Kua Vave Fakatuʼu Ia Te Palatiso ʼi Te Kele!

“Ko tamatou Tamai e i selo, ke tapuha tou huafa, ke aumai tau pule, ke fai tou finegalo i te kelekele o hage ko selo.”—Mateo 6:9, 10, Tauhi Foou.

KO TE faikole ʼiloa ʼaia, ʼaē ʼe fakahigoa e te tokolahi ko te Tamai ʼaē ʼe ʼi selō, ʼe ina foaki ia he falala ki te mālamanei. ʼO feafeaʼi?

Ohagē ko tona fakahā ʼi te Faikole ʼo te Tamai ʼaē ʼe ʼi selō, ko te Puleʼaga ʼo te ʼAtua ʼe ina fakahoko anai ia te finegalo ʼo te ʼAtua ʼi te kele ohagē pē ko tana kua fakahoko ʼi selō. Pea ʼe ko te finegalo ʼo te ʼAtua ke toe fakatuʼu ia te Palatiso. (Fakahā 21:1-5) Kae koteā ia te Puleʼaga ʼo te ʼAtua, pea ʼe ina toe fakatuʼu feafeaʼi anai ia te Palatiso ʼi te kele?

Ko He Puleʼaga Moʼoni

Ko te Puleʼaga ʼo te ʼAtua ʼe ko he puleʼaga moʼoni. Ke feala ke fakatuʼu ia he puleʼaga, ʼe tonu ke ʼi ai hona kau pule, hana ʼu lao, pea mo hana hahaʼi fakalogo. ʼE maʼu koa e te Puleʼaga ʼo te ʼAtua ia te ʼu faʼahi ʼaia? Kotou tokagaʼi ia te ʼu tali ʼaē ʼe tuku mai ʼi te Tohi-Tapu ki te ʼu fehuʼi ʼaenī e tolu:

Ko ai te kau pule ʼo te Puleʼaga ʼo te ʼAtua? (Isaia 33:22) Neʼe fakanofo e Sehova ʼAtua tona ʼAlo, ia Sesu Kilisito, ke pule ʼi te Puleʼaga. (Mateo 28:18) ʼAki te takitaki ʼa Sehova, neʼe filifili e Sesu he ʼu hahaʼi mai “te ʼu telepī kehekehe, mo te ʼu lea kehekehe, mo te ʼu hahaʼi kehekehe pea mo te ʼu puleʼaga kehekehe” ʼaē kā natou kaugā hau anai mo ia ʼi tonatou ʼuhiga “pule fakahau . . . ki te kele.”—Fakahā 5:9, 10.

Koteā te ʼu lao neʼe fakatuʼu e te Puleʼaga ʼo te ʼAtua maʼa tana hahaʼi fakalogo? ʼE ʼi ai te ʼu lao peʼe ko te ʼu fakatotonu ʼe fakamaʼua ki te hahaʼi fakalogo ke natou fai he ʼu meʼa lelei. Neʼe fakahā e Sesu ia te lao ʼaē ʼe maʼuhiga ʼaupitō ʼi te ʼu lao fuli, ʼi tana ʼui fēnei: “ ‘ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.’ Koʼenā te folafola ʼaē ʼe lahi tokotahi pea mo ʼuluaki. Ko te lua, ʼaē ʼe tatau, ʼe ko ia ʼaenī: ‘ ʼE tonu ke ke ʼofa ki tou kāiga ohagē pē kiā koe totonu.’ ”—Mateo 22:37-39.

