ʼE Fakapelepeleʼi e Sehova Tana Kau Kaugana ʼAē Kua Mātutuʼa

“ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe kotou fakahā ʼo ʼuhiga mo tona huafa.”—HEP. 6:10.

1, 2. (a) Koteā ʼaē ʼe lagi kotou manatuʼi ʼi takotou sio ʼaē ki he tahi kua ʼulu hina? (b) ʼE feafeaʼi kiā mata ʼo Sehova te kau Kilisitiano ʼaē kua mātutuʼa?

 KĀ KOTOU sisio ki te hahaʼi mātutuʼa ʼi te kōkelekāsio mo tonatou ʼu ʼulu hihina, ʼe kotou manatuʼi koa ia he fakamatala ʼe tuʼu ʼi te Tohi-Tapu, ʼi te tohi ʼa Taniela? ʼI te meʼa neʼe Ina fakahā age kiā Taniela, neʼe fakatātā e Sehova ʼAtua ia ia totonu ki he tahi ʼe ʼulu hina. Neʼe tohi fēnei e Taniela: “Neʼe au haga sioʼi ʼo aʼu ki te temi ʼaē neʼe fakatokatoka ai te ʼu hekaʼaga hau pea neʼe heka te Matuʼa ʼo te ʼu ʼAho. Ko tona teu neʼe hihina ohagē ko te nive, pea ko tona fuluʼi ʼulu neʼe hagē ko he fuluʼi ʼakeno maʼa.”—Tan. 7:9.

² ʼI te agamāhani, ko te fuluʼi ʼakeno ʼe lanu hina. Koia ko te ʼulu hina pea mo te higoa “Matuʼa ʼo Te ʼu ʼAho” ʼe fakatokagaʼi mai te lahi ʼo te ʼu taʼu pea mo te poto ʼo te ʼAtua, ʼo tuha ai mo ia ke tou fakaʼapaʼapa lahi kiā te ia. ʼE feafeaʼi kiā mata ʼo Sehova, te Matuʼa ʼo Te ʼu ʼAho, te ʼu tagata mo fafine agatonu ʼaē kua mātutuʼa? ʼE ʼui ʼi te Folafola ʼa te ʼAtua “ko te ʼu ʼulu hina ʼe ko he kolona matalelei mokā ʼe maʼu ia nātou ʼi te ala ʼo te faitotonu.” (Taag. 16:31) ʼEī, kapau kua ʼulu hina he Kilisitiano agatonu, ʼe hā ai ia tona fotufotuʼa tagata, pea ʼe ko he meʼa matalelei ia kiā mata ʼo te ʼAtua. ʼE kotou maʼu koa ia te manatu ʼa Sehova ʼo ʼuhiga mo tokotou ʼu tehina mo tuagaʼane ʼaē kua mātutuʼa?

He Koʼē ʼe Natou Maʼuhiga ʼAupitō?

 3. He koʼē ʼe maʼuhiga ʼaupitō kiā tātou ia te ʼu tehina mo tuagaʼane ʼaē kua mātutuʼa?

³ ʼI te kau kaugana ʼofainaʼi ʼaia ʼa te ʼAtua ʼaē kua mātutuʼa, ʼe kau ai nātou ʼaē ʼo te Kolesi Pule ʼa te kau Fakamoʼoni ʼa Sehova, te kau taupau feʼoloʼaki ʼaē kei lolotoga gāue nei pea mo nātou ʼaē neʼe gāue ʼi te temi muʼa, mo te kau pioniē faʼafai, pea mo te kau fai fakamafola ʼo te Puleʼaga kua fotufotuʼa, te ʼu tehina mo tuagaʼane ʼaia ʼe natou tauhi agatonu ʼi tatatou ʼu kōkelekāsio. ʼE lagi kotou ʼiloʼi ʼihi neʼe faʼafai ʼi te fakamafola ʼo te logo lelei lolotoga ni ʼu taʼu pea ʼaki tanatou faʼifaʼitaki lelei neʼe natou fakalotomālohiʼi te kau tūpulaga pea mo tokoni kiā nātou ke fetogi tonatou maʼuli. Ko ʼihi ʼu tehina mo tuagaʼane mātutuʼa neʼe natou fakahoko tonatou ʼu maʼua mamafa pea mo natou kātakiʼi ia te fakataga ʼuhi ko te logo lelei. Ko Sehova pea mo “te tagata kaugana agatonu mo poto” ʼe natou fakafetaʼi lahi ki tanatou tokoni lahi ʼaia ʼi te temi muʼa pea mo te temi nei ki te gāue ʼo te Puleʼaga.—Mat. 24:45.

