Tou Taupau Tatatou Agatonu ʼAki He Loto e Tahi

“ ʼE au haʼele anai ʼi tou moʼoni. Fai ke tahi toku loto ke au manavasiʼi ki tou huafa.”—PES. 86:11.

1, 2. (a) Iā Pesalemo 86:2, 11, koteā ʼaē kā tokoni mai anai ke tou nonofo agatonu kiā Sehova ʼi te ʼu temi ʼaē ʼe ʼahiʼahi ai tātou pea mo tou felāveʼi ai mo te ʼu fakahala? (b) Ko te temi fea ʼaē ʼe tonu ai ke tou agatonu ʼaki he loto kātoa kiā Sehova?

 HE KO’Ē ko ʼihi Kilisitiano ʼaē neʼe nonofo agatonu lolotoga ni ʼu taʼu logolā tonatou pilisoniʼi peʼe ko tonatou fakatagaʼi, kae ʼe natou tō ki muli age ki te hele ʼo te mānumānu koloa? ʼE fakalogo ia tatatou nofo agatonu ki te ʼu meʼa ʼaē ʼi totatou loto. ʼI te Pesalemo 86, ʼe fakahā ai te pikipikiga ʼo te agatonu pea mo te loto e tahi, ko tona fakaʼuhiga ko he loto ʼe kātoa, ʼe mole fakaʼapē lua. Neʼe faikole fēnei ia te tagata fai pesalemo ko Tavite: “Ke ke taupau toku nefesi, koteʼuhi ʼe au agatonu! Ke ke haofaki tau kaugana—ko koe ko toku ʼAtua—ʼaē ʼe falala kiā te koe.” Neʼe toe faikole fēnei ia Tavite: “Akoʼi mai kiā te au tou ala, Ê Sehova! ʼE au haʼele anai ʼi tou moʼoni. Fai ke tahi toku loto ke au manavasiʼi ki tou huafa.”—Pes. 86:2, 11.

² Kapau ʼe mole tou falala kiā Sehova mo totatou loto kātoa, pea ʼe feala pē anai ke vaivai ia tatatou agatonu ʼaē ki te ʼAtua moʼoni ʼuhi ko he ʼu tuʼania pea mo he ʼu fihifihia. Ko totatou ʼu holi agahala ʼe hagē ko he ʼu foʼi pulu ʼe fufū ʼi te kele ʼo te ala ʼaē ʼe tou haʼele ai. Tatau aipē peʼe tou nonofo agatonu kiā Sehova logolā te ʼu temi faigataʼaʼia, kae ʼe feala pē ke tou tō ki te ʼu hele peʼe ko te ʼu kākā ʼa Satana. Koia ʼe maʼuhiga ʼaupitō ai ʼi te temi nei ke tou agatonu ʼaki he loto kātoa kiā Sehova, ʼi muʼa ʼo te hoko mai ʼo te ʼu ʼahiʼahi pea mo te ʼu fakahala! ʼE ʼui fēnei mai ʼi te Tohi-Tapu: “ ʼO laka age ʼi te tahi ʼu meʼa ʼaē ʼe tonu ke puipui, puipui muʼa tou loto.” (Taag. 4:23) ʼO ʼuhiga mo te faʼahi ʼaia, ʼe lahi ia te ʼu ako ʼe tou maʼu mai te meʼa ʼaē neʼe hoko ki te polofetā ʼo Suta, ʼaē neʼe fekauʼi e Sehova ki te Hau ko Selopoame ʼo Iselaele.