Ko te tahi ʼu lao ʼe fakamaʼua ki te hahaʼi fakalogo ʼo te Puleʼaga ʼo te ʼAtua ke natou tekeʼi ni ʼu faʼahiga aga. Ohagē lā, ʼe tala fakalelei fēnei ʼi te Tohi-Tapu: “ ʼAua naʼa kotou faihala. ʼE mole he tagata fai folonikāsio, he tagata tauhi tamapua, he tagata fai feʼauʼaki, he ʼu tagata ʼe taupau ke fai kiā nātou he ʼu holi ʼe mole tonu ke fai, he ʼu tagata ʼe  momoe mo he tahi ʼu tagata, he kau kaihaʼa, he hahaʼi mānumānu, he kau konahia, he kau leakovi, he ʼu hahaʼi ʼe natou faʼao he ʼu meʼa kā mole ʼanatou, ʼe natou maʼu anai te puleʼaga ʼo te ʼAtua.”—1 Kolonito 6:9, 10.

Ko ai te hahaʼi fakalogo ʼo te Puleʼaga ʼo te ʼAtua? Neʼe fakatatau e Sesu te hahaʼi fakalogo ʼo te Puleʼaga ʼo te ʼAtua ki ni ʼu ovi. Neʼe ina ʼui fēnei: “ ʼE natou fagono anai ki toku leʼo, pea ʼe natou liliu anai ko he faga ovi pē e tahi, mo he tagata tauhi ovi pē e tahi.” (Soane 10:16) Ke kau he tahi ki te hahaʼi fakalogo ʼo te Puleʼaga ʼo te ʼAtua, ʼe mole tonu pē ke ina ʼui ʼe mulimuli ʼi te Tauhiovi Agalelei, ia Sesu, kae ʼe tonu foki ke ina fai te meʼa ʼaē ʼe ina fakatotonu. Neʼe ʼui fēnei e Sesu: “ ʼE mole ko nātou ʼaē ʼe natou ʼui mai kiā te au: ‘ ʼAliki, ʼAliki,’ kā natou hū anai ki te puleʼaga ʼo selō, kae ko ʼaē ʼe ina fai te finegalo ʼo taku Tamai ʼaē ʼe ʼi selō.”—Mateo 7:21.

Koia, ko te hahaʼi fakalogo ʼo te Puleʼaga ʼo te ʼAtua ʼe natou fakaʼaogaʼi pea mo fakamaʼuhigaʼi ia te huafa ʼo te ʼAtua, ia Sehova, ohagē ko tona fai e Sesu. (Soane 17:26) ʼE natou fakalogo ki te fakatotonu ʼa Sesu ke akoʼi te hahaʼi ʼo ʼuhiga mo “te logo lelei ʼaenī ʼo te puleʼaga.” (Mateo 24:14; 28:19, 20) Pea ʼe natou feʼofaniʼaki moʼoni.—Soane 13:35.

Ko Te “Maumauʼi [ʼo] Nātou ʼAē ʼe Natou Maumauʼi [Ia] Te Kele”

ʼE hā mai ʼi te ʼu ʼaluʼaga ʼaē ʼe hoko ʼi te temi nei ʼi te mālamanei, kua vave fakahoko anai e te Puleʼaga ʼo te ʼAtua he ʼu fetogi maʼuhiga ki te kele. ʼE tou lava ʼiloʼi feafeaʼi ia te faʼahi ʼaia? Kua hili kiai taʼu e lua afe, neʼe talanoa Sesu ki he fakaʼiloga ʼe hoko ai anai he ʼu meʼa kehekehe, ʼo fakamoʼoni anai ki te “kua ovi mai [ʼo] te puleʼaga ʼo te ʼAtua.” (Luka 21:31) Ohagē ko tona fakahā ʼi te ʼalatike ki muʼa atu, ko te ʼu faʼahi ʼo te fakaʼiloga ʼaia ʼe hoko moʼoni ʼi te temi nei ʼi te mālamanei kātoa.

