Te Kumi ʼo He ʼu Tali ʼo ʼUhiga Mo He ʼu Fehuʼi

“ ʼI takita ʼosi maʼu te tali ki te fehuʼi ‘pe feafeaʼi’ te maʼu ʼo te meʼa maʼuli, pea mo takita ʼosi maʼu ʼo he ʼu meʼa ʼe mole feala ke maʼu e te hahaʼi fuli, ohagē lā ko he fale ʼe tou maʼu ai ia te ʼu meʼa lelei fuli, ko he foʼi masini fakamokomoko, he meʼa fakatagi ʼe lelei, pea mo he ʼu meʼa kai ʼe lelei, ʼe feala ʼaki te ʼu faʼahi fuli ʼaia ke tou feʼekeʼaki ‘pe koʼē’ ʼe tou māʼuʼuli. He koʼē ʼe tou kumi ia te taʼi faʼahiga maʼuli ʼaia? Koteā tona tupuʼaga?”—David G. Myers, polofesea ʼo te ‘psychologie’ ʼi te faleako ‘Hope College,’ Holland, Michigan, ʼi Amelika.

KOTEĀ anai ia hakotou tali ki te ʼu fehuʼi neʼe lagaʼi e te polofesea ʼaia? Ko ʼihi ʼe natou feʼekeʼaki, peʼe ko te temi ʼaē ʼe natou fakaʼaogaʼi moʼo kumi ia te ʼu tali ki te ʼu fehuʼi ʼaia, ʼe ʼi ai anai koa hona fua? Kae kapau ʼe mole tou tokagaʼi ia te ʼu fehuʼi ʼaia, ʼe fakatatau pē ki hatatou meʼa noaʼi ia he ʼu kiʼi foʼi maka ʼi totatou ʼu sūlie—ʼe feala pē hatatou haʼele, kae ʼe mole tou haʼele fīmālie anai.

Kapau ʼe kotou feʼekeʼaki pe koteā ia te ʼuhiga ʼo te maʼuli, pea ʼe mole ko koutou tokotahi pē. ʼE ʼui e te sivi World Values Survey, ʼe kau ʼi te ʼu sivi lalahi kua fai ʼo ʼuhiga mo te ʼu meʼa ʼaē ʼe maʼuhiga kiā mata ʼo te tagata, ʼe kua tuputupu ia te kaugamālie ʼo te hahaʼi ʼi te ʼu fenua ʼe natou fakakaukauʼi ia te “ ʼuhiga pea mo te tupuʼaga ʼo te maʼuli.”

Kapau ʼe kotou loto ke kotou lava maʼu ia he tokalelei moʼoni ki tokotou ʼatamai, pea ʼe tonu ke kotou maʼu te ʼu tali ki te ʼu fehuʼi maʼuhiga ʼe tolu.

ʼE tou ʼomai koa maifea?

Koteā te tupuʼaga ʼo te maʼuli?

ʼE feafeaʼi ia te kā haʼu?

Kofea ʼaē kā tou maʼu mai ai he ʼu tali ki te ʼu fehuʼi maʼuhiga ʼaia, pea ʼe tuha ke tou falala kiai? ʼI te ʼu pāsina ʼaē kā hoa mai, ʼe tou maʼu ai anai te ʼu tali ʼe foaki mai ʼi te Folafola ʼa te ʼAtua, te Tohi-Tapu, kae ʼe mole tou fai ni ʼu tali ʼaki pē tokita poto fakatagata. ʼE matou fakaafe atu koutou ke kotou ʼavahi ia takotou Tohi-Tapu pea mo kotou lau ia te ʼu manatu ʼaē ʼe ina fakahā mai ʼo ʼuhiga mo te ʼu fehuʼi ʼaia.