ʼE Tonu Ke Feafeaʼi Tatatou Aga Ki Te Hahaʼi?

“Ohagē pē ko te meʼa fuli pē ʼe kotou loto ke fai e te hahaʼi maʼa koutou, ke kotou toe fai fēia maʼa nātou.”—LUKA 6:31.

1, 2. (a) Koteā ʼaē ʼe talanoa kiai ʼi te Akonaki ʼi te Moʼuga? (b) Koteā ʼaē kā tou vakaʼi anai ʼi te ʼalatike ʼaenī pea mo ʼaē kā hoa mai?

 KO SESU KILISITO neʼe ko te Tagata Faiako Lahi pē ʼaia. ʼI te fekauʼi mai e tona ʼu fili te ʼu tagata moʼo puke ia ia, neʼe fua noa te faiga ʼa te ʼu ofisie pea neʼe ʼui maʼa nātou: “ ʼE mole heʼeki ʼi ai he tahi age tagata kua palalau fēia.” (Soa. 7:32, 45, 46) Ko te Akonaki ʼi te Moʼuga neʼe ko he akonaki ʼi te ʼu faiakonaki fakatalakitupua ʼa Sesu. ʼE tuʼu te akonaki ʼaia ʼi te kāpite 5 ki te kāpite 7 ʼo te Evaselio ʼa Mateo, pea ʼe toe talanoa kiai iā Luka 6:20-49. a

² ʼE lagi ʼi te akonaki ʼaia, ko te ʼu palalau ʼaē ʼe tou logo māhani kiai, ʼe ko ia ʼaē ʼe fakahigoaʼi tuʼumaʼu ko te Lēkula ʼAulo. ʼE fakaʼuhiga te vaega ʼaia ki tatatou aga ʼaē ʼe tou fai ki te hahaʼi. Neʼe ʼui fēnei e Sesu: “Ohagē pē ko te meʼa fuli pē ʼe kotou loto ke fai e te hahaʼi maʼa koutou, ke kotou toe fai fēia maʼa nātou.” (Luka 6:31) Pea neʼe lahi te ʼu meʼa lelei neʼe ina fai maʼa te hahaʼi! Neʼe fakamālōlō e Sesu te kau mahaki pea mo fakatuʼuake te kau mate. Kae neʼe tapuakinaʼi tāfito te hahaʼi ʼi te temi ʼaē neʼe natou tali ai te logo lelei ʼaē neʼe ina fakamafola age kiā nātou. (Lau ia Luka 7:20-22.) ʼI totatou ʼuhiga kau Fakamoʼoni ʼa Sehova, ʼe tou fiafia ʼi tatatou kau ki te gāue fai fakamafola fēia ʼo ʼuhiga mo te Puleʼaga. (Mat. 24:14; 28:19, 20) ʼI te ʼalatike ʼaenī pea mo ʼaē kā hoa mai, ʼe tou vakaʼi anai te ʼu palalau neʼe fai e Sesu ʼo ʼuhiga mo te gāue ʼaia, pea mo ʼihi age puani ʼi te Akonaki ʼi te Moʼuga ʼe talanoa ʼo ʼuhiga mo tatatou aga ʼaē ʼe tonu ke tou fai ki te hahaʼi.

Ke Tou Agamalū

 3. ʼE feafeaʼi anai hatatou fakamahino ia te fakaʼuhiga ʼo te kupu agamalū?

³ Neʼe ʼui fēnei e Sesu: “Fiafia ia nātou ʼaē ʼe agamalū, heʼe natou maʼu anai te kele.” (Mat. 5:5) ʼI te Tohi-Tapu, ʼe kehekehe pē ia te agamalū ʼi te vaivaiʼaga. Ko he aga ʼe tou fai ʼe lelei moʼo fakahā ia tatatou fakalogo ʼaē ki te ʼu lēkula ʼa te ʼAtua. ʼE tou fakahā tatatou aga ʼaia ʼi tatatou ʼu felōgoi ʼaē mo te hahaʼi. Ohagē lā, ʼe mole tou “liufaki ki he tahi te kovi ʼuhi ko te kovi.”—Loma 12:17-19.