 4. He koʼē ʼe tonu ke tou fakaʼapaʼapa ki te kau Kilisitiano ʼaē kua mātutuʼa pea mo faikole maʼa nātou?

⁴ ʼE tuha mo te hahaʼi mātutuʼa ʼaia ke fakafetaʼi pea mo fakaʼapaʼapaʼi nātou e ihi kaugana ʼa Sehova ʼAtua. ʼI tona fakahagatonu, ko te Lao ʼa te ʼAtua ʼaē neʼe foaki kiā Moisese ʼe ina fakapipiki ki te manavasiʼi kiā Sehova ia te fakamaʼuhigaʼi pea mo te fakaʼapaʼapaʼi ʼo nātou kua mātutuʼa. (Lev. 19:32) ʼE tonu ke tou faikole tuʼumaʼu maʼa te hahaʼi agatonu ʼaia pea mo fakamālo ki te ʼAtua ʼo ʼuhiga mo tanatou ʼu gāue kinakina ʼaki te ʼofa. Ko te ʼapositolo ko Paulo neʼe faikole maʼa tana kau kaugā gāue, nātou tūpulaga pea mo nātou mātutuʼa.—Lau ia 1 Tesalonika 1:2, 3.

 5. ʼE feala ke fua lelei feafeaʼi kiā tātou ia tatatou fakatahitahi mo te kau ʼatolasio ʼa Sehova ʼaē kua mātutuʼa?

⁵ Tahi ʼaē meʼa, ʼe feala ke fua lelei ki te kōkelekāsio kātoa ia te fakatahitahi mo te kau Kilisitiano ʼaē kua mātutuʼa. ʼAki te ako, te fakasiosio lelei, pea mo te kua māhani ʼi te maʼuli, ko te kau ʼatolasio agatonu ʼa Sehova ʼaē kua mātutuʼa ʼe natou maʼu he toe ʼatamai mālama ʼe maʼuhiga. Neʼe natou ako te faʼa kātaki pea mo natou lotomahino, pea neʼe natou fiafia lahi ʼi tanatou akoʼi age ki  te tahi taʼiake ia te ʼu meʼa ʼaē neʼe natou ʼiloʼi. (Pes. 71:18) Kau tūpulaga, kotou aga fakapotopoto pea mo kotou fakaʼaogaʼi lahi ia te toe poto lahi ʼaia ohagē ko hakotou ʼohu vai ʼi he vai keli loloto.—Taag. 20:5.

 6. ʼE lava feafeaʼi hakotou fakahā ki te hahaʼi mātutuʼa tonatou maʼuhiga ʼaē kiā koutou?

⁶ ʼE kotou tala koa ki te hahaʼi mātutuʼa ʼe kotou ʼofa iā nātou ohagē ko te ʼofa ʼaē ʼa Sehova kiā nātou? Ko te meʼa ʼaē ʼe feala ke kotou fai, ko hakotou ʼui age tokotou ʼofa lahi ʼaē kiā nātou, ʼi tanatou nonofo agatonu pea mo takotou fakamaʼuhigaʼi ʼaē ʼo tanatou ʼu manatu. Tahi ʼaē meʼa, ʼi takotou mulimuli ki te ʼu tokoni ʼaē ʼe natou foaki atu, ʼe kotou fakahā ai ʼe kotou fakaʼapaʼapa moʼoni kiā nātou. Tokolahi te kau Kilisitiano kua mātutuʼa ʼe natou manatuʼi ia te tokoni poto neʼe fai age kiā nātou e te hahaʼi mātutuʼa neʼe agatonu pea mo tona ʼu fua lelei kiā nātou ʼi tanatou mulimuli kiai ʼi tonatou maʼuli kātoa. a

