:2-26, neʼe fakatatau e te  ʼapositolo ko Paulo ia te kōkelekāsio ʼa te kau Kilisitiano fakanofo ki he sino ʼe “lahi tona ʼu koga.” Ohagē pē ko te ʼu koga kehekehe ʼo te sino, ʼe toe kehekehe mo te ʼu ʼulugaaga pea mo te ʼu fealagia ʼo nātou ʼaē ʼi te kōkelekāsio. Logolā ia te ʼu faʼahi ʼaia, kae ʼe tali pē e Sehova ia nātou fuli ʼaia. ʼE ʼofa pea ʼe maʼuhiga kiā te ia ia nātou takitahi ʼi te kōkelekāsio. Koia ʼe toe tokoni mai ai Paulo “ke tatau te fetokoniʼaki” ʼo nātou ʼi te kōkelekāsio. ʼE feala ke faigataʼa ia te faʼahi ʼaia heʼe kehekehe totatou ʼu ʼulugaaga.

 4. He koʼē ʼe tonu ke tou fetogi tatatou faʼahiga sio ʼaē ki totatou ʼu tehina?

⁴ ʼE lagi feala ke lahi fau tatatou tokagaʼi ia te ʼu vaivaiʼaga ʼo totatou ʼu tehina. ʼI tatatou fai te faʼahi ʼaia, ʼe hagē ʼe tou fakaʼaogaʼi he foʼi meʼa toho pāki ʼe ina pāki pē he kiʼi faʼahi ʼe veliveli. Kae kā sio Sehova ia ki totatou ʼu tehina, ʼe sio ia ki tonatou ʼulugaaga kātoa. Ko te meʼa ʼaē ʼe tou tautau fai ʼe ko te fakatokagaʼi pē ʼo te ʼu vaivaiʼaga ʼaē ʼe mole tou leleiʼia ʼi totatou ʼu tehina, kae ko Sehova ia ʼe sio ki te tagata kātoa, ia tona ʼu kalitātē fuli. Kapau ʼe tou faiga ke lahi age tatatou faʼifaʼitakiʼi ia Sehova, pea ʼe toe lahi age anai mo tatatou fakatuputupu ia te ʼofa pea mo te logotahi ʼi te kōkelekāsio.—Efe. 4:1-3; 5:1, 2.

 5. He koʼē ʼe mole lelei te fakamāuʼi ʼo niʼihi?

⁵ Neʼe ʼiloʼi lelei pē e Sesu ko te ʼuhiga ʼo te hahaʼi heʼe haohaoa ko te fakamāuʼi ʼo ʼihi atu. Neʼe ina fai te tokoni ʼaenī: “Tuku takotou fakamāu, koteʼuhi ke ʼaua naʼa fakamāuʼi koutou.” (Mat. 7:1) Kotou tokagaʼi, neʼe mole ʼui e Sesu: “ ʼAua naʼa kotou fakamāu.” Kae neʼe ina ʼui: “Tuku takotou fakamāu.” Neʼe ina ʼiloʼi ko te tokolahi iā nātou ʼaē neʼe fakalogo kiā te ia neʼe ko tanatou agamāhani ko te fatufatuʼi ʼo niʼihi. Kua liliu koa ko hatatou agamāhani ia te fai fatufatu? Kapau koia, ʼe tonu ke tou faiga mālohi ke tou fetogi, ke mole fakamāuʼi kovi ai tātou. ʼEī, ko ai ia tātou ke tou fakamāuʼi he tahi ʼe fakaʼaogaʼi e Sehova ki he gāue neʼe ina fakanofo kiai, peʼe ke tou ʼui ʼe mole tonu ia ke kau ki te kōkelekāsio? ʼE feala ke fai e he tehina hana ʼu hala, kae kapau ʼe kei fakaʼaogaʼi pē ia e Sehova, pea ʼe tonu koa ke tou fakafeagai ki te faʼahi ʼaia? (Soa. 6:44) ʼE tou tui moʼoni koa ko Sehova ʼe ina takitaki tana kautahi pea kapau ʼe ʼaoga ke fai he ʼu fetogi, pea ʼe ina fai anai ʼi tona temi totonu?—Lau ia Loma 14:1-4.

 6. ʼE feafeaʼi te sio ʼa Sehova ki tana ʼu kaugana?