 4. He koʼē ʼe fiafia ia te hahaʼi agamalū?

⁴ ʼE fiafia ia te hahaʼi agamalū koteʼuhi ‘ ʼe natou maʼu anai te kele.’ Ko Sesu ʼaē neʼe “agamalū pea mo loto agavaivai” neʼe “fakanofo . . . ke ina maʼu te tōfiga ʼo meʼa fuli” pea ko Ia tāfito ʼaē ʼe ina maʼu te tofiʼa ʼo te kele. (Mat. 11:29; Hep. 1:2; Pes. 2:8) Neʼe fakakikite ko te ‘foha ʼo te tagata’ ʼaē ko te Mēsia ʼe kaugā hau anai mo ʼihi ʼi te Puleʼaga ʼi selō. (Tan. 7:13, 14, 21, 22, 27) Pea ʼi tanatou “kaugā maʼu tofiʼa fakatahi pea mo Kilisito,” ʼe kau mo te toko 144 000 kau Kilisitiano agamalū ki te tofiʼa ʼo Sesu ʼaē ko te kele. (Loma 8:16, 17; Fakh. 14:1) ʼE tapuakinaʼi anai ihi kau agamalū ʼaki te maʼuli heʼegata ʼi te kele ʼaē kā takitaki e te Puleʼaga.—Pes. 37:11.

 5. ʼE feafeaʼi anai totatou ʼulugaaga mo kapau ʼe tou faʼifaʼitakiʼi ia te agamalū ʼa Kilisito?

⁵ Kanapau lā neʼe tou aga fefeka, ʼe lagi mole fia fakaovi mai anai ʼihi kiā tātou pea ʼe mole natou fia kaumeʼa anai mo tātou. Kae kapau ʼe tou faʼifaʼitakiʼi te agamalū ʼa Kilisito pea ʼe fia felōgoi ai anai ʼihi mo tātou pea mo tou fakalotomālohiʼi te kōkelekāsio. Ko te agamalū ʼe ko he kalitātē ʼo te fua ʼo te mālohi gāue ʼo te ʼAtua ʼaē ʼe ina fakatupu iā tātou mo kapau ʼe tou ‘maʼuli pea mo haʼele ʼaki te laumālie.’ (Lau ia Kalate 5:22-25.) ʼE mahino ia, ʼe tou fia kau iā nātou ʼaē ʼe agamalū pea ʼe takitaki e te laumālie māʼoniʼoni ʼo Sehova!

 ʼE Fiafia Ia Te Kau Manavaʼofa!

 6. Koteā te ʼu kalitātē lelei ʼe maʼu e ia ‘ ʼaē ʼe manavaʼofa’?

⁶ ʼI tana Akonaki ʼi te Moʼuga, neʼe toe ʼui fēnei e Sesu: “Fiafia ia nātou ʼaē ʼe manavaʼofa, heʼe fai anai kiā nātou te manavaʼofa.” (Mat. 5:7) Ko ‘ ʼaē ʼe manavaʼofa’ ʼe lotomahino, mo tokaga pea mo ʼofa kiā nātou ʼaē ʼe maʼuli faigataʼaʼia. Neʼe fai e Sesu ia te milakulo ʼo ina fakamālōlō te hahaʼi lotomamahi he neʼe “ ʼofa mamahi,” pe neʼe ‘ ʼofa’ kiā nātou ʼaia. (Mat. 14:14; 20:34) Koia ʼe tou manavaʼofa anai heʼe tou ʼofa mamahi pea mo loto tokaga ki ʼihi.—Sake 2:13.