Tou Fakahā Totatou ʼOfa, ʼo Tou Tokoni Kiā Nātou

 7. Ko ai ʼaē ʼe ʼuluaki fakamaʼua ki ai e Sehova ke tokaga kiā nātou ʼaē kua mātutuʼa?

⁷ ʼE ʼuluaki fakamaʼua mai e te ʼAtua ki te ʼu fāmili ʼo nātou ʼaē kua mātutuʼa, ke natou tōkakaga kiā nātou. (Lau ia 1 Timoteo 5:4, 8.) ʼE fiafia ia Sehova mokā fakahoko e te ʼu fāmili tonatou maʼua ki tonatou ʼu kāiga ʼaē kua mātutuʼa pea mo natou fakahā ai ʼe natou tōkakaga ki te hahaʼi kua mātutuʼa ohagē pē ko tona fai ʼe ia totonu. ʼE tokoni te ʼAtua ki te ʼu fāmili ʼaia pea mo ina tapuakinaʼi nātou ʼi tanatou ʼu faiga pea mo te ʼu sākilifisio fuli ʼaē ʼe natou fai. b

 8. He koʼē ʼe tonu ke fakahā e te ʼu kōkelekāsio tanatou tuʼania ʼo ʼuhiga mo te kau Kilisitiano ʼaē kua mātutuʼa?

⁸ ʼE toe fiafia ia Sehova mokā ʼe tokoni te ʼu kōkelekāsio ki te hahaʼi kua mātutuʼa ʼaē ʼe nonofo ʼi te faigataʼaʼia kae mole honatou ʼu fāmili ʼi te moʼoni peʼe mole ʼi ai he tahi ʼe fia tokaga kiā nātou. (1 Tim. 5:3, 5, 9, 10) ʼE fakahā ai e te ʼu kōkelekāsio ʼe natou ‘kaugā mamahi, mo ʼofa ki te ʼu tehina, pea mo fonu ʼi te manavaʼofa’ maʼa te hahaʼi mātutuʼa. (1 Pet. 3:8) Neʼe fakatā lelei e Paulo ia tanatou tuʼania ʼaē kiā nātou kua mātutuʼa ʼi te kōkelekāsio, ʼi tana ʼui ʼaē kapau ko he koga ʼo te sino ʼe mamahi, pea ko “te tahi ʼu kogaʼi sino ʼe mamahi mo ia.” (1 Ko. 12:26) Ko te fakahā ʼo te manavaʼofa, ʼo tou tokoni kiā nātou ʼaē kua mātutuʼa, ʼe tou maʼuliʼi ai te pelesepeto ʼaē ʼe tou maʼu ʼi te tokoni ʼaenī ʼa Paulo: “Kotou kātaki ʼo feʼamoʼaki takotou ʼu kavega, pea ke kotou fakahoko fēia te lao ʼa Kilisito.”—Kal. 6:2.

 9. Koteā te ʼu kavega ʼe feala ke ʼamo e he tahi kua matuʼa?

⁹ Koteā te ʼu kavega ʼaē ʼe ʼamo e te hahaʼi mātutuʼa? Tokolahi ʼe natou gaʼegagaʼe vave. ʼE lagi natou logoʼi, māʼiapē lā mo te fai ʼo he ʼu kihiʼi meʼa, ohagē ko te ʼalu ki te tōketā, te fai ʼo he ʼu pepa, te fakamaʼa ʼo te ʼapi, te fai ʼo te kuka, ʼe mole kei natou lavaʼi. ʼI te agamāhani, ʼi te mole kei lahi ʼo tanatou kai pea mo tanatou ʼinu, ʼe lagi ʼi tanatou manatu ʼe mole kei ʼaoga hanatou kakai mo ʼiʼinu fakalelei. ʼE feala ke toe fēia ʼo ʼuhiga mo tanatou kai ʼi te faʼahi fakalaumālie. ʼI tanatou mole kei sio lelei pea mo logo lelei, ʼe feala ke liliu ʼo faigataʼa ia tanatou lautohi pea mo tanatou fakalogo ki te ʼu polokalama fakalaumālie, pea māʼiapē lā mo te teuteu ʼaē ki te ʼu fono kua liliu ia ko he meʼa fakapiko kiā nātou. Koteā ʼaē ʼe feala ke fai e ʼihi maʼa te hahaʼi mātutuʼa ʼaia?