“Ke Au ʼAvatu Hou Meʼa ʼOfa”

 3. Neʼe tali feafeaʼi e Selopoame ia te logo fakamāu ʼaē neʼe fakahā age e te polofetā ʼa te ʼAtua?

³ Tou fakakaukauʼi age muʼa ia te meʼa ʼaē neʼe  hoko. Ko te tagata ʼa te ʼAtua neʼe ina hoki fakahā age pē ia te logo fakamataku ʼaupitō ki te Hau ko Selopoame, ʼaē neʼe ina fakatuʼu ia te vītulo ke tauhi kiai te hahaʼi ʼo te ʼu telepī e hogofulu ʼo te potu noleto ʼo Iselaele. Neʼe ʼita ʼaupitō ia te hau, pea neʼe ina fakatotonu ki tana ʼu tagata fai fekau ke natou puke te tagata ʼave logo. Kae ko Sehova neʼe nofo mo tana tagata kaugana, heʼe ʼi te lakaga pē ʼaia, ko te nima ʼo te hau ʼaē neʼe ina hiki ʼi tona ʼita ki te polofetā neʼe mate noa, pea neʼe mafahi ia te ʼaletale ʼaē neʼe fakaʼaogaʼi ki te tauhi hala. Fokifā pē, kua fetogi ia te aga ʼa Selopoame, pea neʼe ina kolekole age ki te tagata ʼa te ʼAtua: “Fakalelei age kae ke ke fakafīmālieʼi ia Sehova tou ʼAtua pea ke ke hūfakiʼi au, ke toe lelei toku nima.” Pea neʼe faikole ia te polofetā, ʼo lelei ai te nima ʼo te hau.—1 Hau 13:1-6.

 4. (a) He koʼē ko te fakaafe ʼa te hau neʼe ko he toe ʼahiʼahi lahi ʼaia ki te agatonu ʼa te polofetā? (b) Neʼe koteā ia te tali ʼa te polofetā?

⁴ ʼOsi ʼaia, pea ʼui fēnei age e Selopoame ki te tagata ʼo te ʼAtua moʼoni: “Haʼu ki fale ke tā kakai, pea ke au ʼavatu hou meʼa ʼofa.” (1 Hau 13:7) Koteā ʼaē kā fai anai e te polofetā ʼi te moʼi temi pē ʼaia? ʼE tonu anai koa ke ina tali ia te fakaafe ʼa te hau ʼi tana kua ʼosi fakahā age ia te logo fakamāu kiā te ia? (Pes. 119:113) Peʼe tonu koa ke ina fakafisi ia te fakaafe ʼa te hau, tatau aipē peʼe hagē kua loto fakahemala ki te aga ʼaē neʼe ina fai? ʼE mahino ia, neʼe lahi ʼaupitō ia te ʼu koloa ʼo Selopoame moʼo foaki he ʼu meʼa ʼofa ki hona ʼu kaumeʼa. Kapau lā ko te polofetā ʼa te ʼAtua neʼe ko he tagata mānumānu koloa, pea ʼe mahino ia ko te fakaafe ʼa te hau ʼe ko he toe fakahala lahi anai kiā te ia. Kae neʼe fakatotonu fēnei age e Sehova ki te polofetā: “ ʼAua naʼa ke kai he pane, peʼe ʼinu he vai, pea ʼe mole tonu anai ke ke toe liliu mai ʼi te ala ʼaē neʼe ke ʼalu ai.” Koia neʼe tali fakahagatonu fēnei age e te polofetā: “Kana neʼe ke foaki mai lā te vaelua ʼo tou ʼapi, pea ʼe mole au ʼalu anai mo koe, ʼo kai he pane peʼe ʼinu he vai ʼi te potu ʼaenī.” Pea mavae ia te polofetā ʼi Petele ʼo ina toʼo te tahi ala. (1 Hau 13:8-10) ʼO ʼuhiga mo te agatonu ʼaki he loto kātoa, koteā te ako ʼe tou tāʼofi mai te tonu ʼaē neʼe fai e te polofetā?—Loma 15:4.