 7. Koteā ʼaē neʼe fai e Sesu ki te hahaʼi ʼuhi ko tona ʼofa mamahi ʼaē kiā nātou?

⁷ ʼI te felāveʼi ʼa te hahaʼi mo Sesu ʼi te koga meʼa ʼaē neʼe mālōlō ai, “neʼe ʼofa mamahi ia kiā nātou, koteʼuhi neʼe natou hagē ni faga ovi ʼe mole ʼi ai honatou tagata tauhi.” Koia “neʼe lahi te ʼu meʼa neʼe ina kamata akonakiʼi kiā nātou.” (Mko. 6:34) ʼE tou fiafia mo tātou mokā ʼe tou fai fēia ʼi tatatou fakamafola ia te logo lelei ʼo te Puleʼaga ki te hahaʼi pea mo fakahā age kiā nātou te manavaʼofa lahi ʼo te ʼAtua!

 8. He koʼē ʼe fiafia ia nātou ʼaē ʼe manavaʼofa?

⁸ Ko te hahaʼi manavaʼofa ʼe natou fiafia heʼe natou “manavaʼofa.” Kā tou manavaʼofa ki te hahaʼi, pea ʼi te agamāhani ʼe natou toe liufaki mai ia tatatou aga ʼaia. (Luka 6:38) Tahi ʼaē, neʼe ʼui fēnei e Sesu: “Kapau ʼe kotou fakamolemole ki te hahaʼi ʼanatou hala, pea ʼe toe fakamolemole anai mo takotou Tamai kiā koutou.” (Mat. 6:14) ʼE gata pē kiā nātou ʼaē ʼe manavaʼofa ʼe natou ʼiloʼi ia te fiafia ʼaē ʼe maʼu mai te fakamolemole ʼo he ʼu agahala pea mo te ʼofa ʼo te ʼAtua.

He Koʼē ʼe Fiafia “Ia Nātou ʼAē ʼe Manako Ki Te Tokalelei”

 9. Koteā lā he meʼa kā tou fai mo kapau ʼe tou manako ki te tokalelei?

⁹ ʼI tana fakahā ia te tahi tupuʼaga ʼaē ke tou fiafia ai, neʼe ʼui fēnei e Sesu: “Fiafia ia nātou ʼaē ʼe manako ki te tokalelei, heʼe fakahigoa anai nātou ko ‘te ʼu foha ʼo te ʼAtua.’ ” (Mat. 5:9) Ko te kupu Fakakeleka ʼaē neʼe fakaliliu ʼaki te kupusiga palalau “manako ki te tokalelei” ko tona fakaʼuhiga “ko he ʼu hahaʼi ʼe natou fai ni ʼu gāue ke natou maʼuli tokalelei ai mo ʼihi.” Kapau ʼe tou manako ki te tokalelei, pea ʼe mole tou fai anai he aga ohagē lā ko te fai fatufatu, heʼe ko he faʼahi ʼe feala aipē ke ‘fakamavetevete ia nātou ʼaē ʼe felōgoi lelei.’ (Taag. 16:28) ʼAki tatatou ʼu palalau pea mo tatatou ʼu gāue, ʼe tou maʼuli tokalelei anai mo totatou ʼu tehina mo tuagaʼane ʼi te kōkelekāsio pea mo nātou ʼaē ʼe mole ko he kau Fakamoʼoni ʼa Sehova. (Hep. 12:14) Kae ko te meʼa tāfito ʼaē kā tou fiafia ai heʼe tou maʼuli tokalelei anai mo Sehova ʼAtua.—Lau ia 1 Petelo 3:10-12.