ʼE Kotou Lava Tokoni Feafeaʼi Kiā Nātou?

10. Koteā ʼaē ʼe feala ke fai e te kau tagata ʼāfea ke maʼu e te hahaʼi mātutuʼa ia te tokoni ʼaē ʼe ʼaoga kiā nātou?

¹⁰ ʼE lahi te ʼu kōkelekāsio ʼe tokaga fakalelei ai ki te hahaʼi ʼaē kua mātutuʼa. Ko te ʼu tehina mo tuagaʼane ʼofa ʼe natou tokoni kiā nātou ki te fai ʼaē ʼo tanatou fakatau, mo tanatou kuka, pea mo fakamaʼa tonatou ʼapi. ʼE natou tokoni ki te hahaʼi mātutuʼa ke natou ako, ke natou tokalelei ki te ʼu fono pea mo kau tuʼumaʼu ki te minisitelio. Ko te kau Fakamoʼoni kei tūpulaga ʼe natou kaugā ʼolo mo nātou pea mo feʼaveʼaki nātou ʼi tanatou ʼu motokā. Kapau ʼe mole feala ki te hahaʼi mātutuʼa ke natou mavae ʼi tonatou ʼu ʼapi, pea ʼe feala pē iō nātou ke natou fakalogo ki te polokalama ʼi te telefoni, peʼe puke te ʼu akonaki maʼa nātou. Kā ʼe feala, ʼe tōkakaga ia te kau tagata ʼāfea ke fai he ʼu  fakatuʼutuʼu moʼo foaki ia te ʼu meʼa ʼaē ʼe ʼaoga kiā nātou kua mātutuʼa ʼi te kōkelekāsio. c

11. Kotou fakamatala pe neʼe tokoni feafeaʼi ia te fāmili ki te tehina kua matuʼa.

¹¹ Ko te kau Kilisitiano takitokotahi ʼe feala ke natou toe tali kāiga pea mo fia foaki. ʼI te ʼosi mate ʼo te ʼohoana ʼo te tehina kua matuʼa, neʼe mole kei feala hana lue ia tona ʼapi, he neʼe tuʼusi te tokoni fakapaʼaga ʼaē neʼe foaki māhani age ki tona ʼohoana. Ko ia pea mo tona ʼohoana neʼe nā ako ia te Tohi-Tapu mo te fāmili—te tamai, mo te faʼē, pea mo te ʼu taʼahine ʼe toko lua, pea neʼe lahi tonatou ʼapi. Neʼe natou foaki age ki te tehina ʼaia ia tona ʼu koga fale e lua ke nofo ai. Lolotoga taʼu e 15, neʼe natou kakai fakatahi, mo kakata pea mo feʼofaniʼaki fakatautēhina. Neʼe ʼaoga lahi ki te ʼu finemui ʼaia te tui ʼaē neʼe maʼu e te tehina pea mo te ʼu meʼa ʼaē neʼe hoko kiā ia ʼi tona maʼuli, pea neʼe fua lelei ki te tehina tana fakatahi fakafiafia ʼaia mo te fāmili. Ko te tehina matuʼa ʼaia neʼe nofo mo nātou ʼo aʼu ki tona mate ʼi tona taʼu 89. ʼE kei fakafetaʼi ia te fāmili ʼaia ki te ʼAtua ʼo ʼuhiga mo te ʼu tuʼuga tapuakina ʼaē neʼe natou maʼu ʼi tanatou fakatahi mo te matuʼa ʼaia. Neʼe mole natou ‘hala ʼi tonatou fakapale’ he neʼe natou tokoni ki te tisipulo ʼaia ʼa Sesu Kilisito.—Mat. 10:42. d