“ ʼE Tou Feʼauga Pē Anai”

 5. Ko te mānumānu koloa ʼe ina ʼahiʼahiʼi feafeaʼi tatatou agatonu?

⁵ ʼE lagi tou manatu ko te mānumānu koloa ʼe mole fakafeagai ki te agatonu, kae ʼi tona fakahagatonu ʼe ina ʼahiʼahiʼi tatatou agatonu. ʼE tou falala koa ki te fakapapau ʼa Sehova ʼaē ke ina foaki mai te ʼu meʼa ʼaē ʼe ʼaoga tāfito kiā tātou? (Mat. 6:33; Hep. 13:5) ʼE feala koa hatatou maʼuli fiafia logolā tatatou mole maʼu koloa moʼo totogi ni ʼu meʼa “ke lelei age” totatou maʼuli ʼi te temi nei? (Lau ia Filipe 4:11-13.) ʼE tou situʼa anai koa ki ni ʼu pilivilēsio fakalaumālie ke tou faiga ki te ʼu meʼa ʼaē ʼe tou loto kiai ʼi te temi nei? ʼE tou fakamuʼamuʼa koa ʼi totatou maʼuli ia te tauhi ʼaē kiā Sehova? Ko te ʼu tali ʼaē kā tou fai ki te ʼu fehuʼi ʼaia, ʼe fakalogo tāfito anai peʼe tou tauhi mo he loto kātoa ki te ʼAtua peʼe kailoa. Neʼe ʼui fēnei e te ʼapositolo ko Paulo: “ ʼE fakatupu maʼu meʼa te pipiki ki te ʼAtua pea mo te maʼuli fakafeʼauga. He neʼe mole tou ʼaumai he meʼa ki te mālamanei, pea ʼe mole feala foki ke tou ʼave he meʼa. Koia, kapau kua tou maʼu te meʼa kai pea mo te meʼa laofi, ʼe tou feʼauga pē anai ʼi te ʼu meʼa ʼaia.”—1 Tim. 6:6-8.

 6. Koteā ia ‘he ʼu meʼa ʼofa’ ʼe feala ke foaki mai kiā tātou, pea koteā ʼaē kā tokoni mai anai ke tou ʼiloʼi peʼe tonu ke tou tali ia te ʼu meʼa ʼofa ʼaia?

⁶ Ohagē lā, ʼe lagi fakaʼui mai anai e totatou pātolō ke hiki totatou tuʼulaga gāue pea mo foaki mai he totogi ʼe lahi age pea mo he tahi age ʼu lelei. Peʼe lagi tou ʼiloʼi ʼe tou lava maʼu anai he totogi ʼe lelei age mo kapau ʼe tou ʼolo ki he tahi fenua peʼe ki he tahi kolo moʼo maʼu ai he gāue. ʼUluaki, ʼe lagi tou manatu anai ko te ʼu faigamālie ʼaia ʼe ko he tapuakina mai iā Sehova. Kae ʼi muʼa ʼo hatatou fai ia he tonu ki te faʼahi ʼaia, ʼe mole tonu koa ke tou vakavakaʼi ia te ʼu tupuʼaga ʼo tatatou fai ia te tonu ʼaia? Ko te fehuʼi tāfito ʼaenī ʼe tonu ke tou vakaʼi: “ ʼE malave feafeaʼi anai ia te tonu ʼaē ʼe au fai ki taku ʼu felōgoi ʼaē mo Sehova?”

 7. He koʼē ʼe maʼuhiga ke tou foimo fakamate ia te ʼu holi ʼo totatou loto ia te mānumānu koloa?

⁷ Ko te tuʼu ʼa Satana ʼe ina fakamuʼamuʼa tuʼumaʼu pē ia te mānumānu koloa. (Lau ia 1 Soane 2:15, 16.) Ko te fakatuʼutuʼu ʼa te Tēvolo ke ina fakahalaʼi totatou ʼu loto. Koia, ʼe ʼaoga ai ke tou nonofo tōkakaga ke tou ʼiloʼi pea mo foimo fakamate ia te ʼu holi ʼo totatou loto ia te mānumānu koloa. (Fakh. 3:15-17) Neʼe mole faigataʼa kiā Sesu hana tekeʼi ia te ʼu puleʼaga fuli ʼo te mālamanei ʼaē neʼe fia foaki age e Satana. (Mat. 4:8-10) Neʼe ina fakatokaga fēnei: “Ke kotou tōkakaga pea ke kotou puipui ia koutou mai te ʼu faʼahiga mānumānu kehekehe, heʼe tatau aipē peʼe nofo he tahi ʼi te mahu, ko tona maʼuli ʼe mole haʼu ia mai te ʼu meʼa ʼaē ʼe ina maʼu.” (Luka 12:15) Ko tatatou agatonu ʼe tokoni mai anai ke tou  falala kiā Sehova kae ʼaua naʼa tou falala fau kiā kita totonu pē.