Koteā ʼaē kā hoa kiai? ʼE tali fēnei e Sesu: “[ʼE] ʼi ai anai te mamahi lahi, ʼe mole hona tatau kua hoko talu mai te kamataʼaga ʼo te mālamanei ʼo kaku mai ki te temi nei, kailoa, pea ʼe mole toe hoko anai he tahi mamahi fēia.” (Mateo 24:21) ʼE mole fakahoko e te tagata ia te mamahi lahi ʼaia. Kae ko te ʼAtua ʼe ina haga anai ʼo “maumauʼi ia nātou ʼaē ʼe natou maumauʼi te kele.” (Fakahā 11:18) Ko te hahaʼi agakovi, ʼaē neʼe natou maumauʼi ia te kele ʼuhi ko tanatou manatu pē ʼaē kiā nātou totonu, “ ʼe toʼo anai ia nātou ʼi te kele.” Kae ko te hahaʼi agatonu, ʼaē ʼe leleiʼia e te ʼAtua tanatou tauhi, ʼe “natou nonofo ai anai.”—Tāʼaga Lea 2:21, 22.

ʼE ko he aga faitotonu anai ʼa Sehova ʼAtua ia tana fakahoko te fetogi maʼuhiga ʼaia. Koteā tona tupuʼaga? Tou toʼo ia te faʼifaʼitaki ʼaenī: Ohagē lā ʼe ʼi ai hakotou falefata ʼe kotou lue tona ʼu koga fale ki te hahaʼi. Ko ʼihi hahaʼi ʼaē ʼe natou nonofo ai ʼe natou agalelei pea mo aga fakaʼapaʼapa, ʼe natou totogi pea mo tōkakaga fakalelei ki tonatou koga fale. Kae ko ʼihi ʼe natou fakatupu maveuveu pea mo manatu pē kiā nātou totonu, ʼe mole natou totogi tanatou lue pea mo natou maumauʼi ia te koga fale. Logolā takotou fakatokagaʼi liuliuga age kiā nātou ke fetogi tanatou aga, kae ʼe hoko atu pē tanatou aga kovi ʼaia. Koteā anai ʼaē kā kotou fai? ʼUhi ʼaē ko koutou ʼaē ʼe pule ki te ʼu koga fale ʼaia, ʼe mahino ia ʼe kotou kapu anai ia te hahaʼi agakovi ʼaia.

ʼO toe fēia pē, ko Sehova ʼAtua, ʼi tona ʼuhiga Tupuʼaga ʼo te kele pea mo meʼa fuli pē ʼaē ʼe ʼi ai, ʼe feala pē hana filifili pe ko ai anai ʼaē kā ina tuku ke maʼuli ʼi te kele. (Fakahā 4:11) Neʼe ʼui e Sehova ko tana fakatuʼutuʼu ʼe ko te toʼo ʼi te kele ʼaenī ia te hahaʼi agakovi ʼaē ʼe mole natou fia fai ia tona finegalo pea mo natou tāʼofi ʼihi ke natou fai ia te faʼahi ʼaia.—Pesalemo 37:9-11.

Te Toe Fakatuʼu ʼo Te Palatiso

Mole tuai, pea ko te Puleʼaga ʼo te ʼAtua ʼaē ʼe takitaki e Sesu Kilisito ʼe pule anai ki te kele. Neʼe fakahigoaʼi e Sesu ia te kamata foʼou ʼaia ko “te toe fakatupu.” (Mateo 19:28) ʼE feafeaʼi anai ia te maʼuli ʼi te Palatiso ʼaia? Kotou tokagaʼi ia te ʼu fakapapau ʼaenī ʼi te Tohi-Tapu:

Pesalemo 46:9. “[ʼE] ina fakagata te ʼu tau ʼo aʼu ki te potu taupotu ʼo te kele.”

Isaia 35:1. “ ʼE fiafia anai te toafa pea mo te potu  fenua ʼaē ʼe kele toafa, pea ʼe fiafia anai te potu lāvaki pea ʼe fisi anai ohagē ko te safalani.”

Isaia 65:21-23. “Ko taku hahaʼi ʼaē neʼe au fili, ʼe natou fakaʼaogaʼi kātoa anai te gāue ʼo tonatou ʼu nima. ʼE mole natou kinakina noa anai, pea ʼe mole natou fānaunau anai ki te maveuveu.”