12. Koteā ʼaē ʼe feala ke kotou fai moʼo fakahā ia tokotou ʼofa ki te ʼu tehina mo tuagaʼane kua mātutuʼa?

¹² ʼE lagi mole feala ke kotou tokoni ki he tehina peʼe ko he tuagaʼane kua matuʼa ohagē ko tona fai e te fāmili ʼaia, kae ʼe lagi feala ke kotou tokoni ki te hahaʼi mātutuʼa ke natou ʼomai ki te ʼu fono pea mo kau ki te minisitelio. ʼE toe feala ke kotou fakaafe ia nātou ki tokotou loto fale pea mokā kotou ʼolo ʼo mālōlō. ʼE feala ke kotou ʼaʼahi nātou, tāfito lā mokā natou māhahaki peʼe tonu ke natou nonofo ʼi fale. Tahi ʼaē meʼa, ʼe feala pē hakotou felōgoi mo nātou ohagē ko ni hahaʼi kua fotufotuʼa, pea ʼe tonu ke fēia takotou aga kiā nātou. Kapau kei natou ʼatamai lelei, pea ʼe tonu ke kotou fakalavelave age pe koteā ia tanatou manatu ki te ʼu tonu fuli ʼaē ʼe fai ʼo ʼuhiga mo nātou. Māʼiapē lā mo nātou ʼaē ʼe mole kei ʼatamai lelei, ʼe feala ke natou logoʼi peʼe kotou aga fakaʼapaʼapa kiā nātou.

ʼE Mole Galoʼi Anai e Sehova Takotou Gāue

13. He koʼē ʼe maʼuhiga ke tokagaʼi ia te ʼu manatu ʼa te kau Kilisitiano ʼaē kua mātutuʼa?

¹³ ʼE maʼuhiga ke tou tokagaʼi ia te ʼu manatu ʼa te hahaʼi mātutuʼa. ʼI te agamāhani, ʼe lotomamahi ia te hahaʼi mātutuʼa ʼi tanatou mole kei lava fai ia meʼa fuli ʼaē neʼe natou lavaʼi ʼi tonatou temi tūpulaga pea mo mālohi ai. Ohagē lā, ko te tuagaʼane ʼaē neʼe faʼafai ʼi tana tauhi kiā Sehova iā taʼu e 50 pea neʼe pioniē kātoa, neʼe mahaki leva pea neʼe faigataʼa ʼaupitō ai kiā ia hana kau ki te ʼu fono. Kā ina fakatatau ia tana gāue ʼaē neʼe ina fai ʼi te temi muʼa pea mo ʼaē ʼe mole kei ina lavaʼi ʼi te temi nei, neʼe kamata tagi ai. Neʼe tagi ʼo ina ʼui fēnei: “ ʼE mole he ʼaoga ʼo te ʼu meʼa ʼaē ʼe au fai.”

14. Koteā te fakalotomālohi ʼe feala ke maʼu e te kau kaugana mātutuʼa ʼa Sehova mai te ʼu pesalemo?

¹⁴ Kapau kua kotou mātutuʼa, neʼe kua kotou lotomamahi fēia koa? Peʼe kotou manatu ʼi ʼihi temi kua liʼakina koutou e Sehova? Neʼe lagi manatu fēia ia te tagata fai pesalemo ʼi tona temi matuʼa, koteʼuhi neʼe kolekole fēnei kiā Sehova: “ ʼAua naʼa ke fakafisi kiā te au ʼi toku temi matuʼa; ʼi te temi ʼaē ʼe puli ai toku mālohi, ʼaua naʼa ke tuku au. . . . ʼO aʼu ki te temi matuʼa pea mo te ʼulu hina, Ê ʼAtua, ʼaua naʼa ke liʼaki au.” (Pes. 71:9, 18) ʼE mahino ia, neʼe mole liʼaki e Sehova ia te tagata fai pesalemo ʼaia, pea ʼe mole Ina liʼaki anai koutou. ʼI te tahi pesalemo, neʼe fakahā e Tavite tana falala ʼaē ki te tokoni age ʼa te ʼAtua. (Lau ia Pesalemo 68:19.) ʼE kotou lava tui papau kapau ʼe kotou agatonu ʼi tokotou temi matuʼa, ko Sehova ʼe nofo mo koutou pea ʼe tokoni atu anai ʼi te ʼaho fuli pē.

