ʼE ʼAoga He Haofaki!

FOKIFĀ pē neʼe lōfia te lameni mamala e te ʼu tane vai, ʼaē neʼe tuʼu ovi ki Pittsburgh, ʼi Pennsylvanie, ʼi Amelika. Ko te ʼu tagata e toko hiva ʼaē neʼe gāue ai, neʼe maʼu nātou ʼi loto, iā meta e 73 ʼi te lalo kele. Hili ʼaho e tolu, pea fakahū mai nātou ki tuʼa, neʼe mole natou lāvevea. Neʼe feafeaʼi ia tonatou haofaki?

ʼAki te ʼu mape ʼo te lameni pea mo te takitaki ʼo te satelite, ko te hahaʼi haofaki neʼe natou keli te luo e satimeta 65 tona laulahi pea natou fakahifo ai te puha ʼe loa pea mo fāveliveli, ʼo aʼu ki te faʼahi ʼaē neʼe nonofo ai te ʼu tagata. Neʼe toho ake ai ki tuʼa te ʼu tagata ʼaia takitahi, mai te luo ʼaē neʼe feala pē ke natou mamate ai. Neʼe natou fiafia fuli, mo loto fīmālie, pea mo loto fakafetaʼi ki te hahaʼi haofaki.

Tokolahi iā tātou ʼe lagi mole tou taʼomia anai ʼi he luo ohagē ko te toko hiva tagata gāue ʼo te lameni pe neʼe heʼeki tou tuʼutāmakiʼia. Kae ʼe ʼaoga ke haofaki tātou fuli, heʼe mole feala ke tou hao mai te ʼu fua kovi ʼo te mahaki pea mo te mātutuʼa pea mo te mate. Neʼe ʼui fēnei e te pāteliaka agatonu ko Sopo: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha. Neʼe tupu ake ia ohagē ko he fisiʼi teu pea ʼe tuʼusi; pea ʼe hola ohagē ko te malumalu pea ʼe mole hoko atu tona maʼuli.” (Sopo 14:1, 2) Iā ʼaho nei, hili teitei taʼu e 3 500, kei moʼoni pē ia te ʼu palalau ʼaia, heʼe mole he tahi iā tātou ʼe feala ke hao mai te ikuʼaga fakaʼosi ʼo te maʼuli, ʼaē ko te mate. Pe kofea pē ia te koga meʼa ʼaē ʼe tou māʼuʼuli ai peʼe tou tōkakaga ke tou hao mai te mahaki, kae ʼe ʼaoga ke haofaki tātou mai te mamahi, mo te temi matuʼa, pea mo te mate.

Ko te hahaʼi popoto pea mo ʼihi atu ʼe natou gāue kinakina moʼo fakatologa ia te maʼuli ʼo te hahaʼi ke fualoa age ʼi te temi maʼuli ʼaē kua tou māhani nei kiai. ʼE ʼui e te hahaʼi ʼo te kautahi, ko tanatou gāue ʼe ko te “pulihi ʼo te mate ʼaē ʼe hoko kiā tātou kae mole tou loto kiai” pea mo “tokoni ki te hahaʼi ʼo te kautahi ʼaia ke natou fakahoko lelei tanatou ʼu gāue ʼaē ke feala ai ki te tagata ke ina maʼu ia te maʼuli tuputupua.” Kae ʼo aʼu mai ki te temi nei, ko te ʼu gāue fuli ʼaē neʼe fai e te ʼu hahaʼi popoto pea mo te holi mālohi ʼaē ke iku tanatou gāue, neʼe mole feala ai pē lā ke fakatologa ke fualoa age ia te temi maʼuli ʼo te tagata, ʼaē ʼe fakatuʼakoi pē kiā taʼu e 70 peʼe 80, pea neʼe talanoa kiai Moisese kua hili kiai taʼu e 3 500.—Pesalemo 90:10.

Peʼe kotou manatu tahi peʼe kailoa mo Sopo ʼo ʼuhiga mo te maʼuli pea mo te mate, kae ko te faʼahi ʼe hoko moʼoni kiā tātou fuli mokā fakalaka te temi, heʼe mo koutou foki ʼe kotou “hola ohagē ko te malumalu,” ʼo mole kei kotou fakatahi mo tokotou ʼu kaumeʼa, mo tokotou fāmili, mo tokotou loto fale, pea mo te ʼu meʼa fuli ʼaē neʼe kotou fai, ʼo fakaʼosi ki te mate. Neʼe tohi fēnei e Salomone, te Hau poto ʼo Iselaele ʼi te temi muʼa: “Ko te kau māʼuʼuli ʼe natou ʼiloʼi ʼe natou mamate anai; kae ko te kau mate, ʼe mole kei natou ʼiloʼi he meʼa, pea ʼe mole kei ʼi ai honatou totogi, heʼe kua galo moʼoni tonatou fakamanatu.”—Tagata Tānaki 9:5.

Ko te ʼaluʼaga ʼaē ʼe hoko moʼoni pea mo fakaʼofaʼofa, ohagē ko tona fakahā lelei ʼi te Tohi-Tapu, ko te mate ʼe “pule” ki te mālamanei ohagē ko he hau agakovi. Pea ko te mate ʼe ko te fili fakaʼosi ʼaia ʼaē ʼe ʼaoga ke haofaki mai ai te tagata. (Loma 5:14; 1 Kolonito 15:26) Ko te hahaʼi haofaki ʼaē neʼe akoako lelei ʼosi pea mo natou maʼu te ʼu meʼa gāue lelei ʼaupitō ʼi te mālamanei, ʼe mole feala ke natou haofaki koutou ʼo talu ai. Kae ko Sehova ʼAtua, ia te Tupuʼaga ʼo te tagata, neʼe ina fai te fakatuʼutuʼu lelei moʼo haofaki ia te mālamanei.

[Haʼuʼaga ʼo te paki pasina 3]

Photo by Gene J. Puskar-Pool/Getty Images