⁶ ʼE fakaofoofo ia Sehova ʼi tana lava sio ʼaē pe feafeaʼi anai ia te kau Kilisitiano takitokotahi, ʼi te temi ʼaē kā natou haohaoa ai ʼi te mālama foʼou. ʼE ina toe ʼiloʼi mo te ʼu fetogi lahi ʼaē neʼe kua natou fai ʼi te faʼahi fakalaumālie. Koia, ʼe mole hona ʼuhiga kiā ia ke ina sioʼi ia tonatou ʼu vaivaiʼaga fuli. ʼE tou lau fēnei iā Pesalemo 103:12: “Ohagē ko te mamaʼo ʼo te potu ʼesitē ʼi te potu ʼuesitē, neʼe toe fēia mo tana fakamamaʼo iā tātou tatatou ʼu agahala.” ʼE tou loto fakafetaʼi lahi ki te faʼahi ʼaia!—Pes. 130:3.

 7. Koteā ʼaē ʼe tou ako mai te sio ʼaē ʼa Sehova kiā Tavite?

⁷ ʼE tou maʼu ʼi te Tohi-Tapu te ʼu fakamoʼoni ʼo ʼuhiga mo te fealagia fakaofoofo ʼaē ʼe maʼu e Sehova ke ina sio ki te lelei ʼaē ʼi te loto ʼo he tahi. Neʼe ʼui e te ʼAtua ʼo ʼuhiga mo Tavite ko “taku kaugana ko Tavite, ʼaē neʼe ina taupau taku ʼu fakatotonu pea neʼe haʼele mo au ʼaki tona loto  kātoa pea neʼe ina fai pē te meʼa ʼaē ʼe lelei ki ʼoku mata.” (1 Hau 14:8) ʼE tou ʼiloʼi pē neʼe fai e Tavite te ʼu aga neʼe kovi, kae neʼe sioʼi pē e Sehova ia te ʼu kalitātē ʼo Tavite, he neʼe ina ʼiloʼi neʼe agatonu ia tona loto.—1 Fkma. 29:17.

Kotou Sisio Ki Tokotou ʼu Tehina Ohagē Ko Sehova

8, 9. (a) Ko te faʼahi fea ʼaē ʼe tou lava faʼifaʼitakiʼi ai ia Sehova? (b) Koteā te fakatā ʼe tou lava fai ʼo ʼuhiga mo te faʼahi ʼaia, pea koteā te ako ʼe tou maʼu mai ai?

⁸ ʼE lava ʼiloʼi e Sehova te ʼu loto, kae mole feala kiā tātou. ʼE ko he tupuʼaga lelei ʼaia ke ʼaua naʼa tou fakamāuʼi he tahi. ʼE mole tou ʼiloʼi te ʼu meʼa fuli ʼaē ʼi te loto ʼo he tahi. ʼE tonu ke tou faiga ke tou faʼifaʼitakiʼi ia Sehova ʼo mole tou tokagaʼi pē te ʼu vaivaiʼaga, ʼaē kā pulihi anai ʼi te temi kā haʼu. ʼE mole ko he fakatuʼutuʼu lelei koa lā ke tou faʼifaʼitakiʼi? Ko tatatou fai fēia ʼe fua lelei ʼaupitō anai ki tatatou ʼu felōgoi tokalelei mo totatou ʼu tehina mo tuagaʼane.—Efe. 4:23, 24.

⁹ Tou toʼo te fakatā ʼo he ʼapi kua maumau: Kua tō tona ʼu meʼa fakatalivai, kua fasifasi te ʼu matapā fakamālama, pea mo tutulu ia te ʼato. Ko te hahaʼi tokolahi, ʼi tanatou sisio ki te ʼapi, ʼe feala ke natou ʼui ʼe tonu ke holoʼi; ʼe mole matalelei. Kae ʼe feala ki he tahi ke sio ki te ʼapi pea ʼe ina fakahā mai ia he tahi age manatu. ʼE lagi mole ina tokagaʼi ia te ʼu faʼahi ʼaē kua maumau kae ʼe sio ia ʼe kei mālohi pē ia te ʼu lalago pea ʼe feala ke toe gaohi ia te ʼapi ʼaia. ʼE ina totogi ia te ʼapi pea ʼe ina toe faʼu te ʼu meʼa ʼaē neʼe kua maumau pea mo ina fakamataleleiʼi ia te ʼapi. Ki muli age leva, ʼe ʼui e te hahaʼi ʼaē ʼe fakalaka ʼe ko he ʼapi matalelei. ʼE feala koa ke tou hagē ko ia ʼaē neʼe gāue moʼo toe faʼu ia te ʼapi? ʼE mole tou sioʼi anai ia te ʼu vaivaiʼaga ʼo totatou ʼu tehina, kae ʼe tou tokagaʼi anai tonatou ʼu kalitātē pea mo tou lotomahino ki tanatou ʼu faiga ʼaē ke natou tuputupu ʼi te faʼahi fakalaumālie. Kapau ʼe tou fai fēia, pea ohagē pē ko Sehova ʼe tou ʼoʼofa anai ki totatou ʼu tehina ʼuhi ko tonatou ʼu kalitātē fakalaumālie.—Lau ia Hepeleo 6:10.