15. Koteā ʼaē kā tokoni ki te hahaʼi mātutuʼa ke natou maʼu he ʼu manatu ʼe lelei?

¹⁵ Kau Fakamoʼoni ʼa Sehova ʼaē kua mātutuʼa, ko te ʼu meʼa fuli ʼaē neʼe kotou fai pea mo kotou fai ʼi te temi nei ki te kolōlia ʼo te ʼAtua ʼe mole galo kiā te ia ʼi he temi. ʼE ʼui fēnei ʼi te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe kotou fakahā ʼo ʼuhiga mo tona huafa.” (Hep. 6:10) Koia, kotou tekeʼi ia te ʼu manatu ʼaē ʼe mole lelei, ʼuhi ʼaē ʼi takotou kua mātutuʼa, ʼe kotou manatu anai ʼe mole kei  fakaʼaogaʼi koutou e Sehova. Kotou faigaʼi ke kotou fetogi ia te ʼu manatu ʼaē ʼe fakatupu lotomamahi ʼaki he ʼu manatu fakafiafia. Kotou fiafia ʼo ʼuhiga mo tokotou ʼu tapuakina pea mo te ʼamanaki ʼaē kā kotou maʼu ʼi te temi kā haʼu! ʼE tou maʼu “he kā haʼu pea mo he ʼamanaki” ʼe lelei tokotahi, pea ʼe ko he ʼu fakapapau ʼaia mai totatou Tupuʼaga. (Sel. 29:11, 12; Gāue 17:31; 1 Tim. 6:19) Kotou fakakaukauʼi ia te ʼamanaki ʼaē ʼe kotou maʼu, kotou puipui tokotou loto pea mo takotou ʼu manatu ke tatau mo te temi ʼaē neʼe kei kotou tūpulaga ai, pea ʼaua naʼa kotou meʼa noaʼi ia te maʼuhiga ʼaē ki te kōkelekāsio ia takotou kau ʼaē ki te ʼu fono! e

16. He koʼē neʼe manatu e te tehina kua matuʼa ʼe tonu ke tuku tana gāue ʼi tona ʼuhiga tagata ʼāfea, kae neʼe fakalotomālohiʼi feafeaʼi ia ia e tona ʼu tehina tagata ʼāfea?

¹⁶ Tou talanoa age muʼa ʼo ʼuhiga mo Johan, ʼaē ʼe taʼu 80 pea ʼe tokaga ʼi te temi kātoa ki tona ʼohoana agatonu ko Sannie, ʼaē kua vaivai ʼi te temi nei. f ʼE fesuisuiʼaki te ʼu tuagaʼane moʼo nonofo mo Sannie ke feala ai kiā Johan ke kau ki te ʼu fono pea mo te minisitelio. Kae mole heʼeki faʼa fualoa, neʼe lotomamahi ʼaupitō ia Johan pea neʼe kamata fakakaukau ke ina tuku ia tana gāue ʼi tona ʼuhiga tagata ʼāfea ʼi te kōkelekāsio. Neʼe ina ʼui fēnei kae lolotoga tagi: “Koteā te ʼaoga ʼo taku tagata ʼāfea? ʼE mole kei ʼi ai hoku ʼaoga ʼi te kōkelekāsio.” Ko tona ʼu tehina tagata ʼāfea neʼe natou fakahā age ia te kei maʼuhiga ʼaē ki te kōkelekāsio ia tana kua fakapotopoto ʼaē ʼi te maʼuli pea mo tana fakasiosio poto. Neʼe natou fakalotomālohiʼi ia ia ke hoko atu tana gāue ko he tagata ʼāfea, logolā tana kua vaivai. ʼI tana toe maʼu ia te toe mālohi lahi ʼaki te ʼu fakalotomālohi aia, ʼe kei gāue nei Johan ko he tagata ʼāfea, ʼaē ko he tapuakina ki te kōkelekāsio.