“Neʼe Kākāʼi Ia Ia” e Te Polofetā Matuʼa

 8. Neʼe ʼahiʼahiʼi feafeaʼi ia te agatonu ʼa te polofetā ʼa te ʼAtua?

⁸ Neʼe feala pē ke iku lelei te agatonu ʼa te polofetā ʼa te ʼAtua mo kanapau lā neʼe ʼalu fakahagatonu ki tona ʼapi. Kae ʼi tana mavae atu pē, neʼe felāveʼi mo te tahi ʼahiʼahi. ʼE ʼui fēnei mai ʼi te Tohi-Tapu: “Neʼe ʼi ai te polofetā matuʼa neʼe nofo ʼi Petele pea neʼe ʼomai tona ʼu foha ʼo fakamatala age kiā te ia” ia te ʼu meʼa ʼaē neʼe hoko talu mai te ʼuhu ʼo te ʼaho ʼaia. ʼI tana logo ʼaia ki te fakamatala, neʼe ʼui age e te matuʼa ki tona ʼu foha ke nā teuteuʼi he ʼāsino ke feala hana foimo ʼalu ki te polofetā ʼa te ʼAtua. Mole fualoa kiai, neʼe ina maʼu atu te polofetā ʼe mālōlō ʼi te lalo fuʼu ʼakau lahi pea neʼe ina ʼui fēnei age ki ai: “Haʼu mo au ki fale pea ke ke kai te pane.” ʼI te fakafisi age ʼa te tagata ʼa te ʼAtua moʼoni ia te fakaafe, neʼe tali fēnei age e te matuʼa: “Mo au lā ʼe au polofetā ohagē ko koe, pea neʼe tala mai e te ʼāselo te folafola ʼa Sehova, ʼo ʼui māʼana: ‘Fakaliliu mai ia ia mo koe ki tou ʼapi, ke ina kai te pane, mo ʼinu te vai.’ ” Kae ʼe fakahā mai ʼi te Tohi-Tapu: “Neʼe ina kākāʼi ia ia.”—1 Hau 13:11-18.

 9. Koteā ʼaē ʼe ʼui ʼi te Tohi-Tapu ʼo ʼuhiga mo te hahaʼi aga fakakākā, pea ko ai koa ʼaē ʼe natou fakamamahiʼi?

⁹ ʼE mole tou ʼiloʼi te ʼuhiga moʼoni ʼo te loto ʼa te polofetā matuʼa, kae neʼe loi tana ʼu palalau. Lagi ko te matuʼa ʼaia ki muʼa atu neʼe ko he polofetā agatonu ʼa Sehova, kae ʼaki te temi neʼe kua aga fakakākā leva ia. ʼE tauteaʼi mālohi e te Tohi-Tapu ia te taʼi aga ʼaia. (Lau ia Tāʼaga Lea 3:32.) ʼI te agamāhani, ko te hahaʼi aga fakakākā ʼe natou fakatupu tuʼutāmaki ʼi te faʼahi fakalaumālie kiā nātou totonu kae ʼe toe tuʼutāmaki aipē mo ʼihi ʼi tanatou ʼu aga fakakākā ʼaia.