10. ʼE lava tokoni feafeaʼi mai kiā tātou ia te tokoni ʼaē ʼe tou maʼu iā Filipe 2:3, 4?

¹⁰ Neʼe foaki e te ʼapositolo ko Paulo he tokoni ʼe ʼaoga anai ki tatatou ʼu felōgoi mo nātou fuli ʼi te kōkelekāsio. Neʼe ina uga fēnei ia te kau Kilisitiano: “ ʼAua naʼa kotou fai he meʼa ʼaki he manatu fakataupiepie, ʼaki he fiahā, kae ʼaki te loto fia mālalo, kotou fakaʼuhiga ia nātou ʼaē ohagē ʼe natou māʼoluga age iā koutou, ke mole kotou tōkakaga pē ki te ʼu meʼa ʼa koutou totonu, kae ke kotou toe tōkakaga pē foki ki te ʼu meʼa ʼa ʼihi.” (Filp. 2:3, 4) Ko te agavaivai ʼe tokoni mai anai ke tou maʼu he manatu lelei ʼo ʼuhiga mo ʼihi. Ko tatatou tōkakaga ki niʼihi pea mo kumi ia te meʼa ʼaē ʼe lelei iā nātou ʼe toe tokoni mai anai ke tou sio kiā nātou ohagē ko Sehova.

11. Koteā te ʼu fetogi ʼaē kua hoko ki ʼihi kōkelekāsio?

¹¹ Mole heʼeki faʼa fualoa, ʼaki te ʼu fetogi ʼaē neʼe hoko ʼi te mālamanei, neʼe tupu ai te mavae ʼa te ʼu hahaʼi mai tonatou fenua. Ko ʼihi kolo kua nofoʼi e te hahaʼi mai te ʼu fenua kehekehe. Ko ʼihi ʼi te hahaʼi ʼaē neʼe ʼomai ki totatou ʼu kolo neʼe natou fia mahino ki te ʼu moʼoni fakatohi-tapu, pea kua natou fakatahi mo tātou ʼi te tauhi ʼaē kiā Sehova. Ko nātou ʼaia ʼe natou ʼomai “mai te ʼu fenua fuli pea mo te ʼu telepī pea mo te ʼu hahaʼi pea mo te ʼu lea fuli.” (Fakh. 7:9) Ko tona fua, kua lahi tatatou ʼu kōkelekāsio kua maʼu ai te ʼu hahaʼi mai te ʼu fenua kehekehe.

12. Ko te manatu fea ʼe tonu ke tou taupau iā tātou, pea he koʼē ʼi ʼihi temi ʼe feala ke faigataʼa te faʼahi ʼaia?

¹² ʼI tatatou ʼu kōkelekāsio ʼe lagi tonu ke tou tōkakaga ke tou taupau iā tātou fuli ia he manatu ʼe lelei. Pea ko he faʼahi ʼe ina fakamaʼua ai tātou ke tou mulimuli ki te tokoni ʼa te ʼapositolo ko Petelo, ʼaē ke tou fakahā he “ ʼofa fakatautēhina ʼe mole mālualoi” pea mo tou “feʼofamamahiʼaki, ʼaki te loto.” (1 Pet. 1:22) ʼE feala ke faigataʼa ia he fakatuputupu ʼo he ʼofa lahi ʼi he kōkelekāsio ʼe kaugamālie ai ni hahaʼi ʼe ʼomai mai ʼihi fenua. ʼE lagi ko te agaʼi fenua ʼo totatou ʼu tehina ʼe kehekehe ia mo tatatou agaʼi fenua, ʼo fēia ki te ako ʼaē neʼe natou mulimuli kiai, mo tonatou ʼaluʼaga fakapaʼaga, pea mo tonatou lanu. ʼE mata faigataʼa koa hakotou mahino ki te manatu peʼe ko te ʼu aga ʼa ʼihi? ʼE lagi toe fēia pē mo nātou ʼo ʼuhiga mo koutou. Kae ʼe fakatotonu fēnei mai kiā tātou fuli: “Kotou ʼoʼofa ki te fāmili kātoa ʼo te ʼu tehina.”—1 Pet. 2:17.

