Ko Sehova ʼe Mole Ina Liʼakina Anai Tana Hahaʼi Agatonu

“[Ko Sehova] ʼe mole ina liʼakina anai tana hahaʼi agatonu. Ki he ʼu temi ʼe mole ʼiloʼi hona gataʼaga, ʼe taupau moʼoni anai nātou.”—PES. 37:28.

1, 2. (a) Koteā te ʼu fetogi neʼe hoko ʼi te hogofulu sēkulō ʼi muʼa ʼo totatou temi, ʼo tupu ai he ʼahiʼahiʼi ʼo te agatonu ʼa te ʼu kaugana ʼa te ʼAtua? (b) Ko te ʼu ʼaluʼaga fea e tolu neʼe puipui ai e Sehova ia tana hahaʼi agatonu?

 ʼI TE hogofulu sēkulō ʼi muʼa ʼo totatou temi, neʼe ko he temi ʼaia ki te ʼu kaugana ʼa Sehova ke natou fai ia he tonu maʼuhiga. Neʼe meimei pē ke hoko ia te tau fakasivile kae neʼe mole hoko he neʼe fakagafua age ki te ʼu telepī ʼaē neʼe maveuveu ʼo te potu noleto ʼo Iselaele ke natou faʼifaʼitaliha. Ko Selopoame ia tonatou hau ʼaē neʼe natou hoki fakanofo atu, neʼe ina foimo fakamālohiʼi tona ʼuhiga pule, ʼo ina fakatuʼu ia te lotu Fakapuleʼaga foʼou. Neʼe ina fakamaʼua ki tana hahaʼi fakalogo ke natou tauhi ʼāteaina age pē kiā te ia. Koteā ʼaē kā fai anai e te ʼu kaugana agatonu ʼa Sehova? ʼE natou agatonu anai koa ki te ʼAtua ʼaē ʼe natou tauhi ki ai? Ko te toko lauʼi afe ʼe natou fai te faʼahi ʼaia, pea neʼe tokagaʼi e Sehova ia nātou heʼe natou nonofo agatonu kiā te ia.—1 Hau 12:1-33; 2 Fkma. 11:13, 14.

² ʼI totatou temi, neʼe toe ʼahiʼahiʼi foki ia te agatonu ʼa te ʼu kaugana ʼa te ʼAtua. ʼE fai te fakatokaga ʼaenī ʼi te Tohi-Tapu: “Kotou nonofo ʼalaʼala, kotou nonofo tōkakaga. Ko tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.” Kae ʼe feala koa hatatou “fakafeagai kiā ia, ʼo [tou] mālohi ʼi te tui”? (1 Pet. 5:8, 9) Tou vakaʼi age muʼa he ʼu meʼa neʼe hoko ʼi te temi ʼaē neʼe fakanofo ai te Hau ko Selopoame ʼi te taʼu 997 ʼi muʼa ʼo totatou temi pea mo tou fakatokagaʼi ia te ako ʼaē ʼe tou maʼu mai ai. Lolotoga te ʼu temi faigataʼa ʼaia, neʼe gaohi koviʼi ia te ʼu kaugana agatonu ʼa Sehova, pea neʼe natou toe tau mo te ʼu fakahala ʼa te kau ʼapositā, kae neʼe natou fakahoko aipē ia tonatou ʼu gāue faigataʼa. ʼI te ʼu ʼaluʼaga fuli ʼaia, neʼe mole situʼa ia Sehova ki tana ʼu kaugana agatonu, pea ʼe toe fēia pē anai mo te temi nei.—Pes. 37:28.