10. He koʼē ʼe fiafia ia nātou “ ʼaē ʼe manako ki te tokalelei”?

¹⁰ Neʼe ʼui e Sesu ko nātou “ ʼaē ʼe manako ki te tokalelei” ʼe natou fiafia, “heʼe fakahigoa anai nātou ko ‘te ʼu foha ʼo te ʼAtua.’ ” ʼI tanatou haga tui ʼaē kiā Sesu ko te Mēsia, ʼe maʼu e te kau Kilisitiano fakanofo te “fealagia ke natou liliu ko he ʼu fānau ʼa te ʼAtua.” (Soa. 1:12; 1 Pet. 2:24) ʼE feafeaʼi ki te tokalelei ʼa te “tahi ʼu ovi” ʼa Sesu? ʼE liliu anai ia Sesu ko tanatou “Tamai Heʼegata” lolotoga tana ʼAfio Iā Taʼu e Afe mo tona ʼu kaugā maʼu tofiʼa ʼi selō. (Soa. 10:14, 16; Isa. 9:6; Fakh. 20:6) ʼI te fakaʼosi ʼo tana ʼAfio Iā Taʼu e Afe, ko nātou ʼaia ʼe manako ki te tokalelei, ʼe natou liliu moʼoni ai anai ko te ʼu fānau ʼa te ʼAtua ʼi te kele.—1 Ko. 15:27, 28.

11. ʼE feafeaʼi anai tatatou aga ki te hahaʼi mo kapau ʼe takitaki tātou e “te poto mai ʼoluga”?

¹¹ Ke feala hatatou felōgoi lelei mo Sehova, ia “te ʼAtua ʼo te tokalelei,” ʼe tonu ke tou faʼifaʼitakiʼi tona ʼu kalitātē, ohagē lā ko te maʼuliʼi ʼo te tokalelei. (Filp. 4:9) Kapau ʼe tou tuku ke takitaki tātou e “te poto mai ʼoluga,” pea ʼe tou maʼuli tokalelei anai mo te hahaʼi. (Sake 3:17) ʼEī, ʼe tou liliu anai ko ni hahaʼi tokalelei ʼe maʼuli fiafia.

Ke “Mū . . . Tokotou Mālama”

12. (a) Koteā ʼaē neʼe ʼui e Sesu ʼo ʼuhiga mo te mālama fakalaumālie? (b) ʼE feafeaʼi hatatou fakamū ia totatou mālama?

¹² ʼE tou tokaga fakalelei ki te hahaʼi mokā ʼe tou tokoni kiā nātou ke natou mahino ki te mālama fakalaumālie ʼaē mai te ʼAtua. (Pes. 43:3) Neʼe ʼui e Sesu ki tana ʼu tisipulo ko nātou ko “te mālama ʼo te mālamanei” pea neʼe ina uga nātou ke natou fakahā tonatou mālama ke sio ia te hahaʼi ki tanatou ‘ ʼu gāue lelei,’ peʼe ko te ʼu gāue lelei ʼaē ʼe natou fai ki niʼihi. Koia ʼe tupu ʼaki ai anai he mālama fakalaumālie “ ʼi muʼa ʼo te hahaʼi” peʼe fua lelei ki te mālamanei. (Lau ia Mateo 5:14-16.) Iā ʼaho nei, ʼe tou fakamū ia totatou mālama ʼi tatatou fai ia te  meʼa ʼaē ʼe lelei ki te hahaʼi pea mo fakamafola te logo lelei “ ʼi te mālamanei kātoa,” peʼe “ ʼi te ʼu puleʼaga fuli.” (Mat. 26:13; Mko. 13:10) ʼE ko he toe pilivilēsio lahi ʼe tou maʼu!

13. Koteā ʼaē ʼe tokagaʼi ʼo ʼuhiga mo tātou?

¹³ Neʼe ʼui e Sesu: “ ʼE mole feala ke ū he kolo mokā ʼe tuʼu ʼi he fuga moʼuga.” ʼE hā lelei pē he kolo ʼe tuʼu ʼi he fuga moʼuga. ʼO toe fēia pē mokā tou fakamafola ia te logo lelei, ʼe tokagaʼi tātou ʼi tatatou ʼu gāue lelei pea mo totatou ʼu kalitātē ohagē ko te fakapotopoto pea mo te agamaʼa.—Tito 2:1-14.

14. (a) Neʼe faʼu feafeaʼi ia te ʼu mālama ʼo te ʼuluaki sēkulō? (b) Koteā te fakaʼuhiga ʼo te ʼui ʼaē ke mole tou fufū te mālama fakalaumālie ʼi he lalo “kato fua meʼa”?

