ʼE Tou ʼOmai Koa Maifea?

HE KO’Ē ʼE LELEI KE TOU MAʼU IA TE TALI KI TE FEHUʼI ʼAIA? Tokolahi neʼe akoʼi age kiā nātou neʼe tupu fakafokifā ia te maʼuli ʼaē ʼi te kele. Neʼe akonakiʼi age kiā nātou, ko te evolisio neʼe tupu fakafokifā ia te tagata mo tona ʼu fealagia kehekehe ʼaki he ʼu tuʼuga meʼa ʼe fakaʼapē lua.

Kae tou fakakaukauʼi age muʼa: Kapau neʼe tou tutupu mai te evolisio pea ko tona fakaʼuhiga ʼe mole ʼi ai hotatou Tupuʼaga. Kanaʼaua lā ʼe mole ʼi ai nei he poto māʼoluga ke tou kumi tokoni kiai, ʼo mole ʼi ai hotatou tokoniʼaga moʼo fakatokatoka totatou ʼu fihifihia. ʼE tou falala pē anai ki te poto fakatagata moʼo tekeʼi he ʼu tuʼutāmaki ʼi te kele, moʼo fakatokatoka te ʼu fihi fakapolitike, pea mo takitaki tātou ʼi te ʼu temi ʼaē ʼe tou faigataʼaʼia ai.

Ko te ʼu fakatuʼutuʼu ʼaia ʼe kotou lava maʼu ai anai koa he ʼatamai ʼe tokalelei? Kapau ʼe mole koia, kotou fakakaukauʼi age muʼa ʼo ʼuhiga mo kanapaulā ʼe ʼi ai he tahi ʼe nofo mo he poto māʼoluga. ʼE mahino ia ʼe ko he manatu lelei pē ʼaia ʼe tahi, pea mo mata feʼauga age ia.

Koteā ʼAē ʼe ʼUi Mai ʼi Te Tohi-Tapu?

ʼE fakahā mai ʼi te Tohi-Tapu, ko te mālamanei neʼe fakatupu e te ʼAtua, kae neʼe mole tou tutupu mai he evolisio ʼe mole tokaga ia ki te agaaga ʼo te meʼa ʼe hoko ki muli age pea ʼe mole ʼatamai. Kae ko tātou ko te fānau ʼa he Tamai ʼofa pea mo ʼatamai. Kotou fakatokagaʼi te ʼu fakamahino mai ʼaenī ʼe fai ʼi te Tohi-Tapu.

Senesi 1:27. “Neʼe fakatupu e te ʼAtua te tagata ʼo mulimuli ki tona pāki, neʼe ina fakatupu ia ia ʼo mulimuli ki te pāki ʼo te ʼAtua; neʼe ina fakatupu ia nāua ko te tagata mo te fafine.”

Pesalemo 139:14. “ ʼE au vikiviki anai kiā te koe, heʼe fakamanavahē pea mo fakaofoofo toku faʼu. ʼE fakatalakitupua tau ʼu gāue, pea ʼe mahino lelei kiā te au te meʼa ʼaia.”

Mateo 19:4-6. “Neʼe mole heʼeki kotou lau ko ia ʼaē neʼe ina fakatupu ia nāua, ʼi te kamataʼaga neʼe ina fakatupu ia nāua ʼe tagata pea mo fafine, pea neʼe ina ʼui fēnei: ‘Koia ko te tagata ʼe mavae anai mai tana tamai pea mo tana faʼē pea ʼe pipiki anai ki tona ʼohoana, pea ʼe nā liliu anai ko te kakano pē e tahi’? ʼO mole kei nā toko lua ai, kae ko te kakano pē e tahi. Koia, ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.”

Gāue 17:24, 25. “Ko te ʼAtua ʼaē neʼe ina faʼu te kele pea mo te ʼu meʼa fuli ʼaē ʼe maʼu ai, ʼe hagē ko Ia ʼaenī, ʼAliki ʼo te lagi pea mo te kele, ʼe mole nofo ia ʼi he ʼu fale lotu neʼe laga ʼaki te nima; ʼe mole fai age kiā te ia te tauhi ʼaki te ʼu nima ʼo te tagata, ohagē lā neʼe ʼaoga age he meʼa ki ai, koteʼuhi he ko ia ʼaē ʼe ina foaki ki te hahaʼi fuli te maʼuli pea mo te mānava, pea mo te ʼu meʼa fuli.”