13. Koteā te ʼu fetogi ʼi totatou faʼahiga manatu ʼe lagi tonu ke tou fai?

 ¹³ ʼE lagi ʼaoga ke fetogi tatatou faʼahiga manatu, ke feala hatatou ʼoʼofa foki ki totatou ʼu tehina fuli pē. (Lau ia 2 Kolonito 6:12, 13.) Neʼe ʼi ai koa he ʼaho neʼe kotou ʼui fēnei: “ ʼE mole au fakapalatahi, kae . . . ” pea kotou lau he ʼu kovi ʼo he faʼahiga lanu ʼe lau māhani e te hahaʼi? Ko te taʼi manatu ʼaia ʼe lagi hā ai ʼe ʼaoga ke tou toʼo iā tātou ia te manatu fakapalatahi ʼaē kei mālohi ʼi totatou loto. ʼE feala ke tou fai te fehuʼi ʼaenī: ‘ ʼE au faiga koa ke au feʼiloʼiʼaki mo te hahaʼi ʼaē ʼe mole tatau tamatou ʼu agaʼi fenua?’ Ko te taʼi vakavakaʼi ʼaia ʼo kita ʼe tokoni mai ke faigafua age tata tali pea mo leleiʼia totatou fale tautēhina fakamālamanei.

14, 15. (a) Kotou tuku mai he ʼu faʼifaʼitaki ʼo he ʼu tagata e lua neʼe nā fetogi tanā faʼahiga manatu ʼo ʼuhiga mo te hahaʼi. (b) ʼE tou lava faʼifaʼitakiʼi feafeaʼi ia nāua ʼaia?

¹⁴ ʼE fakahā mai ʼi te Tohi-Tapu he ʼu faʼifaʼitaki lelei ʼo ni hahaʼi neʼe natou fai he ʼu fetogi, ohagē lā ko te ʼapositolo ko Petelo. Mai tona ʼaluʼaga ʼaē ko Petelo neʼe ko te tagata Sutea, koia neʼe mole fia hū ai ki he ʼapi ʼo he tagata Senitile. Kotou fakakaukauʼi age muʼa pe neʼe feafeaʼi ia Petelo ʼi te temi ʼaē neʼe kole age ke ʼalu ki te ʼapi ʼo Kolonelio, te tagata Senitile neʼe mole silikosisioʼi! Neʼe fetogi e Petelo tana manatu, he neʼe mahino kiā ia neʼe ko te finegalo ʼo te ʼAtua ke kau mo te hahaʼi ʼo te ʼu puleʼaga fuli pē ki te kōkelekāsio fakakilisitiano. (Gāue 10:9-35) Ko Saulo, ʼaē neʼe liliu ki muli age ko te ʼapositolo ko Paulo, neʼe tonu mo ia ke fetogi tana manatu pea mo pulihi iā ia te ʼu manatu fakapalatahi. Neʼe ina fakamoʼoni ia tana fehiʼa lahi ki te kau Kilisitiano, ʼo ina “fakatagaʼi mālohi te kōkelekāsio ʼa te ʼAtua pea mo maumauʼi.” Pea ʼi te temi ʼaē neʼe fakatonutonuʼi e te ʼAliki ko Sesu ia Paulo, neʼe ina fai te ʼu toe fetogi lahi pea neʼe ina tali foki ke takitaki ia ia e nātou ʼaē neʼe ina fakatagaʼi ki muʼa atu.—Kal. 1:13-20.