ʼE Mole Liʼakina Anai Nātou e Sehova Mokā Gaohi Koviʼi Nātou

 3. He koʼē neʼe mole fefeka ia te pule ʼa te Hau ko Tavite ʼi tona temi ʼafio?

³ Tou vakaʼi age muʼa ia te ʼu meʼa ʼaē neʼe hoko ʼi te temi ʼaē neʼe fakanofo hau ai ia Selopoame. ʼE ʼui fēnei iā Tāʼaga Lea 29:2: “Kā pule he tahi ʼe agakovi, pea ʼe meo te hahaʼi.” ʼI te temi ʼafio ʼo te Hau ko Tavite ʼi te Iselaele ʼāfea, neʼe mole meo ia te hahaʼi. Neʼe mole ko he tagata haohaoa ia Tavite, kae neʼe nofo agatonu ia ki te ʼAtua pea mo falala kiā te ia. Neʼe mole fefeka ia te pule ʼa Tavite ki te hahaʼi. Neʼe fai e Sehova ia te fuakava mo Tavite, ʼo ʼui fēnei: “ ʼE mahino papau ia ko tou ʼapi pea mo tou puleʼaga ʼe tuʼu mālohi anai ʼi ʼou muʼa ʼo aʼu ki he ʼu temi ʼe mole ʼiloʼi hona gataʼaga; ko tou ʼafioʼaga ʼe liliu anai ʼo tuʼu mālohi ʼo aʼu ki he ʼu temi ʼe mole ʼiloʼi hona gataʼaga.”—2 Sam. 7:16.

 4. Koteā ʼaē neʼe fakalogo kiai ia te ʼu tapuakina ʼaē neʼe maʼu ʼi te temi pule ʼa Salomone?

⁴ ʼI te kamata pule ʼa Salomone ia te foha ʼo Tavite neʼe tokalelei pea mo koloaʼia ia te fenua, ʼo feala pē ke fakatatau ki te maʼuli ʼaē kā maʼu ʼi te ʼAfio Iā Taʼu e Afe ʼa Kilisito Sesu. (Pes. 72:1, 17) Neʼe mole maʼu he tupuʼaga moʼo takuʼaki ai he fakafeagaʼi ʼi te ʼu telepī e 12 ʼo Iselaele. Kae ko te ʼu tapuakina ʼaē neʼe maʼu e Salomone pea mo tana hahaʼi neʼe fakalogo ki te faʼahi maʼuhiga. Neʼe ʼui fēnei age e Sehova kiā Salomone: “Kapau ʼe ke haʼele ʼi taku ʼu fakatotonu, kapau ʼe ke mulimuli ki taku ʼu tonu fakamāu pea kapau ʼe ke taupau lelei taku ʼu folafola fuli ʼo ke haʼele ai, ʼe mahino papau ia ʼe au fakahoko anai taku folafola ʼo ʼuhiga mo koe, folafola ʼaē neʼe au tala kiā Tavite tau tamai; pea ʼe au nofo moʼoni anai ʼi te lotolotoiga ʼo te ʼu foha ʼo Iselaele, pea ʼe mole au mavae anai ʼi taku hahaʼi ko Iselaele.”—1 Hau 6:11-13.

5, 6. Koteā ʼaē neʼe hoko ʼuhi ko te talagataʼa ʼaē ʼa Salomone ki te ʼAtua?

⁵ ʼI tona temi matuʼa, neʼe mole kei agatonu ia  Salomone kiā Sehova pea neʼe kamata lagolago ia ki te tauhi hala. (1 Hau 11:4-6) ʼAki te temi, neʼe mole kei fakalogo ia Salomone ki te ʼu lao ʼa Sehova pea neʼe kamata tuputupu ai leva ia tana gaohi koviʼi ia te hahaʼi. Pea ʼi te lahi fau ʼaē ʼo te fefeka ʼo tana takitaki, logolā tana kua mate kae neʼe kei hoko atu pē ia te meo ʼa te hahaʼi ʼo ʼuhiga mo ia ki tona foha ko Lopoame ʼaē neʼe hoa mai ki ai ʼi te tuʼulaga hau, pea mo natou tagi ki ai ke ina fakamaʼamaʼa tanatou ʼu gāue. (1 Hau 12:4) Koteā ʼaē neʼe fai e Sehova ʼi te kua heʼe agatonu ʼa Salomone?

⁶ ʼE ʼui fēnei ʼi te Tohi-Tapu: “Neʼe ʼita Sehova kiā Salomone, heʼe ko tona loto neʼe kua mamaʼo mai . . . te ʼAtua ʼo Iselaele, ʼaē neʼe ʼasi tuʼa lua age kiā te ia.” Neʼe ʼui fēnei e Sehova kiā Salomone: “ ʼUhi . . . neʼe mole ke taupau ia taku fuakava pea mo taku ʼu fakatotonu ʼaē neʼe au fakamaʼua atu, ʼe au toʼo moʼoni anai mai iā koe te puleʼaga ʼo au foaki age anai ki tau kaugana.”—1 Hau 11:9-11.