ʼE Tokaga Moʼoni Ia Sehova Kiā Nātou

17. ʼAki te ʼu vaega Fakatohi-tapu, koteā ʼaē ʼe feala ke ʼiloʼi papau e te kau Kilisitiano mātutuʼa?

¹⁷ ʼE fakahā lelei ʼi te Tohi-Tapu ʼe feala pē ki te hahaʼi mātutuʼa ke natou maʼu tuʼumaʼu he ʼu lelei ʼi te faʼahi fakalaumālie logolā te ʼu fihifihia ʼaē ʼe felāveʼi mo nātou ʼi tonatou temi matuʼa. Neʼe tala fēnei e te tagata fai pesalemo: “Ko nātou ʼaia kua tō ʼi te ʼapi ʼo Sehova . . . ʼe natou toe tuputupu anai ʼi tonatou temi matuʼa, ʼe natou haga gako anai pea mo mālohi.” (Pes. 92:13, 14) Ko te ʼapositolo ko Paulo, ʼaē neʼe tau mo te mahaki, ‘neʼe mole fakafisi ia, tatau aipē peʼe ko tona ʼuhigaʼi tagata ʼaē ʼi tuʼa neʼe fakaauau sino.’—Lau ia 2 Kolonito 4:16-18.

18. He koʼē ʼe ʼaoga ke tokoni ʼihi ki te ʼu tehina mo tuagaʼane kua mātutuʼa pea mo nātou ʼaē ʼe natou taupau te hahaʼi mātutuʼa?

¹⁸ ʼE lahi te ʼu faʼifaʼitaki ʼi totatou temi ʼe fakamoʼoni ai ko te hahaʼi mātutuʼa ʼe feala ke natou “tuputupu.” Kae ʼe feala ke natou lotovaivai ʼuhi ko te mahaki pea mo te ʼu vaivaiʼia ʼo te temi matuʼa, ʼo toe fēia mo nātou ʼaē ʼe tōkakaga pea mo tokoni kiā nātou ʼi tonatou fāmili. Mo nātou ʼaē ʼe tōkakaga ki te hahaʼi mātutuʼa ʼe feala ke natou gaʼegagaʼe. ʼE ko he pilivilēsio pea mo he maʼua ʼo te kōkelekāsio ke natou fakahā ia tonatou ʼofa, ʼo natou tokoni ki te hahaʼi mātutuʼa pea mo nātou ʼaē ʼe natou taupau nātou. (Kal. 6:10) Ko te taʼi tokoni ʼaia ʼe mole gata pē ʼi hatatou ʼui age ki te hahaʼi mātutuʼa ke natou ʼolo pea mo ‘fakamāfana pea mo haga fafaga fakaleleiʼi nātou’ kae mole tou foaki age he tokoni kiā nātou.—Sake 2:15-17.

19. He koʼē ʼe feala ke falala te kau Kilisitiano agatonu ʼaē kua mātutuʼa ki te kā haʼu?

¹⁹ ʼE feala ki he Kilisitiano kua matuʼa ke mole kei tatau tana ʼu gāue, kae logolā te faʼahi ʼaia, ko Sehova ia ʼe mole ina fetogi ia tona ʼofa ki tana kau kaugana ʼaē kua mātutuʼa. Ko te kau Kilisitiano agatonu fuli ʼaia ʼe natou maʼuhiga kiā te ia pea ʼe mole ina liʼakina anai nātou ʼi he temi. (Pes. 37:28; Isa. 46:4) Ko Sehova ʼe tokoni anai pea mo takitaki anai nātou ʼi tonatou temi matuʼa.—Pes. 48:14.

[ʼU nota]

ʼE Kotou Tali Feafeaʼi Anai?

• He koʼē ʼe maʼuhiga kiā koutou ia te kau Kilisitiano agatonu ʼaē kua mātutuʼa?

• ʼE feafeaʼi hatatou fakahā ia totatou ʼofa ki te ʼu tehina mo tuagaʼane ʼaē kua mātutuʼa?

• Koteā ʼaē kā tokoni ki te kau kaugana ʼa Sehova ʼaē kua mātutuʼa ke natou maʼu he ʼu manatu ʼe lelei?

[ʼU fehuʼi ʼo te ako]