“Neʼe Toe Liliu” Ia Mo Te Tagata Matuʼa

10. Koteā te tali neʼe fai e te polofetā ʼa te ʼAtua ki te fakaafe ʼa te tagata matuʼa, pea neʼe koteā tona fua?

¹⁰ Neʼe tonu pē ki te polofetā ʼo Suta ke ina ʼiloʼi ia te kākā ʼa te polofetā matuʼa. Neʼe feala pē ke ina fai ia te fehuʼi ʼaenī: ‘He koʼē neʼe fekauʼi e Sehova ia he ʼāselo mo he tahi ʼu fakatotonu ʼo ʼuhiga mo au ki he tahi kehe?’ Neʼe feala pē ki te polofetā ke ina kumi kiā Sehova ke ina fakamahino age, kae ʼe fakahā mai ʼi te Tohi-Tapu neʼe mole ina fai ia te faʼahi ʼaia. “Neʼe toe liliu [ia mo te matuʼa] ke ina kai te pane ʼi tona ʼapi, mo ʼinu te vai.” Neʼe mole leleiʼia e Sehova te meʼa ʼaē neʼe ina fai. ʼI te toe liliu ki Suta ʼa te polofetā ʼaē neʼe kua ʼosi kākāʼi, neʼe felāveʼi mo te laione pea neʼe matehi ai ia ia. ʼE ko he fakaʼosi fakaʼofaʼofa ʼaē neʼe hoko ki tana gāue fakapolofetā!—1 Hau 13:19-25. a

11. Koteā te faʼifaʼitaki lelei neʼe tuku mai e Aisa?

¹¹ Kae ko te polofetā ko Aisa ʼaē neʼe fekauʼi ke ʼalu ʼo fakanofo ia Selopoame ke hau, neʼe nofo agatonu ia logolā tana kua matuʼa. ʼI te temi ʼaē neʼe kua matuʼa ai ia Aisa pea mo kivi, neʼe fekauʼi e Selopoame tona ʼohoana ke ʼalu ʼo kumi kiā Aisa peʼe koteā ʼaē kā hoko anai ki tonā foha ʼaē neʼe mahaki. Neʼe lototoʼa ia Aisa ʼo fakahā age ʼe mate anai te foha ʼo Selopoame. (1 Hau 14:1-18) Pea ʼi te ʼu tuʼuga tapuakina ʼaē neʼe maʼu e Aisa, neʼe ina maʼu ia te pilivilēsio ʼaē ke kau ki te tohi ʼo te Folafola ʼa te ʼAtua. ʼO feafeaʼi? Ko tana ʼu tohi neʼe fakaʼaogaʼi ki muli age e Esitalasi ia te pelepitelō moʼo fai ʼaki tana tohi Fakatohi-tapu.—2 Fkma. 9:29.

12-14. (a) Koteā te ako ʼe tou lava tāʼofi mai te meʼa ʼaē neʼe hoko ki te polofetā? (b) Toʼo he faʼifaʼitaki moʼo fakahā ia te ʼaoga ʼaē ke tou tokagaʼi fakalelei ia he tokoni Fakatohi-tapu neʼe foaki mai e he tagata ʼāfea pea mo fakakaukauʼi te tokoni ʼaia ʼi te faikole.

¹² ʼE mole fakahā mai ʼi te Tohi-Tapu pe koʼē neʼe mole kumi tokoni kiā Sehova ia te polofetā, ʼi muʼa ʼo hana toe liliu mo te matuʼa ʼo kai pea mo ʼinu ʼi tona ʼapi. ʼE lagi ko te meʼa ʼaē neʼe ʼui age e te matuʼa neʼe ko he meʼa neʼe fia logo kiai? Koteā te ako ʼe tou tāʼofi mai ai? ʼE tonu ke tou tui papau ki te faitotonu ʼo te ʼu lēkula ʼaē ʼa Sehova. Pea ʼe tonu ke tou mulimuli kātoa kiai, logolā te ʼu meʼa ʼaē ʼe feala ke hoko mai kiā tātou.