 7. Logolā neʼe kua situʼa ia te ʼAtua kiā Salomone, kae neʼe tokaga feafeaʼi ia Sehova ki Tana hahaʼi agatonu?

⁷ Pea neʼe fekauʼi leva e Sehova ia te polofetā ko Aisa ke ʼalu ʼo fakanofo ia he tagata moʼo haofaki ʼo tana hahaʼi. Ko te tagata ʼaia neʼe ko Selopoame, ko he tagata fakapotopoto neʼe gāue ʼi te puleʼaga ʼo Salomone. Logolā te agatonu ʼaē ʼa Sehova ki te fuakava ʼo te Puleʼaga ʼaē neʼe ina fai mo Tavite, kae neʼe Ina tali ke vaheʼi lua ia te puleʼaga ʼo te ʼu telepī e 12. Ko telepī e hogofulu neʼe foaki age kiā Selopoame; pea ko telepī e lua neʼe nofo mo te hōloga ʼo te fāmili ʼo Tavite, ʼaē kua fakafofoga nei e te Hau ko Lopoame. (1 Hau 11:29-37; 12:16, 17, 21) Neʼe ʼui fēnei age e Sehova kiā Selopoame: “Koʼenī ia te meʼa kā hoko anai: kapau ʼe ke fakalogo ki te ʼu meʼa fuli ʼaē kā au fakatotonu atu, pea ʼe ke haʼele ʼi toku ʼu ala pea kapau ʼe ke fai anai te meʼa ʼaē ʼe totonu ki ʼoku mata ʼo taupau ia taku ʼu lao pea mo taku ʼu fakatotonu, ohagē ko Tavite taku kaugana, pea ʼe mahino papau anai ʼe au nofo anai mo koe, pea ʼe au laga anai maʼa koe ia he fale ʼe tologa, ohagē ko ʼaē neʼe au laga maʼa Tavite, pea ʼe au foaki moʼoni atu anai ia Iselaele.” (1 Hau 11:38) Neʼe lagolago ia Sehova ki tana hahaʼi pea mo foaki age he faigamālie ke natou maʼu ai he fīmālie mai tonatou ʼu mamahi.

 8. Ko te ʼu fihifihia fea ʼaē ʼe fakamamahi ai te hahaʼi ʼa te ʼAtua iā ʼaho nei?

⁸ Kua mālohi ʼi totatou temi ia te agamālohi pea mo te heʼe faitotonu. ʼE ʼui fēnei iā Tagata Tānaki 8:9: “Ko te tagata ʼe ina puleʼi te tagata ki tona malaʼia.” ʼE feala ki te maʼuli ʼo te hahaʼi ke faigataʼa ʼaupitō ʼi te faʼahi fakaekonomika ʼuhi ko te hahaʼi faifakatau mānumānu pea mo te kau takitaki aga fakakākā. ʼI te agamāhani, ʼe mole tuku mai ia he faʼifaʼitaki lelei ʼo ʼuhiga mo te aga e te kau takitaki ʼo te puleʼaga, mo natou ʼaē ʼe natou takitaki gāue pea mo te kau takitaki lotu. Kae ohagē pē ko te tagata faitotonu ko Lote, ko te hahaʼi agatonu ʼa te ʼAtua ʼo te temi nei ʼe natou “lotomamahi ʼaupitō ʼi te aga fakalialia ʼa te hahaʼi ʼaē ʼe natou meʼa noaʼi te lao.” (2 Pet. 2:7) Tahi ʼaē, logolā tatatou faiga ʼaē ke tou mulimuli ki te ʼu lēkula ʼa te ʼAtua, kae  ʼi te agamāhani ʼe ko tātou tāfito ʼaē ʼe fakatagaʼi e te kau takitaki fiatuʼu.—2 Tim. 3:1-5, 12.

 9. (a) Koteā ʼaē neʼe kua fai e Sehova moʼo haofaki ia tana hahaʼi? (b) He koʼē ʼe tou lava falala ko Sesu ʼe agatonu tuʼumaʼu aipē anai ki te ʼAtua?