¹⁵ ʼE mahino papau ia, ʼe feala ke tou fai he ʼu fetogi ʼi tatatou aga ʼaki te tokoni ʼa te laumālie ʼo Sehova. Kapau ʼe tou fakatokagaʼi ʼe kei ʼi ai he ʼu manatu fakapalatahi iā tātou, tou faiga ke tou taʼaki te ʼu manatu ʼaia pea mo tou “taupau te logotahi ʼo te laumālie ʼi te noʼo ʼo te tokalelei.” (Efe. 4:3-6) ʼE fakalotomālohiʼi tātou ʼi te Tohi-Tapu ke tou “kofuʼi ia te ʼofa, he ko he noʼo haohaoa ia ki te logotahi.”—Kol. 3:14.

Tou Faʼifaʼitakiʼi Ia Sehova ʼi Tatatou Minisitelio

16. Koteā ia te finegalo ʼo te ʼAtua ʼo ʼuhiga mo te hahaʼi?

¹⁶ Neʼe tohi fēnei e te ʼapositolo ko Paulo: “ ʼE mole fakapalatahi te ʼAtua.” (Loma 2:11) ʼE ko te finegalo ʼo Sehova ke kau te ʼu hahaʼi ʼo te ʼu puleʼaga fuli pē ki te tauhi ʼaē kiā te ia. (Lau ia 1 Timoteo 2:3, 4.) Moʼo fakahoko ia te faʼahi ʼaia, neʼe ina fakatuʼutuʼu ke tala ia te “logo lelei ʼe  heʼegata” ki “te puleʼaga kehekehe, te telepī kehekehe, te lea kehekehe pea mo te hahaʼi kehekehe.” (Fakh. 14:6) Neʼe ʼui fēnei e Sesu: “Ko te gāueʼaga, ko te mālamanei.” (Mat. 13:38) Koteā tona fakaʼuhiga kiā koutou pea mo tokotou fāmili?

17. ʼE tou lava tokoni feafeaʼi ki te hahaʼi kehekehe?

¹⁷ Mole ko te hahaʼi fuli ʼaē ʼe feala ke ʼolo ki he ʼu koga meʼa mamaʼo moʼo tala ia te logo ʼo te Puleʼaga ki te hahaʼi. Kae ʼe lagi feala ke tou tala ia te logo ʼaia ki te hahaʼi mai te ʼu koga meʼa kehekehe ʼaē ʼe māʼuʼuli ʼi totatou telituale. ʼE tou fakaʼaogaʼi koa te ʼu faigamālie fuli moʼo fakamafola ki te hahaʼi kehekehe, kae mole gata pē kiā nātou ʼaē ʼe tou fakamafola ki ai talu mai ni ʼu taʼu? He koʼē ʼe mole kotou faiga ke kotou palalau mo te hahaʼi ʼaē ʼe mole heʼeki fakahā age kiā nātou ia te logo lelei?—Loma 15:20, 21.

18. Koteā te tokoni ʼaē neʼe foaki e Sesu ki te hahaʼi?

¹⁸ Neʼe logoʼi ʼaupitō e Sesu ia te ʼaoga ʼaē ke tokoni ki te hahaʼi fuli pē. Neʼe mole fai fakamafola ia ʼi he koga meʼa pē ʼe tahi. ʼE fakamatala mai ʼi te Tohi-Tapu neʼe “foli ia . . . ʼi te ʼu kolo fuli pea mo te ʼu kolo vao fuli.” Pea “ ʼi tana mamata ki te hahaʼi, neʼe ʼofa mamahi ia kiā nātou” pea neʼe palalau ai ki te ʼaoga ʼaē ke tokoni kiā nātou.—Mat. 9:35-37.

19, 20. Ko te ʼu ʼaluʼaga fea ʼaē ʼe feala ai ke tou fakahā ia te fia tokoni ʼa Sehova pea mo Sesu ki te hahaʼi kehekehe?

