Te ʼu Fehuʼi ʼa Te Kau Lautohi

Neʼe ʼui e te ʼapositolo ko Paulo ‘ ʼe haofaki anai ia Iselaele kātoa.’ (Loma 11:26) Ko tona fakaʼuhiga koa ʼi he tahi lakaga ʼe tafoki anai ia te kau Sutea fuli ki te Lotu Fakakilisitiano?

Kailoa ia, ʼe mole ko te fakaʼuhiga ʼaia ʼa te ʼu palalau ʼa Paulo. ʼI tonatou ʼuhiga puleʼaga, neʼe fakafisi ia te hōloga ʼo Apalahamo kiā Sesu ʼaē ko te Mēsia. Pea ʼi te ʼu taʼu ki muli age ʼi te ʼosi mate ʼa Sesu, neʼe mahino lelei mai neʼe mole tafoki fuli ia te kau Sutea ki te Lotu Fakakilisitiano. Kae neʼe moʼoni aipē ia te fakamatala ʼa Paulo ʼaē ‘ ʼe haofaki anai ia Iselaele kātoa.’ ʼO feafeaʼi?

Neʼe ʼui fēnei e Sesu ki te kau takitaki lotu Sutea ʼo tona temi: “Ko te puleʼaga ʼo te ʼAtua ʼe toʼo anai iā koutou pea ʼe foaki anai ia ki he hahaʼi kā natou fakatupu anai hona ʼu fua.” (Mat. 21:43) Mai tona ʼaluʼaga ʼaē neʼe kua lītuʼa ia te puleʼaga kātoa ʼo Iselaele kiā Sesu, neʼe maliu ia Sehova ki he puleʼaga foʼou, ki he puleʼaga fakalaumālie. Neʼe fakahigoaʼi e Paulo ia te puleʼaga ʼaia ko “te Iselaele ʼo te ʼAtua.”—Kal. 6:16.

ʼI te tahi ʼu koga tohi ʼo te ʼu Tohi Fakakeleka, ʼe fakamoʼoni ai ko “te Iselaele ʼo te ʼAtua” ʼe faʼufaʼu e te toko 144 000 kau Kilisitiano neʼe fakanofo ʼaki te laumālie. (Loma 8:15-17; Fakh. 7:4) ʼI te kūtuga ʼaia ʼe kau ai ia te ʼu hahaʼi ʼe mole Sutea ʼaē ʼe fakamoʼoni kiai ia Fakahā 5:9, 10, ʼaē ʼe fakahā ai ko te kau Kilisitiano fakanofo ʼe natou haʼu “mai te ʼu telepī kehekehe, mo te ʼu lea kehekehe, mo te ʼu hahaʼi kehekehe pea mo te ʼu puleʼaga kehekehe.” Neʼe filifili tāfito ia nātou ʼo te Iselaele fakalaumālie ke natou liliu “ko he puleʼaga pea mo he ʼu pelepitelō . . . , pea ʼe natou pule fakahau anai ki te kele.” Logolā kua lītuʼa ia Sehova kiā Iselaele ʼi tona ʼuhiga puleʼaga ʼaē neʼe ina fili, kae neʼe feala pē ki te hahaʼi takitokotahi ke natou liliu mai ʼo fakatokatoka pea mo ia. Ohagē ko te kau ʼapositolo pea mo te tokolahi ʼo ʼihi ʼi te kau ʼuluaki Kilisitiano. ʼE mahino ia, ko te kau Sutea ʼaia, pea mo te hahaʼi fuli ʼaē, neʼe tonu ke totogi nātou ʼaki ia te taʼataʼa ʼo Sesu Kilisito.—1 Tim. 2:5, 6; Hep. 2:9; 1 Pet. 1:17-19.

Logolā ko te tokolahi ʼo te kau Sutea ʼo te ʼuluaki sēkulō neʼe mole kei natou maʼu te faigamālie ʼaē ke natou liliu ʼo kaugā pule mo Sesu, kae neʼe mole fetogi ai ia te fakatuʼutuʼu ʼa te ʼAtua. ʼE mole feala anai ke tāʼofi ia te fakatuʼutuʼu ʼaia ʼa te ʼAtua, koteʼuhi neʼe ʼui e Sehova ʼaki ia tana polofetā: “ ʼE fēia anai taku folafola ʼaē ʼe mavae atu ʼi toku gutu. ʼE mole toe liliu mai anai kiā te au kae mole hona ʼu fua, kae ʼe mahino papau ia ʼe ina fai anai te meʼa ʼaē kua au leleiʼia, pea ʼe lava lelei anai te meʼa ʼaē neʼe au fekauʼi kiai.”—Isa. 55:11.

ʼE moʼoni te faʼahi ʼaia ʼo ʼuhiga mo te fakatuʼutuʼu ʼa te ʼAtua ke ina fakanofo ia te toko 144 000 ʼu kaugā pule ke natou pule mo tona ʼAlo ʼi te lagi. ʼE fakahā lelei ʼi te Tohi-Tapu ko te finegalo ʼo te ʼAtua ki te kātoa ʼo te kau fakanofo ʼe ko te 144 000 pē. ʼE mole feala anai ke tō noa!—Fakh. 14:1-5.

Koia lā ʼaē, ʼi te temi ʼaē neʼe tohi ai e Paulo ‘ ʼe haofaki anai ia Iselaele kātoa,’ neʼe mole ina fakakikite ʼe tafoki fuli anai te kau Sutea ki te Lotu Fakakilisitiano. Kae neʼe fakaʼuhiga tana ʼu palalau, ko te fakatuʼutuʼu ʼa te ʼAtua ke ʼi ai he toko 144 000 kau Iselaele fakalaumālie ʼe kaugā pule anai mo tona ʼAlo, ia Sesu Kilisito ʼi te lagi, ʼe fakahoko anai ia. Kua fakakatofa iia e te ‘Atua, ko te “Iselaele kātoa”—ʼe haofaki anai nātou, pea ki muli age ʼe natou pule anai ʼi tonatou ʼuhiga hau pea mo pelepitelō ʼi te Puleʼaga Fakamēsia.—Efe. 2:8.