⁹ Kae ʼe tou fakatui ki te moʼoni ʼaenī: Ko Sehova ʼe mole ina liʼakina anai tana hahaʼi agatonu! Kotou fakakaukauʼi age muʼa ia te ʼu fakatuʼutuʼu ʼaē kua ina fai moʼo fetogi ia te kau takitaki agakovi ʼo te mālama ʼaenī. Ko te Puleʼaga Mesianike ʼa te ʼAtua ʼaē ʼe takitaki e Kilisito Sesu kua tuʼu ia ʼi selō. Kua ʼafio nei Sesu Kilisito ʼi selō talu mai teitei taʼu e teau. Kua vave pē anai ia tana haofaki kātoa ia nātou ʼaē ʼe manavasiʼi ki te huafa ʼo te ʼAtua. (Lau ia Fakahā 11:15-18.) Neʼe kua fakahā e Sesu ia tana agatonu ki te ʼAtua ʼo aʼu ki tona mate. ʼE mole hagē ia ko Salomone heʼe mole ina fakamamahiʼi anai ʼi he temi ia tana hahaʼi fakalogo.—Hep. 7:26; 1 Pet. 2:6.

10. (a) ʼE feafeaʼi hatatou fakahā ʼe maʼuhiga kiā tātou ia te Puleʼaga ʼo te ʼAtua? (b) Kā tou tau mo he ʼu fihifihia, koteā ʼaē ʼe tou lava falala kiai?

¹⁰ Ko te Puleʼaga ʼo te ʼAtua ʼe moʼoni pea ʼe ina fakagata anai ia te ʼu agakovi fuli pē. Ko tatatou fakalogo ʼe tou foaki kiā Sehova ʼAtua pea mo tona Puleʼaga. ʼE tou fakafeagai ki te mālama heʼe lotu pea mo tou faʼafai ʼo faiga ke tou fai he ʼu gāue ʼe lelei heʼe tou falala kātoa ki te Puleʼaga. (Tito 2:12-14) ʼE tou faiga ke mole ʼulihi tātou e te mālamanei. (2 Pet. 3:14) Logolā te ʼu fihifihia ʼaē ʼe tau nei mo tātou, kae ʼe tou falala ko Sehova ʼe ina puipui anai tātou mokā ʼahiʼahiʼi tatatou tui ʼi te faʼahi fakalaumālie. (Lau ia Pesalemo 97:10.) Tahi ʼaē, ʼe ʼui fēnei mai ia Pesalemo 116:15: “ ʼE maʼuhiga kiā mata ʼo Sehova, ia te mate ʼo tana kau agatonu.” ʼI te maʼuhiga ʼaupitō ʼo te ʼu kaugana ʼa Sehova kiā te ia, ʼe mole ina fakagafua anai ke fakaʼauha nātou ʼi tonatou ʼuhiga kūtuga.

ʼE Mole Liʼakina Anai Nātou e Sehova Mokā ʼe Natou Tau Mo Te ʼu Fakahala ʼa Te Kau ʼApositā

11. Neʼe kamata feafeaʼi ia te heʼe faitotonu ʼa Selopoame?

¹¹ Neʼe feala pē ke maʼuli fīmālie ia te hahaʼi ʼa te ʼAtua ʼi te takitaki ʼa te Hau ko Selopoame. Kae ʼaki tana ʼu gāue, neʼe toe ʼāsili kovi te ʼahiʼahiʼi ʼo tanatou agatonu ʼaē ki te ʼAtua. Logolā ia te kolōlia pea mo te tuʼulaga hau ʼaē neʼe kua foaki age kiā Selopoame, kae neʼe toe faiga ia ke ina maʼu he ʼu puleʼaki moʼo fakamālohiʼi age tona tuʼulaga. Neʼe fēnei tana fakakaukau: “Kapau ʼe tatuʼu te hahaʼi nei ʼo fai he ʼu sākilifisio ʼi te ʼapi ʼo Sehova ʼaē ʼi Selusalemi, pea ʼe mahino ia ʼe liliu anai ia te loto ʼo te hahaʼi nei ki tonatou ʼaliki, ia Lopoame te hau ʼo Suta; pea ʼe mahino ia ʼe natou matehi anai au pea mo natou toe liliu anai kiā Lopoame te hau ʼo Suta.” Koia neʼe fakatuʼu ai leva e Selopoame ia te tauhi foʼou ʼaki te ʼu vītulo ʼaulo e lua. “Pea neʼe ina fakatuʼu te tahi ʼi Petele, pea ko te tahi neʼe ina fakatuʼu ʼi Tane. Pea neʼe liliu ia te meʼa ʼaia ko he meʼa fakatupu agahala, pea neʼe ʼolo te hahaʼi ki te tahi vītulo ʼo aʼu ki Tane. Pea neʼe ina laga he fale ʼi te ʼu potu māʼoluga pea mo fakanofo ia te ʼu pelepitelō neʼe fili mai te hahaʼi, neʼe mole natou kau ʼi te ʼu foha ʼo Levi.” Neʼe fakatuʼu e Selopoame tona ʼaho ʼo te “fakafiafia maʼa te ʼu foha ʼo Iselaele,” pea neʼe ina fakatuʼutuʼu ke ina “fai he ʼu mōlaga ʼi te ʼaletale moʼo fai ʼaki he ʼahu fakasākilifisio.”—1 Hau 12:26-33.