¹³ Ko ʼihi ʼe natou logo pē ki te ʼu meʼa ʼaē ʼe natou fia logo kiai mokā tokoniʼi nātou. Ohagē lā, ʼe feala ke foaki age ki he tehina he gāue ʼe ina toʼo anai tona temi ʼaē ʼe feala ke ina fakaʼaogaʼi ki tona fāmili pea mo tana ʼu gāue fakateokalatike. ʼE lagi kumi tokoni anai ki he tagata ʼāfea. Pea ʼe lagi kamata anai e te tagata ʼāfea tana ʼu palalau ʼo ina ʼui ʼe ina ʼiloʼi lelei pē ʼe mole tuha mo ia ke ina ʼui age ki te tehina peʼe feafeaʼi ia te taupau ʼo tona fāmili. ʼOsi pea vakaʼi anai e te tagata ʼāfea mo te tehina ia te ʼu tuʼutāmaki fakalaumālie ʼaē ʼe feala ke hoko mo kapau ʼe ina tali te gāue ʼaē ʼe foaki age e tona pātolō. ʼE tāʼofi pē koa anai e te tehina ia te ʼu ʼuluaki palalau ʼa te tagata  ʼāfea, peʼe ina tokagaʼi anai te ʼu tokoni ʼaē neʼe ina fai ki muli age? ʼE tonu ki te tehina ke ina fakafuafua lelei ia te meʼa ʼaē ʼe lelei kiā te ia ʼi te faʼahi fakalaumālie.

¹⁴ Tou vakaʼi ia te tahi age ʼaluʼaga. ʼE feala ki he tuagaʼane ke ina fehuʼi age ki he tagata ʼāfea peʼe tonu ke nā tahi nofo mo tona ʼohoana ʼaē ʼe mole ko he Fakamoʼoni. ʼE lagi ʼui age anai e te tagata ʼāfea ko te tonu ʼaia ke nā tahi nofo ʼe fakalogo pē kiā ia. Pea ʼe lagi ina fakahā age anai he tokoni Fakatohi-tapu ʼo ʼuhiga mo te faʼahi ʼaia. (1 Ko. 7:10-16) ʼE tokagaʼi fakalelei anai koa e te tuagaʼane ia te tokoni ʼaē neʼe foaki age e te tagata ʼāfea? Peʼe kua ina fakatotonu pē koa ia ʼi tona loto ke tahi nofo mo tona ʼohoana? Kā ina fai anai tana tonu, pea ʼe lelei anai ke ina fakakaukauʼi ʼi te faikole ia he tokoni Fakatohi-tapu.

Tou Fia Mālalo

15. Koteā te ako ʼe tou tāʼofi mai te hala ʼaē neʼe fai e te polofetā ʼa te ʼAtua?

¹⁵ Koteā te tahi age ako ʼe tou tāʼofi mai te hala ʼaē neʼe fai e te polofetā ʼo Suta? ʼE ʼui fēnei iā Tāʼaga Lea 3:5: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu.” Ko te polofetā ʼo Suta neʼe mole kei falala ia kiā Sehova ohagē ko tana fai māhani, kae ʼi te temi ʼaia neʼe kua falala pē ia ki tona poto fakatagata. Neʼe mate ʼi tana hala ʼaia, ʼo puli ai tona matagafua iā muʼa ʼo te ʼAtua. ʼAki te meʼa ʼaia neʼe hoko ki te polofetā, ʼe tou mahino lelei ai ki te maʼuhiga ʼaē ke tou fia mālalo pea mo agatonu ʼi tatatou tauhi ʼaē kiā Sehova!

16, 17. Koteā ʼaē kā tokoni mai anai ke tou nonofo agatonu kiā Sehova?

¹⁶ Ko te ʼuhiga agahala ʼo totatou loto ʼe ina taki pē tātou ki te lakahala. “ ʼE kākā te loto, ʼo laka iā meʼa fuapē, pea mo kovi ʼaupitō.” (Sel. 17:9) Ke feala hatatou nonofo agatonu kiā Sehova, ʼe tonu ke tou haga faiga mālohi ke tou fetogi ia totatou ʼuhigaʼi tagata ʼāfea, mo tona ʼu holi ʼaē ki te fiatuʼu pea mo te falala pē kiā kita totonu. Pea ʼe tonu ke tou kofuʼi ia te ʼuhigaʼi tagata foʼou, “ ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.”—Lau ia Efesi 4:22-24.