¹⁴ Neʼe talanoa ia Sesu ki te mū ʼo he mālama pea mo tona hili ki he hiliʼaga mālama ke mālama ai ia nātou fuli ʼo te loto fale, kae ʼaua tona tuku ki he lalo kato. ʼI te ʼuluaki sēkulō, ko te mālama neʼe fai ʼaki he ʼipu kele pea ʼai kiai he vavae moʼo homi ia te huʼa lolo (ʼi te agamāhani neʼe ko te lolo oliveto) ke mū tuʼumaʼu. ʼI te agamāhani neʼe fakatuʼu ki he laupapa ʼakau peʼe ko he laupapa ukamea, pea ‘ ʼe ina fakamālamaʼi ia nātou fuli ʼaē ʼi te loto fale.’ ʼE mole tutu anai e te hahaʼi ia he mālama pea nātou tuku ʼi he lalo “kato fua meʼa,” ko he foʼi topu ʼe ʼuʼutu kiai lite lolo e hiva. Neʼe mole loto e Sesu ke fufū e tana ʼu tisipulo te mālama fakalaumālie ʼi he lalo kato fakatātā. ʼE tonu ke tou fakamū totatou mālama ki te hahaʼi, logolā te fakafeagai peʼe ko te fakataga kae ʼe mole tou fufū anai te moʼoni Fakatohi-tapu peʼe tou taupau pē maʼa tātou.

15. ʼE malave feafeaʼi tatatou “ ʼu gāue lelei” ki ʼihi hahaʼi?

¹⁵ Neʼe fai e Sesu tana ʼu palalau ʼaenī ki tana ʼu tisipulo ʼi tana kua ʼosi talanoa ki te mālama ʼe mū: “Ke toe fēia pē te mū ʼo tokotou mālama ʼi muʼa ʼo te hahaʼi, koteʼuhi ke natou sio ki ʼakotou gāue lelei pea nātou fakakolōlia ai ki takotou Tamai ʼaē ʼe ʼi selō.” ʼI te sio ʼa ʼihi hahaʼi ki tatatou “ ʼu gāue lelei” ʼe natou “fakakolōlia” ai ki te ʼAtua, ʼo natou liliu ko hana ʼu kaugana. ʼE ko he ʼaluʼaga ʼaia ʼe ina uga ai anai tātou ke tou haga “mū . . . ohagē ko he ʼu mālama ʼi te mālamanei”!—Filp. 2:15.

16. Kapau ko tātou ko “te mālama ʼo te mālamanei” pea koteā ʼaē ʼe fakamaʼua mai ke tou fai?

¹⁶ Kapau ko tātou ko “te mālama ʼo te mālamanei” pea ʼe fakamaʼua mai ke tou fakamafola ia te logo lelei ʼo te Puleʼaga pea mo fai ni ʼu tisipulo. Kae ʼe ʼi ai te tahi age meʼa ʼe fakamaʼua mai ke tou fai. Neʼe ʼui fēnei e te ʼapositolo ko Paulo: “Kotou haga haʼele ohagē ko he ʼu fānau ʼo te mālama, heʼe ko te fua ʼo te mālama ʼe ko te ʼofa fuapē mo te faitotonu pea mo te moʼoni.” (Efe. 5:8, 9) ʼI te temi fuli pē, ʼe tonu ke tou fakahā ʼi tatatou aga ʼe tou maʼuliʼi te ʼu lēkula ʼa te ʼAtua. ʼEī, ʼe tonu ke tou muliʼi te tokoni ʼaenī ʼa te ʼapositolo ko Petelo: “Ke iā koutou he aga matamatalelei ʼi te lotolotoiga ʼo te ʼu puleʼaga, ke feala ʼi te temi ʼaē ʼe natou laukovi ai kiā kotou ohagē ko he kau agakovi, ke natou fakakolōliaʼi te ʼAtua ʼi te ʼaho ʼo tana ʼaʼahi, ʼuhi ko tanatou sio mata ki takotou ʼu gāue lelei.” (1 Pet. 2:12) Kae koteā anai ʼe tonu ke fai mo kapau ʼe fihifihia he tahi mo hona tehina?