12. Koteā ʼaē neʼe fai e te hahaʼi agatonu ʼa te ʼAtua ʼo te potu noleto ʼo te puleʼaga, ʼi te temi ʼaē neʼe fakatuʼu ai e Selopoame ia te tauhi ki te vītulo ʼi Iselaele?

¹² Koteā ʼaē kā fai anai e te hahaʼi agatonu ʼa te ʼAtua ʼi te puleʼaga ʼo te potu noleto? Ohagē pē ko te faʼifaʼitaki ʼo tanatou ʼu kui agatonu, ko te kau Levite ʼaē neʼe māʼuʼuli ʼi te ʼu kolo neʼe hinoʼi age kiā nātou ʼi te telituale ʼo te puleʼaga noleto neʼe natou foimo fai he puleʼaki ki te faʼahi ʼaia. (Eke. 32:26-28; Fkau. 35:6-8; Teu. 33:8, 9) Neʼe natou situʼa ki ʼonatou tofiʼa, kae natou ʼave tonatou fāmili ki te potu sautē ʼo Suta, ke feala ai hanatou hoko atu ia tanatou tauhi agatonu ʼaē kiā Sehova. (2 Fkma. 11:13, 14) Ko ʼihi Iselaele ʼaē neʼe kua nonofo fakatemi pē ʼi Suta, neʼe natou fakatuʼutuʼu ke natou haga nonofo aipē lā kae mole natou toe liliu ki ʼonatou ʼapi. (2 Fkma. 10:17) Neʼe tokaga Sehova ʼo fakafealagia ke liliu mai ʼihi hahaʼi ki te tauhi moʼoni, ke feala ki te ʼu taʼiake kā haʼu ʼo te puleʼaga ʼo te potu noleto ke natou situʼa ki te tauhi ki te vītulo kae natou liliu ki Suta.—2 Fkma. 15:9-15.

13. ʼI totatou temi, neʼe ʼahiʼahiʼi feafeaʼi ia te hahaʼi ʼa te ʼAtua ʼaki te ʼu fakahala ʼa te kau ʼapositā?

¹³ Iā ʼaho nei, ko te kau ʼapositā pea mo tanatou ʼu akonaki hala ʼe feala ke fakatupu tuʼutāmaki ki te hahaʼi ʼa te ʼAtua. Neʼe faigaʼi e ʼihi takitaki ke natou fakatuʼu ia he lotu Fakapuleʼaga, ʼo natou fakamaʼua ki tanatou hahaʼi fakalogo ke natou mulimuli  kiai. Ko te kau takitaki ʼo te Keletiate pea mo ʼihi hahaʼi fiatuʼu neʼe natou lau, ʼe ko nātou te kūtuga hau mo pelepitelō fakalaumālie. Kae neʼe maʼu pē ʼi te kau Kilisitiano moʼoni ia te kau fakanofo moʼoni, ia nātou ʼaē ʼe natou faʼufaʼu ia ‘te kau pelepitelō fakahau.’—1 Pet. 2:9; Fakh. 14:1-5.