Fakahā 4:11. “ ʼE tāu mo koe , Sehova, ʼio, tomatou ʼAtua ke ke tali ia te kolōlia, pea mo te fakaʼapaʼapa, pea mo te mālohi, heʼe ko koe ʼaē neʼe ke fakatupu ia meʼa fuli, pea ʼuhi ko tou finegalo neʼe natou māʼuʼuli ai pea mo fakatupu ai ia nātou.”

ʼE Feafeaʼi Ia Hatatou Maʼu He ʼAtamai ʼe Tokalelei Moʼoni ʼAki Te ʼu Tali Mai Te Tohi-Tapu?

Ko te ʼiloʼi ʼaē ko “te ʼu fāmili fuli ʼi te kele ʼe natou maʼu ia tonatou higoa” ʼuhi ko te ʼAtua, ʼe fetogi tatatou faʼahiga manatu ʼo ʼuhiga mo te hahaʼi. (Efesi 3:15) Ko tata maʼu ia te taʼi ʼatamai mālama ʼaia ʼe toe tokoni mai foki ki tatatou faʼahiga fakatokatoka ia totatou ʼu fihifihia pea mo tatatou fakaʼuhiga ʼo tātou totonu pē. ʼE malave anai tatatou faʼahiga manatu ki te ʼu ʼaluʼaga ʼaenī.

Kapau ʼe tou fai he tonu kae ʼe mole tou faʼa ʼiloʼi hona puleʼaki, ʼe mole tou hoha fau anai ʼo ʼuhiga mo te manatu ʼa te hahaʼi ʼo ʼuhiga mo te ʼu faʼahi ʼaia. Kae ʼe tou falala anai ki te tokoni ʼa te Tohi-Tapu. Koteā tona tupuʼaga? Koteʼuhi “ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke kātoa lelei te ʼu kalitātē ʼo te tagata ʼa te ʼAtua, pea mo kātoa lelei tona teuteuʼi ki te ʼu gāue lelei fuli pē.”—2 Timoteo 3:16, 17.

ʼIo, ʼe tonu ke tou gāue kinakina pea mo tou lolomi ia tātou totonu mo kapau ʼe tou fia maʼuliʼi ia te ʼu tokoni fakatohi-tapu. ʼI ʼihi temi, ko te takitaki ʼa  te Tohi-Tapu ʼe lagi ʼe ina uga anai tātou ke tou fai he aga ʼe mole ʼalutahi ia mo te ʼu meʼa ʼe tou holi kiai. (Senesi 8:21) Kae kapau ʼe tou tali neʼe faʼu tātou e te Tamai ʼofa ʼe ʼi selō, pea ʼe tuha mo ia ke ina ʼiloʼi ia te meʼa ʼaē ʼe lelei age kiā tātou. (Isaia 55:9) Koia ko tana Folafola ʼe ina fakapapau fēnei mai: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Tāʼaga Lea 3:5, 6) Kapau ʼe tou maʼuliʼi ia te tokoni ʼaia, pea ʼe mole tou hoha fau anai mokā ʼe tou tau mo he ʼu fihifihia pea mo fai he ʼu tonu.

Kā tou tau mo he fakapalatahi, ʼe mole tou mafasia anai ʼaki he ʼu manatu ʼe mole lelei, ʼo tou ʼui ʼe mole tou maʼuhiga, heʼe tou kau ʼi he lanu peʼe ko he agaʼi fenua ʼe mole hona ʼaoga. Kae ʼe tou faigaʼi anai ke tou fakapotopoto ʼo puipui ia totatou matagafua. Koteā tona tupuʼaga? Heʼe ko tatatou Tamai, ia Sehova ʼAtua, “ ʼe mole fakapalatahi; kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gāue 10:34, 35.

Kapau ʼe tou mahino ki te faʼahi ʼaia, pea ʼe mole tou fihifihia anai mo te hahaʼi ʼuhi ko te fakapalatahi. ʼE tou mahino anai ʼe mole hona fua ʼo tatatou fia māʼoluga age ʼi he tahi lanu, heʼe ko te ʼAtua “neʼe ina fakatupu ʼaki te tagata e tahi ia te ʼu puleʼaga fakatagata fuli pē ke nonofo ʼi te fuga kele kātoa.”—Gāue 17:26.

ʼE mahino ia, ko tatatou ʼiloʼi ʼaē neʼe fakatupu tātou e te ʼAtua pea ʼe toe tokaga ia kiā tātou, ʼe ko he fakatafitoʼaga ʼaia ke tou lava maʼu he ʼatamai ʼe tokalelei moʼoni. Kae ʼe ʼi ai te tahi age meʼa ʼe maʼuhiga age mo kapau ʼe tou taupau ia he loto ʼe tokalelei.