“ ʼAlu Muʼa ʼo Fakatokatoka Mo Tou Tehina”

17-19. (a) Neʼe koteā ia te “mōlaga” ʼaē ʼe talanoa kiai iā Mateo 5:23, 24? (b) He koʼē ʼe maʼuhiga ke fakatokatoka muʼa mo hota tehina, pea neʼe fakahā feafeaʼi e Sesu ia te faʼahi ʼaia?

¹⁷ ʼI tana Akonaki ʼi te Moʼuga, neʼe fakahā age e Sesu ki tana ʼu tisipulo ke natou tōkakaga naʼa natou tāʼofi honatou ʼita ki honatou tehina pea mo fehiʼa ki ai. Kae neʼe tonu ke natou foimo fakatokatoka mo tonatou tehina ʼaē neʼe natou fakamamahiʼi. (Lau ia Mateo 5:21-25.) Tou vakaʼi fakalelei age muʼa te tokoni ʼaē neʼe fai e Sesu. Kapau neʼe kotou momoli takotou mōlaga ʼi te ʼaletale pea ʼi te temi ʼaia ʼe kotou manatuʼi ʼe mamahi hokotou tehina kiā koutou ʼo ʼuhiga mo he meʼa, koteā ʼaē ʼe tonu ke kotou fai? Tuku tokotou mōlaga ʼi muʼa ʼo te ʼaletale kae kotou ʼolo muʼa ʼo fakatokatoka mo tokotou tehina. Kapau kua kotou ʼosi fai ia te faʼahi ʼaia, pea kua feala leva ke kotou toe liliu mai ʼo momoli ia tokotou mōlaga.

¹⁸ ʼI te agamāhani ko te “mōlaga” neʼe ko he sākilifisio neʼe fai e he tahi ʼi te fale lotu ʼo Sehova. Neʼe maʼuhiga ia te ʼu sākilifisio manu, he neʼe ko he fakatotonu ʼa te ʼAtua ʼi te Lao ʼa Moisese ki te kau Iselaele ʼi tanatou tauhi. Kae kapau neʼe kotou manatuʼi ʼe mamahi tokotou tehina kiā koutou, ʼolo muʼa ʼo fakatokatoka te fihifihia he neʼe maʼuhiga age ia ʼi te momoli ʼo te mōlaga. Neʼe ʼui e  Sesu: “Tuku muʼa tou mōlaga ʼi te muʼa ʼaletale, kā ke ʼalu muʼa ʼo fakatokatoka mo tou tehina, pea kā ke liliu mai, pea hoki ke momoli ai leva tou mōlaga.” Neʼe maʼuhiga ʼi te Lao ʼi muʼa ʼo he fai mōlaga, ke fakatokatoka muʼa he tehina mo hona tehina.

¹⁹ Neʼe mole fakatuʼakoi e Sesu ia tana palalau ki he ʼu faʼahiga mōlaga pea mo he ʼu faʼahiga talagataʼa. Koia, neʼe mole feala ke fai he mōlaga mo kapau neʼe manatuʼi e he tahi ʼe mamahi tona tehina kiā ia ʼo ʼuhiga mo he meʼa. Kapau ko te mōlaga neʼe ko he manu neʼe kei maʼuli, pea neʼe tonu ke tuku “ ʼi te muʼa ʼaletale” ʼo te holokosetā ʼi te malaʼe ʼa te kau pelepitelō ʼi te fale lotu. Kapau kua ʼosi fakatokatoka ia te fihifihia, pea ʼe toe liliu mai anai ia ia ʼaē neʼe lakahala ʼo momoli tona mōlaga.