14. Koteā anai tatatou tali ki te ʼu manatu ʼaē ʼe fakamafola e te kau ʼapositā?

¹⁴ Ohagē ko te kau Levite agatonu ʼaē neʼe māʼuʼuli ʼi te hogofulu sēkulō ʼi muʼa ʼo totatou temi, ʼe mole kākāʼi te hahaʼi agatonu ʼa te ʼAtua ʼi te ʼu manatu ʼa te kau ʼapositā. Ko te kau fakanofo pea mo tonatou ʼu tehina Kilisitiano ʼe natou fakamamaʼo mai te ʼu manatu ʼa te kau ʼapositā ʼo natou foimo tekeʼi. (Lau ia Loma 16:17.) Logolā tatatou fakalogo lelei ʼaē ki te ʼu pule māʼoluga ʼo ʼuhiga mo te ʼu meʼa fakamālama pea mo tou fakamamaʼo mai te ʼu fihi fakapolitike, kae ʼe tou agatonu ki te Puleʼaga ʼo te ʼAtua. (Soa. 18:36; Loma 13:1-8) ʼE tou tekeʼi ia te ʼu fakamatala loi ʼa nātou ʼaē ʼe natou lau e natou tauhi ki te ʼAtua pea ʼe natou toe moamoagaʼi pē Sehova ʼaki tanatou aga.—Tito 1:16.

15. He koʼē ʼe tāu mo feʼauga ke tou agatonu ki “te tagata kaugana agatonu mo poto”?

¹⁵ Kotou fakakaukauʼi age muʼa ia te faigamālie ʼaē neʼe foaki e Sehova ki te hahaʼi agatonu ke natou mavae mai te mālama agakovi ʼaenī, ʼo fakahū nātou ki te palatiso fakalaumālie ʼaē kua ina fakatuʼu. (2 Ko. 12:1-4) ʼI totatou loto fakafetaʼi ʼaupitō, ʼe tou nonofo ovi ki “te tagata kaugana agatonu mo poto ʼaē kua fakanofo e tona pule ki tana hahaʼi faifekau, ke ina foaki kiā nātou tanatou meʼa kai ʼi tona temi totonu.” Neʼe fakanofo e Kilisito ia te kaugana ʼaia “ki ʼona koloa fuli.” (Mat. 24:45-47) Tahi ʼaē, tatau aipē mo kapau ʼe mole tou mahino kātoa ki he fakatuʼutuʼu neʼe fai e te kaugana ʼaia, kae ʼaua naʼa tou takuʼaki ke tou fakafeagai kiai peʼe ke tou liliu ki te mālama ʼa Satana. Kae ko tatatou agatonu ʼe ina uga anai tātou ke tou agavaivai ʼo fakatalitali ke fakamahino mai e Sehova ia te ʼu faʼahi ʼaia.

ʼE Mole Liʼakina Anai Nātou e Sehova Mokā ʼe Natou Fakahoko Ia Te ʼu Gāue ʼAē Neʼe Tuku Mai e Te ʼAtua

16. Koteā te fakatotonu neʼe fai ki te polofetā ʼo Suta?

¹⁶ Neʼe tauteaʼi e Sehova ia Selopoame ʼuhi ko tana ʼu aga fakaʼapositā. Neʼe ina fakatotonu ki te polofetā ʼo Suta ke ʼalu ki te potu noleto ʼo Petele pea ke lea kiā Selopoame kae neʼe lolotoga fai mōlaga ʼi tana ʼaletale. Neʼe tonu ki te polofetā ke ina fakahā kiā Selopoame ia te logo fakamataku. ʼE mahino ia, neʼe ko he gāue faigataʼa ʼaē neʼe hinoʼi ke fai e te polofetā.—1 Hau 13:1-3.

17. Neʼe puipui feafeaʼi e Sehova ia tana tagata ʼave logo?

¹⁷ Neʼe ʼita ʼaupitō ia Selopoame ʼi tana logo ki te tautea ʼa Sehova. Neʼe ina hiki tona nima ki te tagata fakafofoga ʼa te ʼAtua, pea mo kalaga ki te ʼu tagata ʼaē neʼe tuʼu ovi ki ai: “Kotou puke ia ia!” Pea ʼi te moʼi temi pē ʼaia, ko tona “nima ʼaē neʼe ina hiki kiā te ia, neʼe mate noa, pea neʼe mole kei ina lava peluki. Pea neʼe mafahi te ʼaletale, ʼo mavetevete ai te efu ʼo te ʼaletale.” Neʼe maʼua kiā Selopoame ʼi te temi ʼaia ke kolekole ki te polofetā ke ina fakafīmālieʼi ia Sehova pea mo faikole ke toe lelei ia tona nima ʼaē neʼe kua mate noa. Neʼe fai e te polofetā ia te faʼahi ʼaia, pea neʼe lelei ai tona nima. Koia neʼe puipui e Sehova ia tana tagata ʼave logo mai te tuʼutāmaki.—1 Hau 13:4-6.