¹⁹ Ko te ʼu ʼaluʼaga fea ʼaē ʼe feala ai ke kotou fakahā mo koutou ia te aga ʼaia? Neʼe faigaʼi e ʼihi ke natou fai fakamafola ʼi te ʼu koga meʼa ʼo tonatou telituale ʼaē ʼe tahitahiga tona fai. ʼE kau kiai ia te ʼu matani gāue, te ʼu ʼōloto ʼaē ʼe gaoʼi ai te ʼu tamaliki, te ʼu kā, peʼe ʼi muʼa ʼo te ʼu falefata ʼaē ʼe faigataʼa te hū kiai. Neʼe faigaʼi e ʼihi ke natou ako he tahi age lea ke feala ai hanatou fai fakamafola ki ni hahaʼi ʼe māʼuʼuli nei ʼi tonatou telituale peʼe ko he ʼu kūtuga neʼe mole fai fakamafola tuʼumaʼu kiā nātou ʼi te temi muʼa. Ko takotou akoako ʼaē ke kotou ʼalofa ki te hahaʼi ʼi tanatou lea, ʼe kotou fakahā ai takotou fia tokoni ʼaē kiā nātou. Kapau ʼe mole feala ke tou ako he tahi age lea, kae ʼe feala koa ke tou fakalotomālohiʼi ia nātou ʼaē ʼe natou lolotoga ako nei ia he tahi age lea? ʼE mahino ia ʼe mole tou fia fakalotovaivaiʼi he tahi peʼe tou feʼekeʼaki pe koʼē ʼe faigaʼi e ʼihi ke natou fai fakamafola ki te hahaʼi mai te tahi fenua. Ko te maʼuli fuli pē ʼe maʼuhiga kiā mata ʼo te ʼAtua, pea ʼe tou fia manatu fēia mo tātou.—Kol. 3:10, 11.

²⁰ Ko te maʼu ʼo te manatu ʼa te ʼAtua ʼo ʼuhiga mo te hahaʼi, ʼe toe fakaʼuhiga ke tou fai fakamafola ki te hahaʼi fuli pē, ʼo mole tou tokagaʼi ia tonatou ʼaluʼaga. Ko ʼihi ʼe lagi mole honatou ʼapi, peʼe tokakovi tonatou ʼapi, peʼe ʼasi mai ʼe natou māʼuʼuli ʼi te agahala. Kapau ko ʼihi hahaʼi ʼe natou gaohi koviʼi tātou, ʼaua naʼa tou manatu ko te hahaʼi fuli ʼo te lanu ʼaia ʼaē ʼe agakovi. Neʼe gaohi koviʼi Paulo e ʼihi hahaʼi ʼo te ʼu kolo, kae neʼe mole ina tuku ia tana fai fakamafola ki te hahaʼi ʼo te ʼu kolo ʼaia. (Gāue 14:5-7, 19-22) Neʼe falala ia ʼe tali lelei anai e ʼihi hahaʼi.

21. ʼE tokoni feafeaʼi anai kiā koutou takotou maʼu ia te manatu ʼa Sehova?

²¹ Kua tou mahino lelei leva ʼi te temi nei, ʼe ʼaoga ke tou maʼu te manatu ʼaē ʼe lelei, ia te manatu ʼa Sehova, ʼi tatatou ʼu felōgoi mo totatou ʼu tehina ʼi te kōkelekāsio, mo totatou fale tautēhina, pea mo te hahaʼi ʼi te fai fakamafola. Kapau ʼe tou fakahā lelei ia te manatu ʼa Sehova, pea ʼe tou lagolago mālohi anai ki te tokalelei pea mo te logotahi. Pea ʼe feala anai ke tou tokoni ki te hahaʼi ke natou ʼoʼofa kiā Sehova, te ʼAtua ʼaē ʼe “mole fakapalatahi” kae ʼe ʼofa ki te hahaʼi fuli pē, “koteʼuhi ko nātou fuli ʼe ko te gāue ʼo tona ʼu nima.”—Sopo 34:19.

ʼE Feala Koa Hakotou Tali?

• Koteā te manatu ʼaē ʼe mole tonu ke tou maʼu ʼo ʼuhiga mo totatou ʼu tehina?

• ʼE tou lava faʼifaʼitakiʼi feafeaʼi ia Sehova ʼo ʼuhiga mo tatatou sio ʼaē ki totatou ʼu tehina?

• Ko te ʼu ako fea neʼe kotou tāʼofi ʼo ʼuhiga mo tatatou sio ki totatou fale tautēhina ʼi te mālamanei kātoa?

• ʼE tou lava faʼifaʼitakiʼi feafeaʼi ia te sio ʼa Sehova ki te hahaʼi mokā tou fai fakamafola?

[ʼU fehuʼi ʼo te ako]

[Paki ʼo te pasina 26]

ʼE kotou lava ʼiloʼi feafeaʼi ia te hahaʼi ʼo he tahi age ʼu agaʼi fenua?

[Paki ʼo te pasina 28]

Ko te ʼu ʼaluʼaga fea ʼaē ʼe feala ai ke lahi age takotou palalau mo te hahaʼi ʼo ʼuhiga mo te logo lelei?