20. He koʼē ʼe tonu ke tou foimo fakatokatoka vave he fihifihia mo hota tehina mo kapau neʼe tou ʼita ki ai?

²⁰ ʼI te manatu ʼa te ʼAtua, ko tatatou ʼu felōgoi mo totatou ʼu tehina ʼe ko he koga maʼuhiga ʼaia ʼo te tauhi moʼoni. Neʼe mole maʼuhiga kiā Sehova te ʼu sākilifisio manu mo kapau ko nātou ʼaē neʼe natou momoli age ʼe natou agakovi ki tonatou ʼu tehina. (Mik. 6:6-8) Koia, neʼe tokoniʼi ai e Sesu tana ʼu tisipulo ke natou “foimo fakatokatoka vave” te fihifihia. (Mat. 5:25) ʼO toe fēia mo Paulo, neʼe ina ʼui fēnei: “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita, pea ʼaua naʼa kotou tuku he faigamālie ki te Tēvolo.” (Efe. 4:26, 27) Kapau ʼe matatonu hota ʼita ki he tahi, pea ʼe tonu ke tou foimo fakatokatoka vave te fihifihia ʼaia mo tota tehina, ke ʼaua naʼa tou nonofo mo hota ʼita, naʼa liliu ko he faigamālie ki te Tēvolo moʼo fakahiga ʼo tātou.—Luka 17:3, 4.

Tou Aga Fakaʼapaʼapa Tuʼumaʼu Ki Te Hahaʼi

21, 22. (a) ʼE feafeaʼi hatatou muliʼi te tokoni ʼa Sesu ʼaenī neʼe hoki tou talanoa kiai? (b) Koteā ʼaē kā tou vakaʼi ʼi te ʼalatike kā hoa mai?

²¹ Ko tatatou toe vakaʼi ia te ʼu palalau ʼaē neʼe fai e Sesu ʼi tana Akonaki ʼi te Moʼuga, ʼe tokoni mai ke tou agalelei pea mo aga fakaʼapaʼapa ki te hahaʼi. Logolā ko tātou fuli ʼe tou heʼe haohaoa, kae ʼe feala ke tou muliʼi te tokoni ʼa Sesu heʼe ina ʼiloʼi ʼo toe fēia mo tatatou Tamai ʼe ʼi selō ia totatou ʼu fealagia. ʼAki te faikole, mo he faiga fakamālotoloto, pea mo te tapuakina ʼa Sehova ʼAtua, ʼe feala ke tou agamalū, manavaʼofa pea mo maʼuli tokalelei. ʼE tou lava fakamū te mālama fakalaumālie ʼaē kā fakakolōlia ai ia Sehova. Tahi ʼaē, ʼe feala ke tou fakatokatoka mo totatou ʼu tehina mokā ʼe tonu ke tou fai ia te faʼahi ʼaia.

²² Ko te tauhi ʼaē ʼe tali e Sehova ʼe tonu ke tou tokaga ki te hahaʼi. (Mko. 12:31) ʼI te ʼalatike ʼaē kā hoa mai, ʼe tou vakaʼi ai anai te tahi ʼu palalau neʼe fai e Sesu ʼi te Akonaki ʼo te Moʼuga ʼe tokoni mai anai ke tou haga fai ia te meʼa ʼaē ʼe lelei ki te hahaʼi. Kae ʼi tatatou kua ʼosi metitāsioʼi te ʼu puani ʼaē neʼe tou talanoa kiai ʼi te akonaki maʼuhiga ʼa Sesu, ʼe lagi tou feʼekeʼaki anai: ‘Peʼe feafeaʼi tatatou aga ki te hahaʼi?’

[Nota]

ʼE Kotou Tali Feafeaʼi Anai?

• Koteā te fakaʼuhiga ʼo he tahi ʼe agamalū?

• He koʼē ʼe fiafia ‘ia nātou ʼaē ʼe manavaʼofa’?

• ʼE feafeaʼi hatatou fakamū totatou mālama?

• He koʼē ʼe tonu ke tou foimo ‘fakatokatoka vave mo hota tehina’?

[ʼU fehuʼi ʼo te ako]

[Paki ʼo te pasina 12]

Kotou faiga mālohi ke kotou fakatokatoka mo tokotou tehina