¹⁷ ʼE ʼui fēnei iā Tāʼaga Lea 11:2: “Ko te poto ʼe maʼu e nātou ʼaē ʼe fia mālalo.” Ko te falala kiā Sehova mo he loto fia mālalo, ʼe tokoni mai anai kiā tātou ke tou tekeʼi ia te ʼu hala ʼaē ʼe fakatupu kovi anai kiā kita totonu. Ohagē lā, kapau ʼe tou lotovaivai pea ʼe feala ai pē anai ke mole lelei ia tatatou sivisivi ia he meʼa. (Taag. 24:10) ʼE lagi kua tou pipiko ʼi te kau ki he tahi faʼahi ʼo te tauhi taputapu pea mo tou manatu kua lahi pē ia te ʼu gāue ʼaē kua tou fai lolotoga ni ʼu taʼu, pea mo ʼui kua lagi lelei ke fakahoko e niʼihi ia te ʼu maʼua ʼaia. Peʼe kua lagi tou fakaʼamu ke tou maʼuli ohagē pē ko te hahaʼi fuli. Kae kā ‘tou faiga mālohi’ pea mo tou fai ke “lahi tuʼumaʼu [tatatou] ʼu gāue ʼi te ʼAliki,” pea ʼe puipui ai anai totatou loto.—Luka 13:24; 1 Ko. 15:58.

18. Koteā ʼaē ʼe tou lava fai mo kapau ʼe mole tou ʼiloʼi ia te tonu ʼaē ke tou fai?

¹⁸ ʼI ʼihi temi, ʼe lagi tonu anai ke tou fai he ʼu tonu ʼe faigataʼa, pea ʼe mole tou faʼa ʼiloʼi pe koteā te meʼa ʼaē ʼe lelei ke tou fai. ʼE tou faiga anai koa ʼi te ʼu temi ʼaia ke tou fakatokatoka totatou ʼu fihifihia ʼaki totatou poto fakatagata? ʼI te temi fuli pē ʼaē ʼe tou tau ai mo he ʼu ʼaluʼaga fēia, ʼe tou aga fakapotopoto anai ʼo kumi tokoni kiā Sehova. ʼE ʼui fēnei iā Sake 1:5: “Kapau ʼe iā koutou he tahi ʼe mole ina maʼu te poto, ke ina haga kole ki te ʼAtua, heʼe ina foaki ki te hahaʼi fuli ʼaki te manavaʼofa.” ʼE foaki mai anai e tatatou Tamai ʼaē ʼe ʼi selō ia te laumālie māʼoniʼoni ʼaē ʼe ʼaoga kiā tātou moʼo fai ia he ʼu tonu ʼe lelei.—Lau ia Luka 11:9, 13.

Tou Fakatotonu Ke Tou Nonofo Agatonu

19, 20. Koteā ʼaē ʼe tonu ke tou fakatotonu ke tou fai?

¹⁹ Ko te ʼu temi maveuveu ʼaē neʼe hoko ʼi te kua situʼa ʼa Salomone ki te tauhi moʼoni, neʼe ʼahiʼahiʼi mālohi ai ia te agatonu ʼa te ʼu kaugana ʼa te ʼAtua. ʼE mahino ia tokolahi neʼe natou hehē. Kae ko ʼihi neʼe natou nonofo agatonu kiā Sehova.

²⁰ ʼI te ʼaho fuli, ʼe tou tau mo te ʼu tonu ʼe ʼahiʼahiʼi ai tatatou agatonu. Mo tātou foki, ʼe feala ke tou fakahā ʼe tou agatonu. ʼOfa pē ke tou nonofo agatonu tuʼumaʼu kiā Sehova mo he loto e tahi, ʼo tou falala kātoa ʼe ina haga tapuakina anai tana hahaʼi agatonu.—2 Sam. 22:26.

[Nota]

ʼE Kotou Tali Feafeaʼi Anai?

• He koʼē ʼe tonu ke tou foimo fakamate ia te ʼu holi ʼo totatou loto ia te mānumānu koloa?

• Koteā ʼaē kā tokoni mai anai ke tou nonofo agatonu kiā Sehova?

• ʼE tokoni feafeaʼi ia te fia mālalo ke tou nonofo agatonu ki te ʼAtua?

[ʼU fehuʼi ʼo te ako]