18. ʼE puipui feafeaʼi tātou e Sehova mokā tou tauhi taputapu age kiā te ia kae mole tou mātataku?

¹⁸ ʼI tatatou kau agatonu ki te fakamafola ʼo te logo lelei ʼo te Puleʼaga pea mo fai ni ʼu tisipulo, ʼi ʼihi temi ʼe tou felāveʼi ai mo ni hahaʼi ʼe mole natou tali lelei tātou, peʼe natou agakovi mai kiā tātou. (Mat. 24:14; 28:19, 20) Kae ʼaua naʼa tou mātataku ʼo tupu ai hatatou lotovaivai ʼi te fakahoko ʼo tatatou minisitelio. Ohagē ko te polofetā ʼi te temi ʼo Selopoame, ʼe tou maʼu ia “te pilivilēsio ʼaē ke tou tauhi kiā [Sehova ] ʼaki he tauhi taputapu kae mole tou mātataku, ʼi te agatonu.” a (Luka 1: 74, 75) ʼE mole tou ʼamanaki ke hoko he meʼa fakamilakulo fēia ʼi totatou temi, kae ko Sehova ʼe kei ina puipui aipē tātou pea mo tokoni mai kiā tātou ʼi totatou ʼuhiga kau Fakamoʼoni ʼaki tona laumālie māʼoniʼoni pea mo te kau ʼāselo. (Lau ia Soane 14:15-17; Fakahā 14:6.) ʼE mole liʼakina anai e te ʼAtua ia nātou ʼaē ʼe natou manavasiʼi ʼo fakamafola ia tana folafola.—Filp. 1:14, 28.

ʼE Puipui Anai e Sehova Tana Hahaʼi Agatonu

19, 20. (a) He koʼē ʼe tou lava tui papau ko Sehova ʼe mole ina liʼakina anai tātou? (b) Koteā ia te ʼu fehuʼi ʼaē kā tou vakaʼi anai ʼi te ʼalatike kā hoa mai?

¹⁹ Ko Sehova ʼe ko totatou ʼAtua agatonu. (Fakh. 15:4; 16:5) Pea “ ʼe agatonu ʼi tana ʼu gāue fuli.” (Pes. 145:17) Pea ko te Tohi-Tapu ʼe ina fakapapau fēnei mai: “ ʼE ina taupau anai te ala ʼo tana hahaʼi faitotonu.” (Taag. 2:8) Kā hoko he ʼu fihifihia peʼe ko he ʼu manatu fakaʼapositā, peʼe kā natou fakahoko ia he gāue faigataʼa, ʼe falala aipē ia te hahaʼi ʼa te ʼAtua ki te takitaki ʼa Sehova pea mo tana tokoni.

²⁰ Koʼenī ia te ʼu faʼahi ʼaē ʼe tonu ke tou fakakaukauʼi takitokotahi kiai ʼi te temi nei: Koteā ʼaē kā tokoni mai anai ke au nofo agatonu kiā Sehova logolā ia te ʼu fihifihia peʼe ko te ʼu fakahala ʼaē ʼe feala ke hoko mai? Ko tona fakaʼuhiga, ʼe lava feafeaʼi haku fakamālohiʼi ia taku agatonu ʼaē ki te ʼAtua?

[Nota]

ʼE Kotou Tali Feafeaʼi Anai?

• Neʼe fakahā feafeaʼi e Sehova ʼe mole ina liʼakina tana hahaʼi agatonu mokā gaohi koviʼi nātou?

• ʼE tonu ke tou tali feafeaʼi ki te kau ʼapositā pea mo tanatou ʼu manatu?

• ʼE puipui feafeaʼi e Sehova tana hahaʼi agatonu mokā natou kau ki te minisitelio Fakakilisitiano?

[ʼU fehuʼi ʼo te ako]

[Mape/Paki ʼo te pasina 11]

(Vakaʼi te nusipepa)

TE PULEʼAGA ʼO TE POTU NOLETO (Selopoame)

Tane

SEKEMI

Petele

TE PULEʼAGA ʼO TE POTU SAUTĒ (Lopoame)

SELUSALEMI

[Paki]

Neʼe mole liʼakina e Sehova ia tana hahaʼi agatonu ʼi te temi ʼaē neʼe fakatuʼu ai e Selopoame ia te tauhi ki te vītulo