Soane 5:28, 29. “ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe natou logo anai ki [te] leʼo [ʼo Sesu] pea ʼe natou hū mai anai ki tuʼa.”

Fakahā 21:4. “[Ko te ʼAtua] ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi.”

He ʼu Tupuʼaga Ke Tou Tui

ʼE kotou tui koa ki te ʼu fakapapau ʼaē ʼe tuʼu ʼi te Tohi-Tapu? Neʼe fakakikite ʼi te Tohi-Tapu tokolahi ʼe mole natou tui anai. ʼE ʼui fēnei ai: “ ʼI te ʼu ʼaho fakaʼosi ʼe ʼomai anai te kau vāvā . . . ʼo natou haʼele ʼo mulimuli pē ʼi tanatou ʼu holi pea mo ʼui maʼa nātou: ‘ ʼE ʼifea koa tana ʼi henī ʼaē neʼe fakapapau mai? Heʼe talu mai te ʼaho ʼaē neʼe momoe ai tatatou ʼu kui ʼi te mate ko meʼa fuli pē ʼe hoko atu ohagē ko te kamataʼaga ʼo te fakatupu.’ ” (2 Petelo 3:3, 4) Kae ko te kau vāvā ʼaia ʼe natou faihala ʼaupitō. Tou vakaʼi ia tupuʼaga pē e fā ʼaē ʼe feala ai ke tou tui ki te meʼa ʼaē ʼe ʼui ʼi te Tohi-Tapu:

(1) ʼI te temi muʼa, neʼe kua tauteaʼi e te ʼAtua ia te hahaʼi agakovi ʼi te kele. Ko te Tulivio ʼi te ʼaho ʼo Noe ʼe ko he faʼifaʼitaki lelei ʼaia.—2 Petelo 3:5-7.

(2) Neʼe tonu te tala fakakikite ʼo te Folafola ʼa te ʼAtua ia te ʼu ʼaluʼaga ʼaē ʼe hoko ʼi te temi nei ʼi te mālamanei kātoa.

(3) Ko meʼa fuli ʼe mole “hoko atu ohagē ko te kamataʼaga ʼo te fakatupu.” ʼI hona ʼaluʼaga neʼe mole heʼeki hoko he meʼa fēia ki muʼa atu, ʼe mamahi totatou kele ʼi te kua ʼāsili kovi ʼo te ʼu fihifihia fakasōsiale, mo te ʼu aga heʼeʼaoga pea mo te maumauʼi ʼo te ʼu meʼa maʼuli ʼo te kele.

(4) Ko te “logo lelei ʼo te puleʼaga” kua fakamafola ʼi te temi nei ʼi te kele kātoa, ʼo fakahā mai ai kua ovi mai ia “te fakaʼosi.”—Mateo 24:14.

Ko te kau Fakamoʼoni ʼa Sehova ʼe natou fakaafe koutou ke kotou ako mo nātou ia te Folafola ʼa te ʼAtua ia te Tohi-Tapu, ke kotou ʼiloʼi ai he tahi age ʼu manatu ʼo ʼuhiga mo te falala ki te maʼuli heʼegata ʼi te pule ʼo te Puleʼaga ʼo te ʼAtua. (Soane 17:3) ʼEī, ʼe ko he kā haʼu taulekaleka ʼaē ʼe fakatalitali kiai te mālamanei. Kua vave hoko mai ia he ʼu temi ʼe fakafiafia age! ʼE kotou māʼuʼuli anai koa ʼi te temi ʼaia?

[Paki ʼo te pasina 7]

Ko nātou ʼaē ʼe natou ʼui ʼe mole fetogi anai ia te maʼuli ʼe natou faihala ʼaupitō

[Paki ʼo te pasina 8]

ʼE kotou māʼuʼuli anai koa ʼi te temi ʼaia?